ابتسم ابتسامه بسيطه وقال بنفسه : شكلها صبا تغيرت بالسنين اللي فاتت وزادت شجاعه وصبر عن قبل ..
طلع جواله يكلم فيصل ويشوف ايش صار على ناصر ، دق عليه وبعد رنتين رد عيه فيصل بصوت متعب : الو .. هلا مازن ..
مازن : هلا فيصل ، هآآ ايش صار عندك ؟؟
فيصل : لا تخاف قلت لهم كل اللي صار قبل وبلغوني انهم بيكملون الباقي ويسجلون اعترافاتي واعترافته ويطابقونهم والحين انا باجيكم ، المهم انتم وش صار عليكم عسى لمياء قامت ؟؟
مازن : الى الان اللي نعرفه لأ ، لكن ان شاء الله احسن والدكتور دخل عليها قبل شوي بس رفضت الممرضه تتدخلنا وتقول اصابتها موب خطيره كلها كدمات ورضوض بسيطه ، لكـن .. هههههههههه ما ادري وش اقولك ان احس ان المريضه صبا موب لمياء ..
فيصل باستغراب : صبا !! ليش هي تعبت ؟؟
مازن : ههههه ، لا بس طول الوقت تصيح ماوقفت دموعها ابـد ، اللي يشوفها يقول ميت لها احد ولا مصيبه كبيره حلت عليها ، والمشكله لي ساعه وانا اطمنها ان حاله لمياء موب بذيك الخطوره بس هي لا حياه لمن تنادي .. هههه
فيصل : ههههههه ياحليلها صبا ، بس اعذرها لان لمياء قريـبه مره لصبا وتمووت عليها عشان كذا لا تستغرب منها هالشي ..
مازن انتبه ان الدكتور طلع من الغرفه وتوجه لهم عشان كذا قال لفيصل : فيصل الدكتور الحين طلع ، بعدين اكلمك ، سلآم ..
فيصل : بشرني اذا خلصت ، يلا مع السلامه ..
سكر مازن من فيصل بالوقت اللي شاف صبا تقوم من مكانها وتوقف جنب مازن عشان تسمع الدكتور وش يقول
الدكتور : السلآم عليكم ، انتم اللي جاييـن مع المريضه ؟؟
مازن : وعليكم السلام ، ايه حنا ، ها دكتور بشر شلون حالتها ؟؟ عسى قامت ؟؟
الدكتور : لا تخاف هي الحين قامت بس يبيلها ترتاح شوي ، بس انا ابي اعرف ايش صار لها عشان تجي عندنا بهالشكل ؟؟!
مازن ارتبك ما يدري وش يقول : صـ .... صـار لها حادث سياره ..
الدكتور : آهـا فهمت ،، طيب انا بطمنكم ما صار لها شي خطير بس تعرضت لضربات تركت اثـر بجسمها ومع الايام راح تختفي ان شاء الله ..
تكلمت صبا : طيب دكتور ممكن اشوفها الحين ؟؟
الدكتور : طبعا ممكن حنا الحين نقلناها غرفه احسن وراح نخليها يومين على الاقل بالمستشفى لحد ما تشفى تماماً ، روحي للمرضه هناك وهي تدلك على غرفتها ( اشر لها على ممرضه قريبه منهم كانت تشتغل بأوراق عندها ) ..
راحت صبا عند الممرضه تسألها عن غرفه لمياء ، اما مازن قال :
شكرا دكتور ما قصرت ، تعبناك معنا ..
الدكتور : لا يا ولدي حنا ماسوينا شي هذا واجبنا ، بس بسأل وين ولي امر المريضه لازم يجي عشان يوقع على بعض الاوراق ..
مازن تلعثم ولا درى وش يقول ، شلون راح هالموضوع من بـاله وش يقول الحين لأبو لمياء ، مضطر يكذب عليه زي ماقال للدكتور ...
مازن : هآ ، إيه راح ابلغ ابوها الحين واخلـيه يجي ..
الدكتور : طيب عن اذنكـ بروح اكمل شغلـي ، وإذا جا الوالد انا بالمكتب استناه..
مازن : إن شاء الله ..
مشى الدكتور وترك مازن بحيرته والافكار تجيه من كل جهه ، كيف راح يشرح لابو لمياء وخالته الموضوع ؟؟ وبعدين صبا !! صبا راح يستغربون حظورها المفاجئ ومعرفتها باللي صار قبلهم !! ، تنهد واتصل على فيصل قبل يقوله حاله لمياء وبعدين يتصل على ابو لمياء ..
صبا بعد ما سألت الممرضه وين غرفه لمياء ؟؟ اتجهت للغرفه تبي تتأكد من سلآمه لمياء لازم تشوفها بعيونها ان مافيها شي ، فتحت الباب ودخلت الغرفه الواسعـه لفت عينها صوب السرير اللي كانت لمياء منسدحه عليه ومغمضه عيونها ، قربت صبا من عندها وفكت غطاها وقعدت على الكرسي اللي جنب السرير ، انتبهت لمياء للحركه اللي صارت بالغرفه وفتحت عينها ببطئ من التعب اللي فيـها ، شافت قدامها وجه صبا واللي ممتلي دموع وهي تقول :
لمياء .. لمياء حبيبتي الحمدلله على سلامتك ، ماتشوفين شر يا عمري ..
تكلمت لمياء بشبه همس : الله يسلمك ، ورجعت تسكر عينها تبي ترتاح ..
صبا عرفت انها بخير وودها ترتاح ، تمت ماسكه يدها وتقرئ عليها قران ، بعد 10 دقايق قامت صبا من مكانها ودخلت الحمام تغسل وجهها وتمحي آثـار التعب والضعف اللي بادي على وجهها ، غسلت وطلعت من الحمام شـافت جوالها يرن باسم امها ، ابتسم وهي متأكده ان امها ميته خوف عليها ، ردت عليها :
صبا : آلو ..
ام فيصل : حبيبتي صبا وينك انتي الحين وراك ماتردين على مكالماتي مت خوف عليك يا بنيتي وينك الحين ؟؟
صبا : لا تخافين يمه انا بخير والحين انا موجوده بالمستشفى ..
ام فيصل : بالمستشفى ، وراه عسى ماشر ؟؟
صبا : لا بس صـار حادث بسيط بلمياء والحين هي احسن وانا قاعده عندها ..
ام فيصل : لمياء !! والحين هي شلون ؟؟ الا قوليلي باي مستشفى انتم الحين وانا جايه لكم هاذي بنتي الثانيه لازم اطمن عليها ..
صبا : تعالي الله يحيك ، هنا بمستشفى الـ ( ***** )، غرفه رقم ( **** )
ام فيصل : يلا مع السلامه ، هذاني جايه ..
صبا : مع السلامه ..
اول ماسكرت صبا من امها ، تكلمت لمياء ببطأ :
اكيد هاذي خالتي صح ؟؟
صبا : أيـه ، ههههههه يا حليلها امي انهبلت يوم عرفت انك بالمستشفى وتقول الحين بتجي ..
تغيرت ملامح لمياء للحزن وقالت : وامي وابوي دروا ؟؟
صبا : هذا مازن الحين يكلمهم وبيجون ..
لمياء : طيب وش بنقول لهم بنخلي السبب حادث سياره ؟؟
صبا تنهدت وقالت : شنسوي مالنا الا هالحل ، صعبه نقول لهم السالفه ، المهم ماعليك انتي الحين من هالسوالف وارتاحي ولا تصدعين راسك اوكي ..
ابتسمت لمياء : يووه عاد الحين جتنا الدكتوره صبا ، واللي يرحم والديك اكرمينا بسكوتكـ ، مالي خـلق نصايحكـ ..
حطت صبا يدينها على خصرها وقالت : ما شاء الله الحين اكرمينا بسكوتكـ ، وامس بالعزيمه ( تقلد صوت لمياء ) صبا سولفي معي لا تسكتين سولفـي ، والحين تبيني اسكت هآآ ...
لمياء : خلااااص صبا ..
صبا : طيب ، عشآنك بسكت ..
سمعوا صوت احد يدق الباب ، سألت صبا : ميين ؟؟
مازن : انا مازن صبا تعالي برى ابيك شوي ..
صبا : طيب دقيقه ..
راحت صبا للكرسي واخذت غطاها وتغطت فيه ، التفتت على لمياء وقالت لها : شوي وارجع لك لا تخافـين ..
هزت لمياء راسها بإيه ، وطلعت صبا تشوف مازن برى ..
مازن : ها صبا وش صار على لمياء عساها بخير ؟؟
صبا : الحمدلله احسن بس يبيلها ترتاح شوي ، ها ايش صار على خالتي وزوجها عرفوا ..؟؟
مازن والضيقه باديه على وجهها : ايه ، قلت لهم وطبعا العذر كان حادث سياره وقالي عمي انه بيجي هو وخالتي يتطمنون عليها ، بس انا خايف يستغربون من وجودنا هنا ولا ادري وش اقولهم ؟؟!!
صبا : امممم ، طيب عندي حل انا راح اقولهم جزء من الحقيقه ..
مازن : ما فهمت ؟؟ شلون جزء منها ؟؟
|