منتديات قصايد ليل - عرض مشاركة واحدة

11-17-2011

الحلقه الحاديه عشر ..

قلت : فديــــــــــــــــتج شــــــــــــواخ ما صدق
شيخه : نواري حياتي انتي اهني
قلت لها : هي اهني شواخ ما صدق
شيخه : بلا استكشاف بلا خرابيط تعالي نقعد ويا بعض سولفي لي عن أخبارج ..

رحنا قعدنا مع بعض حسيت روحي طايره من الفرح شوي وبموت من الفرح ..
قالت لي : هاييل مال مدرستج ..؟
قلت لها : هي

قالت لي : الله يعنيج عاد عليهم
قلت لها : ههههه صدقج يغثون الواحد والله
شيخه : شخبارج بعد ..؟
قلت لها : ماشي يديد وانتي ..؟

شيخه : مانع خطبني ..
حسيت بفرحه وقتها بغيت أحضن شيخه .. صح انه حلمها هي مو حلمي أنا بس يوم يتحقق لها شي أحس انه تحقق لي أنا وأفرح لفرحها وأتضايق لضيقها ...

قلت لها : مبروووووووووووك حبيبتي تستاهلين
شيخه : وأخيرا يبته لدربي ..
قلت لها : الله يهنيج وياه يا رب
شيخه : من صوبج ما شي أخبار

قلت لها وأنا اتنهد . وين الله يخليج نسيته مع وفاة أبوي أحس حتى مشاعري ماتت مع موت أبوي تصدقين ..

شيخه : نورو خلي ايمانج بربج قوي وبعدين ربج يعوضج انشالله .. تعالي انتو ساكنين في نفس البيت جيه جذا..

قلت لها : نفس البيت بس متى اشوفه اربع وعشرين ساعه برا وبعض الأوقات ع الأكل وبس .. جنهم يتحاشون وجودي قمت احس جذا
شيخه : لا حرام عليج نواري مو لهالدرجه عاد ..

قلت لها : يلا انشالله أماني الكل تتحقق
حسيت الوقت يمر بسرعه مع شواخ .. قلت فـ خاطري يا ريت لو بعدنا مع بعض جان الحين أنا مستانسه مع شواخي بس يالله قدر .. ها ما نقدر نعارضه ..

............

رجعت البيت وأنا مستانسه عن خاطر .. لأني شفت شواخي على طول رحت رقدت ما تغديت
لأني تعبانه من الدواره خاصةً مع شواخ ..

نشيت ذاكرت مثل باجي الأيام ورحت أقرا روايه من زمان هب قاريه .. دشيت نور الإمارات بعد صار لي مده ما دشيته .. حسيت الوقت راح بسرعه ..

سولفت مع جواهر عن اللي صار مع شواخي ومع أم برج العرب اقصد برح دبي ..

.............................

اليوم الثاني رحت المدرسه وأنا فيني رقاد لأني قريت روايه أمس بليل
حسيت روحي برقد فالحصه ..

وداد : نواري بلاج ..؟ تعبانه فيج شي ..؟
قلت لها : الله يلعن فارس والجوري ..

وداد : هههه منو هاييل ..؟
قلت لها : مال رواية همس صوتك .. أمس بليل طول الليل سهرانه
وداد : هههه هي أنا بعد قريتها على نور الإمارات انتي وين قريتيها ..؟

قلت لها : صدق أنا مسجله عندهم وانتي
وداد : وانا بعد واااااو شي طيب ..
قلت لها : قصدج عجيب

وداد : هههه وناسه نعرف بعض شو نكّج
قلت لها : ............... وانتي
وداد : ..............

قلت لها : يتيمة زايد كانت ييرانا تدرين
وداد : صدق والله ،، فـ خاطري أتعرف عليها ..
قلت لها : انشالله ، شو من روايات يديده قريتي ..

تمينا نسولف عن الروايات وشو ايدد شي نازل وعن الكاتبات وجذا ..
دشّت أم برج دبي حمدوووه
حمده : هلا والله بـ نواري

حكرتها ما رديت عليها طز فيها ما ارابع حثاله أنا ..
يت تجربت عنّا : لا لا تقرين روايات أكيد عاشقه .. بس وربي بـ تحبيني أكثر ..

تميت أسولف ويا وداد ما عطيتها ويه هاللوث ولا فيه بنية تسوي جذا شرات هاي ..
دشّت موزه اللي فحادي عشر

على طول حمده يت صوبي ولوت علي بطريقه مقززه حسيت روحي برجع من اسلوبها الخايس هاللوث ..
بغيت أدزها توني بدزها الا موزه تكلمت ونستني بـ كلامها روحي بعد

موزه تكلم حمده : ها عيبتك يالخاين .. ان ما راويتك يا حمدانوه ما يكون اسمي موزه ..
حمده بصوت تفخمه : سيري لاااه أصلا تسوين ظفرها انتي

اندمجت وياهن فالسالفه .. أول مره في حياتي أشوف بنات يتكلمن بهالأسلوب الغجري ..
حسيت روحي وسط شباب هب بنات .. استحيت من نفسي لما سمعت سبهن ..

موزه بعد ما خلصت سب وضرابه قالت : أنا براويج قدرج يا نوره ..
انصدمت شو يخصني فسوالفهن هاللوث ..

قلت : ابعدي عنّي أحسن لج ..
قالت : براويج قدرج يالــــــ******
حسيت انها أهانتني .... حتى أهانتني قليله فالكلمه اللي قالتها ..

قلت : أصلاً انتي ما تعرفين قدرج تدرين ان قدرج ما يسوى ماطا الأقدام بعد ..
موزه يت جريب عني تبا تمد ايدها علي ..

في ايد مسكت ايدها وابعدتها عني
حمده : اطلعي برا أحسن لج ..

وتضاربن وسبن بعض كالعاده ..
حمده : لا تهتمين لها ما تسوا ظفرج بعد

قلت لها بصوت عالي يدام كل البنات : أصلاً لولاج جان انا بخير ، بس انتي ودريني بحالي ..
وطلعت وطلعت معاي وداد محد يأمن يقعد فالصف هذا روحه .. جنه قاعد وسط شباب والله ..

رجعت البيت وأنا مدوخه ما كليت حمده وموزه سدو نفسي رقدت ونشيت حزة صلاة العصر صليت ونزلت أكل

وأنا ماشية من ع الدري حسيت روحي مدوخه أكيد دمي نقص .. رحت المطبخ ما قدرت ايود روحي .. حسيت روحي ما اروم أوقف طحت ع الأرض ..

كنت فوعي بس ما أقدر أوقف .. حاولت أصرخ أزقر أحد بس نفسي أحسه واقف ما اقدر انطق بحرف بعد .. لدرجه اني حسيت روحي بموت فـ هالثانيه خلاص ..

شفت عدول ياي صوبي جان اقول له بصوت يالله يالله ينسمع : ازقر عمي ...
عمي ياه متخرع ومرت عمي بعد والبنات ..
عمي سندني عليه ووداني الحجره

مرت عمي حطت راسي ع ريولها : بنتي شي يعورج فيح شي
حركت ايدي بمعنى دايخه .... ما قدرت ارمس ولا اتحرك من التعب

مرت عمي قرت علي ولما خفيت شوي وبديت ارجع طبيعيه
عمي : نوره البسي عباتج وتعالي بوديج المستشفى

ما قلت لأ لأني حسيت روحي خلاص بموت فـ مكاني ان ما ودوني المستشفى ..
عمي ساعدني لما وصلنا السياره ركبت ووداني المستشفى طول الدرب كنت مغمضه عيوني لأني لو فتحتها راسي بيدور ..

وصلنا المستشفى وبسرعه دخلوني عند الدكتور ..
بعد ما فحص الدكتور ..
الدكتور : كليتي الصبح ..
قلت : هي ..

الدكتور يطالع أوراقه : انزين يا نوره بنسوي لج فحص دم .. الحين بتيي النيرس وتوديج
يت النيرس وودتني عمي تم مع الدكتور ..

سحبو عني دم حسيت دمي بيخلص خلاص ..
رجعت عند الكتور سولف شوي مع عمي ..
عقب التحاليل ,,,

الدكتور : لو سمحت يا بو يوسف ،، البنيه حاولو انها تاكل هالأسبوع عدل وبعطيها أدويه أنا لأنه دمها وايد ناقص اذا ما تحسنت خلال هالأسبوع بنظطر نرقدها وننقلها دم ..
قلت : لأأأأأأأ باكل مابا ارقد عندكم

الدكتور : ههههه جان زين ، يلا عاد بكتب الأدويه ، بويوسف ديرو بالكم عليها عدل ..
عمي : انشالله بس انت فهمها قول لها تاكل عيزنا نحن ترد من المدرسه ترقد وبس

الدكتور : آخر شي هي بتتحمل نتيجة أفعالها ,,
وصف لي الدكتور الدوا وقبل ما نطلع حطو لي مغذي لمدة ساعه تميت عندهم ..
عقب ما خلص المغذي ردينا البيت ..

جواهر : كلللللوش ،، الحمدلله ع السلامه أول مره ما يرقدونج ..
ضحكت وياها ... طول عمرها بتم جذا جواهر ..

الجوهره : نواري لازم تاكلين عدل أوكي
الكل طالع صوب الجوهره مستغرب شو فيها ,,, أول مره ترمس
جان اقول : انشالله بهف أكل بيتكم كلّه
الجوهره : ههههه

كلنا استغربنا .. الجوهره صابها شي استوا بها شي
قلت : جوجو تراني خلاص شكلي بحول عندج اللي وياي ما تخليني ارقد
الجوهره : حياج حياج ..

جواهر اتخصرت : لا والله .. انزين سيري سيري خل تنفعج ..

يلست معاهم شوي وعموه طول الوقت جواهر سوي ها .. الجوهره يبي ها .. عموري ييب ماي .. عدول ييب الدوا .. علاوي ييب وساده .. ههههه بس ناقص تقول حق عمي بعد ..

مر يوم الأربعا بسرعه ما داومت يوم الخميس لأني بعدني أدوخ وما اقدر اوقف عدل ..
ارتحت من صدعة أم برج دبي خخخ

يوم الجمعه كلنا تيمعنا ع الغدا ياسر ويوسف بعد كانو موجودين ع الغدا ..
عقب الغدا أنا وجواهر الجوهره رحنا الحجره عسب نذاكر ..

طول الوقت كنت أطالع الجوهره أحسها ملاك شي جذا .. ما ادري ليش كانت متغيره الفتره الأخيره أحيدها اجتماعيه بس الحمدلله ردت مثل ما كانت حتى انا رديت مثل ما كنت بس أنا لي أسبابي ..

عقب الغدا يو عيال عمتي صوبنا قعدو البنات ويانا وتمينا نسولف ..

حسيت حياتي ردت طبيعية ,, ردت لي الروح صرت أتأقلم مع الكل مثل ما كنت .. بس يوسف
ما يحس بي .. بعده ..... يوسف هاملني وايد .. ليته يجي ويجس نبضي .. ويشوف اش كثر مشتاقه له ....

بديت أعيش حياتي وهمومي فارتنها ورا ظهري قمت أعود عموري وعدول يصيرون اجتماعيين عدول بسرعه تأقلم نفسي .. وصار سبال يرادد وايد أما عموري بعده خجول وحبوب ..

مرت الأيام يومياً أحاول أصير عاديه وأنسى الجراح كثر ما أقدر
بالفعل قدرت أتناساها أما أنساها فلا يمكن ..

مرت الأيام وأغلب حكاياتي صارت ماضي في حياتي .. ياه شهر ثلاثه أكره شهور السنه عندي .. ما أحبه ولا أطيقه

رحت المدرسه ..
دخلت الصف سلمت وطلعت مب متفيجه أجابل ويه النحس .. أم برج دبي ..
وداد طلعت في ويهي : هلاأأأ
قلت : هلأأأ والله
وداد : جيف الحال ..

قلت : بخير ومن صوبج
وداد : مديم حالج ياربيييه ..بخير
قلت : ها ذاكرتي

وداد : اكييييد ، سويتي تقارير الفيزيا ..
قلت : هي ، هلكت والله خلاص انهد حيلي من كثر الدراسه والتقارير ,,هم والله

وداد : هههه هانت ، ها تجهزتي حق باجر .. حفلة يوم الأم
قلت : لا ما بي تراني ..
وداد : لاااااااااااااا عاد ، نبا نشوف ماماتج ..

حسيت عيني دمعت : وداد أمي متوفيه ..
وداد : آسفه والله ما أدري ع بالي بس ابوج
قلت لها : لا اثنينهم ..

وداد : آسفه نواري
قلت لها : لا عادي

وداد : انزين تعالي ..
قلت لها : مابا وداد يوم اشوف أمهات البنات أتذكر أمي ، قبل ع الأقل أبوي كان مهون علينا بس الحين منو ..؟ ما عندنا حد ..

وداد : الله يساعدج نواري
قلت لها : آمين ..
وداد : بعدها حمده تلاحقج ..

قلت لها : قصدج حمدان هههه
وداد : هههه نوعا ما
قلت : هي ملوعه بـ جبدي حتى فالباص ههه

وداد : الله خلقج حلوه لازم البنات بعد يتخبلون هههه
قلت لها : لو البنات بيتخبلون عاد مابا الحلا
وداد : هههه الله يعينج على ما ابتلاج ..

................

ياه وقت الرواح باجر بغيب ما بحضر مالي خاطر ..أكيد البنات بيزعلون بس هم ما يعرفون ضروفي ..
ركبت الباص رحت قعدت مكاني .. شفت البنات مستانسات يقولن باجر يوم مفتوح وترفيهي .. ياليت لو امي وأبوي معاي جان فرّحوني وحسو بالحزن اللي بداخلي الحين ..

الباص وصل يدام البيت كنت قاعده أمر وأنا سرحانه .....

حسيت روحي بطيح خلاص بس نجيت

فيه حد يودني .... ابتعدت وأنا متقززه ... موقف يقرف ..
قلت : قومي يالحيوانه شو انتي ما تخافين ربح على هالحركات ..
.
دزيتها من يدامي وطلعت نزلت البيت وأنا متضايجه ...

دخلت الصاله سلمت رحت غيرت وصليت نزلت اتغدا .. شفتهم كلهم موجودين حتى ياسر ويوسف ..
قعدت أتغدا ..

جواهر : نواري شو اليوم ..؟
قلت لها : زفت
الجوهره : له له جيه ..؟
قلت : عقب بخبركن ..
الجوهره : باجر بغيب ..

قلت : جيه ..؟ ...أمج بتروح باجر
الجوهره : أول شي باجر يوم الخميس ويوم الأحد علي تسليم التقارير مليون ألف تقرير علي ..
قلت لها : الله يعينج ، أنا خلصت تقاريري ..

جواهر : وأنا بعد ..
يوسف كان يرمس مع عمي بس قال : هي سمعت البنات يسوون تقارير ويبيعنها ..
قلت : حشا .. حتى فالتقارير يتاجرون هههه
الجوهره : هالسوالف تنفع حق جواهر هههه

جواهر : نكتو انتو نكتو ، أصلا ما تعرفون عن ذكائي شي بعدكم
ياسر : وايد يا عبقرينو ..
عمي : ها نواري شو المدرسه

قلت له : أوكي الحمدلله
عمي : يلا انشالله شهرين وتتخرجن
أنا وجواهر والجوهره : آمين ..

عمي : هههه لهالدرجه كارهات حياتكن ..
جواهر : وأكثر بعد ، يارربــــــــــــــي متى نفتك

.....

عقب الغدا نشينا نحن البنات ورحنا المطبخ ..
جواهر : ارمسي شو مستوي ..

قلت : تدرون سوالف حمدوه هالخايسه ..
جواهر : هي وبعدين
قلت : اليوم وأنا أبا أنزل ما شفت تحت هي كانت ماده ريولها جان يختل توازني لأني دعمت ريولها زين ما طحت ولا تكسرت ريولي .. جان تيودني من خصري وع ع ع

الجوهره : أخ خ خ كيف مستحملتنها انتي
قلت : متى افتك منها يا ربيه ..
جواهر : وبعدين ..........

قلت لها : جان أقول قومي يالحيوانه شو انتي ما تخافين ربح على هالحركات ...
جواهر : قويـــــــــــــــــه ...

قلت لها : والله لوعت جبدي بحركتها ،، لو تشوفين شقايل تحضن البنات جبدج تلوع ..
الجوهره : وع ع ع مقززات هالبويات ..

قلت : وأكثر ، ما ادري هاييل أهاليهم شقايل مستحملينهم ..
سمعنا صوت أحد دش المطبخ ...

صخينا أع ليكون سمعنا بنروح فيها ..... طالعنا بعض نحن الثلاث ..

يوسف : الجوهره شي بارد ...؟
الجوهره : هي شي بيبسي وكولا وسفن آب ..
يوسف : أختج حوله ما تنحب ...
أنا والجوهره : ههههههههههه
جواهر يودت خصرها : متعودين ينكتون علي ، والله اني هب حوله وغرشوبه ، انزين ان ما راويتكم ..
وبعدين كل شي الجوهره جيه أنا مالي رب يعني

يوسف : هههه لا بس اعقلي عقب بتقولين غيرو اسمي .. من كثر ما نزقرج ..
جواهر : لا بتم جذا عاد أحسن ..
يوسف بيطلع : الجوهره يييبي لي بيبسي ..
الجوهره : انشالله ..
طلع يوسف ... جان جواهر تقول : ليكون سمعنا ..

الجوهره : لو سمعنا بنروح فيها ، بيقول جيه ما خبرتوني من قبل عسب ما يصير شي أكبر ..
قلت : لا انشالله ما يصير شي أكبر .. الين ألحين بس بالكلام ما حاولت تتجرب منّي هاك الزود ، وكلها شهرين ونفتك ..

جواهر : الجامعه بناتهم أخس هاللي سمعته ..
الجوهره : بس فالجامعه كلنا بنكون مع بعض ..

قلت : هذا اذا جواهر وميثاني ما رسبو ...هههههه
ماحسيت الا بـ بوكس على مقبضي : آآآآآآع شو من ايد عليج مطرقه .. أعوذ بالله

جواهر : تستاهلين ، يلا أنا سايره أتجهز حق حقلة باجر ..
قلت لها : سيري سيري أحسن ..
الجوهره : أنا بودي بيبسي حق يوسف وبيي

قلت لها : أنا سايره الصاله اللي فوق بترياج اهناكي
الجوهره : أوكي ..

رحت من ع الدري تميت أمشي بـ هدوووء الحمدلله ما حسيت بدوخه قمت كل فتره وفتره أروح أجيك ع الدم اذا أوكي ولا ناقص حبوبي أخذها ع الموعد .. انشالله حالتي تتحسن وأنسى شي اسمه مستشفى جبدي لاعت منه ..

شفت عموري يدام البلاي استيشن وعدول وعلاوي ل واحد وياه بي اس بي ,,,
قلت : عمور شو هذا انت وايد تقعد ع البليستيشن ..
عمور : آخر لعبه آخر لعبه ..

قلت له : نش ذاكر يلا ما شي ،،، بسك حشا يوميا ترد من المدرسه مطيح يدامه ..
عموري : حرام نواري حرام .. وبعدين بذاكر يوم نروح عند المدرس ..

قلت له : عموري فديتك ما يصير كلّه نعتمد ع المدرس لازم روحنا بعد نذاكر عسب نييب درجات أوكي ، يلا حبيبي قوم ..
عمور نش بضيق : انزين ,,,

ابتسمت له رد لي الابتسامه .. قلت : عدول علاوي نشّو يلا بسكم ..
عدول : أنا صف ثالث ما يصير أذاكر روحي ..

علاوي : وأنا بعد ثالث يعني نفس عدولي
قلت لهم : لا والله ،، جيه يعني صف ثالث ما يذاكرون رواحهم .. على راسهم ريشه ..
عدول : لا استاذ العربي يقول ... ممتك بتزاكر لك يا شاطر ...

يابها بطريقه تضحّك : هههههه يغربل عدوينك نش يلا ، أونك تقص علي .. يلا ودرو هاللي في ايدكم وذاكرو ..

ماقامو الين سحبت منهم البي اس بي دشّو يذاكرون أشك يعني اذا بيذاكرون عدول مستوي فوضوي متعب مرت عمي شوي بس لما يشوف عمي يصخ ما يرمس خخخ أحسن ..

لفيت وراي .........: ماشالله مصلحه اجتماعيه ..
طالعته : ههه ياسر من متى اهني ..
قال : سمعت المحاضره كلها هههه

قلت : يا ريت لو بتصير مثلهم وتذاكر بعد ..
ياسر : أميه هاي جامعه هب مدرسه .. يعني أي كلام المهم نتخرج ..
طالعته : فـ نظرك جذا ..

يت الجوهره .... : نورو ..
قلت لها : تعالي طالعي أخوج شو يقول
الجوهره باستغراب : شوووه ..؟

قلت لها : يقول المهم يتخرج النسبه مب مهمه ..
الجوهره : الأولاد وتفكيرهم .. جذا
ياسر : هههه لو جواهر تقول وتفكيرهم الغبي ..

ضحكنا وطلع ياسر تمينا أنا والجوهره قاعدين أنا شغلت التلفزيون والجوهره يدام اللاب تسوي لها تقارير ..

قلت لها : تقرير شو عليج ..؟
الجوهره : عربي وانجليزي ..
قلت لها : قررتي عن شو تسوينهم ..
الجوهره : لا بعدني ..

قلت لها : خذي تقاريري عندي نسخه .. نحن مو من نفس المدرسه عادي ..
الجوهره : مالج عن شو ..؟

قلت لها : العربي عن أبي قاسم الشابي والانجليزي عن الايديوكيشن ان ذا يو اي ايي ..
الجوهره : أوكي ...
قلت لها : شوفيهم في الفولدر رقم 5 فالداكيومنت ..
الجوهره تمت تقرا التقارير .. وأنا تميت حاطه قناة العفاسي في محاضره دينيه وايد عيبتني ..
الجوهره : نواري تقاريرج شي ..

قلت لها : ترا كله من النت مب من عندي بس أدخل مواضيع في بعض وأييب مراجع من عندي ..
الجوهره : كلنا جذا الله يخليج ..

قلت لها : ها خلصتي ..؟
الجوهره : هي ، بس باجر بطبعهم في المكتبه ماشي مص في طابعتنا ..
قلت لها : الله يخليج دوم جذا نحن .. هههه

الجوهره : نواري انتي رديتي شرات قبل ..
قلت لها : جوجو انا كانت لي أسبابي أتغير أول شي وفاة أمي وعقب عشنا روحنا مع أبوي وتوفى وودرنا الله يرحمهم .. بس انتي ليش تغيرتي ..

الجوهره : روحي ما أدري ..
قلت لها : الجوهره انتي ما كنتي جذا ارمسي ...
الجوهره : والله روحي ما ادري ..
قلت لها : بس يلا زين رديتي شرات أول ..

الجوهره : نواري تدرين يوسف كان يوديني عند طبيب ..
قلت لها : هي أدري جواهر قالت لي ..
الجوهره : كلهم قالو ماشي فايده وجذا .. بس يوسف تم يوديني كل الجلسات وصرت أوكي الحمدلله ..
قلت لها : الحمدلله ..

الجوهره : الدكتور قال فيه ناس جذا يشوفون أحد غيرهم أو حد مقرب منهم يستوي به جذا يصيرون جيه ..
قلت لها وأنا ابتسم : فديتج أنا ومنو هالنااااس هاااه خبريني ..
قالت لي : اندوك انته .. الحين أونج ما تعرفين انتي بعد منوووه ..

قلت لها : فديتج والله أول مرة أعرف انه بعده في شخص يحزن لحزني ويفرح لفرحي ..
قالت : نواري خاطري نرد شرات أول ..

قلت لها : يا ريــــــــت والله تدرين كنت أقول انتي لج من يطلعج من حالتج أما أنا نو وي ..
قالت لي : حرام عليج .. أنا وين رحت ..
قلت لها : هههه بعدج ربيعة عمري ..

الجوهره : لو جويلز تسمع الحين بتكفخني وياج ..
قلت لها : هههه صدق بس هاي عندها ميثاني الخبله شراتها ..
الجوهره : نواري تعالي حجرتي براويج أشيا ..

رحت وياها دخلنا الحجره .. هاي مو أول مره أدش الحجره أدشها دوم بس أستغرب عكس حجرة جواهر في كل شي .. جواهر حاطه صور وكمبيوترها وشغلات جذا أما الجوهره ما تحب عكس جواهر ...
يلست ع السرير ...

الجوهره فتحت كبتها .. وطلعت البوم يت صوبي
قالت لي : نواري تتذكرين هالصور ..
شفت الصور : اممم هي قبل ما ادري كم سنه ..
الجوهره : طالعي هالصوره ...

شفت الصوره أنا والجوهره لابسين نفس البدل ونحن صغار شكلنا برئ ...
قلت : جوجو طالعي كشتي ..

الجوهره : هي ماما دوم تقول انج ما تحبين تسحيين شعرج ههههه
طالعتها يودت قلبي : ليكون يدام الكل ...
الجوهره : هههه هيه يدام كلهم ..

قلت لها : عموه فضحتني فضيحه .. الله يهداها ..
الجوهره : طالعي هالصوره ....
شفت الصوره دموعي بغت تهل خلاااااااااص .......ما استحملت ... دموعي نزلت ...
بللت خدودي ....

رميت روحي في حضن الجوهره ........ وتميت أصيح وأطلع كل اللي بداخلي من عنا وتعب .. وشوووق لفراق أغلى ناسي .......

الجوهره : نواري لو أدري بتسوين جذا جان ما راويتج ..
شفتها وقلت : الجوهره ... احرقي هالألبوم ..
الجوهره تخرعت : لأ نواري حرام عليج هذا فيه أحلى ذكرياتنا ..
قلت لها : قلت لج احرقيه ..

الجوهره بدت تصيح : مو بس انتي اللي تحبين عمي كلنا نحبه كلنا ...
طالعتها نزلت دموعي ...... ما رمت أستحمل بكا الجوهره يزيد ألمي وحرقتي على فراق أبوي وأغلى ناسي ...

وقفت يمب الباب وقبل ما أطلع سمعت الجوهره تقول .............
ياليتها ما قالتها ياليتها ما نطقتها ........ فتحت بـ هالكلمه آلام وجراااح لا يمكن تبرا بسهوله .. فتحت لي أبواب الجحيم .. ليش كل ما ابي أسد باب ينفتح لي باب ......

الجوهره . : نوره انتي صرتي قاسيه ..........

طالعتها بدت دموعي تنزل أكثر وأكثر الين ما حسيت ماي جسمي خلّص .....

الجوهره قالت قاسيه .. أنا!! قاسيه ،،، توني عرفت بقيمة هالكلمه ... لما قالو لي اياها ..
للأسف وقت متأخر عرفت معناها ...........
بعد ما قلتها لأغلى ناسي ...

قلت له قــــــــــــــاسي وعدتها مرات ومرات .... آآآآه ليت أرجع بـ عمري كم سنه ..
لألألأ مابي كم سنه أبي كم يوم وكم شهر بس .. عشان أصلح غلطتي في حق أغلى ناسي ..
أنا السبب أنا السبب بنزول دمعته أنا ..........

طالعة صوب الجوهره : بس الجوهره خلاص يكفي ........
وازداد صياحي وبديت ارتجف ما ادري خوف حنين شوق ضعف قله حيله ... الله أعلم ..
الجوهره تصيح : كلنا نحبه مو بس انتي .......

قعدت ع الأرض وأنا أتذكر ذاك اليوم .. كنت قاعده يدام أبوي .. وما حسيت بـ قيمة الجلسه ولا قيمة الوقت اللي أقضيه ...... معاه ، الا بعد فراقه .. بالفعل ما نعرف غلاة الواحد الا بعد فراقه .... بس ليت ما فارقته ... ليته يمبي يحس باللي أحسه من بعده ...

قعدت متحسره وانا أصيح قلت : أنـــــــــــا ما أحبكم كلكم أنا بس ابا أبوي ......
أبــــــــــــــوي ليش رحت وودرتني روحي لييييييييييش ..؟

حسيت بالكل حولي يهديني ... بس أنا ما طعت أحد ... أبــــا أبوي بس ما أباكم ،،،أكرهكم كلكم كلكم واحد واحد كنتو تردون أبوي بيفارقنا ولا حد قال لي ومحد علمني ...

ما حسيت باللي يصير حولي ........ أحس روحي رحت لـ عالم ثاني بعيد عن الناس كلهم ..

حسيت بـ الأمان .. حسيت أبوي يمبي وأمي بعد خلااااص أنا وياهم تحقق مرادي ....
بس قمت على صوت الدكاتره حولي ..... حسيتهم كلهم حولي ....
طالعتهم بديت أصيح : أبــــــــا أبوي ما أباكم
ما أذكر شو كان يقول الدكتور ............
بس اللي أشوفه اني قاعده أضرب الدكتور : انت ذبحت أبوي انت ,. ابوي مات عندكم انتو ذبحتوه انـــــــــــــــــــــ ............................،،،،

للحظات حسيت بنمال تمشي في عروقي ......... وتاكلني أكل كأنها تشفط دمي .....
للحظه حسيت العالم كلّه يحتك في بعضه .. وكل شي صار أبيض ... البياض عم المكان بس تبعه ســـــــــــــــــــــــــــواد حالك غطّا عيوني ..........

................................
تمنيت انّه اللحظة اللي الله يوافيني فيها ... بس أنا شو من أعمال أحملها معاي ...
أحمل معاي مشاركات في منتديات تفوق عدد مشاركات باقي الأعضاء .. أحمل معي درجات
كلها فوق التسعين ... أحمل معي ورث بورثه من أبوي ..........

بـــــــــــــــــس كل هذا ماراح ينفعني كل هذا ما يسوا شي واحد يدام حسنه وعمل صالح ..
للحظه غيرت أمالي قلت مابي أموت مابي ........... ورديت قلت أبي أموت أبي الحق أمي وأبوي ,,, أبي أسكن عندهم .. بس هالشي مو في صالحي ... فضلت الحياة الدنيا ... قلت يمكن بعد وعيي بزيد في عدد حسناتي وأعمالي الصالحه ............ وعقبها أروح أي مكان وين ما يكون ...........
.............................

،،،،،،،،،،،،،،،،،،،،،،،،،،،

................:::: أبا مــــــــــاي ......
محد سمعني ... منو بيسمعني أصلا ...
حاولت أعلي صوتي ........ كثر ما أقدر للأسف مافي أي اجابه ....
بديت اصيح بصوت عالي ........
حسيت بناس يتيمعون حولي ........

والكل مبتسم .... حسيت روحي بـ حلم .... حاولت اطالع عدل الين صفا نظري ...
الدكتور : الحمدلله على سلامتك يا نواره ..
طالعته ما قدرت ارد غير اني أقول : ابا ماي ...
الدكتور : طيب انتي ارتاحي شوي ... كيفك هلأ ..

طالعته حاولت أشيل روحي وأقعد وقعدت من بعد عنا ...........
حسيت بألم يسري بجسدي ألم سيطر على كل جسدي ....
الدكتور : كيفك هلأ .. في شي عم يوجعك ..؟

قلت له وأنا أأشر عالوريد .: هـــ ........ــــــذا ......
الدكتور : أي بسيطه انتي ارتاحي وكل اللآلام بدّا تروح ... طيب يا شطوره ..
طالعته : وين أهلي ...؟

الدكتور : هلأ عمك وائف برا بدنا نوديكي حجرتك وبيزوركي ..
حسيتهم ييروني من على سرير طول الوقت كنت مغمضه عيوني حسيت روحي أبي أرقد تعبانه ما أقدر أفتح عيوني بعد ...

وصلت لحجره حسيت الباب ينفتح يتسكر الله أعلم ،،، بس اللي حسيت به ايد دافيه تمشي على شعري ....
حاولت أفتح عيني بعنا ... فتحتها ابتسمت ........ حسيت بـ الأمان ,,, لوا علي ..

.............: ها حبيبتي شخبارج ..؟
قلت له : بخير عمي ....
طالعني : الحين بييون كلهم انشالله
قلت له : شاللي يابني اهني
عمي : انتي ارتاحي وعقب يصير خير ..

سمعت صوت كلام من صوب الباب .. دشو كلهم .. عمتي ومرت عمي والبنات ...
سلمو علي وتحمدو لي بالسلامه ...

قلت : وين الجوهره ..؟
مرت عمي : وراها تقارير .. بتيي عقب انشالله ..
طالعتها : ليش أنا اهني

محد رد ما ادري ليش على طول الكل غير الموضوع من عنده ،، بس أنا ابا أعرف شاللي صار لي .. شاللي رقدني .. لهـ الدرجه ضعيفه أنا .. طيحه عاديه تدخلني العنايه ...

طالعتهم يتكلمون عقب لحظات بدت الحجره تفضا وتفضا .. الين ما فضت ما بقا غير عمتي ..

طالعتها حليلها هي اللي متعنيه وياي في كل طيحاتي فالمشفى .. متعبتنها وايد أنا ..
بغيت أكلمها بس حسيت روحي ما أقدر .. تغمضت عيوني روحها حسيت بارتياح ...

......................

صحيت على ضو الشمس وهو داخل من دريشة الحجره ...

شفت عمتي قاعده تقرا قرآآن ... طالتها ابتسمت ... مبين عليها التعب ,,, لو أنا مكانها بسوي لبنت أخوي جذا ولا لأأأ .. كل شي جايز بـ هالزمن ..

عمتي انتبهت لي : صـــح النوم ..
طالعتها : صح بدنج الغاليه ..

عمتي راحت صوب الريوق وقدمته منّي .. الين صارت طاولة الريوق جريبه عني ..
عمتي : كلي حبيبتي ..
قلت لها : مب مشتهيه ..
عمتي : لازم تاكلين لو ما تاكلين روحج بوكلج أنا غصب .. مب زين توهم ناقلين لج دم ..

طالعتها وكل حيرة العالم في ويهي .. أنا نقلو لي دم .. بس أنا فحصت ذاك اليوم ودمي كان زين .. شاللي جلب أنا اش كثر كنت طايحه ..

قلت لها وأنا كلي حيره : بروح بتغسل وبيي لج ..
عمتي : انزين

ساعدتني وأنا أنزل حسيت بدوخه فالبدايه ... اكيد لأني فتره ما مشيت ... بس توازنت
ولما رديت قعدت عالسرير وكليت ... حسيت جبدي لايعه فالبدايه عقب بديت أكل بشهيه ..

طالعت المغذي في ايدي .. وشفت ايدي الثانيه بعد فيها الابره اللي تنحط فالوريد بس هذي غالقينها مب واصل لها شي استغربت ...

قلت : عموتي كيف ييت أنا اهني ..
عمتي : ذاك اليوم طحتي وكنتي منهاره وتهذرين وايد ..
قلت لها : شو كنت أقول .,

قالت : ما أدري والله الجوهره بس تدري ومن هاك اليوم حابسه روحها ما تطلع ويانا ولا ترمس ...
قلت لها : كيف يبتوني وشو صار عقب ..؟

عمتي : يبناج دخلوج العنايه لأنج ما كنتي تتنفسين عدل .. وايد ضاق عليج .. عقب الدكتور طلع قال لازم ينقلون لج دم دمج ناقص وايد ..

قلت لها : ومن شو ضيق التنفس ..
عمتي : من التفكير يقول الدكتور أو من الدراسه بعد لأنه ضغط عليج ..
قلت لها : منو عطاني دم انزين ..

عمتي : يوسف و الجوهره ..
قلت لها : هاااه يوسف والجوهره . . جيه لـ هالدرجه دمي ناقص يتبرعون لي اثنين ..
عمتي : وايد وايد ناقص ما تسمعين الرمسه انتي ، ديري بالج ع روحج ..
طالعتها : عمو نحن أي يوم ..

عمتي : الجمعه ...
تخرعت : هااااااه ... من يوم الأربعا أنا طايحه ...
عمتي : لا تخافين اليوم بيظهرونج انشالله
قلت لها : انشالله ..
عمتي : تريقي يلا هب ناقصين يستوي بج زود روحج ضعيفونه .

.
طالعتها ابتسمت ....... الحين دم أغلى اثنين يسري بجسدي دم الجوهره ويوسف يسري فيني أحس روحي سعيده ... دمي اختلط بدمهم ... آآآآه اش كثر أحبهم أنا ولا أقدر أفارقهم ..

ع الساعه 11 الضحا كتب لي الكتور ترخيص مع كومة أدويه .. عمتي ساندتني لما وصلنا السياره وردينا البيت رحت بيت عمي على طول ودوني الحجره عسب ارتاح ..

قعدت.. و جواهر وعليا وميثا وعمتي ومرت عمي كلهم حواليني بس أنا أبا الجوهره ..
الجوهره وين ..؟ .. ليش ما يت شافتني وأنا أغلى ناسها ..
هذي حياتي لما ما أحتاج لأحد كلهم حواليني بس لما أحتاج لهم ما ييون صوبي أه هذي قسوة الحياة .. .. ..

حزة صلاة الجمعه الكل طلع ... والحريم والبنات روحن يصلن فالصاله ..
طلعت رحت حجرة الجوهره دقيت الباب محد رد علي
دقيته ... بعد ،،،، الجوهره فتحت لي الباب وويهها شاحب مافيه حياه ..... علامات الحزن مرتسمه على ويهها الطفولي البرئ ..

طالعتها ابتسمت لها وبستها .........: اشتقت لج جوجو ...
الجوهره طالعتني صاحت ورمت روحها في حضني حسيت فيها .. أنا بعد محتاجه لـ حضن يدفيني يحميني .. وقامت تصيح بـتأنيب ..

قالت لي : أنا ما أستاهل شوقج لي ..
طالعتها : ليش جوهره بلاج فيج شي ..؟
الجوهره : نواري ،، آسفه والله ماكنت أقصد ...
طالعتها استغربت ....

الجوهره : لو تبين بحرق كل الصور وكل الذكريات الا يستوي بج شي ..
طالعتها . لأ لأ لأ منو قال أحلى شي الذكريات والصور ..
الجوهره استغربت : مو انتي هاك اليوم قلتي أطرهم ..

قلت لها : هههه كنت مو في وعيي ..
الجوهره : نواري أنا أحبج والله ، ما اقدر أستغنى عنج طول عمري
قلت لها : وأنا بعد ...

...........: لا والله ، من متى عندنا بنات يتغزلن في بعض ...
لفينا متخرعات ...

الجوهره : ههههه يخس بليسج خرعتينا ..
ميثا : أحسن لي أروح عند جواهر ،، وأودر العاشقات رواحهن
ابتسمنا لها ،، الجوهره سحبتني وقعدتني ع السرير ,,,
الجوهره : ارتاحي مب زين الوقفه وايد ..تتعبين عقب

قلت لها : هههه جوجو دمج يسري فـ عروقي
الجوهره ابتسمت : فديتج أنا ... أصلا لي الشرف ان دمي يسري بـ عروق نواري ..
سمعنا صوت عمتي تدور علي ... الجوهره راحت نادتها ..

عمتي يت بصينية الأكل ووكلتني غصب عني الين حسيت روحي بنقع من كثر ما كليت ..
قلت : عموتي والله بسني ..
عمتي : ماشي يلا كلي ..
قلت لها : والله بسني بنقع خلااااص ..
عمتي حطت الملعقه فالصحن .. وقالت : يلا خذي الدوا ..

عطتني حبوبي بمراقبه واعتناء .. حسيت انها أمي أوشي غالي لا يمكن أستغني عنّه طول عمري ... واذا راح يمكن اتينن بسها الصدمه يتني مرتين ..
قلت : عمو انتي وايد حنونه علينا ..
عمتي حضنتني .: فديتج لو ما أكون حنونه عليج على منو بحن يعني ..
قلت لها : عمو وايد تعبتج وياي صــح

عموتي حضنتني وبدت تصيح : تعبج راحه يا بنت خليفه ...
بدت دموعي تهل تمسكت بها أكثر ,,, بغيت أحضنها طول عمري ولا أستغنى عنها ..

قالت : مثل ما ربيت أبوج وهو صغير بربي عياله بعد ..
طالعتها : عمو أبوي كيف كان ...؟
عموتي ابتسمت وغيرت الجو ... وقالت : كان فوضوي شرات عادل ..

قلت لها : هههه أشوف نحن طالعين على منو ..
قالت .: وراسه يابس عنيد شرات نااااس ..

ابتسمت لها .. وضميتها بقوه وقلت : عموووه لا تودرينا والله نحبج ،، ليكون تسويين شرات بابا وماما وتتركينا ...

قالت لي : لا حبيبتي بتم وياج طول ما أنا عايشه انشالله انتي قطعه من الغالي ..
قلت لها : كل اللي أحبهم يفارقوني بين يوم وليله ..
عمتي : انتي ادعي ربج وانشالله يسهل عليج حياتج ..

قلت لها : عموتي بداوم يوم الأحد ..
عمتي : لا لا ، ماشي ,,, تريي الين الثلاثا ع الأقل ..
قلت لها : مافيني ، ع الأقل يوم أروح المدرسه أرتاح أنسى الهموم
عمتي : بس بتتعبين جسديا ..

قلت لها : المهم نفسيا عموه والراحه الجسديه تيي من النفسيه ..
عمتي بروح : بلا هذر زايد يالفيلسوفه.. أنا بسير بتغدا يوعانه من يومين كلّه أكل مستشفيات

طلعت وهي تبتسم لي .. تفديتها من داخلي ومن كل أعماقي .. ربي يحفظها لي ولعيالها ...
مر يوم الجمعه مع بنات عمي وعمتي يوم وايد حلو في قمة الروعه ... حسيت بالسعاده أهلي حولي .. حتى ولو مو مكتملين بس هذييل بعد أهلي اللي يحبوني وأحبهم ...

يوم السبت رحت الموعد مال المستشفى الدكتور فحص دمي وشاف كيف حالتي قال وايد تحسنت .. تم ينكت ويقول عن أضربهم مرة ثانيه هههه يتني الضحكه بس ما ضحكت لأني قافطه على موقفي اللي سويته من يومين وضربتهم ... المفروض الواحد يتمالك أعصابه .. بس أنا لي أعذاري حالتي كان يرثى لها .. ما كنت بوعيي بعد .. بس هالشي راح يضل ذكرى بـ حياتي لا يمكن أنساها ... نعم لا يمكن أنسااها لأنها شاذه عن البقيه ...

مر يوم وبعده يوم كل يوم مثل اللي قبله بس الفرق يوم تقل الآلام ويوم تزيد .. هذا حال المواجع ... يوم الاثنين قمت الصبح حسيت بنشاط ... ما أدري ليييش ..؟

بس أكيد .. لأنه مر أكثر من يوم على رقادي فالمستشفى ... يوم بعد يوم اذا حافظت على روحي حالتي بتتحسن أكثر عن قبل ..
تسبحت ولبست ..

رحت صوب حجرة جواهر لأني خلاص أرقد مع الجوهره .. جواهر ما زعلت لأنها مو نفس طبعي هي وميثاني ,,, وأنا والجوهره ...

تذكرت انهم مدرسه اليوم .. رجعت الحجره شفت السرير .. حلاته وأنا أنش الصبح وأشوف أغلى ناسي .. وبلسم جروحي يمبي ... ننام مع بعض نصحى مع بعض .. نصلي مع بعض .. نحس بمواجع بعض ونفرح سوا ... كل شي متشاركين فيه ..

آآآه ملل البيت بدون الجوهره ... أحسها فرحة البيت ..
شفت روحي فاضيه .. والحين الساعه تسع ..

رحت حجرة عموري وعادل وعلاوي ... الحجره كبيره تسدهم .. حلوه حياتهم بلاي ستيشن طايح .. وملابس مفرفره ما تنشال الا يوم أحد يشيلها .. حلوه حياة الطفوله أكبر همومنا ألعابنا ...

رديت الحجره .. فتحت الكتب .. حاولت أراجع اللي طافني هالثلاث أيام .. حليت الأسئله وما تعبت فالدراسه لأني أراجع أول بـ أول ..

الساعه 10 ونص تذكرت روحي مب متريقه ,,, أويــــــه والدوا لازم الساعه 11 أخذه ...
سمعت باب الحجره يندق وحد دش ...

............: نواري نشيتي .. كنت يايه أوعيج عشان الدوا ..
قلت : هي عموتي ... كنت قاعده أذاكر ..
مرت عمي : زين عاد يلا تعالي تريقي عسب الدوا
قلت لها : أوكي الحين بلحقج ...

استانست بخاطري لو نسيت دواي عادي .. في ناس مهتمين بي ويعطوني الدوا.. مو شرط .. أنا أتذكر ...
نزلت .. رحت المطبخ شفت مرت عمي مسويه سندويتشات ..

خذيت لي وخذيت الدوا معاي أصرت الا أكل عندها وأشرب الدوا اهني ..

سمعت كلامها وقعدت وياها تريقت وخذيت الدوا قعدت مع مرت عمي وهي تجهز أغراض الغدا .. تميت أسولف وياها ... حسيت الوقت راح بسرعه .. حلوه حياة الصبح ..
نحن طول الصبح في المدرسه ولا نعرف شو يصير فـ العالم الخارجي ..

رحت الحجره أكمل دراسه عسب ما تتراكم علي المواد .. حاولت أخلص بسرعه .. راجعت وحليت أوراق عمل الين ما أذن الظهر صليت ييت أصلي دعيت ربي يغفر لأمي وأبوي .. و تميت أقرا قرآن الين حسيت روحي خلاص بينهد حيلي وبطيح مكاني من التعب اللي فيني ..
رحت حطيت راسي وأنا مرتاحه ...

ما حسيت بروحي الا وصوت الجوهره تقول نواري نشي صلي العصر ..
قمت وأنا متخرعه .. كل ها رقاد .. ما أشبع رقاد أنا حشا ..

رحت تيددت وصليت وعقب نزلنا أنا والبنات نتغدا .. لأنهم ييون جريب أذان العصر ...

عقب الكل رد لحجرته يذاكر ... الجوهره فهمتني المسائل اللي طافتني .. وفهمت منها عدل لأني أحبها .. أي شخص أحبه في هالدنيا لازم أفهم نظراته .. أفهمه متى يحزن بدون ما يقول أي كلمه .. فما بال اذا شرح لي وقال لي ...

............

صحتي تحسنت خلال أيام الأسبوع .. يا يوم الخميس لازم أغيب لأنه عندي موعد فالمستشفى صحيت من نومي تسبحت وتجهزت .. نزلت تحت أتريق .. شفت روحي مب مشتهيه شي .. قلت خل أشرب بس حليب وعقب ما أخلص فحوصات بشتري لي ريوق من المستشفى .. رحت المطبخ طليت .. الحمدلله مافي أي أحد .. لو مرت عمي اهني جان تذبحني لو تدري اني ما بتريق حليلها هههه تخاف عليه .. رحت صوب الثلاجه طلعت الحليب ييت أصبه فالقلاص لأني أحبه بارد وبس ...

سمعت صوت عروقي فزت .. وجسمي كله ارتعش ...

؟؟؟؟؟؟؟؟؟؟؟ظ