الجـــــــــــــــــــــــــــــــــــــــــــــــ ــــزء الثـــــــــــــــــــــــــــــــــامن
بوعبدالله فكر انه يسافر مع زوجته لمكه والمدينه في الكم يوم اللي بيرحون لينه وعبدالله وريم لبنان وام عبدالله رحبت بالفكره كثير
عبدالله رجع البيت ودخل مالقى احد في الصاله العاده امه تكون قاعد في الصاله لكن بعد ماسافرت مع ابوه مكانها صار فاضي
لانه قليل مايدخل ومايلاقي امه وحس بمكانها وابتسم ودعى في قلبه ان المكان مايفقدها بشر..عبدالله كان تعبانه فأختصر الطريق وراح غرفته ينام
دخل عبدالله الغرفه ولقاها مظلمه مافي غير ابجوره نورها ضعيف كانت مولعه شاف ريم نايمه عقب ماهلكها نايف لين مانام
عبدالله فصخ غترته ودخل اخذ له شاور وحلق ورجع طلع ووقف جنب سرير نايف وقاعد يتأمل برائته وهو نايم وخدوده الحمره ولمس خصل شعره الحرير
وكان وده يبوسه بس خاف يصحى ويجنن ريم وهي مانامت زين وراح للفراش
ولقى ريم نايمه وقعد يتأمل خطوط الاهراق في وجهها من قلة النوم باسها على خدها وراح بعدها في سابع نومه
...........................
في بيت بوعبدالله
لينه:هلا مريومه...شخبارك..؟
مريم: الحمدلله مشتاقتلك..
لينه: والله حتى انا...وشرايك تجيني..؟
مريم: لا اليوم بلاش مشغوله مره خليها وقت ثاني
لينه: خلاص براحتك اي وقت تفضين كلميني البيت بيتك..
مريم: تسلمين ياعسل...بس ليش فاضيه طول الوقت..؟...الحين انتي متزوجه والله يوم انا كنت مثلك
كنت احوس حوووس
لينه: هههههههههه لا ياختي انا ماعندي حوسه ابد
مريم: خلك خلك كذا هذي احلى ايام وانتي مو قاعده تستمتعين فيها
لينه في قلبها: اااه ياليت اقدر ياليت
لينه: حطوط يابنت الحلال
مريم: الله يهنيك ويوفقك
لينه:ااااامين
هاللحظه سمعت لينه صوت الباب
لينه: اقول مريووم صوت الباب بروح اشوف من جاي وانشاءالله برجع اكلمك..
مريم: اوكي لولو خذي راحتك
لينه: يلا مع السلامه
مريم: فمان الله
...........................
راحت لينه تشوف من كان جاي وحاولت تعرف من الانتركم
لينه: نعم
الضيف:...........
لينه:مين..؟
الضيف وهو مستمر برن الجرس:...........
لينه بعد ماقفلت السماعه: وشفيه ذا ما يرد...؟...اروح اشوف انا..
لينه وهي تفتح الباب: مين..؟
مزون: مفااااااااااااااجأه
محمد: مرررررررررررحبا
لينه بفرحه وهي تحضن مزون: مزووون وحشتيني..
مزون : هههههههههه انتي اكثررررر شخبارك لولو..؟
محمد: الله وانا مالي شي.....لنا الله
لينه وهي ترتمي في حضن محمد:انت وجههك لاتقول هالكلام وحشتوووني..
محمد: وانتي اكثر وحشتيني لولو مووت
لينه: ليش ماقلتولنا انكم جايين..؟
مزون: بغينا نسويها مفاجأه
لينه: واحلى مفاجأه والله وين ساره وعبدالعزيز..؟
محمد: ساره مين بس خلاص ساره ماراح تشوفينها هنا الا نهاية الاسبوع وزين لو شفتيها نهاية الاسبوع
لينه: هههههههههههه
...........................
خالد: وشلون شهر العسل..؟
عبدالعزيز:والله حلو الحمدلله
خالد: ماكان ناقصكم الا انا
الكل: ههههههههه
ام عبدالعزيز: عقبال ما اشوفك مع زوجتك وعيالك
خالد: لالالا وش زوجه وش عيال ما ابي
ام عبدالعزيز: وليش ما تبي..؟...هذا اخوانك وعيال عمامك كلهم تزوجوا وشمعنى انت يعني..؟
خالد: كذا انا ما ابي
ابو عبدالعزيز: استح على وجهك وش ماتبي انت..؟
ساره: هالكلام الحين بعد مايشوفنا كلنا في بيوتنا بيغار ويقول زوجوني
خالد: ههههههههههههههه اي هين
ام عبدالعزيز: الله يسمع منك يابنتي
بو عبدالعزيز: ها سارونه لايكون عزيز ضايقك ولا زعلك في شي
ساره: لا بالعكس عمي عزيز مافي مثله
عبدالعزيز: انا اقدراضايق ساره حبيبتي..؟
ام عبدالعزيز: الله يتمم عليكم
الكل: امين
...........................
ريم بصوت مليان نوم: عبدالله انت من متى هنا..؟
عبدالله بخمول: ما ادري
ريم:ماحسيت فيك..
عبدالله وهو يحاول يفتح عيونه: جيت ولقيتك نايمه مابغيت ازعجك..
ريم: شكلي انا اللي ازعجتك..
عبدالله وهو يقوم ويعدل جلسته: ليش..؟
ريم: لابس كنت في عزنومك وقومتك...
عبدالله وهو يحضنها: لاحبيبتي لاتقولين كذا
ريم وهي تبعد عنه: طيب ماتبي غدا..؟
عبدالله: مو جوعان..
ريم:طيب
عبدالله: ريم فيك شي..؟
ريم: انا..؟؟
عبدالله: اي احسك هالايام متغيره علي..
ريم ببرود: لا مافي شي
عبدالله بأستغراب: طيب تعالي بكلمك
ريم: عبدالله معليش بس ابي اخذ شاور نتكلم بعدين
راحت ريم وخلت عبدالله في حالة تعجب وشفيها ريم عمرها ماكانت كذا معي اكيد فيها شي....
...........................
لينه:استانستي عاد..؟
مزون: اي والله مرره ...ومحمد ياقلبي هو ماقصر
لينه: بعد ياقلبي وما قصر والله وتطورنا
مزون: هههههههه تدرين عاد السفر يغير ما احد يضل على حاله
لينه: ههههههه يعني اول كنتي قرويه والسفر عدلك
مزون: ايكزاتلي
لينه: ههههههههه حتى اللغه تطورت
محمد وهو داخل عليهم ويتكلم بنبره حاده:مزون
مزون: نعم...!!
محمد بنفس نبرة الصوت: قومي..
مزون:وشو..؟
محمد: قلتلك قومي..
مزون وهي تقوم: نعم...
محمد بأبتسامه تذوب: تفضلي.......كل سنه وانتي طيبه
مزون بعد ما استوعبت: اووووه صح اليوم يوم ميلادي...
محمد: عقبااااااال مية سنه وانتي معي طبعا...
لينه: ههههههههه كل سنه وانتي سالمه ياعمري
مزون: وانتوا بخير يارب...وانا ناسيه هاليوم...(وهي تلتفت لمحمد) ياحبيبي انت متذكر وجايب لي هديه بعد... ياحبي لك..
محمد: وانا اقدر انسى..؟
لينه: وش قصدك يعني انا ناسيه..؟
راحت لينه وطلعت من العلبه اللي على الطاوله كيس لونه بني وقدمته لمزون
لينه: تفضلي عقبال مية سنه يارب
مزون وهي تحضن لينه: تسلمين والله
محمد: الحين وشمعنى يعني لينه تحضنينها وانا لا..؟
لينه: هههههههه فاقد حنان
مزون بأحراج: انا قاعده معك شهر ماشبعت..؟
محمد: هههههههههههههه لا والله ما اشبع ابد
لينه: قايلين مو شايف خير
محمد:يلا عاد ماتبين تفتحين الهدايا..؟
راحت مزون وقعدت على الكنب وجلست جنبها لينه ومحمد من جهه ثانيه
فتحت مزون هدية لينه كانت عباره عن ساعه بيج من جلد الثعبان وعليها زخرفه بالالماس
مزون: وااااو مره حلووه تجنننن تسمليين يالينه ياعمري......بتشوفين هديتي يوم ميلادك
لينه بأبتسامه: العفو حبيبتي مابينا هالسوالف الماصخه
مزون: هههههههههه
محمد: اقووول وهديتي انا..
فتحت مزون هدية محمد كان خاتم مرصع بألماس الوانها مايله للون الوردي
مزون وهي تلبس الخاتم: فضيييييييييع محمد روعه
محمد بأبتسامه: انتي الروعه انشاءالله اعجبك..؟
مزون وهي تمسك ايده: اكيد محمد يكفي انه منك...ولونه جاي مع نفس اللون اللي كنت افكر اشتري خاتم مثله...
محمد:انا كنت متعمد هالشي
مزون: محمد انت كنت قاصده
محمد: يس معقوله انسى لك شي..؟
مزون وهي متأثره من معاملة محمد من بداية زواجهم: يارب يخليك لي ولايحرمني منك قول امين..
محمد: امين ويخليك يارب
لينه: بس والله يامحمد انت حركاااات اثاريك تعرف في هالسوالف ذوووق اسبيشل بس ماشي مع وشو ما فهمت..؟
مزون:عندي فستان يالينه مررره حلو بس كنت ابي له اكسسوارات ماشيه مع الوانه ومحمد ماقصر والله
لينه: اااهااا بس وانا احسبك ماتعرف شي
مزون:اي والله وشذا انا بعد ماتوقعت محمد فيه هالرومنسيه ذي كلها.........اقووول لايكون بس لك ماضي وسوابق
محمد ببراءه: نعم؟؟
لينه: ههههههههه هذا اللي يقول بغيناها طرب صارت نشب
محمد: وش سوابقه جايب لك هديه واقولك كلام حلو وبعدها بتقلبين علي هههههههههههه
مزون: لاخلاص ماراح اقلب مشكوور حمود...
محمد: ههههههه العفوووو
..........................
بيت بو نايف
نايف وهو طالع: يمه انا بطلع الحين
ام نايف: وين..؟
نايف: بطلع وبس عن اذنك..
ام نايف: الله يهداك...
نايف: ليش وشفيني..؟
ام نايف: الله يهدي الجميع ياولدي....انت تبي اي شي تسوي عليه مشكله
نايف: انا انشاءالله ربي هاديني بس خلوني
ام نايف: لااله الا الله انت وشفيك مو كافيك اللي مسويه من كم يوم..؟
نايف حس بضيقه لما تذكر اللي صار
نايف: يمه خلاص عن اذنك مع السلامه
ام نايف بكدر: في حفظ الله
..........................
في مكان ثاني بعيد عن الباقيين في أمريكا تحديدا في سان فرانسيسكو بضاحية رونارت بارك
المكان كان مليان بريحة السجاير والمكان شبه محيوس
سعد وهو يدور على اغراضه:انت وين الموبايل والولاعه..؟
منذر:وشعرفني...انا الحين مو لاقي حتى التكت...
سعد:فالح ضيعتهم..؟
منذر:اقول روح اشوف وين وديت اغراضك انت أول...
سعد: وانت الثاني حتى هالاجازه بتقعد هنا..؟
بدر وهو يلتفت ويتكلم بنفس شينه:اي...
منذر: انت كل سنه قاعد هنا ماتفكر تشوف اهلك ياخي..؟
بدر بنفس الطريقه:لا عندكم شي..؟
سعد: الحين موتقول اختك انخطبت وبتتزوج وانت ولا كأنك اخوها..؟
بدر: كيفها تتزوج تقعد وش اسوي لها..؟
منذر: روح لها شوف هاللي بياخذها شوف اهلك كم سنه ماطبيت ديرتك...
بدر: سكروا الموضوع وانا حر اروح ولا اقعد خلاص براحتي
سعد: وانت صادق براحتك
بدر: انا بنام ياريت ماتزعجوني..
وراح بدر قبل ما يسمع ردهم ونام
..........................
ساره:سرياتي خذي هالملابس وغسليهم بس نقيعهم في صابون أول
سرياتي وهي تاخذ الملابس: اوكي مدام
ساره: خلاص روحي شكرا
سرياتي وهي رايحه: نت اتول
راحت ساره عند الكنبه وارتمت عليه من التعب
ساره وهي تغمض عيونها:اوف ياربي
عبدالعزيز وهو داخل: انت هنا..؟
ساره: اي مثل ما انت شايف...
عبدالعزيز وهو رايح للحمام يغير ملابسه: وشفيك شكلك تعبانه..؟
ساره وهي ع نفس حالتها: اي شوي
بعد مرور ربع ساعه تقريبا خذا فيها عبدالعزيز شاور وغير ملابسه وطلع لساره
عبدالعزيز:سلامتك تعبك السفر..؟
ساره وهي تفتح عيونها: اي والله...(بعد ما انتبهت)..نعيما
عبدالعزيز بأبتسامه: الله ينعم عليك...روحي خذي شاور ونامي عقبها عشان ترتاحين
ساره: خلاص بقوم..أقول عزيز ابي ازو اهلي..
عبدالعزيز: انشاءالله نروح لهم الليله..؟
ساره: اي تكفى..
عبدالعزيز:خلاص ولايهمك بس روحي خذي لك شاور ونامي عشان تصيرين مرتاحه في الجلسه
ساره: طيب عن اذنك
عبدالعزيز: تفضلي
راحت ساره خذت لها ملابس وراحت تتحمم وعبدالعزيز ماقاوم النعاس ونام وطلعت ساره ونامت هي بعد
..........................
ريم كانت نازله وسمعت حس لينه وسمعت حس محمد ومزون وتوقعت انها تتوهم ويكون احد جاي يزورهم او صوت التي في بس احتياطا خذت الجلال وراحت لمصدر الصوت
ريم: السلام عليكم
الكل: عليكم السلام..
ريم بأبتسامه: جيتوا..؟...مشاءالله الحمدلله ع السلامه
محمد ومزون:الله يسمك
سلمت ريم على مزون وقعدت معهم
ريم: ياحليلكم لكم وحشه والله
محمد: تسملين والله
مزون: انتوا اكثر بعد..
ريم: مزون وعبدالعزيز جاوا معكم..؟
مزون: اي بس راحوا بيتنا ويمكن نروح لهم كلنا بالليل اذا عمي وخالتي مسافرين..
ريم: اهم شي انكم رجعتوا الحمدلله على سلامتكم
مزون:الله يسلمك
محمد: أم نايف وين عبدالله
ريم: فوق الحين بينزل...كم الساعه..؟
لينه: اربع
ريم: اي خلاص اجل الحين ينزل عشان الشغل
مزون: اجل اتغطى قبل ما يجي
خذت مزون الجلال بسرعه وتغطت
عبدالله وهو داخل يسلم على محمد: هلا والله بو جاسم الحمدلله على السلامه
محمد بفرح: هلا فيك الله يسلمك...شخبارك..؟
عبدالله: تمام والله انت كيفك ليش ماقلت لنا انك جاي..؟
محمد: حبينا نسويها مفاجأه
عبدالله: احلى مفاجأه اشتقنا لكم يالبايخ واشتقنا لثقالة دمك..
محمد: ههههههههههه هذا انا جيت
عبدالله: متى الوصول
محمد: عالظهر
عبدالله: الحين مو المفروض انكم بتجون الاسبوع الجاي..؟
محمد: اي ياخي رجعنا بدري ولا مثقلين عليكم..
عبدالله: اقول عاد وشومثقلين بلا كلام ماله داعي زين انك جيت ياشيخ معناته مافي سفره للبنان..
محمد: هههههه لا طبعا يالخاينين مافيه بتكنسلونها...
عبدالله: ها مزونه شخبارك..؟
مزون: لا..؟..اشوى انك مانسيتني..
عبدالله: ههههههههه وانا اقدر انساك والله لك وحشه..شخبارك..شلون محمد معك..؟
مزون: الحمدلله بخير انت شلونك..
عبدالله: والله بخير يوم شفناكم
مزون: تسلم
عبدالله كان يعامل مزون مثل أخته لينه وماخذ عليها حتى ريم ماكنت تزعل لانها عارفه علاقتهم ومحمد ما يتضايق من هالشي
وهالشي كان ينطبق على عبدالعزيز ولينه بعد ....تقريبا كانت علاقتهم كلهم مع بعض كذا
عبدالله: نورتوا والله طيب روحوا ارتاحوا عقب السفر
محمد: بس يحطون الاغراض ونروح..
لينه: اضن خلاص رتبوا المكان
عبدالله وهو يقوم: يلا روحوا ارتاحوا وانا بعد بطلع الحين تأخرت على الشغل
محمد: الله معك....يلا انا بروح ارتاح تجين مزون..؟
مزون: اي الحين جايتك..
محمد وعبدالله:سلام
الكل: مع السلامه
لينه: انتي وشو جايتك بعد..؟..روحي خلصينا انخمدي وتعالي لما تقومين شكلك جنيه تبين تنامين
مزون: هههههههههه يمه شفيك هبيتي في وجهي تحسبين بقعد بروح انام احسن من مقابل وجيهكم
لينه: هههههههه روحي يلا
مزون: اوكي سي يو
لينه: وشفيه لسانك انعوج بعد ماسافرتي.؟
مزون: هههههههههه اسفه جده لينه سلام
لينه: هههههه مع السلاامه
راحت مزون لمحمد اللي كان رايح في سابع نومه بعد ما تحمم وغير ملابسه وهي نفس الشي تحممت ونامت
...........................
ركب سيارته وحركها وقعد يفكر في طريقه
وشفيها ريم هالايام..؟...أول مره تعاملني بهالطريقه وهالجفاء حتى لما جيت اطلع ما تكلفت تسألني تغديت ولالا
العاده ريم تقولي انتبه لنفسك لاتتأخر بشتاقلك...معقوله عشان محمد ومزون ولينه كانوا قاعدين..؟...
لا اصلا هي من امس وهي مو طبيعيه توقعت انها كانت تبي تنام بس حتى قبل لاتنزل تحت كانت مضايقه وهي بالغرفه وتلكمني بطريقه غريبه
ليش..؟..انا ماسويت لها شي ولا زعلتها بشي والله عجزت اعرف ليش كانت كذا..يمكن كانت مضايقه شوي خلاص اخليها
احيانا الواحد يصير مو طايق نفسه وهي نايف متعبها يعني مو ناقصه شكلي انا أكبر المسائل وهي صغيره....
كمل عبدالله طريقه وحاول يتجاهل احساسه بأن ريم فيها شي....
............................
أم غاده: غاده بغيتك في سالفه
غاده:سمي يمه
ام غاده: سم الله عدوك...سمعي يابنتي أم ابراهيم كلمتني في موضوع زواجك انتي وابراهيم تقول تبي المكله
تكون في هالصيف بدال مايكون خاطبك سنه كامله أنا قلت لها اشاور ابوك واشوف انتي وش تقولين والله يكتب اللي فيه الخير..انتي وشرايك..؟
غاده: والله مدري ابوي وشقال..؟
ام غاده: ابوك ماعنده مانع الباقي عاد رايك انتي..
غاده بحيا: اللي تشوفونه...
ام غاده: اجل خلاص بنقولهم موافقين..
غاده: طيب وبدر..؟
ام بدر بتنهيده: اخوك ذا بديت اغسل ايدي منه
غاده: يمه لاتضيقين خلقك
ام غاده: والله مامنه رجا الله يهديه لنفسه
غاده: انشاءالله بس لو مارضى يجي الصيف الجاي
ام غاده: اضن هذا اللي بيصير وبعدين هو مو ولد عمره اربع سنين بقعد اربي فيه من جديد
غاده: الله يهديه يارب ويصلحه
ام غاده: الله يسمع منك..ياحليلك ياغاده كبرتي وبتتزوجين البيت بيصير خالي من بعدك
غاده بأبتسامه: عشان تعرفون قيمتي وتعرفون اني ماليه عليكم البيت
ام غاده : اي والله
غاده بأبتسامه: بتفقدوني يا امي..؟
ام غاده والدموع بعيونها وهي تحضن بنتها: مانفقدك بشر يارب...الله لايورينا غلاك..
غاده وهي بحضن أمها: يابعدي عمري يا امي الله يخليك لي ويخلي لنا ابوي
ام غاده: امين ويسعدك ويهنيك..
............................
دخلت لينه المطبخ وفتحت الثلاجه تدور اي شي تاكله
لينه: سيتي ايش الغدا..؟
سيتي: ماكروني..
لينه: فااالحه ياختي هذا اللي الله قدرك عليه..؟
سيتي بضحك: اووووه مدام وات دو يو ونت..؟
لينه: ما ابي شي استريحي بس هههههه..مستر عبدالله تغدى..؟
سيتي: نو..
لينه:ليش..؟
سيتي: اي دونت نو..
لينه استغربت غريبه عبدالله ماتغدى وريم خلته يطلع بدون غدى...
.............
لينه: ريم عبدالله ماتغدى..؟
ريم: ما اضن..
لينه: بس عبدالله مافطر يعني من الصبح قاعد بدون اكل..؟
ريم: والله ماادري عنه يالينه...
لينه اتسغربت بس ماحبت تتدخل وتضايق ريم بسؤالها
...................................
أم فيصل:عنود وين أختك..؟
عنود: ما ادري يمه شكلها نايمه...
أم فيصل: وشذا النوم...تدرين الساعه كم..؟
عنود: ما ادري عاد يمه وشفيها...
أم فيصل: قومي فزي روحي شوفيها قوليلها خلاص يكفي نوم...
عنود: يااربي...انشاءلله بروح اقولها...
راحت عنود غرفة عهود وتوقعت انها بتلاقيها نايمه بس عنود انفجعت من اللي شافته وبقت تصيح وتصارخ...........
...................................
ليش ريم متغيره على عبدالله في شي صاير ولا عبدالله ولينه متوهمين ...؟؟
كيف بتكون حياة عبدالعزيز وساره ومحمد ومزون...؟؟
عنود وش اللي صدمها...؟؟
.................................................. .......
|