اما لمياء بعد ماراحت منها صبا بعشر دقايق نزلت تحت بعد ماملت من القعده بغرفتها ، ما لقت احد بالصاله فراحت للمطبخ تشوف وين اهلها ، ما لقت احد نفس الشي ، فرجعت للصاله وقعدت تتفرج على التلفزيون ، بعد دقايق سمعت صوت الباب ينفتح وتدخل امها ومن وراها اختها جنا اللي واضح التعب على وجهها والأنهاك .
اول ما دخلت ام نواف : السلام عليكم ..
لمياء : وعليكم السلام .. وين كنتم ؟؟
جنا ماردت عليها وطلعت فووق على طول ، اما امها ردت عليها وهي تقول : كنا عند جارتنا سعاد بنتها ولدت ورحنا نبارك لها بسرعه ما اخذنا وقت طويل ورجعنا ..
لمياء : يوه يمه وش ****كم الحين عندهم ؟؟ الساعه 2 وربع بدري مره .. كان خليتوها المغرب ولا بالليل ؟؟ بعدين ليش ماخذه معك جنا ؟؟
ام نواف : يابنتي انا اول ماولدت البنت مالحقت اروح لهم ، واليوم تذكرت و بغيت بس اسلم على البنيه وابارك لها لانها المغرب بتسافر للرياض عند بيت زوجها ، اما عن جنا اول مابغيت اطلع كانت توها جايه من مدرستها وقلت فرصه تجي معي تشوف الناس ويشوفونها تدرين عنها ماتحب تطلع وتختلط بالناس واجد وهاذي هي كلها نص ساعه ورجعنا .. طيب انتي وشخبارك الحين ؟؟ انا طلعت وانتي نايمه ولابغيت ازعجك واقومك ...عساك الحين احسن ؟؟
لمياء ابتسمت لامها : الحمدلله مافيني شي .. صبا هالحماره اكيد مخوفتك عليَ بزيااده ،، لاتخافين يمه بنتك مثل الحصان مافيها شي ..
ام نواف : الله يديم الصحه والعافيه علينا ... اقوول لمياء ما كانك ناحفه زياده ؟
لمياء وهي تناظر جسمها : ما ادري ما لاحظت ؟ ليش مرره صرت عصله ؟؟
ام نواف : لا مو مرره ضعفتي ،، ولو ان احد ثاني كان ما لاحظ .. بس لاني امك احس انك ناحفه شوي يعني بطنك اختفى مافي شي آبد ..
لمياء بسخريه : وهو قبل كان فيه شي .. !! بس تدرين احسن كذا ما ابي يطلع لي بطن .. ( وبغرور ) ابي احافظ على رشاقه جسمي ..
ام نواف : الله يصلحك بس ، ماعندك الا هالرشاقه .... المهم وين اخوك نواف ؟؟ المفروض رجع من دوامه ؟؟ وصبا وينها بعد ؟؟
لمياء هزت كتوفها : ما ادري انا قمت ولا لقيت احد ، وصبا راحت لبيتها ، بس يمكن نواف وداها .. اما فراس كالعاده يتغدى برى وبيرجع بعد شوي ..
ام نواف وهي رايحه للمطبخ : الله يهديهم ويصلحهم ان شاء الله ...
.................................................. ...............
وقفت دقات قلبـي وقفت ,,
يوم وقفلـي وناظـر والتفت ,,
من حلاه ومن ضياه ومن سناه,,
لو نظر لشمس غابت وأنطفت ,,
الله وأكبـر يوم ناظـر وابتسم ,,
صاب قلبي من لحظ عينه سهـم ,,
ماقدرت انطق ولاارد النسم,,
كـن روحي فارقتني واختفت...
//
بعد دقايق وصلوا لبيت صبا ، صبا كانت سرحانه وتفكر ولادرت انهم وصلوا ...
نواف : صبا يلا انزلي ..
صبا : هااه ... ايه وصلنا .. طيب يلا بااي
نزلت من السياره بسرعه قبل ماتسمع رده ،، وتوجهت لباب بيتهم ونواف يناظرها من سيارته ينتظرها تتدخل ويمشي ..
طلعت صبا مفتاح البيت من شنطتها وفتحت الباب ودخلت داخل وهي تسمع صوت سياره نواف وهي تمشي .. سكرت الباب وراها وفكت طرحتها وخلتها على كتوفها ..
دخلت الصاله ولقت امها قاعده تتقهوى مثل عادتها بهالوقت .. قربت من عندها وحبت راسها : السلام عليكم يمه ...
ام فيصل : وعليكم السلام ... هلا حبيبتي زين وصلتي الحين توني كنت بقول لفيصل يجيبك .. مع مين جيتي ؟؟
فصخت صبا عبايتها ورمتها باهمال على وحده من الكنبات وقعدت جنبها بكل ثقلها وهي تتنهد : جيت مع نواف ..
قامت امها ومعها صينيه القهوه : طيب تبين احط لك الغدا الحين ولا متى ؟؟
ابتسمت صبا لامها : لا يمه مشكووره مابي شي الحين ، اذا اشتهيت بعد شوي انا بروح احط لي ،، انتي ارتاحي واقعدي سولفي معي ...
ام فيصل : ان شاء الله باجي اقعد معك بس بجيب غدا فيصل واجي ..
صبا كان تلعب بشعرها وتنفشه وتحووس فيه : ليش هو جا ؟؟
قبل ما تجاوب امها عليها ، سمعت صوت ضحكات من فوق وتقترب منهم ، وبعد لحظات شافوا فيصل ينزل ووراه شخص اتضح انه مازن ...
صبا اول ما لمحت فيصل ما انتبهت لمازن اللي وراه وقفت وحالتها حاله وهي تقول بصوت عالي : فيصل تعـال بقول لك شي مـ ....
ماكملت جملتها الا وشهقت شهقه قويه وحطت يدها على فمها ... !!!
فيصل كان واصل بذيك اللحظه لاخر الدرجات ناظرها باستغراب ومازن وراه بالضبط يناظرها وماسك ضحكته عليها .. واضح انها استغربت وجوده ولا درت عنه ..
فيصل : سلامات صبا وش هالشهقه ؟؟ كانك شايفه بعبع ؟؟
بذيك اللحظه بالذات انربط لسان صبا ولا قدرت تتكلم بحرف واحد !! ... وكل اللي يدور ببالها شي واحد .. !! وتكلم عمرها فيه .. شلون شافها مازن بهالشكل ؟؟ ياربيه شكلي مرره يفشل ومبهذل هذا غير شعري الكشه والمكياج وكل شي .. يوووووووه اكيد سمع صوتي العالي وصراخي .. ياربيه وش هالفشيله !!
وش بقول الحين ؟؟ وش اسوي ؟؟ وبعدين ليه كذا شهقت افف وش بيقول عني الحين مرجوجه ومهبوله ...؟؟ ياربيه وش اسوي ؟؟؟
وقف عقلها عن التفكير لما سمعت صوت فيصل : هييييه يا حلو وين رحت ؟؟ صبا وين طرتي ؟؟ ترى الحبيب هنا ..
انحرجت صبا زياده وودها الارض تنشق وتبلعها .. هذا وقت سخافه فيصل وثقل دمه .. عليه كلماات بعض المرات !! ... ماودك الا تصفقه بس ..
تمالكت صبا نفسها ومشت جنبهم منزله راسها تبي تروح فووق وتهرب منهم وطلع صوتها وااطي بالمره وهي تكلمهم : عن اذنكـم ...
راحت فوق ومادرت عن العيون اللي كانت تراقبها !! ... عين مازن ماراحت عنها الا لما اختفى ظلها تماما عن عينه .. وكل ما يشوفها يزيد حبه لها ولشكلها وطيبتها وحياها وعفويتها وبرائتها اللي يعشقها ..
ابتسم لنفسه وهو يقعد جنب فيصل ..........
فيصل اللي ماسك بطنه من الضحك : هههههههههههههههه اما عليها وجه لما شافتك .. تقول طالع لها جني خخخخخخخ مسكينه راحت في خرايطها البنت ..
ضربه مازن على راسه وهو يقول : حدك عاد على صبا ترى ما ارضى عليها .. وبعدين ليه ماقلتم لها اني بجي؟؟ .. زين كذا خليتوها تنحرج وتستحي ..
فيصل : وليه ان شاء الله نقولها ؟؟ موب هي زوجتك يعني عادي تشوفها ما صار شي ان شفتها وهي ماتدري عنك ... وبعدين بالذمه موب احلى تشوفها على الطبيعه بدال التكشخ والتزين الزايد لك .. عشان تعرف حقيقه الوجه اللي انت ماخذه .. ههههههههه
ام فيصل : هو فيصل .. !! وشفيه وجه صبا يهبل ياملحه .. صح ولا لا يامازن ؟
مازن : ايه والله خالتي وانتي الصادقه يهبل ويفتح النفس موب زيك ،، الا فيصل اللي مايعرف يناظر زين .. هذا وهي اختك ها ( ضربه مره ثانيه على راسه وهو يضحك )
فيصل وقف وهو يناظر مازن نظرات خبث : وانت ماشاء الله قزيتها من فوق لتحت عشان تقول عنها كذا .. ( مسك يد مازن وشده بقوه عشان يقوم معه ) اقوول بس يلا قم .. بس اول سيارتك للحين ماخلص منها رفيقك .. ؟؟
مازن بعد ماوقف مع فيصل وقال : الا خلص سعود منها وارسل لي رساله وين يحطها وقلت له قبل شوي يوقفها عند باب بيتكم .. يعني بطلع الحين والاقيها المفروض بوجهي .. ( التفت لخالته ) يلا خالتي مع السلامه ..
ام فيصل : وين الحين تروح ؟؟ تغدى عندنا اول ...
مازن : لا خالتي مشكوره ، اهلي ينتظروني على الغدا .. يلا بالإذن مع السلامه
ام فيصل وفيصل : مع السلامه ...
بعد ما طلع مازن من عندهم ، راحت ام فيصل للمطبخ وقالت بصوت عالي لفيصل: فيصل رح شف اختك فوق وعطها خبر ان مازن راح عشان تنزل ...
فيصل وهو يرقى الدرج : ان شاء الله يمه ..
راح فوق لغرفه صبا وطق الباب عليها ، ولما سمع منها الاذن .. فتح الباب ودخل لقاها قاعده على السرير ومتكتفه وواضح انها مطنقره .. !!
صبا رفعت حاجب : خـير ..!! ليش تارك ضيفك المحترم وراقي لي ..؟؟
فيصل كان ماسك نفسه لا يضحك على شكلها واضح انها معصبه : والله يا اخت صبا ضيفي المحترم على قولتك توه رايح .. وانا جاي اناديك تجين تحت معنا ان بغيتي ..
صبا قامت من على السرير : طيب مشكور انك قلت لي .. ممكن تنقلع الحين وتتركني بالغرفه لحالي ابي اناام ..
فيصل : وانتي الحين ليش معصبه ومطنقره علينا وش سوينا لك ؟؟
صبا : ايه مرره بريئين .. !! ما كأنك قبل شوي فشلتني عند مازن ؟؟ وش يضرك لو قلت لي من قبل انه جاي ؟؟ ، على الاقل اقعد هنا بالغرفه موب افشل روحي قدامه ..
فيصل : طيب الحين افهمي السالفه زين واعرفي ليش جا ، وليش ماقلت لك ؟؟ انا بعد ما طلعت من الجامعه اتصلت فيه اسلم عليه واسولف معه وقال لي انه توه طالع من الشركه وسيارته ماخذها رفيقه ، فقالي امره واوديه بيته ، وانا كان ودي اوريه اوراق وبحوث عندي مضبطها للجامعه وودي اشوف رايه فيها عشان كذا نزلته عندنا وانتي ماكنتي موجوده قعدنا بغرفتي فوق ربع ساعه بعدين نزلنا وانتي مشرفه بالصاله وقاعده تلعلعين بصوتك عليّ ...
صبا عصبت من كلامه وقالت : لــا ،، انا العلع وانت تتطنز وتتمصخر علي ( وتقلد صوته ) هنا الحبيب ، انت ماتستحي خير تقول كذا ؟؟ افهم اني بنت واستحي من هالكلام ، طيحت وجهي وفشلتني قدامه ..
لفت راسها عنه وتوجهت للمرايه ، اما هو ماقدر يمسك نفسه وانفجر ضحك : هههههههههههههههههههههههههههههه اما انتي تستحين ، ليه انتي تعرفين الحيا ؟؟ هههههههه ضحكتيني قال ايش قال تستحي من هالكلام !!! هههههههه وبعدين ماكذبت بشي .. موب هو الحبيب ... ولا ؟؟
انقهرت صبا منه وودها تذبحه قربت منه وجت وراه ودفته من ظهره للباب وهي تقول : انقلـــــــــــــــــــــع ياحماار .. انــــقلع ...
دفته برى غرفتها وسكرت الباب باقوى ماعندها ، اخذت نفس وهي تلعن فيصل وتسبه ، تمددت على السرير في محاوله للنوم ..... وبعد محاولات جهيده ومضنيه نامت ...
.................................................. ...............
انتهى البارت
|