عبير: ماما والله خايفة تسوي لي مشاكل
ام عبير: عندك حل غيره يعني؟ خالد ولسى عريس
واخواتك طبعا مستحيل تروحين لهم
عبير: طيب والله يعينني رجعتيني لأربع سنوات ورى
ام عبير: ما اوصيك ياقلبي بنتي اللي ربيتها وعرفتها
حتى لو غبت عنك مافي شي بيتغير
عبير: ان شاء الله من عيوني ... ماما
ام عبير: هلا
عبير: حاتم لسى زعلان؟
ام عبير: بكرة يرجع لعقله ... ويعرف ان كل هذا طيش
شباب
عبير: اطلبيه اذا كان يعزني مثل وحدة من اخواته انه
يحضر زواجي... قولي له عبير ماتكتمل فرحتها الا
بحضور كل اخوانها ..
ام عبير: ان شاء الله راح اقول له بس انتي لاتفكرين
في هذي الأمور وقومي صلي الظهر ... الساعة صارت 2
وانتي لسى ماصليتي
عبير فزت من مكانها : الله يخزي الشيطان نسيت صلاتي
ام عبير: الله يهديك يارب.. وراحت تجهز نفسها لسفرها
المفاجيء....
***********************
عبير بعد ماصلت وذكرت ربها اتصلت في اريج
اختها : الو
اريج: هلا عبورة
عبير: وش هذا الازعاج اللي عندك؟
اريج: بالمطبخ اجهز غدا زوجي
عبير: ههههههههههههههههه على هذا الحال كل يوم؟
اريج: راضية ياختي مادام اخدم حبيبي على قلبي
مثل العسل
عبير: الله يهنيكم يارب... اروج اليوم بروح بيتكم
اريج: اي بيت؟
عبير: بيت اهلك يعني بيت مين
اريج: طيب
عبير: مادري كم بقعد هناك عشان ماما بتروح الطايف
تعالي اروج
اريج: خالتي ليش رايحة؟
عبير: خالي تعب عليهم بس الحمدلله الحين تمام
اريج: الحمدلله
عبير: تعالي اجلسي معايه
اريج:واترك رجلي؟
عبير: لا ماقلت كذا بس تعالي نقعد ونتعشا وبعدها
روحي انتي
اريج: افااا تطرديني من بيت ابوي
عبير: ههههههههههههه لا بس عشان تروحي لبندر
وانا اكمل مذاكرتي وانام
اريج: زين متى رايحة هناك؟
عبير: قبل المغرب اتوقع
اريج: خلاص بسوي صينية حلى من اللي يحبهم قلبك
وبجي .. بس كلمي ندو وفتون بعد نجتمع على العشا
عبير: والله حلو ... وبكلم شهودة كمان ...
اريج: زين زين كذا بنفلها
عبير: وعلى الاختبار السلام
اريج: صدق والله؟
عبير: لا والله بصراحة المنهج مذاكرته بس تعرفين
لازم اراجع واركز اكثر وعندي 3ساعات راح احاول
اخلص جزء كبير من المنهج
اريج: الله يوفقك يارب... خلاص لاتشغلين نفسك بشي
وخليني انا اتكفل بكل الاتصالات ...
عبير: اوكي
اريج: يلا حبيبتي بحط غداي .. واشوفك المغرب
عبير: على خير يارب...
وسكرت منها واتصلت بفهد سولفت معاه شوي
واستأذنت منه انه بتكمل مذاكرتها وماعلمته انها
بتروح لبيت ابوها ... ولا كان سبقها هناك ........
****************************
وصلت ولقت غادة وريم قاعدين بالصالة...
دخلت وسلمت عليهم .. وفصخت عباتها وقعدت
عبير: البنات لسى ما جو؟
غادة: فتون تو مكلمتني تقول مو جاية الا بعد المغرب
عبير: طيب اريج وندى وشهد؟
غادة:ماكلمتهم بس اكيد جايين الحين
عبير: حلو ... ريمو كيف المدرسة معاك؟
ريم: تمام .. بس الواجبات كثير
عبير: عادي ياقلبي اهم حاجة انتي اجتهدي واكيد
هذا الاسبوع راح تعطلون صح؟
ريم: مادري الأبلة تقول تبينا نجي الأسبوع الجاي
مع انا خلاص ختمنا المناهج
اريج: السلام عليكم
الكل: وعليكم السلام
اريج: ريمو قومي شيلي الحلى وديه المطبخ
ريم: طيب .. وتمتمت بينها وبين نفسها مخليني شغالة العايلة
اريج: عشتو يهالمفعوصة طال لسانها
ريم ضحكت وخذت الحلى
غادة: قلت لك طالعة على عمتها العوبا
اريج: يابعد عمري هالبنت تعجبني
عبير: ههههههههههههههه دوبك تشتكين من طول
لسانها
اريج: امدحها يالخبلة مو اذمها ... شهد وندى مو
جايين الا بعد المغرب
عبير: ليه؟
اريج: شهد تقول خالد نايم ... ولا صحى يبي له
ساعة يتدلع عليها ... يعني اتوقع العشا جايين
عبير: ياحياتي مرررة لايقين على بعض
غادة: اي الله يوفقهم يارب
اريج بخبث: عبورة
عبير:هلا
اريج: نسيت اعلمك ترى ماجد يبيك في الملحق
عبير: جد؟ من متى؟
اريج وهي تقعد بالكنبة اللي مقابلة لعبير : اول
مادخلت قال لي بس نسيت ..
عبير قامت رايحة له ... كانت لابسة برمودا جينز
فاتح ... وتي شيرت تركواز ,,, ورافعة شعرها
الطويل ذيل حصان ... وخصلات نازلة على وجهها
الناعم ...دخلت بكل هدوء بس ماشافت احد
استغربت ... معقول اريج تكذب عليها ... رجعت من
مكان مادخلت وماحست الا باليد اللي تمسكها ...
شدها له بقوة وضمها .. واول مالمحته عيونها فز قلبها
والنبض اللي بداخلها رقص فرح ..: فهد بعد عني
فهد بهمس: وحشتيييييييييني
عبير: طيب بعد شويه وكلمني لاحد يشوفنا كذا
فهد: عادي زوجتي حلالي وضمها اقوى
(( ضَمني حيل
قلت ( ارفق )
قال ( تو الناس بدري ...
ما بدينا ... ما لوينا من ورى ظهرك يدينا
ما تهنينا بـ ضَمة ...
خَلِي آخذ بس فُرصة ... ودي اقهر واحدٍ ملعون جد
ودي اقطع من وريده لين تتقطع حباله . )
قلت ( منهو ...؟! )
وابتسم لي
قال ( واحدٍ من جِد ماطِيقه
يسمونه جفى . )
قلت ( تكفى ... إلعن أُمه
شد حيلك )
قال ( والله لقتله واربط عياله )
وضَمني حيل ... ياهو مجنون
ومادريت الا وانا اشهق ...
وشوفي عاد شهقة البنت وش تسوي به يا يُمه
خَلَته ملح ...!!
وقمت أصَفق في كفوفي ... مدري ليش ...؟!
وتنتفض بالقيظ يا يُمه كتوفي ... ما هو برد
مدري ويش ...؟!
وآتعبر
لعن ابوه الحضن ... جنني ...
ودهوَرني ... ما دريت انه كِذا
رَجَعْ العُمر اللي مات
والضحكات ... والآمال والأحلام والنشوّة بعد
وقمت اشد يديه واترجاه يرحمني
والله حالة....!! ))
فكت يدينه بصعوبة وركضت وهي تضحك ...
وصلت لمدخل البيت والتفتت له شافته واقف
مكانه يناظرها ... دخلت لأريج اللي كانت ميتة
ضحك هي وغادة : تعالي والله لاذبحك كذا تسوين
فيه؟
اريج: ايييي احسن مخبلة بخالي المسكين يترجاك
يشوفك وانتي تتغلين ... قبض عليك متلبسة في عقر
دارك...
عبير مسكت جوالها ترد وهي تضحك على اريج
وحركاتها اللي مستحيل تتركها : الو
فهد: تعالي
عبير: لا
فهد: عبورة تكفين
عبير: اذا بطلت حركاتك اجي
فهد: اي حركات؟ لا تظلميني
عبير: اي حركات؟ مسوي مو عارف .. ماراح اجي
فهد: عبورة يالله عاد وربي مشتاق لك
عبير: طيب اوعدني ماتسوي نفس حركاتك
فهد: بصراحة ما اوعدك
عبير: اجل خلاص ماراح اجي
فهد: اقول ترى دلعتك بتجين ولا جيت سحبتك بالقوة
عبير: ترضاها عليه؟
فهد: لا والله ياقلبي بس تعالي اقعدي معاي شوي
عبير: طيب بس اوعدني
فهد: اخاف اوعدك واتهور واصير خاين للوعود
عبير: هههههههههه وانا اقول اريج من فين جايبة
الخبث اثاريه كله وراثة منك
فهد: افااا عبورة انا خبيث
عبير: لا حبيبي انت البراءة كلها
فهد ذاب من سمعها قالت حبيبي: عبووورة
عبير: هلا
فهد: تعالي قبل اجي لك
عبير : اوكي ثواني بس
راحت لأريج وغادة اللي قاعدين بالصالة وجلست
مرتبكة : عادي اطلع كذا؟
اريج: اي عادي زوجك
عبير: بس ماعمري طلعت له وانا لابسة كذا
غادة: خلاص شافك يعني وش يفرق ؟
عبير: مادري بس استحي ,,,
اريج: يابنت كلها شهر ويتغير الحال بس روحي
له
عبير: طيب تعالي معايه بأخذ له عصير
اريج: ماتعرفين تصبين عصير بكاسات بعد؟
عبير: هههههههههههه لا بس مرتبكة واخاف اطيحهم
اريج: قومي قومي الله يعين فهود ويصبره على ما
ابتلاه
قامو وصبت عبير العصير بكاسين ... واريج حطت
لهم شوي من الحلى ...
عبير: الصحن ثقيل
اريج: عبير وش تحسين فيه ياقلبي؟
عبير: والله ثقيل جربي تشيلينه
اريج: تعالي يالرفلا انا اشيله بس امشي قدامي
وطلعو رايحين للملحق ... دخلو الثنتين وعيون فهد
تناظر عبير اللي جاية تمشي بخطوات مستحية
وشاف اريج اللي سابقتها : خير وش عندك لازقة ؟
اريج تحط العصير : وععععععع من زينك انت وياها
ماجيت الا عشان مرتك الخبلة ماتعرف تشيل العصير
عبير شهقت: انا قلت ما اعرف؟
اريج: لا ياقلبي شوي شوي على عمرك لا تتقطعين
فهد ميت ضحك على اريج بس مايبي يحرج عبير
اكثر: اروج اقضبي الباب لاهنتي .. وزوجتي خليها
تتدلع .. لو تبي انا اطبخ لها من عيوني
اريج: وأسفاه على الرجولة كان هذي تاليتها ... وطلعت
تركض قبل تضرب فيها علبة المناديل اللي رماها
عليها فهد
عبير كانت ميتة ضحك على اشكالهم التفت لها فهد
وهو قلبه ميت شوق لها : لاتصدقين عاد اني بطبخ لك
عبير: من قال اني راح ارضى اصلا
فهد: اجل ماتعرفين تشيلين العصير
عبير استحت منه حييييييييل: لا والله بس ثقيل وانا
متوترة وخفت اطيحه ..
فهد: بس؟
عبير: والله
فهد: طيب ليش بعيدة تعالي جنبي
عبير: لا خلينا كذا احسن
فهد قرب منها شوي وهي ارتبكت: لاتخافين مو مسوي
لك شي.. شلونك؟
عبير: تمام
فهد: تدرين كم باقي ويجمعنا بيت واحد؟
عبير: شهر
فهد: 27 يوم
عبير: حاسبها؟
فهد: شلون ما احسبها وانا اعدها ساعة ساعة
عبير ابتسمت له بحب وكمل : ابي اعترف لك بشي
عبير: ايش هو؟
فهد: تدرين متى اول مرة شفتك؟
عبير: لما صدمت فيه وانا طالعة من الباب
فهد: لا
عبير تفاجأت: قبلها؟
فهد: اي كنتي جاية من الكلية ... الظهر ودخلتي المطبخ
كانت اول مرة اشوفك فيها ... ماكنت اعرف انتي مين
توقعتك وحدة من بنات عمانهم ...
عبير: وكيف عرفت انه انا عبير
فهد: سألت وعرفت ..
عبير ماعلقت واكتفت انها تناظر بفهد اللي كان مركز
بكل اللي يقوله وكأنه يستجمع صور من الماضي: كنتي
احلى بنت اشوفها ... ماقدرت اشيل عيوني عنك .. ولأول
مرة بحياتي ماقدرت حتى اشيلك من راسي... احاول انساك
بس مادري ليش يجيني شعور اني ابي اجي هالبيت واشوفك
وكنت اجي ... واشوفك بدون انتي ماتعرفين اني قاصدها
التفت لها وشاف نظراتها المستغربة بس كمل كلامه
بكل هدوء: عبورة لاتستغربين هذا شي من الله ... شعور
كان اقوى مني ... رغبة حاولت اكبتها بس ماقدرت
كنت خايف من الارتباط ... وبلحظة تأكدت اني ما اقدر
ابتعد عنك اكثر اتخذت قراري .. اللي اعتبره اسعد لحظات
عمري
عبير: ماكنت عارفة انك تحبني قد كذا
فهد: والله احبك اكثر بعد من اللي تتصورينه ... وراح
اثبت لك هالحب ان الله احيانا
عبير: ان شاء الله
فهد: شربيني العصير
عبير ناظرته وهو كمل : ابي اذوقه من يدك
مسكت الكاس تبي تقربه منه بس مسك يدها : لا ابي
من كاسك
عبير توردت خدودها وماعرفت وش تقول قربت
الكاس منه وشربته بيدين ترتجف ... وعيون فهد
تناظرها بكل شوق ووله : اوعديني
عبير: اوعدك؟
فهد: ايه اوعديني ماتتخلين عني ابد
عبير: اوعدك ماراح اتخلى عنك
فهد: وتبقين معاي العمر كله
عبير: ان شاء الله راح ابقى معاك طول العمر
فهد: حطي يدك بيدي وقولي وعد
تشابكت ايديهم .. وبهمسة حب وعشق وغرام فاض
فيها الحب : وعد
باسها بين عيونها : الله لا يحرمني منك يارب...
وقام مودعها وقلبها يترجاه يبقى لعيون الشوق اللي
بداخلها : يالله حبيبتي بقوم اصلي المغرب وانتي قومي
اقعدي مع خواتك ..
عبير: اوكي
فهد يقومها معاه : تعالي معاي للباب
وقامت معاه بكل استسلام وهدوء ... وصلته للباب
وودعته ودخلت هي بعد تصلي ...
******************************
صلت بغرفة اريج وقبل ماتنزل تقعد مع خواتها قابلتها
ام تركي اللي كانت شايفة كل شي صار: وفري حركاتك
بعد العرس .. وش بقى ماسويتي؟
عبير انصدمت من كلامها : انا؟
ام تركي: اجل انا؟
عبير: والله ماسويت حاجة غلط
ام تركي: تتحضنين بأخوي وتقولين ماسويت شي؟
عبير بكل هدوء تبي تنهي النقاش بدون مشاكل:وانا
فعلا ماسويت حاجة ... مادام انتي شفتي كل شي معناها
شايفة انه كل شي صار غصبا عني وانا اللي بعدت عنه
بعدين فهد زوجي وماسويت شي حرام ..
ونزلت قبل تسمع اي كلام ثاني تاركة ام تركي وراها
وهي تسب فيها ...
سلمت وقعدت مع خواتها وغادة وشهد ... سوالف وقهوة وحلى
ندى: هاه عبورة وش بقى لك ؟
عبير: اشياء بسيطة بس
غادة: حلو يعني مريحة قبل الاختبارات
عبير: اكيد خصوصا انه كان عندي فترة طويلة اجهز
نفسي فيها..
اريج: عبورة والله استنى متى اشوفك عروس
عبير: عارفة اروج .. ابغى يكون شكلي كلاسيكي ... ميك اب
ناعم ... وتسريحة طبيعية .. ومن زمان .. من وانا صغيرة
نفسي البس تاج ..
ندى: بعد عمري الله يهنيك ويوفقك يارب
اريج: فتون ليش ساكتة؟
فاتن: معاكم
اريج: لا والله من اول سرحانة وماتدرين وش نسولف
فيه
غادة: في شي شاغل بالك؟
فاتن: مادري وش اقول
غادة: صاير شي بينك وبين سعود؟
فاتن: لا مابينا الا العافية ... بس انا اليوم رحت المستشفى
اراجع في حالتي ...
اريج: طيب؟
فاتن: الدكتورة تقول كل كشوفاتي سليمة ومافي شي يمنع
الحمل وكل التأخير قضاء وقدر
شهد: يمكن عين ؟ ليش ماتواظبين على الرقية الشرعية
فاتن: والله ماخليت شي الا سويته بس ربي ماكتب
غادة: فتون لاتيأسين وتذكري قول رب العالمين ( ولاتيأسوا
من روح الله انه لاييأس من روح الله الا القوم الكافرون)
فاتن: مايأست والله وهذاني اراجع للحين
عبير: هي قصدها احسني الظن بالله ولاتقولين انا سويت
وماصار شي ... يمكن ربي كاتب ولكن الى الآن ماصار
فاتن: ان شاء الله ... انا فكرت ونويت اتوكل على الله
واسوي عملية اطفال انابيب وان شاء الله تنجح ويرزقني
ربي باللي اتمنى
غادة: هذا آخر حل؟
فاتن: تعبت والله وهذا آخر الحلول...
شهد: وسعود وش رايه؟
فاتن: للحين مافاتحته في الموضوع اليوم هو عند زوجته
الثانية وبكرة ان شاء الله راح اناقشه
عبير: حلو يعني بتنامين اليوم هنا؟
فاتن: اي ان شاء الله
غادة: الله يوفقك ويكتب لك الذرية الصالحية ويرزقك
من حيث لاتعلمين
اريج: وكم راح تكلفك؟
فاتن: يقولون من 12 لـ 20 الف
اريج: وعندك هالمبلغ؟
فاتن: عندي مبلغ معين واذا نقصني شي ابوي مو مقصر
قامت عبير ترد على امها اللي وصلت ودقت عليها
تطمنها ....:هلا ماما
ام عبير: هلا حبيبتي
عبير: وصلتي بيت خالي؟
ام عبير: ايوه ياقلبي وكلهم تمام وخالك الحمدلله يقولون
تمام مايمديني اليوم ازوره بس بكرة بروح له ان شاء الله
عبير: طيب سلمي لي عليهم كلهم
ام عبير: يوصل ياقلبي .. خلاص انتي انتبهي لنفسك
ولاتفكري بحاجة وانبسطي ولاتشيلي هم حاجة ابدا
خالك الحمدلله بخير والله
عبير: طيب
ام عبير: مع السلامة... وسكرت من امها وراحت كملت
قعدتها مع خواتها ... اللي تخللها الضحك والحب والأخوة...
*******************************
بعد منتصف الليل وفي الوقت اللي اغلب الناس ينامون
التجأت للي ماينام ... بالثلث الأخير من الليل ...
صلاة ودعاء ودموع ورغبات ... توجهت فيها الى
الحي القيوم الذي لاتأخذه سنة ولا نوم ....
من قلب صادق وخاشع ... ارتفعت الأكف تضرعا
لرب العالمين وتقرباً لأكرم الأكرمين (اللهم يا حي يا قيوم ،
يا ذا الجلال والإكرام ، أسألك باسمك الأعظم الطيب
المبارك ، الأحب إليك الذي اذا دعيت به أجبت ،
وإذا استرحمت به رحمت ، وإذا استفرجت به فرجت ، أن
تجعلنا في هذه الدنيا من المقبولين والى أعلى درجاتك
سابقين ، واغفر لي ذنوبي وخطاياي وجميع المسلمين
اللهم اغفر لي وعافني واعف عني واهدني الى صراطك
المستقيم وارحمني يا أرحم الراحمين برحمتك أستعين
سبحان الله والحمد لله ولا إله إلا الله ، والله أكبر ولله الحمد ،
وأستغفرك اللهم عدد خلقك ورضى نفسك وزنة عرشك ومداد
كلماتك اللهم اغفر للمسلمين جميعا الأحياء منهم والأموات
وأدخلهم جناتك ، وأعزهم من عذابك ، ولك الحمد ،
ربي لاتذرني فردا وانت خير الوارثين
ربي لاتذرني فردا وانت خير الوارثين
ربي لاتذرني فردا وانت خير الوارثين
وصلى اللهم على أشرف الخلق سيد المرسلين محمد صلى
الله عليه وسلم وعلى أهله وصحبه أجمعين....)
دعاء من القلب .. تخالطه دموع التضرع ...
آآآآآآآآمين قالتها فاتن من قلب .... ومسحت على وجهها
قامت وانسدحت على سريرها ... ومازال لسانها يردد
الدعاء الى ان غفت عينها ....
بعد الظهر جا سعود يمرها تروح للبيت ... بس لزم عليه
ابو تركي يقعد للغدا ... بعد ماتغدو مشو لبيتهم ...
طول الطريق وهي ساكتة وماودها تتكلم وموفرة كل
كلامها لا اقعدو مع بعض ... وصلها البيت : انا بروح
الصلاة وجاي تبين شي اجيبه لك؟
فاتن: سلامتك بس..
سعود: يسلمك ربي
فاتن: ولا تتأخر ابيك بموضوع
سعود: الله يستر انا حاس سكوتك وراه شي
فاتن: لاتخاف الموضوع عادي اصلا روح لاتفوتك
الصلاة وبعدين نتفاهم..
نزلت وطلعت لشقتها ....بدلت ملابسها وصلت ودخلت
|