بعد اسبوع من الاحداث وتحديداً في يوم الملكه ، الساعة 9 ونص كانت صبا فوق بغرفتها معاها لمياء وصبا ميته رعب ، لبست فستانها و الكوافيره مخلصة منها من زمان كانت جاهزه ولمياء تحثها تنزل لانها تاخرت كل الناس من زماان جايين ، كانت الملكه لا هي كبيره مرره ولا صغيره عزموا الخالات والخوال والعمات والأعمام وبناتهم وعيالهم وصديقاتها المقربات ولأن البيت كبير كفى للمعازيم ..
لمياء كانت لابسه فستاان مرره نااعم وبسيط كان علاقي لونه احمر على عنابي تحت الركبه بشوي ماسك على جسمها وعند الخصر رابطه فيونكه ناعمه ولبست كعب على لون الفستان اما شعرها ما لعبت فيه كثير رفعت شعرها على فوق ونزلت خصل بالفير ، اما مكياجها كان ناعم نفس الشي ومابالغت فيه ، لمياء طلعت مرره كيووت وناعمه بالفستاان وكثير عجبتهم على بساطه الفستان كانت طالعه فيه خياال تهبل ..
اما صـــبا العروس ..
كان فستانها من قدام لنص البطن كله زخارف شكلها كانها الماس متداخل مع زخارف سوده وبعدين من تحت طاغي عليه اللون الاسود وفيه لمعه بيضه ، كان مخصر على جسمها وطويل له ذيل قصير من ورى ، مع كعب ابيض ، وشعرها فاتحته ومسويه فيه فير ولان طوله لتحت الكتف بشوي طالعه عليها التسريحه خياال ، والمكياج كان بسيط وناعم ومعطيها حلاوه ونعومه ، كانت صبا بذيك الليله ملكه جمـال .. !!
طبعا صبا كانت معصبه من شي واحد هي كانت مفصله مع الفستان شـال ولما لبسته لمياء وبنات خالاتها قالوا لها افصخيه احلى بدونه مغطي على شكله الفستان ومخربه وهي طبعا رفضت وبعد الاقناع وافقت بالمووت ..
صبا بغرفتها كانت متوتره ومرتبكه لدرجه كبيره شوي وتصيح ، توها امها طالعه من عندها بعد ماوقعت وصارت زوجه مازن ، لمياء تحاول تهديها وتهون عليها..
لمياء : صبا يلا امك تقول الزفه بتبدى يلا بسرعه خلاص تاخرتي ..
صبا شوي وتصيح : لمياء مابي مابي انزل خلاص موب لازم ملكه ..
لمياء : صبا وش هالكلام .. ( مسكت يدها بقوه ووقفتها بالغصب ) يلا بسرعه بقول لنهى يشغلون الزفه وانتى وقفي عند الدرج واستعدتي يلا ..
مشت صبا شوي شوي وهي تحس قلبها بيوقف طلعت من الغرفه ووقفت عند الدرج بس من بعيد يعني محد شافها اما لمياء نزلت وراحت لخالتها ام فيصل : خالتي يلا صبا جاهزه نقول لمازن يدخل ..
ام فيصل : يلا انا بكلم فيصل واقوله يخلي مازن يدخل بالصاله وانتي قولي للناس تتغطى وتبعد عن الكرسي اللي بيقعد مازن وصبا فيه ..
لمياء : ان شاء الله ..
راحت لمياء وعلمت الناس ان المعرس بيدخل اغلب الحريم اللي ماهمتهم مرره الزفه راحوا للمجلس الثاني واما البنات لبسوا عباياتهم ينتظرون صبا تنزل ، لمياء لبست عبايتها وتلثمت وراحت فوق عند صبا اللي واقفه ترتجف ..
لمياء : ها صبا خلاص جاهزه مازن الحين بيدخل ..
صبا ماتت رعب : لاتقولين ، لا لا مابي ..
مسكت لمياء يد صبا وقالت : تعوذي من الشيطان مافي شي ، يلا بسم الله ، انا بسكر الانوار واشغل نور الدرج الخافت واول ماتسمعين الزفه توكلي وانزلي انا بكون تحت عند نهايه الدرج لاتخافين بكون قدامك طول الوقت ،( باستها على خدها ) يلا حبيبتي الف الف مبروك يا حرم مازن ..
ابتسمت صبا بصعوبه وقالت : الله يبارك فيك ..
سكروا كل لمبات الصاله وشغلوا النور اللي على الدرج ، بدت الزفـه بموسيقى استمرت شوي ، وبعدهـآآ طلعت صبا ونزلت الدرج شوي شوي على زفه ( لمعه الالماس ) اول مازلت صبا كل البنات زعرطوا لها وصوروا ..
وصلت لآخر الدرج وقدامها مازن قاعد على الكرسي مبهور بجمالها ، تغيرت له صبا كثير وزاد جمالها عن اول بميه مرره ، طالعه ناعمه وتجنن ، ¬تقدمت لعنده لما خلصت الزفه وهو وقف سلم عليها وقعدوا جنب بعض ، صبا كان بيوقف قلبها من الخوف ، اخيرا .. اخيرا جا اليوم اللي تكون فيه جنب مازن ، اليوم صارت زوجه مازن ، وهذا هو جنبها وهي حلاله خلاص ..
مازن : الف مبروك صبا ..
صبا بصوت واطي وهي منزله راسها : الله يبارك فيك ..
لمياء دمعت عينها وهي تشوف صبا اختها قدامها قاعده بملكتها لفت يمين لقت ام صبا تدمع راحت جنبها وقالت بصوت واطي : خالتي مايسير تصيحين لاتزعلين صبا ، افرحي خالتي افرحي ..
ام صبا : والله يابنيتي هاذي دموع الفرح هاذي بنتي الوحيده حبيبتي هاذي اشوفها اليوم قدام عيني ولاتبين ادمع لها ..
لمياء : معليش خالتي عشان صبا لاتصيحين قدامها ..
ام صبا : ان شاء الله
مسحت دموعها وتقدمت لصبا ومازن وباركت لهم ونفس الشي ام مازن راحت تسلم عليهم ، لمياء ماتحملت تسكت ، راحت زغرطت بصوت عالي وهي تناظر صبا اللي ضحكت على لمياء ، دخل فيصل وابوه يسلمو على صبا ، تقدم ابوها لها وحب جبهتها وقال : مبروك حبيبتي الف مبروك ..
وهي بدورها حبت راسه : الله يبارك فيك يبه ..
تقدم لها فيصل وقالها بإذنها : الله الله كل هالجمال لمازن .. ارحميه شوي ..
استحت صبا ولاردت عليه ، هو ضحك عليها بصوت واطي وحب جبهتها وقال : الف مبروك صبا تستاهلين ..
لف لمازن وقال : مبروك مازن تستاهل صبا والله يوفقكم ..
مازن : آمين ، والله يبارك فيك وعقبالك إن شاء الله ..
طلع فيصل مع ابوه ولمياء تقدمت وهي متغطيه راحت عند صبا وحظنتها وهي تقول لها بهمس : ماقدرت اشوفك حلوه كذا ولا اضمك ، الف الف مبرووك صبا
صبا : ههه كم مره قلتيلي هالجمله اليوم ..؟؟
بعدت عنها لمياء : وطول العمر بقولها لك ..
صبا : يا بعد قلبي انتي ، الله يبارك فيك والدور جاي عليك ..
بعدت لمياء عنهم وراحت تجيب الشبكه اللي كانت على الطاوله البعيده حطت العلب قدامهم على طاولتهم ورجعت مكانها تصور ..
مازن فتح العلبه الأولى اللي هي الدبله مسك يد صبا البارده من الخوف ودخل الخاتم باصبعها وقرب يدها لفمه وحبها ، استحت هي لما سوى هالحركه قدام بنات خالاتها و رجعت يدها بسرعه لحظنها ، مازن ابتسم لها وفتح العلبه الثانيه واللي كانت سآعه الماس مرره فخمه وتجنن ، دقايق وكانت الساعه على يدها ، فتح العلبه الكبيره واللي كانت طقم الماس بعد ، بلعت صبا ريقها وقالت بنفسها : ياويلي بيلبسني كل ذا .. ؟؟
اول شي اخذ مازن عقد الالماس ولفت صبا على جنب عشان يقدر يسكره ، اول ماسكره همس بإذنها وقال : تهبلـين حبيبتي ..
هنا صبا راحت فيها من الحيا وصار وجهها احمر ، حمدت ربها انه همس بإذنها ولا قال قدام الناس ، لفت عليه واعطاها ابتسامه ذوبتها ، رجع يلف على الطقم واخذ الحلق ، وهنا الطامه الكبرى ، صبا ماتت خوف شلون بيلبسها بتكون قريبه مرره منه ، وهو جنبها رايحه فيها شلون اذا حست بانفاسه قريبه منها !!
قرب مازن من اذنها اليمين وبدى يلبسها الحلق ببطء لأنه كان مستمع بقربها منه وماوده يخلص ، عكس صبا اللي ميته خوف وتبيه يخلص بسرعه ، خلص من اذنها اليمين ولفت عشان يلبسها الحلق الثاني بالاذن اليسار ، هنا صبا تمنت الأرض تنشق وتبلعها كان قدامها عيونها على عينه وهو يبتسم لها وهي ما تدري وش تناظر ولا تقدر تحرك راسها وتلتفت لانه قاعد يلبسها ، اول ماخلص حست براحه كبيره ، لبسها اخيرا الاسواره الروعه ، وبعدها بدوا البنات يزغرطون مره ثانيه ، وقف مازن واستغربت صبا ليش وقف ؟؟
مازن : يمه شوفي لي الطريق انا وصبا للمجلس ...
صبا هنا انهبلت !!!!!!!! للمجلس !! قالت بنفسها : يا ويلي للمجلس بقعد معاه لحالنا ، الله يعين ياويلي ..
|