البارت الرابع و الثلاثين
معقوله ... ساميه !!!!!!!!!!!!!
كانت تشم تدرون وش تشم ؟؟!!
مخدرات !!!
من شدة ذهولي ما انتبهت عليها و هي تشدني بقوه لغرفتها
دفتني بقوه عالجدار و تطالعتني بشر و عيونها الغايره المخيفه ترعبني
ساميه : و الله لو أسمع انك قلتي أي شي على اللي شفتيه بأدمرك فاهمه
فتحت الباب و دفتني برى غرفتها و ردت سكرت الباب لحظة صمت
أدورها في عقلي مع نفسي هذي مدمنه و راح تدمر نفسها بهالشكل المرعب
بقيت في مكان ما دفتني
ملك : وش فيك جالسه هنا ؟!!
قلت بذهول
أميره : ساميه
و أشرت على الغرفه اللي بوجهي
ملك : وش فيها
أميره : ها و لا شي
مر قدامي شريط لذكريات مرعبه لما كنت مشاركه بلوحات في مستشفى لعلاج الإدمان بمصر
منظر البنت المدمنه اللي هربت من المستشفى و صدمتها سياره مسرعه قتلتها مروع!!
هزتني ملك من كتفي
ملك : أميره !!
قمت بسرعه فتحت باب غرفتها عليها و شفتها بنفس الوضعيه تشم المخدرات ملك انشلت حركتها لما شافت المنظر ساميه هجمت علي بعنف و ضربتني قمت دفيتها بقوه و طلعت من الغرفه من الروعه و قوة الصدمه نزلت من الدرج وقف قبالي جواد أول ما شفته خفت مدري ليه تخيلت ان أنا المدمنه مب ساميه خريت عالأرض بدون ما أحس بشي
________________
الساعه : 10:00 صباحا
فتحت عيوني ببطء و كأني في حلم
جواد : سلامتك يالغلا ما تشوفين شر
جوري : سلامتك يا اموره
طالعته بإستغراب
شكله ما عرف ان أخته مدمنه لازم يعرف معقول ملك ما قالت له
أميره : أأ ...........
قاطعني و قال :
جواد : ارتاحي و لا تقولين شي راح أعاقب ولدي عالعذاب اللي قاعد يسويه فيك
قلت بتساؤل
أميره : أي ولد !!
جوري : اللي في بطنك ........ انتي حامل يا أميره مبروك
فهيت من الصدمه حامل !! طيب بس ساميه دمرت كل حس فيني فقدت التركيز
غمضت عيوني بتعب و كأني طالعه من عالم مرعب طالعت جواد اللي شوفته بالدنيا
بس رديت غمضت عيوني سمعت صوت فتح الباب فتحت عيوني أطالع
ساميه : مبروك
سحبت نفس قوي يوم شفتها حطيت يدي على فمي من الروعه بشوفتها سحقتني مثل البودره اللي تشمها و هفتني مع الهوا
جواد شاف تأثري العنيف فطالعني متسائل
أميره : أبي .... أبي
جت جنبي و همست في اذني
ساميه : ملك تقريبا ميته لأنها كانت بتفتح فمها فإبلعي لسانك أفضل رحمتك ترى لأنك حامل !!!
غصب عني حطيت يدي على بطني و طالعت اللي حولي بفجعه
جواد : وش فيك !! وش قلتي لها
ردت بإبتسامه كذابه
ساميه : سر بينا لا تهتم !!
وش ماسكه علي عشان أخاف منها ليه ما قلت لجواد ليه خفت و ارتعبت و هي تهددني ملك وش ذنبها المسكينه !! لازم أقول و أتكلم
مسكت يد جواد و شديت عليها بقوه ... هو مره كان مستغرب انتهت الزياره و أنا شاده على يده طلعوا البنات و راحو
جواد : أكيد تبين تقولين شي و شي مهم بعد
قلت و أنا أبكي
أميره : الحق على ملك أختك ترى ترى ساميه .....
حسيت بدوخه مب طبيعيه يمكن من الرعب اللي سوته لي ساميه أو من خوفي
مسكني من كتوفي بعنف و خوف
جواد : وش فيها ساميه ؟
أميره : مدمنه مخدرات
___________________________
مرت الأيام بطيئه هذي عادتها لما يخيم الألم و يجرحنا بقوته !
تعودت ان الألم يكون طويل و لحظات الفرح و السعاده تطير بسرعه نلحق وراها ندورها عشان ما نتألم أو اننا نألم اللي نحبهم حقدت على السعاده و كرهت الألم اللي انكتب علي أعيشه بصمت يمكن أقاومه للحظات بس أرد أنهار باكيه لأني تعبت من مقاومته
كنت أراقب بطني و هي تكبر في البدايه تضايقت بس حبي زاد لها لأنها تشيل قطعه من جواد اللي انشغل بأخته و أنا قدرت هالشي بكل رحابة صدر !
مر رمضان عالجميع بألم يعني بدون أي وجه للإبتسام كان بالنسبه لي جميل لأني أروح أصلي بالمسجد الكبير صلاة التراويح أنا و الجده اللي كانت ساكته على طول و ما تتكلم الا اذا شافتني ما كان لها أي تفاعل مع سالفة ساميه لأنها كانت ساكته مفضله الصمت على الكلام و البوح ....
ساميه اللي هي محور سالفتنا جواد دخلها مستشفى متطور لعلاج الإدمان و الكارثه انها كانت مدمنه من خمس سنوات و السواق هو اللي يجيب لها الجرعات كل ما احتاجت لهالسبب أدمنت عليه بدون ما يحس احد فيها كيف أدمنت هذي سالفتها هي أكيد راح تحكيها للجميع .... أو فضلت انها تكون سر مدري عنها !!
انمنعنا من زيارتها أول اسبوعين بعدها انسمح لنا نزورها كم من المرات اللي زرتها فيها كانت تطردني أنا و ملك اللي الحمد لله طابت من الجرعه القاتله اللي حقنتها لها ساميه لأنها خايفه انها تتكلم و تفضحها عند جواد التهيت مع ملك لين الحمد لله طابت و صارت تروح تصلي معانا التراويح رجاوي كانت الصدمه عليها عنيفه جدا بدت تتسخط و تلعن في ساميه اللي اكتشفنا ان عندها حاله نفسيه مزمنه و لازم تاخذ فترة نقاهه الأطباء و الدكاتره تعبوا معاها من ناحية العلاج النفسي بعد ما تأكدوا ان جسمها خالي من المخدرات بس بعد قالوا تستكمل علاجها بره أفضل لها !!
جوري كانت بس تبكي كعادتها لما تتأثر من شي عزه طول الوقت متصومعه في غرفتها و ما نشوفها الا لما تمر و تروح لمكتبها الخاله خيريه و بنتها هديل كانوا من أسعد الناس ذيك الأيام ما في عندهم غير التلفزيون و ملاحقة مسلسلات و برامج رمضان اللي تخليهم يسهرون للفجر و ما يصحون الا العصر و أحيانا قريب المغرب ....
جواد حالته جدا منهاره صار يدخن بشراهه أكبر و ما يجي الا متأخر البيت قال ايش يكون دايم عند أخته فطور ما يفطر معانا و دايم يكون عند أخته يدخل يلبس أي لبس و يطلع بسرعه عند أخته اللي أول ما عرف سالفتها دخل غرفتها و قفل الباب و قام يضربها بقسوه !!! بدت حجوزاته لسويسرا عشان ساميه تتعالج ... نفسيا !!
و أنا مثل الأطرش في الزفه و ربي لو ما في أهله كان انذبحت من زمان هو مهو مطنشني هو منشغل مع اخته !!أعذار أعطيها له عشان ما تصير مشاكل بينا !!
يحرقني شوقي لجواد فصرت أنلهي برسم اللوحات أو اني أقعد أسولف مع البيبي اللي في بطني و أغني له عالأقل انشغل بشوقي بعيد عن جواد كنت أخاف أبين له مشاعري بس خفت يفهمني غلط و يقول اني ما أبيه يساعد أخته اللي ما تدانيني و دايم تطردني و قال ايش ادهور حالتها النفسيه أكثر و أكثر فإنثبرت في البيت لأني أعيد و أكرر سو خير و ارميه البحر كانت الأيام صعبه و أيام فراقي مع جواد تقترب و كل ما أحط له قطعه من ملابسه بالشنطه أبوسها و أنا أبكي كان ودي نعيد سوى بس الأقدار تحكم و على هالأساس كنت أسلم أمري لله دايما و أمسح دموعي و أنا سعيده بولد جواد أو بنته عالأقل شي يخفف الشوق اللي ذابحني حطيت الدفتر اللي أهداني اياه و أنا كاتبه فيه كل شي من أول ما حبيت ناصر لآخر ما تزوجت جواد و عيشني في النعيم و الحب
و جا يوم الوداع لأن الوداع صعب و لأني من الألم مب قادره حتى أصيح !!
ودعت جواد بكل الحب و الشوق اللي فيني بكل قوة العالم اللي ضمته بكل دقائي و ذراتي
و هو يبوس يدي و يوعدني بمكالمه سريعه أول ما يوصلون و يوصيني على صحتي و عالبيبي و على جواد اللي ساكني ..... ترك قلبه بين يديني و راح !!
شوفته و هو يقفيني خلتني أرتجف بس رد التفت لي و جا ضمني بقوه و هو يبوس راسي و يشم شعري و يبكي
كأنه حاس أو غير متيقن برجعته احساس داهمني للحظه و هو يضمني بس احتفظت فيه لنفسي حط يدي على صدره مثل ما تعود يسوي دايم بس للحظات حسيت يدي ترتعش و هي تحس نبضاته بكيت لسبب واحد انه راح يوحشني أو هو من زمان واحشني بس ما أظهرت له هالشي لأنه هو نفسه مب متحمل حتى بعدي ...
مدري ليه حسيتها لحظات الوداع الأخيره لمست فيها شعره و أنفه و عيونه و شفايفه لأني من الأساس ما أبي أودعهم ....
( الفراق .... الفراق صعب قاتل و خصوصا مع من أحببت يلقيك الشوق في صمت السكون و يدفعك الحنين للعوده من جديد )
أحبك قالها لي و الدمعه تسيل على خده لمست حتى الدمعه اللي هي بعد تقولي أحبك
كانت في يدي تعليقه طويله من المعدن مكتوب عليها أحبك و اسمي و اسمه في الأخير منقوش عليها صورة الأسد اللي يحبها حطيتها في يده على وعد قريب بالرجعه اللي خفت مصيرها الأقدار لين يجي يومها !!
________________
الساعه : 10:30 مساءا
أميره : يالغلا يكفيك يالله نام انت حيل تعبان من السفر
جواد : خليني أكلمك مدري كيف راح أنام و منتي بجنبي
أميره : يالغلا قلبي بين يديك على طول
جواد : كيف ولدي ؟!
أميره : يسلم على أبوه مشتاق
جواد : و الله أبوه اللي مشتاق و ذابحه الشوق
أميره : شخبار ساميه
جواد : أول ما وصلنا استقبلها الطبيب الألماني في المطار و رحنا للمستشفى و طبعا هي بالمستشفى تسوي التحاليل و الفحوصات اللازمه تصدقين استغربوا انها تعالجت من الإدمان في أقل من شهر مع العلم ان مدة ادمانها كانت خمس سنوات شاكين في الموضوع !!
أميره : سبحان الله ...... الله يشفيها و يساعدها يا قلبي
جواد : أدري انها قست عليك بس .......
أميره : حبيبي لا تقول بس غلاها من غلاك حياتي تدري عاد هذا أول عيد يمر بينا و لا تكون موجود فيه معاي
جواد : معشوقتي
قالها بهمس يرعشني أحب صوته الهامس
أميره : هلا يا روميو
جواد : غني لي !!
أميره : غالي و الطلب رخيص .....امممممممم وش بغنيلك !!
جواد : اللي تبينه !
أميره :
غبت يوم و عذرناااك
و بولهنا انتظرناااك
يالله ارجع كفااايه
ابصراحه فقدناااك
يعني مااا صاااحت اذنك
مااا بكى الشوق منك
مااا صرخ يوم حزنك
لحظة اللي طريناااك
في غيابك نسينااا
وش لنااا وش علينااا
شاااغل البال فينااا
ليتنااا ما تركناااك
انجبرنااا نخليك
تبتعد عن مراااسيك
بس و اللي يخليك
حتى في الحلم شفناااك
غبت يوم و عذرناااك
و بولهنا انتظرناااك
يالله ارجع كفااايه
ابصراحه فقدناااك
يعني مااا صاااحت اذنك
مااا بكى الشوق منك
مااا صرخ يوم حزنك
لحظة اللي طريناااك
اليوم آخر يوم في رمضان و الحمد لله ختمت قرآني في رمضان مرتين صليت التراويح مع الجده اللي أول ما رجعنا للبيت قومت البيت كله بأهله و خدمه و شغالاته تنظيف كامل للبيت تبي كل شي يبرق و البنات بالمطبخ يساعدونها في تسويت الكعك و حلوى العيد
و بما اني حامل فمنعتني من تسوية الكعك معاهم بس و الله هالأجواء ما تتفوت و أصريت اني أصلح معاهم ... بعد الحاح مني فوافقت !!
لبست جلابيه مره نعومه لونها مشمشي رفعت شعري بالشباصه و صلحت غرتي و نزلت لهم بالمطبخ ... جلست معاهم حول الطاوله و هم يسوون المعمول و يشكلونه في القوالب ...
جوري : مره شكلك يجنن و انتي حامل
رجاوي : هذا دليل على ان اللي في بطنها بيطلع مثل القمر
طالعتها و قلت بتريقه
أميره : طيب خليك من تخميناتك الزايده لأنه التمره طالعه برى العجين
ملك : وش تتمنين ولد و لا بنت ؟!!
أميره : اللي يجي من الله حياه الله
هديل بتأفف و هي تمسك العجين بقرف
هديل : كارثه لو جا ولد و عيونه رصاصيه
رجاوي : مسكينه انتي بالعكس بيطلع يجنن مثل توم كروز و الحلوين اللي عيونهم ملونه
جوري : تدرين عاد زوجي عيونه عسليه
انا و رجاوي طالعناها و قلنا في وقت واحد
رجاوي + أميره : يا هووووووووووووووو
البنت حمرت و خضرت و صفرت
جوري : بس خلاص ما قلت شي
قامت رجاوي تقلدها
رجاوي : "" تدرين عاد زوجي عيونه عسليه ""
جوري شالت قالب المعمول و رمته عليها
و قمنا نضحك
هديل : تدرون اني جالسه مع شلة بنات سخيفات
سحبت الكرسي و قامت تبي تطلع من المطبخ رجاوي غليت وصلت درجتها فوق الميه كسرت مؤشر الحراره مسكت يدها أهديها عشان ما تقوم تسوي كارثه الحلو في الموضوع ان الجده وقفت لها عند باب المطبخ و ضربتها بالعصا
الجده : بتنثبرين في مكانك تكملين الشغل و لا بكسر هالعصا على راسك
ردت جلست في مكانها بكل خضوع
رجاوي انفجرت بالضحك تبي تقهر هديل
ملك : تدرين عاد ان انتي السخافه بعينها يا شيخه استحي بلا دلع
قالت رجاوي بدلع
رجاوي : يا لوحي خايف على اصابعها الصغنطوطيه لا تتجلح و تنخدش
و انفجرنا بالضحك و خصوصا ان رجاوي تعرف ترفع الضغط صح بشكل مره مضحك
هديل : أحسن منك دايم دفشه عفشه مدري عريس الغفله وش يبي في وحده مثلك لسانها مثل ...........
قاطعتها رجاوي بصرامه
رجاوي : انطمي أحس ما أبكس هالوجه أغير معالمه لا تنسين يوم انبكستي في هالوجه العيد اللي فات و ما قدرتي تورين لنا وجهك ... سكري حلقك أفضل لك
قامت هديل
هديل : تهدديني طيب أنا أوريك
و طلعت من المطبخ و حنا فاطسين ضحك عليها لأنها بكل تأكيد راحت تشكي لأمها مثل البزران ....
عزه راحت تشتري بعض الأغراض من ضمنها عطور للفواحات و عود و حلاوات للعيد
يوم حلو يتخلله الضحك و الوناسه و الكل مغير جو الجده صحيح أجبرتنا جميع على شي يمكن بعضنا ما كان يبيه بس في صالحنا و صحيح انها طول و قتها ساكته بس تحس فينا بقلبها الطيب بصمتها تعرف كيف اني متعذبه بسبب فراق زوجي و تعرف خوف جوري من زواجها اللي قرب موعده و معاناة رجاوي مع نفسها و صمت عزه اللي تفرج عنه لما تجلس معانا تعرف معاناة ملك مع الماضي و تعلقها بزوجها الله يرحمه يزداد يوم بعد يوم
تحس فينا بس تسكت و هي تعرف ان بعض الأحيان الصمت ما يكون له مكان ابدا
سهرنا للفجر ما فينا نوم فرحانين بالعيد كل وحده راحت لغرفتها تشيك على لبسها و تتسبح و تسشور و خلافه أما أنا رحت أبكي على أطلال الحبيب و ألمس مكانه و أصيح
رن جوالي بنغمتي المفضله اللي حطيتها خصيصا له
و الله واااحشني موت
آخف بعدك أمـــوت
أميره : يالغلا واااحشني
جواد : يا حياتي لا تبكين
أميره : ارجع الله يخليك يكفيك بعاد يا روحي أبيك محتاجه لك حتى ولدنا ينتظر رجعتك رد لي خلاااااص حبي أنا بعد لي حق عليك تعاال أبيك
جواد : يالغلا يا قلب جواد و عينه لا تبكين تخلص ساميه العلاج و الله بنرجع شوقي لك أكبر يالغلا مب عارف كيف مشتاق لك كيف بيمر هالعيد بدون الأميره ....
أميره : حياتي طيب احجز لي أجيك الله يخليك
جواد : بتتعبين و بعدين انتي حامل و السفر بالطياره خطر عليك
أميره : طيب اوعدني ترجع الله يخليك !!
جواد : معشوقتي
أميره : .................
جواد : معشوقتي
أميره : جواد ... أحبك يالغلا أحبك لا يطول غيابك
جواد : أكيد يا قلب جواد برجع كوني واثقه من هالشي كلها كم شهر بتشوفيني عندك !
_________________
العيد هل و طلت تراحيبه
طبعا العيد يوم خيالي مع انه بالنسبه لي كان كئيب بدون جواد !!
كشخنا و تزينا رجاوي و جوري و هديل راحوا للكوافير يقصون و يصبغون
أنا و ملك جلسنا بالبيت نباشر الضيوف و نرحب باللي جايين يعايدونا
طبعا رحنا للمسجد صلينا و ردينا نعايد بعض و نستقبل المعايدين
عيدي بدون حبيبي مهو عيد و كل ما اشتقت و حرقني الشوق أكلمه أو أتصل عليه
أرسل لي صوره كانت مره تجنن بسويسرا و الأكثر اثاره في الموضوع انه كان لابس التعليقه اللي عطيته اياها كان شكله مره يجنن و هو لابس الكاب و راكب السياره سيارته البانوراما السودا هههههههه
جاني بوكيه ورد كبير و ساعه ألماس من جواد كان موصي عليها في واحد من المحلات و ربي كانت فرحتي غير تقليديه صرخت من الفرحه و الوناسه يعني وااااااااااااااااااااااو
حتى شي ما قدرت أوصف سعادتي لما شفت الهديه
ملك : أموره في ضيوف بالمجلس يبونك
أميره : غريبه مين يعني ؟!
ملك : جيبي الورد بخلي الشغالات يطلعونه لغرفتك و انتي شوفي ضيوفك
رحت أشوف ضيوفي اللي من شفتهم حسيت بالأكسجين يخنقني أكثر من انه يدخل لصدري
و يساعدني على التنفس !
ابتسمت ببلاهه ردت فعلي المعتاده و الغير متوقعه !!
أميره : أهلين تور ما نور المكان
سلمت عليهم ببرود شديد و اللي ما تتوقعونهم ........أخواني ....!!
وينهم من زمان !!
أخيرا استجابوا لنداءاتي لما قطعت الأمل في اني أشوفهم أو بالأصح نسيت ان لي أخوان !
ما قلت لكم اني دقيت على أخواني من باب صلة الرحم و طبعا محاولاتي باءت بالفشل الذريع ... أحمد الكلام بيني و بينه صار مستحيل بس أشكره على شي واحد انه زوجني جواد غصبن علي ... عبدالهادي كأنه ما صدق يتخلص مني أو لنقل انه اتقاسم الورث مع أحمد عشان كذا تخلصوا مني و أنا اللي كنت متوقعه ان الفلوس هي آخر اهتماماته !!
مسكينه أنا قلبي حنون حيل أمير سمعت من الناس تدرون يعني وش سمعت من الناس يعني أخوي اللي من لحمي و دمي أسمع أخباره من الناس و أنا اللي هريت جواله اتصالات و مسجات و لا جا فكر حتى يرد علي و من الأول يقول اني توأمه !!
ثامر لاهي مع مرته و عياله و شغله بالشركه قصدي شغله بالفلوس !!
ياه من كثر ما هم أوفياء معاي و قلبهم علي جو يعايدوني ههههههههه !!!!
سبحانه من علا شانه
أميره : وش اخبارك يا أحمد عساك متهني بس و مرتاح !!
طالعني برفعة راس و شوفة نفس
أحمد : بخير ....... تمام و من الأحسن الى الأحسن
طالعته بإبتسامه استغراب تعبر عن مقتي لهالأحمد بشده
أميره : شخبارك يا عبدالهادي طلعت مرتك أحسن منك تسأل و تتصل ؟
عبدالهادي : و الله يا وخيتي أشغال
قلت بدون تصديق
أميره : لااااااا تدري عاد علمتني مرتك مره ان كلمة أشغال ملغيه من قاموسها يعني ما تنفع حتى تصريفه تتصدق !!
طالعني بإرتباك و رد طالع الأرض ما عاد مثل عبادي اللي أخبره هزل جسمه و صارت عيونه غايره الفلوس وش يجي من ورى حبها غير الهم و الغم !!
أميره : هلا بتوأمي يا هلا بالبرنس شرفت و آنست متى الوصول من بريطانيا
قال و هو يتجنب يطالع عيوني
أمير : أمس !!
أميره : آهاا لا فيك الخير و الله جاي تعيد علي .... وش أخبار ثمور مضيع الأخبار و العلوم ؟؟
ثامر : ................
قلت بطفش
أميره : تدرون عاد حريمكم فيهم الخير أحسن منكم يثمر فيهم الخير لو قطره
قلتها و أنا أرفع شعري
أميره : ..... و أعتقد ان البيت بيتكم ما قلتوا لي وش تشربون ؟!
قام أحمد و قال بعصبيه
أحمد : جيناك نعايدك و تركنا أشغالنا تعاملينا بهالمعامله طلعتي ما تستاهلين مجينا لك
ضحكت بتريقه
أميره : رد لورى لبعيد قبل خمس شهور أو ست شهور و تذكر كيف رميتني أربع أيام تحت الأرض مع جيف متعفه و دواب الأرض تنهشني .... بصراحه برافو أحسنت معاملتي !!
طالعوني أخواني و بعدين طالعوه من كثر ما هم مفهيين .... هو طالع الأرض بإرتباك
أميره : أها طلعتوا ما تعرفون ما سألتوه مين حرق البيت و خلاني أتشوه و أنحرق ..
ما قالكم كيف صارت عنده هالشركه العملاقه و الفروع الكبيره في دول الخليج ما قالكم وش سوى على قطعة الأرض في أبو ظبي ما قالكم كيف زوجني بهالسرعه و بدون تأخير
معقوله كنتم عمي ما تشوفون كل اللي كان يصير و لااا تتعامون عشان تاخذون الفلوس و الحمد لله ان الفلوس عندي تراب الدنيا ما راح أسألكم و لا أقولكم أبي فلوسي اللي اختلستوها و لا حسابي اللي لقيته مجمد في البنك هههههههههه عادي خذوه
وقفت قدام أحمد
أميره : وش فيك خافض الراس .... وش فيكم سكتوا ؟؟!! و الله الحمد لله طلعت أحسن منكم فيني خير بعد ما رميتوني في النعيم عند جواد الله يطول عمره و بعد ما ظلمتوني و خدعتوني و خنتوني .... اتصلت عليكم و سألت عنكم أرسلت المسجات و اتصلت بس و لا واحد فيكم رد علي .... وش تنتظرون مني بعد كذا آخذكم بالأحضان و أطبطب عليكم ؟
و لا أرفعكم فوق و أفتخر فيكم .... ما راح أتبرى منكم بالعكس بتظلون أخواني غصبن علي
حبيت و لا ما حبيت لأننا نحمل اسم واحد مساعد آل ....
أنا لقيت أهلي اللي أحبهم و اللي يحبوني يخافون علي و أخاف عليهم أهل زوجي اللي رميتوني لهم محسبين انكم رميتوني لجهنم .... و طلع أطيب من الطيبه نفسها !!
عمر الفلوس ما جابت الحب و لا السعاده ..... انتم عار على الحياه ...
طلعت من المجلس و أنا أرتجف طلعت لغرفتي أبكي أبكي حيل
مب قادره أستوعب أنا وش قلت !!
_____________________
الساعه : 07:20 مساءا
ثاني يوم العيد رحنا الملاهي و بحكم اني حامل ما قدرت ألعب و لأن بطني كبرت شوي
أو بيتهيأ لي و ...دايم أحس بالألم بسبب بعده ياااااااااااه يا جواد ...
قمت أتأمل البنات و هم ينططون و يلعبون و يجرون جلست بروحي أتذكر لما رحت أنا و جواد الملاهي في ايطاليا ... ركبنا كل الألعاب و من ضمنها لعبه عباره عن كره تدخل جواها فتدفع الهوا بقوه من الأرض ياه قديش صرخت لما طار شعري لفوق و طارالإيشارب مع الأوراق اللي لازم نجمعها و نحطها بالصندوق !!
دخلنا غرفة المتاهه اللي كلها أبواب شفافه تدور على نهايه عشان تطلع و المضحك ان جواد تسلق واحد من الأبواب لما تهنا و عرفنا طريق الخروج ... غشاش بإمتياز لا يفوتكم !!
ملك : أميره أميره
أميره : هلا ااا
ملك : أكيد سرحانه في حبيب الألب
قالت و هي تناولني الأيسكريم
أميره : اذا ما سرحت في جواد بسرح في مين ؟ واحشني وربي
ملك : يا هوووو وينك يا جواد تسمع زوجتك وش تقول عنك !!
ابتسمت بمرح و قمت آكل الإيسكريم
ملك : تلعبين معانا
أميره : كيف ألعب و أنا بهالوضعيه
و أشرت على بطني
ملك : معليش نسيت أموره و ربي مقدره وضعك انك تعبانه بس
أميره : بس غير الغالي ما عندي أحد أتعب عشانه
ملك : طيب قومي نتمشى !!
قمنا نتمشى و نسولف في كل شي و الأهم اننا كنا نسولف عن عزه
ملك : تدرين حالة عزه محزنه !!
أميره : ليه هي ليه كذا دايم منطويه و تفكر و تتفلسف في كل شي ؟!
ملك : اسمعي قبل ما أقولك على سالفة عزه بقولك شي بس ما تزعلين !
جوري : بوم بوم بووووووووووووووووم
أميره : يا ويل قلبي !!
ملك : بسم الله الرحمن الرحيم جوري و وجع
هي فطست ضحك و طبعا بسبب حركتها الرهيبه توصخت ملابسي بالإيسكريم
ملك : روعتينا حسبي الله على عدوينك وش ذا !!
جوري : فقره من فقرات العيد هههههههههههه
أميره : أنا متأكده اني بسقط على يدك انتي و رجاوي
و قمت أدلع و أسوي نفسي تعبانه
أميره : آه لحقوا علي بطني سويتيها فيني يا جوري
طبعا خافوا علي و جوري تروعت مسكينه و كانت بتبكي كالعاده
أميره : هههههههههه الكاميرا الخفيه
جوري : و ربي سخيفه
ضربتني على كتفي بقوه و راحت !
رجعنا البيت و قمت أسولف أنا و ملك في غرفتي
أميره : وش الشي اللي خايفه يزعلني ؟!!
قالت و هي مستحيه
ملك : سمعت كلامك مع أخوانك أمس
ابتسمت ببرود
أميره : خذي راحتك
ملك : طلعوا زعلانين مره
أميره : الله يهديهم و اللي سووه معاي مب هين ؟؟
ملك : تدرين محد يستاهل الخير هالأيام الا الناس الطيبين تدرين و عزه كانت من هالطيبين و تحولت للي انتي شايفته !
تعدلت في جلستي و طالعتها
ملك : يا قلبي عزه تزوجت بعد ما خلصت الثانوي سافرت بحكم عمل زوجها الى ألمانيا و سجلت بالجامعه و تخصصت في قسم العلوم الإنسانيه طبعا كانت حياتها على ما تحكي لنا فوق فوق الوصف التهت في دراستها و زوجها في شغله ....
و مرت الأيام و خلصت عزه دراستها و عجبتها العيشه هناك فكملت الماجستير بإمتياز
في مره من المرات قالت لزوجها تبي تتأخر عندها عمل بعد الظهر فلما راحت لعملها ما لقت الدكتور لأنه اعتذر فرجعت لبيتها و دخلت لغرفتها لقت زوجها مع وحده في وضع لا يحسدون عليه !!
المسكينه جتها حاله نفسيه و رجعت للرياض و طبعا طلبت الطلاق و صارت بس تمسك كتب الفلسفه و تتفلسف صارت استاذه في الجامعه لأنها على درجه عاليه من العلم و الثقافه و مع ذلك عايشه حياتها !!! مشروخة القلب !!
( الخيانه عباره مستهلكه تتداولها الأجيال ... لا تحقرن صغرها لأنها هادمة لأكبر الدول )
|