جاسم يتمغط و هو على السرير ولا تلفونه يرن .. جان ياخذه و لا ( الوالد يتصل بك )
جاسم و صوته ثقيل من النوم قال _ هلا يبا .. و عليك السلام ..
تو قاعد من النوم .. منو ؟ إيه ربع ساعه و جايك .. أبشر أبشر يبا .. مع السلامه ..
وقف جاسم بكسل و هو يقول _ صج ماكو شغل .. أربــع و عشرين ساعه ذبايــح .. !
أخذله ملابس و دش يتسبــح ..
دخلت فاطمه و بنتها حور في شقتهم .. فاطمه يتكلم بنتها _ قولي يلى يا بابا قوم ما صار نوم ..
حور بتوعد _ و تعطيني حلاوه ..
فاطمه تضحك _ أعطيج حلاو واجد مو حلاوه وحده ..
أبتسمت حور بشطانه و أركضت لـ غرفة النوم و راحت لصوب السريــر .. تفاجأت ان أبوها مو موجود .. جان تركض لبرى الغرفه و لا أمها داخل المطبخ
تشرب عصير .. قالت حور بحزن _ ماما بابا مو موجــود على سريره ..
فاطمه أطالع ببنتها بإستغراب _ مو موجــود ..!!
حور تسحب دراعه أمها بقهر _ عطيني حلاوه ..
فاطمه توخر يد بنتها و تقول _ ألحيــن أعطيج حلاوه بس شلون مو موجود ..؟ يعني قعد من زمان .. غريــبه !!
ثم قالت لبنتها _ تعالي معاي عشان أطلعلج الحلاو ..
حور بـ براءة مدت أصابعها العشر بوجهه أمها و قالت _ أبي حلاو كثر هذا ..
فاطمه تضحك على بنتها _ لا يا ماما بعدين أسنانج تصير سوده و ياكلها السوس و تطيـح و تصيرين مثل العجـوز ..
حور تأشر بأصبعين _ خلاص ماما بس جذي ..
فاطمه تمسك أصبـع واحد _ أوكي بس أصبع واحـد .. و الثاني
باجـر .. أوكي ماما ..؟!
حـور _ أوكي مـامـا ..
و هم طالعين من المطبـخ و داشين غرفة النـوم .. شافـوا جاسم جا يمهم و هو مشخص و ريحة العطر فايحه .. جـان أتخصر فاطمه و تقول بإبتسامه _ هالله هالله ويـن على الله ..؟
جاسم و يطالع بالمنظـره الكبيره في صالتهم و قال _ عندي مشوار مهم ..
فاطمه أطالعه بتفحص _ و كل هذا عساس مشوار ..
ضحك جاسم من نظراتها فـ قال _ أعوذ بالله من تفكيـرج على طول سوء ظـن ..
فاطمه _ أنزيـن ليش ما تقولـي وين بتـروح ؟!
جاسم بضحكه _ قلتلـج بروح لـ مشوار ..
فاطمه ترد أتخصر _ و هالـ مشوار ماله أسـم ..؟!
جاسم يضحك و يتجهه لـ باب الشقه و يقول _ بو خالد عنـده عشى و عازمنا .. هـا شي فـ خاطرج ؟
فاطمه تبتسم له و تقول _ سلامتـك يا بو حـور ..
طلع جاسم من الشقه ..
فاطمه كانت تمشي صوب غرفتها .. فجأة طقت يدها على جبهتها ..
فاطمه _ آوووه نسيت أهلي تحت ..
جان تسرع بمشيتها و تفتح باب شقتها .. و لا جاسم متجهه صوب الدرج .. جان تعلي صوتها
_ جاسـم ..
جاسم يلتفت صوبها و قال _ هلا ..
فاطمه تعض على شفتها السفلى و تروح يمه قالت _ أبيييه
نسيت لاقولك أهلي تحت عند خالتي ..
جاسم _ خالتي موجود أهنيـه ..!
فاطمه _ إيـه بس خل أقولهم انك بتنـزل ..
جان تنزل قبله و تقطع عليهـن سوالـفهن و تقول _ جـاسـم بيسلـم ..
تغطن البنات و قالت فاطمه _ حيـاك جاسـم ..
جاسم نزل و راح لصوب خالته و حب راسها وقال _ شلـونج يا خاله شخبارج ؟!
أم محمد منحرجه _ بخيـر يا بو حور .. أنت شعلومك إن شاء الله تمـام ..؟
جاسم _ الحمد لله بخـار ..
جان يلتفت صوب جنان و قال _ شخبارج يا أم جومانه ؟!
جنان بصوت واطي _ الحمـدلله بخيـر ..
جان يلتفت لـ أمه و قال _ هـا يمه تامريـني على شي ؟
أم بندر _ سلامتـك يا وليـدي ..
/////////////////////////
لـقت مكالمتيـن من بنـدر و مسج منه ( أطمنج انا وصلت المخيـم )
ضغطت سارا على زر الإتصال و بعد كذا رنه .. جاها صوتـه _ هلا سارونـه ..
سارا بـ شوق _ صباح الخيـر ..
بندر و هو نازل من السياره و شايل أجياس المطعـم .. قال _ صباح النـور ..
سارا _ آمم شقاعـد أتســوي بهالفجـر ؟!!
بندر يطالع الأجياس _ تو جاي من ماكدونـالدز .. و جـايــب للشباب وجبـات ..
سارا _ عـافيـه .. متى بتجــي ؟
بندر دش الخيمـه و حـط الأجياس عنــد الشـبـاب ..
قال _ أنا و الله بخيــر ..
ضحكت سارا و قالت _ شلونك ؟
و شمســوي إن شــاء اللــه مرتــاح ؟
بندر _ أكيــد مرتــاح مدام أخوج معــاي ..
ضحكت سارا و قالت _ تطــنــز حضرتــك ..!
بندر يضحك _ عنــدج مانــع ..!!
سارا بدلع _ إيــه هذا حمــودي .
ما أرضى عليــه ..
بندر رافع حواجبه _ شخليـتي لي
أجــل ..
سارا بحيا _ لا عــاد أنت غيــر ..
أبتسـم بنــدر من كلمتــها ..
قال بجرأة _ شلـون يعني غيـر ؟
سارا _ أنت زوجي و هو أخـوي
قال بإحباط _ بــس جــذي ..
قالت _ و أنت أبو عـيـالي .. و هو خال عيــالي ..
بندر بسرعه قال _ يلى عاد تضحكيــن علي .. شايفتني مدهن شعري .. أدري اني أبو عيالج و محمد خالهم .. بس خير هالحجي ماكــو ..
سارا ضحكت و قالت _ أنــت تعــال و انا أقــولك ..
بندر يبتسم _ أبشري نص ساعه و انا في البيــت ..
سارا بإستغراب أطالع ساعتها و قالت _ بندر الساعه 2 الفـجـر ..
نام و أرتاح و تعال بعد ما تصحصح و تشبع من النوم أما تجي ألحيــن بهالفجر و انا أعرفك مو متعود تسهر لهالحزه لا لا تجي ..
بندر _ شفيج .. ؟ انا قايــل للشباب عـ 3 انا بحرك و بوصل واحــد لبيــته و انا على طريقي .
سارا توصيه _ بندوري عمــري دير بالــك على نفــسك ..
بندر يضحــك _ أبشــري ..
سارا تقاطعه بسرعه و تقول _ و سوق على مهلــك .. شــوي شوي لا تســرع ..
بندر يبتسم على توصياتها وقال _ أبشــري يا بنت الحــلال و أنتي نامي لا تنطريني يلــى حبي تبيــن شي ؟
ســارا _ أبــي ســلامتــك ..
(( الــســ/ 5 فجرا / ــاعـــه ))
أبو بندر يعدل شماغه و هو يستغفــر ثم شاف جاسم نازل من الدرج قال _ يلى مشيــنا ..
جاسم شاف بندر مو موجود فسأل أبوه _ للحيــن بو عذبي في المخيم يبا ؟
بو بندر يمشي لباب البيت _ أكيــد
في المخيم .. لنــك تعرف أخوك ما يطوف صلاة الفجــر و هو ألحين مو موجود معانا فأكيد فالمخيــم .. يلى مشيــنا ..
و طلعوا لــ بيت من بيوت الله يذكر فيها أسمه ..
طلعت ام بندر من غرفتها بتصلي
فــ الصاله ..
كبرت الله .. و قــرأت دعــاء الإستفتاح .. ثم شرعت بقراءة سورة الفاتحه و بعدها سورة من قصار السور ..
ليــ ما خلصت من ركعتي سنه الفجــر .. و لا تلفون البيت يرن ..
أرفعت السماعه و لا شاب يسلم
قالت _ و عليك السلام يا ولــدي
بو بندر و الله طالع للمسجد .. و حتى جاسم .. الله يسلمــك ..
و سكرت السماعه ..
قلبها نغزها شهالإتصال الغريب في وقته .. قالت بخوف _ أستغفر الله .. و أعوذ بالله مــن الشيطان الرجيــم ..
ثم كبرت تصلي صلاة الفــرض .
و بعد ما خلصت من الصلاة جلست ام بندر تقرأ أذكار الصلاة و أذكار الصباح .. و لا التلفــون يرن مره ثانيــه .. جان ترفعه .. قالت بهدوء _ نعــم ..
و لا نفس الشاب الي أتصل قبل شوي قال _ السلام عليكم يا خاله ..
أم بندر بخوف و العبره خانقتها قالت بما يملي عليها أحساسها _ يا ولدي بـنـدر فيه شي ؟!!
الشاب يهديها و قال _ خاله هدي
و تعوذي من أبليــس .. بو بندر و جاسم وينهم ؟ للحيــن ما جــو من المسجــد ..!!
قالت و الدموع تذرف _ لا يابوك ما جو للحيــن ..
قال _ خلاص خليــهم يجــون في مستشفــى الأميــري ضروري .. و مع السلامه ..
و سكر التلفــون .. أم بندر في مكانها ظلت تبجي من الجــاي ..
و أخذت التلفون و أتصلت على بو بنــدر ..
أم بندر بصراخ و بجي _ ألحــق يا بو بنــدر .. ألحــق ..
بو بندر بخوف قال _ شفيــج يا مره تبجيــن ..؟
قالت و الصوت يتقطع من البجي _ ولــدي بنــدر .
بو بندر حس بحراره و صخره طاحت على راسه قال ببطء _ شفيــه بنــدر ؟
قالت _ واحد دق يقول تعالوا للأميــري ..
بو بندر بسرعه _ يلى يلى أحنا رايحيــن ألحيــن له ..
قالت ببجي _ و انا بروح لــ ولدي ..
قال بعصبيه _ ألحين خلينا نلحق و نشوف .. و سد الخــط ..
جاسم لون الحياه شبه راح من وجهه .. الكلام الي دار بين أبوه و أمه أستنتج منه .. أخوه الكبيــر فــ المستشـفـى .. ليش و متى و شنو صار له ؟ الأجوبه كلها في الأميري .. ما سأل أبوه لأنه عرف الخبر .. أسرعوا في مشيتهم لــ مصافط سياراتهم الي جدام بيتهــم ..
و ركبوا بسرعه سيارة جاســم ..
و حرك لمستـشـفى الأميــري ..
سارا قعدت على منبه الصلاه ..
شغلت الأبجوره .. و لا إراديــا شافت مكان بندر فاضي .. خطر ببالها انه راح يصلي في المسجــد .. قامت بتروح تتوضأ ..
بعد 10 دقايــق .. كانت سارا تقرأ الأذكــار .. ثم قامت بتشرب ماي .. بس صوت خالتها واصل لــ عندها .. قعدت تميــز الكلام و لا خالتها كانت تبجــي و تقول _ يا ويــلي على ولــدي .
يا ويــلي عليــه ..
سارا لا إراديا أركضت لـ غرفتها و تفحصتها بنظراتها أدور الهاند باق أو أي شي يأكد لها عن وجود بندر .. بدون تفكيــر صرخت بــ إنكار _ لاااااااااااااااااااا
و سحبت عبايتها و ركضت برى الشقه ..
و هي تنــزل شافت خالتها و فاطمه تحاول تهديها و تقعدها ..
نزلت بسرعه و مسكت خالتها من كتوفها و قالت برجا _ بنــدر شفيــه يا خالــه ..؟
فاطمه تلف على أختها و تمسك يدها و تحاول تهديها _ ما فيه إلا العافيه .. بس هدي و تعــوذي من الشيـطـان ..
سارا و دموعها على خدودها _ زيــن ويـنـه ألحيــن ؟ و خالتي ليش تبـجـي ؟! ( ثم لفت على خالتها ) خاله بندر شفيه ؟!!
أم بندر بألـم تقعــد على الغنفه
و تقول _ بالمستشـفـى ..!
سارا بخــوف _ ليــش ؟!
فاطمه بهدوء _ للحيــن ماندري ليش ؟ بس عمي و جاسم راحوله و ان شاء الله ماكو إلا العافيه ..
/////////////////////////
// مستشفى الأمــيــري //
جاسم و أبوه صعدوا الأصنصير
و كلن في همه و نجواه لــ ربه بسلامة بندر ..
أنفتح الأصنصير و مشوا لــ غرفته .. لقوا شاب واقف عند باب الغرفه و شكله متوتر .. جاسم قرب منه .. أول مره يشوفه في حياته .. و أستغرب منه .. ربع أخوه يعرفهــم .. و هذا وجهه جديد عليه .. مد يده له و قال _ السلام عليـكـم ..
الشاب و يرد يسلم _ و عليك السلام .. أنت جاسم و هذا أبو بندر ؟
جاسم يطالع أبوه و يرد يطالع الشاب و قال _ إيه انا جاسم و هذا الوالـــد .. خير بندر شفيه ؟ ( تحرك جاسم و ابوه لباب الغرفه لكن الشاب مسك يد جاسم ) و قال بأسف _ أعذرني
الزياره ألحيـــن ممنوعه ..
أبو بندر بهم قال _ زيـــن يا ولدي الله يبارك فيك .. بندر ليش موجود أهنيـــه ..؟ طمنـــي .. ريح قلبي الله يريح قلبـــك ..
الشاب ألتفت وراه لقى كراسي جان يقول بأدب _ ممكــن نقعد
بالأول ..
( جان يقعدون عالـ كراسي )
قال الشاب و كأن الحادث جدام عيونه ينعاد .._ ع الساعه 3 الفجر كنت عالخط السريع جان أشوف جيب جدامي يطير بالهوا حوال بعده عن الأرض مترين .. و سبحان الله كذا مره يطق الأرض و يطيـــر ..
أبو بندر غطى وجهه بيدينه .. بجـــره .. سنده .. ذراعه اليميـــن .. معرس توه ما صار له خمس شهور .. فــ غرفة ما يدري هل بيطلع سيده لـ المغسله و لا بيطلع لـ بيته .. جنته .. بين أهله و ناسه ..
أنتبهت بو بندر ان الشاب و جاسم ساكتيـــن .. و مراسم الحزن مرسومه على وجيههـــم
قال برجا _ يااا الله أسألـــك العافيه لـ ولـــدي ..
سمع التأميـــن منهـــم .. و سكتوا ينطرون الدكتور يطلـــع من الغرفه .. بعد ربع ساعـــه طلع الدكتـــور .. أجتمعوا عليه ..
قال بو بندر _ طمنـا يا دكتـــور ..
الدكتور _ الحمدلله ان الله أمداه بعمر جديـــد ..
بو بندر تنفس براحه و قال _ اللهم لك الحمد و الشكر ..
جان يكمل الدكتور بأسف_ لكن بقول شي لازم تستوعبونه .. و تؤمنون بقضاء الله و قدره ..
جاسم بخوف _ عسى ما شر يا دكتور ؟
الدكتور يطالع بوجيه الكل _ المريض فقد عضـــو من أعضاءه ..
بو بندر احباله الصوتيه خانت ما قدر يسأل الدكتور .. قال الشاب بسرعه _ شنهي يا دكتور ؟!
الدكتور _ نص ساقه الأيمــن ..
أضطريـنــا نبتـــره .. و الحمدلله
و هو ألحيـــن منوم ..
بو بندر و دموعه تنزل _ اللـهـــم لك الحمد .. أهم شي أشوفـــه قدام عيوني عايش لو بدون أرجول ..
جاسم يربت على كتف أبوه _ الحمدلله و تستاهل سلامته يا الغالـــي ..
بو بندر قال _ زين يا دكتور متى الزيـــاره ..
الدكتور _ عالعصـــر إن شاء الله ..
و راح .. مد الشاب يده لأبو بندر وقال _ حمدلله على سلامة بندر ..
بو بندر بتعب _ الله يسلمـــك .. و بيض الله وجهك يا ولدي ..
الشاب _ وجهك أبيض يا عم ..
و سلم على جاسم و طلــع من المستشفى ..
و مسك جاسم يد ابوه و قال _ يلى يبا خروح البيت تلاقي الوالده ألحين حالتها حاله ..
بو بندر بيمشي بتعب _ يلى يابوك ..
@@ بيـــــــــت بو بنــــــدر @@
الكل كان قاعد في الصاله ينطر
أي خبر يطمن قلوبهم على بندر
و لا باب البيت يتبطـــل .. سارا تغطت و هي تبجي بصوت واطي .. دخل ابو بندر و جاسم و راح بو بندر سيـــده لـ غرفته ..
يبي يرتاح حس ان هالسويعات الي قضاها في المستشفـــى جنها دهـــر ..
أما جاسم مشى صوب أمه و حب راسها و يدها و قعد جنبها ..
أم بندر و البجى قطع قلبها قالت و هي أطالع باب البيت .. تنطر ضناها تنطر شوفته سالم تنطر سلامه لها .. قالت _ ويـن أخوك يا جاسم ؟!
سارا غطت حلجها بيدها تمنع صوت بجاها عن جاسم ..
جاسم قال و يحاول يحسن صوته من الحزن و الهم _ الدكتور قال أحسن له يقعـــد اسبوع و ثم يرخصونـــه ..
أم بندر تحط عينها بعين ولدها و ما خفت عليها نظرته الحزينه قالت و صوتها مبحوح _ و ليـــش
هو بالمستشفـــى ..؟!!
جاسم أبعد عينه من عيون امه المتسائله و قال بهدوء متصنع _ سوى حادث .. و الحمدلله طلــع سليم بس ..
سارا بسرعه قالت بتعب _ بس شنو ؟
جاسم _ أبتــروا نص ساقه اليميــن لأنها أنقطعــت في الحادث ..
سارا شهقــت و قالت بصدمه _ شنــووووو !!!
أم بندر صوتها على و هي تبجي و تقول _ ودونــي له ..
جاسم حضنها بقــوه و العبــره خانقته من منظر أمــه ..
سارا بسرعه قامت و أركضت بتصعد الدرج .. لكـن الــدوران سبقها و طاحت على أول عتبـه عـ الــدرج ..
فاطمه صرخت _ لااااااااااااااا ..
و ركضت لـ أختها .. طلع بو بندر من غرفته مستغرب الصرخه .. شاف سارا طايحه و أختها تشيل و جاسم و ام بندر جايــن
صوب سارا .. بسرعــه ركض و شال بنت أخــوه .. و نزلها عـ الغنفه .. طلــع جاسـم مــن الصـاله و راح للديــوانيــه ..
فصخــت فاطمه عباية أختهــا
و صرخت عـ الخدامــه تجيـب ماي بارد ..
أم بندر بخوف _ سارا يمي ..
سارا سارا ..
سارا تهز راسها ببطء .. و عمها يمسح شعرها بيده .. و يقول _ سارا .. سارا .. تسمعيـنـي ..؟
سارا بألم _ آه .. آه ..
بو بندر يلتفت لـ يمين و يسار ثم قال _ ويــن جاســم ؟!!
فاطمه أدوره بعيــونها و ما شافته .. قالت _ يمكن صعــد فوق ..
قال بو بندر خلاص انا بروح أشغل السياره و انتي ساعديني فالـ مشي و طلعوها لــ سيارتي
أول ما طلع شاف نعول جاسم عند باب الديوانيــه ..
%%%%%%%%%%%%%
الدكتوره تبتسم لـ بو بندر و جاسم _ لا الحمدلله .. المدام ما فيها إلا العافيــه ..
( جان تلتفت لـ جاسم و تكلمه بفرح ) _ مبروك المدام حامــل .
قال بو بندر و هو يبتســم لولده ثم طالع فــ الدكتوره _ زوجها مو موجود .. و هذا ولد عمها و حماها و انا عمها .. الله يبارك فيـج ..
الدكتوره تبتسم _ و النعم عمي.
خلاص بما أن زوجها مو موجود فـ بعطيك الإرشادات .. سارا عندها فقــر دم .. و الحمد لله ما طلع أنيميا حاد لأنه بيكون ضرر عليها و على الجنـيـن .. فبكتبلك حبوب و أطعمه تكثر من تناولها مع أشربه ..
و قعدت توصيهم على سارا ..
** بيــــت بو محــــمد **
وجهه أسود كأن هموم الدنيا على راسه .. حذف الهاند باق على الأرض و كمل طريقه لصاله .. شاف أمه و بدور قاعدات يسولفــن .. جان يحب راسها و يحط راسه على ركبة أمه و يسحب يدها و يحب بطنها .. شافته امه و حست انه مهموم .. مع انه مجتمع مع ربعه .. لكن وجهه عكس باطنه .. ولدها متضايق و نفسيته شكلها تعبانه .. مدت يدها الثانية تمسح على راسه .. و تقول بحنان _ متضايــق يا محمد ؟!
محمد و دمعه خانته و سالت على خده قال ببحــه _ حيــل حيــل يمه ..
بدور ظلت صامته بدون حس ..
و تراقـب زوجها بألــم .. تعرفه إذا تضايق و مهموم و تعرفه إذا كان فرحان و سعيــد .. قامــت بهدوء و راحت للمطبخ تجيــب له ماي ..
لمحت امه دمعة ولدها فمدت يدها و مسحتها و قلبها أنقبض قالت بنبرة خوف _ زيــن قولي شمضيقك ؟!
قال بصوت متحشرج _ بنــدر يمه ..!
أم محمد بخوف قالت _ شفيــه ..؟!!
محمد يقعد و قال _ ســوى حادث و بتروا رجله ..
سمعوا قزاز ينكســر .. ألتفتوا بسرعه لـ مكان الصوت ..
بدور و حولينها القزاز و دموعها تتجمــع .. قالت بصوت باكــي _ متى ؟!
قال محمد _ فجــر اليــوم .. و عـ العصــر الزياره مفتوحــه ..
ام محمد بألــم _ الله يصبــر أهله .. زين و سارا شخبارها ما شفتها ؟!
محمد _ أمبلى شفتها و طاحت عليهم .. و ودها عمي و جاسم و بشرتهم الدكتوره بنتج حامــل
على رغم هالبشاره و هالخبر المفرح إلا ان مصيبة بنـدر أكبر و أبعدتهم عن الشعور بالـفـرح ..
قالت امه _ خلاص اجل أخذنا على العصر نروح له ..
محمــد قام بكسل و صعــد فوق ..
.. )( 3:30 عصــرا )( ..
سارا تلبس نقابها بعد ما أتصل جاسم بـ فاطمه ..
فاطمه بحزن _ سارا خلاص تعوذي من أبليــس ..
سارا و تمسح دموعها بكلينكس
و هي ماشيه لــ برى البيت _ أعوذ بالله من الشيطان الرجيم
فاطمه اسرعت بمشيتها لــ وصلت جنبها و مسكت يد سارا و ضغطت عليها .. و قالت بهمس _ تحبيــنه ؟!
سارا بسرعه لفت على وجهه أختها و قالت بألم _ ما توفيــه هالكلـمـه .. لو يبي روحي فدوة له ..
سكتت أختها و كملن طريقهن لــ سيارة جاســم .. و كان خالتهن و عمهن موجوديــن في السيــاره ..
// الــ مستشــفى //
بندر بجهد مع أحساس بالألــم قعد عدل و ساعدته النيــرس
عشان يقعد براحه .. قالت بأدب _ عاوز حاكه سيد بنــدر .؟
بندر بضيق قال _ لا ..
قالت _ خلاص إزا كونت عاوز أي حاكه بس أزغط عالــ زر و انا حاقي..
قال _ مشكــوره ..
و طلعت من الغرفــه ..
طالع بندر ساقه الأيمن بحزن و ألــم .. تذكــر شلون صار الحادث .. لو سمع كلام سارا جان ما صار له كل هذا ..! لو .. لو .. لو .. وين بيوديها ألحيــن .. و صار له القدر المحتوم ..
( قل لن يصيبنا إلا ما كتب الله لنا )
قال بصوت واطي مختلط بألم و عزيمه _ يا الــلــه تلهمني الصبــر و الرضا بالــ قــدر ..
تمنى انه ما راح .. تمنى بات في المخيم .. تمنى يشوف سارا .. تمنى يشوف أهله .. تمنى يطلع من المستشفى ألحيــن .. و يمشي بحريــه .. بدون مساعده بدون أتكــال ..
قطع حبل أفكاره صوت طق باب و ثم دخول أهلــه .. بسرعه طاحت عليه أمه و هي تبجي .. حضنها بندر و هو يرسم أبتسامه قالت امه _ بنــدر يــا قلــبي.. ( ثم رفعت راسها ) و كملت _ شخبارك الحيــن ؟ ما تونس بشي ..؟
ضحك بندر و قال _ بخيــر يمـال العافيــه يمه .. ليش ليش هالدموع ..؟ كاني جدامج مافيني إلا العافيه .. شوفيني يمه ..
قال ابوه و جاي يسلم عليه _ حمدلله على السلامه .. و شلونك يا بو عذبي ..؟
بندر بهدوء _ الله يسلمــك يبا .. بخير يعلك بصحه و عافيه ..
جا جاسم و هو يبتسم لـ و يقول _ حمدلله على السلامه ..
( جان يقول و هو رايح صوبه _خشمــك .. و حبوا الأخوان خشوم ..
بندر _ الله يسلــمك يا بو حور ..
جان يتلفت و قال _ إلا وين الأميــره ؟
جاسم _ نايــمه .. مو يقولون نوم الظالــم عبــاده ..
جان الكل يضحــك .. ثم قطع عليهم صوت فاطمه و هي تقول _ خطاك السو يا بو عذبي ..
رد بندر عليها _ خطاج اللاش يا ام حــور ..
و بعدها بصوت واطي قالت سارا و هي تقرب يمه _ الحمد لله على سلامتــك ..
بندر عينه عليها و قال _ اللــه يسلمج ..
قربت سارا اكثر لي قعدت بــ الكرسي الي جنبه و قالت بهمس _ شلونك بندر ؟!
بندر حس بتعبها و إرهاقها قال بنفس الطبقه _ بخيــر بشوفتج ..
ابو بندر و جاسم فضلــوا يطلعون شوي حتى تاخــذ سارا راحتها .. قالوا بصوت واحد _ يلى نترخــص ..
قال بندر _ تو النــاس ..
جاسم يبتسم _ لا بس ربع ساعه عشان الأهل ياخذون راحتهم و جاييلك .. لا تخاف بقعد على قلبك لي تقول عوع .
ضحك الكل و قال بندر _ والله عســل على قلبي ..
جاسم _ حبيبي و الله ..
و طلع بو بندر و جاســم ..
ألتفت بندر لــ أمه و قال بلهجه ترحيب _ يــا الله حي بأم الغالي ..
ام بندر تمسك يد ولدها و تقول _ الله يحيــك ..
ثم ألتفت لــ صوب الثاني و شاف سارا فصخت نقابها _ يا الله حي بأم عذبــي ..
ضحكت بخفه سارا على رغم شحوب وجهها و قالت _ الله يحيك و يبقيــك يا الغالي ..
و طالع بــ فاطمه الهاديه بوجودها و قال _ يا حي الله بأم حور ..
فاطمه _ الله يحيك ..
ثم رد يطالع سارا بتفحص و تم عاقد الحواجب و قال _ ســارا شفيه وجهج ؟
سارا تبتسم بحيا و قالت _ تعبانه شوي ..
بندر بإهتمام _ و رحتي للطبيــب ؟
قالت و وجهها مع التعب ظهر له أنحراجها _ أمم إيه رحت له ..
قال _ ها شقالــج ..؟
سارا أرفعت نظرها لــ خالتها و ثم طالعت بــ عيونه و قالت _ حــامــل ..
بندر بسرعه لف عاليسار ناحية أمه و قال بفرح مو مصدق الخبر _ صــج و الله ؟!
أمه تهز راسها بـ نعم و قالت و هي تبتسم له _ مبروك يا بو عذبي .. و عن قريب بتشوفه و تملي عينك منه ..
ضحكت سارا و هي تشوف بندر يطالعها جنه مو مصدق .. ثم قالت و هي تهز راسها _ و الله حامــل ..
ضحك بعدها بندر و قال _ زيــن جم لج شهر عشان أحسب جم باقي و أشوف عذبــي ..؟
سارا تضحك معاه و قالت _ في الشهر الأول ..
( يــا ولــد )
سمعوا صوت محمد فتغطت أم بندر عدل و قال بندر بصوت عالي _ حيــاك يا بو عمــر ..
// بــع ــــد مــرور أسبــوع //
الـكـل درى بحادث بندر و زاروه في المستشفى .. و كانت حالته النفسيه شوي تعبانه إذا قعــد بروحه .. و يحاول ان يظهــر الفرح إذا شاف أهله .. و استانس من قلبه .. يوم عرف ان سارا حامــل .. و ان عذبي قرب جيتــه ..
بندر بالعكازه يحاول يدش البيت
و يساعده أبوه و جاسم ..
و لا صوت اليباب واصلهم .. رفعوا راسهم لقوا ام بندر و عبير يببن و سارا و فاطمه قاعدات ..
جان يصفن ام بندر و عبير و هن يغنن هالأبيات ..
يا الله طلبناك يا الوالي
يا خيرن نرتجي منه
انك تسلم لنا الغالي
بنــدر عسى ما يصيحنه
يا ذيبهن بالخلا الخالي
و الهجن بالقيض ينصنها
..
و على ما خلصت و لا بندر قاعد على الغنفه ..
قال بو بندر لـ بندر و قاعد جنبه و بصوت واطي شوي _ تــرى العمال ما باقيلهم شي و يخلصون من الأصنصيــر ..
أحسنلك من صعدت الدرج و انا بوك ..
بندر عقد حواجبه _ ليــش ما كان له داعي .. انا بطلب ساق صناعيــه من ألــمانيا .. ان شاء الله .. و اصعد الدرج براحه و سهوله ..
بو بندر قال _ هــا عــاد بــدو العمال و ما باقي شي ..
(( بعــد سنــة من الأحــداث ))
بعد توه راد من الشركــه .. لقى حور ترقص عـ الغنفه و تغني _ منــو الحلــو ؟ انا الحلوه .. عاشوا عاشوا عاشوا
ضحك بندر و قال لها _ صج العرق دساس طالعه على خالتج .. بس أبشري بزوجج عذبي ..
حور تخصر و تقول _ لاااا و الله
بندر يتخصر مثلها و قال _ ليش طايح من عينج ..
حور بعفويه _ مابي عذبي ..
بندر _ و ليش ما تبيــنه حضرتج ؟
حور تهز رجلها _ دلــووووع ..
بندر قال _ أصلا ما بياخذج يا العجوز .. أنتي شيفه و جيكــره
شلون عذبي ياخدج ..؟ يلى مناك ..
و لا جاسم نازل الدرج مع فاطمه و قال بقهــر بعد ما شاف علامات البجى قاعده تظهر على وجهه بنته _ عــدال أنت و ولــدك .. منو قاص عليكم
و قالكم مزايــن ..؟
بنــدر يرفع خشمه و قال _ عاد ولدي لا تتكـلـم عنه .. المفروض
يوم عندك محمد و حور تستحي ما تقول عذبي و عذبي ..! ( ضحك هو و فاطمه )
جان يقول جاسم بقهر _ أقول أقول روح نام أحسنلك .. حور يا ماما تعالي .. ( جان تركض لـ أبوها و اطيح بحضنه و حب راسها )
قال بحنان _ ما عليج منه بيجيله يوم و يترجاج تاخذيــن شيفته هال مستانس فيه عذبي ..
حور تقول _ بابا ما بي عذبي ..
ضحكوا كلهم بصوت عالي .. جان يقول بندر _ طاع هاذي صدقت السالـفـه ..
و لا تلفونه يدق لقى ( نــور العيــن ) يتصــل بــك ..
قال و هو واقف _ يلى تامروني بشي ..
الكل _ سلامتــك ..
مشى بندر بعرج بسيط جدا .. و صعد الدرج .. أحيانا يصعــد بالأصنصيــر .. لكنه يفضل الدرج ..
بطل شقته لقى سارا تلاعب عذبي الي منسدح على الغنفه ..
شالت سارا ولدها و راحت تستقبله _ نــور البيــت ..
بندر يحب راسها _ بـ نورج يا عمري ..
جان ياخذ منها عذبي و قعد يحبه بطريقة خلت الطـفـل يضحك بصوت عالي ..
ضحكت سارا و قالت _ بس بنـدر .. حرام عليــك ..
بنــدر يفكه و يمده لـ سارا و قال _ يلى انا بروح انــام .. حدي تعبــان ..
سارا تمشي معاه صوب الغرفه
_ ما تشوف شــر ..
بندر و يطلع له بجامه _ الشر مـا يجيــج ..
و راحت للفراش و لحفته عــدل .. و قالت بحب _
أرقد و آمن حبك اليوم موجود ؟
لا ما يزيحه غير قولة وفاتي ..
بندر أبتسم لها و خذ يدها الي تضبط اللحاف و حبها بـ حب .. من التعب و الإرهاق ترك يدها و غط في سبات عميــق ..
حبت سارا جبهته و راحــت أطفي النــور عشان ينام براحه ..
النهايه ..
|