بلحظه حماس الصف دخلت سارا الي كانت محتله ملعب الرقص . ومعها عذاري ..
قالت الحرمه بعد ما تعبن الحريم من الأغاني الشعبيه _ عشتوا عشتوا ..
بعدها قمت عشان أروح لداري و لا عند صعودي على عتبه الدرج بالصدفه
صدمت بعبير وكانت متوتره قالت بلا اهتتمام _ آسفـــه جنان ما شفتج ..!!
دققت بملامحها ولا بوجه مرتبك واللون الاحمر صابغ وجهها .. و يديها تتراجف و تضغط على ارقام شاشه موبايلها .. مسكتها من كتفها وقلت _ شفيه وجهج جذي ؟
عبير و اطالع بتلفونها و تضغط علي الرز .. مانت مو معايه بتاتا .. قلت بنفاذ صبر .. _ أنتي شفيج قاعده أكلمج عبير ؟ صاير شي ..؟ أحد في شي ..؟
( بدون أحساس مني .. بتلقائيه قلت و الخوف متلبسني ) بندر فيه شي ...؟؟؟
و ضغطت على كتفها بقوه .. لي لاحظت أحساسها بالألم .. وقالت لي باستغراب مع صرخه ألم _ جنـــــان !!!!
قلبي بيطلع من حلجي و مو قادره أوقف تسندت على الطوفه وقلت بخوف _ عبير شسالفه تكلمي ؟
قالت بعد ما أخذت منها نظره _ جنان حور فوق شاب جسمها جنه حريجه و انا وفاطمه قاعدين اندق على جاسم .. بس جهازه مغلق .. و أختج قلبها بيوقف من البجي ..
تنفست جنان الصعداء .. ووقفت علي حيلي وقلتلها _ زين جان دقيتي على محمد الله يهديكم ولا على السايــــ .... ما كملت كلمتي و لا عبير تكلم بالتلفون ..
لك وحشه في داخلي مالها حد .. في غيبتك كل المشاعر تنادي ..
كل الوجوه الي غدت عني تصد ..
أقول روحوا لا تردون عادي ..
إلا انت لك أشتاق لك شوق من جد ..
أحس لك وحشة تقطع فؤادي ..
صديت بسرعه عنها ما عاد أتحمل المشاعر الي غزت روحي .. صعدت فوق لداري بخطوات هاربه من شبح خيانه زوجيه لأني بذمه رجل .. يعني محرم علي حتى تفكير ..شلون بمشاعر تلهب لي طرى لي أسمه ..
رحت لغرفه فاطمة أتطمن عليها و على بنتها .. حالتها ما تسر العدو .. و لا تبشر بالخيــر .. مقطعه عمرها بالبجي .. و قاعده على سريرها و حاضنه حور الي تئن بالم ووجها احمر على اسود .من الحمى ..
ركضت لها و انا خايفه و قعدت عالسرير جنبها و قلت لها و انا احط يدي على جبهة حور , _ فديتج يا عمري تو راكبتها ولا أول ؟؟
فاطمه و هي تبجي _ توني ألاحظ .. شوفي شوفي .. شكلها جنان ياويل قلبي .. ابوها جهازه مغلق و بنتي بتموت ..
قلتلها عشان تتطمن .._ لا الحمدلله .. عبير دقت على بندر و قالتله ..
فاطمه تحضن بنتها بقوه وتبجي .. خاتي دمعه من المنظر الي أشوفه قدامي و فجأه دشت علينا عبير و تقول _ يلى فطوم ألبسي ينطرج تحت جاسم .. يلى بسرعه ..
قمت من مكاني أطلع عباية أختي من الكبت .. عشان تستعجل ..و عبير شالت حور بعد ما طلعت العبايه لها ألبست و أخذت بنتها و نزلت تحت .. ألتفت لـ عبير ولا عبير أطالعني بنظره بارده .. حسيت كأن الدم الي بجسمي نشــف ..
سألتها بإرتباك _ شفيج أطاعيني جذي ؟؟!!
ماردت علي إلا بعد ما قربت منها و انا ابتسم بتوتر شفيها عبير على هالنظره ..؟ ما أعتقد قلت لها شي مو زين ؟!!!!
عبير بفضول _ أنتي للحين و بعد زواجج يا جنان تحبين ولد عمج ؟
ضحكت بسخريه .. استهزاء .. قولوا ألي تقولونه .. فن .. تمثيل .. بحرفه و مهاره .. قلتلها _ منو قصدج ...؟ بنـــــدر !!!!
لاحظتها تنظر لي بإستخفاف ثم قالت _ لا أقصـــــد جاســــم ؟
عرفت أنها تستهزأ فيني و عارفه الي بقلبي .. بس لا يمكن لا يمكن أقولج يا عبير الي بقلبي ... مهما كنا روحين بقلب واحد .. إلا بهالشي لا يمكن أذل نفسي فيه ..
قلت لها مع تمثيل البردو ._ لا .. أنا بذمه رجال الحين .. و اخوج صفحه من حياتي و انطوت ...
عبير _ أها وليش أولى بغيتي تموتين .. وما سألتي إلا عنه .؟؟
قعدت أمشي بالغرفه بدون هدى ... بس عشان أتهرب من نظرات عبير قلتلها و أنا أمثل اللامبالاة _ بندر ألحين ولد عمي و بس ..... و ما فيها شي لي سألت عنه حاله من حال جاسم ...
لكن أتمنى ان فكرج لا يروح بعيد ..
( قلتلها و انا ضاغطه اسناني ) بندر بيظل ولد عمي و بس .....
شفتها تبتسم باستهزاء و تقعد على السرير و كأني مذنبه بجريمه .. مو مصدقتني ليش .. ؟
استغربت من تعاملها عبير توأمي كان من المفترض تكون أسعد وحده و تشاركني بفرحتي مو توزع علي نظرات تقتلني ... وقفت صوب الكبت .. و عطيتها ظهري ..
((( خطبنــــــــا ســـــــــــــــارا لـــــ بنــــــــــــــــــــدر )))
ألتفت لها بسرعه و صرخت بوجهها _ لالالالالالالالا
و هي على وضعيتها ساكته بس بنظرات قاتله ...
طلعت بخطى سريعه لغرفتي مابي أشوف وجهها و لا ابي اسمع صوتها ... الليله هاذي أحد مسلط علي .. لا لا لا ما اتخيل لو بس لحظه .. ما أتخيـــل .. سارا سارا أختي ... و لمنـــو ؟؟ يا ناس ...
حرام عليهم ليش يبون ينون حواجز بيني وبين أختي ...؟ قلة بنات الديره .. مالقوا إلا سارا ... أختي ؟؟!!!!!
طقيت الطوفه بقهر وألم .. ما أتخيل .. مو قادره ...
( جنو العشا تحت )
ألتفت لها بقلب مقهور مابي أطالع بوجها ؟؟ الشيطان راكب راسي .. مع أنها مالها ذنب .. لكن القهر و الغل أعماني وسيطر على مشاعري .. ما توقعت ان الموضوع بتطور و يوصل لهالأمور ...
و يخطبون أختي لــحلمي الأبدي .. السرابي ..
قلتلها بعنـــف _ مابي شي واطلعي برى ...
بدون ما أطالعها لأني خلاص مو قادره .. عبير أقهرتني .. شكلها مو عاجبني الليله .. ألتفت للباب بعد ما اصفقته سارا بقوه .. تأكدت انها زعلت ...و تذكرت قبل كلامها ليما كنا نضحك .. و كانت تتمنى تاخذه .. بس كانت المسأله مسأله ضحك .. ما توقعت انها تصير حقيقه ..
..
ألحين يا جنان شبيقولون عنج .. مشاعرج أنفضحت .. حاسده أختها على ولد عمها .. انتي خلاص جاج نصيب .. و للحين حاسده أختج ..!!!
لا لا والله أني أحب سارا ..و أبيلها الخير .. بس صعبه صعبه .. هالزيجه هاذي .. لكن أنتي تحت عصمه رجل .. بس حتى ولو ... مشاعري ما ماتت للحين ... و بهالزواج بكون خاله لعياله .
يعني الجرح بيعتصرني .. سنين و سنين لي الله ياخذ الأمانه .. قلبي نبضاته سريعه و يديني اشوفها اتراجف .. قدام عيوين ... الغضب الغضب ... أعمى عيوني .. فــ حذفت عمري على السرير .. أحاول اخماد الغضـــب .. و سرعته .. سمعت حشرجه عند الباب .. ثم قعد يطقون الباب ..
و لا صوت عذاري
جنـــــــــــــــــنان ...
يالله الصوت طلـــع ... و يوم طلع مقهـــور _ دشي ...
الـــــ17ـــــجــــ17ــــــزء
الســــابـــعــ عــــــشـــر
أنفتح الباب و لا عذاري و سارا و عبير واقفات عنده ..
غمضت عيوني بألم و قعدت أضغط أسناني ببعضها .. أحاول أكتم صرخه بتطلع .. قالت عذاري _ جنان يلى العشا تحت ..
رديت عليها و احاول اكون طبيعيه _ مــو مشتهيــه ..
سارا بزعل _ زين انا شكو تصارخين علي إذا أنتي مو مشتهيه !!
بتلقائيه طالعت بعبير الي طالعني بتمعن و قلت وانا أخفض صوتي و كانت نبرتي أقرب للأعتذار _ انا آسفــــــه سارا ما كنت أقصد أهاوشج ..
عذاري و هي واقفه على راسي _ زين يلى قومي تعشي أهلج تحت أووه سوري أقصد أهلنا تحت ..
غصبت نفسي على رســم أبتسامـــه كمجامله لأختي .. و وقفت على رجولي .. بطلع بس شفت سارا متخصره و تبتسم لي .. أبتسمت لها .. جت يمي تحضني .. فتحت ذراعي لها . و قلتلها و انا قاصده هالشي ..كانت الأحرف طالعه من صميم قلبي يمكن هي ما فهمت شنو السبــب مــن هالكلمات _ سارونا سامحيني
يمكن سارا تعتبر أسفي عن شدتي معها .. لكني أقصد دخول الشيطان في علاقتي مع أختي عشان شخــــص ..
عبير أسحبت سارا بعد ما شافتنا طولنا قالت _ آوهو وخرني عن حبيبتي توأمي ..
ضحكوا الكل إلا أنا .. دزيتها على خفيف لورى .. قلت بحقد لها _ مابيج و لاني حبيبتج و لا توأمج .. زيـــــــــن ؟
ردوا يضحكون مره ثانيه .. يااا الله على هالناس .. صــــــار الأحساس عندهم ميت ..
قلت و انا خلاص ببجي من القهر _ يلى يلى مناك مناك ..
حسيت انها ناويه الليله علي قالت _ بسج بسج لا ينطلج عرج .. خلاص احنا تحت ننطرج أوجي جنوو ..
و لفوا بيطلعون و ضحكهم صام أذوني .. بسرعه سحبت علبه الكليـــنكـــس الي على طاولتي و حذفتها بحقد و قهر على عبير ..
ألتفتوا لي بعد صرخه عبير .. خواتي كانوا مستغربين من تغير نفسيتي .. أما عبير الي ركضت لي عشان تاخذ حقها .. صعدت فوق سريري و انا خايفه شكلها عصبت من صج ..
قالت و الشرر يتطاير من عيونها و يدها على مكان الطقه _ ليـــش أطقيني ؟!
قعدت أطالعها و انا ساكته و أطالع بسارا أستنجد فيها أبيها تساعدني .. و تفكني منها ..
قالت عبير بخبث _ كل هذا عشان ألي قلته لج ..!!
ضغطت على شفتي السفلى كأني طفلة قاعدين يعاقبونها ..
ردت تقول _ المفروض مو انا ألي أنطق يا حلوه ..!!
هم ما قدرت أتكلم حسبي الله على أبليسها ما خذها راحتها قدام خواتي .. حسيت ان لو تكلمت عبير بعد .. بطينها أعرفها بنت عمي ..
قالت بصوت ما يوصل لخواتي الي واقفات عند الباب _ بغى يذبح أمي يوم قالتله عن ( قالت أسم سارا بشفايفها بدون صوت )
( أنتن ما تستحن الناس تسأل عنج و أنتن معتكفات فوق !! جنان يمي خالتج تنشد عنج .. روحيلها بسرعه .. )
كلنا ألتفتنا لأمي الي معصبه من تأخيرنا ..
عذاري و تخصر _ يا سلام يا يمه وانا بنت البطه السودا شمعنى خالتي تسأل عن جنان و انا لا ؟
أم محمد _ كاهي تحت روحي أسأليها مالي شغل ؟
سارا و تصفق _ عااااااشت ام محمد ..
عبير بتحرش _ ماكو أنوثه يا ناس ..
سارا بدلع _ انا الأنوثه يا عبير و أنتي ودج بأنوثتي الطاغيه بس مو حاصلج ..
عبير و تنزل من على السرير و تطلع برى الغرفه _ واضـــح ..
سارا و توقف جنبها _ محتراااا سنيورا عبير ..
طالعت عبير بسارا و قالت و هي تبتسم بخبث _ بلا أنوثه بلا بطيخ .. أقول سارونه ..؟
سارا و هي نازله مع عبير على الدرج _ قولي كلي أذان صاغيه .
عبير _ لا مشكوره مابي أذونج انا أبي عقلج يكون معاي حبه حبه ..
سارا _ آسفه .. يلى انا معاج حبه حبه بس قولي ..
عبير بتمثيل البراءة _ فرضا فرضا خطبج بندر أخو ..
قاطعتها سارا و هي تقول بإشمئزاز _ أسم الله أسم الله أسم الله علي انا سارا أخذ هالمعقـــد ..
عبير كاتمه ضحكتها _ لا شدعوه سارا ترى ما أرضى .. حاسبي على كلامج تراه أخوي ..حاولي تتذكرين ها ماما ..
سارا بنظره قهر _ صج و الله .. نسيت عبوره .. أدري انه أخوج و مثل ما هو أخوج تراه ولد عمي .
( قالتها بإشمئزاز )
عبير _ زين فرضا فرضا أهو مصر يبيج .. و لأنج خلاص ما بقالج إلا سنه و تخرجين .. يعني يملج عليج ألحين و تتزوجون بعد التخرج .. و نقـــ
ما كملت جملتها و لا وجهه سارا محتقن من الدم .. قالت بغضب _ نجوم السما أقربله .. لا يفكر و لا يحلم فيني .. و لا بعد الحبيب بينطر سنه .. خو عمره راح من كثر ما ينطر بنات خلق الله .. خل يلحق على عمره .. قسم بالله شكل أخوج بيطق الخمسينات و لحد الحين ما تزوج ..
عبير من الصدمه لسانها ألجم .. بنت عمها مسحت بأخوها بالقاع
ما تركت كلمه إلا قالتها فيه ..
عبير مسكت يد سارا و قالت بقهر _ شدعوه هو ميت عليج .. ما طولينه يا سويره أم الخلاجين .. هذا تاج راسج .. بو عذبي .. رضيتي و لا مارضيتي .. و بعدين هو أصلا فكر فيج عشان تقولين نجوم السما أقربله .. أحمدي ربج بس كأسم بندر يقترن فيج .. ماقول إلا مالت ..
سارا تخصرت _ عشنا و شفنا هذا الناقص و الله .. تاج راسي لا حبيبتي .. تاج راسج أنتي و أهله أما انا لا .. مابقى غير بنيدر
شوفي يا ماما بنتج بتاخذ هالمعقد العملاق ..
حطت عبير يدها على فم سارا تسكتها قالت بهمس _ أووص قصري حسج .. .. ! شكلج تبينه من صج ..؟
عيون سارا بتطلع تبي تكلم بس عبير مسكره جلجها بيدها ..
بعد وجبة العشـــاء .. سحبت جنان عبير لغرفتها .. وراها حساب عسير .. بعد ما سكرت باب الدار عليهن ..
قالت عبير بتمثيل البراءة _ شفتي يا جنان .. أختج شقالت ؟
جنان بصبر و هي تقعد _ ما علينا ألحين من سارا و خبالها ..
شنو مبررات الموضوع الي ثرتيه قبل العشا ..؟!
قالت عبير بلهجه جاده _ جنان انا رفيجتج و بنت عمج .. يعني عارفتج عدل .. و عارفه يا جنان أنج تحبين أخوي و تمنيتيه زوج لج .. من يومنا صغار .. كنت أشوفج تستانسين لي شفتيه .. و كنتي تدلعين عنده عشان يطلعنا برى البيت .. كنت أشوفه يعاملج معامله عاديه كمعاملته لي .. بس أنتي لا .. نظرتج له غير .. نظرتج له كولد عم و حلم تتمنين تحقيقه بأرض الواقع ..
انا كنت فرحانه أنج تحبين أخوي عشان تعيشين عندنا و تكونين مع أمي و أبوي لي رحت لبيتي .. و بترتاحين أكثر لأنج زوجه بندر .. جنان .. بندر كان و لازال أبوي الثاني .. صح أنه عصبي و بسرعه يهاوش إلا ان قلبه رحيم عطوف .. و متأكده ان الي بياخذها أمها داعيه لها .. لانه رجال بمعنى الكلمة .. ما قصر في والدينه و لا في بيته .. جنان للحين ما أدري شنو الكلام الي دار بينكم في المستشفى حتى يخليج تطلبين الطلاق .. !! قعدت أفكر أيام و ليالي عن هالموضوع بس مالقيت له جواب .. و ألحين مدام أنج بذمه رجال .. قولي لي يا جنان طلعي الهم الي بصدرج .. لا تكتمين الهموم ..ماراح يذبحج إلا هي .. و سارا لا خطبناها و لا هم يحزنون .. أصلا عصب علينا و حلف يا ويلنا إن فاتحناه بموضوع الزواج .. يختي مادري شفيه على الزواج .. عدوه اللدود ..
جنان بعد ما خلصت عبير من كلامها .. قالت بهدوء _
أخوج يا عبير كان مثل ما قلتي حلم و تمنيت تحقيقه .. بس حطمت حلمي أني أحطم حلمي و لا أخليه يتحقق .. ما يحتاج يا بنت عمي أفتح ملف من ملفات حياتي .. و ألي أعتبرها غلطه في ملفاتي .. خلاص الي صار صار و ولى .. و الله يرزق ولد عمي البنت الي تسعده ..
قاطعتها عبير _ لا تضحكين يا جنان على نفسج .. سارا و هي أختج ما فرحتي .. و هاوشتيها و هي ولا داريه بشي .. ( مسكت يد جنان و ضغطت عليها ) لكن نصيحه مني لج .. أنسي بندر و فكري بحياتج .. أخوي سنة سنتين خمس بيتزوج هذا إذا ما زوجته أمي بعد شهرين .. و أنتي عيشي حياتج .. و أنسي الي فات .. لو أني ودي أعرف سر زيارته بالمستشفى بس مدام أنج ما تبين تقولين فمراح أضغط عليج .. بس ما أقدر أنام الليله .. يختي الأفكار ذبحتني ..
جنان بجديه _ زين ليش قلتي ان بندر خطب سارا ؟ شنو الي تبين توصلينه من هالشي ؟
عبير _ كنت امهد لموضوع المستشفى ..
جنان ما كانت الكلمات تسعفها و تقول أو تعبر عن ما يخالجها . قالت _ حركتج أسمحيلي أقولج عنها تافهة ..
عبير _ جنان انا اسفه إذا أزعجتج .. بس كنت و الله نيتي صافية ..
و لا جهازها يرن قامت بسرعه عبير للجهاز و سحبته ضحكت جنان و قالت بتهديد _ جيبي تلفوني ..
عبير بعد ما شافت الأسم ضحكت و قالت _ زوجي العزيز
ليش مضيعته ..!! صج ماكو أنوثه فيجن يا بنات علي ..!!
/////////////////////////
// بـــ سيـــاره جـــاسم //
جاسم يبتسم _ لا بسيطه يا خاله .. بس تعرفين لازم دلع
.. بس حراره .. ما تقصرين يا أم محمد .. ألحين ألحين والله ما أقدر .. خليها بوقت ثاني .. شكلنا خربنا عليكم العشا .. تسلمين يا خاله بس كانا بنوصل للبيت .. يلى فمان الله ..
جاسم يلتفت لـ فاطمه _ خالتي تقول خطاكم السوء ..
فاطمه بتعب _ خطاها اللاش ..
ينها قطعت قلبي من صياحها ..
جاسم يلتفت لبنته الي نايمه بالمقعد الخلفي _ لازم تاخذ أبره لأن مفعوله أحسن و أسرع من المشروب ..
فاطمه _ أدري بس و الله ما تحملت بجاها ..
جاسم _ يلى كلها كانت دقايق .. و كاهي ألحين و شوفة عينج نايمه ..
فاطمه بحنان _ بعد عمري يا بنتي .. إيه جسوم باجر موعد السونار لا تنسى ..
جاسم _ إن شاء الله ما أنسى . ذكريني ..
فاطمه تبتسم و يدها على بطنها _ جسوم بصراحه تتمنى الجنين يطلع بنت و لا ولد ..
جاسم بجديه _ و الله الصراحه راحه أتمناه ولـــد .. و إذا جات بنت حياها الله .. رزق وجانا غيرنا يتمنون الضنا و لا جاهم ..
فاطمه _ إي والله صاج .. الحمد لله على نعمة الذريه .. و نعمة الصحه و العافيه ..
جاسم _ الحمد لله .. إلا بسأل شخبار العـــروس ؟
فاطمه تبتسم _ تمام .. بس حسافه طافتني القعده معها .. و أخذ أخبارها و علومها ..
جاسم _ الله يوفقها جنان تستاهل كل خير ..
فاطمه بفضول _ إلا أنا ألي بسألك .. زوجها شفته ؟!!
جاسم _ أكيد .. أجل العشا عمي مسويه لمنـــو ؟! له طبعا
فاطمه _ زين قعدت معه و سولفتوا ..
جاسم بنظره غضب _ و أنتي شكو قعدت معه و سولفت معاه ..؟! هامج حيل أهو ؟
فاطمه بفشيله _ لا ما كنت أقصد .. بس .. يعني زوج أختي و أبيك أتعرف عليه و
قاطعتها جاسم _ لا أبشرج ألي قعد عنده و أخذها معاه سوالف بـــنـــدر ..
فاطمه سكتت و لا ردت عليه .. قالت فـ نفسها _ فديتك يا جسوم طلعت تغار ..
نوف تلم أوراقها بملف .. قال لها نواف _ ها بس هذيل ؟ و لا باقي أوراق ..
نوف تمده له الملف _ لا بــس هذيل .. على الله يسهلها ..
نواف _ إن شاء الله يسهلها .. و أبوي قالي بيكلم واحد يعرفه بالوزاره و بيضبطلج أياها ..
نوف تبتسم _ يا ريت .. و أكمل الدراسا العليا ..
نواف _ ليش لأ .. جيبي نسبه مرتفعه .. و أبشري تقدميــن أنتساب في المدينة المنورة ..
نوف _ إيه يا نواف .. يمدحون جامعتها ..
نواف بيطلع _ أوكي يلى انا بطلع تبين شي من برى ..؟
نوف _ سلامتــــــك ..
على صعدتها و لا خزنه زوجه نواف قبالها ..
خزنه _ بتصعديـــن ؟!
نوف _ إيه ليش تبين شي ؟!!!
خزنه و بيدها ورقه _ إيه عندي فكره حلوه .. و بشوف رايـــج فيها ؟!
نوف ترد تقعد _ أمم و هاذي قعده .. يلى قولي ..
خزنه _ تسلمين بعد عمري .. هذا الله يسلمج ( توريها الورقه الورديه ) لجنة لـ طالبات العلم الشرعي .. ينظمن ملتقيات و ندوات و محاضرات مع فعاليات ترفيهيه و معارض .. رفـيجــتي قالتلي أنهم بحاجة لطالبات علم .. و انا تذكرتج على طول .. ها نوف شنو قلتي ؟!
نوف _ أممم خزنه هالخطوة يبيلها تفكير فما أقدر أرد لج خبر
ألحين .. قولي لـ رفيجتج تنطر كذا يوم ..
خزنه بحماس _ الله يوفقج يا نوف .. ومو عشانها رفيجتي أمدح اللجنة .. لا و الله الشاهد إذا رحت للمتلقى الربيعي خاصه بتشوفين أشياء تثلج الصدر .. و شغل عدل .. يجيبون مشايخ و علماء .. الربيع الي طاف جابوا العالم عبيد الجابري من علماء المدينه و حسين آل شيخ إمام الحرم و جابوا عبدالرزاق البدر .. و حاطينلج معارض متعاقده مع مشاغل حريم يعني فايده دنيويه و آخرويه ..
أبتسمت و قالت _ أوكـــي .. على ضمانتج يا خزنه ..
خزنه بفرحه _ على ضمانتي ..
/////////////////////////
محمد بتوتر _ يبه طيعني ..
بو محمد بعصبيه _ لا يعنـي لا ..
و ظل بو محمد يكح و يسكر الباب بوجهه محمد ..
محمد تم واقف عند باب الحمام و أنتوا بكرامه .. ينطر أبوه ليما يخلص من الكح .. و هو يدعي بقلبه أن يخفف المرض و آلامه على أبوه .. غمض عيونه بحسره و ألم .. و هو يسمع آهات ألم من صدر أبوه المريض .. شاف محمد أمه و سارا جايين صوبهم و على وجيههم أستفهام .. قالت ام محمد _ عسى ما شر ؟ شفيه وجهك جذي ؟!!
محمد مايبي سارا تحس قال _ الشر ما يجيج .. لا عادي بس متأخر على واحد من الربع ..
سارا أطالع صوب الباب بعد ما سمعت صوت كحة أبوها قالت و هي تأشر بأصبعها عليه _ بابا ؟!!
محمد يمسك أصبعها و يقول _ ساروناا روحي نادي بدور ..
سارا بعفويه ركضت صوب الدرج .. تروح تنادي بدور ..
بعد ماراحت سارا مشت ام محمد لباب الحمام المطرف و فتحته .. شافت بو محمد يكح بألـــم .. دخلت بسرعه و مسكته من كتوفه .. قالت بخوف و رجاء _ بو محمد لي متى لي متى ؟! خل نحجز بأسرع وقت ..
بو محمد بضيق تنفس _ لا يام محمد لا ..
محمد يتدخل _ زين ليش يبا ليش لا ..؟!
بو محمد بهوان و هم متجهين للصاله _ يابوك الأعمار بيد الله .. و انا مالي خلق للسفريات و المستشفيات ..
أم محمد _ و نعمه بالله يا علي بس ما نقعد جذي مكتفين أيدينا و ننطر العافيه تجينا ..
بومحمد _ خلاص انا إذا بتعالج بتعالج أهنيه أما روحه للندن مالي قدره يا مره ..
هزت راسها ام محمد لـ ولدها عشان يسكت ..لأن محمد مصر أن أبوه يتعالج في لندن ..
سكت محمد و صعد لـــ شقته ..
أما بو محمد الي طلب دواه من أم محمد .. عشان يخفف الألم عليـــه .. قعد قدام التلفزيون يشوف نشـــرة أخبار 9 بإنصات
شديد ..
يوسف _ إن شاء الله عمري بالعشر الأواخر ناخذ عمره و منها نطلع لـ ميلان ..
جنان _ إن شاء الله .. يوسف أهلك بيسافرون باجر ؟
يوسف بإبتسامه _ إيه باجر بيروحون .. و الوالد عرض علي و رفضت .. حبيت تكون سفرتنا بروحنا ..
أبتسمت جنان .. و سمعوا طق على باب شقتهم ..
قام يوسف يشوف منو عند الباب .. فتح الباب و لا دانـــه بنت أخوه عند الباب ..
دانه بدلع _ آآبي تيـــنان
يوسف شالها و دخلها شقته ..
ضحكت جنان من شافت دانه قالت بدلع _ نــعـم ..
دانه تعلقت برقبة عمها _ تينان آآبي هـــلاوه ..
جنان بتقوم تجيب لها و لا يوسف يقول _ لحظـــه جنان ..
ثم ألتفت لدانه و قال بأمر _ أول حبي هذا ( يأشر على خشمه ) بعدين تينان أتجيبلج حلاوه كبيــــره ..
قربت دانه لـ وجهه عمها و حبت خشمه حيل ..
جنان بضحكه _ كل هالحب عشان حلاوه صج بنت عذاري ..
و قامت تجيب لـ دانه حلاوه ..
يوسف ظل يلعب بنت أخوه .. ليـ جت جنان و عطت دانه الحلاوه مدت دانه الحلاوه لعمها عشان يفتحها .. قال يوسف _ يلى بس اليوم بدلعج .. بعدين بتشوفين عمو الأولي ..
جنان بإستغراب _ لا يكون أنت من النوع الي ما يحب الأطفال ؟
ضحك يوسف من شكل جنان قال _ لا أستغفر الله آكو أحد ما يحب الأطفال .. لا بس بنت أختج دلعها ماصخ و دمها ثقيل فتنرفزني أحيانا فأضطر أني أعصب عليها ..
شبكت جنان يديها ببعض و مدت رجولها المتشبكه ببعضها و شكلت أبتسامه طفوليه على وجهها .. قالت بنفسها _ مالومها بنت عذاري !!!
يوسف يتأملها على حركتـــها الطفوليه .. أبتسم بحـــب .. جنان نزلت راسها بإنحراج من سرحانه فيها.. و لا دانه تسحب يده لها بقوه .. عقد حواجبه .. قال بضيق _ خيـــر ..
تقوس حلج دانه للأسفل .. قال و هو يتصنع الحنان _ هااا شتبين ..؟!
حطت يدها اليمين على عينها اليمنى تفركها و قالت و هي تعصر نفسها على البجـــي _ أنا ما هبك ..
يوسف و جنان قعدوا يطالعون بعض البنت حريفه بالتمثيل .. غمزت جنان لـ يوسف قالت _ داناااا تحبين سارااا ؟!
فجأة كشرت البنت وجهها و عقدت حواجبها .. قالت بصوت عالي _ لااااا ..
يوسف بإستفسار _ منو سارا ؟
جنان _ أختي القعده ..
و طلعت لسانها بدلع لدانه .. الي شوي و تنفجر بجي .. يوسف _ عاد ليش كل هالصياح ؟ شكل أختج شريره ؟
جنان _ حرام .. سارونه شريره
!! إلا بنت أخوك الشريره .. بس سارا لعبها دفش .. فعشان جذي ما تحبها بنت أخوك .. و لا
قطع سوالفهم رنيـــن تلفون شقتهم .. قام يوسف من الغنفه و راح يشيل سماعه التلفون ..
يوسف _ نعم ..
نوال _ هلا يوسف ..
يوسف _ هلابج ..
نوال _ حياكم القهوة تحت ..
يوسف _ خلاص دقايق و ننزل ..
عاد منو الي مسويهاا .. بصراحه نوال .. ؟
ضحكت نوال _ يقولون الصراحه راحه ..
يوسف يبتسم _ يقولـــــــــون !
نوال بفشله _ أمي الحبيبه ..
يوسف _ قايل و الله .. أنتي حتى عتبه باب المطبخ ما تحوشينها عاد قلت يمكن عشاني معرس توني بقراطيسي دشت المطبخ و سوت ذيك القهوه الي يحبها قلبي بس يلى لنا الله ..
نوال _ يوه يا يوسف .. نعيد و نزيد يعني .. يلى أمي تقول تعالوا تقهوا .. صار لكم شهر و ما شفناكم .. عاد يلى ألحين الله يعينك عندك أمك و زوجتك و الله الله أعدل بينهن .. كلهن لهن حقوق عليك ..
يوسف _ شنو ؟ ما فهمت عليج ..
نوال كسر خاطرها قالت برأفه _ يوه يا يوسف أجل ما تعرف سوالف الخاله و الجنكه .
يلى يلى أنزل و أقولك كل شي .
يوسف _ يلى جايين .. و لحظه أرسلوا خدامة سلطان تاخذ بنتهم الغثيثه من عندنا ..
نوال _ أووف الله يعينكم و تامر أمر .. يلى مع السلامه ..
يوسف _ فمان الله ..
سكر التلفون و ألتفت لجنان .. الي قاعده تلعب دانه .
يوسف _ جنان ..
ألتفتت جنان له _ لبيـــه ..
يوسف _ لبيتي في منى ..
جنان _ أجمعيـــن ..
يوسف قايم بيروح يغير _ الوالده عازمتنا على القهوة ..
و لا صوت خدامه عذاري تصيح _ داااناااا ..
يوسف يلتفت لجنان _ طبعا خدامتهم ما تعترف بطق الباب بس صياح ..
أبتسمت جنان .. عايله أختها غريبه و الأغرب بعد خدامتهم ..
قبـــــــــل شـــهـــر رمضـــان بأسبـــوع ..
الساعه 11 صبـــــــــاحا ..
أم محمد بفرحه _ هلا هلا بجنان ..
جنان داخله على أمها و تحب راسها و يدها _ هلا فيج يمه .. شخباركم .. ؟
أم محمد _ الحمد لله بخار .. جنان بتساؤل _ الحمدلك يا رب. بروحج يمه قاعده ؟
أم محمد _ إيه يمه شوفة عينج .. أبوج توه مستأذن من الشركه تعبان .. المرض يمج أكله .. و مو راضي يتعالج برى .. و سارا أنطريها ساعه و بتنزل .. و بدور توها صاعده من عندي بس بترد تنزل بعد شوي .. و أخوج بالشركه ..
جنان بحنان _ زين أبوي وينه ألحين ؟
أم محمد _ نايم بالغرفه ..
جنان _ بروح أسلم عليه ..
أم محمد _ جنان وين تسلمين عليه و هو نايم ..؟
جنان بحب _ عادي أحبه و هو نايم .. مشتاقه يمه له حيل حيل ما تدرين شكثر مشتاقه له و لج
أم محمد تأشر على الغنفه _ زين يمج تعالي أقعدي أول ثم روحي سلمي على أبوج ..
قعدت جنان و قهوتها أمها ..
أم محمد بإستفسار _ جنان .. بتباتين الليله عندنا .. ؟
جنان بفرحه _ إيه .. يمه .. اليوم إفراج .. أهله مسافرين و هو رايح لشاليه واحد من الربع و بينام عنده .. قلت شيقعدني بروحي .. ! خل أروح لأهلي و سمح الحبيب لي ..
أم محمد _ إيه توكم بتكملون شهرين .. و العروس خلاص من تزوج بالاشهر الأولى ما تبات عند أهلها ..
جنان _ معاج حق يمه ..
سكتوا لحظات .. رفعت راسها أم محمد بتساؤل قالت _ أقول جنان ..
جنان _ قولي يمه ..
أم محمد _ ما في شي بالطريج وانا أمج ..؟
جنان أنصبغ وجهها باللون الأحمر قالت بحيا _ لا يمه ماكو شي .. رحنا لدكتوره و قالت تو الناس ..
أم محمد عشان أطمن بنتها حتى لا توسوس _ و الدكتوره صاجه .. تو الناس عليكم .. و الرزق جايكم جايكم إذا الله كاتبلج أتحملين بعد سنة بتحملين و إذا كاتبلج أتحملين بعد شهرين بتحملين .. بس لازم يا بينتي التوكل على الله ..
جنان _ و نعمه بالله ..
|