البارت الخامس و العشرين
سمعت طق عالباب
أميره : مين
فتحت الباب و دخلت
شيخه : وش فيك طلعتي بسرعه ؟
طالعتها و قلت :
أميره : تعبت !
جت جلست جنبي و قالت :
شيخه : ودي أرد لديرتنا ؟
قلت بإبتسامه ساخره و أنا أمسح دموعي
أميره : عشان تكملين علاقتك مع جواد !!
قالت بعصبيه
شيخه : طبعا لاء وش تحسبيني يا أميره
قلت بطريقتي الساخره
أميره : حلوه و مزيونه مثلك بطيح راسك أكبر رجال وش فيك انتي ؟
كملت و قلت و أنا أبعد شعري عن وجهي
أميره : الله يخلي عمليات التجميل
طالعتني بقهر
شيخه : و ربي تقهرين بطلي تريقه لو سمحتي
أميره : معليش آسفه ...... الا ما قلتي لي وش عجبك في جواد ؟؟
شيخه : مدري يمكن كان ناقصني حنان ؟؟
أميره : و ما لقيتيه الا عند جواد !!!
شيخه : أبوي كان خانقني و أمي طول الوقت مشغوله مب فاضيه مدري و مالقيت الا جواد اللي عرض علي اننا نكون أصحاب و تطور الموضوع و صار حب و بعدين ......
نزلت راسها و سكت
تنهدت و قلت
أميره : أعتقد ان هذا مب حب و بعد كذا صارت همسات و لمسات و خلافه و ..........
قاطعتني و الدمعه في عينها و هي تحاول تقنعني
شيخه : أميره صدقيني و ربي بعد كذا ما صار شي و خلافه هذي احذفيها .... صحيح حاول بس أنا رفضت مستحيل هالشي يصير و ربي عقلت ...
قامت تبكي
شيخه : لأني كرهته أميره أنا أحب اللحين بصدق بس اللي أحبه ما يدري عني !
أميره : و مين صاحب الحظ التعيس اللي تحبينه مسكين امه دعت عليه ؟
شيخه : أمير
قمت من جنبها و قلت بعدم تصديق
أميره : نعــــــــــم أمير !!!!!!!! ما لقيتي الا أمير !!
قفيتها و رحت للتسريحه بذهول جلست قبال المرايه
شيخه : تبين الصراحه !!
التفت لها بإهتمام
شيخه : ابتهال و عبير يعطونه وجه ؟؟
رديت أطالع المرايه و أبتسم
أميره : أها عشان كذا كل ليله طالعات و داخلات و كل وحده فيهن كاشخه و ريحة عطرها شي !!! غريبه خواتك ما تنصحينهم غريبه فعلا !!
شيخه : ليه أنصحهم و هم مب خواتي !!! أصلا أنا البنت الوحيده لأمي و أبوي !!
كنت أمشط شعري من قوة الصدمه طاحت الفرشه من يدي !
_____________
الساعه : 10:01 صباحا
جلست قبال المسبح
أتذكر كلام ناديه : كوني نادره في كل شي ..... عيشي بإمتياز بعيد عن المشاكل !!
أمير : ممكن أجلس معاك شوي
فتحت عيوني و طالعته
أميره : تفضل
جلس جنبي و قال
أمير : تدرين صح أنا وياك نشبه بعض بس تمنيت عيوني رصاصيه و خضرا و زرقا مثلك
ضحكت و قلت :
أميره : البس عدسات يا قلبي .....و أنا بعد تمنيت ان عيوني تصير عسليه مثلك
قام يضحك
طالعت المويه بحزن وقلت
أميره : أبي أسافر مع ناديه للرياض
أمير : و أنا !!
أميره : تزوج الله يخليك !؟
طالعني بإبتسامه مرحه
أمير : الزواج مرفوضه فكرته بالنسبه لي
قلت بمرح
أميره : ليه على راسك ريشه ؟!
أمير : لا ..........
ضغط على خدي و قال
أمير : أبي عرسي و عرسك يكون بيوم واحد
ضحكت من قلب
أميره : أمير حبيبي زواج ما راح أتزوج !!
طالعني و قال بمرح
أمير : أميره حبيبتي زواج ما راح أتزوج لما تتزوجين !!!
ابتسمت و قلت
أميره : طيب لو قلت لك ان في قلب يحبك و يغليك
قالي بإستغراب
أمير : أنا !!!!!
أميره : وش فيك مستقل قدرك بهالشكل ؟؟ طبعا انت ؟!!
كملت و أنا أغمز له
أميره : يا تاعبهم !!
ضحك و قالي
أمير : مين صاحبة الحظ السعيد اللي تحب واحد مثلي ؟؟
أميره : اسمع بقولك .... وش رايك تتزوج و تسكن في فيلا انت و زوجتك ؟
و أنا أرد للرياض و أعيش مع أحمد و ناديه ! و نبيع هالقصر لواحد من خوالي
أمير أنا اختنقت و تعبت و الله ......
أمير : و دراستي !
أميره : هي مشكله ..... تقدر تكملها بعد الزواج ........ ها وش قلت ؟؟!
أمير : و الله مدري ؟
أميره : و ربي عايشه هنا عشانك صعبه تبقى بروحك ...... بس ؟؟؟
سكت و أنا أتذكر كلام ناديه اللي يصرخ في راسي بقوه
كوني نادره في كل شي ..... عيشي بإمتياز بعيد عن المشاكل !!
انتبهت للواقع على صوت أمير
أمير : أنا موافق
قلت بفرح
أميره : صدق و الله ....
أمير : ايه بس تخطبين لي وحده سنعه تعرف تطبخ مثل ماري !
ضحكت و قلت
أميره : لك اللي تبيه ؟؟
رديت أطالع المويه بحزن
أميره : أمير
أمير : هلا
أميره : ابتهال و عبير بنات خالي مطلق
ابتسم و قال
أمير : لا
استغربت بصراحه
كمل و قال :
أمير : بنات خالتي شريفة اللي توفت الله يرحمها وش فيك يا أميره كذا ما تدرين عن شي انتي نسيتي ان خالتي توفت الله يرحمها و هي تولد عبير !
تنهدت بعمق و غمضت عيوني لأني فعلا ما أعرف عن عايلتنا شي لأني ببساطه من نعومة أظافري و أنا منعزله عن العالم كلـــــــــــــــــــــــــــه
فصارت هالتفاصيل ما تهمني !!
الساعه : 08:30 مساءا
سافرت ناديه هي و عيالها و زوجها و جدتي شهده
و كل اللي جوانا طبعا معدا خوالي و عيالهم !!
كنت في البلكون أتأمل الحديقه و اتنفس هوا البحر و هو يلعب بشعري
آه كيف راح أكون نادره و أعيش بإمتياز بعيد عن المشاكل !
دق جوالي ....
دخلت للغرفه أشوفه
أميره : ألو
........ : أميره !
أميره : ايه معك أميره مين معاي ؟؟
......... : أنا شمه بنت عم عبدالله
دق قلبي بقوه و تنهدت بصعوبه
أميره : هلا فيك
شمه : ممكن نتقابل في أي مكان تحددينه !؟
صوتها صوت وحده بكت لين مل البكى منها
أميره : ايه ممكن ؟
اتفقنا على مكان المقابله
بدلت ملابسي و لبست عباتي و شلت أغراضي و طلعت
____________
لقيتها تنتظرني ...
سلمت عليها ...... امرأه جميله بحق !
بس الحب تعب قلبها و أخذ من وقتها و أعصابها
شمه : ما توقعتج حلوه جذي
أميره : مشكوره هذا من ذوقك ...... وش تشربين ؟
شمه : قهوه تركي
طلبت من الجرسون قهوه تركي و عصير ليمون !
طالعتها و سكت
شمه : مشكوره على انك جابلتيني لأني ........
قاطعتها بهدوء و قلت :
أميره : تبين تتكلمين عن عبدالله ؟
تنهدت و الدمعه خانتها
شمه : أحبه ليتج تقدرين هالشي !!
طالعتها بحده و قلت
أميره : طبعا مقدره هالشي !
جا الطلب خذت الليمون و هي خذت قهوتها و قالت
شمه : بس هو ما يبيني ؟
أميره : وش الشي اللي ما يبيك عشانه ؟!!
شمه : مدري ؟؟!
قلت بهدوء
أميره : التكبر و الغرور و شوفة النفس مثلا !
طالعت لقهوتها و سكتت
تنهدت و قلت :
أميره : لو تبين عبدالله يحبك تعاملي معاه بطبيعتك اللي أشوفك عليها اللحين و يا رب يوفقكم !!
طالعتني بإستغراب
شمه : تحبينه ؟؟!!
ابتسمت و أنا أشرب الليمون
أميره : اللي يحب لازم يتمنى الخير للي يحبه
رنت في راسي كلمة ناديه : كوني نادره !!
قلت في نفسي أعتقد اني نادره لأني راح أتنازل عن عبدالله لشمه و أكسر قلبي عشان هالمسكينه تعيش حياتها هي متوقعه اني أنا واقفه في طريقها !!!!
مستحيل أبني سعادتي على تعاسة غيري ... أكيد هي تحبه و يمكن من زمان بس مع ذلك اكتشفت اني ما أقدر أستمر مع عبدالله !!!!!!!!!! الله يوفقه
خدعني و هذا يكفيني !!
حطيت العصير عالطاوله و قمت و قلت قبل لا أمشي
أميره : سلمي لي على عبدالله و قولي له تراني عالوعد أتمنى لك يا شمه زواج سعيد
مشيت و أنا أتنهد براحه !
ركبت السياره و رديت للبيت
دخلت غرفتي و رديت جلست في البلكون
طق الباب
شيخه : ممكن أدخل ؟
طالعتها و رديت أطالع الحديقه
جلست في الكرسي إللي قبالي ........
أميره : غريبه ما طلعتي و لا بالعاده انتي غير موجوده في مثل هالوقت ؟
شيخه : قلت لك اني عقلت
قمت أتأملها ؟!
الفتاه الفاتنه اللي دايما أقول انه وراها بلاوي الدنيا و طلع توقعي صح ..... معقوله راح تناسب أمير و لا بتعبه في حياته و أنا ضميري يأنبني اني زوجتها له !!
كانت عيونها حزينه رغم جمالها اللي مخلي لها بريق هادئ !!
يا ربي هي اعترفت لي انها عقلت و تركت جواد يا خوفي بس ان جواد يفضحها !!!
ما أعتقد انه يقدر لأنه بيفضح نفسه مب معقول راح يكون بهالخسه و النذاله !!
شيخه : أميره في وش تفكرين !
قلت و أنا أطالعها
أميره : أفكر فيك يا بنتي !!
طالعتني برجاء
شيخه : أميره بتساعديني ؟
قلت بهدوء
أميره : راح أحاول بإذن الله راح أحاول
_____________
الساعه : 03:20 عصرا
عزمت البنات كلهم عالملاهي ابتهال و عبير و شيخه و ديمه و سلطانه
كنت أبي أغير جو و أتحرر من عزلتي !!
كان يوم رووووووووووووووووووعه
أكلت حلاوه قطن وااااو و لعبت لين قلت بس !!
و كنا نضحك على البنات لما يصارخن ياي !
بس ما أخبي عليكم صرخت لين قلت بس في قطار الموت !!
انقسمنا فريقين أنا و شيخه و ديمه فريق
و سلطانه و ابتهال و عبير فريق " الله يعينهم مع سلطانه "
طبعا كان بينا ألو
وقفنا نشتري آيسكريم
ديمه : بنات شوفوا
التفت لمكان ما تأشر لقيت شاب واقفه قباله بنت شكلهم يحبون بعض و متخاصمين
البنت : انت واحد خاين تضحك معاها و تمسك يديها و ما سويت شي !!
الشاب : افهميني شوي لحظه
و قامت تمشي و هو يلحقها
لفت تجاهه و عطته كف
البنت : انت مب كفو أحب واحد شراتك ؟
طالعت لديمه و شيخه قامت تبتسم
قمت أغني و حنا ناخذ الآيسكريم من البايع و نمشي
أميره : هذي الحياااه مااا تكتمل الا بزعل
و هذي الحياااه مااا تبتدي الا بأمل
شيخه : و دوم الحياااه تختبر منهو الصبـــــــــور
و نكتشف إن الأماااني بحر تملاااه البحور
و قمنا نغني ثلاثتنا
أميره + شيخه + ديمه : و آه من الحياااه دوم الحياااه فينااا تخون
دوم الحياااه فينااا فينااا تخون
أميره :هذي الحياااه مااا تكتمل الا بزعل
و هذي الحياااه مااا تبتدي الا بأمل
طالعت لولد صغير يبكي !!
أميره : دااايم أسير يبكي حزين
تصدق معاااه و مره تخون
قاموا الناس يطالعونا
ما اهتمينا فيهم
ديمه : أحلى الحياااه لمااا تكون
دااايم سعيد و تفداااك العيون
دااايم سعيد و تفداااك العيون
أميره : دايم سعيد و تفداك العيون
و تفداااك العيون
شيخه : انتوا فرقه بنات روعه روعه ههههههههه
و قمنا نضحك و نجري بمرح
أميره : وش رايكم تركبون هاللعبه ؟؟
شيخه : بصراحه آخاف من الأماكن العاليه و هالدولاب مره عالي !!
ديمه : و أنا بعد
تنهدت و قلت
أميره : خلاص بركبه آخر شي
مشت شيخه قدامنا
و فجأه وقفت
طالعنا لواحد وقف قدامها
........ : يا حلوه يالمزيونه
كان يكلم شيخه و يطالعها بنظرات مالها داعي
هي ارتبكت و خافت طبعا أنا اللي مستقويه جيت برد
لقيته يطيح بثقله عالأرض
و طلع لنا أمير
وش جابه هنا ؟؟
قام يكلم شيخه و يطالعها بإحتقار
أمير: حلوه لهالدرجه تمي في بيتكم وش مطلعك ؟
طالعته أبي أنقذ الموقف و هي المسكينه مصدومه و مب قادره حتى تتكلم
أميره : يا أمير
طالعني بنظره معناها اسكتي .......... و راح ؟؟
طبعا الناس قاموا يتجمعون
فمشينا بسرعه و الذهول ممسك معانا
شيخه قامت تصيح
أميره : أمير ما يقصد يا شيخه بس يمكن انقهر ......
قاطعتني و هي تبكي
شيخه : ليه ؟؟
ابتسمت ديمه و قالت
ديمه : يمكن غار عليك يا حلوه ما سمعتيه قالها
ابتسمت شيخه مثل الأطفال و قالت :
شيخه :صدق ؟!
أميره : ايه لو انه ما غار كان ما جا أصلا و ضرب ذاك الأصلع و اسدحه بالأرض !
مسحت دموعها
أميره : و لا يهمك يا قمر نكمل جولتنا
رن جوالي
حطيته اسبيكر
أميره : هلا
سلطانه : وينكم يا بنات ؟؟
أميره : بالساحل الأفريقي الجنوبي
ضحكنا أنا و البنات و كملت
أميره : بالملاهي يا سلطانه قريبين من ساحة الخيل
سلطانه : فاتكم ؟؟!
ديمه : وشو !
سلطانه : و لا تدرون بقولكم بالبيت
شيخه : يوه يا شينك ما أحب اللي كذا
قالت سلطانه بحده
سلطانه : شيخه !!
أميره : انتوا وينكم ؟؟!
سلطانه : بالبيت
طالعنا بعض متفاجئين
شيخه : ليش وش عندكم ؟؟
سلطانه : لما تردون للبيت يحلها الحلال و أقولكم عاللي صار
أميره : أجل حنا بنكمل وناستنا و انتي خليك بالبيت هههههههههه
ضحكنا عليها و أنهيت المكالمه قبل لا تهزأنا
ديمه : تتوقعون شلي حصل
شيخه : مدري ؟؟
كنت أفكر و أتخيل ان ابتهال أو عبير مصلحين بلوه !!
ديمه : أميره في وش تفكرين !!
طالعتها و قلت
أميره : مدري ليه أتخيل ان عبير مسويه شي قوي
شيخه قلب وجهها ألوان
ديمه : ليه قلتي عبير مب ابتهال ؟!
ابتسمت ببرود
أميره : مجرد احساس
رحنا لساحه الخيول طبعا ديمه و شيخه مب طايقين المكان قال ايش ريحة خياس !
قمت أتأمل الخيول و اطالعها و أتذكر
شموخ الفرس السودا الأصيله اللي الكل كانوا يخافون منها آه أيام حلوه !
الله يرحمها ترى الرحمه تطلب للجميع لا تستغربون !!
كنت أتذكر كيف أغني لها و أسولف لها و أسابق بها و ربي كانت تخفف عني كثير !
انتبهت من الماضي على فرس تشبه بالزبط شموخ فرس سودا تمردت على مدربها بعصبيه
قمت أطالعها و هي تبي تهرب و تحاول ترفسه صرت أطالع المشهد و كأني عشته في الماضي دخلت من فتحه في السياج اللي مانع دخول الزوار و صفرت كأني أصفر لشموخ !
فجأه هجدت الفرس و قربت مني ...
صرخوا علي ديمه و شيخه
ديمه : ارجعي أميره
شيخه : يا مجنونه لااااااا
رجل الأمن صرخ علي و قالي أطلع بس المدرب التفت لي و قال لي بذهول :
المدرب : وين تعلمت هالأسلوب ؟
طالعته و أنا مشدوهه !!
أميره : فيصل !!
تدرون لما شفت الفرس تهاجمه ما انتبهت لوجهه كثر انتباهي للفرس نفسها !
التفت للفرس ..... أتأملها
فيصل : اسمها معالي
ابتسمت و طالعته و أنا اعدل طرحتي
أميره : مثلك !
مسك لجام الفرس و قالي
فيصل : باقي قصتنا ما انتهت يا أميره
ابتسمت بتفهم و قلت
أميره : معاك انت .......... باقي ما انتهت !!
التفت لجهة البنات و مشيت و أنا أحس بلذه فظيعه مبسوطه
ديمه : مين المزيون صاحب الفرس ؟
قلت و أنا أمشي معاهن و أطالع السما
أميره : سالفه مع كل يوم تتجدد و تدخلها أحداث ما تنتهي
شيخه : ما فهمت شي ؟
ديمه : و لا أنا
قلت و أنا أضحك
أميره : أحسن خليكن جاهلات على طول
طالعتني شيخه بقهر
شيخه : جاهلات !!!
هربت منها و هي و ديمه يلحقوني
أميره : ايه
هههههههههههههه
______________________
الساعه : 06:30 مساءا
ردينا للبيت و رجولي مب شايلتني آه جريت و لعبت و طلعت كل اللي براسي في هاليوم !
تركت البنات بالصاله و طلعت لجناحي آخذ شور مزبوط !
طلعت من الحمام على رنة جوالي ...
أميره : هلا بالعروسه يا مرحبا
الجوهره : هلا فيك
أميره : غريبه داقه هالوقت المفروض تكونين في أحضان الحب و النعيم ؟؟!
الجوهره : و لا تستحين ما تدقين علي تسألين عن أخباري ؟؟
أميره : لا يا شيخه وش تبين زوجك يقول عني داقه من أول يوم ؟؟
قامت تضحك
الجوهره : و لا يهمك بأخليه يتعود
أميره : عوديه وش وراك غيره ...... ما قلتي لي كيفك !!
الجوهره : الحمد لله بخير مبسوطه حيل
أميره : الله يديم عليك
الجوهره : عقبالك
أميره : يوه يا جوجو رجعنا للسيره الهباب اللي ما أحبها سكري و روحي لزوجك أبرك
الجوهره : زوجي مب موجود راح يجيب أغراض متفرغه لك يا جميل
أميره : الله يرحمك روحي تفرغي لأي شي غيري توني طالعه من الحمام دايخه !
حطيت عالإسبيكر و قمت أنشف شعري
الجوهره : ليه وين طلعتي اليوم ؟
أميره : للملاهي
الجوهره : يووووووووه عالوناسه و الفله ؟!!
ابتسمت و قلت :
أميره : اوووش يا بنت لا يسمعك عبادي ينصدم فيك ؟
الجوهره : وش صلحتي ؟
أميره : غنيت و لعبت و تنططت و .........
نزلت المنشفه من على راسي و كملت
أميره : و شفت فيصل !!
صرخت
الجوهره : ياااااااااااااااه شفتيه ؟!!!
أميره : ايه !
الجوهره : طيب وش قال وش قلتي وش اللي صار احكي لي ؟؟
أميره : ما ينفع في التلفون .... لما تردين من شهر العسل ذكريني أقولك
الجوهره : يا ربي عالنذاله
أميره : توك تدرين ههههههههه
سكرت منها و قمت أسوي مساج لرجليني لبست بلوزه صفرا نعومه و تنوره بيضا تحت الركبه بشوي ..... صليت و مشطت شعري ....
نزلت للبنات أشوف وش سالفة سلطانه !!
رحت لغرفتها طقيت الباب
جاني صوتها
سلطانه : تفضل
دخلت و سكرت الباب و راي
أميره : وين البنات ؟
سلطانه : مدري عنهن ؟
كانت متمدده عالأريكه لابسه بلوزه سواريه حمرا و بنطلون ميدي أسود !!
تعدلت في جلستها و قابلتني .... و هي تبتسم بمزح
سلطانه : أطلب لك شي تشربينه ؟؟
قلت بمرح
أميره : ان كان ما عليكي أمر أبي كابتشينو و قطعة جاتو بالفراوله
قمنا نضحك
أميره : حشا مب داخله غرفه أنا داخله كفيتريا أو مطعم !!
رفعت سماعة التلفون ....
سلطانه : و لا يهمك ثواني و الطلب عندك يا جميل ......... سلزيا أبي اثنين كابتشينو
و اثنين قطعة جاتو بالفراوله بس لا تتأخرين !!
كنت أطالعها بإبتسامه هادئه و أفكر ....
سلطانه : اللي ماخذ عقلك ؟!
أميره : ما بتردين لمشاري !!
قامت من قدامي و هي تروح للبلكون
سلطانه : أحبه و هو بعيد لا يقربني الله يخليه
قلت بجديه
أميره : طيب لو تزوجته وش بتكون ردت فعلك ؟
التفتت تطالعني بحده تبي تاكلني !!
أميره : وش فيك ما رديتي علي !!
صرفت نظراتها و قامت تطالع للحديقه
رحت لها و قلت و أنا أستند عالسور
أميره : شفتي يعني في أمل تردين له
سلطانه : قصتي يا أميره أنا و مشاري مثل قصة خبز العرافه .....
أميره : ممكن أسمعها ؟
طالعت للحديقه بإبتسامه عذبه ذكرتي بالحكواتي أيام زمان يجلس بوقار و حوله الناس و يحكي لهم الحكايه و هو يبتسم بعذوبه تشد السامع انه يسمع له أكثر ..
سلطانه : يحكي الكاتب " أو . هنري " انه في زمن من الأزمان البعيده في مدينه صغيره و نشيطه كانت مارثا مشهوره بخبزها اللذيذ و فرنها المميز الناس كل صباح تجيها مع شروق الشمس تبي خبزها الطازج اللذيذ !!
التفتت تطالعتني ...
سلطانه : ميزة مارثا يا أموره انها تبيع كل أنواع الخبز حتى الخبز اليابس للناس الفقراء اللي ما يملكون ثمن الرغيف الطازج .... كانت مارثا امرأه قلبها أبيض بس عانس و ماخذه في نفسها مقلب ان الشباب ما يبون يتزوجونها عشان بدانتها أو لأن وجهها فيه بثور مشوهته مع انها كانت غنيه و مركبه أسنان صناعيه !!!
ضحكت و قلت :
أميره : مثل بنت صديقة الوالده الله يرحمها فاتها قطار الزواج على قولها و ما تعرف شالسبب و في الأخير اكتشفت انها مغروره و تحتقر الناس كانت دايم تعلل لنا انها ما تبي تتزوج و ترفض العرسان لين في الأخير أمها فضحتها بين الناس و قالت انه ما جا لها و لا عريس !!!
ابتسمت بمرح و قالت :
سلطانه : بس مارثا غير ..... في يوم من أيامها السعيده جاها شاب وسيم لكنه رث الثياب بس أنيق مع رثاثة ملابسه و نحيف ابتسم لها و طلب منها رغيف خبز يابس حياها بأدب و مشى في حاله !
صاحبتنا وش سوت ما نامت ذيك الليله و قامت تحلم فيه و تتخيله متزوجها و توهمت ان ابتسامته لها بداية حب و قامت تعتني في نفسها و قامت تدور على خلطات تصفيه الوجه و تلبس فستانها الأحمر المنقط بالأبيض عشان تكون قدامه أكثر جاذبيه و أناقه
طبعا هو كل يوم كان يطلب الخبز البايت ففي يوم من الأيام لاحظت بقع من الألوان في يده فخمنت انه رسام مسكين فقير يرسم و يرسم عشان يكسب فلوس يشتري فيها خبز مارثا
أميره : أكيد المسكينه تخمينها طلع غلط
ابتسمت و قالت :
سلطانه : مره هالشاب و هو يشتري من عندها الخبز البايت اليابس عجبته لوحه في مخبزها فسأل عنها و قعد يسولف معاها عن اللوحه أخذ رغيف الخبز و طلع !!
مرت الأيام و مرثا تجمل في نفسها و تطرب الشاب بحلو الكلام في الرايح و الراد
فمره حزنت عليه و قالت هو عمره ما طلب يشتري مني كعك فطيره خبز طازج دايم يطلب مني الخبز البايت مسكين الفقير ؟؟!
من اليوم الثاني خبزت له خبزه مخصوص و دهنتها بالزبد الغالي و لفتها له أول ما جا يطلب الرغيف البايت أعطته هاللفه بكل الحب !!
طبعا نامت يومها تفكر فيه ياه لما يفتح الخبز و يلقى الزبد أكيد راح يستانس و باتت ليلتها الخيالات توديها و تجيبها !!
قاطعتنا سلزيا و هي تحط الكابتشينو و الجاتو عالطاوله اللي بالغرفه ...
دخلنا و جلسنا حول الطاوله !!
أميره : مدري أحس ان مارثا ماخذه في نفسها فعلا مقلب !!
سلطانه :في اليوم الثاني قامت مارثا على عادتها تسوي خبزها فجأه سمعت صوت اقتحام غاضب في المخبز طلعت تشوف وش السالفه ؟؟!!
لقت قدامها شاب يدخن أول مره تشوفه و شاب عرفته !!!
فنانها اللي حبته و سهرت تفكر فيه لقته معصب و مقهور و يزمجر بسخط و هو يرفع يده و يلوح فيها و يصرخ في وجهها بلغته اللي ما عرفتها طبعا و هو معصب و قام الشاب الثاني يبعده عن موقع الأحداث !!!
قام الشاب يسبها و يصرخ فيها يا ملقوفه خربتي علي كل شي يا عانس يا عجوز
طبعا المسكينه من قوة الصدمه استندت عالطاوله بتعب
و الشاب صاحب السيجاره يسحب صديقه من ملابسه و يهدي عليه ....
بعد ما راح حبيب مارثا رجع الشاب اللي يدخن و قالها
تدرين ليه عصب عليك لأنه مصمم معماري و حنا نشتغل في مكتب واحد المسكين كان يصلح تصميم معماري لمبنى البلديه لأنه كان بيدخل في مسابقه كبيره جائزتها قيمه لأفضل تصميم طبعا هو خلص من تحبير خطوط التصميم أمس و تعرفين المصممين يستخدمون القلم الرصاص و يمسحون زوائد الخطوط بالخبز الناشف لأنه أفضل من المساحه فكان كل يوم يشتري من مخبزك الخبز اليابس و شكلك فعلا خربتي عليه تعب ثلاث شهور! الزبده كانت فظيعه بالنسبه لهالتصميم اللي خرب أكيد ....و ما صار ينفع الا ينلف فيه سندويتشات القطار !!
طبعا يا أميره لا أقولك على مارثا وش سوت !!
شالت الخلطه السحريه اللي سوتها لبشرتها و رمتها في الزباله و غيرت فستانها و لبست
ملابسها العاديه اللي تشتغل فيها كل يوم !!
قلت و أنا أشرب الكابتشينو
أميره : قصه حلوه و محزنه في نفس الوقت بس ما أعتقد انها تشبه قصتك انتي و مشاري !
قالت و هي تطالع الكوب بحزن
سلطانه : يمكن !بس أحس ان مشاري يشبه مارثا بالزبط متسرع و ما يسمع الا صوت نفسه
أميره : ما قلتي لي وش صار بالملاهي خلاكم تردون للبيت بدري !؟
سلطانه : عبير!! الله لا يفضحنا و يستر علينا ..... شافها خويها فسوى سالفه
و بغبائه يحسبنا كلنا من طقت عبير فقام يعزمنا على الكوفي شوب مع أخوياه
طبعا يا أموره مين اللي حضر الموقف !!!
أميره : يمكن أمير ؟؟ لأنه جا للملاهي
ابتسمت سلطانه و هي تقطع الكيكه بالشوكه
سلطانه : مشاري
كان الكوب في يدي حطيته عالطاوله
أميره : وش جابه ؟؟
سلطانه : أول شي مسك الولد و ضربه بعدين مسك اخته و ضربها و خذنا بسيارته ؟؟
أميره : غريبه رضيتي تركبين معاه !!
سلطانه : بطبعي أحترم عصبية الإنسان اللي قدامي اذا ما تعدى حدوده معاي !و أنا احترمت عصبيته و ركبت مع البنات بهدوء ... طبعا في السياره قام يهزء خواته و بعدين قام يكمل علي سكت و لا رديت عليه يا حبيبتي ما عجبني الوضع أول اشاره و قف عندها فتحت باب السياره و طلعت و هو مذهول من حركتي يا حبي رجعت البيت بتكسي !!
ابتسمت و قلت
أميره : كفك على كذا !!
كملت و قلت
أميره : شي متوقع من وحده مثلك
سلطانه : على فكره وش لون عبدالله
ابتسمت بحزن و رحت للبلكون ....
لحقتني و قالت :
سلطانه : وش فيه ؟؟
أميره : عادي رجع يمشي مره ثانيه ...
و قمت حكيتها على كل اللي صار !
سلطانه : شي متوقع من وحده مثلك
ابتسمت و قلت
أميره : حسيت بإحساسين عكس بعض تماما و خصوصا لما تفادى ضربة الكره و قام
تمنيته يا شيخه معاق مثل ما هو على انه يخدعني !!
مب قادره أتقبل هالخديعه أبدا و هو مثل ما هو بارد و لا حتى سأل عني أو حاول يبرر موقفه دايم المبادرات تجي مني أنا أما هو عمره ما صلح شي عشاني كل ما أفكر اني أنساه أتعب أكثر و أحس قلبي يحرقني عليه أكثر و أكثر !
و فيصل اللي سوى عشاني المستحيل و حبني بصدق و أخلص لي مب قادره أحبه نهائيا
و ربي انه انسان نادر عارفه هالشي بس ..........
طالعت الحديقه و كملت :
أميره : بس مب قادره أحبه ........ و عبدالله يا ما جفاني و بعد عني و ما شفته صلح شي يبين انه يحبني!
حبيته و مازلت أحبه يااااااااااه متخيله يا سلطانه انه لو جا تسامح مني راح أسامحه بس مرات أقول لاء !!
طالعتني و هي تبعد شعرها البني عن كتفها
سلطانه : قلت لك من قبل انه ما يستاهل حبك انتي اللي زعلتي و قلتي لاء !!
تنهدت و قلت :
أميره : لو هو ما يستاهل حبي في غيري وحده تحبه !! بترك لها الساحه فاضيه و اخليها تشبع فيه أصلا أنا اللي جبته لنفسي بأضغط على قلبي و أحاول أنساه !!
سلطانه : تزوجي فيصل و ارحمي نفسك ؟
قمت أطالع الحديقه بتأفف
أميره : مب قادره أحبه كيف أتزوجه ؟!!
سلطانه : مب شرط يكون في حب قبل الزواج أجمل شي الحب بعد الزواج !
رنت في داخلي كلمة ناديه
كوني نادره في كل شي !!
|