منتديات قصايد ليل - عرض مشاركة واحدة

11-17-2011

الحلقه الثامنه عشر ..

ما حسيت بروحي الا وصوت جواهر تقول : نواري قومي نروح الصالون ..
فتحت عيوني بتعب طالعتها : همممممممممم خليني أرقد ..

تجلبت سمعت صوت جواهر : نورو نشّي يلا ماشي وقت بعدنا ما سوينا شي ..
طالعتها ..: أوكييييي ,,
قمت بتعب رحت تسبحت ولبست .. عقب الريوق .. وأكل الفواكه طبعا أونه بشره ما بشره .. ظهرنا من البيت رحنا الصالون ..

من يوم السبت للثلاث يوميا أروح الصالون حزة الصبح وما أرد الا بليل .. حسيته تعب وايد .. حمام مغربي ,, حلاوه .. قص شعر وصبغ وحف وتنظيف بشره وووووو سوالف مالها أول ولا تالي ..
وايد تعبت حسيت روحي بنتهي خلااااص انهد حيلي .. حتى راعية الصالون قالت المفروض من شهر أيي وأحضر الجلسات .. هذا أنا أسبوع واحد أو يمكن أقل هلكت عاااد لو شهر الله يعين .. ومرت الأايام جييييه ..

يوم الثلاث بليل عمي شلانا من الصالون عسب يردنا البيت في الدرب ..

جواهر : بابا مر دار الأزياء ..
عمي : أوكي ..
جواهر : نواري تنزلين ..؟

قلت لها وأنا ميته رقاد وتعب : لا مقدر خلااااص انهد حيلي انزلي روحج ..
جواهر : أوكي بس عطيني الفاتوره ,,

عطيتها الفاتوره وصلنا صوب محل الفساتين .. وعقب جواهر راحت شلّت الفستان مع الأشيا اللي وياه ,, وعقب مرينا ع خيايط المخاوير والعبي .. وخذيناهم .. ما نزلت حسيت روحي منهد حيلي .. ردينا البيت أول ما وصلنا سرت تسبحت .. مسحت جسمي بكريم راعية الصالون عطتني اياه ,, وعقب حطيت ع ويهي قناع بعد اهيه معطيتني اياه ..

بعد ما خلصت رقدت على طول مقدر أصبر أكثر .. حتى عشا ما تعشيت أشك باجر .. بنهزب من عموووه الا متأكده يعني ..

من النوم اللي فيني حتى ما حلمت ,, قمت اليوم الثاني على صوت جواهر وهي تقول ..
جواهر : نواري يلا الحنا ..
طالعتها وقلت وأنا معصبه : يعل يوم عرسج ألعوزج جذا وأقطع رقادج ..

جواهر ابتسمت بس بين في عيونها دموع قالت :اذا عرست أنا .. يلا يلا عن نتأخر لما الحنا تنشف عقب بنظهر من الصالون ...
طالعتها وقمت وأنا فيني كسل الدنيا كله .. : هممممممم مدري متى نفتك ,,

جواهر : نورو تحركي لأشوتج وأدخلج الحمام ...
وانتو بكرامه ..

رحت وأنا كلّي كسل رحت صوب الحمام .. تسبحت وطلعت لبست ولبست عباتي .. وتغشيت .. عسب محد يقدر يطالعني ,, نصايح عموتي ,, الله يخليها هههه .. رحت صوب جواهر وهالمره ياسر وصلنا الصالون .. نزلنا .. رحنا صوب الجلسات العربيه .. ويت الحنايه اللي متفقين وياها .. وماقصرت بدت بي .. ويت عقب ربع ساعه وحده حنّت جواهر ..

وهي قاعدع تحنيني طالعت جواهر وقلت لها : جوجو طالعي اذا حناي هب حلو خبريني أوكي ,,
جواهر : قبل ما أخبرج بفلعها اذا ما حنتج عدل ,,

طالعتها : هههه عن تسمعج وتفلعنا ,,
جواهر تطالعني .. : نواري وايد تغيرتي ,,

قلت لها : طبعا حرم الشيخ يوسف ..
جواهر : مالت ,,

قلت : جوجو كيف عرفتي ها ولد ييرانا اللي ترمسين عنه ..
جواهر تضايقت : هب وقته نورو ..

قلت : ارمسي يمكن أقدر أساعدج ,,
جواهر : والله مدري شقول لج ,,

قلت : جواهر .. لا تعتقدين اني بضرّج ,,
جواهر بدت دموعها تنزل ع الخفيف .. وقالت : أول مره دشيت الجات ,, واحد بدا يرمسني وطلعني من طوري ,, حسيته غير الشباب مدري ليش معني أحب فهد ..

طالعتها : أوكي .. وبعدين ,,
جواهر : عقب خذا ايميلي .. وبعد الايميل بفتره الرقم .. وعرف اني جواهر .. بنت ييرانهم ,, وجذا ,,

طالعتها : جواهر ما أصدق انه ينخرط عليج انتي ,, انتي عاقله وكامله ماشالله عليج مب ناقصنج شي ..
جواهر : يا نـــوره لا بد في الكامل نقصان ..

قلت : انزين فهد كيف درا ,,؟؟
جواهر : تراه ربيعه ..

طالعتها : ومالقيتي ترمسين الا ربيعه ,, وبعدين .,. انتي تعرفين ما في واحد في الدنيا يتزوج وحده يكلمها .. اهووه مو بس على انه عيب لأأأ يا جواهر .. انتي فكرتي قبل انه هالشي حرااام ..

جواهر تصيح : شو دراني طيش ياني ,, والحين شكلي بتحمل نتايجه طول عمري ,,
قلت : جواهر خلاااص لا تصيحين انشالله خير ..

جواهر : انشالله ..
الحنايه الهنديه : هادا سيستر مال انتي ,,؟؟
قلت : هيييه ,,

الحنايه : أنا يشوف فيه سيه أسان انتي فيه زواز ,,
ابتسمت لجواهر وقلت : سولفي وياها بتنسين ,,

جواهر ردت لي الابتسامه وبدينا نطالع نقشة الحنا ,, ونسولف مع الحرمه ,, الحنا شكله شي شي .. بمعنى الكلمه ,,

عقب ما خلصت الحرمه تريينا لما يجف .. وشلينا .. وحطت لنا الحرمه عليه نوع من الدهن عسب ياخذ لون غامج ,, وحاسبنا .. عقب تغشيت .. و طلعنا أنا وجواهر ,, وردينا البيت ,,

على طول رحت تعشيت ,, لأني بس كليت فطاير في الصالون ,, طلبناه من المخبز اللي جريب عن الصالون ,, وعقب العشا ,. طبعا تعشيت في الحجره .. ممنوع أحد يشوفني .. بس اللي عندهم واسطات خخخ .. حطيت راسي ع المخده ,, شفت جنطي اللي فيها ملابسي ,, غريبه ليش ما ودوهم حجرة يوسف ,, يمكن الخدامات باجر لما يفضى البيت بيرتبنها ,, رحت صوب الكبت فتحته ,, وطلعت البوكس اللي فيه أغراضي ,, الخاصه والغاليه نوعا ما ,, طالعت فيه ميداليه ,, شليتها .. ورحت قعدت ع السرير أتأملها ,, شفتها وشفتها ,, اندمجت مع الصوره .. قربتها صوبي .. وبستها ,, ضميتها بايدي وقربت ايدي من ويهي ,, هلّت دموعي .. وعبراتي خانتني .. ..

وينكـ ..؟؟ وينك يابوي .. تشوف بنتك عروووس فرحتها ناقصنها انت ,, وينك تيي وتجس نبضي اش كثر مستانسه وأخيرا بكون مع يوسف بس انت محد .. ليش يابوي تركتني ليش ,, ليتك معي بأحلى أيام عمري ليتك ,, تجي وتشوف بنتك تروح بيت ريلها ,,

مسحت دموعي .. وطالعت الميداليه ,, تذكرت لما كنّا في صحارى وتصورنا مع بعض وصورتنا انحفرت في هالميداليه ,, اش كثر كان يوم حلو ..
...... رديت مسحت دموعي ,, اليوم لازم ما أصيح باجر عرسي ,, هالشي بيأثر علي ,, لازم أكون قويه وأفرح .. غير الصياح بينفخ عيوني ويغيّر في تعاليم ويهي ..

حطيت راسي وأنا مرتاحه .. رفعت ايدي وحطيتها يدام عيوني .. قعدت أتأمل الحنا وهي مرسومه ومنقوشه
نقش على ايدي ,, معطيه ايدي منظر حلو ومحلتني وايــــــــــد ,, أحس العروس بدون حنا هب عروس الحنا تعطي بريق وشكل ثاني غير ..

قطع علي تفكيري صوت التلفون ,, طالعت الشاشه .. بلسم جروحي يتصل بك ,,. بسرعه رديت وأنا مستانسه ,,
قلت : هلا والله بـ ناعم العــــــود ..
يسوفي : هلا وغلا بالورد ,,

قلت : ها شو المعنويات ,,؟؟
يسوف : اسكتي لأيي أفلعج في الحجره عندج ..

قلت أوني زعلانه : أفا أفاااه .. زعلانه منك خلاااص .. قلت لازم انت تسألني شو المعنويات بس أشفقت عليك وقلت أسبقك ,, بس أنا الغلطانه ,,
يسوف : ازعلي واشربي من ماي البحر .. باجر غصبا عنج بتيين لي هههه

قلت له : يلا عاد باي ما تستاهل ,,
يسوف : لا لا لااااااااااااا شو بايه بعد ,, أنا مب مستحمل ما أطالعج تبيني ما أسمع حسج عاد بموت ,,
قلت : يعل عيني ما تبكيك يالغالي .. المهم ما بترقد ,,

يسوف : أشوووف تبين الفكه ,,
قلت : لا والله العظيم .. بس هلكانه أبا أرقد ,,

يوسف : ارقدي اليوم اقري اكتبي سوي اللي تبين باجر عندي يعني عندي ,,
قلت : ردينا على الطير يلي ,,

يوسف : ترا ها موضوعنا باجر ههههه
قلت : يسوووف شكلك تباني أنتحر ,,

يسوف : خلاااص باي حبيبي ارقدي وارتاحي عدددددل ,, أوكي
قلت : انشالله وانت بعد .. يلا في أمان الله ,,
يوسف : في أمان الكريم ,,

بعد ما انهيت مكالمتي مع يوسف .. طالعت التفلون ضميته لي .. من باجر مدري كيف بتكون حياتي معاك يا يوسف .. حياه يديده مليئه بأشيا مخفيه ما نعرفها ,, ضميت المخده لويهي ,, ورقدت ,,
ما حسيت بروحي الا والساعه عشر ونص ,,

الجوهره : نواري حبيبتي قومي يلا ,,
طالعتها : مابااااااااا ,, أول أختج والحين انتي ,,

الجوهره : بنتأخر ع راعية الصالون ,,
نشيت مفزوعه : هيييييييه اليوم العرس ,, يلا يلا الحين بنش ,,

قمت ورحت تسبحت ولبست .. عقب تريقت ,, فوووق طبعا ,, ورتبت أغراضي وجنطتي اللي باخذها وياي الفندق ,, وبعد ما رتبت كل شي ,,

الجوهره : هاا نواري خلصتي ,, ؟؟
طالعتها : هي ,,
الجوهره : بلاااج ..؟

طالعتها وأنا متوتره : خايفه وايد ,,
الجوهره : هههه عادي حياتي ,, كل وحده جذا يوم عرسها ,,

قلت : يلا نروح شكلنا تأخرنا ’’
الجوهره : تراها بتينا القاعه ,,
قلت : زين .. أحسن بعد عسب ما نتعب ,, يلا ازقري البنات ,,

الجوهره : لا البنات كلهن بيروحون صالون بافان في الشارجه ,, ما بييون ويانا القاعه .. بييون بليل
قلت : أهـــــــــاا عاد يلا مشينا ,,
الجوهره : يلا ,,

قلت : لحظه وين الفستان رتبت كل شي باخذه ويايه الا الفستان
الجوهره : جواهر حطته في السياره الصبح ,,

طالعتها : أهااا ,,, فديتها جوجو تعبتها ويايه ,,
الجوهره : أحسن عسب تتعلم حق عرسها ,,

طالعت الجوهره وابتسمت لها .. تذكرت سالفة جواهر .. فديتها والله ما تستاهل .. ربي يكون في عونها ,,
نزلنا ورحنا صوب القاعه ,, دخلنا القاعه ,, الجوهره قالت ندخل من باب أهل العرس ,, بس أنا أصريت الا ندخل من الباب الرئيسي ,, دخلنا ,, وبصراحه انبهرت من تصميم القاعه لأنه طررررر .. ومن فوق الين تحت أو بالأحرى القاعه عامها اللون الذهبي وفيه تدرجات البني ,, أذكر يسوف يحب اللون الذهبي فديته ,,

الجوهره : ها خلااااص طالعتي .. استانستي ,,؟؟
طالعتها : هي شكله طر الصراحه .. يسوف ذويق

الجوهره : هي وايد حلو .. يلا الحين نروح الحجره اللي بتتجهزين فيها ,,
قلت : يلا ,, تأخرنا وايد ع الحرمه ,,

الجوهره : مادري عنج .. كل شوي تعطلينا هههه

طالعتها وابتسمت .. ورحنا الحجره اللي بتجهز فيها ’’, ،، وعلى طول أول ما وصلنا الحرمه بدت بالسشوار ,, و عقبه ميكب ,, وآخر شي التسريحه ,, تأخرت واااااااااااااااااايد .. وأنا أتريا متى تخلص لأنه عظامي عورتني وأنا قارّه في مكاني ههههه ,,

بعد ما خلصت يت الجوهره وكانت جاهزه وطالعه طرررررطريشن ,,
قلت : جوجو بتغطين عليه ,,
الجوهره : ههههه خلّي عنج .. أشوف أشوف ,,

تمّت الجوهره تطالع الميكب والتسريحه عسب اذا فيه أي غلط أو شي مب عايبني تغيره الحرمه ,,
عقب وقفت عسب أطالع روحي .. شفت روحي الصراحه ما عرفت روحي ,, أحس روحي ملااااك غير غير بمعني الكلمه ,, بديت أدقق في ملامحي ,, حسيت روحي وايد تغيرت ,,

الحرمه قالت أروح البس الفستان ,, لبست الفستان الجوهره ساعدتني والحرمه بعد لأنه ثجيييييل وايد ,, عقب الحرمه رشّت اللمعه ع التسريحه ,, والجوهره لبستني الطقم ,, والحرمه ثبتت الطرحه ع التسريحه ’’ وحطت فصوص ع الفتحات والورد اللي في الحنا .. عيبتني الفكره .. وآخر شي تمت ترش اللمعه ع كل جسمي ,, وبعد ما خلصت ,,

الجوهره : ماشالله ماشالله أشوف اليوم ندوّر القمر ما حصلناه أثره يمبنا اهنيه ,,
طالعتها وقلت : ههههه عاد لا تبالغين ,,

وقفت لبست الكعب اللي طولني .. وااااااااااايد ,, طالعت شكلي في المرايه العوده ,, شفت روحي جني عارضه أو شي جذا من طولي ’’, ،، دققت في ميكبي شفته حلو وايد هب دفش على لون الكوشه .. تدرجات البني والذهبي اللي دارج عليه ,, وعيوني محدده وطالعه كشخه .. والتسريحه بعد حلوه .. شعري مرفوع وااايد ونازل من التسريحه فير .. شكلي غير غير ,, الفستان من بُعد كيلو يلق لق ,,

الجوهره : بسج يلا تعالي اقعدي هههه
طالعتها وقلت : خليني أستانس شوي عاااد ,,

الجوهره : الساعه سبع ونص الحين .. يلا عقب شوي بتدش المصوره وتبدا تصورج ,, أنا بروح صوب المعازيم ,,
قلت : لأأأأأأأأأأأأ .. لو تروحين ازقري البنات مابي أتم روحي ..

الجوهره : ماشي يلا ,, الحين المصوره بتيي ..

طلعت جواهر تميت قاعده روحي الين يت المصوره وتمّت تصورني .. سمعت صوت الدق والموسيقى .. أكيد بدو الناس ييون .. يا خوفي .. كيف أطلع يدام هالعالم كلهم ,, روحي والأنظار والأضواء مسلطه عليه ,, يارب استر ,,

وقعدت المصوره تخليني أسوي حركات ,, وأوقات جني تايهه .. كشخه ,, وتقول أحط ايدي جني سرحانه أو اني أحضن اليدار هههه ,,

تمنيت أطلع وأشوف الفعاليات اللي قاعده تصير بره ,, ملل اهني
مر الوقت وأنا طول الوقت قاعده مع المصوره الظاهر فيه غيرها يصورون بره هاي بس حقي خخخ زين أقضي وقت وياها ,, وعقب كم من ساعه دشّت الجوهره ..

الجوهره في ايدها مسكه : هاااج يودي مسكتج وعقب شوي .. تراج بتطلعين استعدي ,,
طالعتها وقلت : خايفه جوجو ..

الجوهره : نواري خلج قويه ,., وبعدين الا هي كم من دقيقه والناس ما بياكلونج ,,
قلت : انزين أوقفي يمبي يوم تزفوني ,,

الجوهره : لا شو تبين نخرب عليج ,, المهم ابتسمي كل شوي وطالعي الناس أوكي ,,
طالعتها وأنا أنافخ : انزين ,,

الجوهره : تعالي أعدل لج الروج ذاب ..

عدلت لي اياه وطلعت وقفت شوي بعيد .. وقالت تعالي شوي شوي ..

يودت المسكه وأنا أرتجف مدري شو صابني ,,. لحقتها .. الين وصلنا قريب الباب العود .. كنت أسمع صوت جري حصان .. ويوم وصلنا جريب الباب الجوهره ابتعدت عنّي .. انفتح الباب .. وصار صوت عالي واييييييييد صوت الباب يوم ينفتح ,.,
وأول ما طلعت حسيت ضوء قوي على عيوني .. طالعت المصوره واقفه يدامي بس بعيده بخطوات .. وقفت للحظه هاي أوامر الآنسه الجوهره .. فجأه بدا صوت يوسف وهو يمسي ع الجميع .. ويقول قصيده فيني ,, حسيت روحي مستانسه .. صوت يوسف يحرك كياني ويهز فيني أشيا وأشيا ,, أحبك يا يوسف ؟؟

تميت واقفه والناس كلهم يطالعون صوبي .. ثواني الا والا القصيده تنختم بكلمة زوجتي حبيبتي ..
بدا لحن هــــــــــادي وحلو وايد .. تقريبا هندي شوي .. بس وايد هادي وحلو ..
وبديت أمشي وأنا أطالع الناس وأرتجف .. وأبتسم لهم ,.. حسيت روحي بموووت من الخوف والرعب .. الين وصلت جريب الكوشه .. وساعدتني الفلبينيه يوم أشل فستاني شوي عسب أروم أصعد .. وقعدت .. حسيت الناس كلها تطالعني بس أنا ,.. كنت أطالعهم وأبتسم الهم .. وأرتجف في نفس الوقت ,, طالعت جواهر وميثاني يتجدمون مني .. ابتسمت الهن .. وبدو يتصورون ويايه ويسوون حركات دلع ,,
والناس بدو ييون يباركون لي .. ثواني الا ويبدا لحن موسيقي .. هااادي ..

جواهر يت صوبي ومسكت ايدي وميثاني معااها وعلايه والجوهره بعد .. ونزلوني من ع الكوشه ,, الكوشه ما كانت عوده وايد كانت استايل أجنبي ,, ووقفوني في النص وبدو يرقصون .. ابتسمت لهن على حركتهن الحلوه ,, وبدت جواهر تيود ايدي وتحركها ,, ما رقصت بس كنت أبتسم أو هم يحركون ايدي لأنه عيب عندنا العروس ترقص دفش خخخخ وعقب اللحن هذا ,,

شفت مرت عمي وعموتي ييون صوبي باسوني وسولفو ويايه شوي .. وعقب ردو قعدو مكانهم ,, طالعت صوب وحده يايه صوبي .. يت وباستني ,,

قلت : شوووووووووواخ ,,
شيخه : فديتج أنا مبروووووك حياتي ,,

قلت لها : الله يبارج في حياتج حبيبتي فرحتيني وربي ,,
شيخه : لازم يوم أدري عرس نواري وما أيي ,,

طالعتها .. وسولفت وياي شوووووي .. ونزلت ,,, وثواني الا والدي جي يقولون اللي يتغطا يتغطا ,, ارتبكت واااااااااااااايد عرفت انه خلااااص يوسف بيدش .. خفت وايد وارتبكت ,,

الجوهره يت صوبي .. وخلتني أوقف ونزلت شوي من الطرحه على ويهي ووقفت جريب عني في طرف الكوشه ,, يوسف دخل معاه عمّي ,,

ما كنت أطالع صوبه مدري ليش استحييييييت وايد .. وصل صوبي مع عمي ,, تجدم عني رفع الطرحه عن ويهي و يودني من جتفي بايديه وباس راسي .. وقال بهمس : مبروووك الغاليه ,,

مدري ليش حسيت برعشه خوف وبنفس الوقت أمان واستقرار..
عقب عمي باس راسي ,,
يت عموتي ومرت عمي صوبنا .. وسلمنا عليهم أنا ويوسف .. مرت عمي حضنت يوسف وحضنتني وتمت تصيح ,, بغيت أصيح .. بس كللللللللل شي بيخترب ..

ثواني الا والبنات ييون صوب عمي ويتصورون وياه .. وعمي قبل ما يطلع ياه وقف يدامنا .. باسني وبست راسه .. ويوسف بعد باس راسه ,,

عمي قال بهمس : دير بالك عليها عدل هاي بنت الغالي ,,
يوسف ابتسم وطالعني : لا توصي حريص ,,

وطلع عمي .. وهو يبتسم لنا ,, وثواني الا وعموري وعدول يدشون ومعاهم علاوي .. يو صوبي وباسوني .. مدري ليش نزلت لمستواهم ,, مب اني نزلت لأأأأ انحنيت وبستهم ..

وبعد أكييييييييد الفعاليات الرسميه وتقطيع الكيكه ,, والعصير وهالسوالف .. زفونا يوسف تم ميود ايدي هالشي وترني واااااايد ’, ، ورحنا الحجره .. ويت المصوره ,, وتمت تصورنا عاااااااااد خلونا ساكتين وايد أحسن .. عقب ما خلصت .. يوسف راح يشل الشنط صوب السياره .. الا هي جنطه وحده عسب الفندق ,, وأنا تمت الجوهره تساعدني أطلع الفستان وألبس مخوره ,, ولبست عباتي ,, وعمي دخل من باب أهل العرس ياه صوبنا ..

عمي : ها العروووس اشحالج ..؟؟
طالعته متلومه : بخير ربي يعافيك ,,

عمي : خوالج بييون الحين يسلمون عليج ,,
ترييت لما يو خوالي يسلمون عليه .. سلمو عليه مدري حسيت ملامحهم غير .. عاديه جدا ,, باين مستانسين يالله ربي يديم المحبه ,,

وعقب ما ظهرو .. زفونا صوب السياره ,, وبعد ما ركبنا السياره ,, يوسف تم يسوق وهو ساكت وأنا بعد كنت ساكته ,,

يوسف : مبروووك نواري ,,
قلت وأنا منزله راسي .. : الله يبارك في حياتك ,,

يوسف : ع الأقل قولي لي مبروووك ,,
تلومت وما رديت عليه جان يقول : جيه طلعتي الفستان ,, كان حلو عليج ,,

قلت في خاطريه بدينا جان أقول : ترا الفستان عوود وايد مقدر اروح الفندق وياه ,,
يوسف : هييييه ,,

وصلنا الفندق بسرعه ,,
ونزلنا يوسف عطا سويج السياره حق العامل ,, ويود ايدي ورحنا صوب الجناح ,, دخلنا .. يوسف قال ..
يوسف : يلا حبيبي دشي ,,
دشيت وتم هو ماسك ايدي ,,

على طول بعد ما دشيت رحت قعدت صوب القنفه ,, كنت لابسه عباتي والشيله ع جتفي ’’
يوسف ياه قعد يمبي .. وقال : نواري حبيبي لا تخافين خلااص أنا ريلج ,,

طالعته ما رديت عليه هزيت راسي بمعنى هيه ,, جان يرد
يوسف : متعشيه ,,

هزيت راسي بمعنى هيه ,, يوسف طالعني ويودني وحطا ايده ورا ظهري وقربني عنه وقال .........
يوسف : ارمسي .. شو كله تهزين راسج ههههه

حسيت روحي ما أروم أرمس جان يقول : شكله ماشي فايده هههه .. يلا أنا بروح بتسبح ,,
يوسف خذا ملابسه ودخل الحمام وانتو بكرامه ,, وأنا رحت صوب المنظره .. طلعت عباتي وعلقتها ,, وبديت أمسح الميكب بالكلينكس مزيل الميكب ,, خلصت بسرعه قعدت ع السرير ,, دموعي خانتني مدري ليش تذكرت ابويه واااايد ,, الله يرحمه ,, لو اليوم عايش جان استانس لي واااايد ..

ما حسيت الا وصوت يوسف يقول لي : نواري بلاااااج ..؟؟
مسحت دموعي بسرعه يوسف تجدم عني وقعد يدامي رفع راسي بايدينه وقال : نواري شو فيج ..؟؟
مارديت عليه وبديت أمسح دموعي ,, قال : خايفه ,, ؟؟

حركت راسي بمعنى لأأ قال : عاد شو فيج ..؟
قلت له : تذكرت بابا الله يرحمه ,,
يوسف تغيرت ملامحه بعد وقال : الله يرحمه ,, والله لو بيدي بعطيج فرحي وهمج أخذه عنج ..
طالعته وقلت : يلا أنا بسير بتسبح ,,
يوسف طالعني وقال وهو يبتسم .. : يلا بسرعه فيني رقاااد ..

.................................................. .................

رحت بفكري بعييييييييييد حسيت روحي مستانسه .. وأخيرا يوسف يمبي ,, مدري كيف أعبر عن وناستي ,, شي حلو اثنين يحبون بعض ويتزوجون وعقب تنتهي حياتهم بسعاده ,, وتكون دايمه للأبد ..

.................................................. .................

ما حسيت بروحي الا وأنا أفتح عيوني على ضو الشمس اللي داخل من بين الستاير ,, قعدت فتحت عيني بكسل ,, تذكرت انه أمس كان عرسي ,, طالعت يمبي .. شفت يوسف رااااااااااااقد ,, حليله شكله تعبان .. لازم كل مسؤؤليات العرس عليه لازم يتعب ,, قمت رحت تسبحت ,, وغيرت ملابسي ,, ورفعت شعري بطريقه مرتبه ,, وقعدت أعابل في التلفون أتريا يوسف ينش ,, قعدت أتريا وأتريا ,, ما نش بغيت استشور شعري بس بضايجه بالصوت .. جان أشوووف مجله ,, رحت يبتها وتميت أتصفحها وكان فيه موديلات وفساتين .. تميت أطالع الفساتين والأزياء ..

حسيت بصوت يوسف وفيه رقاد يقول : صبااااح الورد ,,
نزلت المجله وقلت : صباح النور ..

يوسف حضن المخده وحط راسه وغمض عيونه قال : يقولون الفل والياسمين ولا ورود الدنيا ,, هب صباح النور بس .. أسميج بخيله ..

طالعته ابتسمت : ههههه خلاص الفل والياسمين والجوري .. شو تبا بعد ..؟؟
يوسف ابتسم : هههه هي أباج جذا شطوره تسمعين الكلام ,,

قام وراح خذا الفوطه ودش الحمام وانتو بكرامه يتسبح .. رحت صوب السشوار وركبته واستشورت قذلتي ورتبتها من ورا ما سشورته ما يحتاي جف شوي وناعم ما يباله بس مشيته بالخفيف ... ورفعته رحت قعدت أشوف الأزياء ,,

ما حسيت الا ويوسف واقف يدامي .. يطالع المجله وياي ... جان يقول ..

يوسف : طر هالفستان صـــح ..؟
جلبت الصفحه بسرعه وقلت : لا تطالع عييييييب ..

يوسف : ههههه تغارين يعني ,,
قلت له : شو تتحراني ما أغار ..

يوسف : ههههه انزين أنا بتلبس وبطلبنا ريوق ..
قلت له : أوكي .. متى بنرد البيت ..

يوسف : الساعه وحده وحده الا ربع جذا ..
قلت : أوكي ,,

يوسف طلب لنا ريوق وتريقنا عقب .. أنا رحت صوب المنظره عسب أحط ميكب ,,
يوسف : لا تحطين ,, بدون ميكب أحلى ..
قلت له : عرووس وما أحط ميكب شو تباهم يقولون عنيه ,,

يوسف : ههههه حطي انزين خلاااص ,,
تميت أحط و حددت عيوني وبعد ما خلصت من الميكب ,, شليت ملابسي رحت غيرت .. وبعد ما خلصت طلعت من الحمام وانتو بكرامه ,, شفت يوسف وياه المجله ,,

قلت له : ليش وياك هالمجله ..؟؟
يوسف : حرمتيه مودرتني .. قاعد أدور غيرها ,,

طالعته قلت له بدلع : حراااام عليك يعني ما تباني أكشخ ,,
يوسف : مب ذابحني غير هـ الدلع ,, اكشخي أبوي خلاااص ما بنقول شي ..

رحت رتبت قذلتي كنت مخلصه خلااااص .. ولبست الاكسسوار وتعطرت ,,
طالعت يوسف من المنظره : ها شو رايك أوكي ..؟؟

يوسف صفر وياه صوبي لوا علي تلومت من حركته وتم يطالع من المنظره وترني وايد ,,, جان يقول ..
يوسف : لو أدري انج جيه حلوه جان خذيتج من انتي ياهل ,,

ابعدته عني شوي وقلت : لا تبالغ عاااد ..
يوسف ضحك وراح لبس كندورته ورتب شعره عقب وقف يدام المنظره عسب يلبس الغتره والعقال .. بعد ما خلص وتعطر قال : هاااا شو رايج في ريلج ..؟؟

قلت له : جنتل مان وربي ههههه
يوسف ابتسم ياه يودني من خدودي وقال : يلا البسي عباتج بننزل ..

لبست عباتي والجعب اللي بيسويني ناقه هع .. بس الدراعه طويله شسوي يعني ,, ههههه
ولفيت الشيله ,, ولبست الغشوه ,,

يوسف : ها خلصتي ,,؟؟
قلت له : هيه ,,

يوسف : شطوره حرمتيه تسمع الكلام تتغشى ,,
قلت له : تغار يعني ,,

يوسف : أكييييييد جيه تشوفيني ماكل لحم خنزير عسب ما أغار ,,
قلت : وع ع ع عليك يسوف لوعت بجبدي ,,

يوسف ياه صوبي وزخني من ايدي ونحن طالعين قال : هههه فديتج ,, يلا نسير ..

طلعنا ونحن نازلين نروح صوب السياره .. يوسف رمس الرسبشن .. عسب ييبون الشنط ,, ورحنا نحن السياره ,, تمينا قاعدين ويوسف يسولف ويطفر بي ,, لدرجه سويت روحي زعلانه ,, بس فديته يراضيني ,, عقب دقايق العامل ياب الشنط وحطهم وتحركنا عسب نروح صوب البيت ,,

تميت ساكته أسمع يوسف وهو يسولف وياي وأطالع ملامحه وطريقة كلامه .. غير عن قبل ,, أول غامض وعصبي بس الحين غير وايد .. أحسه قريب مني ,,

يوم عن يوم يكبر في نظري .. وحبه يزداد في قلبي ..
وصلنا بيت عمي .. يوسف طلع وطلعت أنا بعد .. قفل السياره برموت السويج .. وطالع صوبي .. ياه وقف يمبي وقال : وأخيراااااً نواري انتي خلاااص لي ,,,

تلومت واستحيت من طريقة كلامه ونظراته اللي تذبح ..
دخلنا البيت ,, شفت كلهم قاعدين .. الظاهر كانو كلهم يتريونا .. بدت عموتي ومرت عمي يببون ..
تلومت لأنه كل الأنظار صوبي معنهم الأهل بس ,, رحت صوبهم سلمت عليهم وبستهم ..

وشفت عمي رحت صوبه ,, بست راسه ,, صديت شفت عموري وعدول وعلاوي يايين ركض صوبي ,, انحنيت لمستواهم وبستهم ,, شفت البنات رحت صوبهن وسلمت عليهن .. عاد الله المستعان من ميثاني وتعليقاتها ,, ههههه

صديت شفت يوسف واقف يمب عمي وعمتي ومرت عمي ومستانس شكله ,,
جان توني أقعد .. الجوهره قالت : نواري افسخي عباتج ,,
جان أطلع العباه ,, وجواهر شلتها عسب تعلقها ,,

ميثاني تمت تهمس : ياااااااي متى أعرس ,, حلو العرس صح نواري ,,
الجوهره : ميثوووه شو هالرمسه صخي أحسن لج

وقعدو البنات ويايه وسولفنا ومرت عمي وعموتي سولفو ويايه عاد الله والنصايح ,, مالهم ما تخلص ’,,
تغدينا عقب الغدا قعدنا ويا بعض ,, وتذكرت العصر اليوم طيارتنا ,,

قلت : جواهر جنطة السفر مالي جاهزره ,,
جواهر : هي جهزتها .. ريلج ها ما كان جاهز خل يحمد ربه رتبت جنطته ,,

طالعتها وقلت : غصباً عنج وبعدين ما اسمح لج ههههه
جواهر : تغارين عليه يعني ,, ؟؟؟

قلت لها : أكيد ريلي حبيبي ما تبيني أغار عليه ..
ميثاني تغمض عيونها : خربتنا خربتنا ,, بعدني فتاه عذرا لا تسولفين جذا يدامي ,,

طالعنا ميثاني وضحكنا على تعليقها اللي يفطس من الضحك ,,
وعقب الجوهره أشرت لجواهر وميثاني بمعنى تعالو ,, وعلايه تمت ويايه ,,

قلت : شوسالفتهم ,,؟؟
علايه ما فيها حيل : مدري والله عنهم ,,

قلت لها : بلاااج ..؟؟
علايه : جبدي لايعه واااايد أبا أرقد ..

طالعتها وغمزت لها : هاااا يعني حامل ,,
علايه : مدري اليوم العصر خالد بيوديني العياده ,,

قلت لها : عاد مبروك مقدما ههههه ..
طالعت علايه ,, كانت تحب خالد من اهيه صغيره ,, ولد عمها هو ..وربي جمعهم مع بعض .. حتى أنا ويوسف .. ياربيييييييه اش كثر احبه مقدر أفارقه ,,

وعاني من خيالي صوت جواهر وهي تقول : نواري تعالي ,, عليوووه سيري الميلس ,,
لحقت جواهر قلت : شو تبين ,,؟؟

قالت : يوسف يباج ,,
استانست ولحقتها وصلنا صوب المطبخ ,, شفت يوسف ابتسمت له ,,

قال : تبيني نواري ,,؟؟
قلت له : لأأأ انت اللي بغيتني ,,

يوسف استغرب طالع جواهر قال : لأأأأ
جواهر : انزين ترا بابا يباكم في الميلس ,,

يوسف مشا وياي وجواهر تجدمت .. راحت صوب الميلس ,, تقربنا من الميلس ,,
دخلنا كان ظلمه ,, جان نسمع صوت يباب جوجو وميثاني المفلع ههههه

فتحت جواهر الليت وكانت مشغله أغنيه باللاب .. طالعتها مستغربه ,, حتى يوسف تم يطالع مستغرب ,, جان نشوف الصوب الثاني من الميلس كيكه كبيره مكتوب عليها .. مبروك للعروسين ,, نواري و يسوف ..
طالعت يوسف ابتسمت له حتى هو ابتسم لي ,’,

عقب جواهر والجوهره وميثاني ودونا صوب الكيكه ,, وخلونا نقطعها ويا بعض ,,
وحطو القطع في صحن .. وجواهر بالشوجه قطعت قطعه وقالت ليوسف يوكلني ..

وميثاني كان وياها الكام وتصورنا .. يوسف تم يلعوزني كلما يقربه يبعده أخر شي حلفت ان ما صخ ما باكل القطعه هههه .. عقب عطوني الشوجه وأنا وكلته .. حسيت الحركه حلوه ووناسه أمس سويناها بس كانت غير عن اليووم أمس كنت متوتره ومحتاسه أما اليوم لأأ على روااااأ على قولتهم ههههه ..

عقب الجوهره يابت عصير ,, وقالت حق يسوف يشربني .. وبدون استرو لحسن الحظ خخخخ ..
طالعته وقلت : ها بدون استرو عن تخيسني ,,

يوسف طالع الصينيه اللي فيها العصير وقال : هههه حلوه فكرة الورد ,,
جواهر : طبعا أختك سوتها ,, هههه

يوسف شربني العصير ,, عقب الجوهره قالت أنا أشربه ,.,
جان أقول : من نفس القلاص ,,؟؟

الجوهره : هي شو فيها ريلج يلا بسرعه ,, ههههه
طالعت يوسف توني بشربه قال : أبا من صوبج ,,

استحيت طالعته بمعنى البنات اهني شو هالرمسه جان يبتسم ويقول : لأأأأ من صوبج اللي شربتي فيه ,,

استحيت غير انه الكام قاعد يصور كل شي شربته بسرعه وأنا متوتره ومستحيه من سوالفه هههه ..
عقب قال : منو فيكن بتصورنا صور عاديه ,,

علايه هلكانه : أنا أعرف أصور عدل بس منهد حيلي ميثاني تعرف تصور عدل ,,
يوسف : ازقرو ريلها يوديها عنا عن تطيح وتبلشنا هههه

ضحكنا على كلام يوسف من زمان ما يمزح جذا ,, يمكن كان يمزح بس يدامي لأأأأ ..
ميثاني يت تصورنا .. جان يوسف يلوي علي من ورا .. استحيت وهمست : عيب البنات اهني ,,
يوسف طنشني وابتسم للكام وأنا معصبه ههههه ..

وجذا لما أذن العصر وراحو الشباب المسيد يصلون العصر وتمينا نحن البنات وصلينا في البيت عقب رحت شفت الشنطه اذا أغراضي ناقصنها شي ولا لأأأأ ..

رحت غيرت ملابسي ولبست بنطلون بيج وقميص أحمر عنابي شوي والنعال كعب أحمر خخخ وحطيت روج أحمر فاتح هو قلوز نوعا ما ورفعت شعري بقباضه حمرا ,, كنت حاطه ميكب بس خفييييف وايد الروج والجحال بس اللي باين هههه ..

توني بلبس عباتي .. سمعت صوت الباب ,,
رحت صوبه قلت : منوووه ..؟؟
...... : جواهر نواري فجي الباب شوي ..

فتحت الباب دخلت جواهر وقعدت ع السرير ,, قالت : نورو بليز يوم تسافرين لا تفكرين فيني أنا نسيت الحمدلله وانشالله ربي يحلها ,,

قلت لها : عفيه عليج أباج جذا شطوره ,,
سمعت صوت الباب اندق ثلاث وانفتح : ليش ما تفكر فيج ,, وطالع صوبي ابتسم ..

جواهر ابتسمت : قصدي مابي هدايا ههههه يلا أنا بطلع تبين شي ..
قلت : لا سلامتج ..

طلعت جواهر رحت صوب العباه مستحيه عسب ألبسها .. يوسف طالعني ابتسم ,,
قال : لايق عليج الأحمر مسكت الصراحه ,,

طالعته وقلت : استح لا تطالع ’’, ،،
يوسف تم يطالع ويقول : حرمتيه كيفي ..

لبست عباتي وقلت : بس هاي حجرتي جيه دخلت جذا ,,
يوسف : ههههه جب لافلعج الحين .. يلا البسي وتعالي تحت بنتأخر ع الطياره ,,

خذيت جنطة الايد وياي وخذيت الكام بعد .. ولحقت يوسف ..

نزلنا سلمنا على عمي وعموتي ومرت عمي والبنات واليهال .. حسيتهم مستانسين وبيفتقدون وجودنا يوم بنسافر .. الا هم أسبوعين ونرد انشالله ..

وعقب ما سلمنا عليهم .. عمي تجدم مني وقال : ديري بالج ع روحج ,,,
طالعته وارتميت في حضنه تذكرت أبوي وبديت أصيح وأنا حاضنتنه ,,

عمي رفع راسي ومسح دموعي وقال : نواري فديتج ليش تصيحين الا هم أسبوعين وتردون ..
طالعته ابتسمت له ومسحت دموعي ,,

يوسف : تامرون بحايه ..
عمي : سلامتكم بس ديرو بالكم ع روحكم وما وصيك على نوره ..

يوسف ابتسم لي وقال : في عيوني .. نواري ..... يلا نواري ,,

لحقت يوسف وطلعنا ركبنا السياره وتحرك .. وصلنا المطار بسرعه لأنه جريب شوي عن بيت عمي ..
نزلنا كنت ورا يوسف .. بس عقب رحت قعدت في الانتظار وراح خلّص اجراءات السفر والطياره .. ورد صوبي .. رحت وياه لسوق الحره وقال شو أبا اشتري .. ما خذينا وايد أشيا .. خذينا شوي .. عقب أعلنو انه الطياره بتقلع .. ردينا ورحنا صوب الطياره ,,

يوم نحن نركب يوسف كان ميود ايدي لأنه زحمه وايد غير انّه صيف والناس كلها تسافر ,, رحنا قعدنا ..
وربطنا الحزام ,, والطياره دقايق وأقلعت ..

يوسف طالعني وقال : خفتي ,,؟؟
قلت له : لأأأأ ..
يوسف : لازم حرم الشيخ يوسف ,., ما تخاف هههه

طالعته وقلت : ماخذ في روحك مقلب تصدق هههه
يوسف : تعالي جيه سويتي لنا فيلم هندي قبل ما نطلع اليوم ..
طالعته وقلت : ما يخصك ,,

يوسف طالعني وقال : نواري صخي .. عيب ..
طالعته : آسفه ,,

طالعني وقال : ههههه حياتي والله .. فديت اللي يخافون من ريايلهم ,,
قلت بهمس : يفداك كلّي وربي ..

يوسف ابتسم وقال : عيدي ,,
قلت : لأأأأ ليش نازعتني ..

يوسف : دلوووعوووه ,,
قلت : مب انت تقول حرم الشيخ يوسف ..

يوسف : نواري جيه تحت عيونج هالات ,,
تميت اتحسس عيوني وقلت : مدري ,,

يوسف : بس مسود تحت عيونج عدل ,,
قلت : يمكن من القعده ع الكمبيوتر ..

يوسف : عاد شكلي ما بخليج تقعدين ,, عليه مره ثانيه الا مره في الاسبوع
طالعته قلت بسرعه : لأأأأأ ..... أنا أ .......... وتذكرت انه سر جان أسكت ,,
يوسف : شوووه ؟؟

قلت : لا ماشي بس كنت بقول اني من زمان ما قعدت عليه عشان العرس ,,
يوسف : أشك انه كلامج صح ,,

طالعتها وقلت : شو يعني أجذب عليك ,,, بس أكيد من التعب ..
يوسف : يبالنا وقت الين ما نوصل ,,
قلت له : هي لبنان بعيده شوي ,,

يوسف : سرتي لبنان قبل ,,؟؟
قلت له : لأأأ بابا كان يسفرنا بس ماليزيا و مصر ودول الخليج هههه
يوسف : احمدي ربج انزين هههه غيرج ما يسافر ..

قلت له : هي الحمدلله .. انت سرت لبنان قبل ..
يوسف : وااايد ,,
قلت له : شي طيب ,,

يوسف : بناتهم طررررر ,,
طالعته بقهر : يا ريتني ما ييت عاد دول الخليج أحسن ..

يوسف ضحك : ههههه فديت الزعلانين ,,
قلت : سير خل اللبنانيات ينفعونك ..

يوسف تم يضحك علي ,, يت المضيفه وقالت : سي ، أهلين كيفكون ,,
يوسف رد : منااااح ,,

المضيفه : نائيصكون شي .. بدكون شي ,,
يوسف : لأأ خدمتكن في أي بي ,, مو نائصنا شييي ..

المضيفه : نحنا تحت أمركن امتى ما بدكون ايانا .. نجي ,,
وقعدت تدلي يوسف ,, انقهرت الريال يرمسها عادي .. ولا جنه صاير شي ..

قالت : المدام حبيبتك ولا زوجتك ,,
قالت زوجتك بطريقه حلوه خخ جان يوسف يرد : حبيبتي وزوجتي كمان ,,

المضيفه : اي الله يهنيكون مع بعد شكلكون عرسان جدد ,,
يوسف قال : أي جايين لبنان شهر عسل ,,

المضيفه : بتنورها ..

وتمت ترمس يوسف شوي حسيت روحي أغلي من العصبيه جني بركان ومهدد بالانفجار ..

يوم روّحت ,, يوسف شافني وقال وهو يبتسم .. : حلوه لااه عندها أسلوب ,,

طالعته وأنا كلي قهر وصديت ,, متعمد يقهرني هالانسان ويرفع ضغطي ,, يعرف شو نقطة ضعفي ..

طالعته وقلت : هي وايد حلوه لو تباها خذها بعد .. وصديت عنه ,,

يوسف تم يضحك ويقول اني هبله .. ما عبرته ,, عقب ساعات يوم الطياره تهبط ,, ربطنا الحزام وحزامي ما طاع ينربط ,,

جان أطالع يوسف وأقول : أوييييييه هب راضي ينربط ..
يوسف طالعني ضحك وقال : أحسن هههه

طالعته وأنا معصبه : هاللي يهمك يعني أوكي .. ما عليه ,,
يوسف طالعني وقال : ما بربطه الا يوم تقولين حبيبي آسفه ,,

قلت له : ع شو بعد أتأسف ,,
يوسف : لأنج زعلتيني قبل شوي ..

قلت له : هي مبين ,, روحك طفرت بي وقهرتني وآخر شي أنا أتأسف ..
يوسف : خلاااص برايج ,,

ومره ثانيه قالو خلاااص الطياره بتهبط ,, طالعت يوسف وأنا متخرعه وشوي وأصيح ..

مسكت ايده و قلت : يوسف اربطه .. والله آسفه حراااام بموت ..
يوسف ساعدني ربط لي اياه وقال : حياتي ليش تخافين ,, ما في شي يخوف ..

طالعته : هي ليش أخاف ,.. تباني أموت وما أخاف ,,
يوسف : ههههه غبيه ,,

قلت له : محد غيرك ,,
يوسف : تراني بفتح لج اياه ,, وبفرج من الدريشه ,,

قلت : اذا الدريشه تنفتح يعني الطياره والناس اللي فيها بيطيرون هع ..
يوسف : خلي معلوماتج حقج ,,

طالعته وقلت : حبيبي ما بتغشى في لبنان ,,
طالعني وقال : شوووه ..؟

تخرعت قلت يمكن يباني أتغشى ,, نزلت راسي وقلت : اللي يريحك ,,
يوسف : لا لأأأ الكلمه اللي قبل ,,

طالعته وتذكرت تلومت الصراحه بس قلت له : ما بتغشى في لبنان ,,
يوسف ابتسم جنه فهمني وقال : هي محد يتغشى اهناك عادي .. وبعدين انتي امبونج ما تتغشين ,,

قلت له : بس انت اللي قلت تغشي ,,
يوسف : هي يوم نرد الامارات من فوق الين تحت أباج أسود ههههه أغااار ,,

طالعته وقلت : أونك عاد ,, عاد مو لهالدرجه ’’, ،،

وهبطت الطياره في لبنان ,, نزلنا .. ويوسف خلص اجراءات المطار والسفر ,, وهالسوالف عقب ياه يود ايدي وطلعنا ,, بصراحه المكان يخبل بمعنى الكلمه .. حتى يهبل شوي عليه ,, حسيت روحي في بلاد برا ,, لهالدرجه المكان حلو ..

عقب يوسف اتصل مدري على منو بس الظاهر مأجر سياره وفي واحد طول هالأسبوعين هو اللي بيودينا ويردنا ..

ركبنا السياره ورحنا صوب الفندق ,, طول الوقت كنت أطالع برا ,, الجو وااااااااايد حلو .. أحلى عن صيف الامارات بس بعد الامارات حلوه بحرّها وبردها وفي كل حالاتها ..

وصلنا ونزلنا الفندق .. رحنا الجناح ,, ويوسف بعد ما العامل دخّل الأغراض راح قعد عالقنفه ,,

قال وهو يمسح راسه : أووووف تعبت ,,
قلت : هي القعده ممله في الطياره ,,

طالعني وقال بخبث : بس المضيفه ما حسستني مووول بالملل ..
صديت عنه ,, ورحت صوب الشنطه أطلّع لي ملابس عسب أتسبح ,, سمعت يوسف يقول ..

يوسف : فديت اللي يغارون ع رياييلهم ,,
ما رديت عليه .. وقلت : اتصل بـ عمي قول لهم وصلنا ,,

يوسف : هي كيف راحت عن بالي ,,
دشيت الحمام أتسبح وانتو بكرامه وأنا مقهوره ليش يوسف يحب يضايجني دوووم ..

طلعت وأنا شعري مبلل ,, يوسف قال : الوالد سلّم عليج ,,
قلت له وأنا رايحه صوب المرايه ,, : الله يسلمه من كل شر ,,

يوسف ياه من وراي ,, مسك الفوطه وحطاها على شعري وتم يطالعني من المرايه وقال ,,
يوسف : حبيبي جففي شعرج قبل لا تمرضين ,,

ابتسمت له رد لي الابتسامه وشل ملابسه عسب يتسبح ,, ومشى وهو يطالع صوبي ..
عقب تميت أطالع برا من الدريشه صح انه ليل ,, بس بعد الجو حلو والمنظر خلاب وااايد ,,
تقريبا الحين جريب الفير ,, الوقت راااح بسرعه ونحن في الطياره ,,

ما حسيت الا ويد تمسك جتوفي ,, : ها حياتي ,, ما تاكلين ,,
طالعته وقلت : مب يوعانه كليت في الطياره ,,

يوسف : أكيد ما تبين عشا ,,
قلت له : والله العظيم ولو شريت ما باكل لأني هب يوعانه ,,

يوسف ابتسم : على راحتج يلا ارقدي باجر ورانا حواطه ,,
طالعته : هي الله يستر هههه ان ما فلستك ,,

...........................

قمت من النوم طالعت حواليني شفت يوسف راقد ,, وحالته حاله .. تعبان وايد أخاف يمرض ..

قمت رحت تسبحت ولبست وكشخت ,, لبست بنطلون جينر وقميص أسود مع رصاصي وأبيض .. ورديت شعري كله على ورا ورفعته و رفعت قذلتي بطريقه حلوه .. رحت صوب الدريشه طالعت برا ,, الفندق هذا يطل على حدايق كلها خضره وأسواق ,, مدري ليش يوسف ما حجز لنا صوب البحر أحلى ,, طالعت وراي شفت يوسف بعده راقد ,, رحت صوب علبة الميكب ,, حطيت فونديشن خفيف ومسحت ويهي بالبودر عسب يتساوى لون البشره والفاونديشن يلمع .. وحطيت جحال خفيف .. وقلوز .. عقب لبست طقم خفيف ونعومي .. شفت صوب يوسف بعده ما تحرك راقد ..

حسيت روحي ميته يوووع .. رحت صوب الثلاجه عسب أشوف شي أكله ,, ما عيبني شي ,,
ركزت عدل طالعت في الثلاجه .. غرشه شكلها غريب ,,

ركزت وركزت .. أوووووه هذا ويسكي ,, غربلات اليهود ,, غريبه شاللي يايبنه اهني ,, حاولت أعرف تذكرت انه في الفنادق يتواجد بكثره هالشي ,,
رديت قعدت ,, آخر شي مليت رحت صوب السرير قعدت وتلحفت ,,

يوسف ما حس اني ييت يمبه بعد ,, صدق هالانسان نومه ثجيل .. الله يعيني عليه .. بس في كل الحالات فديته فديته فديته ,, وتراني أدل بيته ههههه

آخر شي نفذ صبري .. وهزيته ,, قلت : يوسف ,, يوسف حبيبي قوم ..
تحرك وما رد عليه قلت : حبيبي يسوف قوم .. يعت تراني بموت يلاااا قوم ..

تحرك وغطّا روحه بالبطانيه وقال : هممم خليني أرقد ..
شوي وأصيح : يوسف قووووم ملييييييــــــــت حراام ..

يوسف قام وكلّه رقاد : انزين انزين ,,
قام وشل اللحاف عنه بطريقه غجريه لدرجه تحركت ورديت ريوس ع السرير زين راسي ما دق السرير ..
خفت منه وايد ..

قال : أوووووف ما تخلين الواحد يرقد بعد ,,
أول مره يعاملني جذا ,, وهذا ثالث يوم زواجنا عاد عقب الله يعين دام البدايه جذا ,,

قعدت حسيت دموعي بتنزل .. ليش يعصب علي بس لأني وعيته من الرقاد ,, طالعت الساعه شفت الساعه هنتين ونص الظهر ,, بسه رقاد ..

يودت روحي ,, ترييت تميت قاعده أترياه ,, طلع من الحمام وانتو بكرامه وراح يلبس ,,
تميت صاخه وما أرمس ,, طالعني قال : شو فيج ,,؟؟