يا ظالمة
يا ظالمة زينـك بشيـن السوايـا
من وين لك قلبٍ على طول جاير
ما أبغى الدوا لا صار جرحك دوايا
باكر على الظالم تـدور الدوايـر
اخر علاجي الكي و إنتي الكوايـا
للحب عبره وإنتي قربـك عبايـر
لو هو على زينك بنلقـى صبايـا
المشكلة في الحب تعمى البصايـر
الصبح واضح والخطايـا خطايـا
والربح من بعض الأوادم خسايـر
يا نفس قومي عن غرام البقايـا
ويا قلب قبل تحب شاور وخايـر
أولاد نـاس ولا نحـب الوصايـا
وكلٍ يرى نفسه يعـادل عشايـر
ما كـل قلـبٍ ينشـرى بالهدايـا
ولا كل كسر تفيد فيـه الجبايـر
المعطي الله مـا لخلقـه عطايـا
لو هي على خلقه سقتنا المرايـر
عزاي ربٍ يعطي حسـب النوايـا
يرحم عزيزين الذمـم والضمايـر
ناسٍ تدس الهـم بيـن الحنايـا
وناسٍ وربي ما درت ويش صاير
هذاك حظه مثـل بيـض الثنايـا
وهذاك حظه مثل سـود الظفايـر
|