الحلقه العشرون ..
رحت قعدت ع السرير .. أفكر .. وأدعي يارب ما يصير شي لو صار جواهر المسكينه بتروح فيها .. أنا مدري هذي عقلها وين كان يوم تكلمه ,,
قعدت أتريا وأتريا ,, الين صارت الساعه 11 ونص ..
اتصلت بيوسف أسأله وينه .. ما رد عليه ,,
قعدت ع السرير أترياه ,, سمعت صوت باب الصاله ,, رحت ركض طلعت من الحجره ..
شفته قلت له : يوسف وينك تأخرت ,,
يوسف ياه صوب الحجره دخل ,,
قلت له : عسى ماشر بلااك متضايق ..؟؟
يوسف : نوره لو سمحتي .. لا ترمسين الحين لأنه راسي قاعد يعورني ,,
فضّلت السكوت أعرف انه يوسف يوم يعصب ينسى أمه وأبوه بعد .. حطيت راسي عسب أرقد .. شفته خذا ملابسه ودخل الحمام ..
دفنت راسي تحت البطانيه .. يارب مب شي جايد ,, بغيت أصيح فضلت السكوت ,, ما ياني رقاد ,, سمعت صوت باب الحمام وانتو بكرامه ينفتح ,, وجنه يوسف طلع ,,, ترييت ييي يرقد ,, بس للأسف ما حسيت بشي .. سمعت صوت باب الحجره يتصكر ,, لفيت ,, ما شفته أكيييد طلع ,,
قعدت ,, بغيت أتصل به ,, بس لأأأ بينازعني يمكن لأنه معصب ,, قعدت ,,, قلت أروح أقرا قرآن ,, تيددت وقريت قرآن ,, حسيت دموعي تهل وأنا أقرا مدري ليش ,, بس القرآن يريحني واااايد يوم أقراه ..
أول ما صديت وراي شفت الساعه هنتين ونص الفير ,, يوسف صار له ساعتين طالع ,, يارب استر وين راااح هالحزه ,,
فكرت شسوي أتصل بعمي .. لأأأأ أخاف يوسف ينازعني ,, شسوي يارب ساعدني ..
طلعت من الحجره ,, رحت الصاله ,, ما شفت يوسف .. وين رااااح هالحزه ,, فكرت أتصل به ,, توني برد الحجره سمعت صوت مفاتيح باب الصاله ..
لفيت بسرعه ..
استانست يوم شفت يوسف .. رحت صوبه ركض ,,,
بس فاجئني يوم أشر لي أوقف .. وقفت بمكاني .. خفت ليش سوّا جيه ,,
يوسف : كنتي تدرين ان جواهر ترمس واحد ,,
طالعته تميت ساكته ,, ما تحركت ,, بغيت أرد بس قال : بــاجر يصير خير ,,
وراح الحجره غير ورقد ,, يلست بمكاني مسنتره ,, الله يعين جواهر ,, أنا يهمني أنا شو يصير لي لأني مجرد أعرف وبس ,, اللي يسوي السواه هو اللي بياكلها يعني محد بينظلم غير جواهر الله يعينج ..
شفت تلفوني ياني مسج ,, رحت صوبه بسرعه ,, فتحت المسج قريته ,,
(( نوره الحقي علي يوسف درا ,, والله بيموتني ,,))
رديت لها : (( لا تحاتين حبيبتي بتفاهم وياه ))
واتريت ترد علي ما ردت .. رحت صوب الحجره عسب أرقد ماياني رقاااد الين الفير ,, بعد آذان الفير رقدت ,, وأنا أفكر يا ترى شو بيصير باجر ,,
قمت اليوم الثاني فتحت عيوني .. شفت يمبي ما شفت يوسف ,, تخرعت ,, شفت الساعه ,, وحده ونص الظهر ,, أويييه كل ها أنا راقده ,,
قمت بسرعه تيددت وصليت الظهر ,, عقب رحت تسبحت ولبست ,,, الين صارت اثنين خلصت ,,
نزلت ,, شفت الخدامه مسويه الغدا ,, زين لأني ما أعرف أطبخ ,,
طلعت رحت الصاله قلت بتصل بيوسف ,, توني بدق اتصال ,, الا وأسمع صوت باب الصاله يفتح ,,
شفت يوسف دخل قال : السلام عليكم ,,
طالعته ابتسمت : وعليكم السلام ,,
يوسف مشا بدون ما يقول شي ,, قلت له : تتغدا حبيبي ,,؟؟
قال : مب مشتهي ,,
وراح الحجره ,, استغربت شو سالفته من أمس بليل من ردينا من بيت عمي على هالحال ,, معقوله سالفة جواهر جذا مأثره عليه ,,
رحت الحجره ,, شفته محد .. سمعت صوت الماي .. أكيد دش يتسبح .. رحت قعدت ع السرير ,,
أفكر فيه ,, ودقات قلبي كل شوي تتسارع .. مدري خوف ولا توتر .. ولا شووو ..
طلع يوسف مبين عليه هلكان طالعني .. وما تكلم ,, راح لبس الجلابيه ,, وطلع
لحقته ,, شفته راد الحجره جنه غير رايه بشي ,,
دخل راح صوب السرير رقد ,,
طالعته قلت : حبيبي فيك شي ,,؟؟
يوسف : نوره دخيلج روحي مصدع لا ترمسين ,,
طالعته ولفيت بانكسار جنه خيبة أمل .. معنه كلامه حز بخاطري ,, بس أنا زوجته حبيبته شريكة حياته ,, وباجر بكون أم عياله ,, المفروض يشكي لي لو ما يشكي لي يشكي لمنووه ..
بس سمعت صوت وقّف الدم بـ عروقي ,, لفيت قلت : نعم ,,
يوسف : نوره لا تتضايجين من رمستيه بس أنا ما أحب أقول شي عن حياتي لأاي حد ,,
طالعته وسرت قعدت يمبه ,, دموعي كانت بتهل على حاله بس تمالكت روحي مب وقته الحين الصياح ,,
وقلت : بس يا يوسف أنا مب أي أحد أنا زوجتك شريكة حياتك ,,
يوسف حط راسه ع ريولي ,, أول مره أحس انه يوسف لهالدرجه تعبان وهموم الدنيا عليه ,,
مسحت على شعره وقلت : حبيبي ارمس بسمعك ,,
يوسف طالعني وقال : جواهر من صوب وخوالج من صوب ..
طالعته وقلت : يوسف خلنا من خوالي الحين بس جواهر عرفت غلطها ,,
يوسف : تعرفين يا نوره شو اللي سوته جواهر ,, كلمت واحد يعني خانت ثقتنا فيها ,,
طالعته وقلت : يوسف يمكن جواهر ما كان عندها أحد يسمعها راحت لهالدرب ,,
يوسف : انتي كنتي تعرفين انها تكلم واحد ,,؟؟
قلت له : عقب ما فهد درا خبرتني ,,
يوسف : وليش ما خبرتيني ,, ؟؟
قلت له : خفت تسوي بها شي ,, وبعدين هي عرفت غلطها خلاااص ,,
يوسف : والله مدري شسوي وياها الحين .. أذبحها أكفخها ,,
قلت له : يوسف .. الضرب ما ييب فايده ولا النزاع ,, نصيحه خذها مني أنا بنيه مثلها وأعرف ,,
يوسف طالعني بحيره ,, جنه محتار بحياته ندمان على شي ما يدري شو هو بالضبط ,,
يوسف قال : نوره خوالج كل يوم والثاني يطالبون ببيزات أمج ,,
قلت له : برايهم لا تسوي لهم شي ,,
يوسف طالعني محتار جني فهمته من عيونه وقلت : اذا خايف يسوون فيك مثل ما سوو في أبوي .. ما يقدرون .. يوسف خلاااص كل شي تطور .. ومستحيل يقدرون يسوون شي ,,
يوسف قال : نوره تدرين ورثكم من أمج كان باسم منو ..؟؟
شد انتباهي هالسؤاااال ,,,,,,,,, سنترت بمكاني بغيت أسمعه يقول باسم منو .
.
بس تلفون يوسف رن ,,
يوسف : آلو ... هاااااه ,,,,, اوكي خلاااص يااااي ,,,......... أقول لج يااااي خلااااااااص ..
بعد ما أنهى المكالمه طالعته ,, قال : قومي بسرعه البسي عباتج ,,
قمت البس عباتي سألته : لييييش ؟؟
يوسف : في الدرب بقول لج ,.,,
بسرعه نزل يوسف ونزلت وياااه راح ركب السياره وشغلها وتحرك ,,
سألته متخرعه : يوسف شو صاير ,,
يوسف : جووواهر ,,,,,,,,,,
قلت : بلاها جواهر ,,
يوسف : ياسر بيذبحها ,,
طالعته مدري عقلي طااار .. شو استوى بي ,, قمت أعد اللحظات متى بنوصل ,, معنه نوصل بيت عمي خلال غضون دقايق .. بس الحين أحسهم ساااعات ,,,,,,,
وصلنا بسرعه نزلنا ,, محد كان في البيت ,, سرنا فوق بسرعه ,, صوب حجرة جواهر ,,, سمعت صراخ ريال ,,
ياسر ,, : افتحي الباب .. وقسم بالله بفلعج يا جواهر ,,
يوسف راح صوب ياسر وقال : ياسر هدّي ,,
ياسر : كييييييف تباني أهدّي وهالحيوانه فضيحتها واصله للجامعه ,,
يوسف سحب ياسر بس ياسر راح صوب الباب وقال : يالحيوانه افتحي لاكسر لج الباب ع راسج .. ياللي ما عرفنا نربيج ,,
كنت واقفه بمكاني أشوف ياسر ويوسف ما باليد حيله ,,
يوسف صارخ : يااااااااااااااااااسر .. خلااااااااااااص أنا أكبر عنك وبتفاهم وياها ,,
ياسر : هاي اللي مب متربيه فضحتنا ,,
يوسف سحب ياسر ,, وقال : نوره دشّي عندي جواهر لتسوي بروحها شي ,,
يوسف نزل مع ياسر مدري شو بيقول له .. أما أنا رحت ركض صوب الباب ,,
دقيته وقلت : جواهر حبيبتي افتحي ,,
جواهر تصيح : ياسر اهني ,,؟؟
قلت لها : لأأأأ
جواهر : احلفي ,, بيذبحني نوار
قلت لها : والله لأأ بس انتي افتحي ,,
فتحت الباب دشّيت ,, وارتمت في حضني ,, وبدت تصيح ..
قالت : نوره بموووت ,,
قلت لها : بعيد الشر عنج حبيبتي ,,
جواهر : يعل ربي ياخذني وأفتك وأموت ,, فشلت خواني أنا ,,
طالعتها وقلت : جواهر ... حبيبتي هدّي ..
سحبتها ووديتها صوب السرير قعدتها وصبيت لها ماي ,, عطيتها ,,
طالعتني وبدت تصيح ,, مسحت دموعها وقلت : لا تخافين حبيبتي ,,,
سمعت صوت الباب ينفتح ,.. يوسف دخل ,,
جواهر على طول لوت علي ,, وقالت : والله آآآآسفه يوسف لا تذبحني ,,
يوسف طالعني وأشر لي أتركهم روحهم ,, بعدت جواهر عني ,, عشان أطلع .. بس مسكتني ,,
وقالت جواهر : نوره لا تطلعين ,,
طالعت يوسف اذا بيعارض ولا لأأأ .. يوسف أشر لي اطلع لي ,,
بغيت أطلع جواهر بدت تصيح بصوت عالي ,, وتقول : نوره بيذبحني تمّي حراااام ,,
طالعت يوسف .. وما عارض .. رحت قعدتها وقعدت يمبها ,,
يوسف طالعها ,, وجواهر قالت : والله أسفه ما بعيدها يووووسف والله ,,
يوسف طالع جواهر وتقرب منها ,, جواهر حضنتني وحطت ايديها ع ويها ,,
جواهر تصيح : نوره لا تخلينه يضربني ,,
بس يوسف سحب جواهر .. لدرجه حسيت انه بالفعل بيذبحها ,, وقفها على أطراف ريولها ,,
جواهر تمت تطالعه وتصيح ,,
عطاها هااااااااااااااااااااااك الكف الساخن اللي يحرق الويه ..
لدرجه حسيت روحي أنا بعد احترقت مع هالسطار ,, طالعت جواهر تصيح ,, صحت وياها ,, وحضنتها بعدتها عن يوسف ,,
جواهر صارخت بصوت عالي : مااااااا أحبكم أنا ,, ما أحبكم ,,
يوسف طالعني وقال : أنا بتصل في أمي وأبوي بقول لهم هاي بنوديها ويانا كم من يوم في بيتنا ,,
اعتقدت انه عمي ومرت عمي والعيال محد أكيد عسب جذا يوسف وياسر يفلعون البنيه ع كيفهم ,,
جواهر عارضت ... : مابي وياك انت بتذبحني ,,
يوسف طالعها بنظره حاده : اسكتي أحسن لج ,,
جواهر طالعتني وقال وهي تترجى : ما بي بيتكم مابي ,,
طالعته أشرت لها بمعني أنا بكلم يوسف ,,
يوسف طلع وعقب ثواني رجع داخل الحجره وقال : يلا تعالو السياره ,,
جواهر راحت وراي : مابي بيتكم مابي ,,
يوسف بعصبيه : جيييييييييه تبين ياسر يذبحج ويا سواد ويهج هاللي مسوتنه ,,
جواهر تمت تصيح يوسف قال : تعالي بالطيب أحسن لج ,,
لبست جواهر عباتها وهي تصيح وطلعت وأنا ميوده ايد جواهر .. رحنا صوب السياره ,, وركبنا ,,
طول الدرب يوسف كان ساكت ويدق أصابعه ع السكان بتوتر ,, طالعت جواهر حالتها حاله وتصيح ,,
وصلنا البيت نزلت مع جواهر ووديتها حجرتنا ,,
قلت : جواهر ارقدي ,, شوي عسب ترتاحين ,,
قالت : وين ييني النوم وأنا محد راضي علي ,,
طالعتها وقلت : كلهم بيرضون عليج حبيبتي انشالله .. بس انتي ارقدي ,,
جواهر راحت صوب السرير عسب ترقد رحت عندها تميت أمسح ع شعرها عشان ترقد .. الينما رقدت ,,
شفت انه أذن العصر من شوي وأنا بعدني مب مصليه رحت تيددت وصليت ,, ورحت الصاله ,,
شفت يوسف قاعد محتار ,, قعدت يمبه ,,
يوسف : شو تسوي ..؟؟
قلت له : رقدت ,,
يوسف : خليها ترقد وياج هـ الكم من يوم ,,
قلت له : انزين ,,
يوسف طالعني وقال : اسمحي لي نوار مقصر بحقج أنا بـ هالضروف ,, وانتي توج عروس ,,
طالعته وقلت : لأأأأ يوسف أنا زوجتك مهما تكون ضروفك لازم أتحملها وياك ,,
ابتسم يوسف ,, قلت له : حرااام ليش ضربتها ,,؟؟
يوسف : كنت بذبحها لو انج مب موجوده ويانا ,,
طالعته وقلت : حرااام عليك يوسف ,, ليش جيه عاد ,,
يوسف : نوره لو سمحتي لا تتدخلين بيني وبين أختي ,,
طالعته وقلت : يعني أنا غريبه ,, يوسف الضرب ما منه فايده أبد ,, حرام هالشي تعرف ,,
يوسف طالعني وقال : أنا طالع تبين شي ,,
طالعته وقلت : سلامتك ,, بتيي ع العشا ’,,؟؟
يوسف : هي انشالله ,,
طلع يوسف رحت شفت جواهر راقده ,, رحت المطبخ أساعد الخدامه يوم تسوي العشا ,, وخلصت على أذان المغرب ,, ييت تسبحت ,, وغيرت ,, عقب قومت جواهر عشان تصلي ,,
قامت وصلّت ,,
قلت لها : تعالي نروح الصاله ,,
جواهر : يوسف بيذبحني ,,
قلت لها : يوسف محد ,,
جان تطالعني وطلعنا .. شغلت التلفزيون ,, وقعدنا ,, سألتها : تقعدين على نور الإمارات ,, ؟؟
جواهر : هه وين ياسر ساحب عني كل شي ,,
طالعتها وقلت : بيرضى انشالله وانتي بتعقلين ,,
طالعتني بحسره وردت تطالع التلفزيون ,, أشفقت على حالها ,, هذي وعندها أهل وكانت بتضيع بس ربي ستر ,, عاد اللي ما عندهم أهل الله يستر عليهم ,,
قعدنا لما أذن العشا ,, رحنا صلينا شفت جواهر ساجده وهي تصيح ,, فرحت من قلب ,, يمكن هذا امتحان من رب العالمين ,, وجواهر بتكون قريبه من ربها ,,
خلصت صلاه وطلعنا رحنا الصاله نقعد .. سولفت ويا جواهر عن اللي صار لي في لبنان وكيف لبنان حلوه ,, وقلت الها الهدايا اذا عجبتها ولا لا .. خذتنا السوالف ,,
فجأه سمعنا صوت الباب ,, ينفتح ,,,
جواهر قامت عشان تروح ركض الحجره ,,
بس صوت يوسف وقفها قال : جـــواهر ,,
جواهر سنترت بمكانها وطالعت وراها وقالت : نعم ,,
يوسف : تعالي ,,
جواهر بدت تصيح : عشااان تذبحني ,,
يوسف : جواهر قلت لج تعالي لأيي صوبج واييبج من شعرج ,,
جواهر طالعته ونزلت يت وقفت وراي ,,
يوسف تقدم منا ,, جواهر تمكست بي ,, يوسف طالعنا نحن الاثنين ,, وأشر لجواهر ,,
جواهر ما تحركت من مكانها تمت خايفه وترتجف وتصيح ..
يوسف قال : أنا قلت لج تعالي يعني تيين فاهمه ,,
جواهر رفعت ريولها الظاهر انها قاعده تشيلها شيل من التوتر والخوف ,, تقدمت من يوسف ببطئ .. الواحد يوم يشوفها يقول رايحه لحبل المشنقه أو شي جذا ,,
وصلت صوبه ,, يوسف مد ايده جواهر ابتعدت عنّه ,, رحت أبي أحضنها عن يضربها ,, بس يوسف فاجئني لما حضنها ,,
طالعتهم مستغربه ,,
جواهر أبعدت روحها عنها وقالت : أنا ما أستاهل حبكم أنا خنتكم ,,
يوسف : جواهر تعالي ,,
جواهر تقدمت منه ورمت روحها في حضنه وبدت تصيح وتعتذر ,,
جواهر : سامحني يوسف والله آسفه ما أعيدها ,,
يوسف قال لها : جواهر أهم شي تتوبين وتطلبين الرحمه من ربج ,, وبعدين نحن بشر ,, دام ربنا يغفر ويسامح آخر شي نحن البشر نيي وما نسامح منو نحن عشان ما نسامح ..
طالعت جواهر ويوسف الظاهر يوسف راح يسألها ويطلع منها الكلام كله ,, فضّلت ما أسمع الكلام كلّه على بعضه ,, المهم يوسف رضا عن جواهر ,,
رحت أساعد الخدامه نطلع العشا .. طلعناه عقب رحت عند جواهر ويوسف ,, وطالعت يوسف باس جواهر ع راسها ,,
طالعتهم وقلت وأنا مبتسمه : تراني أأغــــــــــــار هههه ,,
يوسف طالع جواهر وقال : بسبتج مهمل حرمتي أنا وما صار لنا الا أسبوعين ,,
جواهر ابتسمت ,, ويت تساعدني نطلع العشا ,, طلعنا العشا وتعشينا ,,عقب العشا قعدنا شوي ,,
يوسف : أنا بسير برقد تصبحون على خير ,,
قلنا : وانت من أهله ,,
جواهر : يوسف ارقد في حجرتك أنا برقد في أي حجره عادي ,,
يوسف : لا لا ارقدي ويا نوره اليوم ..
جواهر طالعتني وقالت : مليت منها ,, وايد مرات رقدت وياها هههه ..
طالعتها وقلت : يسوف عاد خلها ترقد روحها وأشباح بيتنا ياكلونها ..
يوسف : صـــدقج ,,
جواهر جنها صدق زاغت وقالت : لأأ لأأأ خلاااص برقد ويا نوره أحسن لي ...
ضحكنا على جواهر ,, عقب شلينا العشا أنا وجواهر ورحنا الحجره ,, غيرت ملابسي .. وييت برقد .. جواهر طالعتني وهي راقده ..
قالت : نوره يوسف وايد حنون ومتفاهم ,,
قلت لها : هي أمس منو رمس على ريلي قال عصبي وما يتفاهم ,,
جواهر : هههه والله ما كنت أدري ,,
طالعتها ابتسمت وقلت : ارقدي تراني برقد .. وراي ريل هب شراتج لا شغله ولا مشغله ,.
جواهر ابتسمت لي وقالت : نواري تدرين ييسوف أول مره يلوي علي ,,
طالعتها وقلت : واااايد بنات عندهم أخوان جذا ,,
جواهر : هع يعني يوسف كان يستحي مني ,,
قلت لها : ارقدي وايد أحسن ,,
رقدنا ونشيت اليوم الثاني الضحى ,, مريت ع يوسف شفته راقد جان أروح المطبخ عند الخدامه أساعدها نسوي الغدا عقب ييت صليت الظهر ورحت أوعي يوسف ..
قومته عسب يصلي وصليت وتسبحت ولبست ,,
رحت أوعي جواهر ,,
قلت : جووااااهر قومي ..
جواهر ما ردت عليه تقربت عنها هزيتها ما قامت ,, حطيت ايدي ع راسها تخرعت ,,
رحت ركض ليوسف ,..
قلت : يوسف الححححححق على جواهر مدري شو فيها ..
يوسف ياااه بسرعه ,, ولمس راسها ,, تم يكفخها ,, ما ردت ,,
قال : البسي عباتج بسرعه ,,
لبست عباتي ,, وشل جواهر ورحنا السياره ,, ورحنا صوب المستشفى .. يوم شلّو جواهر وودوها الحجره .. عسب الدكتور يشوفها ,,
تمينا قاعدين برا نتريا جواهر شو مستوي بها ,, ترييت وترييت ,, وتميت أدعي شفت يوسف ,, وايد متوتر ,, طلع الدكتور ,,
طالعت الدكتور في البدايه ما رمس ,,
ردت لي الذكرى شرات قبل .. كنت واقفه بـ هالمكان وفقدت أغلى ناسي ,, وفهالمكان لي ذكريات وذكريات كلها مؤلمه ,,
طالعت الدكتور وأنا متخرعه شوي وبموت من الصياح وفي خاطري أقول له .. لا لا تقولها دكتور ,,
الدكتوره حطم كل شي أفكر فيه بس أسعدني يوم قال : هي بتدلع البنت ديه ,,
يوسف طاالع الدكتور : شو مستوي بها دكتور ,,
دكتور : مسخنه شويه وهي حساسه كتير الزاهر بتزعل كتير وبسرعه ,,
يوسف : دكتور يعني جواهر بخير ,,
الدكتور : آآآه كويسه الحمدلله بس حنومها لمدة أربع وعشرين ساعه عندنا لما حالتها بتستئر بنطلعها ,,
طالعت يوسف حسيت ردت لي الحياه ابتسمت ورحت صوب اليدار تساندت وتميت أدعي الحمدلله الحمدلله ,, جواهر ما استوا بها شي ..
وقفت يمب يوسف ودخلنا الحجره .. تطمنت على جواهر .. وقعدت وياها الين العصر ,, لما بدت الزياره ,,
يو قوم عمي ,, ومرت عمي أكيد يوسف خبرهم من قبل بس الزياره ممنوعه ,
قعدنا ويا بعض ,, وسولفنا حسيت جواهر صحتها صارت أحسن وايد عن الصبح ,, وبعدين هو حسب النفسيه .. ااذا النفسيه أوكي خلااااص كل شي أوكي ,,
لما سمعت صوت الباب ينفتح .. دخل ياسر ,, جواهر بدت تصيح وحطت ايدها على ويهها ,,
ياسر تجدم عنها ,,
جواهر بدت تصيح أكثر ,, ياسر تقرب ولوا عليها جواهر تمسكت به .. شكله رضا خلاااص أكيد يوسف اللي مكلمنه ولا هو بيذبح جواهر ,,
غريبين الأولاد كل يوم ولهم راي ووجهة نظر ,, بس غالبا وجهات نظرهم صحيحه مدري ليش ,, أحسهم يفكرون بعقلهم دوووم أما نحن نفكر بعواطفنا أكثر ..
مر اليوم مع جواهر اللي صحتها تحسنت وبليل ردينا البيت أنا ويوسف ,,, حسيت يوسف مستانس ,, أكيد لأنه لحق ع أخته قبل الضياع ,,
حسيت بتعب وهم وانزاح من ع قلبي .. وأخيرا جواهر سالفتها انحلت ,,
طالعت يوسف راقد لو انه واعي جان سألته ذاك اليوم عن سؤاله لي عن ورثنا ,, شو سالفته ,, ..؟؟
تميت أفكر الين ما رقدت .. قمت اليوم الثاني ع صوت موبايل يوسف ..
يوسف رد وقال .. : ابشر .. مسافة الطريج ونحن عندكم ..
ويوم طالعته سألته : بتطلع ..؟؟
يوسف : لا حياتي .. قومي تجهزي وخل نتريق بنروح بيت أبوي يقول يبانا ..
طالعته راح يتسبح .. تذكرت سالفة الورث ,, ترييت ورتبت اللبسه اللي بلبسها وجهزت الاكسسوار والسوالف ,, شفته طلع رحت صوبه ,,
قلت : يوسف حبيبي .. آآآآ ..
يوسف : حياتي أجلي السوالف الوالد مستعيل ,,
طالعته ورحت تسبحت .. طلعت وتجهزت وترتبت وحطيت ميكب عقب تريقنا ,, شفت الوقت أبد هب أوكي عسب أفاتحه بالموضوع ,,
وبعد الريوق طلعنا عسب نروح بيت عمي ,,
استانست نوعا ما .. وأخيرا جواهر مشكلتها انحلت وبسرعه سبحان الله .. كان ع بالي خوانها بيودرونها طول عمرها وبيعاملونها معامله سيئه ,, بس صار العكس سبحان مغير الأحوال ..
يمكن هالشي مكتوب لها ,, بس أهم شي الحين فهد .. يا ترى طاحت من عينه ,, ولا يحبها حب جما ولا يمكن يستغني عنها لو شو ما صار وشو ما سوت ..
وصلنا بيت عمي ,, نزلنا سلمنا عليهم استانست لما شفت عموري وعدول .. بكلم عمي اني بسكنهم ويايه ,, ابا أنا اللي أربيهم ,, أباهم يطلعون عليه في كل صغيره وكبيره ,,
لفيت شفت عموتي و ميثاني وعلايه ,, سلمت عليهن ,, ورحت فوق شفت جواهر تصيح ..
رحت ركض صوبها ..
قلت لها : حياتي شو فيج عسى ماشر ,,؟؟
سمعت صوت أحد يقول : فهميها الغبيه يمكن تفهم ,,
صديت طالعت وراي : هههه الجوهره اش حالج .. ؟؟
الجوهره : هب بخير ... أوووووف عيزت وأنا أفهمها .. تنياز هي و اللي ياينها أنا بنزل راسي عورني وجبدي لاعت ,,
طالعت وقلت لها : له له جبدج لايعه .. مبرووووووووك مقدما ,,
الجوهره : مليييييييييقه ,,, ونزلت ..
طالعت جواهر أضحك وقلت لها : أكيد حامل لأنها تعاملنا بطريقه هب أوكي ,,
جواهر ابتسمت : هي أكيد ,,
طالعته وقلت مستغربه : مب توج تصيحين ,, ؟؟ شاللي جلب ,,
جواهر : نورو تخيلي شو صار ,,
طالعتها شو بعدددددد ؟؟؟ الله يستر ,,
جواهر .. : فهد تقدم لي ,,
طالعتها وقلت : مبرووووك ..
جواهر : مب جذا السالفه ,,
طالعته وقلت : ليش شو رايج ,,؟؟
جواهر : تقدرين تقولين رافضه ...
طالعتها وفتحت عيوني .. وقلت : شو غبيه انتي ,, فهد ما ينرد ,, وبعدين ليكون تفكرين في ولد ييرانكم هذا ,,
جواهر : لاااااا نوار لا تفهميني غلط ,, بس أنا أحس اني ما أستاهل فهد ,,
طالعتها وقلت : ليييييش ..؟؟
جواهر : نوره فكري ,,. الولد يوم ياخذ وحده ياخذها وهي ما تعرف شي هو اللي يعلمها كل شي ,,
طالعتها : يعني ,,,؟؟
جواهر : نواري فهد خل ياخذ واحد ما عندها لا ماضي ولا شي ... أنا ما أستاهله ,, وبعدين هو يعرف عن سوالفي جيه تقدم لي ,,
طالعتها وقلت : ماله غير تفسير واحد ,,, يحبج يا جواهر وما يبا يضيعج من بين ايدينه ,,
جواهر : مستحيييل مافي حب صادق في هالزمن ,, يمكن يبا ينتقم ولا يأدبني ,,
طالعتها : يلا سخاااااااافه جواهر ... محد ينتقم من بنت خاله ,, وانتي بنت خاله ,,
جواهر : مدري يا نوره والله مرتاحه ,,
طالعتها وقلت : تعالي الله يخليج نروح المطبخ في خاطري حليب ,,
جواهر : وع ع ع مااااااالت عليج ,,
طالعته وقلت : والله مشتهيتنه واااااااااااااااايد ,,
جواهر : ليكوووووووووون ,, وغمزت لي ,,
طالعتها وضربتها : لا استريحي ,,, ,,
جواهر : مالت أبا أصير عمه احملي بسرعه ,,
ضربتها بالخفيف ,,: هي تراج ما بتتعبين ,, أنا اللي بهلك ,,
جواهر : يلا يلا بسرعه ,, سيري اشربي حليب عن يستوي بج شي ويوسف يزعل خخخخ
طالعتها : ملييييييييقه ,,
جواهر : هه أكيد حامل الجوهره قالتها قبل شوي هع ,,
طالعتها : ربي يكملج بـ عقلج ... يلا بسرعه ,,
نزلنا ورحنا أنا وجواهر صوب المطبخ ,, سمعتنا صوت واحد يرمس في التلفون ,, تجدمنا ,,
جواهر مسكت ايدي ,, : لا نواري أخاااف يذبحني ,,
طالعتها : شو انتي غبيه .. خلاااص كل تصرفاته معناها راضي عنج ,,
طالعتني : مدري .. يمكن لأني مريضه ,,
طالعتها ودزيتها ودخلنا المطبخ ,, طالع صوبنا وقال : بكلمك عقب ,,
طالعنا وابتسم ,, جواهر ما ابتسمت أنا عن نفسي ابتسمت ,,
وقلت : كيف االحال ..؟؟
ياسر : بخير ربي يعافيج حرمة أخويه ,, انتي اش حالج ,,؟؟
طالعته وقلت : بخير الحمدلله ,,
ياسر طالع جواهر وقال : ها اش حالج اليوم ..؟؟
جواهر : بخير ,,
ياسر يا صوبنا وجواهر بان عليها الخوف ,,,, لدرجه بغت تلصق فيني بس الحمدلله ما سوتها ,,
ياسر سحب خدودها ,, وقال وهو يضحك : يلا الحمدلله ع السلامه .. نورو شلوها وياكم انتي ويوسف عسب نفتك ههههه
طالعته وقلت : حرااام عليك عاد جواهر حبوبه ,,
جواهر ما علقت مدري ليش ,,, مبين عليها خايفه بعدها ,,
ياسر تقرب عن جواهر وكلمها بصوت واطي ,,, بس سمعت لأني قريبه عنهم ,,
قال لها بأسلوب حيوي : ان ما وافقت عالولد .. شوفي شسوي فيج ,,
طالعت عيونه وبلعت ريجها : لا لا بوافق خلاااص ,,
طالعها عطها كف ع الخفيف : أتمصخر فكري زين وترا الريال شاريج ,,
حسيت البسمه ردت لحياة جواهر ,, حسيتها استانست على كلام ياسر .. طلع من عيونها بريق فرح ,,
طالعت صوب ياسر ,, شافنا وهو رايح لصوب الثلاجه ,,
سمعنا صوت ميثاني من صوب باب المطبخ تركض ,,
دخلت وقالت : ايه انتي وين من ساعه أدور عليج ,,
طالعتها بغيت أضحك .. جواهر : موجوده ,,
ميثا تجدمت عنا وقالت لجواهر : وافقي ويا شكلج .. ع الأقل بنرقص مره ثانيه ,,
قلت : ميثوه ما يهمج الا الرقص ,,
قالت : هي حتى في عرسي برقص هع ,,,
طالعتها وأشرت لها شوفي وراج ,,
لفت وشافت ياسر تفشلت ,, راحت بسرعه صوب باب المطبخ عسب تطلع ,, ياسر كان قريب عنها لأنه
الثلاجات هناك ,,
ياسر قال لها شي بصوت واطي بس ما سمعته ,, لأنه نحن بعاد ,.,.
اللي حسيته ... انه ميثا وايد انحرجت مدري شو قال لها ,, ولو نسألها نو وي ميثوه تخبرنا بس تخبر جواهر .. اللي حسيته ياسر وميثا بينهم شي نظراتهم لبعض غير ... مب انه ميثا تكلمه في التلفون .. لأأأأأ بس اللي حسيته واحد من الطرفين صرّح بحبه للثاني ,, الله يهنيهم ,,
،،،،،،،،،،،،،،،،،،،،،،،،،،،،
مر الأسبوع .. وكانت آخر تطوراته جواهر وافقت على فهد .. الله يهنيها فرحت الها وايد .. وعرفت انه فهد المزوح والشيطون ,, واللي ياخذ كل شي بمزح ,, الا حبه لجواهر صادق وساسه قوي ..
أما ميثوه ما عرفت شو قال لها ياسر ما رضت تخبرني ,, بس مدري ليش متأكده ياسر يباها وهي تباه ,,
علايه والجوهره فحصو .. ثنينهم حوامل ,, عقبالنا هههه لا لا بس أحس روحي تو الناس مابي حاليا لأني أبا أكمل دراسه وأول سنتين مابي يهال ,,
صـــح جواهر ما بتعرس الا بعد أربع سنوات بعد ما تخلص دراسه ,, وغير انه فهد عمره وايد صغير ع الزواج 22 سنه بعده خل يعيش حياته شو يبا عرس وعيال وصدعه ههههه
،،،،،،،،،،،،،،،،،،،،،،،،،،،،
رفعت راسي نقزت وتخرعت ,,
طالعت صوبه : يوسف من متى انت اهني ,,
يوسف ياه وبند اللاب ,, من ساعه وانتي ولا داريه عني ,,
طالعته : هي ... انزين بغيت أسألك باجر بداوم ,,
يوسف : هي باجر أول يوم لج ودوامج المسا ترا ,,
طالعته وقلت : تدري حبيبي أنا وايد مستانسه ,,
يوسف : دوم انشالله حياتي ,,, حبيبي جيه اخترتي تدرسين ,, قانون ,,
طالعته : امممم أحب هالشي ,,
يوسف : شي راجع لج بس عقب هالوضيفه تعب ,,
طالعته واستانست : يعني انت موافق أشتغل عقب ...
يوسف : هي وشو المانع ,,
قلت له : الجوهره تقول حمد قال لها ما شي تشتغل ,,
يوسف : حرين في حياتهم وبعدين يمكن يخاف عليها وما يباها تتعب ,,
طالعته وقلت : يعني انت ما تخاف عليه وتباني أتعب ,,
يوسف : يعني لو تبيني أرفض انج تصيرين محاميه ترا عادي عندي ,,
طالعته وقلت : لأأأأأأأأأأأأأأأأ عاد الا هاي ,, هههه أنا مب مصدقه شقايل انت راضي ,,
يوسف : انزين حبيبتي أنا بظهر الحين شوي ,,
طالعته وقلت : الوقت متأخر ,,
يوسف : عندي شغيله وبرد ,,
طالعته : يوسف ممكن سؤال ..
يوسف : هلأأأأ ,,
قلت له : شو سالفه ورث ماماتيه ,,
يوسف : سالفه طويله وعريضه يوم برجع بقول لج اياها ,,
قلت له : درب السلامه حبيبي ,,
يوسف ابتسم لي الابتسامه اللي أتريا أشوفها طول عمري من شفاته ,, يوم تكون من خاااطر غير ..
حطيت راسي ,, باجر أول يوم جامعه الله يعيني رقاد ونشه من الفير ,, الله يعين ,,
رقدت تميت أتجلب وأتجلب ,, فتحت عيوني ع الساعه هنتين ,, شفت يمبي ,, تخرعت ,, يوسف محد وينه يوسف ,, ربي يستر ,,
طالعت كل صوب في الحجره ما شفته كل شي مثل ما هو الظاهر ما رد ,,
قال دقايق ويرجع ما بيتأخر ,,, تخرعت وطلعت الصاله ,,
سمعت صوت ضحكات ,, ركزت في الصوت ,, هذا يوسف ,, ليش الين هالحزه سهران ,, غير الكلام اللي قاعد يقوله ما يدش العقل ,,
تجدمت عنه بهدوء ,,, لما شافني أشر لي بايده أروح ,, بغيت أذبحه .. كل هذا وبعدك بارد ,,
طالعته بغيض ,, تقدمت عنه ,,, سكر التلفون ,,
ما تكلم تم يهز ريوله بتوتر حتى ما فكر يبرر موقفه لي .. رفعت ايدي وما حسيت بروحي الا وأنا أَضربه .. وأصااارخ : يووووووووسف حراااام ليش سويت فيني جذي حرااام عليك ..