// الــــجــــزء الــحــادي و العــشــرون //
رفع راسه لها ثم أخفضه .. و كمل يشرب قهوته .. صورة عمه مركزه قدام عيونه .. و وصيته بــــ سارا ..
سارا بعرج خفيف وقفت قدامه و قالت بعد تردد _ بنــــدر ..
رفع عينه لها و تم ساكت .. قالت بترجي _ أبيــــك أتجاوبني و بكل صراحه .. أرجوك أرجوك يا بندر ..
بندر عارف شنو الي مشغل تفكيرها لكن مستحيل أتعرف .قال ببرود _ تفضلــــي ..
سارا بألم _ ليش تزوجتــنــي ؟!
بندر ثواني تم ساكت ثم قال _ تعتقدين الرجال ليش يتزوج ؟!!
سارا تهز راسها بإسى _ لا لا يا بندر .. أنت أنت تزوجتني انا بالذات ليــــش !!
بندر مومستعد يواجها البنت ملزمه تعرف فــــ نزل الفنجان على الطاوله و هو هام بيقوم فاجئته سارا بمسكت يده بقوه و قعدت تضغط عليها .. بندر بنظرات متسائله أرسلها لعيون سارا .. و صوت داخلي يقول ليش البنت مصره بهالشكل تم الزواج و خلاص . . ظل بندر يطالع عيونها بتساؤل .. أما عيون سارا كانت تطلب الإجابه من بنـــدر ..
مـرت دقيـقه و الصمت سيد اللحظات .. بندر غاص بأعماق نظراتها الحزينه .. تم واقف بدون حركه .. سارا حست بحراره تشع بجسمها و وجهها .. أنتبهت أنها تضغط على يده بكل قوتها فجأة تركت يده و لفت صوب الدرج بتصعد لشقتها ..بندر تم ساكت و يطالعها و هي تصعد بعرج بسيط ليـــ أختفت من ناظره ..
رد قعد و مسح على شعره بإهمال _ استغفر الله يا ربي ..
و قام صعد لها فوق عند شقتهم
// ســـــــــــــــــــــارا //
ليش ما جاوبني ؟! ليش بندر يسخف السؤال ! انا من حقي اسأله و هو عليه يجاوبني بكل صراحه .. الله يسامحكـــم .. ليش يا محمد ليش !!
سارا و الدموع تنهمر قعدت على السرير بضعف و غطت وجهها بيديها .. و أخذت بالبجي بصوت عالي .. تبي تخمد نار ضعفها .. تبي تعيش بسلام بس أحيانا شعورها بالضيم يحيل ذلك .. ما حست بدخول بندر للغرفه و بوجوده جنبها إلا بعد ما شال يدينها عن وجهها ..
بندر بـ حنان مسك يدها و ضغط عليها _ سارا عسى ما شر فيج شي ؟!
سارا تهز راسها بـــ لا .. و أرتفع صوتها بالبجي .. محتاجه صدر ترتمي فيه .. محتاجه لرجال يرشدها و يوعيها .. محتاجه و مشتاقه لـــ حنان أبوها ..
بندر ما هانت عليه نفسه يشوف دموع أهله قدامه و يظل ساكت مهما كانت تصرفات سارا معاه تظل بنت عمه و صغيره بعقلها و بحاجه لـ نفس طويل حتى يقدر يشكلها على ألي يريحه و يريحها .. و بجاها هذا أكيد من تزويجها له .. بندر بهمس شديد _ الله يغفر لك يا عم .. و بـــ لا شعور فتح بندر ذراعيه و سحب سارا الي محتاجه لصـــدر حنـــون ..
أخذت سارا تشاهق بإنكسار .. و فضل بندر أنه يسكت حتى ترتاح ..
//////////////////////////
عبير تحذف الكوره بعيد و هي متجهه للأطفال _ يلى مـنــاك يا حلوين يمه ضبيه راسها يعورها من الطقطقه ..
ركضوا الأطفال لـــ جهة الي حذفت عبير الكوره لها .. و هم يصرخون بفرح ..
بعد ما راحوا قعدت عبير على كرسي يطل على البحر ..
ثواني معدوده و لا نوف واقفه وراها و بإبتسامه _ السلام عليكم ..
عبير تلف وراها و تواجه نوف قالت _ و عليـــج الســـلام ..
نوف اخذت لها كرسي و حطته قدام كرسي عبير و أقعدت مواجهتها ..
تكلمت نوف بحرج و هالإنحراج لاحظته عبير من إحمرار وجهها و نظرة عيونها _ شلـــونج عبير
؟!
عبير تحاول تبين سعادتها بتغير نوف الإيجابي فإبتسمت لها _ أنا عن نفسي تمام .. بس أنتي شخبارج ؟! ( بعد ثواني من السكوت كملت عبير حديثها ) يـــا القـــاطعـــه ؟!
زاد إنحراج نوف و ردت بهدوء _ الحمدلله بخيـــر .. و أدري صرنا مو مثل أول و هاذي أول جمعه لنا بعد رمضان و العيد .. بس تعرفين وقتنا صار مزحـــوم ..
فـــ قصرنا بحقكم .. عاد راعونا
عبير بمرح _ آآآقـــعـــااااااد ..
ضحكت نوف و قالت _ و الله و الله من صجي ..
عبير و أطق إيد نوف _ أدري بس أضحك معاج ..
( بعدها سكتن ثم طالعت عبير نوف و بجديه قالت ) نـــوف ..
نوف بهدوء _ هـــلا ..
عبير خفظت راسها و ظلت ساكته ثواني و هي تطقطق أصابعها ثم رفعت راسها و عينها بـــ عين نوف .. قالت بجديه _ أنا صريحه و جريئه و يمكن البعض يفسرها بـــ وقاحه مو صراحه و جرأة ..
قاطعتها نوف بهدوء _ لا شدعوه محشومه و أخذي راحتج عبير .. و سألي أو قولي ألي بخاطرج ..
عبير تبتسم _ ما تقصرين نوف .. بس بسألج سؤال محيرني تقريبا سنه و أكثر و أكيد أنتي عارفه هالسؤال لأنه ..
نوف قاطعتها _ طبعا لا ..
عبير _ أوكي ..
سكتت عبير ثم قالت _ ليش رفضتي أخوي و أنتي كنتي ...
نوف تقاطعها كانت متوقعه هالسؤال من عبير .. قالت _ ما صار نصيب .. و هذا السبب ..
عبير مو مقتنعه بجوابها _ الله أكبر يا نوف هذا عندج سبـــب !!
نوف بملامح تعبر عن الضيق _ عبيــر .. هذا سببي و خلاص الي فات مات .. و أخوج مو أول مره ينرد عشان تسألين ليش و ما ليش !!
عبير بإنفعال _ شتقصديـــن يعني ؟! وضحي أكثر ..
نوف ماحبت لهجه عبير المنفعله قالت _ عبيـــر شهالعصبيه و التنرفـــز إلي ماله داعي .. بنت و رفضت خاطب فيها شي ؟! و أخوج عداه العيب و نعم فيه و شوفي ألحين أرزقه ربي بـ بنت عم تستاهله و عشان ما تفسرين الأمور بعقليتج .. انا ما أصلح لـــ أخوج .. و أتمنى مـــا تفتحين هالسالفه مره ثانيه إذا كان لي عندج قدر ..
عبير بشبه أقتناع قالت بصراحه _ شوفي يا نوف .. انا صح كنت رافضه هالخطبه من الأساس .. بس بعد رفضج لــه. كنت مستغربه ليش رفضتيه !!
فعشان جذي بما أنج بنت خالي فكنت أتحرى يوم أشوفج فيه و أسألج بكل صراحه عشان أتجاوبيني بكل صراحه ..
نوف بإبتسامه صفراء _ و إن شاء الله وصلنا لأملج المنشـود .
عبير تحرك كتوفها بعدم الإقتناع و قالت_ مادري مادري .. بس حطي ببالج يا نوف أنج أخت عزيزه و غاليه بالنسبه لي ..و سؤالي لج ماله نوايا سيئه .. انا فخوره فيج و بفكرج و ألتزامج ألحين و الله يثبتج بس تعرفين أحنا يا الحريم نحب نعرف الآكو و الماكو ..و يلى خل ندخل شكل الأهل يدورونـــا ..
نوف تحط يدها على كتف عبير و قالت بهمس مع نبرة رجاء _ لا تلتفتيـــن للماضي يا عبـيــر ..
ثم أبتسمت لها بعد حركة عبير الي مسكت يد نوف و ضغطت عليها .. و دشوا الشاليهه عند الأهل ..
الكل ألتفت لهن و قالت أم أحمـــد _ وينجـــن الله يهداجن تعالن تقهـــون و ذوقن قهوتي ؟!
قالت عبير بعد ما حبت راس مرت خالها _ كنا برى عند الجهال و كاني يا خاله آفا عليج بقعد و أبشرب من قهوتج ..
صبت فاطمه فنجان لـــ عبير و نوف ..
أم بندر _ ألحين يام محمد التسجيل طاف سارا ..
أم محمد تشرب قهوتها _ إيه طافها .. بنتي متعيجزه يام بندر .. عادي عندها أتسجل بعد سنة ..
فاطمه بإبتسامه _ خالتي سارونه تفضل قعدة البيت على المدرسه .. و هي بنت .. عاد أشلون و هي متزوجه ألحيـــن ..
عبير تهمس لـــ فاطمه بدون ما أحد ينتبه _ حسافه يا ريت بندر
يغصبها عالدراسه ..!
فاطمه بحنان _ حـــرام عليج عبور شفيج عليها .. و الله سارونه ضعيفه ..
عبير بدفاشه _ سارا ضعيفه ..! إذا سارا الضعيفه أجل جنان شنو ..؟
فاطمه _ حتى جنان بعد .. ضعيفه و فقيره ..
عبير _ فطوم بسج عاد .. جنان صح ضعيفه و بمرتبه الشرف بعد .. أما هالدلوعه لا و الله ما عديتي الصج .. الضعف و البراءه
شمال و أختج جنوب ..
فاطمه ترد تصب لعبير فنجان _ يختي ليت رياجيلهم خلوهم يجون ..
عبير تحط رجل على رجل و بدلع _ الله يخليلي عسعوسي .. فديته متفتح .. مو مثل هالي مناسبينه حاكر جنان حكر .. خو خلها أتنفس مع أهلها ..
فاطمه تقلد طريقة عبير _ إلا
قولي لايعه جبده من وجهج مصبح و مسي بنفس الوجه قال خل تروح جم يوم و أكسر هالروتين القاتل ..
عبير عيونها بغت تطلع قالت بصدمه _ فطوووم انا لايعه جبده من وجهي ..!!
فاطمه ماسكه ضحكتها _ إيـــه و الدليل كاهو وجودج معانا ..
عبير وجهها أحتقن من القهر قالت _ هيـــن إن ما خليتج تندمين ماكون عبير ..
فاطمه بمرح _ لـــ نرى ..
===================
جنان تبخر الدشداشه و الشماغ و جومانه على السرير تلعب بالطاقيه ..
جنان _ يا حلـــوه .. بابا ألحين بيجي و بيزعل منج ..
( و سحبت الطاقيه من بنتها )
جومانه بدلع قعدت تبجي ..
جنان تحاول تسكتها بعد ما زاد صراخها _ لا لا يا ماما بس بس خلاص .. و شالتها عشان تسكت .. و لا على دخلت يـوسـف .. الي فسخ شماغه و قعد على الكرسي بتعب ..
سمعت جنان فتحت الباب فـ راحت لزوجها .. جنان تبتسم _ لا شكلـــك هلكان مره وحده ..
يوسف و يفتح ذراعه لبنته _ حدي هلكان .. تعالي جومانه عند بابا ..
مدت يديها له و حضنها يوسف بحنان و عاطفه الأب .. و قعد يلعبها على رغم تعبه ..
جنان بحب _ الله يخليك ذخر لها .
رفع يوسف نظره لـــ جنان بنظرة حب و حب خد بنته ..
جنان تروح له و تسحب يده _ يلى قوم تسبح و تعال تقهوى قبل لا تروح عرس رفيجك ..
يوسف ببتسامه _ إن شاء الله عمتي ..
و قام عطى بنته جنان و بحركه سريعه حب خد جنان و طلع مسرع برى الغرفه .. أبتسمت جنان بحب له .. و راحت تشوف القهوه ..
بعدها بنص ساعه .. كانت جنان تعطر زوجها ..
جنان بإندماج _ إي و بعديـــن ..!
يوسف _ إيه عاد قدروا يسيطرون على الوضع ..
جنان بخوف _ آوف يا يوسف و الله صرت أوسوس .. روح أنقل من المستشفى التعبان ..
يوسف _ قل لن يصيبنا إلا ما كتب الله لنا ..
جنان وحلجها تقوس للأسفل قالت برجفه _ يـــوســـف ..
يوسف بحب _ لبـــيـــه ..
جنان و دموعها بدت تسيل _ لازم تنقل ..
يوسف يهديها _ يا عمري خلاص الإداره صلحت الخطأ .. فشحقه أنقل و أدور عوار الراس ..
جنان بخوف _ زيـــن دير بالك على نفسك مره ثانيه ..
يوسف يأشر على عيونه بإصبعه _ من عيـــوني ..
محمد _ و ليش ما جا ؟!
جاسم يعدل قعدته _ يقول تعبان ..
محمد مستغرب _ تعــبـان ..!!
جاسم بصدق _ و الله مو مبين على نسيبك بس يمكن ما يبي يطلع .. خو تعرفه توه عريس ..
محمد بخبث _ آها السالفه جذي .. خلني أوريك فيه ..
جاسم بغشمره _ هيـــي حدك تراه أخـــوي .. ما سمحلك ..
محمد ناقد عليه _ من صجك أنت أبو لـــ طفليـــن .. ؟ و جذي غشمرتك ..
جاسم يحرك حواجبه له _ عاد هذا الواقـــع .. شرايك أنت ؟!!
محمد _ خخخ تصدق غشمرتك ثقيله ..
جاسم _ آييـــبـــاااه ألحين غيرت وجهتك من بندر لـــ وجهتي ..يلى بس دق على نسيبك و أضغط عليه ..
محمد _ تراك ذبحتني بــ نسيبك نسيبك جنك مو بعد نسيبي ..
جاسم بنفاذ صبر _ ألحين بدق و لا شلـــون ؟!!
محمد و يطلع جهازه _ كاني بدق ..
@@@@@@@@@@@@@
أنتبه بندر لـــ جهازه ألي يرن في مخباته .. فـــ طلعه و عدل قعدته ..
بندر _ هلا بو عـمــر ..
محمد _ هلا فيك وينك ياخوك ما تنشاف بعد معرست ..
بندر يضحك _ في البيت ألحين أنت شتبي ؟
محمد _ ليش ماجيت الشاليه ؟!
بندر فاهم لولد عمه _ مو شغلك ..
محمد _ آفا ياذا العلم سويروه تقلبك علي .. عشرة عمر بأسبوع تنساها .. آفا آفا ..
بندر يطالع بـ سارا الي قامت تروح تغسل وجهها .. حب يقهر رفيجه فقال _ قلتلك مو شغلك ترى مو فاضي لكم ألحيـــن ..
ضحك محمد بصوت عالي و قعد يكلم جاسم _ أخوك يقول مو فاضي لكم ألحين ..
جاسم _ منو بندر ؟!
محمد _ لا حميد .. ! هو عندك أخو غيـــره ..
بندر بسرعه _ ووااااابوي بو عمر خلك معاي ألحين أنت شتبي مني ..؟
محمد _ لا يطوفك الجو خيال تعال مع سارا و أقعدوا هالجم يوم فالشاليهه .. و الله رهيب ..
بندر _ صج و الله ..
محمد _ لا و أزيدك من الشعر بيت .. قررنا نمدد بعد ..
بندر يحك راسه _ لا .. و جم يوم
..؟
محمد _ بس يـــوميـــن ..
بندر بجديه _ يلى بس ديروا بالكم على الجهال لا يغرقون تعرف البحر غدار ماله أمان ..
محمد يصيح _ يااااا ولد درر درر يا بو عذبي ..
بندر يبتسم _ عشلون عيل ...
محمد _ أنا أشهد محد معطيك وجهه كثري بس لو تتركـــ..
طوط طوط طوط طوط ...
طالع بشاشه الجهاز و الا بندر مسكر الخط بوجهه ..
عرف ان اضغط أرتفع عند بندر ..
جاسم بضحكه _ تصدق أخوي محترم ..
محمد بضحكه _ شلون ؟
جاسم _ إذا سكر الخط بوجهه أحد أعرف انه مايبي يتلفظ عليه فيسكر ..
محمد بنغزه _ يعني أستكشفت هالصفه عن تجربه ..
جاسم بضحكه _ أكيد ..
سمعوا صراخ الأطفال قام جاسم يشوفهم .. طلع من مقسم الرياجيل و راح صوب المسبح لأنه مصدر أصواتهم قال بصوت عالي _ شفيـــكم !
عايشه تبجي و تروح له _ عم داثم ثوف عثمانوو يدقني ..
جاسم راح لعثمان و مسك أذنه عالخفيف و قال _ يا ويلك إنحشت البنات زين يا عثمان ..
عثمان يكابر عشان ما يبجي قدام البنات هز راسه بإيـــه ..
و ألتفت جاسم لحور و قال _ يلى حبيبتي روحي ألعبي مع عواش ..
حور بدلع _ نلعـــب حريـــم بابا .
جاسم ينزل مستواها _ إيه يا روح بابا .. ألعبوا حريم .. و خلوا الصبيان يلعبون بروحهم ..
عمر _ وأحنا نسبح ..
جاسم _ إيه بس خل أقلل الماي و أسبحوا على كيفكـــم ..
الأطفال مع بعض يتناقزون _ هيه هيه ..
//////////////////////////
[ شـــقـــهے عــــــذاريـــ ]
عذاري _ سبحان الله .. زين و إداره المستشفى ليش مهمله هالشغله ..!! كلش عاد و لا الكيبل ..
جنان _ حسبي الله و نعم الوكيل
إداره أهمال بـ أهمال .. عادي عندهم نفوس تروح ببلاش ..
و أهو عادي و لا كأن صاير شي يتضيحك و يتبسم الحبيب .. و انا الي قلبي بيحترق ..
عذاري تمد لها صحن الشوكولاته _ هاج و عيني من الله خيـــر ..
جنان بضيق _ عذاري .. صراحه انا قلبي ناغزني من بعد هالحادثه ..
عذاري _ تعوذي من أبليس .. هاذي كلها وساوس و الرجال ما فيه إلا العافيه ..
جنان بخوف _ يا بنت الحلال .. حياته مهدده بالموت في أي لحظه أهو موجود بالغرفه و قاعد يصرف الدوا .. حاولي تفهميني و تحسين بالي أحسه .. المره هاذي الله ستر .. بس الثانيه و الثالثه ووو شراح يصير بيروح عني و عن بنته .. ( و قعدت تبجي بضعف )
عذاري تحاول تهديها _ جنو حبيبتي .. ليش التشاؤم و الوسوسه .. خلاص خل ينقل لمستشفى ثاني .. ترى السالفه ما تسوى .. و إداره المستشفى ضبطت الخطأ و صححته ..
جنان من بين دموعها قالت _ أخاف أفقده بيوم .. مثل ما فقدت أبوي ..
حضنتها عذاري و قالت _ تعوذي من أبليس .. و الله يحفظه لكم و لأهلـــه ..
جنان بقلبها _ آميـــن يا رب تحفظه لنا ..
بندر يضغط على الزند بقوه ..
سارا بآلم _ آي آي ..
بندر يضغط مره ثانيه _ سارا يعني أهنيـــه الألم ..
سارا تمسك يده و تشيله من مكان الألـــم _ خـــلاص مافيني شي .
بندر يوقف _ أجل ألبسي بوديج المستشفى ..
سارا بمكانها ما تحركت _ لا ما يحتاج ..
بندر يطالعها بنظرات ثاقبه _ شنو ما يحتاج .. ! يلى عن الدلع ألبسي انا أنطرج تحت ..
سارا بنفس النظرات قالت _ قلتلك ما يحتاج .. بعدين شوفني كا قاعده أمشي أسم الله علي .
( و قامت و هي تحاول تمشي بدون عرج .. و قدرت تمشي عدل ) و ردت تقعد على السرير مره ثانيه و كتفت يديها و قالت بثقه _ شفت شفت مافيني إلا العافيه .. بس أنت ودك توديني للمستشفى مناك تشوفيني مريضه ..
بندر رافع حواجبه _ انا ..!!
سارا بطفوله _ إيـــه أنت ..
بندر حس كأنه قدام طفله طفله بمعنى الكلمه .. فقعد جنبها و قال _ بس انا شفت رجولج و أنتي بعد حسيتي بألم يعني لازم تروحين لـــ دكتور حتى يشوف رجلج ..
سارا بخبث _ لا انت قعدت تضغط حيل على زندي فعورتني ..
بندر سكت شوي ثم قال و هو يقوم من على السرير و رايح صوب الكبت _ ما تبين تروحين ما تبين كيفج صحتج و أنتي أبخص فيها لكن ألحين ألبسي بوديج مكان ..
سارا بتردد _ مو المستشفى !!
بندر ضحك بعفويه _ و الله مو المستشفى .. بس ألبسي ألحين ..
سارا أطالعه و هو يطلع بدله سبورت له قالت _ زين وين بنروح ؟!!
بندر يطلع راسه لها و يقول _ خو مفاجأة .. مابي أحرقها ..
و يرد يطلع باقي البدله ..سارا بقلبها _ يا خوفي تكون مفاجعه مو مفاجأة ..
و قامت بتمثيل تمشي بدون عرج و وقفت جنبه و فتحت كبتها أطلع لها بدله و عبايه ..
أنتبهت سارا أنه قاعد يلبس بدلته بنفس الغرفه .. فأحترق وجهها و أشوي و أدش بين الملابس قالت بصوت واطي _ طاع هذا صج ما عنده ذوق ...
رش بندر على ملابسه عطر فرساتشي بعد ما خلص من لبسه و هو طالع قال _ أستعجلي ..
سارا مسكت نفسها ليــــ سمعت تسكيرت باب الشقه ..
حذفت عمرها على السرير و بألم قالت _ آخ رجلي هاذي شلون أصرفها معاه ألحين .. آوووف طالعلي حنون و انا الغبيــــه المفروض ما أبين ضعفي جدامه .. بس ما أنكر اني أرتحت و هو معاي ؟! وحسيت بحنان أبوي إذا ضمني ..
آووه الرجال تحت ينطري ..
قامت ببطء عشان رجلها و ألبست .. و قفلت الشقه وراها و راحت لــــ بندر الي ينطرها بالسياره ..
سارا و هي تسكر الباب وراها _ السلام عليكم .. بندر يدور شريط من بين الأشرطه _ و عليج السلام ..
و كمل يدور الشريط .. سارا ذبحها الفضول .. ودها تعرف شهالشريط الي قاعد يدوره و ما حرك السياره عشانه قالت _بنيـــ ( و عضت على لسانها بغت تقول بنيدر .. فرجعت تسأل بحرص ) أدور على شي ؟!
بندر و يفتح الدرج _ إيو قاع أدور على شريط ...
سارا بفضول _ شسمه ؟!
بندر طالعها شوي ثم قال و متنح _ شنو شسمه ؟
سارا بحرج _ هذا شيسامووونه أسم الشريط ...
بندر أبتسم من نبرة صوتها عرف أنها أنحرجت قال _ يوه شفيني تنحت أسمه الجمهره ..
سارا سوت بنفسها ما فهمت _ شنو الجمهره ..
بندر لقى الشريط فحطه بالمسجل و قال مستنكر _ بل .. في أحد ما يعرف الجمهره ..!!
سارا بثقه _ أنا ..
بندر _ هذا الله يسلمج ديــــوان
حامد زيد .. و كاهو شريطه .. صراحه حكــــم و درر يقولها ..
سارا _ الناس أذواق و لو ما أختلفت الأذواق لــــ بارت السلع ..
بندر _ يعني أفهم من كلامج انج ما تسمعين لــــ حامد ..
سارا تحب تسمع لحامد بس حبا في العناد .. مثلت أنها ما تعرف بشعره شي .. قال بندر بإندماج _ من سافرت ريم الفلا صديت عن كل الدروب .. ما هو قصور بالعذارى .. بس ذيك ألحالها ..
سارا حست بشي يترك بداخلها نار تحرق صدرها .. قالت بنبره مقهوره _ ما خلصنا من الهــــنوف !!! طلعـــت لنا الريم
بندر لف وجهه لجهتها و قال بنبره وعيد _ بنــــرد للصفر يعني ..
سارا بتلقائية قالت _ تتغـــزل جدامي و تبيني أسكت ..
بندر بصبر _ يا ليل مطولــــك متى تغزلت ..؟ جاوبي متى تغزلت ببنت .. ؟
سارا _ ريـــم الفـــلا ..
بندر _ يا بنت الحلال شعر شعر يقولون مالا يفعلون ..
سارا _ لا الشعر له أسرار في القلوب ..
بندر شغل السياره و قال _ كيفج
و شغل حامد زيد و ظل ساكت .
حامد زيد / من سافرت ريم الفلا صديت عن كل الدروب *** ما هو قصور بالعذارى بس ذيك إلحالها ...
سارا بحقد _ ما شاء الله موقت الشريط على هالشطر ..
بندر بتحرش _ ما كنت متوقع أنج تغاريـــن ..!!
سارا _ لا يا حبي لا يروح فكرك بعيد .. و تاخذ بنفسك مقلب ..
بندر رافع حاجبه _ أجل شتسمين ألي قاعده أتسويـنــه !
سارا تغير الموضوع بدلـــع _ بنـــدر تكفى أبي أسلم على أمييي .. خل نروح الشاليهه ..
بندر بحزم _ آســـف .. و قبل يومين شايفتها ..
سارا من تحت النقاب _ آووف ..
بعد أكثر من ربع ساعه أتضح
لـــ سارا مكان طلعتهم .. بحـــر الـكــوت ..
صفط بندر فـ مكان السيارات ..
بندر و يطفي السياره و يسحب السويج _ يلى أنزلي ..
نزلت سارا و مشت جنبه .. كان الطول واضح جدا بينهم .. سارا كأنها أخته الصغيره مو زوجته ..
مسك بندر يد سارا و مشوا للشاطئ .. قال _ أحيانا البحر يكون صندوق أسرارنا و أحيانا يكون النعش لأرواحنـــا ..
سارا بحالميه _ و أحيانا يكون
إلهامنا لمشاعرنا و أحاسيسنا ..
ضغط بندر على يد سارا بقوه .. ليـــ سرت قشعريـــره بجسمها
***********************
( الـساعـــه 11 مســـاءا )
الإسعاف و دورية الشرطه .. مع المباحث .. شكل إزدحام مروري على شارع بحر الكوت .. مع إزدحام الناس و توقف السيارات ..
( ... ) إنا لله و إنا إليه راجعون شوف شلون السيارة معفوسه حدها .. يقولون الي داخلها ماتوا على طول ..
( ... ) الله يرحمهم .. عاد البحر ما ينقرب بهاليوم بذات ..
( ... ) يـــومهـــم هذا يا خوي ..
( ... ) إيه و الله صاج .. هذا يومهم ..
/
/
/
الــجــزء الــثــاني و الــعـشــرون . . .
/
/
/
جنان بتوتر أطوف الغرفه روحا و جيه .. للمره الألــف أدق على جهاز يوسف و يرد عليها الخدمه بــ الجهاز المغلــق أو خــارج منطقة التغطيه ..
عقلها بيطير اليوم هذا أسوأ يوم مر عليها من تزوجت .. من المغرب و زوجها رايح يحضر زفاف رفيجه .. و الساعه ألحيــن بدش 12 صباحا و ما رد البيت .. جنان بدون وعي نزلت لدور الأرضي و قعدت بالصاله قبال باب البيت و الأنوار مطفيه و أهل زوجها نايمين ..جنان و تلفونها بيدها و تهز رجولها بتوتر جا قدام عيونها أنها تصرخ و حريم يحاولون يهدونا .. و بنتها تصرخ تبي أبوها .. و خالتها تبجي .. هزت راسها بصرخه هامسه _ لاااااا .. أعوذ بالله منك يا أبليس ... و نزلت دموعها بخوف ..و قعدت تقرى آيه الكرسي حتى ترتاح .. حست بصوت مفتاح أرفعت راسها لــ باب البيت .. و لا يوسف جدامها واقــف ..
جنان بلا شعور أركضت له و هي تبجي ..
يوسف أنتبه لشخص بالظلام يركض له وقف متجمد ليــ قرب هالشخص منه و قال بصوت حزين باكي _ ويــن كنــت ؟!!
تحسس يوسف ملامحها بيده .. قال مستغرب _ جــنــان !!
جنان ماسكته من كتوفه _ يوسف .. ليش تأخرت و ليش جهازك مغلــق ؟ خوفتني عليك ..
أخذ يدها و مشى معها للدرج .. وهو يقول _ مافيني شي حبيبتي .. ظلت جنان ساكته و هي تمشي معاه .. و مسحت بيدها الثانيه دموعها ..
// جــــنــــــــــــانــــــــ //
الله يرحمهم .. شفت بعيونه حزن على موت الهنديين الي كانوا بشارع الكوت يم البحر ..
لكن الحمدلله رد زوجي لي بالسلامه .. قلت له بدلع _ شفت شلون حرمتني من العشا ؟!!
شفت الحنان بعيونه و قال لي _ آوه أنا آسف جنان .. تعرفين مو بيدي الزحمه و الإجراءات الي صارت .. لكن خلاص ألحين أدقلج على مطعم نطلب عشى .
قلت له بدلع و عصافير بطني تطلب مني الرحمه _ على راحــتـــك ..
سارا بتعب قعدت على طرف السرير بعد ما بدلت ملابسها .. قالت _ خلاص ما أقدر رجولي تعورني .. و راسي ذابحني بموووت ..
بندر و هو متجهه لسرير و رفع اللحاف .. قال _
عندج بالدرج الأول ع اليمين حبة بندول ..
سارا أطالعه من المنظره .. و سكتت بعدها و لا ردت عليه وقامت بتعب شديد .. و راحت يم للدرج و أخذت الحبه و هي بتطلع من الغرفه أنتبهت أنه يكلمها ..
بندر و النوم مسيطر عليه_ طفي الليت معاج ..
سوت ألي أمرها ثم راحت للمطبخ تشرب لها ماي ..
بعدها راحت لصالتهم و لا تشوف جهازه الجديد و مفاتيحه و بوكه .. جان تاخذ جهازه و هي بتفتح المنيــو و لا حاط رمز القفل .. سارا التعب راح و الألم خف .. من شوفة جهازه و بقفل .. قالت بقهر _ حاط قفــل .. بيستر على فضايحه و بلاويه ..
فكرت بحرق الكرت و أدخل كذا رقم ثلاث مرات و بجذي أحترق الكرت .. بس تذكرت عصبيته يوم كسرت جهازه القديم .. فقررت أتواجه أحسن لها و ماراح تخلي الليله تعدي عليه .. ليش حاط رقم قفل ..
سارا بعد تفكير قامت و الجهاز بيدها و راحت له ..
دشت عليه و شغلت الليت .. رفعت اللحاف عنه و هو غاط بالنوم سارا بصوت عالي _ بندر قوووووووم ..
حط يده على عينه عشان النور و بصوت خشن قال _ طفي الليت بنام .. و تغطى باللحاف ..
سارا بعناد رفعت اللحاف عنه و حذفته بعيد عنه و قالت بحنق _ أكلمك أنا قوووم ..
بندر عيونه حمره من النوم و زادته حركتها .. قال بعصبيه و هو يأشر على اللحاف المحذوف _ شنو هذا .. ؟
سارا تخصرت و قالت _ يا سلااااااااام .. و مدت الجهاز له و قالت _ انا ألي أقولك شنو هذا ؟!
بندر غمض عيونه ثواني ثم قال بصوت غاضب و يأشر على اللحاف .. _ جيــبيــه ..
سارا بقهر _ قاعده أكلمك انا .. ليش حاط قفل ؟! قولي ليش ليش ؟
بندر أخذ نفس طويل ثم قال _ جيــبيــه ..
سارا تمد له الجهاز و بتحدي قالت _ أول شغله لي و ثم أجيبلك لحافك ..
بندر سحب جهازه منها و قال بعصبيه _ أنتي حتى على النوم منكده علي .. ( و بنبره تهديد قال )جيبي اللحاف لا قسمن بالله ما تعدي الليله هاذي على خير .. ترى نفسي قصير مو طويل مو طويل مو طويل يا سارا .. قلتلج جيبيه تحركي ..
سارا بعين قويه _ و انا بعد نفسي مو طويل يا ولد عمي ..
طلــقنــي .. و ألحيــن بعد ..
طلقني .. مدام هاذي فعايلك ..
بندر حس انها ما تفهم و لا تبي تفهم .. مو متقبلته أبدا .. وهو بعد مو متقبلها بس خلاص لازم يتعايشون مع هالزيجه ..
قال بأمر _ أطلعي برى أحسنلج
سارا بإنهيار قالت _ ماني طالعه برى ..
بندر هدى نفسه و بصبر قال _ يا بنت الحلال أحسنلج أطلعي برى ..
سارا قعدت أطق راسها بقهر لي تناثر شعرها على وجهها _ طلقني يا بندر أكرهك أكرهك ..
لو بيدي جان ذبحت عمري بيوم أربط أسمي بأسمك .. أكرهك أكرهك ..
قام بندر و مشى لها النوم طار من عيونه .. و سارا ترد لورى و هي مستمره أطق راسها بيديها و تبجي _ أكرهك يا بندر ..
بندر بصبر حاول يمسك يديها عشان ماطق راسها _ زيــن ليش كل هذا ؟! عشان شنو يا سارا ! عشان قفــل !... كل هالنكد و الطق و البجي عشان قفل ..!
سارا ببجي تبتعد عنه و أنحشرت بين الباب و الكبت _ و شنو الي داخل القفــل ..؟ ما تقدر أتجاوب .. انا أدري ليش .. ؟ عشان الهنوف .. ليش رديت تحط الحافظه بجهازك الجديد ؟!
بندر تحامل على نفسه و قعد يصبرها فأبتسم عالخفيف و مسك حنجها و رفعه له و قال _ ليــش تــغارين ؟!
ضحكت بإستهزاء و قالت و هي تشيل يده عن حنجها _ آخر شي أفكر فيه الغيــره ..
بندر بحاجب مرفوع _ أجــل هالفــلم الي صار عشان شنو ؟
سارا و دموعها أتساقط بغزاره قالت _ قلتلك انا ما أغار و هالشي أحلم فيه ..
بندر بأصابعه مسح دموعها الي تساقط .. سارا كبتت نفسها و نزلت نظرها لرجوله .. بندر و هو يمسح الدموع بأصابعه قال بهمس _ زين جذي ما عينا خير أنتي زدتي الصداع لراسج و انا طار النوم من عيــوني .. و الحافظه يا سارا شعر خرابيط شاعر .. خيال مو حقيقه .. و الهنوف أسم دايما يتغزل بها الشعراء .. يعني فقط اسم أخترته .. و بعدين حذفت الحافظه بعد المشكله الي صارت و شوفي عشان تحررين عقلج من الأفكار السودا .. ( فتح قفل جهازه و راح للحافظه )
بندر _ ها شرايــج ..!!
و شال أصابعه عن وجهها و تم ساكت ينطرها أتكلم ..
رفعت له نظرها و قالت _ انا اسفه بندر ..
بندر بهدوء _ و سالفه طلقني لا عاد أسمعها .. أحنا ما تزوجنا عشان أنتطلق ..
|