: لاتعاندين .. ويالله روحي مع عماتي ارتاحي .. واشربي قهوه وجاي وانا بخلص الباقي...
ميثا بابتسامه: وانا بساعدها .. يالله عمتي روحي ارتاحي
رفعت يديها بالدعاء : الله يوفقكم يا بناتي ويستر عليكم اللهم امين...
ابتسمن بعفويه من تلك الدعوات الصادقه التي ارتفعت للسماء .... ثم التفتن لبعضهن وتوسعت الابتسامه
ميثا : شكل الدعوه بتصيبج الاول ... والله يرحم حالنا ..
دلال : ههههههههه الله يقطع ابليسج ... يالله ساعديني
جلست ميثا بقرب الصندوق تجمع به الاغراض التي حوله ...: ماشفتي صمود اليوم ؟
رفعت دلال راسها باستغراب : صمود ؟ لا ليش شنو صاير ؟
مطت شفتيها بانزعاج : لا ابد... بس ماعجبتني امس ... والكـ ...
قاطعتها دلال : ماعليه انا عاذرتها يا ميثا ... محد يا ميثا يعرف صمود كثري تراهي اضعف من الشخصيه
التي تورينا اياها .. اضعف بوايد .... تعاني وتكتم وتشيل بقلبها ..
عقدت ميثا جبينها : من شنو تعاني ؟ هذا احنا حالنا حالها ؟
: صح ميثا .. بس صمود انسانه حساسه لابعد حد.... صح عاشت طفولتها عندنا وتربت في بيتنا ..بس بعدين
التحقت بامها .. وخواتها .. وخوات خواتها وخالتها وعيالها ..
يعني بعدت عن مجتمعنا بمجتمع ثاني يختلف عنا ...
حركت راسها باستغراب : يختلف ؟؟ بشنو يختلف
: يختلف بوايد اشياء... يعني شوفينا احنا شهادة متوسط وابتدائي... وعمرنا ماطلعنا لبرا الديره ..
واحلامنا ما تتعدى الامن .. الاستقرار .. وان كبرت احلامنا حيل .. نفكر بالزواج والاولاد..
هزت ميثا راسها مصغيه ..
: صمود عاشت مع ناس .. شهاداتها جامعيه .. تسافر بالسنه مره واثنين ... من تبلغ ال 18 تطلع ليسن
وتسوق سياره ..اقل شي يكون عندها تلفون حسب الموضه .. علاجها مجاني مدارسها مجانيه ما تخجل من
هويتها.. تتوظف وظيفه حكوميه ..عندها بطاقة بنكيه وتقبض معاش شهري يعني مستقبلها مضمون 99%....
لكن صمود وين من هذا كله ... تحس انها النكره اللي بينهم.... اللي راح يتوقف تعليمها للثانوي...وتسكر
على شهادتها الصندوق ...تخجل من هويتها لانها بينهم غير .. علاجها بفلوس وتحلم تتوظف والا تدخل
الجامعه ... تحلم تسـ ....
قاطعتها : بس هي احسن حال منا .. ع الاقل امها كويتيه .. لها مميزات خاصه .. يعني مدرستها
مجانيه وكملت تعليمها..ويمكن تتحسن لها الامور وتدخل الجامعه تتوظف
:.. صح المدرسه مجانيه..؟ بس واثباتها ؟ والعلاج ؟ والسفر ؟ والشهاده والجامعه ؟ ...والوظيفه؟ والليسن ؟
: مممم زين واختها عهود ؟
: عهود مثل حالتها ... بس الله فتح عليها .. وان شاءالله بتطلع من هذا كله بزواجها من ناصر
: أي .. الله يوفقها ... ويوفقنا ..
: آميــن ..
.
وقف في المنتصف يرمق ذلك الافق البعيد والفضاء الواسع بعينين حالمتين ونظرات متامله بالقادم خير ..
: بشنو سرحان السيد مشعل
رمقه مشعل بنظره خاطفه وعاد لما كان عليه مع شبح ابتسامه ...
تحدث خالد بعد ان اقترب اكثر : ماودك نرجع ها ؟
تنهد والتفت اليه: تصدق ايه ...(ابتسم خالد واكمل مشعل ) يظل هالمكان يعني لك اشياء واشياء...
يكفي انك تحس فيه بانك طير حر...بلا قيد يقيدك ولا دنيا تضيق عليك...
توسعت ابتسامة خالد : تراه موجود مايتحرك متى ما حنيت له تعال ما تردك الا سيارتك ...
اتسعت ابتسامة مشعل واردف قائلا : ما قلت لك ؟
خالد : بشر عساه بس خير؟
سكت ثواني يترقب نظرات خالد المتعطشه للخبر.. ثم قال : انقبلت بالوظيفه ...
كشت ملامح خالد .. ثم انبسطت بفرحه : احلف ... ( صافحه بحراره وشد على يديه ) الف الف مبرووك ...
ياخي واقف عندك من الصبح وما تقول بس طايح لي تغزل بالبر
ابتسم مشعل : قبل شوي جتني مكالمه منهم .. الظاهر واسطة صقر اشتغلت ....
: الحمدلله ...والله يوفقك يابوسعود وانشوف سعود قريبا
: خلنا نشوف وليد بالاول ... وابد لك مني سعود يكون وراه ....
قهقه خالد ضاحكا ..وشاركه مشعل ...
مشعل : تصدق افكر مرات لو في من صقر اثنين بعايلتنا
كشت ملامح خالد بالم ثم قال : كان فيه بس .... الله يرحمه
استوعب مشعل قصده فهمس باسف : الله يرحمه ...
: صدقني مشعل صقر انسان حاله حالنا يتعب ويتالم ويكتم لكن الفرق بينا وبينه انه يتعلم من المصايب اللي
تصيبه وما يخاف من التجربه.. احنا عيبنا نتوجس من كل شي جديد ... ولما نطيح صح نقوم لكن ما نتعلم ما
ناخذ حصانه من هالالم .. همنا انا نقوم وبس...
: اللي مساعد صقر كمية المعارف اللي يعرفهم .. يعني ماشاءالله معارفه مراكز وشي بالدوله
: ما عرفهم بالساهل....تراه راعي فزعه .. يكفي دوره بالغزو... ودم ابوه الشهيد....
: الله يرحمه ... الله يرحمه ..فقدنا اثنين ..ضاع دمهم هدر
همس بالم : ان ضاع حقهم عند البشر فما يضيع عند رب البشر ..
.
اقتربت بخطى ثقيله نحو تلك المنشغله بجمع الحاجيات واغلاق الصناديق ... احدثت صوتا بخطواتها لتلتفت اليها الاخرى مرحبه
: هلا والله بدودي ... ها خلصتوا ؟
: هزت راسها وهي تسحب نفسا ... ثم تطلق حروفها بهدوء اي خلصنا وانتي للحين؟
: ماشاءالله عليكم ... بغى شويت اغراض بس واسكر الصناديق...
تقدمت منها صمود تساعدها بحمل الصناديق والحقائب الى السيارة
طول فترة حمل الاغراض والحقائب لم تتفوه صمود بكلمه .. سوى بابتسامات رسمتها مجاملة لدلال التي تحاول ان تستدرجها بالحديث... فتطلق نكته او تعلق على حدث او تذكرها بقصة قديمه .... فدلال تعرفها جيدا ... وتعرف ان كان في قلب تلك الفتاة حديثا يصعب إخراجه ...إلا بالاستدراج ...
وضعت صمود الصندوق الأخير .. ونفضت يديها مرارا وكأنها في كل مره تسال نفسها اافعل ام لا ؟؟.... سكتت ..ثم همست : دلول آسفه
التفتت اليها دلال باستغراب ..وعقدت حاجبيها مستنكره : على شنو ؟
بعثرت صمود نظراتها في الفضاء : ممم (وعادت تنظر الى عيني دلال ) على الكلام اللي قلته امس...
لانت ملامح الاخرى وارتسمت على وجهها ابتسامه صادقه ...: ادري انج ما تقصدين ...
تحركت صمود قاصدة التحرر من الضيق الذي يلفها وتبعتها دلال بالخطى البطيئه تجاريها
جلست صمود على مقدمة السياره واستندت دلال عليها لتقابلها
: تعبت دلال ..
: تعبتي ؟ من شنو تعبتي ؟
: تعبت من الوضع اللي انا فيه ... تعبت من مستقبلي المظلم اللي كل ما الونه احس انه يرجع قاتم مثل ماكان ...
: ليش تحسين انج وحيده بهالشي... كلنا مثلج
: وشنو ذنبي اذا انتم راضيين باللي انتوا فيه ؟
: القناعه كنز لايفنى
: لايا دلال لا .. هذي مو قناعه ... هذا رضوخ استسلام ..دلول يمكن انتي وميثا ماتحسون باحساسي ... يمكن لان البيئه اللي عشتوا فيها ما تحسسكم بالفرق ولا بنظرة اللاشي ...
: دودي خواتج والا خواتهم جواهر وفجر ياذونج بشي؟
: لا .. ومو لازم احد يقول... انا اشوف يادلال اشوف.. واسمع ... واحس.... انا انسانه يا دلال ...
دلال : وزيد حبل نجاتج ؟!!
توسعت عيناها ثم ضاقت وهي تنظر لدلال بتعجب...
دلال : لاتتعلقين بغير ربج .... الامل فيه وحده.....وغيره ماتضمنين انه يخيبج يا صمود
ضاقت عيناها اكثر : شنو تقصدين
: ان بقدر تعلقج بغير ربج راح تكون قوة سقوطج
صمود تعقد جبينها باستغراب : دلال سامعه شي ؟!
ابتسمت وحركت راسها نافيه: زيد ولد خالتي مثلج تمام ... لكن فكري عدل...لاتحطمين مستقبلج بس لانه طوق نجاه
توسعت ابتسامة صمود الساخره وأطلقت ضحكاتها التي كتمتها بأناملها: هههههه مستقبل ؟؟ هههه أي مستقبل يا دلال ؟؟...المستقبل ضايع فيه وبدونه ...
امتدت يد دلال لتمسك بيد تلك الضعيفه : صمود جاوبيني بصدق ... زيد حلم طفوله ..... والا طوق نجاة
كشت ملامح الاخرى وكانها صدمت بالسؤال او لم تسالهُ نفسها من قبل...سكتت ونظرات دلال المترقبه تلتهمها..... همست بعد تفكير صامت : ليش مايكون الاثنين ...
:
.
.
في تلك الجلســه الهادئــه قــرب السيــارات الممتلئـه بالاغــراض
التقط صقــر الدلـه من النـــار..
وقام بصب القهوه... ناول اعمامه الفناجيل .. واحد تلو الاخر حتى اهتزت بيدهم معلنة الكفايه ...
بعد همسات تداولها صقر مع عمه بو خالد .. ربت على كتفه يطمنه ...
والتفت لفهد الذي جلس بقربه وسالـه بهمس : شخبار الموضوع فيه جديد؟
التفت اليه ورد بهمس مماثل : يبيله قعده يا فهد... ماطلع سهل مثل ما توقعنا ..
عقد جبينه : له .. شنو سمعت ؟
همس : لي قعده معاك .. بس خلها لوقتها ...
حرك راسه بلايجاب : الله يقدم اللي فيه الخير ..
رد بــ : آميـــن ... وصمت عندما لمح ذاك الشاب قريبا هناك .. يتحدث مع مشعل وخالد ..
فنهض بعد ان ربت على فخذ فهد : شوي وراجع ...
.
راقبه فهد حيث ذهب... والتقطت نظرات بوخالد الموقف الذي عرف مسبقا مالذي سيقدم عليه ....
اقترب صقر منهم واشار بيده : ثااامـــر
|