في بيت ابو فيصل ، الكل كان قاعد بالصاله ، ابو فيصل وام فيصل كانوا يتقهوون ويسولفون بامورهم ، اما صبا كانت قاعده على الكنبه ومندمجه تناظر عرض ازياء بالتلفزيون وعيونها عليه ، اما فيصل كان جالس قبالها يقرى جريده ، ومحمد الصغير منسدح بالارض يناظر تلفزيون مع اخته ...
بعد دقاايق انتبهت صبا لفيصل وهو يرمي الجريده جنبه ويتأفف وهو زهقاان .. شافته يناظرها بدون هدف ، عطته نظره استخفاف وسخريه ورجعت تناظر عرض الازياء ..
فيصل استغرب من نظرتها ذي .. سلامات !! خير !!
فيصل : اقوول صبا غيري ذا اللي انتي حاطته وشوفي لنا شي ثاني زيين ..
صبا طنشت ولا كان احد يناديها ...
فيصل : هيييي يا اخت تراني اكلمك ..
ونفس الشي لاحياه لمن تنادي .. ما حطت عينها عليه ولا لفت راسها له ..
فيصل بدى يعصب منها : يااهوووه صبا ووجع ردي ..
اخيرا لفت عليه صبا ببطأ وبرووود شديد وقالت بهدوء : خير .. وش تبي ؟؟
فيصل : اقول غيري هاللي حاطته ، هالقناه دايم تشوفينها بهالوقت .. ما مليتي منها ... !! حطي شي زين وسنع نناظره موب ذا الله يخلف عليك ..
صبا ناظرت الساعه اللي فوق التلفزيون ، بعدين رجعت تناظره وقالت ببرود : شف استاذ فيصل الحين الساعه 9ونص الساعه تعال تكلم .. عرض الازياء بياخذ له نص ساعه عشان يخلص بعدين بتابع لي مسلسل بعدين تفضل شـف اللي تبي .... سمعت ..
فيصل قام وقرب من عندها وهو يقول : والله يا انسه صبا انتي آخر وحده تفكرين اني بامشي على كلامك وأسمعه .. انا فيصل اشوف اللي ابي بالوقت اللي ابي ولا احد يرفض كلامي او يخالفه فاهمه .. ويالله الحين عطيني الريموت قبل ما استعمل القوه معك ....
صبا : احلف ياشيخ خوفتني ... رح بس استقوى على احد غيري ، حركتك ذي ماتخوفني ولاتهز فيني شعري .. فآآآآآآآآهم ..
قاطعهم صوت محمد وهو يصرخ فيهم : بــسسسسس اسكتوا خلوني اعرف اشوف ازعجتوني ...
لف عليه فيصل وقال بسخريه : ياربيه اسفين حضرتك ازعجناك .. ، اقوول بس انقلع يلا .. هاذي اخرتها هالنتفه يرفع صوته عليّ ....
صبا ناظرته باستخفاف وقالت : فيصل حبيبي ماتلاحظ انك ماخذ من نفسك مقلب ،،، طول الوقت .. لا احد يرفع صوته عليَ ، اسمعوا كلامي ، سوو كذا ، ... ليش ان شاء الله تحسب نفسك الوليد بن طلال شايف نفسك علينا ؟؟
ام فيصل انتبهت لمناقرتهم وقالت : هوو .. صبا ، فيصل .. وراكم تتهاوشون هذا وانتم الكبار تسوون كذا وش بقيتم لمحمد ؟؟ اعقلوا واهجدوا بس ابي اقولكم شي
صبا : سمي يمه قولي وشو ؟؟
قامت صبا من مكانها وراحت جلست جنب امها ، اما فيصل رجع مكانه يسمع امه وش تبي تقول ؟؟
ام فيصل : ايه كذا زين اهجدوا بمكانكم وبلا حركاات بزاريـن ..
صبا : يماااه ماعليك مننا الحين .. انتي وش كنتي بتقولين ؟؟؟
ام فيصل : قبل ما اقول لكم ، بسألك صبا متى اختبارك الاسبوع الجاي ..؟؟
صبا : اختباراتي الاسبوع الجاي .. بتكون الاحد والثلاثاء المواد الصعبه اما الماده السهله بتكون يوم الاربعاء مايبيلها شي مذاكره بسيطه وخلاص .. درجه كامله باذن الله ..
ام فيصل : ان شاء الله اجل اذا اختبارك الاحد بيوافق طلعتنا ، شوفوا بكره بنروح لمزرعه جدكم الله يرحمه .. يومين ودنا نستانس فيها قبل اختباراتكم الاسبوعين الجايه .. وبنرجع عصر الجمعه ها وشرايكم ؟؟
صبا : ونااااااسه ... من زمااان مارحنا للمزرعه اللـــه فـــــلللله ، طيب خالاتي وخالي راشد كلهم بيجون .. ؟؟
ام فيصل : لا تخافين كلهم جاايين .. من اكبرهم لأصغرهم ..
صبا : اهم شي ان لمياء بتجي هي اللي هامتني ..
تدخل فيصل : ايه كثري منها الباقي مايهمونك .. اصلا اهم شي عيال بعض الناس... صـ ..
ما كمل لان صبا لفت عليه صبا بعصبيه ورمت المخده اللي جنبها عليه وهي تقول : انت اخر واحد تتكلم استاذ فيصل ، بعد اللي سويته فيني اليوم مالك حق تفتح فمك بكلمه .. انطم ساامع ..
ابو فيصل اللي كان يشوفهم وهم يتناقرون مافهم وش سالفه اليوم اللي تتكلم عنها صبا عشان كذا قال : صبا وش سالفه اليوم اللي تتكلمون عنها ؟؟
صبا لفت لابوها وقالت بارتباك : هااه .. ايه يبه سالفه بيني وبين فيصل .. هوشه كالعاده دايم تصير ... ( ورجعت تناظر فيصل ) صح فيصل ؟؟
فيصل ابتسم لها بسخريه وقال : اكــيد يآ عمري ..
رفعت صبا له حاجب بعدها لفت لامها وقالت : طيب يمه متى بنروح بكرى ؟؟
ام فيصل : بعد العصر ان شاء الله بنروح ، ( ولفت لزوجها ) ها يابو فيصل ماغيرت رايك بالروحه .. ؟؟
ابو فيصل : والله ودي اجي معكم واستانس بس مضطر اروح ليله بكرى للرياض عندي شغل ضروري لازم اخلصه .. وماني راجع الا ليله الجمعه .. وغير كذا بزور اخواني وخواتي هناك ..
( ابو فيصل كل اخوانه وخواته عايشين بالرياض الا ابو فيصل بحكم شغله ، وهو بين فتره وفتره يودي عياله الرياض يشوفون اعمامهم وعماتهم .. )
صبا : يوووه ، يالقهر .. طيب يبه عندي اقتراح حلو يخليك تجي معنا ..
ابو فيصل : وشو .. ؟؟
صبا ناظرت فيصل بطرف عينها وقالت بخبث : يروح فيصل بدالك للرياض وانت تجي معنا للمزرعة .. وجودك يبه اهم من فيصل .. فيصل ماله داعي بالروحه لايهش ولاينش .. ولا شرايكـم ؟؟
ام فيصل بحده : صبا ... !!! وش هالكلام .. حتى فيصل لازم يروح ويستانس معنا حاله حالنا .. اخوك هذا !!
صبا : طيب طيب بسم الله ، ماكان قصدي شي .. بس بغيت امزح .. على طوول قلبتو عليّ ..
فيصل : اييه وااضح تمزحين ، لايهش ولاينش ها ... اقوول صبا خلينا حلوين وساكتين لافضحك الحين عندهم واقولهم ( ناظرها بخبث وكمل ) اشياء ماتنقـال ... ها وشرايك تبين اقوول ...
صبا خافت من كلماته بس سوت نفسها قويه : ماسويت شي اخاف منه ، واذا عندك شي قل يالله ماحد ماسكك ...
ناظرها بخبث اكبر وقال : متأكده ...؟؟
صبا ارتفع عندها الأنبير وتنرفزت من كلمات فيصل ، قامت من مكانه وهي تمثل البرود والتجاهل وراحت لزاويه الصاله اللي موجود فيها طاوله صغيره عليها تلفون وجنبها كرسي ، قعدت بالكرسي ورفعت السماعه تدق على لمياء ...
.................................................. ...............
عند لمياء بمجمع الظهران ... كانت قاعده بجلسات قبال المطاعم وطالبه لها عشاء من مطعم ( فنليز ) تعشق هالمطعم لانه يسوي باستا ... مرررررره فظيعه
كانت تاكل لما قطع عليها صوت جوالها يدق ، طلعت الجوال من الشنطه وردت على المتصل .. بيت خالتها ام فيصل .. اللي هي صبا ..
لمياء : آلو ...
صبا : هلا واللـــه لموو .. وينك انتي الحين يالداشره ؟؟
لمياء : هلا صبا .. أي داشره يرحم امك ... انا بالظهران .. بس فاتك قبل شوي وش صار معي ؟؟
صبا باهتمام : وشو ؟؟
لمياء : تخيلي مين شفت بالمجمع ؟؟
صبا : مين ؟؟
لمياء بصوت واطي : مشاري ..
صبا شهقت بصوت عالي .. ونزلت السماعه وهي تناظر باهلها المستغربين شهقتها المفآجأه ..
قبل مايتكلمون ماعطتهم فرصه ورجعت تكلم لمياء وهي واقفه،
تكلمت بهمس ماسمعه الا لمياء : لمياء دقيقه شوي ، باكلمك من فوق اصبري .
ما انتظرت ردها وسكرت السماعه وراحت فوق قبل مايقولون اهلها لها شي ..
اول ماوصلت لغرفتها اخذت جوالها من على التسريحه ودقت مره ثانيه بلمياء اللي على طوول ردت ..
صبا : بسرررررررعه الحين قوليلي .. شلون شفتيه وكيف ومتى ووين ؟؟؟
لمياء بعصبيه : صبا ووجع ، اعصابك علي حبه حبه يـ ماما ، اففف منك وبعدين لاتذكريني بالسالفه لاني بروح هالدقيقه اذبح فراااسووه الحمار النعله المنحط النذل الخسيس الكلب الثور اللوح عديم الاحساس ال..
قاطعتها صبا وهي تضحك وتقول : بس بس .. ههههههههههههه ارحمي الولد .. كل قاموس السب قلتيه له .. لييش وش السالفه علميني .. ؟؟
لمياء : آآآه بس لو تدرين وش صار ..؟؟ .. تخيلي جزاي الحين مشتريه له شي زين ويروح يسوي فيني كذا .. !! النعله ما ادري وش فيه قلب علي فجأه !!
صبا بقله صبر : يووووه طيب قولي السالفه عشان افهم وش قاعده تخربطين انتي .. ؟؟
لمياء اخذت نفس وقالت : شوفي انا كنت اتسوق في حال سبيلي .. ومريت بمحل تي شرتات وبدلات للرجال وكذا ، دخلته واعجبني تي شيرت مررره فظيع ، اخذته لفراس بعد ماكلمته واخذت منه المقاس .. وبالصدفه طلع موجود معي هنا بكوفي " pj's " فـ رحت له وما امداني اقعد واسولف معه شوي .. قصدي اتهاوش معه الا اشوف ظل واحد واقف على راسي ، رفعت راسي اشوف مين الا وانصدم بذا الجمال اللي قبالي ، صبا لو تشوفينه .. آآآه تخقين خق موب صاحي ...
صبا قاطعتها : لا شكرا خليه لك .. انا عندي مازن ويكفيني ..
لمياء : قسم بالله لو تشوفين هالآدمي ، تنسين مازن واللي جاب مازن .. الحمار حلّو اكثر .. يدري اني بدوخ ان شفته ..
صبا : ههههههههههههههه ، طيب والزبده .. الا الآن مافهمت ليش معصبه من فراس ؟؟
لمياء : اسمعي الحين تجيك السالفه ، اخي في الله سلم عليه ولزم يجلس معنا ويقعد !! ... تخيلي .. !! يبيه يقعد معنا وانا موجوده .. هالحيوان قليل الأدب المنحط النذل ..
صبا كانت ميته ضحك على لمياء المعصبه : ههههههههههههه اووه رجعنا عـ السب .. بس هههههه .. انتي نكتـــه .. !! وانتي وش سويتي بالله .. لاتكونين قعدتي معاه ..؟؟
لمياء شهقت بصوت واطي وقالت : وجع صبا وش شايفتني اقعد مع واحد مو من محارمي ؟؟؟ ، قالولك صبا اقعد معه ...
صبا : لميووه يالحماره انا اقعد مع واحد ما اعرفه يآ قليله الأدب .. ( وباستهبال قالت ) آآه هاذي اخر صداقتي معك .. يآ ويلتآآه .. بس
لمياء : اقوول واللي يرحم والديك .. اسكتي بس .. الله واكبر وهالصداقه بس .. المهم اكمل لك وش صار ؟؟ طبعا شلت روحي وقشي واستئذنت منهم اروح ، وقبل ما امشي الا الأخ فرااسوه هالحمار .. رجع يقول لي اقعدي معنا وتعرفي عليه اكثر وما ادري وشو ؟؟ ولا الثاني هاللوح عاجبه الوضع مشارريووه قهرني ساكت ولا قال مايحتاج وراح وخلاني براحتي .. لأ !! .. من جد قهرني ونكد عليّ الطلعه .. المفروض يذلف وينقلع ويتركني مع اخوي براحتنا موب انا اللي انطرد بس الشرهه موب عليه على الثور الثاني اللي يسمى اخوي تدرين بذيك اللحظه بغيت ادوس فراس برجلي واخلي زوليه لحمامي .. آآآخخ بس ولا ادخله بوحده من فتحات المكيف اللي بالمجمع كان احسن .. عشان يتوهق ومايطلع منها ابد ..
صبا كاانت فاااااطسه ضحك من لمياء .. مسكينه حالتها صعبه هي ودعاويها ذي .. : ههههههههههههههههههههههه بس بس اسكتي .. مت من الضحك .. هههههههه يآ حليلك لمياء هههههههههههه .. وانتي الحين اكيد قاعده لحالك كانك جنيه .. صح ؟؟
لمياء : جنيه بعينك ؟؟ وجع !!! .. ايه قاعده لحالي وش اسوي يعني مالي احد وبعدين اكيد بعد شوي بروح يعني مهوب مطولين ان شاء الله .. وهذاني قاعده اتعشى على الاقل انسى اللي صار ولو ان بقلبي حرره الى الان على فرااس بطلعها عليه ان شاء الله لما اروح البيت بس اصبري عليّ ...
صبا : تدرين عاد لمياء شعورك الحين نفس شعوري .. الله عطانا اخواان علل وغثا .. ماينطاقوون .. يحبوون يفشلوونا ويفضحونا عند الناس .. الله يفشلهم زي ماسوو فينا ... تدرين اخي الغالي العزيز المصون فيصل وش مسوي ؟؟
لمياء : الله يعينا عليهم ، عآد فيصل هذا طول عمره عــلللله .. وش مسوي هالمره ؟؟
|