الجزء الثاني..
نشت مريم من الرقاد وكانت حاسه بنشاط غير طبيعي هالمره..كانت قاعده عاالمكتب ووتتصفح كتبها وتراجع الي خذوه اليوم في الكليه فجــأه تذكرت امـــها..صح انها في حياتها كلها ما شافتها بس بعد حاسه انها فاقده اعز انســانه..حاسه انها محتاجه حق هالانسانه..صح ان مرت ابوها مب مقصره وياها بس بعد ما تاخذ مكان أمها..تنهدت..الله يرحمها.. وغصـــبا عليها نزلت دمعه من عيونها ..على طول قررت تنزل تحت تقعد ويا اهلها شوي لانها حست بضييج ..طلعت من غرفتها وبندت الباب..ونفس الشي عوشه كانت توها طالعه من حجرتها ..
عوشه: مريمووو الدبه ..جان ما نشيتي من الرقاد ..بعده وقت
مريم: انا من زماان ناشه ويا ويهج..بس تميت ادرس واراجع الي خذناه اليوم..
عوشه: خخخخخ مفييييييييجه!!!
مريم: هي شو تتحرين اكيد بتفيج ..هـــذا طب مب لعب عيال..انتي شو كنتي اتسوين
عوشه: انا اقولج مستااااااانسه ما عندي امتحان ولا واجبات باجر..
مريم: وطبـــعا استغليتي هالشي ولا فتحتي كتاب واحد..
عوشه تهز راسها: نعم نعم هذا ما حصل يا اختاه..
مريم: عوشووووه انتي ثنويه عامه وعلمي بعد لازم تذاكرين اول باول يا حظــــي
عوشه: افففف مريوووم والله تعبت الاسبوع هذا كله عنا امتحانات ما عدا باجر..خخخ على سالفة باجر ..ابلة الاحياء كانت بتعطينا امتحان بس البنات قصوا عليها وقالوا عنا امتحان عربي ..جان تأجله
مريم: لا ومستانسه بعد قاصين عالابله!!
عوشه: انا ما يخصني ..البنــــات بعد تعرفينهم..والله انتي مب حاسه فينا مريووم كل يوم امتحان حشـــا ما يريحونا ابد ..يا ربيي متى بفتك !!
مريم: ان شاااء الله بتفتكيييين انتي بس ذاكري عدل الله يخليج يا عوشووه نبا نسبه حلوه..
عوشه: ان شااااااء الله يالدكتوره مريم..
تحت كانوا يالسين بو راشد وفاطمه ..
بو راشد رفع راسه فوق وشاف عوشه ومريم واقفات في الممر ويسولفون : مريم..عوشه..تعالوا قعدوا ويانا
عوشه: لا لا ابويه ما نبا انخرب عليكم القعده الرومانسيه خذوا راحتكم خخخخ
الكل: ههههههههههه
فاطمه: ههههه ابوج ويين والرومانسيه وييين خلااص شيــــب
بو راشد: نعـــــم نعـــــم..شو قلتي يالعيوز!!!..الحين انا شيبت !!!..فديتني بعدني شيخ الشباب انا ..انتي الي خلااص التجاعيد بدت تظهر على ويهج ..احم احم
فاطمه: لااااا عيوووووني انت نسيت يوم انك ماخذني كان عمري 16 سنه وانت عمرك 25 ..يالله يا بنات احسبوا ابوكم كم اكبر عني !!!
بو راشد : الريال مب بعمره يالعيوووز ..الريال بشكله ..بذمتكن بنااات شكلي مو شباااب
عوشه: خخخخ تبغي الصج ابويه ..الصراحه اذا ما كنت بنتك كنت بقردنك
بو راشد يطالع ام راشد وهم مب فاهمين آخر كلمه قالتها عوشه..
وعوشه ومريم يضحكووون على اشكالهم
مريم: صخي حسبي الله عليج يا عوشووه خلينا ننزل
عوشه: ههههههههههه يالله
ونزلوا مريم وعوشه وقعدوا وياهم ..بس عوشه لين الحين تضحك
فاطمه: عوشوووه!!!!..بس عاد صخي ..اشله هالضحك بعد
مريم: ما عليج منها عمتي اتذكرت شي وقاعده تضحك علييه
فاطمه: حشا!!!..شو هالشي الي مضحكنها هالكثر..
عوشه: هههههههه..لالا ماشي امي المهم بخبركم تدرون اليوم اتصلت في منو
فاطمه: اتصلتي في منو؟؟؟
عوشه: اتصلت في جـــــاسم
فاطمه: فدييييته ولدي شخباره والله اني متولهه عليه
عوشه: الحمدالله بخيير ..قالي بيتصل عقب بس مااتصل ليين الحين
فاطمه: اتصلي فييه الحين خليني ارمسه
بو راشد: شو اترمسينه الحين يا حرمه يمكن الولد مشغول ..خلااص قالتلج روحه بيتصل والحمدالله ان اطمنا عليه
فاطمه: زين زين خلااص..
بو راشد: المهم اليوم اتصل فيني اخوي سلطان وقال لازم انسير نتعشى بيتهم فزهبوا عماركم بعد صلاة العشا بنسير
مـــريم استانست من خاطرها ..يعني بتشوف حــــمد اليوم..
عوشه: الله ونــــاسه بيت عمي سطان بشوف حمدوووه ..وبعد عالاقل نطلع انغيــــر جو
بو راشد: مريم اتصلي في راشد قولييله ايي بعد
مريم: ان شاء الله ابوي بتصل فيه..
بو راشد: انزين عيل شكله اذن المغرب انا بروح المسيد..
فاطمه: هي يالله ونحن بنروح انصلي بعد
….......
يوسف من الصياح الي كان يصيحها ما حس بعمره الا وهو في سابع نومه حتى من غير لا ياكل شي..وعايشه كل دقيقه كانت تطل عليه وتشوفه راقد..والحين قررت انها تسير تقومه لانه اذن المغرب ولام ينش يصلي..قربت منه ويلست عداله عالسرير
عايشه بحنان: يوسف حبيبي يالله قوم بسك رقاد..
يوسف بطل عيونه بصعوبه ..
عايشه بابتسامه: يالله قوم حبيبي..
يوسف مسك ايد امه وباسها: امي سامحيني على اللي صار الظهر
عايشه: يا بعد عمري والله مسامحتنك ربي لا يحرمني منك
يوسف: امي حاس اني دايخ..
عايشه: يما قلبي..بسم الله عليك يا ولدي شو فيك ..قوم قوم خل اوديك المستشفى..
يوسف: لاا لاا مافي داعي ييبيلي قلاص ماي بس..
عايشه: ان شاء الله..
طلعت عايشه تركض صوب المطبخ..
مروه: اميييي بلاج؟؟؟!!
عايشه: اخوج يا مروه اخوج ماادري اشفيه..وهي اتبطل باب الثلااجه..وين المااااي؟؟؟!!
مروه: امي خلص ما عنا ماي ..كان فيه شوي وشربته شيخه
عايشه: يا حســـرتي على ولدي..وهي تصارخ..سيري اتحركي سيري بيت قوم ام احمد خل يعطونج دبة ماي
مروره: انزين انزين امي..
شلت عايشه تفاحه من الثلاجه وقطعتها عالسريع عشان تعطي يوسف ياكلها..لانها اتذكرت انه هو راقد على لحم بطنه من الصبح مو ماكل شي..
وركضت صوب الحجره..وقربت صوبه على طوول..
عايشه تصيح: يوسف حبيبي نش خل كل هالتفاح
يوسف: ماابغي اميي..ييبيلي ماااي
عايشه: يا يوسف الله يخلييك علشان خاطري نش وكل التفاحه الي يايبتنلك..
نش يوسف واتساند وتمت عايشه تأكله التفاح لين ما دشت مروره وكان وياها دبة الماي..
مروه: هذو الماي امي
يوسف بعصبيه: من وين يايبتنه؟؟؟!!
مروه: من وين يعني.!!!..من بيت قوم ام احمد
يوسف تم يطالع امه والشراره تطلع من عيونه..
عايشه: شو اسوي يا يوسف خلص المــاي اللي عنا وقلتلها اتسير اتيب من بيت قوم ام احمد مافيها شي يعني الا هو مــاي
يوسف: حتى ولــــو ماي..امــــي شوفي انا بدبر مبلغ بسيط وبسوي تجاره
عايشه: اي تجـــاره يا يوسف الله يهديك انت خلك بدراستك والله بيفرجــها علينا..
مروه: بس اميي نحن حالتنا صعبه ..ملينا ونحن انسير الجمعيات الخيريه وهم بعد ملوا منا ومن طلباتنا الي مااتخلص..امي ليش احنا جيه ليييش..مريولي مال المدرسه قصر علي..وكل البنات في المدرسه يضحكون علي وعلى شكلي ..دموعها بدا ينزل..امي والله حراام الي قاعد يصير فينـــا..تدرين الحين يوم سرت اييب الماي من بيت قوم ام احمد..ساره بنتها قالتلي ..استحوا على ويوهكم حتى الماي قمتوا تاخذونه منا ..صج ناس فقر..امي يرضيج!!!..يرضيج ينقال لنا هالكلام..
عايشه وهي تصيييح بحرقه: بس بس يا مروره بس..لا تعذبيييني الله يخليج..طبــعا ما يرضيني بش شو نسوي يا بنتي هاي حكمت ربـــــج ..وهذا الي هو كاتبه لنا ..
ويوسف غصبا عليه دمعت عيونه..حس انه عاجز على انه يسوي شي..خاطره يرفع اهله فوق ويسكت الناس الي يقولون عنهم هالكلام ..بس ما بيده شي يسويه..
يت شيخه تركض صوب الحجره..
شيخه: امي ..امي .. تلفووووون
عايشه نشت بصعوبه وسارت اتشوف من عالتلفون..ويوسف نش عشان يصلي المغرب ..
عايشه شلت التلفون: الو
ام احمد: الووو..
عايشه: هلا..هلا ام احمد
ام احمد: اهليين ..شخبارج عساج طيبه؟؟
عايشه: بخير ربي يعافيج..انتي شخبارج
ام احمد: الحمدالله بخيير..عندي لج بشاره
عايشه: صــــدق والله؟؟..شوووو هووو..تكفين قوليلي من زمااان ما سمعت خبر حلو
ام احمد: لقيييت لج شـــغل..
عايشه استاست: ام احمد من صجج؟؟؟!!
ام احمد: هييييه والله ..
عايشه: انزين قوووليييلي شو هالشغله؟؟؟
ام احمد: سمعيني وقالت لها ام احمد عن الشغله.......
..........................
في الكويت..الجــــو كان عجيب عندهم اليوم..وبــــــراد..ودلال حاشره امها وابوها الا يودونها الملاهي..
خديجه: اوفففف دلالوووو ..اذيتيني ..عندج امتحان باجر روحي درسي
دلال: يبــــــــا ..تكفى اقنعــــها..والله اني دارسه حق الامتحان
مشعل: اييه يالله خلنا انروح يا خديجه اتقول دارسه حق الامتحان
خديجه: واذا درجتج ما كانت زينه في الامتحان.؟؟؟
دلال: طقيني ..زفييني ..سوي فيني اللي تبينه
خديجه: خــــلااص اتفقنا..
مشعل: يالله عيل دام انكم اتفقتوا آانا بروح اشغل السياره وبنطركم ..منال ونواف بييون؟؟
دلال: هييييييييييه وناسه ..ما بخلي لعبه ما بركبها..الحين بروح أسألهم آنا
وراحت تركــــــض
خديجه: شوي شوي يمـــا عن تطيحييين..
مشعل: اتصدقين يا خديجه..احس اني صاير مهمل هالايام..من زماااان ما طلعت العيال برع..لما شفت دلال اشلون مستانسه اني بطلعها حسيت بقصوري اتجاههم
خديجه: انت الله يهداك يا مشعل ..الشغل ماخذ كل وقتك ..
مشعل: شو اسوي بعد تدرين هذا راس المال ومايصير اهمله بس ان شاء الله بحــاول اوفق بين عيالي وشغلي
خديجه: احم احم وآانا يعني مالي حق عليك
مشعل: انتي الخير والبركه..
خديجه: ههههه ربي لا يحرمنا منك يا بو نواف
مشعل: يا وييييييييلي ..من زمان ما سمعت حجي حلو ..تكفين يالله قوليلي ..
خديجه: ههههه شنو اقولك ..يالله روح شغل السياره لين مااتحر ..
مشعل: اييي يالله وانتي روحي اتزهبي
خديجه((تبا تتغلى)): اممم لا آنا ماراح ايي معاكم روح انت والعيال
مشعل: ايييه مب مشكله ..بتصل في زوجتي الثانيه بشوفها يمكن اتي
خديجه والشراره طالعه من عيونها: نعـــــــــــــم!!!!....اي زوجــــه هاااااي ومتى اتزوجـــتها وكييف و.....
مشعل يقاطعها: هههههههههه اشفيج يا بنت الحلال امزح معاااااج..وفيييه حد عنده هالقمر ويشوف غيرها
خديجه: ايييه حسبالي بعد..اتعرف اشلون خل اسير اتزهب وايي معاكم..انتوا الريايييل ما منكم امان
مشعل: ههههههههه الله يسامحج يا خديجه..يالله روحي
دلال نازله من الدري: يمـــــا ..يبـــــا..ترى منال ما راح اتي معانا ..بس نواف قال بيي
خديجه: وليش ان شاء الله ما راح اتي..؟؟..يعني تقعد بروحها في البيت!!
دلال: ماادري يمـــا قعدت اترجاها اتي معانا ..ما رضت
خديجه: خل اسير اشوفها
مشعل: ايييي يالله لا تتأخرون ..وانتي يا خديجه لا تضغطين على البنت يمكن عندها امتحان او واجبات
خديجه: لا ان شاء الله ماراح نتأخر بس مااتهون علي اخليها يالسه روحها بالبيت ..آنا بروح اشوف شنو فيها
مشعل: ايييه يالله دلووووول ..خلينا نروح احنا
دلال: يالله
فوق في حجرة منال..طبعا منــال كالعاده..مجابله شاشة الكمبيوتر وقاعده عالنت..تدخل عليها خديجه
خديجه: منال يمـــا!!
منال: هلاااااا..يمــــا
خديجه: ليش ما تبين اتين معانا
منال: يما مالي خلق روحوا انتوا آنا بقعد ..تدرين يما عندي امتحانين باجر وواجبات وايده
خديجه: والله ماادري شو اقولج يا يمــا بس قلبي ما يطاوعني اخليج بروحج في البيت
منال: لا تحاتين يما مابيصير شي ان شاء الله وآنا قاعده في غرفتي
خديجه: اييه وآنا بوصي الخدم اييون يقعدون في الصاله اللي فوق..
منال: لا تحاتين يما مابيصير شي ان شاء الله وآنا قاعده في غرفتي
خديجه: اييه وآنا بوصي الخدم اييون يقعدون في الصاله اللي فوق..
منال: خــلااص اللي تشوفينه
خديجه: يالله حبيبتي ديري بالج على عمرج
منال بابتسامه: ان شاء الله يما
وتطــــلع خديجه من عند منال..ومنـــال لا عندها امتحانات ولا واجبات بس النت ماخذ كل وقتها !!!!
اول ما تطلع خديجه من عند منال اتشوف نواف طالع من حجرته..
نواف بابتسامه عريضه: يمـــا ..شو رايج فيني
خديجه: يا ربييي شو هالجمال ..ماشاءالله ماشاءالله بسم الله عليك يا ولدي تف تف عن الحسد...اتهبل يما
نواف: ههههه ما بخلي بنيه ما بطيحها غشيانه اليوم من جمالي
خديجه: هههههه ايييه لااا اكيد بتيننهم بعد
نواف: ههههه ايييه اكيييد
خديجه: يالله يمـــا خلنا انروح ابوك ينطرنا في السياره
نواف: يالله يما مشينا
..................
..أمــــــي ..انتي اكيييد اتخبلتي!!!..انتي اف وعيــــج !!..لاا لاا مستحييييل ..انا لين الحين مب قادر استوعب اللي سمعته منج ياامي..انتي شووووو!!!..مااتحسييين فينا ..تبين اتنزلييييين كرا....
تقاطعه عايشه: يوسف!!!!
يوسف: شوووووو يوسف ...شووووو!!!..خليني اقوووول الي في خاطري خليني..امييي والله حرام عليج مب كفايه الشباب اللي يعايروني في المدرسه ..انت ما عندك ونحن عندنا..والحين بعد تبين يقولون لي يا ولد الـــ....امي ما لقيتي غير هالشغله!!!
عايشه بهدوء وحزن: قولي انت ..لقيت غيرها وقلت لا!!!..يعني شو تبوني اسوي قولولي ..يعني حسبالك واااايد سهله علي اني اسير واشتغل هاي الشغــــله ..صوتها بدا يعلى..يعني ما تعرف ان كل هااا انا اسوييه علشاااانكم ..اهم شي انها شغله شريفه واحصل فيهم بيزتييين اعيشكم فيييه..
يوسف نزل راسه وتم يصيييح ما عرف شو يرد على امــــه..يوسف ضعيف جدا في هالمواقف وما عرف شو يرد..
يوسف كسر خاطر ومروه وقربت منه ولوت علييه وقعدت اتواسيه وهي بعد ما قدرت تحبس دموعها: يوسف حبيبي ..ترى الناس ما عندهم شي غير الرمسه ..واللي مثلنا لازم مايفكر في كلام الناس..يالله عاد فديتك امسح دموعك..امـــي بتشتغل شغله شريفه عالاقل تمنعنا من انه نطلب احتياجاتنا من الناس ....
يوسف ما حس بعمره الا وطيح عمره في حضن مروه وتم يصيح بحرقه..حس انه محتـــــاج حد يخفف عنه ويواسييه و هي الوحيده اللي ترفع من معنـــوياته ..على الرغم من انه مروه اصغر عنه بسنتين بس قـــويه في هالمواقف وتقدر تتحمــل..على عكس يوسف ..وعايشه بعد كالعاده ..اتصيح من الخاطر..نش يوسف من حضن مروه وراح قرب من امه وباسها على ظهر ايدينها وراسها ولوى عليها وحط راسه على جتفها ..امييي سامحيييني الله يخليييج
عايشه حضنت يوسف وهو كان قاعد يصيح بحرقه شرات اليهال ..المفروض انه يكون اقوى من جيييه بوااايد ..وكان قاعد يحـــاول انه يهدااا بس مب قادر ..
دشت عليهم شيخه وشافتهم كلهم يصيحون ..وجان تدمع عيونها
شيخه: ماما ..يوسف...مروه..ليش اتصيحون؟؟
نش يوسف من حضن امه ومسح دموعه..
عايشه وهي تمسح دموعها: ما فينا شي حبيبتي تعالي امي قعدي عندي
شيخه : ماما انا يوووعانه وشفت الثلاجه ما في شي
نشت عايشه بصعوبه: لااا حبيبتي شي العيش اللي زاد مال الغدا وقلت بخليه حق العشا الحين بحطه لكم
يوسف: امي انا ماابغي شي..كلوا انتوا
عايشه: لا فديتك لازم تاكل انت حتى ما ااتغديت..
يوسف: والله مب مشتهي امي
عايشه: حتى لو قلتلك عشان خاطري
يوسف: خلااص فديتج علشان خاطرج بس
عايشه: يالله مروه فدييتج نشي ساعديني
مروه: ان شاء الله امي..
...........
في بيت سلطـــان اخو علي..متيمعييين كلهم في الصاله الكبيره..عائلة سلطان محمد مكون من..حمـــد عمره 25 سنه ..يشتغل في الشركه مع ابوه..أميره..عمرها 23 سنه..متخرجه من جامعة زايد من سنه وقاعده في البيت بطـــــاليه لانها مب محتاجه شغل..ابوها مب مقصر عليها..آخر العنقود حمده عمرها 17 سنه وهي ثنويه عامه كبر عوشه..وهم وايد ويا بعض..
الكـــل كان مستانس ما عدا راشد ..اللي موول مب مستلطف ولد عمه حمد..حمد من الصبح يسولف وياه وهو كله ساكت واذا رد ..ردوده كلها مختصره..وهذا كله بصوب ونظرات بنت عمه اميره بصوب..من الصبح قاعده تتطالعه ..وده يزغدهــــا..اخس شي عنده يوم حد يطالعه ..فموول ماكان مرتاح...
راشد يوقف: خلااص عيل انا بترخص منكم الحين
سلطان: ويين ويين يا راشد..اقعد اتعشى معانا
راشد: لا عمي اسمحلي مااروم ..مره ثانيه ان شاء الله
علي: مااتقولي وين تبا اتروح انت
راشد: ابوي امواعد ربيعي انسير نتعشى مع بعض
علي: الله يهديك يا راشد ..انا قايلك ان اليوم العشا عند عمك
سلطان: ما عليه يا علي خله الولد بكيفه ..مرخوص يا ولدي
راشد: يالله عيل مع السلامه
الكل: مع السلامه
اميره مبوزه: اوففففففففففففففففففففففففففففف
مريم: اشفيييييييييييييج؟؟؟
اميره: زييييييييين جيييه الحين..راااح..وانا اللي كنت مستانسه انه بيقعد ويانا اليوم..والله من الصبح كنت قاعده اطالعه ..عالاقل كنت ابغي منه ابتسامه بس..وهو ولا جنه يشوفني ..والله اسمحيلي اقولج ترى اخوج وايد خقاق
مريم: هههههههههههه..ويييييييي من حقه يتخقق جمــــــال وأخــــــلااق وشخصيه و.......
اميره تقاطعها: انزين بس بس فكينا الله يخليج..اااه يا قلبي وانا شو اللي محببني فيه غير جماله..
مريم: ههههههه الله يخسج اميرووه صخي عن حد يسمعج..
من راح راشد ..حمد استغل الفرصه وكان قاعد يأشر على اميره انها اتقول حق مريم عن الاتفاق..
اميره: اقول مريم
مريم: هاا قولييييي
اميره: اممممممم..حمد يبا يرمسج..
مريم ارتبكت وويهها احمر وحمد كان قاعد يطالعها: شووو !!!..شو اتقولين انتي ..لاا لاا استحييي
اميره: يالله عاد مريوووم شو تستحين..ولد عمج هذا ..وهي تغمز لها..وزوج المستقبل
مريم استحت ونزلت راسها تحت وما عرفت شو ترد على اميره..
اميره: ماااالت عليج ..الحين احمدي ربج انه اخوووي يحبج ويبيج ..مب انا مالت علي محد مسويلي سالفه
مريم غصبا عليها انفجرت من الضحك على اميره..
اميره: هي هي اضحكي شو وراج..المهم يالله ترى اخوي يتريا
مريم: ماادري اميره اخاف ابوي يحرج..
اميره: عمي ما بيقول شي لا تحاتييين وبعدين هذا مب ريال غريب ..هذا ولد عمج يا ماما عادي..شوفي انا وانتي الحين بنطلع بنتمشى في الحديقه وهو بيي ورانا..
مريم: ماشاءالله متفقييين على كل شي
اميره: ههههههه هييه طال عمرج
مريم: اميره والله خايفه..انا استحيي
اميره: جب لاااااا اللي يقول الحين اول مره ترمسه ..يالله يالله امشي
مريم: اففف زيين يالله
وطلعوا اميره ومريم وتموا يتمشون في الحديقه..صدت مريم وراها ..
مريم: اويييي اميره هذووو يااااي..انا برد داخل والله استحي
اميره: سكتي سكتي لا اصفعج الحين...اخوي تعال الله يخليك شوفلي صرفه وياها تراها رافعه ضغطي..
حمد: هيييه اتخسين تصفعينها وراسي يشم الهوااا
مريم منزله راسها تحت ومستحــــــيه..
اميره: خلااص عيل انا مالي مكانه اهني خل ادش داخل احسن لي
مريم سحبتها من ايدها عشان ترد
حمد: مريم ..شو تبين فيها خليها اتسير..
اميره: هييه والله صدقه اخوي شو تبين فيني خليني اسير ..وراحت اميره عنهم ..وتموا مريم وحمد مجابلين بعض..طبعا مريم منزله راسها تحت وويهها محمر..
اميره تصد عليهم: هههههههههههههههههههههههه والله اشكالكم تضحك..وتكمــــل دربها لين الصاله..
ومريم في خاطرها ..انا براويج يا اميروووه الدبه..
حمد: اشحالج مريم..؟؟
مريم: الحمدالله انت اشحالك
حمد: بخير الله يسلمج..يالله عاد ارفعي راسج خل اشوفج..
مريم رفعت راسها ..
حمد: هي جييه اوكي يالله خلينها نمشي...
مريم مستحيه: يالله..
حمد: امممم شو الدراسه وياج؟؟
مريم: الحمدالله ماشي الحال..
حمد:مشتــــــــاقلج حيل يا مـــــريم
مريم: ................
فوق في حجرة حمده..هي وعوشه كانوا يطالعون من الدريشه حمد ومريم وهم يتمشون ..
عوشه: ههههههههههه حمدووووه تعالي شوفي شكل اختي كيف صاير والله اتضحك اسميني بقطعها في البيت
حمده: هههههههه والا اخوي فديته ..شوفي شكله يهـــــبل واختج يحصلهـــا الشرف تكون زوجته
عوشه: لاااااا عيوني الا اخوج الي يحصله شرف يكون ريل الدكتوره مريم
حمده: انزين انزين ذليتيينا تراج..المهم شو رايج نزقرهم من فوق..وانزيغهم خخخخخ
عوشه: ههههههههههه هي هي فكره حلوه والله..
أميره: احـــم احـــــم
عوشه وحمده يطالعون بعض وهم قافطين..
عوشه: هاي كله من حمدوووه قالتلي اسوي جيييه
اميره: هيييه وانتي ماشاءالله عليج وافقتيها وقلتيلها فكـــره حلوه..
عوشه: حمدووه هاي سمعت كل شي
حمده: هههههههههههههه هييه
اميره: يالله خلوا عنكم هالخرابيط ونزلوا ..العشـــــا زاهب
حمده: انزين وانا بسير بزقر مريم وحمد..
عوشه: لا انا بسير
حمده: لا انا
اميره: لا انتي ولا هيي..انا اللي بسير..
وراحت عنهم اميره..ولحقوها حمده وعوشه..بينزلون تحت..راحت اميره الحديقه تزقر حمد ومريم..
اميره: اييييييه انتوا بعدكم ما مليتوا..يالله تعالوا العشا زاهب
حمد: افففففففف الوقت مر بسرعه ولا حسييت فيييه..وطبعا بعد العشااا عمي بيردكم البيت وما بشوفج الا بعد شهر..انتو موول مااتونا
مريم: هههه لا ان شاء الله..المره اليايه انتوا تعالوا
اميره: لا عيوني المره اليايه انتي بتينا بفستانج الابيض ان شاء الله
مريم: ههههه يعني بعد سنـــــه
حمد: لاا واللــــــــــه..سنـــــــــه وايد ..حرام عليج..
مريم: لين مااخلص دراستي..
حمد: انزين عالاقل ملجه الحييين وعقب العرس
مريم: يصير خير
اميره: اونه بعد تتغلى مرت اخووووي..حمد ترى ما عليك منها هاي مستعيله اكثر عنك بس ما تبا تبين لك
حمد: هههههههه فديتها والله
اميره: انزين يالله ..خلونا انسير تراهم يتريونا
حمد+مريم: يالله
..................
اليوم الثاني ..الصبح..نشت من الرقــاد وهي اتصيح ..وعلى طول فتحت سدتـــها وشلت الصوره..وتمت تتطالعها..ووتذكر ذكرياتهم ويا بعض..
بو راشد كان متزهب عشان بيروح الشركه ...وتوه صد صوبها ويبا يرمسها يشوفها قابضه الصوره واتصيح..
بو راشد: لا حول و لا قوة الا بالله..قلتلج انسييها خــــــلااص
فاطمه: مااقدر يا علي مااقدر..
بو راشد: اوهوووو لا اتخليني ايي واطر الصوره الحين
فاطمه: كــــله منك يا علي انت اللي حرمتني منها والحين بعد تبا اتطر صورتها عشان ما يبقالي شي من ذكراها..مستحيييييل..
بو راشد: اووووه فكينا الله يخليج..
ويطلع بو راشد من الحجره..وهو نازل عالدري يشوف البشكاره يايه صوبه..
بو راشد: خييير انتي الثانيه شو تبين
ماريا: بابا فيه حرمه واقفه برع ..ماادري شنو تبي
بو راشد: حــــــرمه!!!!انا بسير اشوفها الحين
وراح بو راشد صوب الباب عســـب يشوف منو هاي اللي يايه هالوقت.فــتح الباب ..
بو راشد: نعـــم اختي ..فيه شي؟؟
|