اليوم : الخميس
الساعه : 10:30 صباحا
المكان : بيت أبو عبدالله الله يرحمه
______________
نوره ..
هذي شغلتي أنا من بعد ما توفى ريلي الله يرحمه غسلي الملابس يبي الغدا نظفي الصحون عابلي بالهالبيت يا ربي تعبت
ودي أسوي أي شي ثاني غير هالشغله و مجبوره يوميا أطلع مع البشكاره لغرفهم و أنظفها
الحلو في يوم الخميس ان الوالده تقومنا يميع عشان نفطر سوى ..
قمت سويت الفطور و يلسنا نفطر ..
نوره : ودو وش فيها عيونج زايغه جذي !!
ردت علي و هي تتثاوب بدون نفس
ود : سكتي عني الله يخليج
الوالده : انتي دوم جذي بليده و كسوله بقول لعبدالله يدور لها على ريل يفكني منها و من النقره معاها
ود : شوووووووووو تزوجيني هذا اللي ناقص بقعد هني على قلوبكم !!
نوره : ودو احشمي نفسك و يلسي عدل تربعي جذي و صحصحي معاي من تخلصين فطورج تقومين تلمين الصحون و تغسلين المواعين
تبققت عيونها و كشرت عن أنيابها و طلع لسانها هذا وش طوله ؟!
ود : نعممممممممممم و البشكاره شو عملها يا حبيبتي لا لا هالشغله ما اعيبتني
ضحك سهيل و قال :
سهيل : انتي كله ما تشتغلين أصلا
ود : سهيييييييل بتسكت هالحزه و لا ...
في هاللحظه سكتت ود يوم سمعت صوت عبدالله داخل
عبدالله : السلام عليكم
دخل سلم على راس الوالده و يلس قربها
الوالده : يعلني أشوف عيالك قبل ما اموت
عبدالله : الله يطولي عمرج فديتج ... اشحالكم ان شا الله بخير
نوره : بخير يعلك بخير
ود : أنا مب بخير بعدني تعبانه ؟؟
عبدالله :الله الله الله وراها أبوي زعلانه شو متعبنج !!
قالت بدلع :
ود : يبوني اشتغل بالبيت بدل البشكاره !
عبدالله : ههههههههه هذا انتوا يالحريم تبون الراحه و النوم عالشبريه و بس
و فجأه دخلت أماني و هي ساكته كأنه انصب عليها ماي بارد يلست تفطر بدون ما تنطق بحرف !
شلت لها كوب و مدته صوبي و قالت
أماني : نوره صبي لي حليب
طالعتها الوالده و كأن ناغزها شي
الوالده : شو فيج ما سلمتي قولي السلام عليكم يا مسلمين
أماني : امايه شو تبغين اللحين خليني افطر ما فيني هبه أرمسلج !!
طالعتها و أنا أضغط على نفسي فيني كلام ودي أقوله بس مب متفيجه لها هاللحين
عبدالله : شو فيج انتي صايره أخلاقج في خشمج
قالت بدون نفس ..
أماني : كنت سهرانه
الوالده : شو مسهرنج ؟؟
أماني :الرسم امايه الرسم
طالعتها و سكت أحيانا الواحد لازم يسكت شو يسوي اذا كان هو مب قادر يمسك حنجرته شو يسوي يا ناس !!
|