منتديات قصايد ليل - عرض مشاركة واحدة

01-06-2012

(( في بيت ابو سعود ))

( غرفة دلع .. الساعة 8 بالليل)

كانت دلع قاعدة بروحها ف الغرفة .. ام سعود من شوي راحت المشغل وسعود طالع .. ومافي غير لينا ف البيت .. وسالم طلع مع فيصل ..

حست بزهق من قعدة السرير .. زيادة على انها جوعانة مرررة .. ما اكلت من امس ولا حطت شي ف بطنها .. بس .. مالها خلق تاكل ..
قامت من على السرير وسحبت عمرها للحمام .. تسندت على المغسلة .. وفتحت الماي الدافئ .. وغسلت فيه وجهها عشان تتنشط شوي ..

توضت وطلعت من الحمام تصلي يمكن ربي يشرح صدرها شوي ويفرج عنها همها ..

بعد الصلاة مسكت القرآن وقرأت شوي .. لين ما بدى وجهها يرجع للونه الطبيعي ..
سكرت المصحف وقامت .. غيرت ملابسها وطلعت من الغرفة ..

مشيت شوي شوي ف الممر .. ووقفت عند الدرج ونادت على لينا ..
دلع : لينااااااااااااااا.. لينا ..
جات لينا تركض : نعم ..؟؟ ها دلع بغيتي شي..؟
دلع :ما عليك امر .. بس بغيت اسألك .. وين الناس ..؟؟ البيت فاضي ..
لينا : ابوي ما يقعد ف البيت تعرفينه .. وامي ف المشغل .. وسعود طلع .. وسالم مع فيصل .. وما في غير البرنسيسة لينوووش ..
دلع : ههههه والنعم ... تراني جوعااانة وزهقانة من السرير .. ابغى احد ينسيني ..
لنا وهي تطلع الدرج : ابشري .. ما طلبتي ..

طلعت للدور اللي فوق وراحت قعدت مع دلع يتفرجون تلفزيون شوي ويسولفون .. لين ما بدت دلع تنسى سعود والمشكلة اللي حطها فيها .. بس هالنسيان طبعا لمدة مؤقتة ومردها بترجع تفكر ف السالف وتشوف لها حل ..

*************************************

(( بعد يومين .. اول يوم مدارس .. يوم السبت ))

( بيت ابو عوض .. الساعة 6 ونص )

قعد عوض ينتظر اخته ف السيارة وهو مغمض عيونه ومسند راسه على ورى .. ما شبع نوم ابد .. امس ما نام الا الساعة 2 الفجر .. لانه كان يتفرج فلم ما قدر يفوته ..

دخلت اروى وصقعت الباب بقوة : السلام
فز عوض متخرع من صوت الباب وقال : ووووووووووجع .. شوي شوي تراها سيارة ..
اروى : طيب خلاص زين .. يللا اتحرك للمدرسة .. بتاخر ..
عوض فتح عيونه ع الاخير مستغرب : سواقك انا ولا بدي غارد .. ؟؟
اروى : مدري اختار انت .. المهم يللا عوض بليز بتاخر ..
عوض : انتي انا مدري متى بتعقلين .. نعنبو ثانوية عامة وكذا هبالك .. متى بتعقلين ..!؟!؟ اشك انك بتتزوجين صراحة ولا واحد بياخذك .. مرفووع عنك القلم ..!!!
اروى بنص عين : شكرا على توقعاتك .. انا اتوقع انه ولا وحدة بتتقبلك .. لانك مرة عصبي وتسوي من الصغيرة كبيرة .. يعني من اول اسبوع طلاق .. ولا ليش اول اسبوع؟؟ من ايام الملكة بتتصل وتقول ما ابغاك وتفك الخطبة .. كااااااك

وعلى هالحال بدا يومهم الاول للمدارس والشغل بعد العيد ...

___________________________________