منتديات قصايد ليل - عرض مشاركة واحدة

11-17-2011

الحلقه العاشره ..

جواهر : هاي نورو هب أنا .. فهد ميثاني وياك
قال : مبين .. هي ميثا وعليا ..
قلت : فضحتنا جدام الناس ..
فهد : هههه من يومها فضيحه ، منو يايبنكن ..؟
جواهر : ياسر ، وراح بوظبي يقول عنده شغل ..
فهد : بتردون ويا منو ..؟

قلت : يوسف بيمرنا ..
قال : اتصلو به خل لا يمر أنا بوصلكن
قلت : أوكي بس نستأذن قبل

فهد : سيرو صوب محل لايف استايل ميثا وعليا اهناك
قلت : أوكي
ابتعدنا عن فهد ونحن بـ وجهتنا لصوب ميثا وعليا

قلت : تعالي جوجو ميثاني الحين مب شاريه أغراض المدرسه جيه يت اليوم
جواهر : ترا أمس قلنا لها بنيي اليوم أكيد عسب جذا يت
قلت : والله هالبنيه رقله على قولة ياسر هههه
جواهر : سأل عنها أونه ..

قلت : والله كل شي جايز هالزمن .. مو بعيده يرمسون بعض بعد
جواهر : هههه لالا .. ميثاني بس يدامنا قويه ولا هناك اخرطي
قلت لها : وين ها بعد .. ضيعنا شكلنا

جواهر : لازم ،، عاد من زود ما نيي المول عسب نحفظه هههه
قلت لها : هههه صدقج والله
جواهر : نوره نوره طالعي

قلت : وين ..؟
قالت : هناك ..
طالعت : أويه شو يايبنه ..؟
جواهر : تعالي نروح صوبه ..

،،،،،،

جواهر : هلا ..
.......: هلا ..

جواهر : يوسف شاللي يايبنك ..
يوسف : جيه ما تبيني أيي ..؟
جواهر : لأ قصدي منو خبرك خلصنا ..

يوسف : لو ياسر مب مخبرني جان رقدتي اهني بعد
جواهر : هي عادي أسويها تراني ..
يوسف : هههه يلا بـ نتغدا اهني

استغربت من يوسف اليوم وايد فري مع جواهر .. يوم متشدد ويوم أوبين شو السالفه .. والله
انسان غامض .. ما ينعرف لك يا يوسف ..

جواهر : يوسف يوسف ... ميثاني وعلايه اهني ازقرهم خل يتغدون ويانا
يوسف : على حسابج ..؟
جواهر : لأ لأا .......عاد خلاص بلاها العزيمه هههه
يوسف : شحيّه ..هههه ، يايين ويا منو
جواهر : فهد جنه يايبنهم ..
يوسف : آهاا

كنا قاعدين نمشي وأنا طول الوقت ساكته لا أطالع يميني ولا يساري بس دربي .. مب ناقصه
أكل هزبه هـ الانسان متقلب الأحوال ..

يوسف : نوره .. شريتي كل شي ..
استغربت يسألني أنا .. ؟ جان أقول : هي شريت كل شي
يوسف : وين أغراضكن ..؟
جواهر : عطيناها حق ياسر ..

يوسف : أنا أقول لو اني مب ياي جان رقدتي اهني
جواهر : هههه
ابتسمت طالعت يميني ..: هكو قوم ميثاني ..
يوسف : سيرو ازقروهن ..
رحنا أنا وجواهر صوب عليا وميثا ..

ميثا : وأخيرا ما بغيتو تييون
عليا : ريولي تكسرت من كثر ما اتريا
جواهر : يلا يلا يوسف عازمنا ع الغدا ..

ميثا : أنا بيي بس علايه لأ
قلت : ليييش علايه ..؟
عليا : خالد اهني بيطلعني وندور ..
جواهر جنها تحلم : حظهم اللي مالجين

قلت : كيف .. خوانج يخلونهم ..؟
ميثا : أمي .. مالجين راقده انتي .. وبعدين ما بيروحون بعيد اهني فالمول ..
قلت : آهاا .. صدق راح عن بالي انهم مالجين هههه

جواهر : عاد أنا من الصبح قاعده اباغم شو أقول ..
ميثا : خليها عيزت البنيه ..
قلت : ههههه مالت عليكن
جواهر : أميييه يلا نروح صوب يوسف عن يكنسل ويردنا البيت ونتغدا عيش
ميثا : هي مليت أبا شي جيه جاهز مليت من أكل البيت
قلت : يلا امشو بلا هذر

تقدمنا من يوسف بس كان قاعد يرمس مع واحد ..

قلت : بنات جنه فيه واحد نتم اهني ويوم يروح نتجدم
جواهر : هي عن يقطع راسي يوسف

وقفنا نشوف اللي رايحين واللي رادين عقب دقايق شفنا الولد راح
رحنا صوب يوسف

يوسف : ها اكتملت الشله ، وين عليا ..؟
ميثا : راحت ويا ريلها
يوسف : نوره ولد خالج سلّم عليج ..
طالعته باستغراب : الله يسلمه ...

يوسف : بلاج ..؟
قلت له : أول مره أعرف عندي أولاد خال ما جد شفتهم ..
يوسف : بتشوفينهم انشالله

قلت : ما با ما اتشرف .. في قرابتهم ..
يوسف : الله يهديج .. ها بنات شو بتتغدون

جواهر وعليا تمو يقولون ويقولون حشا بيفلسونه حليله .. تميت ساكته منو ولد خالي هذا وكيف يعرف يوسف .. اللي اعرفه أهل أبوي يكرهون أهل أمي وأهل أمي يكرهون أهل أبوي ..

رجنا قعدنا فـ صوب وتغدينا ... عقب الغدا يلسنا شوي ..
جواهر : شكرا أخوي الغالي ع الطلعه ..
يوسف : أدري لو مو هـ الطلعه جان بتحشين وراي حش ..

كلنا طالعنا بعض ابتسمنا .. على كلام يوسف عن جواهر ..
جواهر : الله يعيني باجر ع نشة الفير ..

ميثا : لا تلوعين جبدنا من الحين ، خلينا نستانس ..
قلت : هذا وانتو تعرفون البنات اللي بتشوفونهم باجر وجذا ، عاد أنا الله يعيني ..
يوسف : نوره ترا باجر بتصدعين من صوت جواهر وهي تصارخ لازم شي ضايع هههه

طالعته وضحكت على جواهر : لـ هالدرجه مهمله جوجو ..
جواهر : حشا سمعتي رايحه فيها مره مره ..

تمينا نسولف ، استغربت من اهتمام يوسف لي وكلامه معاي غريبه أبد ما سواها .. بس هو يوم جذا ويوم يجلب اميه وثمانين درجه .. الله يعيني ..
عقب تمشينا شوي ويوسف ردنا البيت ..

يوم رحنا حجرتنا أنا وجواهر
جواهر : تدرين نورو يوسف نادر ما يطلعنا ..
قلت لها : هي شكله جذا هب مال قوم طلعات
جواهر : دوم يطلع مع ربعه أما نحن نو وي

قلت لها بروح : أكيد ، لو طلع وياج بـ تفضحينه ..
جواهر : هههه حرام عليج عاد هب لـ هالدرجه ..

العصر رتبت كتبي .. لمّا يينا بيت عمي شليت معاي الأشيا الضروريه وبس ..
طالعت ع الكتاب .. هذا الكتاب قبل اسابيع بابا كان يسمعني .. آه يابوي آه فقدتك ..

شفت دموعي قاعده تطيح على صفحة الكتاب .. مسحت دموعي ..
أنا لازم أصير قويه وأنسى قبل كان عندي سند يدافع عني ويوقف معاي بس الحين لأ ..

لازم أنا اللي أواجه مشاكلي روحي .. وادافع عن خواني .. مالهم فالدنيا أحد غيري ..
مر اليوم عادي شرات الأيام اللي قبلها حسيته يوم في قمة الملل ..

ما أدري باجر لأي مدرسه بروح .. منو اللي فيها .. وكيف بناتها .. وشو تربيتهم ولا المعلمات
ما أعرف عنهن شي .. ، يا ترى هل بتأقلم مع البنات ولا لأ ,, بيحبوني وأحبهم ولا يكرهوني..

وينج يا شيخه ليتج وياي ليتج .. بس مستحيل نرد نكون مع بعض مستحيل خلاص هذا قدرنا و
افترقنا .. ع الأقل انتي فراقج هيين لأني أدري انج عايشه ع الأرض ويمكن يوم من الأيام بشوفج ونلتقي .. أما ابوي خلاص راح راح ماله رجعه ..
.......

صحيت على صوت أذان الفجر ..
يا ربييييه حلاته من صوت .. يوم الواحد ينش على اذان الفير ,, يقولون زقزقة العصافير بلا
عصافير بلا بطيخ ..

رحت تيددت وييت صليت وقريت لي جم من صفحه فالمصحف اللي اهداني اياه بابا ..
هذي الذكرى الوحيده اللي لا يمكن يستوي بها شي أو حتى تضيع ,,

كل شي يضيع يخترب ينكسر يروح عليه الدهر .. الا المصحف .. احلى هديه والله يا باباتي ..
لازم يوميا أقرا جزء كامل عشان أختمه كل شهر أنا وعدتك يالغالي ولا يمكن أخلف بوعدي ..

تجدمت من جواهر شفتها راقده ..
قلت : جواهر جواهر نشي صلي الفير
جواهر : هممم خليني راقده
قلت لها : وراج مدرسه حوووه نشي
جواهر : وع ع ع يالأرف .. بنش عقب ..

ودرتها محد يعرف لها غير عمتي مزنه .. رحت صوب الحمام وتسبحت طلعت .. وايد برد
شوي وأتثلج من البرد ..

رحت شغلت الدفايه .. وجففت شعري وأنا أجفف
جواهر : بندي هالأرف .. ورانا أرف وتبا تأرفنا بعد

ضحكت فـ خاطري المدرسه عند جوجو اسمها أرف مزبله خربطه كل مسميات العالم الوسخه
لــلمدرسه هههه والله جواهر قصه .. روحها

رحت صوب الكبت طلعت ملابسي لبست وتجهزت ولبست شيلتي بعد .. والبوت ..
تجهزت خلاص .. قلت اليوم اول يوم بروح المدرسه خل أحط لي جحال بس .. حطيت جحال عالخفيف ما يبين بعد يمكن وقلوز خفيف على لو شفايفي ..
وأنا أحط آخر لمساتي شفت جواهر نشت متخربطه وراحت تتسبح وتسوي بسرعه .. والله حاله
تجهزت ع الساعه ست وربع ونزلت ..

عمتي : ها نشيتي ..
قلت لها : هي
عمتي : أنا ييت الحجره الساعه ست الا ربع أوعيكن شفتج مب ع السرير جان أقول أكيد راحت تتسبح ..
قلت لها : هي نشيت مبجر ..

عمتي : تعالي تريقي ماما ..
رحت قعد ع الكرسي مالي خاطر اتريق تريقت غصب عشان اخذ الحبوب مال الدم ..

خلصت رحت قعدت فـ صوب
شفت عموري وعدول بعد قامو وعلاوي وكلهم جاهزين يو يتريقون
عموري ياه صوب مرت عمي وباس راسها .. كنا نسوي هالحركه لأبوي الله يرحمه ..

طالعته عيوني امتلت دموع .. بس تميت أعابل بطرف الشيله لما الباص ييي ..
قلت حق مرت عمي : عموه الباص بيمرني اليوم
عمتي : لا اليوم عمج بيوديج وعقب الرده الباص بييبج عسب يندل البيت
قلت لها : هي صح ..

عمتي : ديري بالج ع روحج عدل ..
قلت لها : انشالله
عمتي : عموري وعدول فـ نفس المدرسه مع علاوي

قلت لها : يلا زين ع الأقل تعرفون كيف الأساتذه اللي عندهم والأولاد
مرت عمي : هاي جواهر بعدها ما خلصت
قلت لها : لا يوم نزلت راحت تتسبح

مرت عمي : دوم مأخره الباص زين الجوهره وياها ولا جان الباص يوميا مودرنها ..
قلت لها : هههه جوجو دوم جذا متأخره فـ حياتها ما كانت اول وحده
عموري : الساعه سبع الا ربع عموه ها وقت الباص

عموتي : هي حبيبي سيرو اوقفو برا ..
عموري : عادل علاوي يلا
عادل : نوره متى الاجازه
طالعته : هههه سير حبيبي المدرسه الحين

مرت عمي : عموري دير بالك عليهم
عمر : انشالله
طلعو عموري وعادل
هالحزة عمي ياه عسب يتريق وجواهر والجوهره بعد

عمي : السلام عليكم
كلنا : وعليكم السلام
عمي : اش حالكم يا عيال ..؟
كلنا : بخير
عمي : ها نواري جاهزه ..
قلت له : هي ...

مرت عمي : ماشالله عليها أول وحده ناشه من صلاة الفير ..
عمي : بارك الله فيج بنتي ..
جواهر شلّت ريوقها ..: أنا بسير برا الباص بيوصل الحين ..

مرت عمي : دومها جذي متأخره هالبنيه ..
جواهر شلّت شنطتها بطريقه غجريه وراجت ركض صوب الباب : يلا مع السلامه
مرت عمي : الله وياكم ..

عمي كان قاعد يتريق : وين يوسف وياسر ..؟
مرت عمي : ياسر يقول ماعنده محاضرات اليوم وبعدين هم محاضراتهم العصريه هب الحين
عمي : هي صح غيرو السستم مالهم ويوسف وينه ..؟

مرت عمي : يقول أوعيه الساعه عشر بيروح بوظبي عنده شغل ..

عمي : هي رمسني أمس .. قولي له خل يمر على مكتب حميد الــ ......... ، لا تنسين

شدّت انتباهي هالجمله ، هذا خالي هي خالي شو اللي خلاهم يتذكرون بعض .. يمكن شغل ..
بس مستحيل عمامي يشتغلون مع خوالي .. ليش يا ربييه تذكرو بعض ومالقو يتذكرون بعض
الا الحين يوم ما صار عندي أحد يوم غديت وحيده بـ هالدنيا ..

قطع علي تفكيري صوت عمي : نوره يلا قمنا
نشيت رحت صوب عمي عسب نطلع ..
مرت عمي : تعالي نوره ,,
رحت صوبها وعطتني بيزات ..
قلت لها : ما يحتاي عمو ..
عمي : بنتي خذي ، خلاص الحين أنا ولي أمركم ومسؤول عنكم ..

سكت وقلت فـ خاطري متى أكبر ياربي متى ..؟ ما أحب أكون عال على غيري ..
طلعنا ورحت ركبت مع عمي السياره .. وصلنا صوب المدرسه .. شكلها الخارجي وايد حلو ..
مثل باقي المدارس الحكوميه ،، بس الناس اللي فيها مادري كيف يلا الله يستر

عمي : بنتي أوراقج خلاص جاهزه ,, وانتي مسجله يعني جنج طالبه من زمان عندهم ..
قلت له : مشكور عمي
عمي : يلا عاد ديري بالج ع روحج
قلت له : انشالله ، مع السلامه
عمي : مع السلامه

نزلت وقفت دخلت المدرسه .. فيها وايد بنات مثل مدرستي القبليه بس أكيد أخلاق كل وحده تختلف عن الثانيه محد مثل الثاني ..في الزين وفي الشين ..

دخلت حسيت الكل نظراته صوبي .. الكل يطالعني .. ما ادري لأني يديده ولا شكلي غريب ,,
الله يعلم ..
رحت صوب مجموعه بنات ..

قلت : السلام عليكم ..
قالو : وعليكم السلام
قلت : لو سمحتو وين صف ثاني عشر علمي ..
فيه وحده قالت : اهناك تطالعين وين هذيج الحجره
لفيت ويهي شفت حجرة الفراشات اهناك

طالعتها ما بغيت أرد قلت اروح عنهم بكرامتي أحسن رحت دورت الين حصلت الصف وشفت

الأسامي اللي عالورقه اسمي بينهم .. اسم ابوي بعد اسمي أأأه يالغالي ما تدري اش كثر اشتقت لك .. ومحتاجتنك وايد وايد .. حياتي من دونك عذااااب ..

دخلت الكلاس وقلت : السلام عليكم

فيه منهم ردو السلام ، ومجموعه تّمو يعلقون تعليقات تلوع الجبد .. خلتني أتقرف من روحي بعد .. الله يعيني دام بتم ويا هاييل ..

شفت مقعد فاضي رحت قعدت فـ صوب يت بنيه صوبي
البنيه : هلا والله منوره المدرسه
قلت لها : منوره بأهلها ..
البنيه : أنا وداد وانتي ..؟

قلت لها : نوره ..
وداد : عاشت الأسامي نواري
قلت لها : عاشت أيامج
وداد : انتي من دبي .. ولا اول مره تيين ..
قلت لها : لأ أنا من الشارجه بس خلاص نقلت دبي

وداد : يا هلا .. ع العموم تبين شي ولا شيات ترانا حاضرين
قلت لها : سلامتج الغاليه ..

طلعت وداد .. غريبه ما قعدت مع ولا بنيه من بنات الصف .. بس وايد طيبه مبين عليها صدق
الناس كل واحد وله طبعه ..

شفت مجموعه ثانيه طلعت روحها مبين عليهم هاديات وهب هاك الزود مع البنات ..
فيه وحده دشّت ومقبضها جنه برج العرب .. لا جنه برج دبي لأنه أطول شوي روعتني ..

البنيه : صباح الورد والكادي لأحلى بنات في بلادي ..
فيه وحده تمت تتمايل وراحت صوبها وتباوسو وتمو يسولفون وعقب البنات ازدادو حوالينها
الظاهر عندها شعبيه كبيره من البنات ، بس هاي مو شكل الواحد يرابعها ..

للـحظه وقفت وقالت : بنات أنا بيزي الحين تريوني ثواني
طلعت بالبلاك بيري مالها برا الصف ..

استغربت كبف ييبون تلفوناتهم المدرسه وهاي مرة وحده بلاك بيري ، أكيد يخشون التلفونات ..
دشّت طالعت البنات فيه وحده دشت عقبها وباستها على خدها والفاظهم كلها حياتي وبيبي ووايد
حسيت روحي بين مجموعة شباب قاعدين مع بنات ، ما حسيت اني قاعده مع بنات من جنسي ..
وقفت أم برج دبي هاذي وراحت صوب الصبوره ورسمت حرف الــ h
وقالت : يا حلوه شو اسمج ..؟
استغربت هاي تزقر منو ...

وطالعت صوبي وقالت : يا حلوه شسمج ..؟
قلت بدون نفس : نواري ..

ما ادري ليش طلعت مني نواري هل غيض من هالبنات وتصرفاتهم ولا شي ثاني
جان تكتب يمب الـ h حرف الـ n ...

وقالت بصوت الكل يسمعه : بنات ترا موزه بحّت خلاص الحين نواري أوكيك
استغربت شو تقصد بكلامها موزه ونواري ما فهمت عليها .. قلت ياساتر دام صبحنا ومن أول
يوم جذا عاد الأيام اليايه الله يعيننا ..

رن جرس الطابور والكل راح وقف رحت وياهن وقفت تميت أطالع البنات كل وحده لون وشكل .. وصفاتهن بعد مختلفه .. غير عن بنات مدرستي غير .. اشتقت لشواخ وسوالفها فديتها ..

دخلنا الفصل ودرسنا الحصص الأربع حسيت بالغربه بين هالبنات بس انشالله بتأقلم وياهن ..
ووايد ينكتون علي ويقولون بالتلميح وينج موزي تسمعين حمدان شو يقوول استغربت حمدان مره وحده منو ها حمدان وشو دخله صفنا ..؟

رن جرس البريك طلعنا كلنا رحت قعدت فـ صوب روحي يت صوبي وداد ..
وداد : هلا والله بـ نواري
قلت لها : هلأ .. وابتسمت
وداد : منوره صفنا والله نواري
قلت لها : منور بج فديتج

وداد : ههههه غريبه ما جمعتي .. أكيد عرفتي طينتهم ..
قلت لها : هههه من أشكالهم مبين عليهم ..

وداد : أنا كنت من بوظبي هالسنه ييت عندهم بداية العام ، الله يخليج تعبت وياهن وايد
قلت لها : الله يعيني ..

وداد : بس صفنا اللي جيه فالمدرسه وبعض البنات ينعدون ع الأصابع
قلت : زين ولا مديرة المدرسه بعد بتشرد

وداد : هههه زين نواري ما بتشترين
قلت لها : هب مشتهيه
وداد : قومي يلا ..
قلت لها : عشان خاطرج بس
وداد : هي كلي عدل عن اييج فقر دم

قلت لها : هههه خبرج عتيج فيني فقر دم
وداد : عاد غصباً عنج تاكلين
قلت لها : أوكي باكل خلاص استويتي مرت عمي الثانيه ههههه

وداد : جيه بلاها مرت عمج
قلت لها بحزن : ترانا ساكنين ويا عمي ..
وداد : آهاا خير بس ليكون من الاجارات بعد

قلت لها : يا ريـــــت لو اجارات ، بس ابوي توفى من كم أسبوع
وداد : عظم الله اجرج
قلت لها : أجرنا وأجرج

وداد : آسفه ما كنت أدري
قلت لها : لا عادي ولا يهمج حبيبتي يلا ناكل عن أطيح
وداد : يلا

رحنا قعدنا مع بعض ثواني الا ومجموعة بنات يو وراحت وياهن وداد ..
ما بجبرها تقعد وياي أكيد اللي راحت وياهن تعرفهن عدل وبينهن عشره هب أنا اللي ما كملت يوم بعدني
قعدت روحي شفت الوقت ما قاعد يروح رحت الكلاس قعدت مكاني

دخلت هاي أم برج العرب ..
وقالت : يا ويل حالي بنات فيه وحده صوبنا تطيح الطير من السما ..
البنات تمو يضحكون وياها
دشّت وحده ويت صوب أم برج العرب وحضنتها بطريقه مقرفه .. وع ما أصدق انهن بنات ..

قالت : اشتقت لج ..
ردت عليها : وأنا أكثر حياتي ..

عقب دشّت وحده ثانيه كان مبين عليها فيوزاتها ضاربه .. رفست الكرسي
وقالت : أنا اروايك حمدان تسوي بي جذا .. والله بعلمك قدرك ..

وطلعت وتمت أم برج العرب تسولف ولا يهمها بس اللي لاحظته البنيه هذي .. يزقرونها حمدان .. يعني أكيد بويه .. الله يعينا أجمعين ..

رن جرس الفسحه وومارسنا يومنا عادي مثل أي يوم دراسي .. درسنا ورن جرس الرواح
ركبت الباص حسيت بـ حد لصق بس .. تروعت بسرعه ابتعدت ..

لفيت جفت أم برج دبي وراي .. تخرعت من نظراتها الصراحه ، هذا أول يوم وما سلمت منها الله يعين الأيام اليايه ..

قعدت فـ صوب مع مجموعة بنات ما اعرفهن وتميت ساكته لما وصلت البيت ونزلت وأنا نازله شفت وحده مدت ريولها بدربي .. كيف أمر الحين

قلت : لو سمحتي ممكن ,,
ما ردت علي جنها ما سمعتني جان ارفع ريولي واخطف .. لو اترياها بتفاتن وياها الحين وبفلعها بس أشك انها بتفوز .. على طولها ...

نزلت دخلت البيت سلمت ورحت فوق غيرت ملابسي توضيت وصليت لأني ما صليت فـ المدرسه أخاف اروح حمامات المدرسه روحي دوم كنت أخذ وياي شواخ بس الحين منو عندي عسب اخذه وياي .. وبعد أخاف لأني أسمع وايد سوالف ..

نزلت تحت عسب نتغدا
مرت عمي : حيالله نواري اقربي ماما ..
رحت قعدت وياهم وتميت أكل
جواهر : ها شو مدرستكم ..؟

قلت لها : زينه ماشي حالها
جواهر : يلا زين ، أقول لج اليوم ميثاني محتشره عندنا تفاتنت ويا المس ..
طالعتها : هههه دومها جذا ميثوووه

ياسر : هاي حتى المس ما سلمت منها
الفتره الأخيره وايد حسيت ياسر يهتم لـ ميثا ويسأل عنها تقريبا .. يا حظهم ميثوه وجوجو يدرسون مع بعض ..

تغدينا عقب الغدا على طول الكل راح لـ حجرته يرقد ..
رقدت من التعب قلت يوم أنش بذاكر ..

............

نشيت من الرقاد صليت العصر ع الساعه خمس ونص تقريبا صلاتي متأخره اليوم وايد ..
نزلت رحت أكللي شي قبل المذاكره ..
طلعت من المطبخ قلت أروح صوب عموري وعدول

رحت صوب عموري شفته يذاكر ساعدته شوي لأنه متعود أحد يذاكر له ..
قلت : عموري عدول وين ..؟
عموري : راح عند الأبله عشان دروس التقويه ..

قلت له : منو قال لك
عموري : عمي يدفع حق الأبله بيزات
قلت له : دروس تقويه ولا دروس خصوصيه
عموري : ما ادري شي جذا

قلت له : أهاا
عموري : وأنا بعد عمي قال باجر بروح عند المدرس

يا ربييه يا عمي اش كثر متعب روحك عشانا والله انك تستاهل حبنا لك ..
رحت الحجرة اذاكر شفت جواهر بعدها راقده الله يهديها هالبنت دوم تطوفها الصلوات وتقضيها اليوم الثاني ..

ذاكرت وكان بين المذاكره شي بريك للصلاه والاكل هع هاي عادتي وخلصت جريب أذان العشا .. رحت اصلي العشا .. نزلت اشوف حرمة عمي

رحت شفتها قاعده تعدل العشا
قعدت معاها شوي اتسلى وبالمره اكتسب خبره فـ الطبخ ههههه

عقب رحت الصاله شفت الجوهره قاعده تذاكر يلست وياها طول الوقت انا اسولف وهي ساكته ما تقول الا كلمه كلمتين الله يعين اللي بياخذها

رحت تعشيت روحي لأني نودانه .. فيني رقاد بشكل هب طبيعي ..
رقدت من وقت ونشيت اليوم الثاني من وقت .. أنا وجواهر والجوهره تريينا الباص ويا بعض برا ولما الباصات وصلت ركبو باصهم وأنا ركبت باصي .. حسيت الحياة حلوه ما توقف عند
نقطه وحده أو حدث واحد .. لازم نعرف نعيشها وبتصير حلوه

رحت المدرسه وكـالعاده وحيده حتى وداد تدور مع بنات من معارفها ,, وصفي كلهن أخلاقهن
ما تعيبني فيه بنات من صفوف ثانيه بس بعد غير ..

مالي خاطر ارابع ولا وحده .. قمت اكره اني اتقرب من شخص ويستوي به شي ،، لازم كلما
أحب شخص لازم نفترق لازم .. أحسن اكون انسانه محايده .. لا قريبه من أحد ولا بعيده ..

مرّت ايام الدراسه عاديه كل يوم مثل اللي قبله وأشك اللي بعده يشببه .. ما في يوم يتجدد فيه شي .. حياتي مالها طعم ولا لون بعد ما مر الأسبوع الأول .. كان علينا رحله هي مو رحله هم بيودونا جامعه عسب نعرف ونستكشف وهالشي يأهلنا للمستقبل ..

ركبنا الباص وكلها بنات ثاني عشر بس ..
وفيه مجموعه قاعدين ينكتون ويستهبلون بس استهبالهم فوق الحدود ..
تضايجت من رمستهم .. عقب الحزه اللي بننزل فيها مريت من جنب الكراسي كلها بس يوم وصلت لكرسي حسيت بأحد مسك ايدي .. ووقف

سحبت ايدي ردت مسكتها أم برج دبي ..
قلت : لو سمحتي ممكن تودريني ..
قالت : لأ فديتج في خاطري أمشي وياج ..
قلت لها : وأنا مابا أمشي وياج
قالت : نواري فديتج يلا نمشي ويا بعض
قلت لها بنفس طريقتها : حمده فديتج ممكن تودريني وتتركيني بـ حالي ..
قالت : أوكي أوكي ع راحتج بس لنا لقا انشالله

وعقب نزلنا دخلنا داخل وتميت أدور وأدور روحي محد معاي ونحن ماشين

............: فديتج
صديت مستغربه ...

منووو قال لها فديتج .. ؟؟؟؟؟؟؟؟؟؟؟؟؟؟؟؟ الردوود ""والله علة الاقل 3 ردوود والله ان القصة خباال ردوووا وجوفوا بقية الاحداث ""بتنصدمون من بقية الاحداث