*********************
بدت دراستها بالمعهد كل يوم تروح وتجي مع ياسر
الا اذا ماقدر يمرها ترجع مع السواق ... مرت عليها
الايام وحست بالراحة شوي انها قدرت تغير جو ...
تعرفت على بنات عربيات يدرسون معاها بنفس
المعهد وهالشي خلاها تحس انها عايشة من جديد خصوصا
بعد الوحدة القاتلة اللي عاشتهم الشهرين اللي فاتو ... وخلال
هالفترة زاد الشعور اللي بداخلها لياسر ..كان هادي وماصار
منه اي شي يزعلها ... وكل يوم عن يوم تتعلق فيه ... الا
بأوقات تتذكر ليلتها الأولى معاه وتحس وقتها بكره شديد
له ... ومابين هالمشاعر المتناقضة .. تعيش بدوامة ماتدري
شلون راح تطلع منها ...
طلعت اليوم بدري... وياسر راح يتأخر شوي وبيجي على
موعده... شافت محلات قريبة من المعهد وراحت لهم مشي
قعدت تتفرج على الاشياء المعروضة..واختارت كم غرض
لامها وخواتها .. لارجعت لهم تبي تهديهم ..محل وراه محل
وماحست بالوقت اللي راح وهي تتقضى ... التفتت حولها
وماعرفت وينها فيه...حست بخوف فظيع ... حاول تتذكر
من وين بالضبط جات بس ماعرفت ... بسرعة الدموع
تجمعت بعيونها... طلعت جوالها من شنطتها تبي تتصل
بياسر بس الجوال بطاريته فضت وماعاد فيه اي وسيلة
اتصال ابد وصارت تدعي ربها انه يرجعها بالسلامة
دارت بكل مكان بس ماعرفت شلون تروح .. حاولت
تستجمع اللي تعرفه من لغتها وسألت عن المعهد بس مالقت
جواب محد فهم عليها ..... لغتها مو ذاك الزود ودراستها
توها بأولها ... شافت لها حديقة قريبة .. راحت لها وقعدت
على احد الكراسي الموجودة ودموعها ماوقفت من خوفها
الشمس قربت تغيب وخوفها زاد ... من بعيد جاتها وحدة
مبين على ملامحها انها خليجية من قلب ارتاحت الجوهرة
من شافتها
البنت: السلام عليكم
الجوهرة: وعليكم السلام
البنت: توقعت من شكلج انج عربية..عسى ماشر اختي
ليش تبجين؟
الجوهرة: ماعرف هنا شي وضعت بهالمدينة.. تكفين اذا
تعرفين شي ساعديني
البنت : سعودية صح؟
الجوهرة: ايه
البنت: لاتخافين تعالي معاي وان شاء الله ترجعين لاهلج
بالسلامه
الجوهرة: وين اروح له؟
البنت: بيتنا هني بآخر الشارع..
قامت الجوهرة معاها وبداخلها مازال الخوف ساكنها
البنت: معاج بشاير ... من الكويت ... اعتبريني اختج
ولا احتجتي شي لايردج الا لسانج
الجوهرة اللي بدت ترتاح شوي : والنعم والله تدرسين هنا؟
بشاير: اي الحمدلله ..اغلب حياتي عشتها بلندن وادل فيها
شارع شارع يعني لاتحاتين ولايضيق خلقج مشكلتج بحلها
لج.. بس ماعرفت اسمج بالاول
الجوهرة: انا الجوهرة
بشاير: عاشت الاسامي
الجوهرة : عاشت ايامك ... وصلو لبيت بشاير ودخلت
بشاير: حياج اختي.. تفضلي
الجوهرة: ابي شاحن تكفين اكيد زوجي بيتصل فيني
بشاير: انزين ارتاحي بييب لج قلاص ماي
راحت جابت لها كاس موية ... وشربت الجوهرة
وناظرتها بامتنان:مشكورة ياقلبي والله مادري لو ماجيتيني
وش كان صار فيني..
بشاير:هذا كله مقدر من رب العالمين .. صبر بروح اييب
لج الشاحن
الجوهرة قاعدة بتوتر وكل خوفها من ردة فعل ياسر ..
بشاير جابت لها الشاحن ... اول مافتحت جوالها اتصل
ياسر وردت بخوف: الو
ياسر بصراخ سمعته حتى بشاير: وينك فيه؟
الجوهرة: ياسر هدي شوي وانا افهمك كل شي
ياسر: مابي اهدا علميني الحين وينك؟
الجوهرة: ما اعرف بس بخلي بشاير توصف لك المكان
كلمته بشاير ووصفت له بيتهم وقال لها دقايق وجاي لها
الجوهرة: وربي ليذبحني
بشاير: ان شاء الله مو صاير لج شي.. ابي اعطيج رقمي
كلميني اذا لقيتي فرصة وطمنيني عليج انطرج
الجوهرة: ان شاء الله ربي يعدي هالليلة على خير
بشاير: ورب البيت ارتحت لج ولاعرفتج اكثر بصير اشوفج
وايد.. اذا ودج طبعا؟
الجوهرة: ياليت والله ذبحتني الوحدة بهالبلد الكئيب
بشاير: لاتشيلين هم شي باجر نصير مثل الخوات
ومانفترق
الجوهرة تناظر جوالها اللي يدق: ياويلي هذا هو جا ...
ودعت بشاير وراحت والخوف مالي قلبها ..اكيد ماراح
يعديها لها ياسر على خير...
(نرجع شوي قبل ساعات ..اول ماجا ياسر لها اتصل فيها
كان جوالها مغلق .. انتظرها تطلع له بس ماطلعت ..دخل
سأل عنها بس محد شافها جن جنونه..توقع انها انخطفت
ماعرف شلون يتصرف.. ماخلى مكان الا دورها فيه
ومالقاها ..وقته كله يلوم نفسه ..انه هو اللي جابها لهالمكان
واهملها ... خاف عليها ..وهالاحساس عمره ماحسه بحياته
اول مادق وفتحت جوالها ... كان بيطير من فرحته بمكانه
بس الموقف اللي حطته فيه كان حارق دمه ومعصب عليها)
نزلت وشافته ينتظرها تحت عند باب العمارة ... مسكها من
يدها وحست باصابعه غارزها بيدينها ... صرخت بأعلى
صوتها من الألم بس حط يده على فمها : تبين تجيبين لنا
مشاكل اكثر من اللي جبتيهم
الجوهرة: ياسر والله غصب عني
ياسر: ولا كلمة لا وصلنا الشقة نتفاهم
ركبت السيارة ومشى فيها بدون ماينطق بحرف... وهي
الخوف مالي قلبها ... حاسة ان هدوئه هذا هو اللي يسبق
العاصفة.. وصلو للعمارة اللي ساكنين فيها ...سحبها من
يدها وطلعها دخلو الشقة ورماها على الأرض وصرخت
من ألمها : ممكن تفهميني وين رحتي اليوم؟
الجوهرة: رحت اشتري اغراض وضيعت الطريق ووو..
وماعرفت ارجع
نزل لها وشدها من شعرها : وانا قايل لك من الشقة
للمعهد ومن المعهد للشقة ... روحات وجيات مابي بس
الظاهر انتي ماينفع معك الا احبسك وما اخليك تعتبين
هالباب
الجوهرة: ياسر فك شعري حرام عليك
ياسر فكها من يده وناظرها والشرر يتطاير من عيونه
وبنبرة تهديد: طلعة من هالشقة مافي..انتي ماتستاهلين
من يعطيك ثقة ويخليك تروحين وتجين
الجوهرة: مو بكيفك.. كفاية اني من تزوجتك وانا ذايقة
الضيم تبي تحبسني بعد؟ وديني لاهلي ولديرتي بدل
هالعيشة اللي تقصر العمر...
ياسر: ماراح تروحين ولا مكان الا متى مابغيت انا
الجوهرة وقفت وقابلته: وانت مو مسئول عني تتحكم
فيني ... انا سكت من اول ورضيت بس خلاص فاض
فيني الصبر
ياسر: لا تتحديني ولا تعانديني ... تراك انتي الخسرانة
وربي لو نويت اعذبك لاعذبك مثل ما ابي بس انا
محترمك ومقدرك لانك بنت خالتي
الجوهرة: اي احترام واي خرابيط اللي تتكلم عنها وانت
راميني بهالشقة ...
ياسر: انا مو مقصر معاك بشي ... كل شي وفرته لك
اكل وشرب وسكن ودراسة .. وحتى طلعات وروحات
ولا تبين تحسين اني احترمك لاعطيتك باقي حقوقك
الجوهرة حست بمعنى كلامه بس تبي تتأكد منه: اي
حقوق اللي تتكلم عنها؟
ياسر: مثلك عارف مايحتاج اتكلم
الجوهرة: لو انت آخر رجال بالعالم ماخليتك تلمس
مني شعرة...
ياسر طرطع وانقهر من كلامها ... سحبها من يدها
ووداها للغرفة رماها على السرير وقرب منها مسك
يدينها يثبتها على السرير لاتتحرك وقرب منها يبوسها
وماقدرت تقاومه .... طوله وضخامته سيطرت عليها
كليا ... بكت وشاف دموعها... قام عنها وهو يناظرها
باحتقار: قلت لك لاتتحديني منتيب قدي لو كنت ابي منك
شي خذيته من زمان وخلصت بس قلت لك من قبل مالي
فيك حاجة ...
طعنة بالصدر .... وكلام مثل السهام جرحها واصابها
في مقتل ... كلامه كان اقوى من انها تتحمله ...:اطلع
برا ياحقير
ياسر: طالع من غير ماتقولين ... وطلع وهو تارك وراه
حطام امرأة ضيعها بقسوته وغروره ... بكت انوثتها
المجروحة .. وكبريائها المسلوب ... بكت غربتها ...
وضياعها ... بكت همومها اللي سكنت هالقلب ودمرته
يـاوقت..يكفي مابقى للعمر كثر اللي مضـا
تعبت أجـامل غربتي وأشكي همومي للوطن
لمحتني (ساكت) ترى ماكل من يسكت رضا
مجبـور أصارع بلوتـي مدامها ( لعبــة زمـن )
:
’،
ماعاد فيني .." أبتسم " مدام هالدمعة .. [ سلاح ]
ماعاد
فيني
أبتسم
وأخفي
! همومي والحزن !
ومادام فكري أقتنع يرفض مبادئ..هالكفاح
بأقتل شعوري وأدفنه وأخلي أحساسي كفن
( ياليل )
تكفى ضمني .. ماعــاد فيني للجـراح .!!
( تعبت )
أجامل وأنتظر .. زود المصايب والمحن .!!
الله أكبر × يازمن × وشلون قلبي [ما أستراح ]
( العيب فيني ) ياترى ولا ( العيوب من الزمن )
اللي بغيته
( مالفى )
وأقفـا على دربه وراح .!
واللي رفضته
( مارحل )
يضحك وانا عيوني بكن .!
لاصار " حظي مركبة " تبقى المصيبة .. ! بالرياح !
تجري " الرياح العاصفة " في عكس ..ماتمشي السفن
الـهـم أصبح لي ..( وطن )
والجرح أصبح لي .. ( وشاح )
وياجرح
.. ماعاد
... أحتمل
.... مادام
...... لأهمومي وطن
...... أحس
..... بظلوعي
.... قفص
... والطير
مكسور الجناح
وأحس .. بعيوني .. دمع مسجون .. في داخل جفن
والليل قرب ينتهي ويزول في وقت الصباح
وانا وليلي نكتفي بس المواجــع ما اكتفن
ماعاد
لأسراري بلد
والحزن
دمرها وباح
،’،’
ولاعاد فيني
أبتسم
وأخفي
همومي والحزن
:
:
*************************
الساعة صارت 1 بالليل وناصر للحين ماجا,, وفارس
حرارته مرتفعة ...وطول الليل وهي كمادات تبي
تخفض حرارته بس مو راضية تنزل ... اتصلت بناصر
اللي من شاف اتصالاتها المتكررة حط جواله على السايلنت
وكمل سوالف مع اخوياه بالاستراحة ...صحيح انه ماصار
يروح مثل اول كل يوم ..بس لا راح للاستراحة ينسى نفسه
فيها شافت حرارته لقتها وصلت الـ 39 وفارس شبه متشنج
قامت ركض لغرفة مشاعل لقتها ترتب بغرفتها: الحقي علي
فارس حرارته مرتفعة وناصر اتصل فيه مايرد
مشاعل قامت معاها ركض ... وشالت فارس: تعالي بسبحه
بموية باردة... وجهزي نفسك ناخذه للمستشفى...كلمي اماني
تصحي ابوي
راحت ندى ركض لاماني ... اللي من عرفت راحت لم غرفة
امها وابوها تصحيهم وعلمتهم باللي صاير..قامو مفزوعين
ياخذون فارس للمستشفى..كل هذا صار وناصر بدنيا ثانية
( بمكان ثاني كان ناصر قاعد مع اخوياه يلعبون ورق وناسي
كل شي حوله
ناصر: وزع الورق يامحمد
محمد: رد ياخي على جوالك وفكنا
ناصر: ياشيخ ازعاج بس.. وحطه على السايلنت: العب العب)
على الساعة 2 ونص ناظر ساعته شاف الوقت متأخر :اوف
شلون عدى هالوقت كله ماحسينا ... يالله ورانا دوامات بكرة
وقام يبي يطلع ... سحب جواله وتفاجـأ من عدد الاتصالات
اللي اذهله قرصه قلبه وحس انه صاير شي...
شاف الاتصالات من ندى ومشاعل وابوه...!!!!!
(يارب تستر) رددها بخاطره .. دق على ندى كذا مرة بس
ماردت ... وزاد خوفه ركب سيارته وهو متوتر وخايف ...
اتصل بمشاعل اللي ردت وهي متنرفزة: ليش متصل الحين
ان شاء الله؟؟؟ خلك بدنياك احسن لك
ناصر: مشاعل وش صاير ندى فيها شي؟ ولا فارس؟
مشاعل: وانت يهمك اصلا ؟ وربي انك مو كفو ندى ولا كفو
بيت وعيال .. وسكرت السماعة بوجهه ولأول مرة تسويها
وتسكر بوجه اخوها الكبير بس النار اللي بقلبها على ولد
اخوها حارقتها ... رجع اتصل فيها كذا مرة وردت:نعم
ناصر بصراخ: مشاعل وش اللي صاير ترى واصل حدي
لاتخليني اطلع حرتي فيك
مشاعل: ولا شي فارس تعب علينا والحمدلله الحين احسن
بس بيخلونه 24 ساعة يتطمنون ان حرارته انخفضت
وماعاد راح ترتفع ...
ناصر: ندى عندك؟
مشاعل: ما انصحك تكلمها الحين لاني مادري وش ممكن
تكون ردة فعلها
ناصر: مشاعل تكفين ابيها
مشاعل تكلم ندى: خوذي ناصر يبيك
ندى وهي مازالت تصيح من الموقف اللي هزها : مابيه
ولايجيني هنا ولا ابي اشوفه
مشاعل: سمعت؟
ناصر: وينكم فيه بأي مستشفى؟
قالت له مشاعل اسم المستشفى وراح لهم ...استأذنوها
ابو ناصر وام ناصر ومشاعل راجعين البيت بعد ماتطمنو
على فارس
ابو ناصر: لا احتجتي شي وانا عمك كلمينا
ندى: ماتقصر ياعمي عسى عمرك طويل...
ام ناصر: يالله ياندى بكرة ان شاء الله بجي لك من بدري
انتبهي لفارس ولو ارتفعت حرارته لو شوي نادي
الممرضات
ندى: لاتوصيني على ولدي ... الله يخليه لي
ام ناصر: اللهم آمين يارب
مشاعل قربت وسلمت على ندى: اذا احتجتي اي شي
او حتي زهقتي من القعدة لحالك كلميني
ندى: الله لايحرمني منكم يارب
واستأذنوها طالعين .... بعدها بدقايق ناصر وصل
للمستشفى وسأل عن فارس وقالو له .. بس الزيارة
ممنوعة كلم الكل وسوا ازعاج وقلق بالمستشفى انه
بس يبي يتطمن عليهم ويروح ... وبالاخير حن عليه
الدكتور وسمح له بس بدون مايطول...
راح مستعجل للغرفة ..ودخل شافها قاعدة تحط كمادات
على فارس..رفعت عينها ومن شافته شالت عينها عنه
ناصر: شلونه؟
ندى ماردت عليه وطنشته
ناصر: ندى انا آسف
ندى: آسف؟ وش يفيد الأسف وانا بأصعب المواقف
بحياتي لا احتجتك مالقيتك ..
ناصر: ندى وربي ماكنت ادري
ندى: يعني انا اللي كنت ادري باللي يصير؟ ولا كل
شي يصير بحياتنا ندري عنه..
ناصر: ندى اسمعيني بس
ندى: مابي اسمع شي منك ... لاتقعد تقول لي اخوياي
وخذتنا السوالف ..انا مامنعتك لاتروح بس لا احتجتك
ليش تتركني؟ ليش حاقر اتصالاتي وماترد علي
ناصر: والله
اشرت له ندى يسكت : خلاص ناصر انا اللي فيني
كافيني... مابي اسمع منك شي ... لان كل اعذارك
ماتقنعني ولا راح تغير شي باللي صار..انا تعودت
على انانيتك وسلبيتك معاي ...راح اسامحك على كل
شي الا ولدي ياناصر لو راح مني ماراح اسامحك
عليه العمر كله
ناصر: بسم الله عليه ... ندى وش هالكلام تراه ولدي
انا بعد ولا نسيتي؟
ندى: ولدك بالاسم بس.. ناصر ابي ارتاح الحين خل
هالنار بقلبي مابي منك شي الحين ... ولا رجعت
البيت وطلع فارس بالسلامة لي تفاهم معاك
ناصر: تهدديني يعني؟
ندى: وانا كل ماقلت لك شي قلت تهدديني؟ لا ما اهددك
بس لازم احط حدود ترى تعبت اعدي لك غلطاتك
وانت للأسف تتمادى بكل مرة
ناصر ناظرها بحزن وهي أشرت له يطلع ... تبي
ترتاح وبنفس الوقت ماتبي تقول شي تندم عليه بعدين
ناصر: اوكي ارتاحي انتي الحين ... راح اتصل فيك
الصباح اي شي تحتاجينه علميني بجي لك من بدري
ان شاء الله
طنشته هالمرة بعد وماردت عليه ... وهالشي قهره
وحز بخاطره...طلع وقلبه ماكلته الحسرة على زوجته
وولده اللي اوقات يهلمهم بغبائه
رجعت ندى قعدت تقرا على ولدها وتحط له الكمادات
وطول الليل ماغفت عينها ..سهرانة على راحة ولدها
*
*
*
ومثل كل ليلة تمر على ابطال هالقصة ..مشاكل وهموم
تحاصر البعض ... وحب وعشق يغلف البعض الآخر
وهذي هي دوامة الحياة ...
وهذا ماقسمه رب العالمين بين البشر ... احزان وافراح
وهموم وانشراح ...والحمدلله على كل الاحوال....
*
*
*
*
*
*
الجزء التاسع عشر
*
*
*
*
*
ليلة كئيبة مرت بكل تفاصيلها التعيسة ... ليلة كانت
كلها دموع وعذاب واحساس قاتل بالإهانة ...بكت
كل شي صآر معاها ...وبزحمة احاسيسها الموجوعة
تذكرت بشاير وماتدري ليش حست انها ودها تكلمها
تشكي لها ... تفضفض عن اللي بخاطرها ...كانت
الساعة 10 استحت تتصل فيها خافت تكون نايمة
او تضايقها بهالاتصال خصوصا انها ماتمون عليها
اكتفت انها ارسلت لها مسج بسيط ويعبر عن مشاعرها
( مساء الخير اختي..
اولا حابة اشكرك على موقفك معاي وماراح انساه لك
طول العمر والله يقدرني وارد لك جميلك ..
وصدقيني اني اتمنى اتعرف عليك اكثر وحياك عندي
بأي وقت انتظرك تلبين دعوتي ,,,وآسفة على الازعاج)
بشاير كانت قاعدة مع اهلها اول ماوصلها المسج ...
ابتسمت بخاطرها لصاحبة المسج واتصلت فيها تكلمها
من اول وهي تبي تتطمن عليها: الو
الجوهرة: هلا والله
بشاير: مساء الخير شلونج؟
الجوهرة: بخير انتي كيفك؟
بشاير : الحمدلله.. قاعدة بروحج؟
الجوهرة: ايه
بشاير: بشري ان شاء الله ماصار شي وياج؟
الجوهرة: وش اللي ماصار خليها على ربك بس...
بشاير: طقج؟
الجوهرة: تبين الصراحة؟...
بشاير:اعتبريني اختج وقولي كل اللي بخاطرج
الجوهرة: بشاير انا اعيش بعذاب محد يتصوره
والاقسى اني اعيشه لحالي... ابي افضفض اللي بخاطري
ابي اقول..بس من عندي اقول له... قاعدة لحالي بهالمدينة
حتى اهلي ومابي ازود همهم فوق هم بعدي عنهم
بشاير: الجوهرة
الجوهرة: سمي
بشاير:اي وقت يناسبج قولي لي والله بيي لج على طول
الجوهرة: تقدرين بكرة؟
بشاير: اي اقدر ان شاء الله بس عطيني وصف شقتج وانا
ايي لج الصباح
الجوهرة: ما اعرف والله بالضبط الوصف
بشاير: ساكنة بشقة ماتدرين وينها؟
الجوهرة: لانك مو دارية اني محبوسة فيها ,,,
بشاير: عيل شلون ايي لج؟
الجوهرة راحت تطل من الشباك وشافت لوحة احد المحلات
اللي قريب من شقتها... قالت لبشاير الوصف اللي قدرت
عليه واتفقت معاها اذا ماعرفت توقف بالمحل والجوهرة
تطلع لها مع الشباك وتعرف منها الشقة ...
ارتاحت الجوهرة لهالاتصال كثير خصوصا انها حست
انه في احد حاس بمعاناتها وماتدري ليش تحس هالبنت
تبي تساعدها ...تسبحت وذكرت ربها ونامت ...
***********************************
|