جنان قاعده على نار .. تنطر أمها أتكلم عن الحوار الي دار بينها و بين عذاري بس طاف .. شافت أمها تمدد على الغنفه بتعب .. قالت جنان _ أجي أدلكج يمه ..؟
ام محمد بتعب _ إيـــه ..
راحت عندها و قعدت أدلك رجول امهاا .. قالت جنان _ يمه
ام محمد _ هلاااا ..
جنان تضغط على شفتها السفلى _ يمه شعندها عذاري ؟
ام محمد تعقد حواجبها _ ما عندها شي ..
جنان لوت حلجها لصوب اليمين قالت _ زين ليش عصبتي عليها؟
ام محمد ترفع راسها و اطالع بـ جنان بنظره غضب ثم قالت _ قالتلج شي هي ؟!!
جنان بسرعه من شافت النظره قالت _ لا لا لا ما ادري شسالفه أصلا ..!!
ام محمد بغضب _ هاذي عذاري و هاذي سوالفهاا .. سالفه مالها داعي لا تشغلين بالج عليهااا ..
جنان اسكتت و كملت تدليك لـ أمها ..
جت سارا من المطبخ و جايبه معاها صينيه فواكه ..
أم محمد شافت الصينيه قالت _ هاذي البنت الزينـــه ..
سارا تلعب بحواجبها لـ جنــان بتقهرها .. قالت جنان لـ سارا _ أستغفر الله يا ربي ..ألحيـن أمي
تمدحج شكو ترفعين حواجبج علي ..
سارا و تمشي بغنج و تحط حبه عنب بحلجها _ محتـــــرااا .
جنان بقهر قالت _ صج يهااالووه
أم محمد تقاطعهن _ والله ما يصير .. كل وحده لازم تمسك الثانية بشعرهاا .. هذا وانا موجوده العيون تخزخز و لسان قام يطول .. اجل من وراي شتسون ؟!! بناتي الحيا متبري منهن ..
جنان ضاق خلقها زياده .. الأحداث عندها اليوم كئيبه وتبي تفجر طاقه من البجي كاتمتها لكن شنو سبب هالضيقه ؟
هل من مكالمة عذاري و طاري
الخطبه الي لمحتها ؟! و لا من حركات سارا المستفزه ..؟ ما عرفت شنو السبب .. لكنها قامت
من عند امها و سارا الي ياكلون فواكه .. و بتصـعــد فوق .. نادتها
امها .. جنان بجمود _ هلا يمه ..
ام محمد _ أمشي أكلي فواكه .
جنان تحط يدها على راسها _ بس ماني مشتهيه يمه .. بناااام و لا أحد يقعدني ع العشا ..
و كملت طريقها لغرفتها ..
مسكت ام محمد أذن سارا و قرصتها .. سارا بألم _ آآآي .. يمه
ام محمد _ إن شفتج أتحرشين بأختج .. قطعت هاللسان .. و علمت أبوج و أخوج عليج ..
سارا تمسك يد امها و تبعدها عن أذنها _ آي .. خلاص ما عودها ..
دش بو محمد .. عليهم و ملامح وجهه تعبانه .. و منحني ظهره ..
قامت سارا له تمسك يده و تقعده على الصوفا .. بعد مالاحظت تعبه و عجزه .. أول ما قعد أطلق آهه و أرخى جسمه .. طالعت سارا بأمها بخوف قالت بهمس _ يمه ابوي أشفيه ..؟
قامت ام محمد لزوجها و قعدت جنبه .. قالت بهدوء _ بو محمد أنت تعبان ؟
لف وجهه لها و قال بصوت تعبان _ إيه يام محمد .. بس عوار خفيف و يروح ..
فجأة كح بطريقه متواصله .. وقفت سارا من التوتر و الخوف .
و قعدت اطالع بأبوها بحسره و ألم .. و رجاء من الله انها تكون آخر كحه .. أبوها يتألم قدامها و لا هي قادره تساعده بشي .. ركضت بلا شعور لـ لمطبخهم تجيب له ماي .. حتى تخف عليه الكحه ..
بعد ما وصلت شافته منسدح على الصوفا و مغطي وجهه بشماغه .. و امها طالعه من غرفتهم و بيدها قرص حبوب ..
سارا بصوت مرتجف _ يبـــا هاك الماي .. يبـــا ..
سارا قلبها طاح .. ليش ما يرد علي .. الشيطان لعب فـ عقلها ..
هزت كتفه بإستمرار .. و لا أمها تجر يدها من على كتفه .. قالت بهمس _ شفيـــج عليه ؟
سارا الدموع تجمعت بعيونها _ أبوي ماقاعد يرد علي يمه ؟!!
ام محمد وتاخذ القلاص منها قالت _ إيه غفى .. ألحين بقعده
بو محمد بو محمد كاهو الماي و الحبه .. يلى قوم ..
سارا بخوف تفحصت أبوها بدقه ليـ شافته يتحرك عشان يقعد عدل .. خانتها أبتسامه على السريع بين دموعها الساكبه على خدودها ..
و قعدت جنبه على الصوفا و حبت كتفه بحب و حنان لهالرجل
الأبوي العطوف ..
رفع راسه لها و هي قاعده جنبه أنحنى لراسها و حبه .. ثم أكل الحبه و شرب الماي ..
قال _ قعدوني على العشا ..
ام محمد _ أبشر أبشر ..
قامت سارا و قعدت جنب أمها و عيونها مركزة على ابوها الي على طول نام ..
جـــــــــــنـــــــــــــان
ما أقدر ما أقدر ..! مدام هالشي
يخصني لازم أعرف .. لكن امي ليش ما تبيني أعرف ؟!!!
أخذت جنان تلفونها و أتصلت على عذاري .. لكن الجهة المتصلة فيها ما ترد .. حذفت جهازها _ آوووف يا عذاري هذا وقتج !!
طالعت بساعه الحائط لقت الوقت 7:45 مساءا ..
أكيد هالوقت مسموح لها من قبل السلطات العليا .. رجعت و اخذت جهازها و دقت على عبير
الي ثواني و صوتها واصل لمخ جنان _ جناااااااااااااااااااااااااااان .
جنان بحقد سكرته بوجهها ..
جنان _ أحسن خل تتأدب بغت تفجر الطبله حسبي الله من صوت نشاز .. حتى التصنع ماكو وجود له بقاموسها .. ياربي ودي اشوفها إذا بغت تكلم زوجها .. أمنيتي فهالحياه ..
شافت جهازها يرن .. رفعت بعد كذا رنة بتقهر عبير ..
جنان بتقول نعم بس عبير ما تركت لها مجال .. عبير بصراخ _ آيا قليله الحياااا تسكرين السماعه بوجهه عمتج ..
جنان تخصر _ بعينج عمتي .. أول تأدبي و قولي نعم بهدوء مو تفجرين أذون خلق الله .. شهالدفاشه ياااا الله ..؟!
عبير بقهر _ يلى مناك .. أعوذ بالله قاعدات لي عالقعده أنتي و أختج .. مير المسكينه أختج ما تاخذ حقها بيدها غيرها ياخذلها حقها .. و لا أنتي حقج و زياده ما خذته بيدج ..
جنان _ شنو .. شنو مسويه لأختي شي ..! باجر أنتي الوحيده حرمان من الريوق ؟!
عبير تقاطعها _ لا تخافين في ناس أخذوا حقهاااا لا تخافين ..
جنان بدلع _ بعدي و الله جسوم.
عبير بخبث _ بعدج بندر مو جسوم .. يا حلووه ..
جنان ما فهمت _ شكو بندر ؟!
عبير _ الي هاوش أخته العزيزه عشان فطيووموه ..
جنان أبتسمت .. قالت عشان ما تحس عبير _ الله يعطيه العافيه ..
عبير _ أيا الي ما تستحين تقولين لرجال متزوج و أبو .. بعدي و الله .. و يوم جت على الأعزب قلتي يعطيه العافيه .!
جنان بدلع _ جسوم الله يسلمج بمثابة أخوي محمد .. بس بندر لأ ..
عبير بدفاشه تقلدها _ جسوم الله يسلمج بمثابة أخوي محمد .. بس بندر لأ ..
يعني عندج أثنين أخوان منو قدج ؟ أيوااا ..
جنان _ سخيـــــــــفه عبير ..
عبير بسرعه تذكرت سالفه الخطبه قالت _ جنو عندي لج خبر فرش طازج توه حتى ما طلع من أربع ..
جنان بإستغراب _ وي صارت حسبه هاذي .. يلى قولي كلي لج آذان صاغية يا بنت عمي ..
عبير _ تسلملي هالأذون الحلوه يا بنت عمي ..
جنان تأفف _ يا ليل ما طولك .. السالفه مطوله .. بتقولين و لا شلون ؟!
عبير تأخذ نفس بتكلم و لا تضحك من الحيا .. جنان ما ستحملت طريقه ضحك عبير .. فقعدت تضحك معاها .. تموا يضحكون ثم سكتت جنان و قالت بقهر _ يـــــــــوه يا عبير خلاص مصخت السالفه ..
عبير تحاول تسكت عمرها لي قدرت ثم قالت _ جنوو ..
جنان بصبر _ نعم يلى قولي ..
عبير بحيا _ اليــــــوم
جنان بنعومه تقلدها _ إيــــــــه
عبير _ جاسم ناداني للديوانية .. و كان عنده رجال و دخلني عليه ..
جنان تقاطعها _ شنووو ؟!
عبير _ رفيجه جاي يخطبني و شرط انه يشوفني قبل ..
جنان أستنانست لها و فرحتلها قالت و يدها على خدها الأيمن _ يا فشيلتي و عمي و بندر كانوا موجودين ..؟
عبير اطالع بباب غرفتها _ لا بس باجر بيتقدم رسمي ..
جنان تبتسم _ شكله حلوو ؟
عبير تذكر _ أممم لا عادي بس راعي حركات جلد الشوارب .. و الفرنسية ..
ضحكت جنان بصوت عالي و قالت _ جالد شاربه .. الله يوفقج يا عبير ..
عبير بفرحه _ أجمعين يا جنو ..
لحظه يوه يا هالرجال متى يتزوج و يفكني من طلباته .. شفتي هاذي الي بتاخذه و الله تلقين أمها داعيه عليها مو لها ..
جنان ألتزمت الصمت و هي تسمع شكاوي عبير من أخوها ما قدرت تحمل بعد ما قالت عبير بقهر _ ياختي هو شنو أستعباد .. ! الظاهر انا الي امي داعية علي .. تشاو ..
وصكت الجهاز .. جنان ضحكت من كل قلبها على بنت عمها العفويه بدون تصنع .. الي بقلبها على لسانها .. و هذا الي مريحها أكثر ..
جنان بحنان _ يا حليلج يا عبور ..
و يا حليلك يا بندر أدافع عن بنت عمك .. بصراحه ما دري شلون جاتني الجرأة و طلبته يجي عندي .. و يطلقني .. سبحان الله قرارات ننصدم منها بعد ما تنفذ و شلون أحنا صدرناها ..
مشيت لـ مسجلي و شغلت شريط سوره الأنفال للقارئ عبدالمحسن القاسم .. يا الله .. سبحان الله من الصدف الجميله ان بندر بعد يحب يسمع لهالشيخ . و تركت صوت الحق يدوي بغرفتي ..
غيرت و لبست بجامتي الورديه و حذفت عمري على الســـرير
/////////////////////////
صرخت صرخه مخيفه خلت أهل البيت يركضون لـ مصدر الصوت ..
صفيه و خزنه بوجهيه مصدومه و مذهوله من المنظر الي قدامهم ... نـــوف طايحه و بعيون مفتحه و رغوه زرقاء مغطية فمها .. جسمها كان مشمئز من الكدمات الي مختلف الألوان مغطيته
أم احمد و تهز جسم بنتها و هي تبجي _ روحوا نادوا أحد من أخوانهااا ..
بسرعه استوعبت صفيه و ركضت لـ أحمد تقعده عشان يودي أخته للمستشفى ..
خزنه قعدت تساعد خالتها و هي تحاول تشيل نوف و يطلعنها من الحمام " اعزكم الله "
جا أحمد و هو حتى ما غسل وجهه و لا غير بجامته .. شافهم يحاولون يصحونهاا ..قال بتلعثم _ اناا بببسياره جيبوووها بسسسرعه .. و طلع و هو يركض ..
حذفت امها العبايه عليهاا و شالنها ليـ وصلنها عند باب البيت الخارجي .. جا أحمد و شالها و حطها بالسياره .. قالت امه و هي ميته بجي _ احمد يمه دير بالك عليهاا ..
أحمد ما رد عليها بسرعه ركب سيارته و حرك للمستشفى ..
صفيه و خزنه .. ما حبوا يستفسرون .. عن سبب محاولة حماتهم لـ الإنتحار .. !!
فقعدن عند خالتهن يهدنها و يواسنا ..
ام أحمد _ آآه يا قلبـــي .. راحت راحت بنتي ..
صفيه تمسك يد خالتها _ أستهدي بالله يا خاله .. إن شاء الله كلها غسيل معده و ترد لنا بصحه و عافيه ..
ام أحمد _ يـــا ريت يا صفيه .. يا ريـــت ..
و تقوم خزنه تجيب لها عصير ليمون .. _ خاله أشربي عصير .. ام أحمد _ بس مابي يا خزنه .. بنتي راحت راحت راحت ..
خزنه بأسى _ زين خاله أدق على نواف أخليه يشوف الوضع هناك ..
رفعت راسها ام أحمد لـ خزنه _ دقي و عطينيه .. انا بكلمه ..
خزنه و تروح تجيب التلفون ..
دقت كذا مره بس الجهاز مغلق
خزنه بحزن _ خاله مغـــلق .!
ام أحمد _ اكيد قاله أخوه و هم ألحين بالمستشفى ..
أول ما وصل أحمد للمستشفى أخذوا نوف و ددشوها بغرفه غسيل معده .. و الحمد لله قدروا عليها قبل لا تنظم لعداد الموتى لا قدر الله ..
و راح بعدها سيده للتلفون و أتصل على نواف ..أحمد بصبر _ ألوو نواف ..
نواف _ نعم منو معاي ؟
احمد _ معاك احمد أخوك . انا بالمستشفى .. نوف يا نواف حالفه إلا تسود وجيهنا ..
نواف بصدمه _ شنـــو ؟ منتحره
أحمد بتوتر _ إيه .. و ألحين أهي بغرفه غسيل المعده .. تكفى دق على ( ..... ) خل يكتم على الموضوع .. و المستشفى بديهيا بيدقون على الشرطه .. و تخبر أنت سين و جيم .. ليــ ننفضح ..
نواف بعصبيه _ حسبي الله و نعم الوكيل .. ألحين لو طلع هذا مسافر مو موجود بالديره .. شراح أسوي يا أحمد ؟!
احمد بسرعه _ رووح ألحين لبيته و كلمه .. ما بيرفضلك الخدمه ..
نواف بقهر _ و اقوله السالفه من لـــ إلى ..
احمد بسرعه _ لااااا
نواف _ اجل شقوله ..
احمد _ قول تمشكلت معاها و طقيتها و ثم هي حاولت تنتحر
نواف بهم _ أوكي انا بغلق جهازي و إن صار شي انا بدق عليك ..
احمد _ أوكي .. أقول أقول نواف
نواف _ نعم
احمد _ أبوووي .. ما عنده خبر !
نواف _ والله مادري وانا خوك .
احمد _ أجل يلى فمان الله ..
..
حرك نواف بكل ضعف و هوان لقريب لهم و شخصيه بارزه بالكويت .. ضغط على نفسه و على كرامته و شرفه الي ضيعته
بنت طايشه بلحظه جنون و طاعه للشيطان .. كانوا دوم رافعين راسهم .. بمرجلتهم و سمعتهم البيضه مثل بياض الثلج
بعد نصف ساعه وصل قدام بيت الرجال .. دش الديوانيه شاف الرياجيل ماليين الديوانيه .. قعد يسلم عليهم .. و سعوا له و قعد جنب الرجال ..
بعد السلام و أخذ الاخبار و الأحوال .. قال الرجال بعد ما شاف توتر نواف _ نواف وانا عمك .. فيك شي ؟!
نواف ووجهه صاير اسود _ إيه يا عم .. طالبك طلب .. و إن شاء الله إنك بعد الله تفرجها .
الرجال _ أبشر يا ولدي إن الله قدرني ماني مقصر معاك ..
نواف _ تجي معاي برى لأنه خاص شوي يا عم ..
قام الرجال مع نواف و قال بصوت جهوري _ يا النشامى العذر منكم بروح لمشوار قصير و جاي بحول الله و قوته ..
الكل _ حـــيـــاك ..
بعد ما طلعوا من الديوانيه و ركبوا سياره نواف .. قال نواف السالفه للرجال .. و فيه نظره إنكسار .. و صوت ضعف . سكت الرجال فتره . ثم قال _ أي مستشفى أختك فيه ؟!
نواف _ مستشفى (...)
الرجال _ زين الحمدلله .. خلاص الموضوع منتهي .. و تقدر تروح ألحين ..
نواف بحرج _ والله مادري شلون أشكرك يا عم .. بس ما قول إلا الله يجزاك خير ..
الرجال بجدية _ اجمعين .. بس يا نواف لا تكررها .. أختك هاذي
و أرفق بها .. أوصانا الرسول صلى الله عليه وسلم بالنساء .. و قال ( رفقا بالقوارير ) خو إذا طقيناهن جنا طاقين واحد من الربع .. !
نواف يهز راسه بنعم و يقول بنفسه _ بلاك ما تدري شمسويه
البنت ؟! يا الله سترك بس ..
سلم عليه نواف ووصى الرجال نواف انه يوصل لأبوه سلامن كثير .. ووعده نواف .. و راح لطريق المستشفى .. ليلحق على أخوه و أخته ..
فتح نواف جهازه لقى مكالمات لم يرد عليها كلها من أهله .. طنشها و دق على أحمد ..
أحمد بلهفه _ آلو ها عسى لقيته ..؟
نواف _ أيه الحمدلله .. و يقول خلاص الموضوع منتهي ..
أحمد بإرتياح _ آه الحمدلله ..
نواف _ للحين ما طلعت ؟!
احمد بضيق _ لا يقولون باقي ساعه ..
نواف يغير أتجاه و يروح لبيته _ اجل بروح للبيت ..
احمد _ أوكي انا بنطرهاا ..
نواف _ يلى أجــــ
قاطعه أحمد و قال _ لحظه نواف مرتي و مرتك شافوا كل شي .. إذا سألتك زوجتك قولها أحمد طقها بعد هوشه بينهم و هي حاولت تنتحر .. و حذرها ما طلع هالسالفه برى البيت ..
نواف _ أبشــــــــــــر .. شي فخاطرك ؟
احمد بزفره _ ســــلامتك ..
§§§§§§§§§§§§§§§§§§§§§§§
بو بندر _ حياكم الله هاذي الساعه المباركه يا بو عيسى ..
بو عيسى _ الله يحيك و يبقيك يا بو بندر .. و هاذي و الله الشرف العظيم انا نناسب هالنسب ..
بو بندر _ تســــلم يا بو عيسى .
بندر يوجهه كلامه لـ عيسى بإعجاب _ معلم تاريــــخ ؟!
عيسى يأشر على جاسم _ نفس المدرسه ..
بندر _ ما شاء الله .. يعني ربع ..
أبتسم عيسى و قال _ تقول جذي ..
قال بوبندر _ عن نفسي ما عندي مانع .. لكن الشور شور البنت ..
قاطعه بو عيسى _ أكيد أكيد يا بو بندر .. و أحنا بنتركلكم 3 أيام و بالكثير أسبوع .. و نشوف الرد
و لها إذا بتشرط .. فهو حقها ما نختلف فيه .. و بتنتقل من بيت ابوها معززه مكرمه لـ بيت زوجها و بتظل معززه مكرمه و لا بتحس بقصور إن شاء الله ..
و إن تبي تفن بالمهر تبشر و انا عمها ..
قاطعه بندر _ أحنا يا عــــم نشتري الرياجيل ما نشتــــري الفلوس .. نبـــي لها الستــــر و العفاف يا عـــم و تحطونها بعيونكم .. هاذي كل شروطنـا ..
بو عيسى يأشر على عيونه _ بنتكم بعيونا .. يا بو عذبــي ..
يلى تامرونا بــشــي ..؟
الكل _ سلامتك ..
قام بو عيسى و عيسى .. يسلمون ثم طلعــــوا من ديوان بو بنــــدر ..
قام بعدها بو بندر _ الله يوفقها .
بندر يمثل الزعل _ إيييييه يا الدنيا
الكل تزوج و الشيخ بندر مكانك راوح ..!!
جاسم يحط يده على كتف بندر _ هانـــــــت هــــانت يا خوي ..
بندر يطالع بأبوه و كاتم ضحكته _ شفت يبه حتى الأطفال قعدوا يواسوني ..!! و بسرعه قبل لا توصل يد جاسم لراسه انحاش لــ داخل البيت ..
و صوت جاسم واصله _ أحمد ربك .. و الله إنك مو كفو مواساه
دش البيت بسرعه و منزل راسه
قال بصوت الضحكه مغطي عليها _ يا ولــــــــــــد ..
فاطمه _ حياك ..
دخل بندر و سلم على امه و بنت عمه ..
شاف عبير مو موجوده _ وين عبير ؟
ام بندر _ نايمه فوق بدارها ..
بندر أبتسم _ في أحد ينام هالحــــزه .. !
ام بندر كاسره خاطرها بنتها _ يا ويلي عليهااا الصيفي هذا ملعوزها تلعوز ..
بندر _ أحسن تستاهل من طقها على يدها و قال تاخذ صيفي .. عارفين شمسنا و صيفنا بهالأشهر شتصير .. ؟!
أم بندر _ يا ويلي عليهاا .. مسكينه .. شافت بنت عمها أخذت صيفي .. سوت مثلها .. تقول رجلي على رجلهاا .. حتى بالدراسه ( اطالع بفاطمه و تضحك )
فاطمه تبتسم _ سبحان الله إلي يشوفهن يقول خوات مو بنات عم ..
بندر يسأل فاطمه _ جنان بعد ماخذه صيفي ؟!
فاطمه _ إيه ..
بندر تذكر _ آها و انا أشوف عمي ليش كنسل سفرة الصيف
عشان الصيفي ..
أضحكت ام بندر يوم تذكرت موقف سارا _ يا حبي لهالسارا .
تصدق يا بندر بغت تموت يوم كنسل السفره بو محمد عشان صيفي جنان .. و ساراا أشتغلت عليهم ..
ضحك بندر و بقلبه _ أحسن تستاهل و الله ودي أقص لسان هالصغيره .. عليها لسان يوزن بلد أعوذ بالله منهاا ..
بندر و هو يوقف _ يلى الله يوفقهن ..
الكل _ آميــــــــــــــــن ..
صعد بندر لـ غرفة عبير .. حب يخرب عليها نومتها .. فدخل الغرفه .. ياااالله التكييف على آخر حد .. و عبير متكوره على بعضها من شدة براد الغرفه ..
تذكر أيام الطفوله .. إذا نامت عبير و الهنوف و جنان كان ياخذ الروج ( أحمر الشفاه ) و يخبص بوجيههم .. و بعد ما يقعدون من النوم .. تصيبهم حاله من الخرعه .. بندر سحب علبه مكياجها .. و أخذ حمره و راح يم سرير عبير .. فجأة أنفتح باب الغرفه .. كان جاسم الي جاي مندفع و هو يقول _ ويــــنك ؟
أشرله بندر أنه يسكت .. و قال بهمس _ تعــــــــال ..
جا جاسم و الإبتسامه شاقه الحلج تذكر مغامراتهم .. قال بهمس _ سو شوارع وانا خوك ..
بندر بنظره خبث _ أبشر وانا خووو ( ماكمل كلمته ولا حاط الحمره بوجه جاسم .. الي صرخ _ آيــــا النذل .. أوريك أوريك ) و لحق أخوه عبير بسرعه قعدت مخترعه من صراخهم و صكت باب الغرفه قالت بسرعه _ شفيكم شسالفه ؟ و قامت من فراشها تركض وراهم و تصرخ _ شسالفه شسالفه ؟!
/////////////////////////
بعــــد أسبــــوع على الأحـداث
الماضيه . . ،
عبير دخلت القفص الذهبي .. و كانت في غاية السعاده .. بارك لها الأصحاب و الأقراب ..
و بعد عيد الفطر بأيام قلائل ستنتقل لــ بيت الزوجية ..،
نوف ،، بعد خروجها من المشفى .. لازمت غرفتها بإكسار .. وذل .. و وحشه .. فقدت القريب قبل البعيد .. فقدت كيانها .. فقدت كبريائها .. فقدت إحترامها لنفسها و إحترام الغير لها .. أهلها أبعدوا عنها أي ألة أو غرض يؤدي حياتها لـ خطر ..
بندر لم تتغير الحياه عنده .. كلها أيام روتينيــه .. و الشركه ما أخذه وقته .. و موضوع الزواج أجله لــ وقت آخر أو بالأصح لوقت مناســــب .. في مخيلته فكره .. خطوه .. سيقدم عليها . لكن لها مــزاج جيد .. و خطوه جريئه .. و لكل حادث حديث ..
جنان .. الصيفي هلكها .. فأدى إلى قلة تواجدها مع عائلتها ..
نست أو تناست .. الحوار الذي دار بين عذاري و أمها .. و أشغلت فكرها في دراستها .. كانت تشعر بتردي وضع والدها الصحي .. ففي بعض الأحيان تجلس عنده لـ أخذ علاجه ..
جنان نزلت بعد ما نادتها سارا ..
لــ أن أبوها يبيها بغرفته ..
طقت الباب ثلاث مرات ..
أبو محمد _ حـــــيــــاج ...
جنان أفتحت الباب و ادخلت ..
باست راسه و يده و قعدت جنبه ..
دخلت عليهم أم محمد .. و قعدت جنب بنتهــا .. قالت و هي
تبتسم _ هلا يبا ..
بو محمد يمسح على شعرها _ يا بنتي انا ما أضمن نفسي لثواني ..
قاطعته جنان _ بعد عمرن طويل بطاعة المولى يبا ..
بو محمد _ مردنا يا بنتي للتراب ..
وانا ودي أشوف عيالج .. يا جنان
جنان كأن أبوها لوى ذراعها .. قالت كـ تأكيد للمؤشرات الي تقذفها للعقــــل .. _ إيه يبا ..
بو محمد _ يوسف حمى أختج عذاري متقدم لج ..
جنان هزت راسها بـ لا .. قالت بضيق _ لا يبا انا مابي أتزوج ..
بو محمد بتعب _ يا جنان انا ابي أشوفج عروس قبل لا ياخذ الله الروح ..
جنان بسرعه حبت راسه و يده و بصوت متحشرج _ لا يبا لا تقول جذي .. تكفى .. روحي فداك بس لا تقول هالحجي ..
ام محمد بحزن _ جنان يوسف ما شاء الله عليه .. و لي متى بتمين ترفضين .. شوفي عبير ملجت .. و نوف يمكن بعدها . و كاهو الي رفضتيهم بندر وأمه متكلمه في هاجر .. و جابر بعد اسبوعين ملجته و انتي بس قاعده ترفضين الخطاب .. !
جنان غطت وجهها بيديها .. بندر بيخطب هاجر .. بندر .. !!سمعت كحة أبوها .. رفعت راسها .. شافته يكح بقــــوة .. قالت و هي تبجي _ يبا تبي ماي ؟
قامت بتجيب ماي لأبوها و لا يمسك يدها و أصر انها تقعد .. قال بتعب _ جنان .. الرجال ما يتطوف و انا ابوج .. انا ابيج تروحين بيتج وانا مطمن .. ها شقلتــــي يا بنتي ؟!
ام محمد بترجي _ يلى جنان خل نفرح فيج يا بنتي .. و الله انا مشتاقين لهاليوم يا بنتي .. وافقي و ماراح أتخسرين بإذن الله ..
جنان عيونها تزغلل من الدموع
رجع أبوها يكح من جديد .. قالت و حنجها يرتجف _ موافقــــه ..
قالت امها لها و هي تحضنها _ مــــبــــروك يا بنتي ..
وقف بو محمد من الكحه .. و قال بصوت تعبان _ مبرووك ..
و رجع يكح مره ثانية ..
/
\
/
\
الجــــــــــــ 14ـــــــــــــــزء
الــــــــــــــرابــــــــــــــــع
عـــــــــــــــشـــــــــــــــر
،
،
،
ليش ما صرخت بأعلى صوت و قلت لا ؟!
ليش تسرعت بقــــراري..؟ عالأقــل أفكر أشاور نفسي .. و أستخير ربي ..
قلبي ليش أحس كأنه يعتصر؟ ليش أحس بضيقة صدر ؟ ليش ؟
شنو ناقصني ؟ شنو العيب الي فيني و ما يخليه يفضلني على بنات الناس ؟ عالأقل انا بنت عمه .. أقرب بنات المحارم له .. و محجرينــــي له ليش يا بندر ؟ ليش ليش ؟ بلحظه قهر حذفت الشمعدان على أرضيــــة الغرفه ..و ببطئ قعدت على الأرض و قالت بحسره _ حرام عليك يا بندر .. و الله حــــرام ليش تدفني بالحيا .. و أنا أموت على بسمه فرح لك .. آآآخ يا ولد العم حسافه السنين ألـــي قضيتها بحبك إلا بوهــــم و كان وهم قاتل لروحي .. و ألحيــــن رايح لبنت عم أهلي .. و بنــــت عمك مستحقرهاا .. بس يــــا جنان أنتي طلبتي الطلاق منه .. بصوت متقطع تهز راسها بنعم _ إيه انا طلبت لأنه هو رافضني بالأساس .. رافضني يعنــــي شايلني من باله .. و رافضني أكون أم لعياله .. ( أبتسمت بألم ) رافضني أكون أم لــ عذبي .. و لو ما سمعته بأذوني كان الزواج تم و انا يا غافلين لكم الله .. و القلب مو لي مو لي .. !
يا بنت الحلال انسيه .. الله مو كاتبه من نصيبج و ما جابلج إلا الهم و الكدر و هو عــــايــــش حياته .. و لا عبر لج .. عيشــــي حياتج .. من دون بندر .. أو حتى من دون طيفه .. خليه ماضـــي أسود و اطويه من سجل حياتج
قالت عشان أطبطب على نفسها و تنساه _ نــــاس يا جنان مــــا تستحق الذكرى و لا تستحق التضحيه ..
أهنيه الدموع كأنها قطع ثلج و فجأة ذابت فــ ماي حار ..
جنان ضامه رجولها لـ صدرها و تئن بقهر ..
/////////////////////////
بندر بعصبيه قام و قال _ لا هاجر و لا غيرهااا .. و الطاري هذا أقطعوه .. افهموني يا بشر انا بجيكم بــــيــــوم و أقــــول أخطبيلي يا أمي الغاليه فلانه بنت فلان .. خلاص بعد أكثر من جذي شنو تبون .. ( بألم قال ) خلاص يمه أرحميــــني .. انا تعبت انتوا ما تعبتوا من هالموضــــوع ؟!!
ام بندر و هي معصبه _ أنت الي أرحمني يا بندر .. أرحمنــــي ..لي متى بتظل عزوبي .. لي متى لي متى ؟! مــــا فكــــرت بعيال .. أتشيل أسمك و ترفع راسك .. ما فكــــرت بمره تهتم و تعتني فيك .. لي متـى يا بندر؟
بندر يحاول ما يعصب أكثر على امه اخذ نفس و قال _ أستغفر الله .. بيجي هاليوم يام بندر .. بس أصبري علي .. أصبري .. ( قالها بتحذير ) و لا تسوين شي من وراي .. و هالهاجر .. ( مسح جبهته ) أنسيهااا ما راح آخذها .. لو تنطبــــق السما ع الأرض ..!
ام بندر بأسى _ زين ليــــش يــــا وليدي ؟ والله انها أخلاق و جمال و دين .. أسأل عبير و فاطمه عنها .. إذا كان أختياري ما يعجبك ..؟!
بندر يرد يقعد جنب امه _ حاشى لله يمه .. أختيارج عـ العين و الراس .. لكـــن انا الي بختار زوجتي .. لا تقولون شلون ما لون ؟ ما لي شغل .. ؟ البنت لي انا .. و انا الي بعيش معها .
ام بندر بتعجب _ بندر شفيك ؟ شلون بتختارها يعني ؟! أمم يعني مثلا أخت رفيجــــك ..
بندر ضحك _ لا يما لا هي من أهل ربعي .. لكن هذا من حقي و ماراح أفرط بهالحق .. و إلا انا غلطان ؟!
دزته أمه و قالت بزعل _ روح عني روووح .. لو أتزوج يا بنيدر من وراي مالي شغل فيك .. رجال شكبرك .. ( قالت بستهزا ) و هذا من حقــــك !!!
بندر ما حب يزعلها أكثر حب كتفها و حضنها _ شدعــــوه يمه ؟! و الله ما عرفناكم إن ما تزوجت أكلتوني و إن وافقت و أشترطت أني انا الي بختــــار شريكتي هم أكلتوني ..
ام بندر دزته و عطته نظره .. و قعدت تهمهم بكلمات غير مسموعه ..
قال بندر بضحك _ يا لطيــف زعلت العمده .. و تحش بولدها بعــــــــــــــــد ..
أم بندر بزعل _ قوم فارق من عيوني يا بنيــــدر ..
بندر ضحك عليها و هو يقوم حب راسها و قال بجديه _ يمه أنسي هاجر و الله يرزقها الرجل الصالح ..
أم بندر بعصبيه _ انا شقلتلك فارقني يا بندر مدام النفس مو طيبه ..
بندر ضاق صدره و لف حتى يطلع برى البيت ..
أم بندر بزعل _ استغفــــر الله . بيجنني هالرجال .. مادري منو هاذي الي يبيها ؟!
سارا متجهزه بس تنطر أخوها يطلع من شقته حتى يوديها لبيت رفيجتها .. بعد موافقه ابوها .. الي حاول محمد و امها ليــ وافق ..
شافت امها مندمجه ببرنامج في التلفزيون ..
تأففت و غيرت قعدتها أخوها تأخر عليهاا .. قالت بملل _ يماااه ..
ام محمد ألتفتت لها _ هلا ..
سارا تمسك كذا خصله مــــن شعرها _ شرايج بشعري يمه ؟ أحلى جذي و لا قبــــل ؟
ام محمد تبتسم _ إذا تبيــــن الصراحه شعرج ألحين أحلى و إذا طال أكثر من جذي بيطلع أحلى و أحلوين بعد ..
سارا اطلع منظرتها الورديه من الجنطه و اطالع بمكياجها و شعرها قالت متردده _ صج جــــذي أحلى ؟! اخاف البنات يتمصخرون علي ماما .. !
ام محمد استانست يوم طولت شعرها قالت _ ما عليج منهن .. محدن يضحك على طول الشعر إلا مهبــــول .. و لا جمال المره و تاجها شعرها وانا أمج .. قبل الشعــــار مــــا يقصدون إلا بعينها النجــــلا و بشعرها أســــود الليــــل ..
سارا جازت لها السالفه _ أحسن بعد عشان أطلع بـ نيو لوك تعرفين صارلنا شهرين ألا من عطلنا و لا شفنا بعض .. زين يمه قــــولي قصــــص أول .. وناســــه . عليهم حركات عند الغــــديـــــر ..
محمد يضبط الشماغ و هو على الدرج _ أقــــول اسبقــــيني ع السياره .. بلا غدير بلا عبير ..
سارا تخصر _ منو عبير هاذي بعد .. أقول الغدير مال البدو قبل .. هذاك الي إذا يبون ماي يروحون له عشان يصبصبون الماي .. و يعيشون عليه حتى ما يموتون ..
محمد يعلق على جملتها الأخيره _ لا يا شيخه .. أكيد شحقه الواحد يشرب ماي عشان يعيش يعني مخترعه شي يبيلج براءة أختراع ..
سارا بتقهره _ خخ سخيف .. محمد شسالفتك اليوم ؟ غدير عبير شيخه .. منو هذيــــل ؟ هين بس خل أرجع من هاللمه و شوف أم العيال شلون بتستقبلك .. ؟
محمد يطالع بأمه و هو منقهر _ شوفيها يمه .. أتهدد وانا الي بوديها وبنتج وجهها عريض بعد ..
أم محمد اطالعها بزعل _ سارا يا بنتي عيب عليج أخوج الكبير حتى داش المتوسط وانت توج ببطني ما شفتي الحياه بعدج و جذيه أدبج معاه عيب يا بنتي ؟و ديري بالج كاني أذكرج ديري بالج لسانج هذا حطيله كنترول .. لا تفشلينااا .. عند ام رفيجتج .. و تقول ما تعرف تربي بنتها ..
سارا تمشى بثقل لأخوها و تحب راسه _ آسفــــه حمــــودي .. أقصد محمد .. ( اطالع بأمها ) و عشانج يمه بحاول أمسكه ..
محمد يكلم امه و يقلد سارا _ بحاول أمسكه بحاول بحاول .. يلى يلى يبا مشيــــنــــا ..
سارا تمشي وراه و قبل لا تلبس نقابها بحركه طفوليه طلعت لسانها لأخوها محمد الي ماشي قدامها .. ثم لبست نقابها
و طلعوا من البيت متجهين لبيت رفيجه سارا ..
/////////////////////////
|