بارت 9
في يوم الاربعاء ـ في المستشفى الساعه 12ونص الظهر
كانوا لمياء وصبا بسااابع نومه لانهم ماناموا الا متأخر من السهر ،
كان جوال صبا يرن وصبا انزعجت من الصوت تبي تنام زيين ، رفعت الجوال ترد وهي مغمضه عيونها تقريبا نص نايمه ونص صاحيه ، ردت وهي ماتعرف مين اللي داق ؟؟
صبا : الو ...
فيصل : هلا والله براعيه الألو ..
صبا : فيصل ؟؟
فيصل : بشحمه ولحمه ..
صبا وهي تتثاوب : فيصل انقلع ابي انام ...
فيصل : افا افا وهذا وانا باقول لك خبر يفرح يا عرووس ...
صبا : عروس !! ، فيصل وش قاعد تخربط انت ؟؟
فيصل : صبا انا ما اخربط ، مازن اليوم كلم ابوي واتفق معاه على وقت الملكه ..
صبا الى الآن ما استوعبت اللي يقوله فيصل وتوقعت انها بحلم للحين : طيب طيب يلا انقلع بنام ...
سكرت التلفون بوجهه وحطته على الطواله وكل هذا وهي ما استوعبت اللي سمعته ، قعدت 10 دقايق على السرير ،
وفجــــــــأأه ، نطت من السرير وفتحت عينها واستوعبت اللي صار ، دقت على فيصل مره ثانيه اللي رد عليها وهو يقول : ههههههههههه ، اخيرا استوعبتي يا عرووس
صبا منصدمه الى الأن : فيصل ، فيصل انت صاحي ، عد الكلام اللي قلته قبل شوي عده ... !!!
فيصل : ههههههه يا حليلك ، اقول مازن قبل شوي راح لابوي وقال له يبي الملكه بكره ...
صبا بصدمه : إيــــــــــــــــش ؟؟؟ !!!!
فيصل : ههههههه ، صدق او لا تصدق ، تخيلي ؟؟
صبا : فيصل ولد خالتك ذا صاحي !! وشو بكره وانا وين رحت ولا اخذتوا رايي على طول قررتوا بكره ؟؟؟
فيصـل : وشو انتي الله يهديك ما ناخذ رايك والحين انا داق وشولوه هآ ؟؟
صبا وفيها الصيحه : فيصل الله يعافيك وشو بكره ما جهزت شي ؟؟ حرام عليكم لا لا مستحيل بكره توني ما استعديت ..
فيصل : وليش ما استعديتي ؟؟ الفستان وجاهز له اسبوعين مخلص ، ماعندك شي؟
صبا : حتى ولو ، باقي المكياج والشعر والاكسسوار ، باقي اشياء كثيره ، وبعدين موب بس عشان كذا ، ما قلنا لأحد وانا ماستعديت نفسيا ...
فيصل : نفسيا !! ليش انتي بتاخذين بعبع هذا مازن !!
صبا : يووه فيصل الكلام معاك ضايع ، المهم هي كلمه وحده مستحيل بكره الملكه لو إيش م س ت ح ي ل ،، فآآهم .. !!
فيصل : طيب ومتى تبينها يا آنسه صبا ؟؟
صبا : ما ادري اشوف بعد اسبوعين ثلاثه يسير خير ، خلني ارتب اموري واوضاعي وبعدين املك ..
فيصل : أحح ، اسبوعين ثلاثه ، شلون بقول لمازن كذا ؟؟ ، عز الله بينهبل !!
ابتسمت صبا وقالت : كيفه مالي دخل اقل من اسبوع مستـحيل ..
فيصل : طيب طيب خلاص ، الا انتي متى بتجين البيت ؟؟
صبا : اممم ما ادري بشوف لمياء هي ودها تطلع اليوم من المستشفى بنتفاهم مع عمي واشوف ، يلا فيصل مع السلامه ..
فيصل : مع السلامـه ..
اول ما سكرت صبا من فيصل ، نقزت لسرير لمياء وهي تهزها وتقول : لمياء قومي قومي لمياء بسررعه ماتصدقين وش صاار قومي ..
لمياء فتحت عيونها شوي وقالت : يوووه صبا وش فيك خليني انام ..
صبا : لمياء قومي ، هذا موب وقت النوم تخيلي وش قال لي فيصل ؟؟
لمياء ورجعت تسكر عيونها : وشو .. ؟؟
صبا اخذت نفس وقالت : لمياء ، مازن يبينا نمـــــلك بكره .. !!!
فتحت لمياء عيونها فجأه من اللي سمعته وجلست زين على السرير وقالت : إيش ؟؟ وشلوون ؟؟ ليش ؟؟ وش صار ؟؟
صبا هزت راسها : تخيلي ،، يا ربيه ماني مصدقه ، لا لا مستحيل اللي صار ، يا ربيه ..
لمياء : دقيقه دقيقه ، وش السالفه الحين ... ؟؟
صبا : فيصل قبل شوي دق عليَ وقال ان مازن قبل شوي كان عند ابوي وقاله انه يبي ملكتنا بكره !! طبعا انا رفضت لو ايش تكون الملكه بكره مستحيل قلت لفيصل يقول لمازن انها مستحيل تكون اقل من اسبوع ..
لمياء : صبا ، رجلك هذا مهبوول ، تووه ماصار على رجعته 3 ايام قال بيملك ، لهالدرجه مستعجل ؟ ، وانتي ليش بتتأخرين كذا موب انتي ودك تتزوجين من زمان هاذي هي جت من الله ، انتي ماعندك شي !! فستانك من زمان مخلص ..
صبا : لميـاء ، بالعقل انتي الثانيه !! وشو بكره ؟؟ خليني استوعب الحين وارتب شغلي وبعدين السالفه كلها فستان !! ، الشعر والمكياج وهالخرابيط وين راحوا ؟؟ ، انا مابي ملكه أي شي ابي ملكه حلوه صح بسيطه بس ابي شي حلو ، ابي بوفيه واعزم القريبين واستانس ، مابي شخطه توقيع وخلصنا ..
|