صبا : يعني راح اقولهم اني ما لقيت لمياء بالراشد زي ماصار وانك انت وفيصل جيتم تاخذوني من الراشد ولما طلعنا من المواقف شفنا الحادث ونزلنا ولقينا لمياء مصابه ووديناها المستشفى وبكذا نفسر لهم سبب وجودنا هنا ..
مازن : ايه صح ما شاء الله عليك جبتيها بكذا ماراح يستغربون جيتنا بس الحين وينه ذا فيصل تأخر ؟؟
ناظر ساعته وقال : الحين انتي اقعدي مع لمياء لما يجون خالتي والباقين ، وانا بنتظر فيصل لما يجي ..
التفتت صبا تبي تفتح باب الغرفه الا تذكرت شي : مازن
مازن نفس الشي كان معطيها ظهره ويبي يمشي بس وقف لما سمعها تقول اسمه وقال بنفسه ( يا حلو اسمي على لسانك يا صبا ) ، التفت لها وقال: هلا
صبا : ترى امي بتجي توها مكلمتني وتبي تتطمن على لمياء ، و .. وبعد أ .. أأا ابي ... ابـي ..
مازن ابتسم : وشفيك صبا وش تبين تقولين لي ؟؟
انحرجت صبا ولا عرفت وش تقول : أ .. أأ ، خلاص خلاص مافي شي ..
رجعت تبي تروح الغرفه ، بس استوقفها صوت مازن : صبا مانتي متحركه من هنا الا لما تقولين لي وشو كنتي بتقولين ..
توهقت صبا واضطرت تقول له : مافي شي يسوى بس كنت .. كنت ابي اقول شكرا ..
مازن رفع حاجب وقال : على ؟؟؟
صبا : على اللي صار اليوم لان لولاك اليوم الظهر كان انا الحين ...
( ماكملت الجمله وسكتت )
مازن ابتسم ابتسامه ذوبتها : العفو ، ماسوينا شي انتي الغاليه صبا ، يلا بالإذن
مشى وتركها مصدومه من التغـير المفاجى اللي صار فيه ، امس بس عطاها نظره كلها احتقار واليوم يتبسم لها !! ، ماتدري وش صار فيه بالضبط لكنها تدري ان هالشي اسعدها كـثيير ، وخاصه كلمه (انتي الغاليه صبا ) حسستها انها شي مهم بالنسبه لها ،، ويآآ أنها تتمنى هالشي يدوم وما يزوول ابد ..
التفتت ودخلت الغرفه ولما فصخت الغطا انتبهت لمياء للابتسامه اللي على وجهها
لمياء : الله الله ، كل هذا عشان شفتي وجه الحبيب لدقايق ، وانا اللي امس اتشحذ منك هالابتسامه مافي امل وهو الضحكه شـاقه الوجه ..
انحرجت صبا زياده على كلام لمياء : وانتي الحين وش تبين تتدخلـين بينا ، خـير ؟؟
زادت ابتسامه لمياء وقالت : حركااااات الحين صار فيه ( بينا ) وما أدري وشو ؟؟
علميني علميني وش قالك وخلاك طالعه كذا يلا بسررعه ...
صبا ماتحملت هالإحراج وقفت وراحت للدريشه : لميووه ، ترى ان ماسكتي ...
قآطعتها لمياء : لا لا لا واللي يرحم والديك الا تهديدك تراني ما اتحمله ، خلاص بسكت ..
صبا : ايه عشان تتأدبين مره ثانيه ...
قعدوا دقايق كل وحده تفكر بالمستقبل قدامها واللي راح يصير ، سعاده ولا حزن ؟؟؟ بعد الصمت اللي دام فتره ، تغطت صبا مره ثانيه وتوجهت للباب في حين تكلمت لمياء : وين وين ؟؟؟ تتركيني لحالي ؟؟
صبا : هههههههه اعصابك اعصابك ، لا تخافين بشوف فيصل جا ولا لا ؟؟
لمياء : طيب بسرعه ارجعي ..
صبا : يا ربيه كل هذا حب ، ما اقدر انا على الشوق ..
لمياء : وع انا اشتاق لك ، كل السالفه ان ...
قاطعهم صوت الباب ومن بعده يدخل عليهم ابو لمياء وامها ،، اتجهت امها للمياء : لمياء ، لمياء حبيبتي وش صار عليك ؟؟!!
لمياء : يمه لاتخافين مافيني الا العافيه ، حادث بسيط والحمدلله طلعت منه بخير ..
صبا همست بإذن لمياء : بـسم الله قطوه ام سبع ارواح ..
التفتت لها لمياء : وشو وشو ؟؟ ماسمعت ؟؟ انا ام سبع اروح يأم الصرآخ انتي من صراخك فقعتي طبلة اذني الداخليه ..
قطع عليهم الكلام صوت ابو لمياء : وشفيكم تتساسرون ؟؟
راحت صبا وقفت جنب عمها ومسكت ذراعه : ما في شي بس فيه ناس يحسدوني ان عندي ابو زيكـ...
لمياء : شف شف ياهووه انتي ترى هذا ابوي قبل مايصير ابوكـ بالرضاعه ...
صبا : يماما هذا بابا نمبر 2
... : وانا اخو نمبر 2 بعد ..
التفتت صبا لورى لقت فراس يبتسم لها : والنعم بالبراذر نمبر 2 ...
راح عنها فراس واتجه لأخته لمياء : الحمدلله على السلامه لمو وش صار لك بالضبط ، فيصل برى يقول لي حادث وما أدري وشو ؟؟ علمينا السالفه بالتفصيل ؟؟
ارتبكت لمياء وما عرفت شلون تشرح الوضع لهم زين وناظرت صبا تستنجد فيها
تكلمت صبا : مافي شي بس هالدلوعه كانت رايحه للراشد ونزلت من السياره عند الرصيف هالذكيه وطبعا من زود الفهواه صقعتها سياره بس ما صار لها شي كبير وانا وفيصل ومازن كنا متوجهين للراشد وبالصدفه لحقنا عليها ووديناها المستشفى ووبس ، وهاذي هي قدامك مثل الغزال لا إله الا الله ..
فراس : ايه اشوى كذا السالفه على بآلي شي كبير صار لكـ ..
لمياء : ايه صح وين نواف وجنا ؟؟
فراس : جنا كالعاده بسابع نومه وحنا كنا مستعجلين وما فضينا نقومها ،، ونواف بالشغل صعبه يطلع بس راح نعطيه خبر انك احسن الحين ..
لمياء : طيب يبه ابي اطلع الحمدلله انا بخير ...
ابوها : بشوف الدكتور وش يقول وارد لك ..
طلع ابوها من الغرفه متوجه للدكتور ، اما صبا قالت : يماما ما اظن انك بتطلعين قبل يومين سمعت بإذني الدكتور يقول هالكلام ..
لمياء : يووه وشو يومين حشى اللي يشوفني يقول متكسره ولا حالتي خطره ما فيني شي ،، ( حركت يدينها على فووق عشان تثبت لهم ان مافيها شي لكنه المها ولا قدرت تحرك يدها من الام ،، ) آآآي ياربيه فجأه المتني يدي ..
راحت لها صبا وام لمياء ، قالت صبا : طبعا بتألمك توك اليوم صار الحادث وتبين تطلعين ، الحين ارتاحي ونامي وبتسيرين بخـير ...
غطتها صبا زين ، وجت امها تحب راسها وتقول : حبيبتي لمياء اسمعي الكلام ولا تتحركين كثير ولا تسيرين بزر ..
لمياء : طيب ان شاء الله انا بنام الحين بس انتم وين بتروحون ؟؟
امها : بروح البيت اجيب لك ملابس وارجع انام معك طيب ..
صبا : لا لا خالتي انا اللي بنام معها انتي ارتاحي البيت يحتاجك ، انا بجيب ملابسي وملابسها وارجع المستشفى مره ثانيه ..
ام لمياء : ما قصرتي حبيبتي صبا خلاص اجل بجيب لكم من البيت شي تاكلونه ولا تخلين ذي ( تأشر على لمياء ) تاكل بطاطس وبيبسي وهالخرابيط خليها تاكل شي زين وينفع جسمها ...
ناظرت صبا لمياء بنذاله وقالت : ابشري خالتي ما طلبتي شي مستحيل اخليها تذوق لحسه من هالخرابيط ، شوربه ويخب عليها ...
لمياء : ايوه ايوه عز الله رحت فيها اذا صبا بتقعد معاي ، اففففف يمه وش ذا ابي اكل زي الناس ، مابي خرابيطكم ذي هريس ومرقوق وشوربه وما ادري وشو ؟
صبا : اوووش ولا كلمه يلا نامي واخمدي ..
قام فراس للباب وهو يضحكـ : الله يعينك يا لمياء اذا صبا بتقعد عندك بيصير المستشفى سجن لك .. خخخخخخ
صبا : يلا يلا بس اطلع انت ..
طلع فراس مع امه واتجت صبا للمياء تقول : شوفي بروح الحين اجيب ملابسك ويا ويلك ان مانمتي مفهووم ..
غطت لمياء وجهها وقالت : خلاص فهمت طسي انتي بس ...
تغطـت صبا وطلعت من الغرفـه وعلى وجهها ابتسامه فرحآنه ان لمياء كانت بخير ، مشت بالسيب تدور فيصل ومازن ، وهي تغني بصوت واطي ..
انت غير الناس عنـــــدي
انت عندي شي كبيــــــــر
كيف بصبر وانا شايــــف
ناس من حولك كثيـــــــــر
وانا احبك واقولها لـــــــك
كلمه خليها في بالـــــــــك
انا مانـ ...
قبل ما تكمل انتبهت لفيصل ومازن قدامها قاعدين على الكراسي ومعطينها ظهرهم سمعت فيصل يقول : مازن شف انا كل همي تكون اختي مرتاحه وسعيده مع اني عارف ان هالسعاده بتكون معاك لازم تلاقـي حل للمشكله ولا راح تتنازل عنها ..
مازن : وانت تتوقع اني بتنازل عن اختك بهالسهوله لا طبعا ، لكن اللي صار لي مخليني ما اعرف ايش الحل اللي يضمن سعاده صبا ، اتزوجها او اتركها تعيش مع واحد ثانـي .. ؟؟
فيصل : مازن انت تحب صبا ؟؟
مازن بانفعال : طيب وانت تشك بهالشي انا احب صبا ومستعد اسوي أي شي عشان اشوفها فرحانه واذا بيكون هالشي بزواجي منها فانا بكره بحدد وقت الملكه مع عمي ..
حطت صبا يدها على فمها من المفاجأه اللي سمعتها قبل شوي ، كانت تبي تسمع زياده لكنها فوجئت بيد على كتفها ، التفتت لقت امها ، ابتسمت لها وقالت : هلا يمه جيتي ..؟؟
ام صبا : ايه حبيبتي جيت ها وين غرفه لمياء ؟؟ ابي اتطمن عليها ...
صبا : لا تخافين هي الحين نايمه وصارت احسن بس بتنام بالمستشفى يومين وودي انام معها يمه ممكن ؟؟
ام صبا : طبعا ممكن ، اجل انا بروح الحين ما يحتاج قعدتي ، بس انتي روحي الحين مع اخوك جيبي ملابس لك ولها ...
صبا : طيب بروح انادي فيصل ..
تركت صبا امها وراحت لجهه مازن وفيصل و تفكر باللي سمعته قبل دقايق ما فهمت ايش كانوا يقصدون بالمشكله اللي عندهم ؟؟ وبعدين ايش دخلها هي بالمشكله ذي ؟؟ وليش تكون سعادتها بواحد ثاني غير مازن ؟؟؟
ما حست بنفسها الا هي واقفه قدام فيصل ومازن وصوت فيصل يقول لها : صبا وش جابك ؟؟
صبا : هاا ، هلا فيصل وينك لي ساعه وانا ادورك ؟؟
|