البارت الثالث و الثلاثين
جواد : انتبهي
شالني بصوره سريعه و جرى فيني عالشاطئ بشكل خلى كل اللي عالشاطئ يطالعونا ... نسيت أقولكم اني في ايطاليا بلد الرومانسيه !!
أميره : وش فيك ؟!
جواد : خفت عليك من العقرب لا يلدغك
حرقتني جبهته اللي صارت على جبهتي و نظراته اللي يتحاوطني من كل مكان
و تصفيق حار من كل اللي كانوا موجودين
قلت و الخجل ذابحني حيل
و هو يطالعني ذايب
أميره : ممكن تنزلني !!
جواد : لا ما راح أنزلك لين نوصل الفندق
قمت أدلع
أميره : نزلني نزلني
شهر لي هنا غايصه في السعاده أو بمعنى أصح صرت جزء منها جواد قالي هو المستقبل بس طلع فعلا هو المستقبل في هالشهر علمني كيف أحب و كيف تكون رعشة الحب علمني ان الحياه بحر مفتوح لازم يكون في جنبك اللي ينقذك لاجيت تغرق علمني كيف تكون لمسة اليدين كيف تكون ساخنه من اللي تحبه علمني ان الحب مب كلام ينقال الحب شعور و احساس .... كان يعلمني ان كلمة أحبك كلمه صغيره تتكون من أربع حروف بس معناها فوق ما نتصور أكبر من حجمها بكثير لأنه اللي يحب يكون صادق وفي مخلص و لأنه اذا اختلت فيه صفه وحده تروح قيمة الحب و تتشوه صورته
كنت أتأمل أتأمل كل شعره في ذقنه شفايفه أنفه الحاد و عيونه اللي أبحر بعالمها أدور على مرسى ما ألقى لأنه ما لبحاره شواطي عشقت عيونه و لا نقول صارت جزء مني حبيت غموضها و سحرها حبيت حتى قسوتها حبيت تأملها و نظراتها اللي تحضني بشوق
حبيت حواجبه بكل شعره فيها حبيت شعره العربي الأصيل الأسود حبيت ثقله و هو يطيح متهالك على جبهته حبيت أنفاسه حبيت غيرته لهفته جنونه علي و غير هذا كله حبه لي ............
كنت أتأمله في لوحتي بهدوء أعيش كل دقيقه معاها ....
أميره : تعال ممكن !!
جاني و هو شايل الكاميرا
كان في رسام يكمل لوحه عالبحر اللوحه روعه بس تدرون عاد ما أحب أي رسمه تكون بين يديني مو كامله ...
طالعت في الرسام اللي كان عجوز , طبعا نظرات لاهبه تخترقني من عين جواد
أخذت الفرشه من الرسام و قمت أضيف بعض الأشياء عالوحه و أمزجها بالألوان
طالعني العجوز بوناسه و قام يبربر بسعاده بلغته ناولته الفرشه و هذيت راسي بخفه
أميره : جواد
صد عني و لا رد علي
أميره : زعلان مو ....
جواد : مو و نص
أميره : و الله انه عجوز و بعدين يا جواد مدري حسيت اني لازم أكمله اللوحه
و لاحظ انه عجوز !!
لف علي و مسكني من كتوفي بقوه
جواد : أنا أغار عليك مجنون فيك ما أبي أحد يقربك و انتي عارفه ان سالفة كشفك لوجهك ..............
حطيت يدي على شفايفه مقاطعه
أميره : آسفه ما راح أعيدها ممكن ترد السيجاره في جيبك
لأنه كان مطلعها و ناوي يولعها
جواد : مشكلتي ما أقاومك
سافرنا من الرياض على هنا بالسر حب جواد يسوي لهم مفاجأه أول ما نوصل !
انتظرناهم لين ناموا كلهم و سافرنا و لما استقرينا بالسويت دقينا على عزه اللي ما صدقت و تقول انها راحت لجناحنا تتأكد بنفسها من وجودنا جوري استانست مره و قال ايش حركات أخوي الرومانسيه ....!!
لا أنسى سالفة رجاوي اللي تبي تنتحر عشان انقل من قيمتها و هي عارفه ان كلامها غلط و ان الكلمه اللي قالتها لهديل قويه يعني تستاهل اللي صار لها رجعت للبيت بنفسها و قفلت على نفسها باب غرفتها رافضه تكلم أحد خاله خيريه كانت مره زعلانه من حركة جواد بس بعدين رضت ...
ساميه مره مالها حس !!!
و هديل كتخمين مني أحس انها مولعه !!
__________________
الساعه : 05:30 صباحا
صحيت من النوم بدري على غير العاده
لقيت جواد نايم
قمت أتأمله قديش انت وسيم و خصوصا لما صار على طبيعته زادت وسامته و البنات في ايطاليا و خصوصا موظفة الروم سيرفس اللي تجيب لنا الطلبات تفرسني لما تتمايع في كلامها و تطالعه بطريقه تقهرني ...
بسته على خده و غطيته زين و رحت أتسبح لبست لي بنطلون أسود ضيق و بدي أحمر عليه جكيت سكري صليت و قمت أمشط شعري عند المرايه ودي أقصه طال و صار عاجبني مع اني مو راضيه على لونه ودي أصبغه بني أو بندقي فاتح صاير مموج و غره كبيره مقصوصه على جنب لمسة مكياج هادئه جدا و بخت عطر نعومه
جبت كرسي و حطيته قبال السرير و قمت أتأمله ما ودي أزعجه بس أكتفي بتأمله
مع بعض الذكريات الجميله معاه
جواد : مدينة القوارب
أميره : ياااااااااااااااه روعه ... مع اني تقريبا لفيت العالم بس ما فكرت في ايطاليا !
جواد : مثلي مستحيل
تكتفت و طالعته
أميره : تفضل اطربني وين رحت ؟!
جواد : رحت أمريكا فرنسا بلجيكا المكسيك و ألاسكا في الجنوب الشمالي و .........
أميره : ما شا الله و مع مين رحلاتك ؟
جواد : مرات بروحي و مرات مع أخوياي تبين الصراحه وحده من رحلاتي بس اللي ممتعه و فوق الوصف
قلت ببرود
أميره : رحلتك لما جيت تروح ماليزيا أول مره
طالعني و هو يجدف بالمجداف
جواد : رحلتي معك
قمت وقفت و جلست جنبه
أميره : يا بكاش لأن أحلى رحله رحتها في حياتي
رفعت حواجبي بمرح
أميره : معك
قالي بقهر
جواد : طيب امسكي جدفي معاي
يا ربي ما توقعت ان التجديف صعب بهالطريقه
أميره : لا لا خلاص تعبت
حطيت راسي على كتفه بتعب
جواد : اللحين لي ساعه أجدف بروحي و انتي خمس دقايق تعبتي
أميره : يا قلبي الله يخلي العضلات انت انسان رياضي ما شا الله و أنا الله يخلف علي !!
انتشلني من الذكرى منظر المطر و هو يهطل بشده
لحظتها تذكرته أول ما جينا
جواد : أبيك تكشخين آخر كشخه
قلت و أنا أقفيه
أميره : جواد كل يوم و أنا أكشخ يا قلبي
جواد : بوديك مكان خيالي
و فعلا كشخت بفستان أحمر نعوم و روج أحمر و خليت شعري على طبيعته مموج
دخلنا لمكان مقسم و كل ركن فيه منعزل كان المطر ينزل بخفه أيامها كنت لابسه الجاكيت السكري الطويل و الإيشارب البني .....
دخلني في مكان يجنن طاوله و كرسيين و الأرض بكاملها منثوره بالورد الأحمر الشموع منوره بشكل رائع و حتى كاسات العصير جواها ورد أحمر
جلست عالكرسي و المطر يجنن كان مره خفيف
مسك الإيشارب و سحبه
شعري طار مع الهوا ...
أميره : جواد !!!!
جواد : محد بيشوفك هنا تقدرين تفصخين الجاكيت
طبعا سوا لي فيها من الطبقه الأرستقراطيه جا أخذ الجاكيت و حطه تحت الطاوله عشان المطر و جلس قبالي يتأملني
جواد : حتى هالكرسي اللي جالسه عليه أغار منه
ابتسمت بخجل
حط يده على يدي اللي كانت عالطاوله
جواد : ممكن أشوفهم
قلت بتساؤل
أميره : مين !!
قال بصوت هامس يرعش قلبي
جواد : عيونك
طالعت لعيونه بخجل ذبت فيها كنا نتأمل بعض و ما حسينا بالمطر اللي صار يهطل بشده و يغرقنا انطفت الشموع و بد الورد يطير مع الهوا بشكل مره خيالي
قمت أدور بالمكان و أجمع الورد و أنثره بالهوا و أرد أجمعه من جديد و أنثره بفرح
جواد تم يطالعني بشكل مره أحرجني رحت له مسكت يده و قومته
قمنا نلعب في المطر و نرمي الورد على بعض
أميره : أعتقد انك بتلغي الطلب نتعشى بالبيت
جواد : ناخذه سفري معانا و حنا رايحين
وصلنا البيت أول ما شفته مقفي يصك الباب دخلت له هديه بالأكل
طبعا تفاجأ بالهديه اللي كانت عباره عن ميداليه ذهب عليها حرفه و من الجهه الثانيه اسمه !!
أهداني ساعه فخمه حيل و طقم ذهب
انتبهت من ذكراي على صوته و هو يطالعني
جواد : حبيبتي ليه ما صحيتيني ؟!
أميره : ما حبيت أزعجك تو الوقت بدري
جواد : يعني أنام مره ثانيه
ابتسمت بمرح
أميره : ياليت
جواد : ليه ان شا الله
أميره : عشان أتأملك و أسبح في بحارك
رد نام على المخده و تغطى بالبطانيه بشكل مضحك و ابتسم لي
جواد : طيب انتبهي لا تغرقين بس
قمت أضحك و أضحك على شكله
جواد : فديتها هالضحكه عسى عمرك طويل
أميره : لا تفغر كثير حياتي ترى ورانا سفره للرياض .....
جواد : لماليزيا !!
________________
أميره : حياتي !
جواد : عمره آمريني
مسكت يده و ضميتها بين يديني
أميره : رغم انك قربي بس أحس انك ............
دمعت عيوني و قلت
أميره : بتتخلى عني !!
ضمني بحب و شوق
جواد : وش هالإحساس الشين !!؟؟ مستحيل نفترق أو أتخلى عنك يالغلا !!
وصلنا ماليزيا و رحنا للشاليه طبعا لأن الجده كانت تقريبا بروحها و تبي مين يسليها ؟
سلطانه ردت لدبي و شيخه سافرت لبريطانيا كالعاده عملية تجميل جديده مدري هالبنت وش فيها شين عشان تسوي عمليات تجميل الله المستعان !!
خلقت ربي شريفه و حلوه مهما كانت !
و الكشافه رد كل واحد منهم لديرته عشان المدارس
الكل استانسوا برجعتنا و أكثرهم شمس و ملك
الجده مره كانت مبسوطه و سوت لنا ذبيحه على طريقتها الخاصه ذبحت لنا خروف بنفسها و طبخته و حنا يالبنات علينا السلطات و الأشياء الثانيه
و حنا بالمطبخ ....
ريانه : ليتهم خلو الشغالات يسوون السلطات
شمس : جده تقول لاء
ملك : يالله وش ورانا خلنا نسوي شي أحسن من جلستنا كذا
كنت أتأمل الخياره اللي أقطعها و أسهى من لحظه للحظه
ملك : جدتي قالت تبي تقضي رمضان بالرياض و تبي تسوي عمره بمكه
ريانه : ودي أسافر لأستراليا أقضي العيد فيها
ملك : أي عيد الله يرحم حالك في أماكن مثل هذي عندك جده أو أبها و ان مره مب عاجبك عندك دول الخليج وش كبرها و ش زينها تعيدين فيها !! و لا لاء يا أميره
أميره : هااااا معاكم
ريانه : ايه واضح !
تغدينا من أكل الجده مره خطير و طعمه حلو
جلسنا شوي بالخيمه نتقهوى و الجده تسولف لنا
بعدها رحت لغرفتي أبي أجيب أغراض الرسم و أركب اللوحه على الحامل اللي شريته
لقيت جواد يكلم بالتلفون و مره معصب عيونه حمر و باين انه يرتجف
بعد ما خلص مكالمته مسكت ذراعه و قلت بخوف
أميره : جواد وش فيك صاير شي ؟!
وخر يده عني بعنف و دفني بقوه و صرخ في وجهي
جواد : وخري عني يا بنت مساعد الساعه
طلع من الغرفه بسرعه و صفق الباب بقوه
لحظة صمت أذهلني شكله و حركته و عيونه و عنفه معاي جرحتني كلمة يا بنت مساعد اللي أحسها خناجر مغروسه في قلبي ....
ليه يا جواد وش سويت لك عشان تعاملني بهالطريقه ...!!
بكيت بحراره و حتى اللوحه غيرت رأيي ما بكملها
دقيت على جواله يعطيني مشغول أربع مرات و أنا أدق يعطيني مشغول و آخر مره لما دقيت جواله مقفل أكيد طفش مني وش السالفه !!
ليه احتد بهالطريقه و طلع قفلت جوالي و رميته بالدرج ماله أي داعي دام جواد ما يبي حتى يسمع صوتي !
رحت أتسبح بالحمام طلعت نشفت شعري و لبست لي فستان نعوم و تمددت عالسرير
أبغض كلمه على قلبي ينطقها جواد " يا بنت مساعد " أحسه يقولها بإستخفاف بقرف بتشفي !!
بكيت ساعه كامله انتظره يجي ما جا قهرني لو انه سمع شي يخصني كان قتلني و هذي ما فيها كلام أكيد الموضوع يخصه أو يخص شركته أو .....
يمكن الموضوع يخص الملاكمه ...!!يمكن !!
طلعت من غرفتي و رحت لغرفة ملك
كانت تقرى كتاب لأرسطو
ملك : وش فيك يالغلا !!
أميره : جواد مدري وش فيه كان موصل حده و معصب مدري وش فيه ؟!
ملك : أكيد في سالفه قويه في شغله
أميره : بس هذا ما يعطيه الحق يجرحني
و انهرت في حضنها و قمت أبكي
ملك : طيب انتظري شوي بس أدق عليه
دقت عليه مقفل جواله
ملك : أكيد بيرد بعد شوي اذكري الله
أميره : لا إله الا الله بس خايفه عليه لا يصير له شي
تأخر الوقت و أنا أنتظره ما رد في الأخير نمت عند ملك و أنا أفكر فيه
_______________________
11:30 صباحا
صحيت لقيت ملك مب موجوده حتى ما انتظرت أغسل وجهي و بسرعه على غرفتي أشوف جواد جا و لا لاء ...........
و للأسف طلع لاء و شكله أصلا ما نام بالغرفه لأنه كل شي على حاله
انهرت عالسرير بحاله فظيعه و قمت أبكي تسحبت تسحب عالحمام عشان أتوضى و أصلي
بكيت على سجادتي و قمت أدعي انه يرجع و يكون بخير كنت سعيده بلحظه حطمني و اختفى !
استعذت بالله و قمت أعشم نفسي خير أكيد بيرجع وين بيروح يعني !؟
مع انه جرحني بس قلبي الطيب يسأل عليه مهما سوى ؟؟
قمت بدلت ملابسي و زبطت مكياجي كأنه ما صار شي
بعد ساعه تقريبا جلسنا نتغدى بعدها قمت أتمشى في الشاليه بطوله و عرضه ملك و ريانه طلعوا يشترون أغراض شمس التهت في غرفتها تبي تغيرها الجده راحت تسوي قيلوله
أما خاله مزنه و خاله نويره فطلعوا مع السواق مدري على وين !
جلست قبال البحر و هواه يهفني بقوه
وش فيك انلهفتي عليه ؟؟!!
بدا الحديث الأليم مع النفس !!
زمان كنتي تتمنيه بقول بدون مبالغه انه يموت ... و اللحين انلهفتي عليه و انتي كنتي ما تدانينه و تنتظرين اللحظه اللي يطلع فيها من البيت و لنقل من حياتك ككل !!
جايه اللحين تبينه يرد يا شيخه قلعته .... لاء مو قلعته ليه قلعته و هو اللي سوى الكثير عشاني .... بس مب مثل فيصل ...... فيصل هذا نسيته اقتحم حياتي بالغلط و خلا نفسه جزء منها غصب احساسي بالذنب قاتلني و شعوري بإن جواد سامحني و نسى الماضي هذي من أروع الأشياء اللي سواها عشاني حبني بجنون .... اللي يحب بجنون يعايرك بأبوك اللي مدري شالذنب اللي سواه عشان يقول كذا و لو مهب هو غيره كثيرين يعايرونك بأبوك و أولهم أخوك أحمد ...
ارتعشت و أنا أتذكر شكل أحمد و هو يقول أبوك .. أبوك و ليه مهو بأبوك انت بعد و لا عشانه غلط مع أمك خلاص صار أبوي بروحي و ليه العار انرمى علي أنا وش ذنبي !!؟؟
أساسا لما انولد أنا ما كنت موجوده في الحياه أصلا وش هالعقل اللي مخليني جزء من ماضي ما كان لي ذنب فيه .. و من الأساس حبست أحمد لي في ذيك الغرفه المشؤومه مالها أي مبرر ... آه صح نسيت انه ميت على الفلوس الا مذبوح عليها ... المفجوع !!
رديت لصورة جواد اللي محفوره في داخلي أتخيله يحط يده على كتفي و يفاجئني بوجوده
يضمني و يقولي آسف ....
أوهام أتوهمها و أنا أتخيله ........... قطع علي تأملاتي جلوس ملك
أميره : متى رجعتي !!
ملك : زوجك نايم بالملحق عند الرجال
أميره : من صدقك !!!!؟
ملك : ايه و الله
جيت بقوم مسكت يدي بقوه فجلست
ملك : لا تنلهفي عليه خليك زعلانه منه لو هو من جد يخاف على زعلك ما كان أصلا قدر ينام ليله وحده بعيد عنك طنشك و لا قال لي زوجه خايفه علي أشوف وش صار عليها مو جرحك قبل لا يروح أجلسي خليه صدي عنه أعطيه أشكل عشان يصير لك قيمه عنده !!
أميره : صعب ...
ملك : بالعكس من أسهل الأمور انك تطنشين
أميره : ما أقدر
ملك : الا تقدرين
انهرت و أنا أبكي و أقول
أميره : أحبه يا ملك أحبه ما أقدر على بعده أحبه حتى لو جفاني
نمت عند ملك و مشيت على شورها لأن جواد ما شرف و لا فكر حتى يدق علي و عشان ما أظلمه رحت لغرفتي و شغلت جوالي أشوف يمكن أرسل لو مسج واحد طبعا لاء !!
انهرت عالسرير أبكي و أضم مخدته أشم ريحته حتى ريحة سيجارته عشقتها و تخيلته متمدد جنبي و يسولف احساس قوي بالشوق اللي في داخلي وش ذنبي أنا لو صار له ايش مع الشركه ما يسوي معاي كذا ...
__________________
الساعه : 03:20 عصرا
يومين مااا اسولف معاااه
أغنية لراشد الماجد شغلتها ريانه و قامت ترقص قدامنا و تتمايل برشاقه و نعومه
كنت أصطنع الإبتسامه و أنا أشوفها و أسمع كلمات الأغنيه اللي جت عالجرح !!
مااا شفت أغلى من غــــلاااك
و مااا شفت أقسى من قساااك
سواااها قلبك يااا عنيــــــد
يومين مااا سولف معــــــاااه
ملك : قومي نرقص
قلت بدون نفس
أميره : مالي نفس يا ملك قومي انتي و شمس
تنهدت بحزن و قالت
ملك : بعدين معاك باقي حزينه يالله قومي بترقصين معاي يالله بسرعه
و غصب علي قمت أرقص ما حبيت أكسر بخاطرها
بس ما قدرت أكمل جلست
مااا دمت أنااا متهني فيك
و انت تبيني و أنااا بيك
ليه تتعمد تغيــــــــــــب
و أنااا اللي قلبي بين ايديك
مااا ادري تغلي أو زعــــــل
و لا قلبك مني مـــــــــــل
اذا انتى تقوى عااالغياب
علمني وش لون أحتمــــــل
زودتهااا مره معاااي
همك بهااالدنيا عناااي
و انااا ترى مااا ابي كثيـــــر
أبي أحس ان هنــــــــــااااي
و انااا ترى مااا ابي كثيـــــر
أبي أحس ان هنــــــــــااااي
أبي أحس ان هنــــــــــااااي
طلعت من الغرفه و قمت أصيح رحت للبحر أشكي له
للحظات تذكرت رنا ....
رنا : وحده حبت واحد تركها و سافر سنين و سنين رد لقاها منتظرته
أميره : مجنونه و غبيه لو انها تزوجت و عاشت حياتها مب أحسن
رنا : ليه مجنونه بالعكس دام صلة الحب قويه خلاص وش اللي يمنعها انها ما تنتظره
أميره : أي صلة حب قويه و هو تاركها و مسافر الله أعلم وش مسوي يوم سافر !!
رنا : الله يا أميره ما توقعتك شرانيه لهالدرجه وش عليك فيها خليها تنتظره ان شا الله مية سنه ... قومي سوي لنا عصير
أميره : أوف منك و ليه ما تقومين تسوين لنا العصير ؟؟
رديت للبحر اللي قدامي قديش تلاطم أمواجه قوي و يخلب الألباب أحيانا يكون هادي و حنون يتأملنا بصدر رحب و أحيانا يصير شرير و مخيف يآلمنا و يكوينا ...
يمكن هو واحد من الكائنات اللي لما تقهرنا نرجع لها بخضوع يدفعنا الشوق اننا نتم نتأمله بلا نهايه ....
قمت أجري عالشاطئ و أنثر الرمل و أبكي و أصرخ
أميره : أحبك يالغلا ليه تجفاني ليه كيف جالك قلب يومين حتى ما تطل علي تشوفني
اشتقت لك و الله اشتقت لعيونك اللي اقتلتني و خلت الشوق يذبحني اشتقت للمسة يدك و رعشة قلبك اشتقت أحس نبضاتك و يدي على صدرك اشتقت أحط راسي على صدرك و اسمع نبضات قلبك ... تقول انك ساكني انت ساكني بجنون طبعا بل أكيد لأني شلت قلبي و حطيتك مكانه !!
دخلت للمطبخ أصلح عصير ليمون يمكن الفكره المجنونه اللي أفكر فيها تطير
كنت أفكر أروح له الملحق و أصالحه بس رديت للعصاره أطلع حرتي فيها
دخلت ملك و هي شايله أكياس
ملك : خذي هالأغراض رتبيها
قالت للشغاله و جت تطالعني
ملك : أتمنى تحسبين حسابي لأني بعد شوي بنفجر من خالتي نويره
أميره : ليه وش صار ؟!
قمت أصفي الليمون اللي عصرته
ملك : قال ايش تبي تتزوج ؟!
رحت أجيب مويه
أميره : طيب حلو خليها تعيش حياتها ما شا الله توها في عز شبابها
قالت و هي مره منفعله
ملك : بدل ما تجلس في بيتها تربي بناتها
أميره : و راح تربي في بناتها لين متى !!
ملك : لما يتزوجون !!
حطيت السكر و الليمون و المويه في الخلاط
أميره : و بعدين
ملك : بصراحه الجواب صعب يعني وش تسوي غير انها تجلس بالبيت مع جدتي
شغلت الخلاط
أميره : دام لها قدره على تحمل أعباء الزواج مرة ثانيه خليها تتزوج و بناتها بيعيشن حياتهن عادي يعني وش بيصير لهن !
انطفى الخلاط بيده بيد حبيبي اللي بحركه مباغته حاوطني بنعومه خلتني أرتعش
جواد : بحبك وحشتيني وحشتيني يالغلا و بحبك مووووووووووووت
ملك ابتسمت و لمت الكم شغاله اللي كانوا بالمطبخ و طلعت
قلبي طلع من مكانه و تجمد
طالعته و عيوني تدمع و جسمي يرتجف كان شايل كيس أحمر بيده و يطالعني بشوق و لهفه .... و حب
بعدته عني و طلعت بسرعه من المطبخ حسيت بإحساسين متعاكسين بإحساس القلب و قوة العقل عالقلب القلب يقول روحي له ... و العقل يقول خليه يلحقك ولد عبدالكريم !!
لحقني و شدني له و ضمني
جواد : ما تدرين قديش واحشتني ؟!
قلت ببرود و أنا أصد بوجهي عنه
أميره : أميره تعطيها مشغول و تقفل في وجهها عادي
بعد شعري عن وجهي
جواد : أدري اني زودتها حبيبتي و ما فكرت وقتها فيك كنت عصبي شوي ؟!
طالعته و قلت بسخريه
أميره : شوي !!! هالشوي اللي مستسخفها دمرتني عارف كيف !!
شلت تفكيري يومين و أنا أتعذب و لا فكرت حتى ترفع الجوال و ترسل لي لو كلمه وحده تطمني عليك تقول انك ساكني و تعذبني ليه ليه ليه !!
و قمت أبكي
أميره : تدري وش صرت بالنسبه لي !! كل شي عارف انك تذبحني و تشرحني بسكين بارد و لا أقولك انك تقتلني بغيابك و صدك و جفاك ... تغلى علي !! قولي يا أخي عالأقل علمني كيف أتحمل لا صديت عني و حبيت تبعد و تتغلى
طالعني بحزن أول مره أشوفه في عيونه أو لنقل ندم
بعدت يده عني و قفيته بمشي
جواد : انتظري
التفت له ببطء و طالعته شفت عيونه تدمع تدرون اني خفت على عيونه من حرارة الدموع
جريت له و ضميته بقوه مسكت وجهه و مسحت دموعه اللي أحرقت قلبي
أميره : لا الا هالدموع احبسها حبيبي الله يخليك
جواد : آسف
ضميته و قلت
أميره : ما في آسف في الحب
جواد : أحبك
و بكل بساطه سامحته لأني أحبه
كان سبب زعلته انه انحرم من بطولة الملاكمه بسبب ضعف في جسمه و ان الفحوصات و كلام الدكاتره يحرمه من بطولة هالسنه خوفا على صحته و جواد طبعا مره زعل و راح لهم و طلب اعادة الفحوصات و قالهم انه تدرب زين و صحته ممتازه و طبعا النتيجه نفس الأولى انه لا مشاركه في بطولة العام !!
زعل و تأزمت نفسيته و تم في غرفه في ملحق الرجال مقفل على نفسه
ما أخبي عليكم كنت مستانسه بكلام الدكاتره انه محروم من البطوله و هذا شي يفرح
لأنه الملاكمه مهما يكون رياضه خطره و ممكن تتسبب في عاهات لا قدر الله بسم الله عليه حبيبي !!
و أتوقع بما انه شره جدا في التدخين فمن الطبيعي انه يضعف حتى لو حرص على التمرين
مبسوطه ياااااه !!
جواد : و كأن الوئت في بعدك وائف ما بيمشيش ....
كان يغنيها لي و هو منسجم
أميره : لا تتحمس
جواد : بحبك وحشتيني بحبك و انتي نور عيني لو انتي مطلعه عيني بحبك مووووووت
أميره : حبيبي المفروض أنا اللي أقول المقطع الأخير لأن انت اللي مطلع عيني
بحبك موت
جواد : كنت مراقبك خطوه بخطوه اليومين اللي راحوا كنتي تحت عيني
أميره : عشان كذا كنت مكبر المخده و نايم في العسل .... ياه الله لا يعيدها منت متخيل كيف اني لجأت و نمت عند ملك لا تكررها نهائيا و لا عاد تعيدها
ضمني و قال
جواد : حاضر طال عمرك !
أميره : و لا تعصب علي ترى أخاف منك لما تعصب
جواد : ما راح أعصب عليك وعد بس لا تعصبين علي !!
بشوفته تضحك دنياي و تغرد العصافير و تغني الورود أحبك
كان الكيس الأحمر هديه منه لي ..
عباره عن دفتر مره ظريف أكتب فيه كل اللي أبيه و يقراه بين فتره و فتره اكتب كل اللي في خاطري يااااااااااااه فله بأكتب كل شي
تقترحه أفكاري علي
بقرب رمضان ردينا للرياض و طبعا ردت الجده معانا و ملك بعد اللي حبت تغير جو
استقرينا في القصر الكبير و اللي بالنسبه لي صار جنه بوجود جواد الله لا يخليني منه
كنت سعيده حيل بوجود الكل و خصوصا جوري اللي طول الوقت و حنا نسولف ما نطفش أبدا مع بعض ....
و نقعد نشرب قهوه تركي طول الوقت عشان ما نام و تكمل السالفه و طبعا يجي جواد يهزأنا " يالله كل وحده على غرفتها "
الجده مو كثير مرتاحه في البيت كرست وقتها كله للصلاه و العباده رجاوي سالفه ثانيه جالها عريس فمسويه زحمه و بما انه غني و من عايله واصله فطال لسانها أكثر و صار قنبله نوويه ...ساميه مثل ما هي مع تغيرات مريعه في شكلها مدري وش سببها و ودي أعرف سالفتها اللي مخليتها كذا و دايم سهدانه !!
هديل اللي طلعاتها و دخلاتها ما تخلص و على عين أمها اللي شايفتها و هي بعبارتها الدائمه اللي ترددها ( صغيره خلوها تعيش حياتها ... خلوها تدلع )
عزه في صومعتها تقرى كتب أو تحضر محاضرات أول تجلس بالحديقه !!
ملك تأقلمت مع الوضع عادي و خصوصا انها قد جربت تعيش معاهم كم مره بإختصار شديد البيت يجنن بوجود جواد جنبي ... مهما يصير
أميره : الله الله وش انتي تسوين !!
جوري : أكتب طلبات عشان رمضان
أميره : الشيف يتصرف
جوري : لا هذي طلبات زياده على طلبات الشيف
أميره : أها
كانت رجاوي تاكل على طاولة المطبخ
رجاوي : دايم الناس تروح تقضي لرمضان بفجعه كنهم طول السنه ما ياكلون الا في رمضان
مثل أختنا في الله
رمتها جوري بالقلم
جوري : انثبري بس لا تغصين علينا
أميره : ههههههههه أختك هذي عجيبه مدري كيف زوجها بيحتمل وحده مثلها
رجاوي : يا حبيبتي يحمد ربه اني رضيت فيه و أنا بنت العز
أميره : اذا هو عليه هو بعد ولد عز فما أتوقع انك تقدرين تغترين عليه
جوري : من أول ليله مطلقه مطلقه ما فيها كلام
رجاوي : أعوذ بالله من هالفال
قامت بإنفعال و هي ترمي الصحن بالمغسله
رجاوي : لا و مسويتلي النعومه
طلعت من المطبخ لأني خفت لا يتراشقون بالصحون و ينكسر لي ضلع هم كذا من عرفتهم دايم مخاصم و مضارب و سب الله يهديهم
مدري ليه طلعت أبي أشوف ساميه ودي أفهمها أو أساعدها بشكل أو بآخر
وصلت عند باب غرفتها لقيته مفتوح شوي يعني أقدر أشوفها منه كنت بطق الباب بس شي بشع وقفني و خلاني أبهت في مكاني !!!
|