منتديات قصايد ليل - عرض مشاركة واحدة

11-17-2011

الحلقه السادسه عشر ..

قطع علي تفكيري ..صوت جواهر وهي داخله ..
جواهر : هلا والله بالعروس هلا ,,
قعدت عدل .. : هلاأأ

جواهر : سوري خربنا عليج لحظتج الرومانسيه ,,
ابتسمت لها : لا عادي .. تعالي ..
جواهر : ها شو الحياه اليديده ,,

قلت لها : حلوه عسل ع قولة الجوهره هههه
جواهر : أميييه أميييه خربتني البنيه ,, هههه
قلت لها : انتي اللي سألتي ,,

جواهر : خبريني يلا شو قال وشو سوّا ..
قلت لها : هااااااه شوووه ما سمعت ,,؟؟
جواهر : خبريني كل شي بالتفصيل ,,

طالعتها وقلت : هاللي ناقص .. بنات آخر زمن .. يوم تملجين تعالي قولي لي حبيبج شو قال لج أوكي ..
جواهر : لأأأأ أنا ما أخبر
قلت لها : أشك الصراحه ,, وأنا بعد ما أخبر ,,
جواهر ترفع ايديها : يالله متى أعرس ,,

قلت لها : ههههه لاحقه ماماتيه بعدج ياهل ,,
جواهر : متى العرس انزين ..؟؟

هالشي اللي ما فكرت فيه وما حسبت حسابه بعد .. كيف راحت عن بالي ..؟
رفعت جتوفي وقلت : مدري والله ,,
جواهر : انزين .. خلاااص بابا قال يوم الثلاثا بنروح صلاله ..

قلت لها : زين ,, يلا عاد يبالنا نتجهز ,,
جواهر : اعتبريه شرات شهر العسل للملجه ,,

طالعتها : ههههه أوكي أفا عليج ,,
مر اليوم بسرعه .. يوسف ما كان موجود ع العشى ,, وبليل اتصل بي رمسني نص ساعه .. حسيت بقربه منّي ,., حسيت بحبي له كلماله يزيد ويزيد ,,

يوم الجمعه يو عندنا .. عموتي وميثاني ع الغدا استانسنا وياهن واااايد ,,
المغرب روحو .. رديت الحجره رحت تسبحت ولبست .. وعقب صليت المغرب ,,

عقب الصلاه سمعت صوت باب الحجره يندق ,,
جان أقول .. : منو ..؟
...........: ممكن أدش ..

فرحت يوم سمعت صوته اليوم كنت مشغوله وايد مع عمتي والبنات ,, رحت صوب الباب ,,وفتحته ,,
قلت : هلأأأ
يوسف : أهلين اشحالج ,,.؟؟
قلت : تمام ,, ومن صوبك ,,؟

يوسف سند راسه ع الباب .. : هب بخير ,,
حسيت روحي فزعت تفاجئت ,, قلت : له له عسى ما شر ..
يوسف : حبيبتي اليوم ما اتصلت بي ولا سئلت عني كانت مشغوله بناس غيري ,,

استحيت الصراحه جان أبتسم وقلت : يوووووسف ..
يوسف : ههههه خلاص انزين لا تعصبين ..

طالعته ابتسمت له جان يقول : يلا بس بغيت أتطمن عليج ,, أنا ظاهر تبين شي ..؟
طالعته وقلت : سلامتك ,,
يوسف : حشا تبين الفكه ماقلتي ها ريلي أباه يتم ويايه ,,

استحيت منه وصديت الصوب الثاني ,, وبديت ألعب بأصابعي ..
يوسف : ههههه انزين خلااص ,, بتصل بج ع الساعه عشر ,,
طالعته وقلت : انزين .. الله وياك

رووح تميت أطالعه الين اختفي عن عيوني ..
كان في خاطري يا يوسف أقول لك تم ويايه طول عمرك ... لا تفارقني لو دقيقه بعد ..
رجعت فريت روحي ع السرير ,, دعيت ربي يحفظ لي يوسف ..

قمت من ع السرير ,, رحت صوب السده فتحتها .. شفت الروج .. حطيت شوي .. مدري ليش بس عبط ,,
رحت صوب الستاره ,, فتحتها شوي ,, ركزت شفت سيارة يوسف ..

الظاهر توّه ظهر من البيت ,, الله يحفظك ويرعاك وين ما تروح .. يا يوسف يا غناتي ومنيتي ,,
نزلت سولفت مع جواهر ,, وتعشينا .. عقب العشا .. شفت الساعه عشر رحت صوب التلفون ,,
أتريا اتصالك يا يوسف .. قعدت ع السرير أحك في ايدي وأتريا يوسف يتصل كل شوي أطالع صوب التلفون

,,
ترييت الين صارت عشر بالضبط .. قلبي فز ,, طالعت صوب التلفون ترييت اتصال يوسف ,, ترييت وترييت ,, الين صارت عشر وخمس ,,

حضنت التلفون وأنا أدعي يارب يتصل الحين ,,
طالعت صوبه وكل شوي أطالعه .. ما اتصل بي ,,
شفت الساعه عشر وربع حسيت قلبي بيوقف من الخوووف ..

اتصلت به ما رد عليه ,, خفت أكثر وأكثر .. اتصلت به بعد .. ما رد عليه ,,
الين صارت عشر ونص ,,

سمعت صوت التلفون ياني مسج ,,
قلبي فز .. وسحبت التلفون بسرعه ,, زين ما طاح ,,

شفت مسج من .. بلسم جروحي ,,
( حياتي أنا مابيي اليوم عندي شغل .. برد باجر بليل .. )

دمعت عيوني .. كل هذا وأترياك آخر شي ما تيي ,, شو شغله هذا بعد اللي ظهر لنا ..
رديت راسي لورا .. الله يحفظك يا يوسف .. بس ليش خوفني عليه جان يخبرني من أول ,,
بس الغايب معاه عذره .. يمكن فيه رياييل يمبه ,,

رقدت على أمل أنش وأعيش يوم أحلى عن اللي قبله ,, وغير عن اللي قبله ,, ملئ بالحياه .. خالي من الهموم والمواجع ..

قمت اليوم الثاني الظهر تسبحت ولبست .. وصليت نزلت أتغدا ,,
قلت : السلام عليكم ,,
عمي : وعليكم السلام هلا بعروسنا هلا ,, ...

الصراحه قمت أستحي على أي جمله تنقال الحين .. وقمت أحاسب وأخيل على تصرفاتي أكثر عن قبل ..
ياسر : مبروك حرمة أخويه ..
طالعته ابتسمت له : الله يبارك فيك ,,

قعدت أتغدا ,,
عمي : ياسر اليوم بليل يوم يرد يوسف انت سير عسب تجابل الشغل ,,
ياسر : بس أنا وراي جامعه ,,

عمي : عادي تقدر تاخذ يومين اجازه ,, حق تايلند خذيت اجازه ,,
ياسر يتنهد : انشالله .. يسوف بيسافر وياكم ,,
عمي : هي انشالله .. بس اذا الشغل توقف قال ما بيسافر ويانا ,,
ياسر .. : على خير انشالله ,,

يوسف لأأأ يوسف تعال ويانا .. أنا ما أروم أفارقك وانت في نفس البلاد .. عاد اذا رحت بلاد ثانيه شو بيصير .. يوسف لا تخذلني تعال ويانا ..

مر اليوم وأنا أفكر يوسف بيي ويانا ولا لأأأأ يا ربيييه ما اروم أعيش بدونك يا يوسف ..
خلاااص انت صرت لي عالمي ودنياي وكوني كلّه ..

رقدت وأنا أفكر بك يا يوسف .. أفكر في حبك ,, اللي تربّع و سِطا وسط الحنايا ,, أفكر في غرامك اللي ماكلني أكـــل .. ومسهرني الليل .. وينــكـ يا يوسف رد .. بسرعه مشتاقه لكـ موووت ..؟؟

رقدت وأنا كلّي أمل في شوفتك بكره ,, والله في غيبتك أعيش هموم ومعاناه ,,
قمت من النوم وأنا مستانسه ,, اليوم بشوف يوسف أمس بليل رد ,, يااااي اش كثر مستانسه .. برجعتك يسوفي ..

رحت تسبحت ولبست وكشخت ,, طلعت برا الحجره شفت جواهر قاعده ,,
استغربت ليش ناشه جواهر مبجر اليوم .. طالعتها : صباح الخير ,,.
جواهر : صباح النور ..
سألتها : تريقتي ولا لأأأأ

جواهر : الحمدلله تريقت ..
نزلت أتريق وأنا أفكر يوسف رد ولا لأأأأ يارب يكون رد ما أتحمل بعاده أنااااا .. صار مثل الهوا فـ حياتي اللي لا يمكن أستغني عنه ,, صار أنفاســـــي باختصار ..

خلصت ريوقي .. نشيت رحت فوق .. شفت جواهر وعدول قاعدين ..
رحت قعدت ع القنفه وشغلت التلفزيون وقلت : شو السالفه .. ع شو متيمعين ..؟؟

عدول متضايج : نوار اسمعي جواهر شو تقول ,,
قلت له : شو تقول هاي بعد ،، حتى انت حليلك ما سلمت من لسانها..؟
جواهر : أصلاً هي تقرب لي قبل ما تقرب لك ..

عدول معصب وينفي .. : لأأأأأ أختي أنا هب أختج سمعتي ,,
جواهر : لأأأأ تقرب لي قبل ما تقرب لك إنت ..
عدول شوي ويصيح : نواري سمعيها شو تقول .. أصلا انتي أختي أنا أكثر صح ..؟؟

قلت له وأنا أبتسم .. : هي حبيبي ,, وانتي ايه .. صخّي بلاج حاطه دوبج بدوب الياهل ..
جواهر تطالع عدول وتطلع لسانها : امممم ... أصلا هي حرمة أخوي قبل ما تستوي أختك ..

طالعتها فريت عليها الفروحه .. وقلت : صخي أحسن لج ..
عدول : أصلا انتي غبيه .. هذاك الأسبوع صارت حرمة يوسف .. أنا كنت قبل أخوها ..

جواهر تنفي .. : لأأأأأأ ،،، أصلا نحن نباها حق يوسف من قبل ما تنولد من يوم كانت في بطن أمها تعرف هالشي ولا لأأأ .. ويوم طلعت يوسف قال .. أباها يعني أباها ..
عدول ياه حضنني : نوار طالعي هاي شو تقول ..

قلت له : خلها هاي المخرفه مدري شو شاربه الصبح .. تبا تصيحك أصلاً ..
عدول : هي أنا ريال ما بصيح ,, ( وطلع لسانه حق جوجو .. )

مطيت خدوده وقلت : فديت الرياييل أنا ,, يلا حبيبي سير العب مع علاوي وعمور ..
راح عادل طالعت جواهر وقلت : انتي بلاج ع الولد ..

جواهر : محد عندي أطفره ,, جان أيّود عدول ..
قلت لها : لا حول ولا قوة الا بالله .. حشا انتي حتى لسانج متبري منج ..

جواهر : ههههه فديت حرمة أخوي اللي كلامها عسل يفتح الشهيه ..
وركضت صوب الحجره قبل لا أفلعها ,,

ابتسمت .. جواهر يوم نمدحها .. تسبنا .. ويوم نسبها تمدحنا .. حلو طبع هالانسانه يعجبني واااايد ,, أحلى شي فيها .. عندها قاعده تسميها ,, لا للهموم .. كل شي قاطتنه ورا ظهرها ,,

تميت مندمجه وأطالع برنامج صباح الخير يا بلادي ,, مدري في مقطع شدني له وايد ,, وتميت أطالعه ..
ما حسيت الا بظلام حااااااااااااااااالــــــــــك يدامي ويعم المكان ,,

تخرعت ,, قلت : منووووه ..؟
..........: حبيب حبيبتي ,,

هالصوت اللي أتمنى أسمعه في أحلامي بعد ,, هالصوت اللي يوقف الدم بـ عروقي ,, لكننه يرد لي الحياه في نفس الوقت ,,

شليت ايده عن عيوني وقلت ,, متفاجأه : يســـــــــــــــوف ..!!!
طالعني ودار حوالين القنفه وياه صوبي ,, وقال : فديت منطوقج .. يا حلو يسوف .. وانتي تنطقينها ..

استحيت منه ,, وايد .. قلت .. عسب أغير الجو .. : هههه منو هذا اللي اسمه حبيب حبيبته ,,
يوسف : واحد ولهان ما شاف حرمته من يومين ..

ويلس يمبي هالشي وترني .. قربه لي يوترني واااااااايد .. أحس بخوف وسعاده ,, وألم وشوق وكل شعور العالم وأحاسيسه تتجمع بي ..
قلت له وأنا مبتسمه ابتسامه صغيره : وليش ما شافها انشالله ,,؟؟
يوسف : مشاغل الدنيا لهته ,,

مدري كيف يتني الشجاعه .. وأنا أكلم يوسف .. يمكن شعوري بالأمان وياه يشجعني ,,!!
قلت : ليييييش مشاغل الدنيا أهم عنها ,,؟؟
يوسف : السموحه .. يا نونة مملكتي ,,

قلت له : أوكي .. يالملك متريق ,,
يوسف : من زمااان .. تريتج تنشين كنتي راقده فالعسل شكلج تحلمين بي صح ..!! ههههه
استحيت وما رديت عليه ,, طالعت صوب التلفزيون ,,

يوسف : أوكي نواري .. أنا بظهر تامرين بحايه ,,
قلت له : ما يامر عليك عدو .. بس ممكن سؤال ,,

يوسف : أمري ,,
قلت له : يوسف .. انت بتيي صلاله ولا لأأأ ..؟؟
يوسف : والله ما أظن ,,
طالعته وطلعت مني كلمة بألم .. : لييييييييش ؟؟

يوسف : لهالدرجه مهم أنا ههههه
قلت له : لا صدق جيييه ما بتيي ..؟؟

يوسف : الشغل واقف ويباله من يجابله .. غير شركة أبوج الله يرحمه كل مسؤولياتها علي ..
قلت له : الحين من كبر شركة أبوي الا هو مكتب وله فروع .. ويا ريت لو عود ..
يوسف : بس بعد الشغل شغل هب من مظهر الشركه ,,
قلت له : انزين برايك ..

نشيت عسب أدش الحجره .. شفت يوسف ولا عبرني .. ع الأقل ارفع معنوياتي .. قول المره اليايه بيي وياكم ,, انشالله تردون بسرعه الا هم كم يوم .. ولكن لا حياة لمن تنادي ..

حز في خاطري هالشي ,, دوم يوسف ما يعتذر ,, حتى ولو كان غلطان ,,, دوم أنا اللي أعتذر معنه أغلاطي تافهه وهب كبيره ,, وما تبا السموحه من أحد ,, بس يوسف أحسه مستحيل يتنازل ويعتذر حتى ولو لي أنا حرمته .. اللي باجر بكون كاتمة أسراره يمكن ..

رميت روحي ع السرير .. ما بكيت مدري ليش .. يمكن لأني خلاااص تعودت ع الصد والجفا ,, صار هالشي شي أساسي في حياتي ,, من كثر ما صدوني .. ناس وناس .. صار عادي عندي ,, حتى ولو سألت وما جاوبو على سؤالي ,, شي عادي ,,

قمت من النوم .. على أذان العصر ,, شفت حواليني تخرعت ,, أنا راقده من الصبح الين الحين ,, شفت الموبايل ,,
1 مكالمه لم يرد عليها ,,ومسج ,,
طالعت الرقم .. بلسم جروحي ,,
تذكرت اللي صار ,, وانه حتى ما حاول يرفع معنوياتي ,,
فتحت المسج .. شفت مكتوب ,, ( لا تردين برايج ,, )

لـ هالدرجه !! ,, انزين أنا كنت راقده ,, ولو متصل أكثر من مره يمكن سمعت ,, بس اهني مكالمه وحده .. بدينا جذا .. عاد شو نهايتنا ,,
تألمت في خاطري ,, طرشت له مسج ,, ( كنت راقده .. )

وقمت رحت الحمام تيددت عسب أصلي الظهر والعصر ,, لأني طوفت صلاة الظهر ,,
طلعت .. شفت الموبايل مثل ما هو .. ما في أي مسج يديد ,, ولا مكالمه ,,
صليت ,, قريت قرآن ,, بعده يوسف ما دز لي مسج ولا اتصل ,,

نزلت ,, شفتهم كلهم قاعدين ,, حتى يوسف وياهم ,,
قلت : السلام عليكم ..
الكل : وعليكم السلام ,,
عمي : صح النوم نواري ,,
قلت له : صح بدنك الغالي .. ورحت يلست يمب جواهر ,,

جواهر : حشا .. كل ها رقاد شو ما تشبعين رقاد انتي ..؟؟
يوسف : قولي ماشالله عن تصكين حرمتيه بعين ,,

استانست .. بس ياريت يوسف قالها بظروف أحسن ,, من جذا ,, هذا ومب صاير شي وتزاعلنا عاد لو يصير الله يستر ..
عمي : ها بنات تجهزتو حق باجر ,,
أنا وجواهر : هـــــــي ,,

مدري ليش قلت جذا .. يمكن عسب أحسس يوسف انه هب لازم اييي ويانا ..
يوسف : أبويه سيرو بالطياره سياره وحده ما بتسدكم ..
عمي : جيييه خلاص ما بتيي ,,؟

يوسف : هي ما بيي عندي شغل ,,
عمي : الله يوفقك ولدي ,,
يوسف : آمييين ,, يلا أنا ظاهر تامرون بحايه ,,
مرت عمي : ربي يحفظك الغالي ,,

يوسف وقف وقبل ما يطلع .. قال : نوره تعالي أباج ,,
قمت وأنا مستغربه ,, رحت وراااه لحقته الين وصل الحوي رحت له صوب سيارته ,,
فتح الباب وقعد .. وقال : اركبي ,,
ركبت .. قال : بعدج زعلانه ,,

قلت له : لااا خلاص انسى السالفه ,,
يوسف : انزين بس خلااص بس كنت بسألج هالسؤال ..

نزلت وبندت الباب بهدوو ومشيت بهدو الين داخل البيت ,,
يا برودة دمك والله يا يوسف .. كل ها اللي سويته ولا يهمك ,,

بس أنا الغلطانه يوم اني قلت اني هب زعلانه .. الله يسامحك ,, ألحين تعالي وأباج آخر شي ولا تهتم لي .. حتى ما حاولت تراضيني ..

رحت الحجره مالي بارض أقعد مع قوووم عمي ,, قعدت عاللاب شوي ..
حسيت روحي مليت من اللاب ومن التلفزيون من كل شي .. بس اللي أحس به ,, اني ضايقه ,, و أبي أحد يسليني يواسيني .. ينسيني الهــم ..

بس منووو ..؟ منو اللي بيحس فيني .. منو بيشاركني همومي وحياتي اللي عايشتها ,, حتى انت يا يوسف صرت مثلهم كلهم ,, أنا اللي ظنيتك حياتي ودنيتي وبنسى الهموم بقربك ,, صرت مثل الكل لا تحس ولا تشعر .. ماقول غير كافي جفا منك ,, يجي منك أكثر يا يوسف ..

.. قلت أنسى شوي .. رحت صوب الشنطه .. رفعتها ,, وبديت أحط أغراضي اللي باخذها وياي .. خذيت لي كم من بدله وجينزات وسوالف تكفيني هالأربعة أيام ,, باجر الثلاثه بنطع وبنرد الأحد بليل أو الاثنين الصبح ..

يا ريت لو نرد اليمعه ,, ما أستحمل بعد يوسف .. ياريت يبادلني نفس الشعور ..
قضيت وقتي وأنا أتجهز ,, الين الساعه تسع رحت تعشيت مع جواهر وعقب انخمدت .. لأنه باجر بنطلع الساعه ست الصبح ,, مدري ليش أحس روحي مستانسه ,,

عمي قال بنروح بسياره .. بتسدنا السياره لأنه ياسر بعد بيي وبياخذ معاه عموري وعلاوي وعدول .. أما أنا وجوجو بنركب مع عمي وحرمته ,, هذا غير الجنط اللي ويانا روحها يبالها مكان ,.. جوجو شكلها ماخذه كبتها وياها .. هههه

قمت على صوت جواهر وهي تحوس .. وتدور مدري على شو ..
قلت وأنا أتجلب : أووووووف شو تيبن يايه الحجره تالي الليل ..
جواهر : شو تالي الليل الساعه أربع الحين نشي تجهزي ,,

قلت لها : وعيني خمس ..
جواهر : ما بتلحقين ,,
قلت لها : ما بحط ميكب هب رايحه عرس ,,,,,أووووووووف بندي الليت وردي حجرتج ..
جواهر : انزيييييييييين ,, طلعت بس بندت الباب بقوه حسيت أذوني انطرت ,,
دعيت عليها ,, الله يبلاها بـ ريل يأدبها انشالله ,,

رديت رقدت الين خمس وربع ,, نشيت تسبحت وتلبست .. صليت الفير ,,
ما حطيت شي غير كريم حق الويه ومرطب مالي بارض ميكب ما ميكب ,,
جواهر دخلت الحجره : ها جاهزه ,,؟؟
قلت لها : هيه يلا ننزل ,,

جواهر متخرعه : لاااااااااا من صدقج تيين ويانا جذا بتفضحينا ,,
قلت لها : هي بيي جذا ,,
جواهر : حطي جحال ع الأقل وبودر ,,

قلت : ما يحتاي أصلا نحن بنتم في السياره الين ما نوصل ,,
جواهر : برايج ,,. انزين يلا ننزل ,,
نزلنا أنا وجواهر كانو عمي ومرت عمي وياسر واليهال متيمعين ,,
عمي : هااا بنات خلصتو ..

جواهر : هي ..
عمي : يسووور صح صح في الدرب سمعتني ..
ياسر يأفف : انتو مدري شاللي موعنكم الفير تبون تظهرونا ,,
عمي : بنوصل بليل صلاله بعيده فاآخر عمااان ..

ياسر : يلا اللي ييي وياي يركب ,,
عمي : تريا نتريق قبل ,,
ياسر يتنهد : انشاااالله ,, وباس عمي على راسه ,,
وقال : أشوف أنا راسي يابس ,, أثر طالع عليك هههه

عمي : انزين يلا تريق ,,
تريقت ع السريع خلصت أول وحده لأني ما شربت غير حليب ,,

رحت المطبخ أشرب ماي لأنه الماي كان بارد وايد ,, شربت ماي ,, تذكرت اني ناسيه كيمرتي ,, رحت فوق دخلت الحجره خذيت الكيمره ,,
يوم طالعه وأشوف الكيمره .. واذا داخل الجنطه فيه جراجه ,,

سمعت ..........: صباح الخير ,,
طالعت صوبه قلت : صباح النور ..
تجدمت عسب أنزل ,,

يااااه سحبني من ايدي ,, طالعته وقلت : نعم يوسف شو تبا ..؟؟
يوسف : انتي زعلانه صــح ,,!!
قلت له : لأأأأ ..

يوسف : نورو عن الخرط زعلانه ولا لأأأ ..؟؟
قلت له وأنا دموعي تهل : وانت شو تفسر موقفك .. ؟؟

يوسف مسح دمعتي : مابا أشوف دموع في عينج حياتي ,,
صديت ويهي الصوب الثاني ,, .. رد لف ويهي عسب أطالعه ,,
قال : أنا آســــــــــف .. ،،، رضيتي ,, وانشالله تردون بالسلامه ,,

مسحت دموعي طالعته وقلت : مسموح ,, يلا مع السلامه ,,
ما عبرته ,, ونزلت بسرعه ,, معنه كسر خاطري أشك انه زقرني ,, بس خل يعرف ماني بلعبه يلعب فيها وقت ما يبا يزعلها يزعلها ووقت ما يبا يراضيها يراضيها ,,

شفت كلهم خلصو ريوق ,, عمي : يلا ياعيال روحو اركبو .. الأغراض في السياره .. ؟؟
مرت عمي : هي .. يلا توكلنا ,,

طلعنا أنا وجواهر مستانسين .. ركبنا السياره ,, يوم عمي ركب وحرك السياره ,,
طالعت من الجامه برا ,, صوب البيت .. والله أحبك يا يوسف غصب عني سويت جذا ولا أنا ما زعلك يا غلا الكون كله ,,

سهيت شوي .. وعاني صوت التنبيه على وصول رساله نصيه جديده ,,
فتحتها وقريت الرساله .. ( أحبج نــــواري .. ربي يرعاج ,, ديري بالج ع روحج .. )

دموعي بغت تهل ,, بس مقدر أنزلها الظروف ما تسمح الكل شو بيقول ,,
ندمت ليش اني عاملتك جذا ,, مدري كيف قلبي طاوعني أصدك اليوم .. ولا أنا هذا هب طبعي يا يوسف ,,
رديت له مسج ,, ( تهمني والله تهمني ,, كذاب أنا يوم أقول انك ما تهمني .. ترا بعادك يالغلا عنّي .. يذبحني ويبعثرني .. )

شفت الدرب .. تميت أطالع يمين ويسار ,, بعد ثلاث ساعات أو أربع تقريبا وصلنا الحدود وبعد الاجراءات المعتاده ,, دخلنا عمان ,, بس يبالنا وقت الين ما نوصل صلاله لأنها آخر عمان ...

حاولت الهي روحي بأي شي بس للأسف ما قدرت .. كل همي بـ حبيب قلبي يوسف ..
أخر شي رقدت مدري كم ساعه يمكن جريب النص يوم لأنه صلاله آخر عمان ,, نشيت طالعت روحنا في مكان حلوووووووو أخضر .. جنه جنه بمعنى الكلمه ,,

كلّه ضباب روووعهـ خبااااال المكان ,, تمنيت أنزل هاللحظه من السياره ,, كانت الدنيا ليل وما نقدر نشوف برا عدل بس الخضر يبين شوي .. والضباب مانع للرؤيه ,,

وصلنا لـ مكان.... و وقفنا ,,
عمي : يلا الحمدلله وصلنا بالسلامه ,,
نزلنا كلنا رحنا ورا عمي .. كنا حاجزين من الشقق الفندقيه عسب نتم مع بعض ,,

دخلنا ’’ عمي أشر على حجره .. رحنا أنا وجواهر حطينا أغراضنا ,,
جواهر راحت تسبحت وأنا بعد .. عقب طلعنا عسب نتعشا .. عمي كان طالب العشا ,,

حطينا العشا تعشينا ,, أنا وجوجو في حجره .. وعمي وعموه في حجره .. ويسور مع الحشاكل في الصاله هع ,, بس عقب ثواني عمي قال حصل حجز يمبنا جان يسور والعيال يروحون الشقه اللي يمبنا ,,

جواهر حطت راسها ع السرير .. ورقدت على طول ,, طول الدرب ماشالله عليها واعيه ,,
أنا تجدمت من الشباك .. حطيت راسي عليه وتميت أطالع برا ,,

أتذكر يوسف حبيبي .. آآآه ه ه اش كثر اشتقت لك يا حياتي ,, هالحزه رن فوني .. رحت صوبه ..
بلسم جروحي يتصل بك ,,
استانست .. رديت بسرعه ,,

قلت : هلأأأأ ,,
يوسف : أهلين حياتي .. ها وصلتو ..؟؟
ابتسمت : هييييه ..
يوسف : ها شو صلاله ,,؟؟

قلت له : هب شي بدونك ..
يوسف : هههه فديت منطوقج ,,
قلت له : تدري أنا يمب الدريشه وقاعده أطالع برا ..

يوسف : وأنا بعد .. بس أنا قاعد أشوفج ..
قلت له : اممم صوره ولا شقايل ..؟؟
يوسف : هههه كلما أشوف القمر أتذكرج ,,

قلت له : بس الشمس أحلى ,,
يوسف : لأأ نواري أحلى عن الكل ,,
استحيت وقلت : هههه والله خاطري أرد دبي ..
يوسف : لأأأأ الامارات حررر خلج في صلاله هههه

قلت له : هههه لو أروح الشمس وياك ترا عادي المهم وياك ..
يوسف : ما نقدر ع الرمسه الحلوه هههه
قلت له : يسووووف لا تلعوزني ,,

يوسف : هههه أوكي حياتي ,, أقول حياتي بتصل بج باجر أوكي ..
قلت له : بترقد ,,؟؟
يوسف : هيه وانتي بعد ارقدي ,,
قلت له : انشالله ,,

يوسف : احلمي فيني أوكي ..
قلت له : هههه من عيوني ..
يوسف : تسلم عيونج ... يلا فمان الله
قلت له : فمان الكريم ,,

سكرت التلفون .. حضنته وأنا قاعده أطالع برا ,, شكله الجو حلو برا ,., حطيت راسي ع الزجاج ..
لاحظت انه بدا ينفنف .. طالعت النفاف حلووو وايد ..لفيت شفت جواهر راقده .. نعست جان أروح صوب السرير وأرقد ..

ما حسيت بروحي الا وصوت عدول وعلاوي يقولون : مــــــــــــطـــــــر مطر ,,!!
قمت طالعت صوب الدريشه .. بالفعل فيه صوت ,,
تجدمت فتحت الستاره ,, الجو حلو وااااااااايد ..فتحت الدريشه ,, طلعت ايدي ..

قطرات المطر .. قاعده تحتك بجلدي .. جنها تداويه ,, يا حلاه المطر ,, حلو واااايد ..
رحت تغسلت وتسبحت ولبست .. طلعت من الحجره ,, شفت الكل يتريق في الصاله ما عدا ياسر .. أكيد راقد في سويتهم ..

قلت : صباحم ضباب ... في أحلى صلاله هههه
عمي : صباحج مطروبرد ..
قلت : أوووه أووووه قويه عمي ..

جواهر : بابا عن تسمعك ماما ,,
مرت عمي طلعت من الحجره : سمعت اسمي أنا ,,
قلت : هي عموووه ترا عمي قال بيطلعج روحج ..

مرت عمي ضحكت وعمي بعد ضحك ..

عقب الريوق تلبسنا وتجهزنا ,, شليت الكام ويايه .. وجواهر بعد شلّت مالها ,, طلعنا عسب نحوط ,, رحنا صوب جبل ,, ما نقدر نشوف السيارات اللي يمبنا من الضباب وروعة الجو .. هالمكان خياااال روعه ..
تجدمنا وصل مكان فووووق فووووق حلاتـــه ..

نزلنا من السياره .. أنا وجوجو رحنا في صوب عسب نصور المكان اللي هو روعه ..
وتمينا نصور ونصور .. عقب فرشنا وقعدنا قضينا يومنا ونحن نتجول في أرجاء هالمكان .. وطول الوقت أنا وجواهر نتصور .. حلو المكان وااااااااااااايد ,,

عقب رحنا صوب بعض المطاعم عسب نتعشا .. تعشينا عشااا لذيذ .. عقب ردينا الشقه عسب نرقد وباجر ننش وندور مره ثانيه ,,

ترييت اتصال يوسف لي .. ترييت وترييت بس للأسف ما اتصل بي .. ورقدت ..
اليوم الثاني نشيت الصبح .. شفت يايني مسج ,, من بلسم جروحي ( حياتي مشغول وايد ما اقدر أتصل بج .. )

تنهدت ,, أأأأه اش كثر أحبك يا يوسف مووووووت أحبك .. ومووووت أهواك ..
تريقنا وقعدنا نسولف حزة الضحى .. طلعنا رحنا صوب هالنافوره الطبيعيه اللي كل ما يشتل الموج تعلا أكثر وأكثر .. شكلها طرررررر ..

صورناها أكيد .. طول الوقت يوم نطالع يسور .. مندمج مدري بـ شوه ..
جواهر : بلاه هذا ,,...؟؟

قلت لها : مدري عنه من أمس جذا ,,
جواهر : موجنه السماعه في اذنه ,,
قلت لها : أكيد عاد يرمس أحد من البلاد ..
جواهر : هههه أكيد ربيعته .. ميثاني أكيد بتذبحه ,,

طالعتها وقلت في خاطري .. خبرج عتيييج يا جواهر .. ياسر يحب ميثاني وااايد .. لو يرمس
ويا بنات العالم ميثاتي غير عنده ..

قلت لها : تعالي نروح هاك الصوب ..
جواهر : يلا ,,
تمشينا شوي ..

قلت : جوجو في استيشن سودا رقمها مال الامارات تعالي نرد ..
جواهر سحبتني : شو يعني عادي شو بيسوون بنا يلا ..
تجدمنا وتجدمنا ابتعدنا شوي عن الأهل .. خفت ,,

الاستيشن راعيها تم يديم مدري ليش ..
فتح باب السياره واحد وقال : نوره ...
طالعت صوبه .. عرفته ....... هذاااااااا هوووه .. بس سويت روحي ما أعرفه ,,

قلت : جوااااهر قمنا نرد هذا ولد خالي اسمه سلطان ,,
جواهر : يلا نرد مب ناقصين رمسات بعد ,,
ردينا .. جربنا صوب الأهل ,, ونحن ماشيين ..

ما حسيت الا بيد تضمني ... تخرعت صديت وراي ..
فتحت حلجي مستغربه وقلت : شوووووووووووواخ ..
شيخه : هي شوااااااااااخ ..
قلت : شخبارج حياتي ,,
شيخه : بخير ومن صوبج ..

قلت : تمااام .. شو هالصدف العجيبه ...؟؟
شيخه : ها مع منووه يايين هههه ؟؟
قلت لها : مع قوم عمي ,, وانتي .. ؟؟

شيخه : مع ريلي هههه ..
جواهر ابتسمت : هي رمّست منى قالت لي أخوي وحرمته بيروحون صلاله ..

شيخه : هههه يلا صدفه عجيبه .. صــــــــــح !! نورو مبروووك مبروك ..
قلت لها : الله يبارج في حياتج غلايه ,,
قعدنا مع شواخ .. صديت شفت صوب قوم عمي ..

مبين مانع ريل شيخه وياهم .. ومعاه واحد .. ركزت هذا سلطان .. بس الظاهر سلطان ياي مع ربعه صلاله هب مع الأهل ..
قلت : هااا شواخ ما فيه شي في الدرب ,,
شيخه : لا لا ,, لو فيه جان ما بدق خط هههه

قلت : صدقج ..
شيخه : يلا انشالله بنحظر عرسج ,,

طالعتها ابتسمت لها ,,, يالله اش كثر أحب هالانسانه .. وأحب معدنها ..
مر اليوم ونحن مع شيخه والشباب مع مانع وسلطان وربعه ,,

جريب المغرب شلينا قشارنا .. والكل تم يرد لسيارته ,, ودعت شواخي فديتها ,,
رحت صوب السياره .. الظاهر ولد خالي سلطان قاعد يساعد ياسر ,,
سلطان : اشحالج نوره ,,؟؟

قلت له : تمام ,,
سلطان : مبروووك عالملجه ..
قلت له : الله يبارك فيك ,,

وركبت السياره ,,,
جواهر : يالله نواري اش حلاته ,,

قلت لها : ماماتيه الشكل هب كل شي ,,
جواهر : ميبي .. أوكي ترانا يوم نرد اليوم نقول حق يسور يتصل بالجوهره نرمسها ..
قلت لها : أوكيييييييه ..

وتميت أفكر ليش يوسف ما دق .. ولله المكان اهنا حلو واااايد وشي .. بس ناقصنه سكر حياتي يسوووف ..

ردينا السويت .. خلينا يسور يتصل بـ الجوهره رمسناها .. بغيت اصيح تذكرتها ,, مب باجي شي عسب يردون .. يوم الأحد بترد الامارات ,, والله بتنورها فديتها ,,

رحت صوب الدريشه كالعاده .. وأنا أطالع صوب الدريشه وأتذكر يسوف وليش ما يدق علي ,, والله اشتقت له واااايد .. معقوله ما يشتاق لي يعني ..

طالعت برا .. الدنيا قاعده تنفنف .. سبحان ربي محلاها هالأرض ,, خضره و ماي .. وشلالات يعني هب عوده عوده بس تهبل واااايد .. يقولون ماليزيا بعد حلوه وفيها أماكن طرر بس يلا انشالله أروح الها يوم ..
تذكرت .. يوم أنا وشواخي صغااار ابتسمت .. كيف كنا نحلم ونقول .. شو بنصير يوم نكبر

سندت راسي ع اليدار .. دموعي بدت تهل .. مدري شوق ليوسف .. ولا تذكرت أبوي الله يرحمه ولا شواخي كيف صارت حياتها غير .. مثل اللي كانت تتمناه ,, الله يوفقها ,,

رحت صوب السرير ,, وما حسيت بروحي الا وجواهر توعيني ..
قمت .. تسبحت ولبست .. قالو بنطلع ,, عقب الغدا هالمره ,,
تمينا الصبح أنا وجواهر نفضي الممري من الصور .. ونحطهم عاللاب ,,

عقب ما تغدينا طلعنا رحنا صوب كلّه شلالات .. روعه المكان ..
رحت تجربت صوب الماي وتميت أطالع فوق .. يت قطرة ماي عليه .. مسحتها ..

يالله اش حلات هالمكان رووووعهـ بالفعل يغير نفسية الواحد .. طالعت صوب مجموعة ورد بعيده عنا شوي ,,
رحت تجدمت من الورد ومعاي الكام .. تميت أصور الورد ,, صورت وصورت ..
الين مليت قعدت ع الحشيش ,, حسيت لبسي كلّه تبلل بس عادي يلا ,, ما يهمني جي ولا جي خايسه ,,, الدنيا كلها وحل ,,

قربت روحي من الورده ,, قطفتها ,, قلبي عورني .. هاي معطيه منظر حلو للمكان ليش سويت جذا ..
بس عقب قلت بجففها وبحطها ذكرى طول عمري ,,

رفعتها قربتها صوب ويهي وطالعتها ,,
شفت عليها ندى .. يالله محلا الندى اللي معطيها حلا ,,
لولا هالندى ما كان لـ هالورد قيمه ,,

جان أقول ليش صورت الورده شكل وبس .. المفروض يوم أصور الشي أصور أحلى جوانبه ومعدنه .. المفروض تفكيري ما يكون سطحي .. مفرووض أتعمق بالشي ,, وأستعمل هالأسلوب في حياتي مع يوسف .. يمكن بيكون لها حل ..

يودت الكام وصورت الورد بالندى اللي عليه ,, ومن جانب وزاويه يعطون معنى للصوره ,,
تميت أجلب بالصور .. ركزت بين صورة الورده بدون ندى واللي مع الندى ...

اهني تذكرت ,, شي يشبه الورد .. هذا خدي ,, بدون دموع ما يروم يعيش ,, بدون هالدموع ما بيكون لخدي قيمه ,, وبدون هالندى ما بيكون لوردي قيمه ,,

أنا والورده فينا صفات متشابهه جداً فينا أشيا كثيره مشتركه ,,
اذا هملناها تذبل ,, واذا شفناها من شوفها ما نمل ,,

هذي الورده .. تشبهني في أشيا كثيره ,, حسيت روحي بحط هالورده بأغلى مكان عندي مدري ليش همتني هالكثر ...

صحاني من خيالي يوم حسيت بيدين على عيوني ..
حاولت أشلها وصديت وراي .. تخرعت ,, وقلت : يسوووووووف ...؟
يوسف مبتسم : هي يسوووووف .. هههه حبيب نواري ..

صديت قلت : أنا زعلانه ما تتصل بي بعد ,,
يوسف : واذا ما اتصلت الا لأني بيي عند حبيبة قلبي ,,
طالعته استحيت قلت : والله فاجئتني ,,
يوسف : حلوه المفاجئه ,,

قلت له : فوووووق ما تتصور ..
يوسف شاف الورده سحبها عني وقال : في منو تفكرين ..؟
قلت له : حزر فزر هههه

يوسف : أكيييد الشيخ يوسف ..
قلت له : هههه والنعم والله .. عطني الورده لا تخربها حرااام ..

جان يطالعني وقال بأسلوب يذوب ويابها ع شكل شله : مـنّــكـ يغــــار الــــورد يــا ورد ..

حسيت روحي بموت من أسلوبه قلت له : بس انت ماي هالورد .. لو أهملته بيموت .. وانت الرحيق اللي يطلع من هالورد ..

يوسف : فديت منطوقج والله ..
جان يزخ ايدي وتمشينا .. رحنا صوب الشلالات شكلها طرر وتمينا أنا ويسوف نصور المكان وأصوره ..
يوسف : أحس روحي هندي كل شوي اتصور ههههههه
قلت له : عسب تتم ذكرى ..

يوسف : حق عيالي صــــ !! ـــح
استحيت منه جان أقول : تعال تعال شوف هاك اليبل شقايل خضر ,,
يوسف ياااه صوبي .. وقال : ترا نحن قراب عن السعوديه .. أبها جريبه عنا وايد ..

قلت له : صدق .. قمنا نسير ابها ..
يوسف : راقده انتي .. يبالنا عاد نتم أيام وايد ..
قلت له : اوووف شو هالدوامات اللي تذبح ..

يوسف : هههه تراني باجر برد الامارات ,,
طالعتها متفاجأه والحزن بعيوني ,, : هاااااه ..؟؟
يوسف : والله ما ييت اليوم الا عشانج ,,

قلت له : انزين يوم الأحد نرد رباعه أحسن ,,
يوسف : مليتي من صلاله ولا بعدج ..

قلت له : بصراحه عــــــاااد مستحيل الواحد يمل في صلاله .. بس بدونك حتى بانكوك ملل ,,
يوسف : هههه فديتج ,, انزين وين جواهر ,,
قلت له : تعال نروح صوبهم ,,

مشينا أنا ويوسف صوبهم .. رحنا عند قوم عمي .. هم شكلهم يعرفون انّه ياي .. وكان مسلم عليهم قبل ما ييي صوبي .. بس أنا كنت سرحانه ..
قعدنا ,, عقب جواهر قالت : أنا برد باجر ويا يسوف ,,

عمي : اسألي يوسف يردج ولا لأ ,,
جواهر : هااا يسوف تردني ..
يوسف : جييييه مليتي ,,
جواهر : هيييه ,,

قلت في خاطري نو وي جواهر تمل من السفرات .. أكيد يوسف راشنها عسب جذا قالت ملانه ,, يوم بنرد البلاد يطلعها طلعه لا صارت ولا استوت ,, هههه هاي جوجو ..

يوسف : لو نواري بتيي ويانا موافق ,,
طالعت عمي وقلت : الشور شور عمي ..
عمي : أنا موافق عن نفسي .. بس تاخذون وياكم جواهر ,,

أكيد عمي يوافق أول شي لأنه مالجين وثانيا جواهر بتيي ويانا ,,
والله اشتقت لدبي وااايد .. قمت ما اروم أفارقها ثواني .. عاد لو أيام الله يعين ..
يوسف : يعني خلااااص نورو وجواهر باجر تجهزن بنطلع الساعه تسع الصبح ,,

أنا وجواهر : أووكي ..
قعدنا نسولف كلنا وعمي تم يعلق علينا يوم نحن يهال شو نسوو وكيف حركاتنا ’,’, استانست الصراحه سوالف عمي خباااال ,, غير اني أنا عاااد كنت أم كشه .. والله فضيحه ..

تمشينا شوي واستانسنا .. حتى يوسف طول الوقت كان وياي ما قصر .. فديته يااااي عشاني ,, هههه
الين بليل تمينا وعقب ردينا الشقه .. أنا وجواهر ,, رحنا حجرتنا ,,
جواهر فرت روحها ,, ع السرير .. وقالت : وأخييييراً باجر بنرد البلاد ..

قلت لها : كنتي تعرفين من قبل صـــح ..!!
جواهر : امممم نوعاً ما هو مخطط عليج ههههه
قلت لها وأنا أفسخ عباتي ,, : أحلى مخطط بعد .. ههههه

جواهر : تدرين يسوف أبد ما يمزح ويانا .. دوم في كل شي جااااد .. الا وياج أحسه عادي ,,
قلت لها : صلي ع النبي عن تصكينا بعين هههه
جواهر : هههه أنا سايره أتسبح ,,

قلت لها : حرااام اليوم بدش قبلج .. ريلي اهني هههه ..
جواهر : بس هالمره مسامحه ,, لأنه ريلج اهني لو انه مب اهني كنت بفرج من الجامه هههه

قلت لها وأنا ماخذه ملابسي وأدش الحمام وانتو بكرامه : الله يعيني على هيك حميّه شو غليزة .. ما بتنبلع
جواهر : ههههه دشي دشي عنلااتج ألحين بفرج من الدريشه ..

...... تسبحت وطلعت بدلت .. لبست بجامه .. وسحيت شعري رفعته بقباضه .. حطيت كريم مرطب ومرطب شفايف !! عقب صليت العشا لأني هب مصلتنه .
.
رحت وقفت صوب الدريشه .. تميت أطالع برا ..
شو حلو المنظر من اهني ,, السياير رايحه وراده ما يبين غير ليتها أما الباجي معتم وضباب ..

بدا ينفنف ع الخفيف .. حسيت بالبروده معني داخل ,, رحت قعدت ع السرير .. وتلحفت .. تذكرت كل شي صار اليوم .. كل موقف كل حرف قال لي اياه يوسف .. استانست حمدت ربي انه يوسف من نصيبي وأنا من نصيبه .. يوسف غير غييييير عن الكل ..

قطع علي تفكيري صوت جواهر : نواري يوسف يباج ..
طالعتها وقلت : انتي مو توج كنتي تتسبحين ..؟

جواهر : صح النوم ماما .. أنا طلعت ورحت قعدت مع يسوف ويسور وانتي بعدج سرحانه ,.
طالعتها : صـــدق ..

جواهر : اللي ماخذ عقلج يتهنا به ..
طالعتها : مالت .. أقول اختاري أي مخوره ألبس ,,

جواهر : اطلعي بالبجامه عادي لاااه ..
قلت لها : اجلبي ويهج .. ألبس الورديه ولا السوده مع البيج ..
جواهر : الأسود مع البيج أحلى ..

قلت لها : أوكي .. ممكن الحين تطلعين ..
جواهر : معـــــــــقده ,,

قلت : هب هبله شراتج انتي وميثوه .. ماشي مستحا ,,
جواهر : انزين انزين .. خذي راحتج أووووف ..

لبست وكشخت ع الخفيف .. طالعت روحي في المرايه ,, قلت ما بحط غير جحال وقلوز ,, ع السريع حددت عيوني بالجحال .. وطلعت ,,

شفت يوسف وجواهر قاعدين ,,
جواهر دوم صنم يدام يوسف مدري ليش تخاف منه ,, معنه وايد طيب ..
قلت : أهلين ..

يوسف : هلا والله ,,
رحت قعدت يمب جواهر ,, وقلت : بلاااج ..؟
جواهر : ماشي ,, يلا أنا سايره داخل ,,

راحت جواهر ,,
يوسف : نواري سيري البسي عباتج وييبي وياج شال لأنه برد,,
قلت له : جيييه بنطلع ,, ؟؟

يوسف : انتي سيري ييبي لج هالأشيا وتعالي ..
طالعته وقلت : أوكي ,,

رحت البس عباتي ولفيت الشال ع رقبتي ,,
جواهر : طالعين ..
قلت : هيه ,, تيين ويانا ..؟؟

جواهر : لا شو بكون رزه عقب ..
طالعتها : ماشالله من متى جواهر عندها مذهب ..
جواهر : هههه سيري قبل ما أفرج من الدريشه ..

قلت : اتهبين ريلي ويايه ..هههه ... وطلعت ..
يوسف قام بهيبه .. وقال : ها خلصتي ,, نمشي؟؟
قلت له : هي خلصت ,,

تجدمنا من الباب ,, يوم يوسف فتح الباب أشر لي أتجدم واطلع قبله ..

طلعت قبله .. لف سكر الباب .. وطلع وقف يمبي ,, يوم نحن نازلين ,, مسك ايدي.. يوم مسك ايدي ,, رفعت راسي عسب أطالعه ,, طالعته ,,عيني طاحت بعينه جان أسحب ايدي ,,

شو كااانت مشاااعر نوره بهاللحظه ,,, وكيف بترد ع يوسف هل بحنيه مثله أم راااح تعامله عااادي ..