مرت الايام وبيت بو خالد في هدوءء واستقرار .. الايام تمر عليهم حلوة خاصة بوجود حمود الصغير ... ويوم ايي سعود ولد فطوم من دبي صح يدمر الدنيا بس كان عسل على قلوبهم ... خلص الكورس .. ونجحت عوشه وتخرجت من الجامعه .. وحتى بسوم وروضه نجحن في مساقاتهن في شهر سته كمل ولد فطوم تسع شهور ... وولد حمده خمس شهور وتوه بادي يحبي ...اما ولد فطوم يعلمونه يمشي ... بس كان كسول وخواف ما يطيع يمشي ... والبنات من خاطرهن وافقن انهن ما يبن يسافرن السنة عشان حمود ما يتلعوز في السفر ولانهن ما يقدرن يخلن حمده وحمود ويروحن عنهم ...
كانت فطوم عندهم في نص شهر سته ... بعد ما خلصن كلهن امتحانات وطلعن نتايجهن ... كانن قي بيت حمده يسولفن
فطوم: هاه عوشه متى بتسوين حفلة التخرج مالتج
عوشه: ما ادري يمكن اتريا شوي ... لين الشتا يوم بيخرجونا هم ... بعدين بسوي حفلة في الحديقة مالت بيتنا
بسوم: من كبرها حديقة بيتنا
عوشه: ماعليه بتكفي ... الحريم بيدخلن البيت والبنات بيتمن برع
روضه: لا والله والطبابيخ والبيادير وين بتفرينهم
عوشه: بنغطي البقعه اللي بنسوي فيها الحفلة وبنقولهم لا يون جهتنا
بسوم: صراحه ولهت على عبود بعده ما طلع .. من شهر حاجزينهم في الكلية
روضه: هيه والله ... ياللا ماعليه هانت باقي سنة وبيفتك
فطوم: والله وبيستوي ضابط .. اخافه الا يخق علينا صدق
روضه: لا فديته عبود سوالف الا
عوشه: اقول فطوم ... سارة اخت حميد محيرينها لحد
فطوم: لا لطوف اللي محيره لولد عمها
روضه: مع انها حلوة وفنانه
فطوم: الله يرزقها
عوشه: بطيع اذا خطبناها لعبود
فطوم: ما ادريبها ... بعدين تدرن ان عبود امي تبغيله وحده من بنات عموة مريم
روضه: وع الله يخليج .. سارة احسن
نزلت حمده من فوق وهي شالة ولدها وقعدت وياهم .. بس غيرن الموضوع وتمن يسولفن عن العيال ... كان ولد فطوم راقد ومخلتنه في بيت ابوها ... وقايلة حق الخدامة اذا نش قبل لا ترد اتييبه لها
**
في بيت بو منصور ... كان يالس بو منصور ويا ام منصور بروحهم لان العيال بعدهم برع ما ردوا ... كانوا يسولفون عن ولد حمده وولد فطوم والعيال
ام منصور: ترى عوشه خلاص خلصت جامعه يا بو منصور .... لو نيوز مبارك الحين يكون احسن .. شله نأجل بعد
بو منصور: زين
ام منصور: كلم بوخالد يا سلطان خلنا نيوز العيال
بومنصور: يصير خير
ام منصر: سلطان انا اكلمك الحين عشان اتيوز ولدك وانت ترد علي بكلمه وحده ... شو الحين بتكلم اخوك ولا
بومنصور: ان شاء الله .. يوم بشوفه بقوله ... بعد تامرين على شي
ام منصور: هيه ... لا تأجل العرس لين الشتا او شهر واحد ... البنيه خلصت خلاص ما وراها شي بتزهب في شهرين ثلاثه وبتخلص
بومنصور: ان شاء الله .. فيه شي بعد
ام منصور: عطهم قد ما يبون عشان يجهزون عوشه ...
بومنصور: ان شاء الله
ام منصور: وكلم ولدك محمد اذا ما سافرنا كلنا ماشي سفر بروحه
بومنصور: يا ام منصور محمد هب ياهل ويشتغل طول السنة شغل اليهد ... خليه يروح يفرج عن نفسه شوي
ام منصور: يعني ما تدريبه وين بيروح
بومنصور: خليه برايه ... يروح وين ما يريد .. ولدج ريال هب صغير
ام منصور: انا بخطب له
بومنصور: لا.. لا تخطبيله الحين ... اتريي شوي لين ما يعرس مبارك وسعيد ولد عمه
ام منصور: ليش ... مبارك بيعرس الحين ... لكن سعيد ما يندرابه بعد ما فجوا خطوبتهم
بومنصور: انتي صبري لا تستعيلين
ام منصور: واذا راح وخذها من ورانا
بومنصور: ما بيوزونه بروحه ... ليش البنت ما عندها اهل
ام منصور: ما يندرى يا بو منصور .. والله خايفه من سفره بروحه ... وروحاته ورداته صوبهم
بومنصور: ماعليج هوه ما بيعرس الا برضاج .. صبري على الولد ولا تستعيلين
وسكتوا لان مبارك واخوه دخلوا وهم يسولفون عن السيارات ... مبارك يريد ياخذ سيارة يديده ... وقاعد هوه واخوه يتشاورون في شو من السياير ياخذ ... بعد ما سلموا على ابوهم وامهم قعدوا وكلموا كلامهم
مبارك: بعدني بشاور نفسي وبقولك شو اريد
محمد: مبارك انا بسافر بعد اسبوع ... خلص الحين او خل ابوي يوقع لك الشيك ويعطيك البيزات اللي تباهن
بومنصور: شو عندكم
محمد: السيارة اللي يريد ياخذها مبارك من اسبوعين قاعد يشاور نفسه ولين الحين ما اختار
ام منصور: مب عندك ثنتين شعنه هالبطره كلها
مبارك: امايا انا من سنتين ما غيرت ولا وحده من سياراتي
بومنصور: وشو تبغي الحين
مبارك: لين الحين اكس فايف
بومنصور: لا ما تريد فورويل .. بتعرس الحين خذلك صالون
مبارك: زين شو دخل السيارة بالعرس ... انا خاطري فيها
ام منصور: صدقه ابوك عندك نيسان واستيشن بسك خذلك سيارة صغيرة
ابومنصور: محمد خذله بي ام اليديده اذا يريد ... او حتى مرسيدس
مبارك: اوهووو السيارة حقي ولا حقكم انا اريد اكس فايف
محمد: (وهو يغمز لمبارك عشان يسكت) ان شاء الله ابوي
مبارك: اوكي مب مشكله .. انا بروح ارقد
ام منصور: من متى انت ترقد من وقت .. ولا مب عايبتنك رمستنا
مبارك) :وهو يبتسم) افااا يا ام منصور منو ما يعجبه هالصوت الحنون ... كروان كروان (ضحكوا بو منصور ومحمد على ام منصور اللي كانت تبغي تواجع مبارك وحتى هيه ابتسمت غصب عنها(
ام منصور: روح ارقد ابرك عن رمستك الخايسه هاي
مبارك: افااااا يا ام منصور ... رمستي خايسه .. غيرج تترجاني اعطيها نظرة او كلمه وانتي تقولين رمستي خايسه
ام منصور: الله يعين بنت عمك عليك روح
مبارك: لا في هاي عاد ظلمتيني الله يعيني انا عليها
وطلع مبارك بسرعه قبل لا ترد عليه امه او يهزبه ابوه وراح حجرته يتريا محمد كيف بيحل ازمة انه يريد الاكس فايف وابوه يبغيه ياخذ الصالون ... شوي ودخل محمد جناح مبارك وقعد في صالته يترياه .. وطلع له مبارك من داخل
مبارك: هاه كيف بتحل السالفة
محمد: يعني بي ام صغيرة او كبيرة شو الفرق كلهن بي ام
مبارك: عاد انا في خاطري الاكس فايف
محمد: يوم قالك ابوي لا... صارت في خاطرك لو قايل امس كنا خلصنا السالفة وخذتها
مبارك: عاد اللي صار
محمد: خلاص خذ مرسيدس .. وانا بقوله اني ابغي الاكس فايف وخذها
مبارك: اهااااا ... وانت بتاخذ المرسيدس بعدين
محمد: لا انت بتعرس بتحتاج لها
مبارك: بلاكم بتعرس بتعرس اللي يسمعكم يقول باجر بعرس .. يصير خير لين العرس
محمد: المهم الحين شو لون السيارة اللي تباها
مبارك: خلاص انا بمر عليك المكتب باجر وبنتفاهم على كل شي
محمد: اوكي ... ياللا تصبح على خير بروح ارقد
مبارك: لا صبر وين تروح ترقد ... ما قلت لي وين بتسافر
محمد: ليش بتخاويني
مبارك: ونخلي ابوي بروحه لا ... بس قول وين
محمد: بروح جنيف .. من كم سنة ما رحنا
مبارك: اهااااا ... زين ماعليه
محمد: صدق ما بتي وياي
مبارك: لا واخلي ابوي بروحه .. ما يهون علي الشيبه
محمد: ان ما خبرت عليك امي .. ما تروم تخلي ابوي وامي برايها
مبارك: هاهاهاها لا بس يعني انا اقصدهم اثنيناتهم
محمد: ولا مب قادر على بعد الخطيبه
مبارك: ليش انا عندي خطيبه مثل الناس .. من شافتني استلمتني ... غيرها تقول لخطيبها حبيبي وبعد عمري وحياتي ... وانا تقولي ما عندك سالفة وشو يايبنك بيتنا ... وانت شعندك ... وفكنا من الحشرة والصدعة
محمد: هاهاهاها بس بعد بنت عمك وهالمرة انت اللي قلت تبغيها... بعدين التميز حلو.. بنت عمك غير عن كل البنات
مبارك: ماعليك صح لسانها طويل .. بس طيبه ... من تتعود على طولة لسانها خلاص
محمد: اهااا وانت تعودت على طولة لسانها
مبارك: تعودنا غصبن عنا مب بكيفنا
محمد: تذكر يوم تقول لو اخر وحده ما خذتها
مبارك: هذاك اول ... ما كنت اعرفها زين ..
محمد : والحين
مبارك: الحين اعرفهم زين من اكبر واحد لين اصغر واحد فيهم
محمد : الله يرحمك يا منصور .. تعال شوف مبارك .. اول يحن عليك عشان تروح وياه بس يوم الجمعه بيت عمي ... والحين انت اللي مطيح هناك اربع وعشرين ساعة
مبارك: يا ريال العمر كم فيه ... منصور راح ... واخر شي قاله لسعيد اتصل في مبارك
محمد: الله يرحمه
مبارك: لو شفت سعيد ذيج الليلة ... اول ما شفته انا واللي خبروني اياه الشباب .. ساعتها عرفت انه كان مب بس ولد عم ورربيع منصور كانوا اكثر من خوان ... كان سعيد وحيد وايد بعد منصور وانا كنت مثله
محمد: اذكر يوم اتواجعون لانه يودرك ويروح ويا سعيد
مبارك: (يبتسم) كنت انقهر صدق ... واطلع غيضي ايام السفر في عوشه اللي كانت تلاسني
محمد: ما كانت تدانيك يا ريال ...
مبارك: هاهاهاهاها وناسة من يوم كنا صغار وهي ما تدانيني ... بس اخر شي انا اللي باخذها وبدانيني غصب عنها
محمد: الله يوفجكم ... ياللا عاد خلني بروح ارقد عندنا دوامات باجر ان شاء الله
وطلع محمد عن مبارك بيروح يرقد .. وابتسم مبارك وهو يذكر اخوه الله يرحمه ... وفي خاطره يقول شفت يا منصور اني انا اللي مثلك في كل شي .. وانا اللي بخذ وحده من بنات عمي ... اه بس لو كنت موجود كنت بسوي اللي تباه واكثر وبروح وياك وين ما تريد ... مب بس وياك انت وسعيد... بس لو خلاص ما تفيد ... الله يرحمك يا اخوي
رجعت الذكريات لمبارك غصب عنه بالرغم من انه كان يحاول يتجاهلها ... يتذكر طفولتهم خوانه وعيال عمه ... كانوا قبل لا يتحولون الفلل يسكنون بيت واحد كبير كلهم ... حتى عمه محمد ... كانوا الخمسه دوم مع بعض خالد ومنصور وهوه وسعيد ومحمد ... وبعد ما تحول كل واحد من الاخوان بيت ... بعد خالد وتم هوه ومنصور وسعيد ومحمد ... سعيد ما كان يقدر يستغنى عن منصور من ايام ما كانوا صغار ... كان واحد من خوانهم ... وكل ما زادت علاقة سعيد بمنصور كان مبارك يبعد ... في مرحلة المراهقة بدا مبارك يتذمر من علاقة اخوه بولد عمه .. وبينه وبين نفسه اعترف انه كان يغار على اخوه من سعيد ... ورد لخواله وعيال خواله واتمسك منصور ببيت عمه بعد ما اتمسك بفطوم ...
تذكر سوالف منصور عن فطوم وعرسه اللي يريده يستوي ... والفرحة اللي فرحها يوم حددوا العرس ... تذكر المرات اللي كان يترجاه منصور عشان يروح وياه بيت عمه ... والمرات اللي كان يخليه يتصل في سعيد يعتذر له لانه يخليه يطلع وياه ...
الشي اللي رده لسعيد يوم الحادث اللي سواه اخوه ... عمره ما تمنى يكون في موقف سعيد ويموت اخوه او واحد من عيال عمه في ثبانه وجدام عيونه ... حس بعجز وضعف سعيد ... والوحده الفضيعه اللي حسوا بها هم الاثنين قربتهم من بعض ...
حتى في السفرات كان يطبع ويا ربعه ويخلي اخوه ويا ولد عمه ... كان يغيض على منصور لانه يروح ويا سعيد ويخليه .. ما كان يحب يروح وياهم حاول يتذكر اعذاره بس اكتشف انها كلها سخيفه وابتسم يوم مرت عوشه في خياله .... عوشه اللي كانت تتحمل غلاسته .. حتى جدام خوانها وابوها كان يهزئها ويصارخ عليها ... وفي كل مرة كان يتوقع انه يوم بيرد ما بتكلمه بس كانت ترد تكلمه ويعصب عليها زياده ... ما كان يكرها ... عمره ما كره عوشه ... بس كان يطلع كل الكبت فيها هيه... يتذكر ابتسامتها يوم يشوفها في الكلدور او راده الفندق من السوق ... وكيف كان يشرشحها ... ويصارخ عليها .. وهي كانت ترد عليه ...
في هاللحظه حس انه اشتاق لها ... عوشه ام لسان من زمان ما تلاسن وياها ... وتذكر انه رقمها مخزن في تيلفونه ... فدور رقمها واتصل فيها
**
في الليل في حجرة عوشه ... روضه قاعده وياها يسولفن وعوشه اتطلع في ثيابها مال الجامعه اللي خلاص ما تباهن عشان تنزلهن عند امها بالباجر تعطيهن اللي مجسومات له ... ويضحكن رن تيلفون عوشه وكان عدالها وهي بعد كانت مخزنه اسم مبارك ... اتفاجئت يوم شافت رقمه
روضه: منو متصل الحين .. وبلاج
عوشه: ما بتوقعين منو متصل
روضه: منو
عوشه : مبارك
روضه: ردي عليه .. يمكن يبى شي
عوشه: لاااااه عشان يسوي حركة ذاك اليوم
روضه: (ما كانت تعرف) أي يوم
عوشه: هاه ... لا ماشي
روضه: ردي سرعه لايكون شي مستوي
عوشه: هيه والله صدقج ... ( وردت على التيلفون ( الو
مبارك: الو... السلام عليج
عوشه: هلا وعليك السلام ...
مبارك) :يبتسم) شحالج
عوشه: الحمدلله بخير ... خير شو فيه
مبارك: لا ماشي ... بس اسلم (كانت روضه تقرب اذنها من السماعه تريد تسمع وتقول لعوشه بصوت واطي ما اسمع وسمعها مبارك)
عوشه: لا والله ... الله يسلمك ومشكور .
مبارك: هاهاهاها قولي حق روضه اللقافه هب زينه شو ينتقل بالعدوى هوه
عوشه: لا والله وانا شلي خص .. على كل سمعتك
روضه: (محتشره) لا والله اصلا انت ليش تتصل هالحزة هاه .. اخبر عليك سعيد
مبارك: هاهاها عطيها التيلفون بكلمها (عطت روضه التيلفون)
روضه : الو هاه شو تريد نعم أي خدمه
مبارك: انتي شو هاللقافه اللي عندج .. ممكن تخلينا على راحتنا شوي
روضه: عدال صاير الاخ رومانسي .... اوكي بتشوف يا بروك باجر بتصل في سعيد بخبره
مبارك: وليش باجر اتصلي الحين ... والتهي عنا ممكن
روضه: اوكي بتشوف ( وردت التبلفون لعوشه(
عوشه: هاه شو تريد ياللا قول
مبارك: ماشي ... تبين الصدق اشتقت لج ...
سمعت عوشه هالكلمه وحست بخدودها تحترق ... ولونها تحول احمر والابتسامه شقت الويه ... وروضه اتطالعها وهي مستغربه اما مبارك ... فيقول الو الو ... عوشه ... وهي كانت ساكته ما ترد لدرجة انه مبارك على باله انها بندت او الخط قطع او ما تسمعه فبند التيلفون
روضه: أي بلاج
عوشه: هاه ماشي
روضه: شو ماشي
عوشه: طالع السخيف .. بند في ويهي
روضه: كل هذا اللي صار فيج لانه بند في ويهج لو قال احبج شو بيستوي بتموتين علينا
عوشه: يقدر يقول عشان اخبر عليه خالد يغسل شراعه ( وهنيه رن تيلفونها لان مبارك رد يتصل وبعد ما ردت)
مبارك: الو ... شياج
عوشه: كيف تسمح لنفسك تبند في ويهي هاه
مبارك: انتي اللي ما ادري شو ياه تيلفونج ما تردين
عوشه: لا بندت في ويهي ... ويا هالويه بس هب منك من اللي يرد عليك
مبارك: طالع هاي .. انتي ما تفهمين اقولج ما بندت انتي اللي سكتي
عوشه: والله .... زين ... اممممم
مبارك: شو
عوشه: اقول
ومبارك يتكلم بندت التيلفون في ويهه وهي تضحك ... رد مبارك يتصل فيها وهو معصب
مبارك: انتي أي .. ليش بندتي التيلفون وانا ارمس
عوشه: انا عوشه هب أي .... انت اللي بديت
مبارك: اصلا انتي اللي ما تنعطين ويه ... ومب منج مني انا السبال اللي متصل فيج ياللا باي (وبند قبل لا ترد عليه عوشه وهو معصب عليها)
عوشه: طالع بند في ويهي وهو معصب
روضه: شي طبيعي .. الله يعين يوم بتعرسون
ابتسمت عوشه وكملن اللي يسونه .. بس هالمرة كانت عوشه ساكته وكل شوي تبتسم وهي تذكر اللي قالها اياه وروضه مستغربه منها ... بس سكتت عنها ... ويوم خلصن راحت روضه حجرتها لان عوشه قالتلها بترقد بس بعد ساعه ردت عوشه تدق الباب على روضه ودخلت عندها وانسدحت عدالها على الشبريه
روضه: شو ما رقدتي
عوشه: لا ما ياني رقاد
روضه: ليش
عوشه: بس
روضه: بلاج انتي اليوم ... شو سالفتج
عوشه: ماشي
روضه: شفتي انه فيج شي ... اقول الساعه كم ؟؟
عوشه: خمس الا شوي
روضه: قومي عيل نصلي بما انج غثه وبعدين بنتفاهم
بعد ما صلن ردن انسدحن على الشبريه بس هالمرة مشغلات الليتات ... وتمت عوشه ساكته وروضه اتطالعها اترياها ترمس ... عوشه ما ييها الرقاد الا اذا كان في خاطرها رمسه وما قالتها
عوشه: انتي ليش ما رقدتي لين الحين
اتفاجئت روضه بالسؤال وما عرفت شو تقول صح ليش ما رقدت للحين ... شو تقول لعوشه كنت افكر في اخوج اللي المفروض اخوي دون ما اعرف سبب لهتفكير الغبي اللي شاغلني من بدت الاجازة ....
عوشه: أي اكلمج انا
روضه: شوووو
عوشه: ليش ما رقدتي هاه ... تفكرين في سعيد
روضه: (منصدمه وتحاول تبين انها ما فهمت) أي سعيد
عوشه: عادي عادي قولي .. ما بخبر حد
روضه: لا والله وشو اقول
عوشه: انج تفكرين في سعيد
روضه: (وهي تحاول تكون معصبه) شو ياج انتي تخبلتي
عوشه: وليش ما تخبريني ... مب انا اختج وصديقتج وتدرين اني احبج ومستحيل اخونج او اخذلج يمكن اساعدج
روضه : وهو اخوي وانا احبه بعد
عوشه: (اتنهد ) على راحتج
روضه: انتي اللي شوفيج ياللا اعترفي ... اكيد مبارك
عوشه: اتصدقين
روضه: شو
عوشه: قالي
روضه: شووو لا يكون قالج احبج
عوشه: لا
روضه: عيل شو
عوشه: قالي اشتقت لج
روضه: لا والله ... وهذا اللي ما خلاج ترقدين ؟؟ ... صدق ما عندج سالفه
عوشه: شو ما عندي سالفه
روضه: ما عندج سالفه ... عشرين مليون مرة قالج ولهت عليج
عوشه: لا يا غبيه هالمرة ما كان يتمصخر ولا يطنز ...
روضه: لا والله .. صاير رومانسي
عوشه: هيه والله
روضه: زين وبعدين
عوشه: ما ادري ... حسيت بـ...
روضه: شو ؟؟؟
عوشه: ما ادري روضه ... جسمي قشعر... وقلبي عورني
روضه: ليش
عوشه: ما ادري .. تدرين اول مرة ادري ان صوت بروك حلو
روضه: يا ويل حالي انا ... بنت عمي تحب
عوشه: (مستحية) أي شو هالكلام عيب ...
روضه: اوووووه عيب مرة وحده ... لا وبعد تستحي ...
عوشه: روضه
روضه: هاهاهاها .. روضه بنت محمد تشهد لحظة تاريخية .. عوشه تستحي .. لا وتحب ولد عمي بعد
عوشه: هب منج مني انا اللي قاعدة عندج اوكي .. (ونشت عوشه بتروح حجرتها وروضه تضحك عليها)
روضه: هاهاها أي وين بتروحين
عوشه: (معصبة) بروح اخمد
روضه: هاهاها شو زعلتي
عوشه: لا ... (وهي تبتسم لانها بتغيض روضه بعد ما وصلت للباب) بس بخليج تفكرين بسعيد اخوي
وطلعت بسرعه من الحجرة وهي تضحك ... وروضه تزقرها بس ما ترد عليها ... شافت بسوم ناشه وواقفه عند باب حجرتها
عوشه: شو موعنج من الحين
بسوم: بروح الدوام ... شو موعني الحين يعني .. وشو هالحشرة اللي مسوياتنها (وطلعت روضه من حجرتها كانت بتلحق عوشه عشان تواجعها)
روضه: اوه انتي نشيتي
بسوم: هيه ... بس شوي شوي .. لا توعون ابوي وامي
عوشه: لا ما عليج ما بينشون الحين
روضه: (تكلم عوشه) انتي ماعليه ماعليه براويج شغلج بعدين
عوشه: (رافعه حياتها بنظرة تعجب) ليش انا قلت شي غلط
بسوم: برايكن بدخل اتغسل وابدل ثيابي ... قبل لا انزل
عوشه: اوكي .. برايج انا بروح ارقد .. ياللا الله يوفقج
روضه: وانا بعد
دخلت كل وحده حجرتها ... بسوم كانت تاخذ دورة الاسعافات الاولية في توام .. كل طلاب الطب لازم ياخذونها في الاجازة الصيفيه .. ولانها تريد تفتك منها عشان بعدين تتفيج حق الاشياء الثانية ولانهم السنة ما بيسافرون .. قررت تاخذها اول سنة لها ... وخاصة انهم ما سافروا هالصيف ... كانت بسوم تستمتع بكل لحظة من لحظاتها في المستشفى والتدريب ... وتتمنى الايام والسنين تمر بسرعة عشان تخلص وتكون دكتورة بسمة
**
في بوظبي .. سعيد في الدوام قاعد يشتغل .... ودخل عليه محمد وبعد ما سلموا على بعض قعد عنده في المكتب يسولف وياه
محمد: اقول ... قم خلنا نروح نتريق في أي بقعه
سعيد: الحين .. عندي شغل اريد اخلصه
محمد: ساعة وبنرد ... ياللا قوم انا مليت واحتاج اخذ فترة راحه
سعيد: اوكي ياللا
طلع سعيد ويا محمد ... وراحوا يتريقون في الكافيه اللي دومهم يقعدون فيه في بوظبي في المارينا مول كانوا يسولفون عن ربعهم اللي سافروا واللي ما خذوا اجازة السنة ...
محمد: علوه وسلطان بعد يمكن يسافرون اول شهر ثمانيه
سعيد: لا والله وين بيروحون
محمد: كالمعتاد ... اسبوع جنيف .. اسبوع باريس.. اسبوع لندن ... واسبوع مصر
سعيد: وليش هالعثرة كلها .. ليش ما يروحون مكان واحد
محمد: يملون ... شرايك نروح وياهم
سعيد: لا يا ريال ... مبارك ماله خاطر يسافر وما بيروح ويا اخوه عشاني
محمد: ليش محمد وين بيروح
سعيد: جنيف
محمد: كم بيقعد
سعيد: كل الصيف وبيرد
محمد: في جنيف بس ... بتلوع جبده
سعيد: هاهاها لا لا تخاف ما تلوع جبده من جنيف
محمد: يعني بيتلاقون وياه هناك ... ياللا يمكن يقنعونه يسافر وياهم
سعيد: (يبتسم) ما اظن
محمد: صدق تعال نروح وياهم ... على الاقل اسبوعين.. كلم مبارك وقوله
سعيد: ماعليه بنتشاور يوم بنرد العين
محمد: شو بياخذ مبارك من السيايير
سعيد: ما ادريبه ... كل شوي قال شي
محمد: تعال صدق .. مبارك بياخذ خطيبة حمد ... من كم يوم اسمع الاهل يتكلمون في هالسالفه
سعيد: هيه .. صدق .. انت بروحك شفت حمد كيف .. وانه ما يتعاشر ونحن هب بايعين بنتنا او طايحه في جبودنا
محمد: عشان جيه ما ايي وياكم المقهى ولا يرد على تيلفوناتكم
سعيد: خله هو الخسران ... حتى مبارك كان يريد يتعذر له بس هوه اللي مرة وحده قطع ولبسنا
محمد: بس الناس تنقد عليكم الحركة اللي سويتوها فيه
سعيد: يقولون اللي يبونه ... انت ريال وادرى بالحركات اللي يسويها حمد .. وتبغي الصدق اصلا البنيه كانت خطيبة مبارك من قبل
**
في مكتب بو خالد ... بو منصور قاعد ويا اخوه يسولفون وفي الاساس بو منصور ياي عشان يحدد موعد عرس العيال ويا بوخالد
بومنصور: هاه يا بو خالد ما تبغي نيوز العيال ... ما صار عندنا عرس من بعد عرس فطوم
بو خالد: (يبتسم) متى ما بغيت يا سلطان... الولد ولدك انت ... والبنت بنتك بعد
بومنصور: خلاص اخرهالصيف .. في اخر شهر تسعه
بوخالد: يا سلطان ... اخره لشهر واحد ... الجو حلو والناس ما بتضايج من الحر
بومنصور: ام منصور مستعيله على العرس ... انت تدري انها كانت بتيوز منصور في شهر واحد وما لحقت عليه ... وما بطيع تيوز لا مبارك ولا محمد في شهر واحد
بوخالد: اذا على شهر واحد ما عليه ... بنيوزهم شهر 12 او ثنين
بومنصور: ما عليه يا خوي في الاخير كلمتك انت اللي تصير
بوخالد: لا يا سلطان .. مب كلمة منوه اللي تمشي ... انت خل ام منصور تكلم نورة ويشوفن الوقت اللي يبنه .. وعوشه يبالها زهاب بعد
بومنصور: خلاص يا خوي
**
حمده من يابت ولدها واعتدل وضعها ويا ريلها وهي في عالم ثاني .. اكتشفت بالفعل شو هي السعادة والحب .. السعادة بالنسبة لها كانت في ابتسامة هالبيبي الصغير ومناغاته ورضى ريلها ... سعادتها كانت يوم يكون خالد قاعد وياها يلاعب ولدهم او يبتسم ويسولف وياها... وبالنسبة لخالد من ياه الولد تغير في معاملته لزوجته وحس بمسؤولياته كأب وزوج ... اذا كان يريد يربي ولده صح لازم يكون هوه اول صح مثل ابوه ... واذا يريد ولده يكبر ويطالع عليه... لازم يكون مثل وقدوة صالحه لولده .. عشان تكون صورته حلوة في عيون ولده ... صارت اغلب طلعاته ويا ابوه ويرد البيت ويا ابوه ... بطل سالفة السهر بروحه في الميلس او حتى عند واحد من ربعه ... واذا بيتأخر يتصل في حمده يقولها ... والاحلى من كل هذا كله انه كان يطلع ويا حمده بروحهم دون حمود يتمشون او يوديها السوق ... السوق هالمشوار اللي من تزوجته حمده ما جد وداها غير الدريول وروز مع وحده من البنات ... صبرها وطولة بالها عليه غيرته .. حست انه بالفعل استحق كل لحظة حب حبتها اياه وهو غافل عنها ... لانه عوضها كل الايام اللي عاشتها محرومه من عواطفه يوم اكتشف من نفسه ان حرمته الانسانه اللي تستحق مشاعره ... كان عمر ولدهم ست شهور... وكان متختخ وعيونه حلوة وواسعه ولونها عسلي مثل عيون أمه ...
بعد المغرب يوم الخميس خالد قاعد يلاعب ولده في الصالة ... وحمود يضحك بصوت عالي ومستانس ويا ابوه .. اما حمده فكانت تبدل ثيابها لانها بتطلع ويا خالد بيتعشون برع وتتريا عوشه وروضه اين عشان تخلي حمود عندهن ... وهي نازلة من فوق كانت تسمع ولدها يضحك وخالد يسولف وياه ... وتبتسم وفي خاطرها تتفدى الاثنين ... وصلت الصاله وشافها خالد
خالد: ياللا طلعنا عشان ما نتأخر برع
حمده: لا لحظه يوم بين البنات بنروح
خالد: (يبتسم) ليش بنستأذن منهن
حمده: لا عشان حمود ... شو بنخليه بروحه
خالد: (يشوف ولده وهو رافع حاجب ( شفت حمودي ماماه اتحراك ياهل ... تتريا عماتك اين عشان يقعدن وياك ... قولها انا ريال ما اقعد ويا حريم .. كلمي عمي عبود يشلني الميلس
حمده: هاهاهاها زين والله من الحين ميالس ... لا استريح ماشي ميالس
خالد: (وهو يقلد صوت اليهال) لا لا ما ليد انا ثعلت ... ما توديني ميلث ... ما ليد بنات ما ليد بنات
عوشه : (بعد ما دخلت هي وروضه) حد ما يريد بنات مسود العين ونك .. الله يستر يا حمود يوم بتكبر ما بتخلي وحده ما بتعرفها .. عاد زمنكم بيكون الجيل فلتان بالقو
حمده: بسم الله على ولدي
روضه: بعدين يا اخ حمود يسدك شرف ان احلى واجمل بنت في العالم والكون رضت تقعد وياك وتكون لك بيبي ستر ... خلني اعرس يا ولد حمده ان ما خليتك تشل عيالي واطلع اتحوط انا وريلي مثل امك وابوك
خالد: عرسي انتي اول ... ياللا حمده خلينا نطلع .. وصلا خدامات حمود ..
عوشه+ روضه: شوووو
خالد: اوووووه اقصد عمة وخالة حمود الغاليات الغاويات الطيبات .. النفاعات راعيات الواجب
عوشه: (وهي مادة ايدها) ايدك يا حبيبي على خمسمية
خالد: ليش
عوشه: كم ساعة قعدنا ويا ولدك وانت تطلع ويا حرمتك ونحن نحرم عمارنا من الطلعه والقعده في هدوء حجرنا
خالد: طالع هاي المادية حشا ... توني اقول نفاعه ... وطيبه ... طلعتي شجعه وطماعه
عوشه: برايني
خالد: خلاص قعدي ولا تشغلين التلفزيون ولا تطالعين في قنوات الشوتايم في بيتنا وروحي بيت ابوج اللي امج مب طايعه تركب لكن الشو تايم
روضه: اقول خالد ذليتنا على هالسالفه ... ياللا روحوا روحوا تأخرتوا
حمده: اقول انا مرضعتنه من شوي .. بس اذا صاح سوله شاي في المرضعه .. او عطنه سيرلاك
عوشه: واذا ما سكت
حمده: بيسكت .. واذا ما سكت اتصلن بنرجع
روضه: ان شاء الله اوامر ثانيه
عوشه: الله اذا ملينا منه بنقرصه وبنخليه يصيح وبنتصل بنقول ما طاع يسكت
حمده: حرام عليج .. يهون عليج حمود تسويبه جيه
خالد : قرصيه وبراويج والله اعضج
عوشه: عشان هالمفعوص بيعظني
خالد: شو لاقطينه من الشارع تعضينه ..
عوشه: لا يايبينه من المستشفى
حمده: اقول اذا تكرمتن وسمح لكن وقتكن عطنه تفاحه بالملعقه
روضه: هذا اذا طاع
خالد: ياللا حمده .. كل ما طلعنا سمعتيهن هالموال .. اكيد حفظنه
عوشه: ياللا روحوا استانسوا وخلوا الاعمال الشاقه علينا
حمده: فديت حمودي والله الولد مطيع وهادي عمره ما كان اعمال شاقه بس هالله هالله فيه
روضه: ياللا اللي يشوفج يقول بتروحين اسبوع هب هن ساعتين ... ياللا روحوا
حمده: اوكي ياللا مع السلامه ...
خالد: تبغن شي من برع
عوشه: سلامة راسك حبيبي ... استمتعوا بطلعتكم
خالد: ان شاء الله
روضه: بحفظ الله
طلع خالد ويا حرمته وتمن روضه وعوشه ويا حمود اللي كان ساكت ويلعب بروحه والبنات يطالعن فلم في التلفزيون .... ويوم صاح حمود غيرله بامبرز وعطنه شاي يهال ورقد ... وهن في بيت خالد اتصل سعيد في عوشه لانه رجع البيت وما حصل حد في الصالة ...
سعيد: وين انتن
عوشه: في بيت خالد
سعيد: ليش محد في البيت
عوشه: بسوم فوق في حجرتها .. وبعدين خالد وحمده طلعوا ونحن ويا حمود
سعيد: اهااا ... زين تعالن البيت ... انا ومبارك بروحنا هنيه
عوشه: هاه مبارك ... (تذكرت سالفة التيلفون وخافت انه يكون خبر سعيد قبلها)
سعيد: هيه
عوشه: لا ما نقدر نيكم الحين حمود رقد وما نقدر نخليه بروحه
سعيد: خلنه عند روز
عوشه: حمده ما تحب
روضه: قوليله ايون هنيه
عوشه: تقولكم روضه تعالوا انتوا بيت خالد
سعيد: (يكلم مبارك) تعال نروح بيت خالد ... هن هناك
مبارك: لا يا ريال .. الريال محد شو اروح بيته
سعيد: مبارك ما يريد
عوشه: يا الله وليش ان شاء الله .. بيت ولد عمه ومحد اصلا في البيت غيري وغير روضه وحمود وروز ... شو يستحي
سعيد: هاهاهاها لا خالد محد شو يدخل بيته داخل
عوشه: بلا سخافه انت وياه شو الريال محد ... هالريال اخوك وولد عمك (يرت روضه التيلفون من عند عوشه)
روضه: شو المشكله الحين تبغونا نطرش لكم بطاقة دعوة رسمية عشان اتشرفونا هنيه
سعيد: هاهاها لا ما يحتاي .. بس مبارك ما يريد شو اسويبه ايره غصب
روضه: عطني اياه وانا بخليه ايي
سعيد: اوكي صبري شوي (يكلم مبارك) دوك كلم روضه تبغيك
مبارك: الو
روضه: هلا والله بروميو ... شحالك قيس بن الملوح
مبارك: هاهاهاها شعندج انتي الحين
روضه: ما قلت لسعيد للحين سالفة نص الليل ... تعال لا اخبره الحين
مبارك: لا والله تهديد هوه
روضه: هيه جوليت اترياك هنيه (كفختها عوشه على ظهرها وهي تقول جوليت في عينج)
مبارك: (وهو يتكلم جد) ما يصير يا روضه عيب ... خالد محد
روضه: تدخل عيل بيت عمي يوم محد فيه
مبارك: هذا غير بيت عمي انا بعد ...
روضه: شوف لا تغديلي الحين شريف روما تعال هنيه خالد ما بيقول شي .. حميد دخل بيت خالد وهو ريل فطوم وانت خطيب عوشه وولد عمه ما بيقول شي
مبارك: حميد دخل بوجود راعي البيت
روضه: وسعيد اللي عدالك شو ... مب بيت اخوه .. تعال انت ونحن بنتحمل المسؤولية كامله
مبارك: اوكي خلاص بس ما بنطول انا بطلع قبل لا يرد خالد ما احب احط نفسي في هالموقف
روضه: والله اللي يسمعك ما ادري شو بيقول ... تعال الله يخليك
مبارك: اوكي (ورد التيلفون على سعيد)
سعيد: هاه خلاص
روضه: هيه ياللا تعالوا .. بس عن الحشرة حمود راقد
سعيد: هاهاها عيل خلاص ما بني اذا نحن حشرة
روضه: اوهوووو الحين نحن اقنعنا هذاك .. هذا بيسويلنا سالفه بعد
سعيد: مالي خص اقنعيني انا بعد
روضه: امممم بعدني ما مسكت عليك ذله عشان اقنعك
سعيد: وشو ماسكه على مبارك
روضه: (تبتسم) تعال وبخبرك
سعيد: اممم اقنعتيني خلاص .. الحين بنيكم
روضه: نترياكم
بندت روضه التيلفون عن سعيد وزقرت على روز عشان تسوي عصير حق عيال عمها ... وبالمرة اتييب دلة القهوة والشاي وحليب البوش ... وبعد دقيقتين دخلوا مبارك وسعيد من الباب اللي على طرف اللي مواجه باب بيت عمها الخلفي
مبارك+ سعيد: السلام عليكم
عوشه+ روضه: وعليكم
سعيد: شحالكن
عوشه: (اللي ويها احمر من دخل مبارك بعد اخرمكالمة بينكهم) الحمدلله بخير
روضه: ليش رادين البيت من وقت
مبارك: وين حمود بشوفه
عوشه: لا الله يخليك راقد ... خله في حاله
مبارك: الا بشوفه
عوشه: قصدك الا بوعيه
مبارك: هاهاهاها يعني اريد اسمعه يصيح
روضه: شرير
سعيد: صراحه نحن رادين نروايكن سيارة مبارك اليديده ...
روضه: مبرووووك
عوشه: مبرووك بس شو خذت
مبارك: خذت مرسيدس كوبي ...
عوشه: (رافعه حياتها ) والله ... ليش ما خذت فور ويل هالمرة
مبارك: (وهو يبتسم لانه ناوي يحرجها) على شرفج هالمرة وعشان خاطرج .. عشان يوم بنعرس ما تلعوزين بالفور ويل وتتخيرين السيارة اللي تبينها يوم تطلعين (عوشه ويها احمر وسكتت اما روضه وسعيد فتموا يضحكون)
عوشه: (وهي تحاول تكون طبيعية وتدور رد لاذع) لا والله ... عيل كان المفروض تتصل تسألني شو من السياير اريد ... يمكن كنت ابغي بي ام
مبارك: ليش انتي تعطين الواحد فرصة يتكلم (وهنيه تذكرت عوشه اتصال مبارك وخافت انه يخبر سعيد قبلها وهي اللي تنحط في موقف الاتهام فقررت تبدا هيه )
عوشه: وليش ما قلت يوم اتصلت ذيج الليلة هاه ...
سعيد: (عاقد حياته) أي ليله (روضه تبتسم ومبارك ويهه احمر وانحرج من ولد عمه اما عوشه فكان في عيونه نظرت اتهام)
مبارك: ليش انتي عطيتيني فرصة بندتي في ويهي
سعيد: وليش انت اتصلت
مبارك: الله خطيبتي وابوي قالي لا تاخذ فور ويل عشانك بتعرس وبما انه الشور طلع من ايدي قلت اشاورها بس لا تخاف اختك ذيبه بندت في ويهي
عوشه: يعني انت اللي ما بندت
مبارك: (يقول في خاطره براويج بس صبري يعني تردينها) انتي اللي بديتي
عوشه: لا انت اللي بديت
مبارك: تيلفونج خربان انا ما بديت
عوشه: لا والله تيلفونك اللي خربان ومعفن
مبارك: لا الشيخه انتي اللي تيلفونج من العصر الحجري
سعيد: أي خلاص خلاص بس عن الحشرة
روضه: بينش حمود وانت وياها اللي بتردون ترقدونه
مبارك: (يبتسم) اوكي خلاص
عوشه: خلاص خلاص بس مب انا اللي بديت
مبارك: (عشان يحرج عوشه) امي قالت لي انهم حددوا العرس شهر تسعه يعني بعد شهرين (بس الكل تفاجأ حتى سعيد وعوشه انصدمت مب معقول يحددون شي ما يقولولها شو تعرس بعد شهرين او شهر ونص وهي بالمرة ما سوت شي )
سعيد: لا لا
روضه: تحلم انت وايد
عوشه: (والصدمه على ويها) تجذب
مبارك: والله ما اجذب ابوي كلم عمي في المكتب من يومين
عوشه: شو قال ابوي (سكت مبارك وهو يبتسم ومستمتع بالصدمة على ويه عوشه اما الباقين فيتريونه يرد) قوول
مبارك: اللي يشوفج يقول ما تبيني .. لا يكون غيرتي رايج
عوشه: مبارك ياللا بلا سخافه تكلم
مبارك: اول ليش منصدمة
عوشه: (بعصبية) مبارك قول
سعيد: شو قال ابوي
مبارك: ما اتفقوا على شي وعمي يبغيه في الشتا (ارتاحت عوشه بعد هالجملة ولاحظ مبارك الراحة على ويها) وفي الاخير امي وعمتي بيتشاورن وبيشاورن عوشه وبيقررون .
وردوا يسولفون شوي ... اما مبارك فكان يفكر في صدمة عوشه يوم خبرها ان العرس تحدد كان يتوقع انها تنحرج بس الصدمة والخوف على ويها صدمته هوه .. معقول عوشه لين الحين ما تبغيه او في مجال انها ترفضه مرة ثانيه ... المرة الاولى كان رفضها فيه راحه للطرفين بس هالمرة .. مبارك تعود عليها وصار يشوفها كخطيبه وزوجة اكثر من بنت عم وبس ... حتى بعد هالنقاش كان يحاول يكون طبيعي بس كان شي يمنعه موجة حزن في انه لليوم ما قدر يكسب بنت عمه ... مبارك اللي عذب غيرها واللي للحين غيرها اتمنى انه يرد حر مب مرتبط عشان يكون لها امل وياه ... ما قدر يكسب بنت عمه ... الشي اللي ما كان مبارك يعرفه ان صدمة عوشه مب خوف من انها تاخذه لانها بدت هيه تميل له ... وتتخيل حياتها وياه وفي بيت عمها ... الناس اللي يحبونها وتحبهم ... صدمتها كانت ان شهر ونص او شهرين ما بيكفنها تسوي الشي اللي تباه لعرسها ... خاصة ان اول عيال عمها اللي بيعرسون واكيد لازم يكون عرسه مب لانه بياخذها هيه بس حتى لو خذ غيرها لازم يكون العرس عشان مبارك ليلة من الف ليلة وليلة ... عشان مبارك تريد العرس يكون ولا اروع .. قعدوا نص ساعه بعد
مبارك: سعيد ياللا خلنا نطلع تأخرنا على الشباب في المقهى
روضه: شو وين ما شفنا السيارة
سعيد: هيه والله تأخرنا ... اقول بنرد في الليل ... وبتشوفن السيارة
عوشه: وبنتمشى فيها وياكم (طالع سعيد مبارك عشان يرد)
سعيد: (يبتسم) ان شاء الله
طلع مبارك ويا سعيد رايحين المقهى وتمن عوشه وروضه في بيت خالد يكملن الفلم اللي كانن يشوفنه ... بس اتصلت حمده على تيلفون روضه اتخبر عن ولدها
روضه: الو
حمده: الو ... شحالكم
روضه: الحمدلله .. شحالكم انتوا
حمده: بخير ... اقول اخبار حمود صاح ولا ساكت
روضه: لا راقد
حمده: (شهقت) حرام عليكن ما بيرقد في الليل ... بتمين انتي وعوشه في الليل عنده وانا وريلي بنرقد
روضه: الله يخليج انتي ردي اول ... ومن متى ما تمينا وياه في الليل من بدت هالاجازة
حمده: هاهاهاها فديته والله
روضه: متى بتردون
حمده: بنروح السوبرماركت تبن شي ولا
روضه: لا انا ما اريد شي .. صبري بسأل عوشه (تكلم عوشه) خالد وحمده بيروحون السوبرماركت تبين شي
عوشه: كل انواع الحلاوة والجبسات
روضه: سمعتي
حمده: هيه ... بس ما تبن شي ثاني
روضه: هيه نريد أيس تي
حمده: اوكي ياللا مع السلامه
روضه: باي
بندت روضه عن اختها وقعدت تطالع التلفزيون هيه وبنت عمها ... اللي كان تفكيرها في مبارك ولد عمها وموضوع العرس
|