في اليوم الثاني ، يوم الثلاثاء صبا كانت دايخه ولا نامت زيين كانت تكلم مازن بالتلفون للفجر ماتركها ساعتين كامله وهي تسولف معه او بالاصح تستمع له وهو اللي يسولف لها ....
راحت صبا اليوم الجامعه وهي مالها خلق نفسها بخشمها لكن وش تسوي هذا اخر اسبوع وبعدين على طول اختبارات وهي ماتبي تحمل أي مواد وتزهق روحها ، عشان كذا بتشد على نفسها شوي لما تخلص وتفتك ...
كانت قاعده مع البنات وتوهم طالعين من عند دكتوره يستفسرون من عندها على بعض الاشياء .. جلسوا البنات وكل وحده تقول جدول مذاكرتها وغيره ...
رنا حست بصبا الدايخه واللي مو معهم آبد : سلامات صبا وش فيك ?? كأنك دايخه؟
صبا : هاا ... ايه والله دايخه وودي انام ، لاني امس بالليل مانمت زين ..
لمياء ضحكت على شكل صبا وهي عارفه ليش ما نامت لكن قالت بخبث : ايه صح صبا ليش مانمتي ؟؟
صبا تناظر لمياء وهي رافعه حاجب ( تعرفين ليش مانمت ليش تسألين ) : ابد بس مازن امس على الساعه 2 الليل كلمني الين الفجر كان يناقشني بشؤون الزواج والعرس وما خلصنا الا على الفجر.
لمياء : يناقشك هآآ !! كثري منها وبعدين من متى والرجال يتدخلون بشؤون العرس على قولتك ؟؟ ! .. ( ناظرتها بخبث يعني كاشفتك كاشفتك ) ...
صبا انقهرت من لمياء وودها تصفقها وهي مرره اخلاقها بخشمها ( وقفت بكسل وقالت للبنات من غير تناظر لمياء ) : انا بدخل انتظركم اذا خلصتـم ...
دلال مدت يدها ومسكتها من ذراعها توقف صبا : لا لا لا صبا بليييز اقعدي خلينا نسولف ولا عليك من هاذي ( تناظر لمياء ) طوول عمرها تحب تتحرش خليها كيفها....
قعدت صبا عشان دلال : اوكي بقعد عشانك ترى ..
دلال : ههههه بعد قلبي انتي ادري ما اهوون عليك تخليني بين العصابه ذيك ( تاشر على رنا واسماء ولمياء اللي قاعدين جنب بعض ) هذولا ماهمهم الا التحرش والسب اما انا وياك مسالمات ....
لمياء : قالت ايش قالت مسالمات ،، اييه مرره واضح .. اصلا السلام بوادي وانتم بوادي ..
صبا ناظرتها بغرور : هه ،، احلفي بس .. اختصري الطريق وقولي انك تبين ترفعين ضغطي بحركاتك اللي ماتهز فيني شعره..
رنا تكلم اسماء : غريبه من متى صبا ولمياء يتهاوشون .. !! بالعاده قلوبهم دايم على بعض ونادر اشوفهم يتناقرون .. !!
اسماء : لاتخافين رنا اقطع يدي اذا ماشفتيهم الليله بوحده من الاسواق ورايحين يستانسون مع بعض نااسين ابوو السالفه .. طوول عمرهم كذا هوشه تاخذ دقيقتين ومناحه على بعض ساعتين ..
دلال : عجبتني ذي هوشه دقيقتين ومناحه ساعتين ،، بس شكل بعض الناس ماعجبهم كلامك ( تاشر على لمياء باصبعها ) ...
لمياء كانت ماسكه راسها من الالم اللي فتكها وموب قادره تتحمل ..
انتبهوا لها صديقاتها وقامت على طوول صبا لها وجلست جنبها ومسكت يدها : لمياء وشفيك ؟؟
ماردت عليها لمياء وظلت ماسكه راسها بيدها الثانيه وضاغظه عليه بقووه ..
رجعت صبا تسألها :
راسك رجع يالمك صح ؟؟
ماردت عليها لمياء لان الم راسها اقوى من انها تتكلم ..
اسماء : طيب لمياء معك بندول يهدي راسك .. ؟؟
واخيرا لمياء تكلمت : اخذته قبل .. قبل ساعتين .. ما فااد .. ( رجعت تضغط على راسها اقووى ) آآآي الم شديد
اسماء ناظرت صبا : غريبه مادامها اخذته قبل ساعتين المفروض يخف عليها ، المهم صبا ( ناظرت ساعتها وقالت ) باقي 10 دقايق وتبدى المحاضره ساعه وتخلص وينتهي الدوام انتي ارجعي مع لمياء بيتها لان شكلها صعب تحظر المحاضره فأحسن لها تروح البيت الحين وترتااح ... وحنا اول ماتلخص المحاضره راح نطمن عليكم اوكي ،، ولاتخافون راح اسجلكم حظوور..
صبا : تسلمييين يآ احلى اسووم مشكوره ،، طيب انا بدق على احد يرجعنا اامممم .. ايه فيصل اخوي يقول اليوم ماعنده شي بخليه يجي وياخذنا ...
بعدت عنهم شوي تدق على فيصل ، طلعت جوالها ودقت على رقمه وحطته عند اذنها ، ثواني ووصلها الرد بعد رنتين ..
فيصل : هلا وغلا باحلى اخت بالدنيا ...
صبا : وهلا والله باحلى اخو بالدنيا ..
فيصل : ههههه لا لا اليوم راضيه عليَ وش الطاري ؟؟
صبا : ابد كسرت خاطري من زمان ماقلت لك كلمه حلوه وطنت ببـالي اليوم اونسك بكلمه من لساني تنسيك عمرك واهلك .
فيصل : احلى يالواثقه بس ،،، اخلصي وش عندك ؟؟ عطينا من الآخر ..
صبا : ما دامك تبي من الآخر بعطيك ،، الله لايهينك لمياء تعبانه شوي وودها ترجع البيت وانا برجع معها فيآليت تجي تاخذنا لبيتهم ..
فيصل : اها وانا اقوول وش سر هالطيبه اللي نازله ،، اخخ بس كلها مصالح ...
صبا ضحكت على اخوها : لا ياخوي وش دعوه لاتخاف مكانتك محفوظه عندي وصدق من قال ياحظي فيك ...
فيصل ( يقاله زعل ) : ايه ايه اضحكي عليَ بكلمتين ،، يا حظك فيني هاا ؟؟
صبا : اقووول عاد فيصلووه بتذلني يعني منت جاينا ولا شلوون ؟؟
فيصل : لا خلاص باجي امري لله .. يلا 10 دقايق وانا عندكم ..
صبا : طيب يلا مع السلامه ...
فيصل : مع السلامه ..
سكرت من فيصل ورجعت للبنات اللي ملتمين عند لمياء : ها لموو للحين راسك يالم؟؟
لمياء وهي ماسكه راسها تحس الالم بيذبحها : الى الان واقوى ، ها فيصل بيجي ؟؟
صبا : ايه لاتخافين قلت له وقال لي 10 دقايق وهو جاي ، اصبري شوي بس ..
قعدوا البنات يسولفون مع لمياء شوي لما يجي فيصل ...
بعد ربع ساعه دق جوال صبا رفعته لقت اسم اخوها ردت عليه :
الو فيصل ..
فيصل : هلا صبا يلا انا برى انتظركم ..
صبا : يلا يلا الحين بنطلع بااي ..
سكرت منه ولفت للمياء : يلا لمياء فيصل برى خلينا نطلع ...
قامت معها بصعوبه ولبست عبايتها بمساعده صبا سلموا على البنات وطلعوا برى لسياره فيصل ، ركبوها وهم يسلمون : السلام عليكم ..
فيصل : وعليكم السلام ..
او ماركبوا وتحرك فيصل لبيت لمياء قال : سلامات لمياء ماتشوفين شر وش جاك ؟
لمياء بتعب واااضح : الشر مايجيك ، آبد بس راسي يالم وابي ارتاح وانام ..
فيصل يناظر صبا اللي قاعده جنبه : اكيد صبا قعدت تقرقر على راسك وتصجك لما بغى ينفجر صح ؟؟
ضحكت لمياء ضحكه خفيفه غصب عنها : لاحرام صبا عسل ماتزعج احد ...
صبا بفخر : بعد تسبدي انتي ( ناظرت فيصل ) احم احم ...
فيصل بسخريه : صبا عسل .. هه كثري منها .. ادري تجاملين عشانها اختك ولا ادري فيها مستحيل تخلي احد بحاله ولا تغثه ...
صبا : انت الحين وش تبي بالضبط ؟؟ فيه احد حارق رزقك عشان تتحرش انا واختي نصلح انت وش تبي جاي تخرب بينا بس صـدق أ..
قبل ماتكمل جملتها سمعت صوت نغمه رساله بجوالها فتحتها وقرت المكتوب :
صبا واللي يرحم والديك انا تعبانه وراسي ينفجر انطمي انتي واخوك لا تتكلمون ، ارسلت لك رساله عشان ماتتفشلين عند فيصل ويرمي عليك كلام مثل العاده يعني عشان خاطري اســــــــــــكتي .. برتااح .. ممكن ؟؟؟
كانت الرساله من لمياء اللي قاعده وراها وراسها بينفجر وماتحملت مناقر صبا وفيصل عشان كذا ارسلت لصبا رساله وافتكت لان صبا اول ماقرت الرساله مسكت ضحكتها على لمياء ونطمت فجأه بدون ماتتكلم ولا كلمه ...!!
فيصل استغرب صبا سكتت فجأه !! ولا تكلمت ابدا غريبه ؟؟!!
فيصل : غريبه !!! وشفيك هجدتي فجأأه ؟؟
صبا سكتت ماتبي ترد عليه عشان مايتهاوشون ...
استغرب فيصل اكثر بس طنش شكلها مالها خلق له ،، ناظر الطريق قدامه وكمل سواقه لبيت خالته ...
وصلوا اخيرا البيت وعلى طووول نزلت لمياء ومعها صبا اللي عطت فيصل خبر انها مطوله عند خالتها شوي ..
دخلوا البيت بمفتاح لمياء واول مادخلوا الصاله فكت صبا غطاها لان البيت بيتها ( على قولتها ) زوج خالتها هو ابوها بالرضاعه وعياله اخوانها بالرضاع يعني عااادي تتحرك وتروح زي ماتبي ..
لمياء على طول توجهت للدرج تبي تناام تعبانه بالمره ،، التفتت قبل لصبا وقالت : صبوو انا بروح انام مرره تعبانه ، بتلاقين امي بالمطبخ قولي لها اللي صار انا مالي خلق اقولها ..
صبا : اوكي خلاص انتي روحي نامي وتطمني بقولها ..
راحت لمياء لفووق وهي مهدووده ، اما صبا اتجهت للمطبخ تتفقد خالتها وتشوف وينها ؟ لقتها قاعده تغسل المواعين مع الشغاله ..
انتبهت لها خالتها وتركت المواعين وراحت لها : هـــــــلا والله بصبا هلا بابنتي ..
سلمت عليها صبا وحبت راسها : هلا بخالتي وامي الثانيه .. شخبارك يمه ؟؟
خالتها ابتسمت على كلمه " أمي " : الحمدلله حبيبتي وانتي وش اخبارك ؟؟
صبا : الحمدلله ماشيه ، الا يمه ترى انا ولمياء رجعنا اليوم بدري من الجامعه موب الحين وقت الخروج ، بس لمياء دايخه ومالها خلق وانا قلت برجع معها ..
ام نواف : حيآك الله البيت بيتك صبا ،، بس وييين لمياء ماسلمت علي ؟؟
صبا : والله لمياء راحت على طوول لفووق تناام دايخه مررره ..
ام نواف : الله يصلحها هالبنت .. طيب صبا حبيبتي بروح اكمل شغلي وانتي سوي اللي تبينه بالبيت ، بس قبل علمتي امك قبل لا تخااف عليك ؟؟
صبا : ان شاء الله الحين بدق عليها واقولها ..
طلعت صبا من المطبخ وراحت للصاله فصخت عبايتها وقعدت على وحده من الكنبات ، رفعت جوالها ودقت على امها .. تطمنها ..
.................................................. ...............
يتبع
|