البارت الثاني عشر
أميره :
طلعت من المستشفى و أنا مبسوطه و سعيده رجعت للبيت و للي لقيتهم بالبيت
لقيت ناديه و عيالها و أحمد و ثامر وناسه
سلمت عليهم و جلست معاهم بالصاله نسولف و نضحك
كنت مبسوطه لأبعد حد مدري كيف جيت عبدالله لي رفعت معنوياتي و أنا كنت متخيله انه نساني !!
للحين باقي في ناس تحبني و تبي تسعدني تدور علي عشان ترضيني !
باقي هالدنيا فيها الخير ما مات للحين يبتسم لنا و حنا ما ندري عن وجوده الا لما نتمعن في هالحياه بعمق راح نلقاه ..
طلعت لغرفتي اشتقت لها ياه أبي اتسبح اشتقت للمويه و الإنتعاش اللي أحس فيه لما تلمس جسمي !!!
صحيح اني تعبانه شوي بس تناسيت هالتعب و أنا قرب عبدالله !!
عبيت حوض الجاكوزي بالمويه و حطيت من كل أنواع الزيوت اللي حضرت لي اياها صوفي
تدرون اني اشتقت لها و لأنظمتها اللي غثتني صحيح أحيانا أكسر هالأنظمه بس باقي
أمشي على أنظمتها !!
أول ما جيت من المستشفى سلمت علي برسميه بس حسيت بالشوق في عيونها تدرون وش سويت سحبتها و ضميتها و بستها على خدها !!
كانت مبسوطه لدرجة ان عيونها دمعت أو بالأحرى بكت أكيد ارتاحت مني طول هالأسبوعين
هي تصلح و أنا أخرب مسكينه معاي صوفي !!
صوفي : نور القصر مس أميره
طالعتها بإبتسامه متسائله
أميره : ياه يا صوفي من زمان ما سمعتها (( مس أميره )) حلوه منك !!
طبعا شعري حطيت عليه أنواع الشمبوهات هلكته مسكين
كنت متقرفه من نفسي أسبوعين بدون سبوح كارثه عفنت من جد !!؟؟
حطيت البلسم على شعري يمكن هالتشابك ينفك فركت جسمي باليفه لين حمر !!
طلعت من الحمام بعد ما لبست الروب و قمت أدهن جسمي و أسوي مساج ليديني و رجولي و رقبتي .... ول عليك يا أميره ما هقيت انك معفنه لهالدرجه رحت لصالة جناحي لقيت البخور مسنع من زمان عن البخور آلاف المرات أقول لصوفي تحط بخور تقولي البخور يكتم و صرنا عايشين على الفواحات اللي منتشره في كل القصر و بأشكال منوعه لدرجة انك ما تعرف هذي فواحه و لا تحفه ... طبعا أكيد البخور من حركات نداوي فديت عمرها ...
تبخرت و رحت لغرفه الملابس لقيت عالطاوله جلابيه مخمل طويله لونها سماوي فاتح مزركشه بألوان فاتحه و زخارف مره ملكيه أكمامها طويله و واسعه .. مخصره عاالجسم
لبستها و رحت للمرايه أشوف شكلي !!
لا الحمد لله خف وجهي شوي كان مثل البلونه و كأني جبت ابره و نسمته !!
شعري صار طويل أو اني متوهمه مدري حسيته و هو مموج كذا حلو معطيني منظر ....طيب ليه أقصه و بعدين هاللحين الموضه الشعر الطويل فخليني مع الموضه مشطت شعري و زين المشط مر فيه استشورته على خفيف و خليته مفلول مالي غره صارت الغره طويله
مدري متى بأقص شعري على الأقل أرتبه على طوله حطيت شريطه تفاحي
كحلت عيوني على خفيف و حطيت غلوس وردي و تنقعت بالعطر ما راح أستغرب لو خلصت العلبه للحين احساسي بإني ما تسبحت لمدة أسبوعين مجننني !!
فتحت الشبابيك عشان يدخل الهوا و النور و رحت للبلكونه فتحتها و طلعت لحد السور أتأمل البحر بصخبه و تلاطم أمواجه يصرخ بعنف بدون ما أحد يحس فيه !!
و كأنه يبي يطلع كل اللي في قلبه للعالم اسمعوني ياااااااااا ناس !!؟
و الله مسكين حتى البحر مسكين و أنا في وسط تأملاتي شفت واحد واقف في حديقة الورد يطالعها و يتأملها شوي وقف يطالع المسبح حسيته في ذيك اللحظه يدور على شي بينه و بين نفسه ينتظر شي متوله عليه أكيد هذا صديق أمير اللي شفته ذاك اليوم أحسه مسكين بس مره حلو ... أحيانا أحس اني ما استحي ))) كان يدخن بشراهه الوحده ورى الثانيه و يطفيهم بعصبيه على سور المسبح و يرميهم بالزباله
تخيلت هالمنظر كله في لوحه و الله شي لقيت شي أشغل نفسي فيه !!
طالعت المنظر للمره الأخيره أبي أطبعه في مخيلتي و مشيت ؟؟
جوالي كان في ذيك اللحظه يرن قمت أدور عليه من التناحه لقيته على الطاوله و أنا أدوره تحت الطاوله !!!
رديت بسرعه : هلا و مرحبا
....... : أميره
استغربت الصوت صوت واحد بس مدري مين ؟؟
أميره : نعم مين معاي ؟؟
........ : تدرين اني أحبك غصب علي أحبك
أميره : تدري انك مجنون ؟؟
قفلت في وجهه بسرعه
و أنا أبتسم بإستغراب مين هذا و الله وطلعتي مجننه العالم يا أموره يا معذبتهم !!
قمت ألقيت نظره أخيره على شكلي في المرايه و قلت بتريقه :
أحبك غصب عني أحبك أموت عليك بست صورتي في المرايه و نزلت
لقيت ناديه في الصاله تطالع التلفزيون رحت لها و سلمت عليها
أميره : تدرين اني اشتقت لك
طالعتني بإستغراب
ناديه : هَو يا أميره صلي على محمد توك قبل ساعه شايفتني
أميره :ههههههه اللهم صلي و سلم عليه بس وحشتيني في هالساعه
هزت راسها و قامت تطالع التلفزيون ؟؟
أميره : وش تتوقعين يكون البيبي ولد و لا بنت ؟؟
طالعتني بإهتمام و قالت :
ناديه : تدري يا بنت أبيها بنت و أسميها نادرين أو يارا بس كله من الله حلو
أميره : وش معنى بنت بالذات مب ولد ؟؟
ناديه : ماشا الله يا أميره عندي ولدين كافي أبي بنت عاد عشان تساعدني بشغل البنت لا كبرت !!
قمت أضحك عليها و أقول
أميره : و افرضي جالك توأم بنات
ناديه : أميره شكلك تبين تقتليني أنا اللحين بدخل الشهر الرابع و تعبانه و أحس اني بموت بواحد خلي عاد توأم ؟؟
أميره : بسم الله عليك أقولك شي قومي بوريك مرسمي
مسكت يدها و قمنا نروح المرسم
أول ما دخلنا
ناديه : تدرين يا أميره صوفي حقتكم مره رسميه ما تضحك و لا تبتسم و لا شي ليه !!
أميره : هي كذا من يوم عرفتها بس و الله أحيانا أشوفها تبتسم بس تضحك ما هقيت !!
ناديه : شكلها نظاميه
أميره : أوووووف يا شيخه نظاميه بشكل فظيع تخنقني بنظاميتها أحيانا أصرخ من القهر لما أسمعها تتكلم على الإتيكيت و النظام المنزلي !!!
تدرين حتى أنا مسويه لي جدول بكل شي أصلحه و متحمله هالنظام عشان أمير يركز بدراسته !!
و المشكله أنا اللي وعدته اني أساعده ؟؟
ناديه : مني متخيله انك نظاميه ؟؟
نزلت اللوح و بديت أوريها أعمالي و طبعا لهيت و أنا أركب لوحه جديده عشان أرسم عليها !
جاني صوتها بعد لحظه من السكون
ناديه : أميره مين هذا ؟؟
التفت أطالعها شفت اللوحه اللي بيدها ...... ارتبكت !!!
أميره : صورة لواحد شفته مره عالشاطئ
ناديه : شكل وجهه شدك لهالدرجة عشان كذا رسمتيه ؟؟
حاولت أفرغ ارتباكي في أي شي فقمت أكمل تثبيت اللوحه على الحامل
أميره : يمكن و عموما أشياء كثير تشدني و تجبرني ارسمها
ناديه : بس بصراحه هالإنسان جدا وسيم و مملوح حيل ... مملوح !! لا قليله هالكلمه على هالجمال جذاب جدا !!؟
تدرون اني غرت بس مدري كيف حاولت ما أبين لها أي شي
ناديه : بصراحه ما ألومك لو رسمتيه !!
مسكت اللوحه من يدها و قلت
أميره : شكرا
ناديه : أهاااا ....... عفوا
رديت اللوحه لمكانها بس قلبتها
ناديه : ليه تقلبينها خليها تشوف العالم و النور ؟؟
استحيت و نزلت عيوني بالأرض مدري ليه ؟
ناديه : تصدقين انها أحلى لوحاتك صحيح كل لوحاتك حلوه بس هاللوحه بالذات أحلاهم
أميره : شكرا ...
سكتنا دقيقتين تقريبا جلست ناديه على الكرسي و قالت
ناديه : أميره
أميره : عيونها آمري
ناديه : تحبينه !!
دق قلبي بقوه من سمعت هالسؤال لأني أنا نفسي ما اعرف جوابه !!
أميره : أحبه !!! مين !!؟؟؟
قالت لي بتأمل :
ناديه : صاحب الصوره
انكتمت ما عرفت وش أقول ؟؟
ناديه : مبين من الرسمه انه انسان غالي على قلبك حيل انسان بهالوسامه الصارخه ما اتوقع ان بنت تشوفه ما تحبه ؟؟
التفت لها و قلت و أنا أصرف
أميره : ليه حبيتيه ؟؟
ناديه : عيب يا بنت أنا متزوجه و أحب أحمد زوجي و بعدين مافي أحلى من أحمد في نظري !!
طالعتها و قلت :
أميره : يا عيني يا عيني وش هالغرام و الحب ؟؟ وينك يا أحمد تسمعها
ناديه وجهها حمر مثل الطماط و جتني تضغط على خدودي و تعاكسني
بعدها طالعتني بجديه
ناديه : مين هو !!
يا ربي من ناديه اذا نشبت لك الله المستعان !!
أميره : ناديه يا روحي يالله نطلع من هنا اختنقت
سحبتها من المرسم و طلعنا
أول ما دخلنا للصاله لقينا أحمد
ناديه : السلام عليكم
أحمد : هلا و مرحبا و مسهلا بأم تركي الغاليه أم الغالي
أميره : السلام عليكم
أحمد : و عليكم السلام هلا
أميره : لا يا شيخ ناديه قلت لها مقدمات و أشعار و أنا ما قلت لي إلا ... و قمت أقلده
(( و عليكم السلام هلا ))
فطس هو و مرته من الضحك
أحمد : هذي أم تركي مالها حل
ناديه : تسلم لي يالغالي
و قاموا يطالعون في بعض بكل الحب ؟؟
الله يهنيهم بصراحه ما ألومه فيها ناديه جميله الا ملكة جمال ما شاء الله عليها و غير كذا أخلاقها روعه و ما شا الله عليها طيبه مره و تستاهل كل خير يكفي انها وقفت معاي في أصعب و أشد حالاتي بعد ما الكل تخلى عني !
و قف قدامي تركي و قام يتأملني ...
تركي : عمه أميله في صوت ولااا
أميره : يا قلب أميره وين هالصوت ؟؟
تركي : ولااا في الحديقه
أميره : ورى في الحديقه وش وداك ورى يا قلبي
مسك يدي و قام يسحبني
تركي : تعالي تعالي سوفي
مشيت وراه لآخر الحديقه و وقفنا
شفت .... فرس ... شموخ
شموخ ... وش جابها هنا ؟؟
صرخت بوناسه شموخ و رحت لمها أبي أمسكها
يمكن هذي مفاجأت عمي فهد معقوله !!!
أول ما قربت منها هاجت و صهلت
أميره : شموخ أنا أميره اهدي يا شموخ ..........أنا أميره
زادت هاجت و قامت ترفس صرخت في تركي
أميره : ابعد يا تركي من هنا روح لماما بسرعه
المسكين أول ما سمعني هرب !!
ليه شموخ صارت عدوانيه بهالشكل حتى أنا صارت تنفر مني
مسكت لجامها و سحبتها بكل قوتي ارفستني في بطني .... فطحت على الأرض
من قوة الرفسه بكيت و دموعي سالت على خدي
أميره : ليه يا شموخي ليه أنا أميره ما عرفتيني شموخ سامحيني لو تركتك كل هالفتره
بس باقي أعزك و الله قمت أتألم أبي أروح امسكها هاجت بعنف و عصبيه كأنها تقول ابعدي عني ما ابيك قربي !!
شفتها خلاص بتعطيني الرفسه الثانيه غمضت عيوني أنتظر رفستها يمكن أموت و ألحق هلي على الأقل أموت بيد غاليه مثل شموخ كنت خلاص مستعده للموت !!
غمضت عيوني أتخيل أمي و أبوي و رنا و أصاله سعيدين بوجودي معاهم كلنا في عالم واحد
بس للأسف فتحت عيوني على صوتها و هي تتأوه و طايحه على الأرض
و واحد واقف قدامي ماسك عجره ليتها عصا لا عجره و الدم يقطر منها حشى هذي سيف مب عجره !!!
طالعته مرعوبه هو نفسه الإنسان اللي شفت من غرفتي في الحديقه الإنسان اللي عيونه شدتني !!!
سمعت صوت شموخ تتألم مدري كيف وقفت و طالعته بحقد
أميره : ليه حرام عليك
جريت لشموخي و رحت لعند راسها .............حطيت راسها في حضني
أميره : آسفه يا شموخ آآآآآآآه لاااااااا الله يخليك تحملي علشان خاطري
شفت جرحها قديش كبير و ينزف بغزاره جيت أبي ألمسه سمعت صوت يمنعني !!
........ : لا تلمسيه هالفرس مريضه
طالعته بصدمه كأنه عطاني كف .... مريضه !!! شموخ مريضه كيف !!
شموخ عميا بس مهي مريضه .....شموخ !!
طالعت لشموخ و حسيت بظله يختفي من المكان
كانت عينها مفتوحه أشوف نفسي فيها كانت تطالعني و كأنها رجعت تشوف
أميره : آآآآآآه يا شموخي صبري شوي بس بنادي أمير يجي يشوفك !!
قمت بسرعه و صرت أجري أحس بألم في بطني مكان ما رفستني
قمت أنادي أمير أمير لين رد علي و جاني ما صدقت أشوفه
أميره : الحق شموخ تنزف في الحديقه
رحنا ركض لعندها وقفت جنب أمير و هو قام يتفحصها شوي وقف و قال و وجهه متغير
أمير : شموخ .......... ماتت
كنت حاطه يدي على قلبي بس يوم سمعت هالكلمه ما شالتني رجولي طحت في الأرض بقربها
و بكيت بحراره و قهر
أميره : لا لا شموخ شموخ شموووووووووووووووووووخ لا تموتين الله يخليك حطيت راسها في حضني باقي عيونها مفتوحه أشوف نفسي فيها عيونها مليانه دموع لا لا عايشه
تقطعين كل هالأميال عشان تموتين عندي شموخ لا اااااااااااااا الله يخليك الموت عذبني حتى و أنا عايشه !!
بكيت و صرخت قمت أطالعها و أتذكر وجه أصاله .....
أبعدي عن السياره بتنفجر .... تذكرت صوتها و وجهها و هي حاضنتني ابتسامتها و عيونها اللي كانت معلقه فيني !!!!
دمها الحار اللي أحسه يحرق جلدي و آخر قطره من قطراته تصفت على ملابسي أصاله !!!
صرخت و أنا أبكي أبي ألمس جرحها بس أمير منعني مسكني وشدني بقوه
أميره : اتركني أبي شموخ لا ااااااااااااااا ء
أمير : اذكري الله شموخ متوفيه و دمها فاسد لا تلمسينه
قمت أصرخ بهستيريا
أميره : فاسد زين عشان أموت وخر عني ابعد !!
و رحت قربها أبي ألمس جرحها
جاني كف طير آآآآآآآآخر جنان كان ممكن أسويه في ذيك اللحظه !!
___________________
الساعه : 08:00 صباحا
فتحت عيوني غصب عني من قوة النور اللي جا على وجهي
تلفت حولي بتعب آآآآآآآآه قمت جلست تمططت بكسل فظيع
أي ليه كذا و بعدين مين جابني هنا ؟؟
أنا في غرفتي إلا هذي غرفتي !!
قمت بخمول و رحت للحمام تسبحت و لبست ملابسي و صليت
وجلست عالسرير كان آخر مشهد اتذكره قبل ما أوصل لهنا هو اني طحت عاالأرض
ليش ما أدري ؟؟
حسيت اني مخنوقه دقيت عالسواق و قلت له يجهز السياره
قمت لبست عباتي و تنقبت و طلعت أخذت شنطتي و أغراضي الشخصيه من جوالي
لمحفظة الفلوس للمفاتيح شفت بطاقة الصراف عالطاوله بس ترددت آخذها
تذكرت ان أحمد عطاني هي و قالي هذي بدل بطاقتي اللي احترقت شلتها و حطيتها في شنطتي و طلعت لقيت الكل نايم محد صاحي طلعت من البيت بهدوء ما بغيت أحد يدري عني طلعت على أعصابي ركبت السياره و مشينا !!
مدري وين اقول للسواق يوديني أبي أروح أي مكان المهم أفتك منهم كلهم مدري ليه داخلني هالإحساس !!!
مشت السياره في الشوارع بهدوء الكل كان محتاس اليوم اثنين و الناس بتروح لدواماتها
الشوارع كانت زحمه و الكل منفعل و معصب الإشارات تزمجر بعصبيه بالضوء الأحمر
و الناس تاكل في نفسها من القهر أصوات البواري تعلى و كأنها تعبر هي بعد عن ضيقها
تخيلت ان الكل في الصباح معصب و منفعل و يسب و يلعن حتى السيارات كان لها انفعالها الخاص مشينا مسافه مش بطاله قلت للسواق يقوفني عند كوفي شوب عجبني شكله من بره !!!
دخلته و جلست طلبت طلبيه للسواق و قلت للجرسون يعطيله اياها !!
اخترت لي طاوله في آخر الكوفي شوب تطل على الشارع طلبت لي فطور عباره عن كروسون شوكولاته و موكا بدون سكر قمت أتأمل الشارع فاضي ما فيه الا سيارات قليله كل بعد فتره تمر وحده أكيد كلهم في أعمالهم لاهين خفت الزحمه و خف الضجيج و سكن الإنفعال اللي كان حابس الأنفاس ... الشمس تلفح الشوارع و الناس و تحرق بلهيبها عمال النظافه و الشوارع الخاويه من الناس الا من دخان السيارات الرايحه و الجايه !!
انعكست صورتي على القزاز اللي قدامي قمت أطالع عيوني بصمت و أحكيلها عن فتره صاخبه من فترات حياتي أحكيلها عن الألم و العذاب و اللوعه اللي حارقتني في قلبي على هلي !!
تنهدت و انا أقلب كوبي و الغريب اني طالبته بدون سكر أجل وش قاعده أقلب !!!
أقلب أحلامي و ذكرياتي أقلب أوراقي و صفحات من عمري أدور في دوامه نسجت الحياه خيوطها و حكت صمتها بسخريه رمت علي أحمالها و قالت لي عيشي العذاب بروحك !!!
مرت ساعه و أنا على هالحال لين برد الموكا شربته و قمت ركبت السياره و مشينا
و حنا نمشي كنت أقرى أسماء المحلات و أتأمل الأماكن و أشوف بعض المحلات توها تفتح أبوابها ... بعد ما لفيت و تعبت رجعت للبيت و أنا مالي خلق
أول ما دخلت للصاله لقيتهم كلهم واقفين على أعصابهم
طالعتهم بهدوء و سكت
أمير : ممكن أعرف وين كنتي ؟؟
قلت بكآبه و الله مب ناقصه
أميره : كنت في كوفي شوب
أمير : و لما انك في كوفي شوب ليه مقفله جوالك
ضربت في راسي هالكلمه (( مقفله جوالي !!!!!!!
فتحت شنطتي أتأكد شفت الجوال فعلا مقفل أيه مخلص شحن
أميره : معليش ما انتبهت له
أمير : و عشانك ما انتبهتي حنا نبقى على أعصابنا
قلت بإنفعال
أميره : يووووه يا أمير ارحمني الله يخليك يكفيني اللي فيني
أحمد : مب مشكله اطلعي ارتاحي بس لا تعيدينها مره ثانيه
أميره : انتوا هذا اللي تبونه طول الوقت بالبيت أريحكم قولوا لي موتي عشان ترتاحون مني !!
ثامر : أميره وش هالتفكير و الله مو القصد كل ما في الموضوع اننا خفنا عليك
أميره : خفتوا علي طيب ممكن تقتلوني عشان أرتاح و ترتاحون !!!
ركضت لغرفتي و أنا أبكي حسيت بألم في بطني
بدت الصور تتلاحم في خيالي شموخ .... قمت بسرعه أطالع الفراغ شموخ توفت
هذا اللي اتذكره ماتت !!!
مرت في خيالي صورة صديق أمير و العجره و السيجاره اللي كانت على طرف شفايفه
و الدم !!!
تنهدت بعنف و رجعت جلست عالسرير أبكي
طق باب غرفتي
أميره : تركوني بروحي بعدوا عني ؟؟
ما كملت كلامي الا و انفتح الباب في وجهي
ناديه : و بعدين معاك وش هالصومعه اللي حابسه فيها نفسك ؟؟
جت جلست جنبي
ناديه : متى هالدموع بتبعد عن هالوجه المليح
ما قدرت أتحمل حطيت راسي في حضنها و بكيت
أميره : آآآآآه يا ناديه محد فاهمني قتلوا شموخ و مب بعيده يقتلوني !!
حطت يدها على راسي و قامت تلعب بشعري
ناديه : مين جايب لك هالفكره كل ما في الأمر ان فيصل صديق أخوك
شاف الفرس بتهجم عليك شال العجره و ضربها و بعدين شموخ كانت مريضه يا أمورتي
أميره : لا تقولين عجره هذا كان سيف !!
ناديه : عجره سيف المهم انك بخير
أميره : ليتها رفستني عشان أموت و أرتاح
ناديه : يا ربي رجعنا لسالفة الموت مره ثانيه خلاص يا أميره راعي مشاعري
أنا بدونك ما أسوى قومي امسحي دموعك ارحميني !!
و قامت تمسح دموعي و كملت
ناديه :خلاص عيشي الحياه بسعاده شوي
يا شينك ما يمر يوم الا و انتي تبكين و عيونك مورمه !!!
ابتسمت بهدوء و سكت
قامت تطالعني بتأمل و كأنها تركت العنان لقلبها يقول كل اللي في داخله ...
ناديه : تدرين كنت أبكي بمراره زمان لما سمعت ان احمد خطب وحده من أهل الجنوب
ياني بكيت و صرخت و في ذيك الأيام مرضت لدرجة اني رحت للمستشفى !!
تعدلت في جلستي و طالعتها بإهتمام
أميره : الله لهالدرجه ؟؟!!!!
ناديه : و اكثر تدرين اني كنت أحبه كان مالك مشاعري و قلبي ما تتخيلين قديش !!
طبعا كنت أحبه و هو ما يدري عني بعد ما خطب بنت الجنوب جا مره لبيتنا زياره هو والجماعه أعمامي و عيالهم و حريمهم كلهم !!
كنت في ذيك اللحظه كارهته مدري ليش !!
أنا قمت أضحك .....
أميره : أحمد أحيانا يكون بغيض و جاد ... و أحيانا أحسه شرير !!
حطت يدها على راسي و قامت تلعب بشعري
ناديه : يا بنت عيب !!
قمت أضحك !!
ناديه : المهم يا ستي رحت للمغاسل اللي بالحديقه ذاك اليوم أبي أغسل القهوه اللي انكبت على تنورتي كنت ملتهيه و أنا أفركها لما خلصت رفعت راسي أطالع للمرايه لقيته وراي يطالعني !!!!!!!
قلت بإهتمام متحمسه الأخت !
أميره : واااااااااااو وش صلحتي ؟؟
ناديه : طالعته و تصنمت في مكاني ... هو مدري وش فيه وقف يطالعني و لا استحى و لا قال خليني أبعد ... أطلع أسوي أي شي !!!
أميره : أكيد شاف الزين وش بيسوي المسكين ؟؟
ناديه : تدرين وش قالي ؟؟
قلت و علامات التعجب مرسومه على وجهي !!
أميره : و بعد قلتي و قال ؟؟!!!!
ابتسمت ناديه و كأنها ماسكه كتاب قصص قديمه و صايره تقلب كل صفحه منه تخلصها بإنفعال جديد !!!
ناديه : تخيلي قالي وش جايبك في مغاسل الرجال !!
قلت بعصبيه متحمسه مثل ما قلت لكم
أميره : عمى في عينه صدق ما يستحي !!
طالعتني ناديه و هي تضحك و ضربتني على كتفي
ناديه : يا بنت عيب
أميره : معليش تحمست بزياده كملي ؟!
ناديه : طبعا انا بسرعه جريت لغرفتي و قمت أبكي لك ليل مع نهار و العجيب انه جا اليوم الثاني و خطبني من أهلي !
أميره : عفيه عليه أخوي ما عنده لف و دوران يبيك جاك من الباب و خطبك
قلت بتفكير : عشان كذا ترك بنت الجنوب و فجأه قالنا انه بيخطب بنت عمه
تدرين ان بنت الجنوب هذي كانت عفرا بنت خالة أمي يعني قرايبنا من جهة أمي
كانت مزيونه حيل و مازالت و للحين يضرب في جمالها المثل بس مره مغروره و شايفه نفسها !!!
ناديه : قطيعه تقطعها !!
أميره : بدينا نغار ؟؟
وجهها حمر حيل و قامت تضربني و ترمي علي المخده و بعدين رمت علي البطانيه و دفتني
قمت رميت عليها المخده
ناديه : أي بطني آآآآه لحقي علي يا أميره
أنا خفت و جيت جنبها يا ويلي وش سويت كانت مغمضه عيونها أول ما فتحتهم
قامت تضحك
ناديه : أمزح عليك هههههههههه
أميره : يا شينك يا نداوي ههههههههه
جلست عالسرير و تمددت بحزن
طالعتني بإهتمام و قالت لي
ناديه : وش فيك ؟؟ باقي ما خف حزنك و لا ملي !؟
ابتسمت بحزن لها و قلت
أميره : و لا سانتي
ناديه : طيب وش رايك أحكي لك حكايه
ابتسمت بمرح و قلت
أميره : موافقه يالله
|