صبا وخلاص مضطره ترضخ لطلبه وتروح معه مع ان الود ودها ماتجي والحيا بيذبحها : خلاص مازن اللي تشوفـ ..
قبل ماتكمل جملتها ماحست الابيد لمياء تسحب الجوال منها بقوه وتحطه على اذنها وبدون مقدمات تكلمت لمياء مع مازن : الو مازن .. انا لمياء وشخبارك ؟
مازن واللي استغرب من صوت لمياء معه فجأه بدون ماتقوله صبا شي بس رد : هلا لمياء .. انا الحمدلله طيب .. وانتي عساك طيبه ؟؟
لمياء وهي تناظر صبا بخبث ونذاله : انا بخير .. بس مازن بغيت اقولك شي صغير يخص صبا .. وهي ماقالت لك عنه ..
مازن وباهتمام : وشو هالشي ؟؟
لمياء لفت وعطت صبا ظهرها وقالت بصوت واطي مايسمعه الا مازن : وش السالفه .. اليوم جت لصبا بنت وسألتها انتي متزوجه ولا لا ؟؟ تدري وش قالت ؟؟
مازن : اكيد قالت ايه ..
اما لمياء ضحكت بصوت عالي وبعدها قالت : ياليتها قالت كذا .. الا قالت العكس تخيل قالت لها .. لأ .. وبعدين سألتها البنت مره ثانيه .. هي مخطوبه .. ونفس الشي جاوبت عليها بلأ .. لا وبعد تقولنا وناسه يسير لها زوجين بدال الواحد وزياده الخير بركه .. ها وشرايك فزوجتك المصون ..
اما مازن قال لها : وتتوقعين وش قصدها من انها تقول لأ .. ؟؟ يعني ناويه تاخذ غيري ها .. اوريها هالصبا .. عطيني اياها وانا اتفاهم معها ..
وقبل ماترد لمياء .. اخذت صبا الجوال منها بالقوه وقالت للمياء : بس كافي كلام معه .. وش قلتي له ؟؟
لمياء : اسأليه وهو يجاوبك ؟؟
صبا حطت الجوال على إذنها وقالت : الو .. مازن ..
مازن قال لها بحده وصوت حازم : صبا .. الساعه 12 اذا ماشفتك واقفه برى ماراح يصير لك طيب ... مع السلامه ..
وسكر بوجهها السماعه .. اما صبا نزلت الجوال من اذنها وتمت تناظره بعين مصدومه واذن مندهشة من اللي سمعته .. اول مره مازن يتكلم معها بهالحده والشده ... ليه ؟؟ هي وش سوت ؟؟ اكيد .. أكيد لمياء لها يد في تغير حالته معها ..
على طوول ناظرت لمياء بعين حاقده وقالت لها : وش قلتي له ؟؟ وغير حاله معي كذا فجاه .. !! تكلمي ..
لمياء بعدت عنها ومشت تسبقها ووراها صبا تنتظرها تتكلم : قلت له كل اللي قلتيه اليوم مع بسمه .. واظن من حقه يعرف اللي جنيته من ورى غبائك هذا ..
صبا وقفت مكانها .. تبي تستوعب اللي صار .. يعني .. يعني مازن عرف بالمزحه اللي سوتها .. والحين بيحسب انها ماتبيه وتبي غيره وودها هالشي ..
ياويلي ... قالتها بقلبها قبل ماينطق فيها لسانها ... وهي متوقعه ان اليوم ماراح يمر على خير .. شلون واللي صار مستحيل يعديه مازن .. صح تافه والموقف كان بسيط ومايستاهل .. لكن حتى ولو .. كلمات بسيط لها معنى كبير ممكن تاثر في قلب أي انسان يحب من كل اعماق قلبه واي شي صغير ممكن ياثر فيه ويجرحه ... ومو أي قلب يستحمل هالشي ويعديه .. فيه قلوب ومشاعر مستحيل تتغاضى عن كذا بدون تبرير واعذار.. والأكيد ان مازن قلبه مثل هالقلب .. والأكيد بعد ان صبا مقتنعه انها غلطت بسواتها ولازم تصلح غلطتها واللي ظنتها تافهه .. ولازم تعتذر من مازن وتشرح له ان كل كلامها .. مزح وماكان قصدها شي ...
قربت منها لمياء بعد ماحست انها سرحانه فقالت لها : صبا وشفيك ؟؟ شكلك سرحتي هييه ..
انتبهت صبا للمياء وقالت : هااه .. وش كنتي تقولين ؟؟
لمياء : وشفيك حالك موب عاجبني ..؟؟
صبا : من بركات وجودك بحياتي يا اختي الغاليه .. ماشاء الله عليك مستحيل تمسكين لسانك ولازم تعلمينه كل شي يصير .. شوفيه الحين اكيد زعل ولازم اراضيه وافهمه .. والسبب انتي ماشاء الله ماتقصرين آبد ..
لمياء : شف الحين حطتها عليّ وانتي اللي غلطتي من البدايه ومزحتي هالمزحه السخيفه .. وانا بدوري بس قلت له عشان يعرف كل شي يدور حوله ويعرف كل اللي قلتيه وسويتيه .. لازم يعرف كل شي عنك .. هذا زوجك وشريك حياتك ، وحياتك انتي تشكل حياته .. والعكس ..
صبا : واذا زوجي .. بيدخل بكل صغيره وكبيره حلوه ذي !!
لمياء : ماعلي منك .. انا اللي علي سويته .. وهذا رأيي .. لازم يعرف مين ماخذ؟
صبا بسخريه : وانتي شايفه انه ماخذ جنيه ولا شيطان عشان تقولين كذا .. ولا خليني زانيه بعد .. وبعدين لمعلوميتك .. ترى مازن اكثر واحد عارفني ويعرف كل شي فيني .. يعني كلامك هذا ماراح يأثر لا علي ولا عليه .. فهمتي .. ؟
لمياء : اقوول تراني ماني فاضيه لك ولمازن حقك هذا انا بروح للبنات تأخرت عليهم ..
راحت لمياء لصديقاتها .. بس صبا بتلت مكانها واقفه وترن باذنها كلمات لمياء ( لازم يعرف كل شي عنك ، هذا زوجك وشريك حياتك ، لازم يعرف مين ماخذ )
قالت لنفسها : هو صدق كل وحده متزوجه لازم زوجها يعرف عنها كل شي ويدخل بتفاصيل حياتها كلها .. بغض النظر عن اللي صار لي ، يعني بشكل عام ،وبعدين لمياء تقول ان حياتي تشكل حياته .. معناته ان كلامها صح وكل شي يسير لي صغير او كبير .. مهم او غير مهم .. لازم يكون مازن يعلم فيه .. وبالمثل هو اكيد بيقول لي كل شي يصير معاه .. آآآه انا مادري كيف راح اتزوج واعيش تجربه جديده بحياتي ما اعرف عنها ولاشي .. ما اعرف عن مبادىء الحياة الزوجيه الا القليل .. بس ما ادري هل الحياة نفسها بتعلمني من تجاربها او لازم اكتشف كل شي بنفسي ..
تنهدت ... واطلقت آآآآه مكتومه من صدرها .. شربت من الماي اللي كان معها وبلت فيه ريقها .. ومشت تبي تروح عند صديقاتها .. لكن قبلها راحت للجهه اللي كانوا بسمه ومشاعل جايين منها .. راحت عندهم ولقتهم وشرحت لبسمه الموقف اللي صار واللي قصدها منه المزح وبس .. وتفهمت بسمه اللي صار ..
ورجعت هي لصديقاتها وعقلها مشغوول بالتفكير ... بسمه وقلت لها اللي صار واني غلطت .. بس باقي مازن .. المهمه الصعبه .. بالنسبه لها
وصلت عندهم وكانت ساكته ما نطقت بحرف .. قعدت معهم جسدا بس عقلها كان بعالم ثاني من التفكير بعذر مقنع تقنع فيه مازن .. ويرضى عنها ..
.................................................. ...............
على الساعه 12 الا خمس .. كانت صبا الى الان غارقة ببحر افكارها وسط صديقاتها بين اللي كانوا يراجعون بعض الامور للاختبارات .. وبين اللي كانت تسولف .. اما هي كانت ساكته طول الوقت .. الين ماانتبهت على الساعه وشافتها باقي 5 دقايق ويجي مازن ..
قامت من مكانها بسرعه واتجهت وين ماحطت شنطتها والعباية .. اخذت عبايتها وشنطتها ورجعت للبنات تسلم عليهم ...
وهي تسكر العباية قالت للبنات : يلا بنات مع السلامه انا بطلع ..
رنا : على ويين ؟؟ تونا اقعدي معانا شوي ..
صبا : والله ماأقدر اعذريني ..
لمياء : صبا مين اللي بيوديك ؟؟
صبا التفتت عليها وعلى وجهها ابتسامه حزينه : اللي بيوديني هو مازن ..
استغربت لمياء حزن صبا مع انها توقعت تكون طايره من الفرحه .. معقوله عشان اللي صار .. ومازن للحين شايل بقلبه ..
صبا رجعت مره ثانيه تناظر ساعتها واخيرا ودعت البنات بيدها والتفتت تبي تمشي .. وقبلها وقفها صوت لمياء : صبا ..
التفتت لها صبا بنفاذ صبر وقالت : ها لمياء وشو ؟؟ يالله بسرعه الله يخليك بتاخر ...
لمياء ابتسمت لها كانها تشجعها وقالت : لاتنسين تجين المزرعه اليوم بنتظرك اوكي ..
صبا التفتت وقالت : اوكي ..
بعدت عنهم صبا .. وعين لمياء كانت تناظرها وقالت بنفسها : آسفه على اللي سويته يا صبا ماتوقعت مازن لهالدرجه بيكبر الموضوع وبيزعل منها جد ..الله يعينك ..
..................................................
|