البارت الثاني و العشرون
أمير : و الله تطورنا يا أميره
قربت صحن المرتديلا قبالي
أميره : طبعا يا قلبي أنا أميره بنت مساعد
عبادي طالعني مقهور من رد أحمد
عبدالهادي : انسان ما أدري كيف أوصفه .......
طالعته و قاطعته و أشرت على شفايفي
أميره : لا تتهور !!
ثامر رجع الكرسي لورى و قام !!
ثامر : أنا رايح للشركه
أمير : خذني معاك !!
قاموا اثنينهم و طلعوا من الغرفه
كأن عبادي كان ينتظر خروجهم
و أنا توني مخلصه من تصليح السندويش
قال بصوت هامس
عبادي : اسمعي وش بتسوين بتقعدين كذا لا شغله و لا مشغله ؟؟
طالعته و أنا أبتسم بلامبالاه
أميره : الله يخلي أحمد
بل شفايفه بلسانه و قال و هو متحمس !!
عبادي : طيب أعلمك سواقة السياره وش رأيك ؟؟
حطيت السندويش على الصحن و قلت بتفكير
أميره : عمره ما كان طموحي سواقة السياره لا لا يا عبادي ما أبي أتعلم السواقه !!
___________________
مرت الأيام متتابعه متسارعه و هادئه جدا ....
أنا صرت أرسم بكثره ..... أشارك في المنتديات ..... أمارس الرياضه .... أشارك في جمعيات الأطفال ....... و كل يوم أزور عبدالله .....
عبدالله مثل ما هو انسان ساكن بدون أي حركه ............
أماني ملكت ما شا الله عليها و علاقتي فيها صارت أقوى
صارت نظرتي للحياه أفضل أنسى الدموع و أرضى في واقعي و حياتي بدون تمرد و سخط ....... أتذكر فيصل و كأنه ذكرى جميله !!
غابت مع الأيام ياااااااااااااه حزينه عليه حيل ودي أعرف عن أخباره لو مقطتفات ....
عبدالهادي و ثامر انشغلوا في تجهيز بيوتهم عشان الزواج قرب !!!
ثامر ناوي يعيش في الرياض و عبادي أخيرا حن و وافق الأخ يشتغل في الشركه اللي بدبي
عشان أحمد ما يشيل همها و يساعده بعد الحمل ثقيل على أحمد الله يجزاه بالخير
كافي انه مهتم في حلالنا !؟
أمير ما شا الله عليه مجتهد في دراسته و في تقدم مستمر
الجوهر قامت تسافر من ديره لديره هي و خواتها و حامد عشان تشتري أغراضها
صحيح قالت لي أسافر معاهم بس رفضت أستحي من أخوها و ماله داعي أسافر دام خواتها معها !!
دانيا نفس الشي انشغلت بنفسها و ما صار أحد يدري عنها شي العروسه مشغوله !!
ناديه تطارد ورى عيالها الله يهديهم الصغار و يصلح حالهم الكل مشغول و يجهز للعرس
إلا أنا !! العرس قرب حتى فستان ما شريت الله المستعان مدري وش أحس فيه !!
تعودت على الوحده صوفي أحيانا تهون علي !!
على فكره صوفي باقي على تحفظها و التزامها بالأنظمه الصارمه هههههههههه
(الإيتيكيت ) ...
جاتني دعوه لحضور معرض رسم و عرض للوحاتي بعد الله يجزاه خير عبادي ساعدني في هالحكايه و صارت الدعوات تجيني من كل مكان !!
كان يساعد على نشر لوحاتي في الجرايد و المجلات و المنتديات و المعارض !!!
لكن هالدعوه كانت مختلفه كان ركن مخصص لي أعرض فيه كل اللوحات اللي أبيها
كنت مستانسه حيل و من كثر و ناستي احترت وش بأعرض من اللوحات !!
________________
الساعه : 08:30 صباحا
خذت معاي بوكيه الورد الصباحي و رحت للمستشفى ....
صباح جديد في يوم جديد ياااااااااااااااااااااه
دخلت على عبدالله حطيت الورد على الطاوله و فتحت الستاير عشان الشمس تصبح عليه
جلست على الكرسي اللي قبال سريره
أميره : تدري يا عبدالله قاعده أفكره وش راح أختار من اللوحات لوحتك أحلى وحده فيهم
ابتسمت بمرح و قلت :
أميره : لالا تبي البنات ياخذونها طبعا لا اللي محلي هاللوحه انت يالغالي تدري بختار
لوحة البحر و لااا تدري بختار لوحة هدوء الليل ...........
سكت و قمت أتأمله بحزن
أميره : بختار لوحه انت رسمت معالمها في داخلي بكل صدق أحتاج أسمعك لأنك الصوت اللي يصرخ في داخلي بحنان !
القيت عليه نظره أخيره و طلعت .......
يوه الساعه 10:00 رحت للمعرض اللي بتنعرض فيه لوحاتي أشوف الركن المخصص لي و أشوف البروفه بعد عشان أحسب عدد اللوحات ...
كان ركني جدا كبير مدري وش بحط و وش بخلي ؟؟!
رجعت البيت و على طول عالمرسم طبعا أخذت صوفي معاي لأنه ذوقها يعجبني
أميره : شوفي يا صوفي اختاري اللوحات اللي تعجبك عندك المرسم تحت أمرك
صوفي : ok مس أميره
كنت أخلص لوحه مثبته عالحامل لإنسان هربت منه مدري ليه ؟!
فيصل و هو عند البحر
انسان متفائل بالحياه بس هالمره بدون سيجاره !
حطيت الفرشه و قمت أتأمل اللوحه
ليه الحياه تهزمنا و بعد ما نطيح و نتعذب و يمكن نموت تجي تفرحنا من جديد و تخلينا نتأملها و نتفائل انها ما راح تخذلنا .....
و مع كل فجر يتجدد الأمل !!
الرائع في الحياه ان لحظاتها و أيامها ما تتكرر كارثه لو هالأيام تتكرر و خصوصا لو كانت
أيام بشعه و سودا ....
تعلمت اني أنسى بس صوفي علمتني حكمه : لما تقولين نسيت خلاص ... هذا دليل على انك ما نسيتي أبدا لأن القدره على نسيان مثل هالأمور صعب جدا و يمكن أحيانا يكون مستحيل !!
انتشلتني صوفي من تأملاتي ...
صوفي : شوفي مس أميره هاي اللوحات ياللي اخترتا بس هاي أروعهن
التفت أشوف اللوحه اللي بيدها .............. جتني رجفه ؟؟
حتى انتي يا صوفي !!
صوفي : لوحه فحميه رائعه لوجه من العصر الروماني بيجنن مين هاد ؟
أميره : واحد شفته مره عالشاطئ
الجواب المعتاد لسؤال دايما يطرح نفسه لكن مع اختلاف الأشخاص !!!
صوفي : باين عليه شدك كتير بتحكي لي مس أميره شو ياللي شدك فيه !!
ابتسمت و قلت و أنا أطالع ليديني بخجل و أضغط عليها
أميره : عيونه شدتني ........ فيها حنان غريب و دفى و أمان و أمل متجدد للحياه
قمت و رحت لشباك المرسم أفتح الشبابيك ...
أميره : عيونه مثل الشمس توعدنا بيوم جديد كله أمل و سعاده تحكي عن الحب و الأمل
و الشوق ما أدري ليه أحس بالأمان لما أشوف هالعيون !!
أخذت منها اللوحه و قمت أوريها ....
أميره : شايفه هالوجه في حياتي كلها ما شدني مثل هالوجه لأنه بصراحه وجه نادر لإنسان ..............
تنهدت بحراره و قمت ألمس الرسمه أنف عيون شفايف شعر و أطالعها بكل الحب
و شكلي نسيت نفسي و أنا أعبر عن مشاعري كأني كنت أنتظر من أي انسان
يسألني هالسؤال : وش اللي شدك فيه ؟؟
انتبهت لنفسي على نظرات صوفي ...... بإختصار كانت مفهيه !!
طالعتها بإرتباك و قلت أصرف كالعاده
أميره : وش رايك في هاللوحه توني مخلصتها ؟؟
و أشرت لها على لوحه كانت مثبته عالحامل ؟؟؟!!
صوفي : حلوي كتير و هاي لمين !!
أبتسمت و قلت بحزن :
أميره : لواحد كان اسمه ........ مجنون أميره !!
حطت يدها على كتفي و هزت راسها بتفهم
صوفي : شو رأيك في كوب نسكافيه !
أميره : يا ليت و الله ....
جت بتطلع ناديتها
أميره : صوفي خذي كروت الدعوات هذي وزعيها بمعرفتك أنا كتبت لك عليها
أسماء المدعويين !!
صوفي : ok مس أميره
جت أخذت مني الكروت و طلعت
قمت عشان أفك اللوحه من الحامل
دق الباب
أميره : تفضل
أمير : صباح الورد
أميره : صباح الخير
دخل و صك الباب
أميره : أنا عارفه من صكت هالباب في وراك ان ؟؟
أمير : بصراحه ايه ؟
أميره : تفضل قول وش عندك ؟!!
شلت اللوحه و حطيتها عالأرض
أمير : بصراحه خالي عبدالكريم و عياله بيجون يعيشون معانا هنا
الكوب اللي كانت فيه الفرش مستقره بأمان ...... طاح من يدي على الأرض
التفت أطالعه بغيظ
أميره : شوف يا قلبي اذا بيجون هنا أنا بأسافر للرياض أتم مع ناديه ابرك لي ؟
أمير : و أشغالك ... و معرضك اللي نهاية الشهر راح يبدى ؟
أميره : انت تقولي بيعيشون هنا و هذا منتهى الجنون عارف بيطق فيني عرق و أنشل ؟
أنا انسانه ما أحب أحد يضغط علي و يراقبني في الطالع و النازل و خالي عبدالكريم الله يجزاه خير يستأجر له فيلا يعيش هو و عياله فيها أنا مالي خص !!
أمير : هذا مب كلامي أنا أحمد اللي قال !
قربت منه و أنا معصبه
أميره : و انا كل شي يقوله أحمد خلاص بمشي عليه !!
بعد ما خلصت آخر كلمه انفتح الباب بقوه و دخل ...
أحمد : وش فيه أحمد يا أميره ؟!
طالعته بطرف عيني
أميره : .......................
أحمد : باقي ساعه و يوصلون أتمنى تستقبلينهم زين و بدون مشاكل فاهمه
رميت المريله اللي كانت في يدي و طلعت من المرسم !!
رحت لغرفتي بسرعه غسلت يدي و تمددت على الأريكه اللي بصالة جناحي
يا ربي مين يطيقهم ذولي مب على أساس اني مجنونه ليه يردون مره ثانيه معقوله خلصوا من ترتيبات الزواج لبنتهم وش جايبهم يا ربي ؟؟؟
غمضت عيني و صرخت بصوت عالي و قلت : يااااااااااااربي ما أدانيهم !
فتحت عيوني و قمت من الروعه
صوفي : شوبكي مس أميره ؟؟
قمت و تعدلت في جلستي
أميره : أكيد انتي عارفه بمجي خالي عبدالكريم ؟
جلست على الكرسي اللي قبالي
و مدت لي كوب النسكافيه
صوفي : لا مس أميره أبل شوي آلي مستر أحمد
أميره : ياه يقهرني ؟؟؟
صوفي : لتصحيح معلوماتك مستر عبدالكريم و مستر مطلق ............
حطيت الكوب بقوه عالطاوله و قلت و أنا مستغربه
أميره : لا تقولين ........
صوفي : ايه مس أميره ؟
أميره :يووووووووووووووه
صوفي : لا تتنرفزي مس أميره روحي خدي لك دوش ساخن و روئي أعصابك !!
و لا بأ تاكلي هم !!
طالعتها بقهر و قمت بدخل غرفتي .......
أميره : صوفي الدور الثالث ما أبي فيه و لا أحد معدا سلطانه لو تبينها تعيش هنا
عندك الدور الثاني كبير و فاضي ؟؟
صوفي : حاضر مس أميره
________________
الساعه : 02:00 ظهرا
قمت تسبحت خذت لي شور حااااااااااااااار و طلعت لبست بلوزه حرير نيليه
و بنطلون أبيض سويت شعري بالجل و تركته مفلول حطيت ميك آب خفيف و روج أحمر
لبست اكسسورات خفيفه و جلست على الأريكه من القهر ..........
رن تلفون غرفتي ..
رديت بزهق
أميره : هلا يا صوفي
صوفي : مس أميره الناس من ساعه واصلين ما بدك تستأبليهن ؟
أميره : الا شوي بنزل
قلتها بطفش و سكرت السماعه !!
شلت الكريم و قمت أدهن رجليني و أفكر ....
لبست الصندل و قمت ...
رحت للبلكونه فتحتها تكيت عالسور و قمت أطالع اللي جو !
لأن الجو يجنن فمقعدين الرجال كلهم في الحديقه جهة المسبح
الكل حاضر و لله الحمد ...... و الله طاحت في راسك يا أموره
ضحكت .... رفعت شعري بدلع و طلعت من الغرفه
طبعا نزلت لقيت الكل موجودين معدا دانيا و أختها ديمه باقي يجهزون للعرس !!
سلمت عالكل و جلست جنب سلطانه
عبير : ماشاء الله كل مره تزدادين حلاوه
أميره : عيونك الحلوين يا قلبي
همست لي سلطانه و هي تمسك يدي
سلطانه : واحشتني يالغلا لك وحشه مالها وصف
التفت لها اطالعها
أميره : انتي اللي لك وحشه
مدري حسيت معاملتها تحسنت معاي !!
هي عموما كلها على بعضها تغيرت !!!!!!!
أميره : كيفك خالتي حليمه ؟؟؟
التفتت لي بغرور
سلطانه : بخير
أميره : شخبارك خالتي بدريه ؟
قالت لي بتصنع و هي ترفع طرف تنورتها
بدريه : بخير يا قلبي ؟
التفت لسلطانه و أنا مذهوله هي كانت معي بالسالفه طالعتني و كتمت الضحكه و أنا مثلها
مسكت يدها و قلت :
أميره : قومي قومي بوريك شي مهم !!
رحنا للمرسم من الباب الخلفي
دخلنا و وريتها لوحه رسمتها لها
ما راح أوصف لكم قديش انبسطت و هي تشوف اللوحه
سلطانه : يااااااااااااااه يا أميره أنا حلوه كذا ؟؟
أميره : انتي قمر
ضغطت على خدي و قالت :
سلطانه : لأني في عيونك حلوه مشكوره يا عمري انتي
باستني على خدي و ابتسمت بإمتنان
الساعه : 12:00 مساءا
بعد ما اخترت اللوح اللي راح أعرضها بالمعرض رحت لغرفتي أتمطط
بدلت ملابسي بقميص قطني قصير و انخشيت تحت بطانيتي و سندت ظهري بالمخدات
مسكتلي هالروايه و قمت أقرأها ( هموم الحب ) !
روايه تتكلم عن جندي كان يعشق زوجته لدرجة الجنون على قولهم كان ما يسمع فيها
هي كانت تحبه بس كانت تضجر من المرحله اللي وصل لها زوجها من العشق
(( ياي من كثر ما عشقها ملت ...... ))
فلما صارت الحرب في بلدهم كان يعتذر عن المشاركه لأنه يفضل الجلوس عند زوجته و عشقها بدل الحرب فلما ضيقوا عليه الخناق و طلبوه للضروره القصوى جلس أيام يبكي و ينتحب حزين على فراق زوجته حتى قبل ما يفارقها ؟!!!
المهم انه امتثل للأمر الواقع و تجهز للحرب
جت لحظة الوداع اللي كان خايف منها .... حضن زوجته بقوه و قبلها و قبل ما يقفيها
و يروح .... قتلها بالمسدس !!!! (( لا تعليق ))
قطعني من الروايه طق على الباب كنت متحمسه أكملها لأنها أكثر من رائعه !!!
أميره : تفضل
سلطانه : هاي أميره
حطيت الروايه عالطاوله و ابتسمت
أميره : أهلا
دخلت و جلست على طرف السرير
أميره : الله وش فيك لابسه العباه على وين العزم ؟
سلطانه : أبي أطلع من البيت ؟!
أميره : وين ؟
قالت و هي تلف طرحتها ؟؟
سلطانه : أي مكان حلو و فيه حركه
طالعتها بإستغراب
أميره : أي مكان هذا اللي تبين يكون فيه حركه في هالوقت ؟
قالت بطفش !
سلطانه : بتروحين و لا لا ء ؟!!!
أميره : نروح وش ورانا يا سلطانه
نفضت بطانيتي و قمت دخلت غرفة الملابس
و قمت أدور على لبس
سلطانه : روايه رائعه قريتها ثلاث مرات
قلت لها و أنا أطلع ملابس من الدولاب
أميره : بالله أجل "دمتري " ليه قتل زوجته قبل ما يروح للحرب تراني ما كملتها !
سلطانه : قال ايش عشان يخاف تحب واحد غيره لما يموت في الحرب فهو استأثرها لنفسه!
أميره : يعني ايش استأثرها لنفسه ؟؟
سلطانه : يعني حس انها ملكه ؟؟ أو بالعربي ملكها
رحت لدولاب الجزم وش بختار جزمه ؟
طبعا كل هذا و أنا أكلمها من غرفة الملابس
أميره : سلطانه توب برتقالي وش ينفع عليه جزمه ؟؟
سلطانه : بيضا يا قلبي
طلعت جزمه بيضا نعومه
أميره : طيب وش ألبس عليه بنطلون ؟؟!
سلطانه : بنطلون أبيض بخطوط برتقالي أو بنطلون جينز بس اختاري شنطه برتقاليه بذهبي ...
طلعت الأغراض و قمت ألبس
سلطانه : وش رايك في جواد ؟
ابتسمت لنفسي و أنا ألبس التوب البرتقالي
أميره : حقير جدا و وسيم جدا
ضحكت و قالت :
سلطانه : بس حنون و طيب
فجعني ردها و أنا أطل أطالعها من ورى الباب
أميره : مين الحنون جواد لاااااااااااا أكيد انهبلتي !!
سلطانه : تدرين انه مجنن البنات ؟؟
قلت بسخريه و أنا ألبس الجزمه
أميره : الا جايب روسهن الأرض ؟؟ الا ما قلتي لي وش أخبارك مع مشاري ؟؟؟
سلطانه : تدرين انه طلب اني أرجع له بس أنا اللي رفضت
شيكت على لبسي في المرايه و طلعت لها
أميره : شيء متوقع من وحده مثلك ؟
رحت للتسريحه أسوي مكياجي و شعري
سلطانه : مثل ما انه شيء متوقع من وحده ذكيه مثلك ترفض فيصل آل .....
أميره : ما شا الله حتى انتم وصل لكم الخبر ؟
سلطانه : غريبه رفضتيه يا أموره ؟؟!! مع انه انسان ما يتعيب لا تقولين لي عادات و تقاليد !!؟
لأن انتي أتوقع انه لا يهمك عادات و لا تقاليد !!
التفت لها أطالعها و أنا أهز كتفي
أميره : نصيب
سلطانه : و لما انه نصيب ليه علقتي الرجال
طالعت المرايه اللي تعكس لي صورتها
أميره : ممكن ما تتكلمين في هالموضوع لو سمحتي ؟!
سلطانه : حريه شخصيه أحترمها
التفت أطالعها
أميره : انتي رائعه
سلطانه : شكرا
قامت راحت للبلكون
قمت أكمل مكياجي و شعري و أخيرا
فوالاااا خلصت
لبست عباتي
سلطانه : أخوك أمير...... يشبه لك
أميره : طبعا
سلطانه : مره شفته لما جينا عندكم أول مره ماشا الله عليه قمر
أميره : بس عيونه عسليه
سلطانه : و هذا اللي محليه ؟؟
قلت و أنا البس برقعي
أميره : ليه حاطه عينك عليه ؟!
سلطانه : لا بس أشك ان شيخه حاطه عينها عليه !!
رفعت البرقع بفجعه !!!!!!
أميره : لا يا شيخه لا تقولين !!
قربت مني و قالت
سلطانه : قلت لك أشك بس !!
طلعنا من البيت و ركبنا السياره
أميره : لا تقولين لي انتي بعد تعرفين تسوقين ؟؟
سلطانه : طبعا يا قلبي بس ما راح أسوق أنا قلت لصوفي تخلي واحد من السواقين يجهز السياره !
أميره : فعلا عيله غريبه !!! وش فيه السواق ما جا للحين !!؟
ما كملت كلامي الا و جا السواق !
مشينا و بالطريق
أميره : وين بنروح !!
سلطانه : أي مطعم يا قلبي ؟؟
أميره : بس المطاعم في هالوقت رايحه وطي !!
سلطانه : مب كلها
أميره : بتفهميني انك خبره في دبي أكثر مني ؟
ما ردت علي لأننا كنا واقفين عند الإشاره و سياره مليانه شباب يطالعونا و يدقون البوري
و الأغاني شايله شيل ....
سلطانه كانت كاشفه فقامت تبتسم
فتحت الشباك و طالعت للشاب اللي يأشر لها
...... : يا حلو ممكن ناخذ صوره مع بعض ؟؟؟
قالت و هي تضحك
سلطانه : انت حقك سكينه تدخل فقلبك ما تطلع
أنا ضحكت و قمنا نضرب كف بكف
........ : إذا منك يا جميل ما نقول لاء
و طبعا قاموا أخوياه يضحكون و يصفرون !
خضرت الإشاره و مشينا
سلطانه : تخلف ... أكثر من كذا ما راح أشوف !!
أميره : العالم كله صار كذا ؟؟ بس الميك آب اللي حاطته ابداع و ما تبين الرجال يغازلك !
و لا تستحين تغطين وجهك !!
سلطانه : حريه شخصيه لازم تحترمينها و لا تجادليني
قلت بطفش
أميره : كيفك يا أم الحريه الشخصيه !
وصلنا عند مطعم أول مره أدخله رومنسي مره بس غير مريح !!
اخترنا طاوله رايقه و جلسنا ..
سلطانه : ما بتفصخين هالبرقع !
أميره : لا يا قلبي دايم لما أطلع كاشفه تصير لي مصايب لا لا و اللي يرحم والديك أنا كذا أحسن !
سلطانه : شوفي شوفي الرجال اللي قبل شوي مع أخوياه دخلوا المطعم
التفت أطالعهم
أميره : لا تقولين رجال كذا تسبينهم قولي ...أولاد... بزران .... أطفال !! أو مره اذا تبين ترفعين قدرهم قولي شباب و ياليت ما تطالعيهم لا ينتبهون لنا اللحين !!
جانا الجرسون و ناولنا المنيو !!
أميره : انتي اللي عزمتيني جيبي اي شي على ذوقك ؟؟
سلطانه : لو سمحت أبي صحن مشويات و مقبلات و اثنين عصير كوكتيل
أخذ طلباتنا و راح
أميره : مني مرتاحه في هالمكان خلينا نطلع من هنا أفضل ...
انتبهوا لنا الشباب و قاموا يأشرون علينا !
أميره : أها ارتحتي ليتك تتلثمين على الأقل ؟؟
طبعا هي كانت تطالعهم
سلطانه : وش بيصير يعني ؟
التفتت تطالعني
قلت لها بخوف :
أميره : تخيلي لو ................
ما كملت الكلمه الا و ...................
سلطانه : مشاري !!!!!!!!
الإنسان المتعجرف ... و ربي يجنن قليله عليه رزززززززززه حتى تهزيئه رزه مثله !؟
كان لابس بلوزه سودا فاتح الأزره الأخ من قوة الثقه !
على بنطلون أسود و لازم الصورة التكميليه لهالإنسان الريحه اللي ... تسبق حضوره!!
ريحة عطره القويه مع ريحة سيجارته مخليه ريحته شي عجيب !!
مشاري : ليه انتوا هنا ؟
طالعته و قلت
أميره : ليه كنت وصي علينا ؟
التفت لشلة الشباب حسيتهم هجدوا لما شافوا صاحب القامه الطويله و الأكتاف العريضه
مسوي لي فيها ( ليه انتوا هنا ) ؟؟
سبحان الله الصوره للأشياء في هالحياه ما تكتمل الا لازم شي يشوها !!
مشاري : تفضلوا قدامي بدون أي كلمه ؟
قالها و هو يسحب أنفاس من سيجارته
سلطانه : لاء
طالعها بإبتسامه ساخره
مشاري : ليتك عايشه حياتك ؟
سلطانه : عايشه حياتي و ليه ما أعيشها !!
طالع ليده اليسار اللي يزينها خاتم بحجر أسود يلمع
مشاري : ما توقعتها تكون عيشتك كذا ؟
طالعته بإحتقار و قالت :
سلطانه : أعتقد ان هذا شي ما يخصك ؟؟
أنا طول الوقت كنت أطالعه .......جذاب واااااااااو بس .....واطي !!
عليه لسان يا الله ....بس حقير..... هذا انتقام مب لسان أعوذ بالله !!!!
أميره : سلطانه قومي لو سمحتي نغير المكان ؟؟
مشاري : لا يا راعية الأصول أعتقد ان هالوقت خلاص بنات مثلكن في فرشهن نايمات ؟
طالع ساعته بفخامه
و قفت و قلت :
أميره : لا يا شيخ ما توقعت انك تعرف لهالأمور !!!
مشاري : لا يا بنت حصه أعرفها و أعلمها للي ما يعرفها
طالعت لسلطانه و قلت
أميره : قومي بسرعه أنا مدري كيف انتي كنتي عايشه مع هالبني آدم
سحبتها من يدها و طلعنا و هو ورانا
ركبنا السياره
سلطانه : اسمعي هالمجنون راح يلحقنا لين البيت أنا أبي أقهره !!
أميره : لا و نعم التفكير خلنا نروح للبيت أفضل و أحسن !
سلطانه :عبدالرزاق
عبدالرزاق : يس مس
سلطانه : انت قوم رح للبيت و أنا بسوق عنك ؟؟
التفت أطالعها بذهول
أميره : يعني !!!
سلطانه : يعني يقوم يروح البيت بتكسي و أنا اللي بسوق
أميره : نـــــــــــــــــــــــــعم !!!!!!!!!!!!!!!!!!
سلطانه : ok عبدالرزاق خذ هاذي الفلوس لك ارجع البيت و روح نام الله يعافيك
طبعا هو طلع من السياره و ركبت هي في مكانه و قامت تسوق !!!
و مشاري ورانا ...
سلطانه : بتمين قاعده ورى كذا ؟
أميره :.......................
تذكرت نفس الموقف صار اللي مع رنا و ناصر !!!
لما كان هو يلحقني و رنا تحاول تنقذ الموقف بكل طاقتها !
_____________________
الساعه : 09:00
ياه راحت علي نومه !
تأخرت على عبدالله كل يوم أزوره بالمستشفى الساعه 08:30
قمت عالسريع تسبحت و صليت بدلت ملابسي و لبست عباتي و شلت قشي و طلعت
خذت بوكيه ورد و رحت المستشفى ؟!
دخلت على عبدالله ....
مثل كل يوم فتحت الستاير و رتبت الورد في المزهريه و جلست قباله
مثل ماهو على شكله كل مره !
أميره : عبدالله ودي أشكي لك همي انت قلت لي انك بتشيل عني همومي قوم الله يعافيك
اسمعني !!
مسكت يده و قلت بحزن :
أميره : تدري خلاص اخترت اللوح اللي بشارك فيها في المعرض اليوم برسلها للصيانه عشان يسوون لها البراويز ليتك معي تحضر المعرض و تشاركني فرحتي
تركت يده و طلعت كرت الدعوه من شنطتي و حطيته جنب المزهريه
ابتسمت و قلت :
أميره : و هذا كرت الدعوه لك يمكن ...........
نزلت راسي بحزن و كملت
أميره : توقف على رجليك و تحضر لي .............
قمت أطالع للكرسي المتحرك اللي كان جنب السرير
أميره : راح تقوم يالغلا و بتمشي على رجليك و بتعيش حياتك و برد أشوف نظرات عيونك اللي تحسسني بالأمان
نزلت دموعي و أنا أمسك يده
أميره : باقي على وعدي يا عبدالله ما نسيتك و ما راح أتخلى عنك مهما قست الظروف علي
لأني ..... لأني .......
حطيت راسي على يده و قمت أبكي
أميره : لأني .............أحبك
فجأه سمعت صوت الجهاز اللي يحسب نبضات القلب رفعت راسي بخوف و قمت أطالع عبدالله !
و أطالع الجهاز ....... يسجل نبضات مرتفعه و سريعه
مدري ليه تخيلت يده تحركت !!!!!!!!!
لاء شكلي كنت أتوهم ؟؟
رجع خف صوت الجهاز و قام يحسب النبضات بشكل عادي !!!!!!!
قمت بهدوء حطيت يده عالسرير لبست برقعي فتحت الباب و طلعت
انتبهت من عالمي بذهول
أميره : جواد !!
ابتسم لي بخسه
جواد : ايه جواد عندك مانع ؟
طالعته بقرف و مشيت
مسك يدي و سحبني تجاهه بقوه
أميره : آآه
جواد : ما تعودت بنت تصدني و تطالعني بهالشكل
أميره : مين قالك اني أنا مثل البنات اللي تتعامل معاهم يا بابا أنا غير !
ترك يدي بدفاشه و قالي
جواد : وش تسوين هنا ؟؟
قفيته و مشيت :
أميره : مالك دخل لا تليقف !
رد سحبني بقوه و قربني منه
أميره : اتركني يا حقير
الممر كان فاضي للأسف........... ذكرني بفيلم أجنبي قديم اسمه "عودة نوبره "
كان تصوير الفلم رائع بس اللي يشبه هالموقف ان المستشفى اللي كانت تتعالج فيها نوبره
مسويين دور كامل بالمستشفى خاص للمشرحه و ثلاجات الأموت طبعا ممرات هالدور مخيفه و فاضيه مافي أي شي يمر فيها غير السكون و الخوف و ريحة الموت !!!
جواد : عبدالله هااا ؟
طالعته بصدمه أول مره أشوفه من قريب كذا !
خفت من نظراته هي صحيح ما تخوف بذاك المعنى بس .........
مدري ليه خفت و انا عيني في عينه !
حسيت لحظه بشي يسحبني له أو مدري كيف أفسره احساس أول مره أحسه !!
انتبهت لنفسي و كأنه كان منومني تنويم مغناطيسي (( سلب حواسي )) على قولهم في الروايات الرومانسيه !!
بعدته عني و قلت :
أميره : اتركني اتركني و اطلع من حياتي !
تركني و هو يطالعني بخبث و الإبتسامه المقرفه اللي يدقنها مرتسمه على وجهه بإنتصار
قفيته بسرعه و مشيت و قلبي يدق بقوه حرك شي في داخلي مدري ليه قربه مني كهربني ولعني خلاني متوهجه ياااااااااااا ربي عشان كذا البنات منجنات عليه !
ليه كان يطالعني بهالنظرات و ليه قربني منه بهالشكل و الله روعني !!
طلعت من المستشفى و ركبت السياره
قمت أتنهد بخوف
أميره : ديورز امشي من هالمكان بسرعه !!
ديورز : OK مس أميره
طالعت ليدي كانت ترتجف بقوه و دموع عيني كانت تنزل بدون استئذان !!
حسبي الله عليك يا جواد وش سويت فيني !!
تذكرت مشاري و هو يلحقنا و أتذكر الإبتسامه اللي كانت مرتسمه على وجه سلطانه
سلطانه : أبي أقهره
أميره : مجنونه فعلا
طبعا كانت حريفه بالسواقه فبعد منوارات و سرعه و تفحيط خلته يصدم بالعامود لواحد من المشاريع اللي قاعده تنبني في شارع عام !!
ضحكت ضحكة في حياتي ما سمعت مثلها كانت مبسوطه الا بتتشقق من الوناسه !
كنت أطالعها و أنا مذهوله منها ؟؟
رجعنا البيت و أنا ساكته تكلمني و لا أرد عليها !!
انتبهت للواقع و أنا عند باب البيت
أميره : برسل لك اللوحات مع سيتي وديها الصيانه ؟؟
ديورز : ان شاالله مس أميره
كأن هالكلمه صعقتني (( ان شا الله )) قبل لا أطلع بذهولي من السياره سألت
أميره : ديورز انت مسلم ؟
ابتسم لي إبتسامه مشرقه تعبر عن الإرتياح
ديورز : يس مس أميره الحمد لله
كان يقول الحمد لله مكسره بس كانت رائعه الحمد لله فعلا ....
اللي من جد صعقني ان ديورز فيلبيني و قال هالكلمه و في المقابل صوفي عربيه بس في حياتي ما سمعتها قالت هالكلمه كله يس مس أو أوكي مس !!!
لا يكون اللي في بالي صحيح !!
ماري مسلمه أتذكر قالتي مره رنا انها مسلمه و سيتي مدري عنها عبدالرزاق مسلم
بقية الخدم ريتا و سلزيا و الشيف الفرنسي و ليسي أصلا ما أعرف الا ذولي الا ذا تغيروا أو في غيرهم مدري بس اللي أعتمد عليهم دايم صوفي ماري سيتي عبدالرزاق و ديورز بس ديورز مو كثير أعتمد عليه لأنه ماله سنه عندنا !!
دخلت للبيت و أنا سرحانه في مية شغله و شغله .....
_____________
بدريه : ما شالله !
أميره : وش فيك !!؟
بدريه : طالعه من بدري ؟؟
ابتسمت بنفاذ صبر و قلت
أميره : عندي شغل في المعرض ؟
شيخه : ايه صح أخذنا كروت الدعوه حتى خالتي بدريه عزمت صديقاتها
طالعتها و قلت بسخريه
أميره : " نساء المجتمع الراقي "
صوفي : مس أميره الغدا على السفره
أميره : يالله يا حلوات تفضلوا الغدا
طبعا قمت رحت لصوفي
أميره : صوفي قولي لسيتي تشيل اللوحات هي و أي وحده من الشغالات و يعطونها لديورز
بيوديها الصيانه ...
صوفي : OK مس أميره
طالعتها بتفكير
صوفي : بدك شي تاني مس أميره
أميره : ها لا لا ما أبي شي
تغديت و طلعت أجلس بالحديقه لقيت أمير
أميره : تحب تجلس عالعشب
كان في عالم ثاني
أمير : ايه لأنه بارد مع الهوا تصير الجلسه حلوه
تربعت و جلست قباله
أميره : أمير لو قلت لك بعد المعرض أبي أرد للرياض
طالعني و كأنه يطالع لإنسان بعيد
أمير : ليه يا أميره ؟؟
أميره : عيال خالك ذولي أذوني و طفشوني !!
عصب و طالعني ....
أمير : نعـــــــــــــــم !!!!!!
انتبهت لكلامي و قلت و أنا أرتجف
أميره : ها لا لا قصدي بنات خالك !
أمير : بتم هنا وحيد !
أميره : أحلى أيامي بدبي كانت مع رنو الله يرحمها
التفت يطالعني بإنتباه
أميره : و اللحين أنا مضطره أخضع لأوامر أحمد ؟ اللي ........
جيت بأكمل كلمتي ......
عبدالهادي : وش تسوون ؟
قمت أطالع عبادي بسرحان و هو يكلم أمير
تدرون وش كنت أفكر فيه كنت أتخيل عبادي و هو يصفق مشاري و جواد هههههههه
ياااااااااااااااه يا ليت !!
طفشوني طول الوقت يراقبوني في الطلعه و الدخله خلااااااااااااااااص طفشت مليت
من كثر ما ني مندمجه في عالمي صرخت
أميره : مجانين طفشوني مليييييييييييييت
التفتوا لي عبادي و أمير ...........
أمير : وش عندها العمه ؟
طالعتهم بروعه و قمت بسرعه طلعت لغرفتي !
|