// بيت بو أحمــــــــــــــد //
دخل بو أحمد و عياله البيت لقوا أم أحمد أتابع التلفزيون بإندماج سلموا بصوت مسموع ..
أم أحمد _ و عليكم السلام .. الحمدلله أنكم جيتوا هالحزه ..
بو أحمد و هو قاعد _ ليش في شي ؟
ام احمد تبتسم _ لا ما في شي مهم بس عشان تعشون ..
بو أحمد ناقد _ ليش واحنا ما نتعشى . ! كل يوم واحنا متعشين ..
ضحكوا الشباب على وجهه امهم الكاسي بالألون الأحمر .. أم أحمد بحرج _ لا قصدي اليوم العشا خلص أمبجر ..
بو أحمد و يمسح ركبته _ آآها الله يهداج جان قلتي جذي من الأول .. آه يا راسي ذبحتني هالمحاكم ..
أحمد وقاعد عند ابوه _ الله يعينك يبه . و هذا الشغل لازم ننكرف و نطلع الفلس بذمه و ضمير ..
بو أحمد بهم _ إيه يا أحمد معاك حق بكل كلمه بس يقللون ساعات الدوام و بعدين الي باط جبدي انـــ
بنفس المكان دار حديث بين نواف و امه ..
جا نواف و قعد جنب أمه بقرب .. و عيونه تتفحص الصالات المفتوحه على البعض .. أم أحمد لاحظت أنه يدور على أحد .. سألت بتوتر _ شفيك يابوي قاعد تلفت ؟
نواف بتساؤل _ وين نوف يمه ؟
بلعت ريقها ام أحمد _ رااحت لعرس رفيجتها ..
نواف بضيق _ برووحها يمه ؟
ام أحمد _ ايه يا نواف .. مافيها شي .. كل بنات هالوقت جذي !!
نواف بقهر _ و مو ذابحنا إلا بنات هالوقت .. كل شي عادي عادي ليما يطيح الفاس بالراس .. يمه بنتج ديري بالج عليها مو كل شي تبيه تنفذيلها .. الزمن هالوقت يخوف .. فاهمه قصدي يمه ..
ام أحمد بتغير الموضوع _ أقول نواف إجازتك خلصت و لا باقيلك ؟
فهم قصدها نواف وقال بضيقه _ لا بعد باجر تخلص .. بس يمه نوف ولي يعافيج شدي الحبل عليها و انـــــا ..
قاطعهم بو أحمد _ شفيكم تساسرون ؟ خلونا نشاركم ..
ام أحمد و هي قايمه بتروح للمطبخ _ سوالف عاديه ما حبينا نزعجكم . يلى انا بنجب لكم العشا ..
أحمد و يصفق _ عااااااااشت الشيفه ..
أم أحمد تمثل العصبية _ أحترررم نفسك يا ولد عيب تقول عن أمك شيفه ..
الكل نقع من الضحك ..
طلع نواف تلفونه من مخباته و ضغط زر أتصال على ((نوف))
لكن لا مجيب .. حاول الكرة تلو الآخرى بنفس الشي لا مجيب .. بعصبية قام من الكرسي وسط أنظار أبوه وأخوه .. نواف وبوسط الدرج قال أبو أحمد _ وين رايح العشا كاهو واصل ؟
نواف و يطالع أبوه _ باخذلي شور عالسريع و جايكم إن شاء الله ..
ابو أحمد _ عجل لا تأخر وانا ابوك ..
نواف _ أبشر يا الغالي ..
#################
// المــســـتـــشـــفــــى //
جنان في دوامه من الأفكار الشينه .. بندر طلق و لا للحين يشاور عمره بس هو واعدني بالطلاق .. و لا بطلقني بعد ما أطلع من المشفى .. زين لو طلقني أكيد هاذي الي ماتتسمى بتقط عمرها عليه أعرفها لا حلال و لا حرام يردعها أصلا لا ولي عليها ناس مهيتين بنتهم ..
كأنها أنتبهت لنفسها و الكلام الي تقوله _ أستغفر الله أستغفر الله اللهم لا شماته بعدين مو هذا يا جنان الي تبينه طلاق و كاهو ولد عمج بينفذه . بيتزوج نوف و لا يتزوج اندونيسيتهم تحملين نتايج قرارج
( سرحاااااان القمر بمنووو ؟ )
جنان بخرعه _ بسم الله الرحمن الرحيم .. الله يهديك ياخوي خرعتني ..
محمد يبتسم ويحب جبهتها _ سلامة قلبج .. شخباااارج ؟
جنان _ تمام الحمدلله .. الأهل شخبارهم ؟
محمد ويقعد عالكرسي _ كلهم بخاااار يسلمون عليج ..
جنان وتقدم القهوة و سله مليانه كاكاو روشيه ..
جنان _ تفضل يا بو عمر ..
محمد ياخذ روشيه وفنجان قهوه _ دام فضلج يا الغاليه ..تصدقين منحاش من هالدلوعه النبشه بروح معاك بروح معاك .
قلتلها أوكي تزهبي وانا أنطرج بالصاله و أقضبلج الباب .. كاهي ( يطلع جهازه ) ثلاث مكالمات لم يرد عليها .. خخخ
جنان بعطف _ حرام تبي تحرمني من أختي ..
محمد توهق _ أقووول بس عاااد يامعووده أقص ايدي إذا ماقلبتوها هوشه بهالجناح .. أعرفجن خواتي ..
أضحكت جنان و الألم زاد عليها فعبست وجهها _ آآآي ..
محمد بخوف _ يعورج ..؟ أروح انادي النيرس ..
جنان ويدها عالألم _ لا لا آه لا عادي ياخوي ألم بسيط .. بس أنت أستريح ..
سألت جنان _ محمد امي ليش ماجت معاك .. ؟
محمد يحك البرنيطه الجويتيه على راسه _ الغاليه عند جيرانا ام عووض ..
جنان _ آهااا أجل ناسيتنا من زمان ..
محمد بيرد و لا جهازه يرن طالع بجنان و قال _ الله يستر ..
أبتسمت جنان من هالجمله عرفت يقصد منو ..
ضغط على الرد .. محمد _ هلا
بدور بأمر _ ليش ما رديت من أول رنه .. ؟
محمد _ ها حلوه هاذي بس أقول لا يكثر قبل ليش ما ترد على المكالمات و ألحين عشان رديت تقولين ليش ماترد من أول رنة !! ماكو شغل صح قلتي الجهال لعوزوني خل اطلع الحره بمحمد موو ؟
بدور بعصبية _ محمد لا تقلبها علي توديني باجر توديني سامع يا محمد ؟
محمد _ آه أستغفر الله أوكي وين تبيني أوديج ..؟
بدور _ماكو غيره أرض المعارض ..
محمد _ شحقه ؟
بدور تحاول تكون طبيعية _ في جناح لماركة شوبارد وانا يا محمد ماجهزت لعرس جنان من ناحية الإكسسوارات وانت عارف ..
محمد بهدوء _ بس هذا الي تبيه أبشري يا ام عمر جم عندي ام عمر و ام عثمان و أم عايشه جم عندي ماعندي إلا وحده و بطت جبدي ..
بدور _ أقول أذكر الله لا يتفنقش واحد من عيونك .. و انا ما بط الجبد .. انا يتفدى بي ..
محمد بتحرش _ ياااشين الواثقين ..
بدور بسرعه _ حمووودي مع السلامه .. ( سكر الخط )
محمد و يوجه التلفون لجنان _ مرت أخوج مصلحجية ..
جنان أبتسمت بإنحراج من هالموقف الحرج بين أخوها و زوجته ..
قام محمد وحب جبهة جنان _ يالله مع السلامه جنو ..
جنان بدلع _ حمود أخذني معاك بطلع ..
محمد _ كلها باجر و تطلعين .. شحقه العجله .؟
جنان مد بوزها بدلع ..
قال محمد _ والله لو يطيح ماكو طلعه يعني ماكو ..
مشى لي وقف عند الباب و قال _ مع السلامه ..
جنان _ مع السلامه ..
>>>>>>>>>><<<<<<<<<<
// شـــــقـــــه عـــــزوز //
سمعوا صوت نغمه موبايل فمسك عزوز شعر نوف بعنف و ريحه الخمر تفوح من حلجه بقرف .. _ شوفي الشقه تنسيها و تنسيني فاهمه ؟
شافها خاضعه راسها للأسفل و لا حراك فشد على شعرها بقوة _ سامعتني يا قذره ؟ و لا أعيد كلامي ..
نوف و جسمها يرتجف من بروده التكيف .. هزت راسها بقوة .. و دموعها جفت من البروده .. تركهاا بقرف و طلع للصاله يشوف هالجهاز الي ماسكت عن الرنين ..
أول ماطلع أركضت نوف لملابسها المحذوفه عالأرض .. ألبستها بإهمال بس تبي تحمي نفسها من عزوز و من بروده التكيف..
أخذ عزوز جهاز نوف .. شاف (( نواف يتصل بك )) أستحقرها زياده و حط عالصامت .. ورجع للغرفه لقاها واقفه و لابسه هدومها فجذبها من كتفها ..
وقرب فمه من إذنها قال بهمس _ لا أشوفج ثاني مره أوكي ياحبي يلى برى ..
بعد ما أنتهى من كلامه أركضت نوف بهلع أدور عبايتها و أغراضها لقتهم عالصوفا بالصاله .. ألبستهم عالسريع و أخذت جنطتها بخوف .. أتجهت لصوب باب الشقه حاولت تفتحه لكن الباب مسكر ألتفت لورى و بجت بحرقه تدري وراها أخوو ينطرها بالبيت وراها رجال بس ما صانت الثقه ولو ربعها .. قالت بإنهيار _ أحب يدك بس بطل الباب الله يخليك امك بس بطله بطله ..
مشى عزوز لي وصل عندها .. فتح الباب بإستحقار و مسك طرف عبايتها و دزها لبرى الشقه ..
نوف طاحت على الأرض بضعف و قله حيله .. فتحت جنطتها بسرعه و لقت جهازها طلعت .. شافت 6 مكالمات لم يرد عليها من نواف و 8 من أمها و 3 من عهود ..
قعدت اطق راسها من الخوف اكيد قالب الدنيا فوق تحت .. تمنت تموت و لا تجي للهلاك برجولها حست بعظمة فداحه الأمر .. و طريق اللذه المحرمه ما يجني غير الضنك و العذاب لصاحبه .. دقت على رفيجه الشر .. شياطين الأنس ..
عهود بهيام _ هلاااا
نوف ببجي _ لحقي علي يا عهود ..
عهود بخرعه _ شفيج تصارخين ؟
نوف _ تعالي لشقه النذل بسرعه تكفين ..
عهود _ أوكي الحين جايتج ..
سكرت نوف تلفونها و قلبها يطق طبول من مصيرها المجهول .. عفتها راحت .. منو الي يرضى يتزوج بنت غلطت هالغلطه الفادحه . ! هذا اذا ما ظهر عليها حمل بجنين غير شرعي .. يا الله ..
نوف بقهر من سذاجتها و تبجي بحرقه _ شلون شلون جيت شلون ؟ يا ويلي من نواف وابوي و أحمد .. يا ويلي ..( سبحان الله .. العبد اذا ما جعل الله نصب عينيه في تحركاته .. هان عليه فعل الموبقات لا من صغار الذنوب .. و إذا كان خائف من عبيد مثله .. جعل يفكر بهم عند أنتهاءه و يقظته من فعلته الشنعاء ..و لا يتذكر أن الله يعلم السر و أخفى و العبيد يرون العلن الظاهر فسبحان الله )
وقفت على حيلها الضعيف .. و أركبت الأسنسير بضعف و بهوان..
// بــــــــــنــــــــــدر //
فتح باب غرفته بالشيراتون .. محتاج لأحد يسمع له .. محتاج أمه بهالظروف .. محتاج زوجه بالأزمات تنتشله من مآزق هالأزمات .. تذكر الهنوف بس بسرعه استغفر ربه .. المره على ذمة رجل .. تمنى جنان قدامه ألحين ..! حرق قلوب أهله أغلى الناس عنده من أجلها .. و هي آآه و هي تقولها ما بيك .. وينج قبل خمس سنين عن ابوج و اخوج .. توج تنتخين بي ؟
أخذله شور عالسريع و ارسل مسج لمحمد ' السلام عليك بو عمر ابي اشوفك ضروري شوف المكان و علي انا الدفع '
%%%%%%%%%%%%
في سيارة عهود .. الأجواء متكهربه .. نوف بصراخ _ عهود رحت فيها خلاص انتهيت ..
عهود خايفه من ردة فعل نوف _ هونيها و تهون يا بنت الحلال ..
نوف بسرعه تلتفت لعهود _ شلون أهونها و أخواني بيشكون فيني ..
عهود بتوتر _ سوي نفسج طبيعيه .. ولا تخلين حولينج شبهات ..
نوف بقهر _ أنتي مو فاهمه شي ولا بتفهمين .. انا كل شهر جايني عريس بس أرفض عشان بندر و ألحين وين انا عن بندر ؟!
عهود تقاطعها _ ولد عمتج انسيه الرجال متزوج .. وانتي ألحيــــن مو ..( سكتت )
نوف بحسره و ندم _ قوليها مو بنت يعني مو شريفه صح هذا قصدج .. ؟!
عهود وتصفط عند بيت نوف ..
نوف لا شعوريا طالعت بشقه أخوها في الدور الثاني شافت الأنوار طافيه ..
نوف براحه _ أشوى نايم ..
عهود _ أهم شي كوني ريلاكس لا تصيرين متشنجه بعدها يشكون ..
نوف _ اوكي ..
دخلت البيت بخفه لقته ظلام تأكدت ان الكل نايم .. فأصعدت الدرج بهدوء .. لقت شقة أخوانها مظلمه .. حمدت ربها بسرها .دشت غرفتها و سكرت الباب وراها .. تبي اطهر الأرجاس عن جسدها .. أخذتلها شاور دافي ..
طلعت أكرمكم الله من الحمام شافت كذا بقع زرقاء على نحرها و عضدها و أجزاء من جسدها ..
نوف بحرقه _ حسبي الله عليك يا خسيس .. الله ياخذ حقي منك .. و أشوف أختك ومهــتــ ..
ألتفتت بخوف و ربكه .. لباب غرفتها الي يطق .. قالت برجفه _ منو عند الباب ؟
نواف بحزم _ انا نواف يا نوف ..
نوف بطبيعة المذنب يعتقد أن الكل شايفه بلحظه فحشه ..
نوف برجول مرتجفه و يد بارده وصلت لباب غرفتها و افتحت الباب .. كان نواف واقف وفاتح ذراعينه و حاطهم على جوانب الباب ..
نوف وعيونها بالارض و كأنها تنطر كف محترم من أخوها ..
نواف بجدية _ ليش ما أخذتي أمي معاج ؟
نوف و تنفس الصعداء .. أرفعت نظرها لأخوها قالت _
آسفه .. بس لاني ما بأطول قلت أرتاحي ما يحتاج ..
نواف و يكتف ذراعه وعيونه أددق على نحر أخته .. قال بإستفهام _ شنو هالكدمه ..؟
نوف بتأتأه وجهها حمر _ ههاذذي طيحه بالحمام عزك الله ..
نواف _ أهااا أوكي باجر عالــ 9 تكونين جاهزه انا بوديج المستشفى عشان يصرفولج مرهم .. أوكي ؟
نوف بتوتر _ أوكي ..
نواف _ يلى مع السلامه
نوف _ مع السلامه ..
سكرت نوف الباب ببطء .. استندت على الباب .. نوف بهمس _ أكليها يا نوف أكليها ..
====================
أنسدل ستار اليوم بالكثير من الأحداث ..
قلوب توجعت و ألمت بقرارات لوت أذراعهم .. أشخاص أنتهكت أعراض المسلمين .. وبطشت بالعقول الصغيره ..
نفوس قضت على حياتهم و أحلامهم بتسرعهم في أتخاذ قرارات متسرعه .. و ناس فرطت بإعطاء ثقه عمياء بفلذات أكبادهم حتى أنتهى في خسر العفه و الطهر ..
// شارع الخليج //
بندر قاعد على كرسي قدام شارع البلاجات .. يفكر في محمد و عمه .. و علاقته فيهم ..
السبب جهزه بس المشكله التقبل .. شلون بيتقبلون طلاق بنتهم من ولد عمها .. بندر بآهه _ آه الله يسهلها ..
لمح محمد جاي بلبس سبورت فإبتسمت شكثر هالرجال يحب السبورت و نادر ما يلبس اللبس الوطني ..
قام بندر عشان يسلم عليه ..
محمد _ هلااااا بو عذبي ..
بندر و يحبه خد _ هلا بك بو عمر ..
محمد _ شخبارك و شخبار الأهل ؟
بندر بهدوء _ الحمدلله تمام ..انت شخبارك ؟
محمد _ تمام .. ها شهالكرم الي نازل عليك .. اي نسيت ابوي يسأل ليش انت و عمي مو مداومين بالشركه .. ؟
بندر حس بتوتر الموقف و عظمته .. تمنى ما ولد و لا ينطق بالكلمات الي حضرها بالليل ..
محمد بإستغراب _ بندر ياخوك شفيك سرحان أكلمك انا .. ؟
بندر يلف وجهه ناحية البحر بهم حس كأن الدنيا على ظهره ..
محمد خاف من شكل بندر المهموم حس السالفه كبيره
هز كتف بندر بخوف _ بندر عمي فيه شي ليش ماجى الشركه تكلم .. ؟
بندر هز راسه بلا و ألتفت لمحمد و بلسان ثقيل قال _ محمد انت حبيبي و فوق على راسي و أخوي بعد .. الي بقوله لك بعد شوي لا يأثر على صداقتنا و على صلتنا ؟
قاطعه بسرعه محمد _ بندر تكلم قول شعندك ..
بندر نزل نظره للرمل ثم حطها بعيون أعز الشباب لقلبه .. قال _ طلقت جنان ..
بلا شعور و تهور قضب محمد دشداشه بندر من فوق و زخه للأعلى و عيونه حمر _ شنوو تقول يا حقيــــ .. و بصق على الأرض ..
مسك بندر يده محمد بخفه و يقول _ سامحني يا محمد بس انا مو قد المسؤولية ..
محمد بقهر و يرص اسنانه _ ألحين ألحين يا بندر تكلم .. وينك من زمان .. ؟ ليش ملجت عليها ثم اطلقها ؟ ليش تحجرها خمس سنين ثم تقول مو قد مسؤولية الزواج ؟ ..
بندر بهمس و يطق صدره _ آسف يا محمد أدري و رب الكعبه اني غلطان ..
محمد بحرقه _ لويت ذراعنا يا بندر من اليد الي توجعنا يا ولد العم ..
تقدم بندر لمحمد و حب راسه _ محمد و الله جنان غاليه .. بس الوالد مصر عالزواج وانا قلتله بس تعرف شيابنا .. سامحني يا محمد ..
نزل محمد يده و صد عن بندر و مشى من حيث ما جا ..
نزلت دمعه من بندر دمعه قهر و حزن .. هذا آخر شي تمناه ..
xxxxxxxxxxxxxxxxxxxxxx
دخلت سارا على أمها و جنطتها محذوفه على الأرض ..
سارا _ آآآآف ما بغيت أخلص ..
ام محمد _ زين شيلي جنطتج من على الأرض يا سويره ..
سارا _ يمه كتفي عورني ..
ام محمد _ زين نادي الخدامه
تشيلها لج و تصعدها فوق ..
سارا و تقعد عند امها _ يمه خليني استانس .. خلاص امتحانات بــــــــح .. يعني شنو ؟
أم محمد تاخذها على قدها _ يعني شنوو ؟
سارا _ يعني عالمغرب نرووح للشوبنق ..
ام محمد _ لا مافي روحه اليوم .. أختج بتطلع من المستشفى ..
سارا تذكرت حركه محمد _ ايه وين محمد ؟
ام محمد _ بالدوام مع ابوج ..
سارا بدلع _ يمه شفتيه امس نجلني قلته بروح معاك لجنوو و انحااش ..
ام محمد _ أحس تستاهلين كل شوي ورجلج معتبه الباب .. أركدي أركدي ..
سارا مدت بوزها _ يــــمــــه
ام محمد بعصبيه _ و صمخ ..
سارا و يده على حلجه _ سكت .
دش ابو محمد و محمد بوجيهه مهمومه و كئيبه ..قعدوا و لا نطقوا بكلمه وحده .. قامت ام محمد تخلي الخدامه تنجب الغدا .
سارا قعدت تخز محمد بنظرات مقهوره .. شافها بو محمد قال بعصبيه _ شفيج اطاعين أخوج جذي ؟
سارا بحرج _ هااا ماكو شي يبا ..
محمد بهدوء _ سارونه قومي ساعدي امي بالمطبخ ..
قامت سارا بسرعه بملابسها المدرسه .. للمطبخ تساعد امها .
قال محمد بضيقه _ ها يبا فكرت
؟!
بو محمد بهم _ أصبر لي تطلع من المستشفى و انا أقولها ..
بس تصدق يا محمد ما قاهرني و حارق قلبي أخوي ليش يغصب الرجال .. ؟
محمد بأحترام _ يبا كاهي جنان غصبناها عليه ..
بو محمد _ البنت غير عن الرجال يا محمد ..
سكت محمد ما حب يتجادل مع أبوه بمسأله عرف ..
// الجــــــ التاسع ــــــزء //
:: بيت بو بنــــــدر ::
على الغداء الكل مجتمع على المائدة .. ما عدا أم بندر الي نفسيتها تعبانه من يوم ما طلع بندر و رافضه يطب فمها أي شي ..و منسدحه على فراشها بهم و حزن .. و شعور بالمراره
قال بو بندر _ عبير نادي أمج تلاقينها بغرفتها ..
عبير بحزن _ أبشر يبه ..
راحت عبير لغرفه امها .. شافتها منسدحه عالسرير كان شكلها مؤثر .. اسرعت لها عبير بالمشيه وحبت يدها _ يمه الغدا زاهب ..
أم بندر ببكا _ ياناس أرحموني
جيبولي وليدي ..
عبير وتبجي _ يمه ولي يعافيج انتي اكلي و بندر بيجي إن شاء الله ..
ام بندر بحسره _ ضاع قلبج يا ضبيه ضاع ..
عبير _ ما بيضيع إن شاء الله اسبوع بالكثير و يرد لنا.
يلى يا الغاليه الغدا بيبرد ..
ام بندر _ روحي تغدي انا مو مشتهيه شي ..
عبير تمسح دموعها _ يمه عشان خاطري ..أكلي بس لقمه عشاني يمه ..
ام بندر و تقوم من على سريرها _ آه ياراسي .. ( تمسك راسها )
عبير بخوف _ يعورج يمه ..
ام بندر _ روحي انتي تغدي وانا باكل بندول و بلحقج ..
#################
بندر بعد مواجهته مع محمد وكيف كانت الرده الفعل قرر ياخذ إجازه أسبوع عشان يسافر لأطهر بقاع الأرض مكة المكرمه .. يستنشق هواها الطاهر .. يمتع ناظريه ببيت الملك جل جلاله .. يفضض ما في قلبه لله وحده .. فـ لله المشتكى .. بيطهر ذنوبه و آثامه بــ تعبده لخالقه .. و يطلب من الله الخير له و لأهله ..
سافر بندر على أقرب طياره توصل لمكه المكرمه ..
تذكر القلوب الحنون .. تذكر بسمتها لاشافته مرتاح .. تذكر أهتمامها و شغفها بتجهيز جناحه .. تذكر اليوم الكئيب و ضعفها كيف كان و رجاها له انه ما يتركها .. أعتصر قلب بندر حزن و حسره على طيشه و تسرعه .. بلا شعور ضرب يده بالكرسي في مقاعد الدرجه الأولى للخطوط الجويه الكويتيه
تألم بقوة الضربه .. قال بندم _ سامحيني يا مويمتي ..
:::::::::::::::::::::::::::::::::::::::::
بدور بترحيب _ يا هلا و يا مسهلا بشمعه الجلاس .. تو مانور البيت ..
جنان والتعب واضح على وجهها قالت _ بوجودج يا أم عمر ..
أم محمد تأشر على الصوفا _ جنان قعدي حبيبتي ..
فجأة سمعوا صراخ و ضجه واصلهم من الدور الثاني و لا سارا تركض من على الدرج _ مرحبا يا مرحبا يامرحبا بالطش و الرش ..
ضحكوا على روحها المرحه وهي تركض بخفه لجنان و تحبها حييل ..
جنان تحرش _ آي خوش حبه هاذي .. أخاف من الحره مو من الفرحه .. ؟
سارا _ آفااا انا مو فرحانه بشوفتج ؟ يا حيف يا حيف ..
بدور _ سويره ولي يعافيج روحي جيبي الكيكه بالثلاجه ..
سارا بدلعها الطفولي _ من عنوني يا آآآمر ..
سارا تمشي للمطبخ ألتفتت جنان بصدمه لبدور و امها _ لا لالالالا ما أصدق هاذي سارا أختي ؟!
أضحكت أم محمد و قالت _ وانا امج هاذي سارا أختج صدقي صدقي .. من فرحتها بانتهى اختباراتها صارت مطيعه 10/10 ..
بدور _لا وزيدج من الشعر بيت انا مواعدتها نروح سوا لفيلا مودا هالأسبوع عشان تجهز لها كذا شغله على قولتها شغل عطله الصيف ..
جنان بإبتسامه _ دوم ان شاء الله ..
الكل _ امــــــيــــن ..
سارا و هي جايه معاها الكيكه _ تأمنواا على شنوووو؟
ام محمد _ اقول بس دقي على ابوج و أخوج شوفيهم جم باقيلهم و يوصلون ؟
سارااا _ آبشري يا فداج عنوني كلها ..
جنان افلتت منها ضحكه محبوسه .. طالعتها سارا بإستغراب فقالت _ جنووو حبيبتي شفيج تضحكين ؟
جنان ودها تقول مو لايق عليج البنت الخدومه و المطيعه .. لكنها ماحبت تفشلها قالت _ لا بس تذكرت موقف مضحك ..
سارا كأنها حاسه انها لها دخل بهالضحكه قالت بإبتسامه متصنعه وواضحه _ آهااا عشان جذي تضحكين .. ( راحت بعدها)
ام محمد _ ياويلي على بنتي كل هالطيبه عشان هالفيلا مودااا ..
لا حول و لا قوة إلا بالله ..
بدور بضحكه _ أحس انها تمثل قدر المستطاع ..
جنان _ انتي شفتي بسمتها لي كأنها تدري اني أجذب عليها ..
ام محمد _ قل أعوذ برب الفلق . أذكري الله البنت ذكيه من وهي صغيره ..
جنان و بدور _ لا إله إلا الله ..
بدور _ جنان محمد ماقالج شي و هو رايح لعذاري ؟
جنان تحاول تتذكر _ أممم لا ليش ؟
بدور _ لا بس موصيته على شغله يجيبها من الصيدليه بس الله يصلحه شكله نسى ..
جنان تهز كتوفها _ يمكن ..!
أم محمد بصوت عالي _ ساراا ..
سارا بغرفة امها _ نعم يمه ..
ام محمد _ رد عليج أبوج ؟
سارا _ اييه يقول كاهو بالطريق ..
ام محمد مستغربه بنتها سارا بغرفتها للحين ما طلعت ..
سألتها _ وانتي شمقعدج بداري ؟ سألتي أبوج و خلاص !!
سارا و طلع راسها عليهم من باب الغرفه وتبتسم _ قاعده أرتبلج غرفتج ماما ..
بثواني أنفجرت جنان و بدور من حركات سارا و خدمتها اللا معهوده ..
أما امها خافت على سارا قامت بسرعه لغرفتها شافت سارا ترتب الشيفو نيره و هي تقول لها _ يمه أنتي فيج شي ؟ تحسين بشي ؟
سارا بعفويه _ لا بسم الله عليه مافيني إلا العافيه ..
امسكتها امها من يدها وطلعت من الدار .. لي وصلن للصاله و أم محمد تفحص وجهه سارا بدقه .. قالت _ لا أكيد فيج حراره و لا شي ..
سارا معقده حواجبها _ والله مافيني شي ..
ام محمد _ زين كل هالطيبه و الخدومه عشان فيلا مودا ( قالتها بإستنكاار )
سارا و تمط الجبنيز _ يمه انا متواعده مع رفيجاتي هناك عشان نشتري شغلات ..
ام محمد وتقعدها على الكرسي _ زين لو قتلتلج أكلملج أبوج نسافر هالصيف للنمسا ..؟
سارا بفرح _ صج يمه ؟
ام محمد _ ايه أحسنلج من فيلا مودا ..
جنان _ ايه والله أحسنلج من هالفيلا مودا .. والله هالسالفه سامعتها من وحده معاي بالكلاس تقول في بنت شرت جنطه ماركه قوتشي .. بعدين سافرت لإيطاليا و راحت لمحل يبيع جميع مستلزمات ماركه قوتشي و قعدت تسأل الحجي ( البائع ومن الأخطاء الي نقع فيها تسمية البائع بإسم محمد و هذا أكبر خطأ نفترض انه كافر نصراني او يهودي او انه بوذي مجوسي .. و حتى لو مسلم مدام اسمه مو محمد مايجوز انا نناديه بمحمد كأننا نستحقر هالاسم .. وانا سمعت هالتنبيه من الشيخ المطلق و يفترض مناداته بعبدالله بعبدالرحمن لأنه بالأساس عبد لله عزوجل ) * نرجع لـــــ القصه * و أتوريه هالجنطه الي شرتها من فيلا مودا سألته هل هالجنطه هي ماركه أصليه أو تقليد ؟ قالها هاذي مو قوتشي بالأساس ..
يعني ناس تسوي جنط و تطبع علامه الماركه ثم تقول ماركه قوتشي .. !
بدور _ بصراحه انا اول مره اسمع بهالسالفه و بعدين فيلا مودا تجيب أصحاب الماركات العالميه في الكويت عشان يعرضون جديدهم من عطورات و جنط و ميك آب .. و يبطلون لهم بعد فروع بالديره
جنان _ اوكي صح ألي تقولينه بس مو كل البضاعات أصليه او بالأحرى ماركه من الماركات . يعني في ناس تحجز زاويه او طاوله او لاين ثم تعرض بضاعتها بغش و تدليس
ام محمد تددخل _ استغفر الله عادي عندهم ياكلون مال الناس لو بالحرام استغفر الله .
بدور _ عاد النبي صلى الله عليه و سلم قال لـــــ
الكل _ عليه الصلاة و السلام .
بدور _ قال لسعد بن ابي وقاص _ يا سعد اطب مطعمك تكن مستجاب الدعوة ..
جنان _ و في بعد حديث قال الرسول صلى الله عليه وسلم عند وصف رجل اكله و مشربه و لبسه كله حرام قال ( أنا يستجاب له ) او كما قال .. أنا <<< على النون شده
سارا _ لاحول و لا قوة إلا بالله و انتي ( اطالع ببدور ) مواعدتني مع هذيل .!!
جنان _ لا يا سارا انا ما أعمم بس انتي تحري مو تشترين بعماج تأكدي عدل ..؟
سارا بثقه_ لالالا خلاص غيرت رأيي بروح للنمسا ..
بدور بغيض _ ماقول إلا ماااالت
جنان _ وانتي ليش بتروحين للنمسا يا حظي .. ؟
ألتفتت لأمها _ يمه شراايج نسافر لميلانو و باريس ؟
سارا بخشونه _ هااااااااي انتي الله بالخير شمدخلج بيناتنا ؟ حبيبتي روحي مع حبيب القلب لو تروحون لمثلث برمودا و لا تل أبيب كيفكم بس أهم شي ابعدي بعيد عناااا ..
جنان تحس كأن نار شابه بوجهها من كثر ماهي مرتبكه
ماتدري شني أسباب أرتباكها و توترها هل من طاري بندر و لا لأنهم ما يدرون ان بندر بيطلقها
مشاعر تملكت جنان بهاللحظه ..
حاولت تكون طبيعيه و ما يلاحظون تغيرها و توترها و خدمها بهالشي دخول ابوها و محمد مع عذاري ..
الكل فرح بوجود عذاري و قعدوا يسلمون عليها بحراره ..
جنان و حاظنه أختها _ أشتقت لج واجد ..
عذاري بتحرش _ أمس كنت عندج ..
جنان ببراءة _ صح بس جيتج عندنا اليوم غيــــــر ..
عذاري بنفسها تقول _ اي بالله اليوم عندج بيكون غير غير يا جنان ..
عذاري ببسمه _ بس اليوم ببات عندكم و باجر عالعصر سي سيد بياخذني ..
جنان بقهر _ آآآوووف يبط الجبد هالرجال ..
عذاري تخصر _ أشوفكم أخذتوا حريه الرأي بهالرجال بزوود ..
جنان _ اقول بس لا يكثر ..
محمد يمد كيس لبدور _ هاج كاهو الكيس ..
بدور _ شكراااا
محمد _ بس شكراااا ( يقلدها )
بدور تسوي بعيونها حركات يعني اسكت ..
أم محمد تسأل عذاري _ شلون وافق انج تجين ..
عذاري تشرب قهوه _ أمم عادي حاولت فيه و الحمدلله وافق ..
سارا تنادي طلال _ أنت ليش ما تسلم .. ! و لا على راسك ريشه ..؟
طلال أخترع و أنخش ورى أمه قالت عذاري بضيق _ يــــــوه يا سارا ترى الولد يخترع منج ..
سارا _ ليش يخترع مني شنو شايف ؟!!
عذاري _ شوفي حركاتج أول ثم تعالي حاسبيني .. !
ثواني و لا طلال يبجي بصوت مزعج .. أحضنته عذاري بحنان ..
وقالت لسارا _ ما خرعتيه ها ؟
هذا كله ما خرعتيه ؟!!!!
بو محمد ما قدر يستحمل من الضغط الي عليه قال بعصبيه _ أنتي لي متى بتكبرين ؟!
الكل سكت من صراخ بو محمد سارا من الخوف جتها العبره نزلت راسها بخوف ..
محمد حاس بأبوه و بالهم الي شايله بقلبه قال له _ استهدي بالله يا بو محمد ..
بو محمد بقهر _ قومي اصعدي فوووق ..
فزت سارا بسرعه و أركضت للدور الثاني ..
ام محمد و جنان و بدور كانوا مستغربيين من ردة فعل بو محمد الغريبه .. يا ما سارا تحرشت بالأطفال و كان بو محمد بس يضحك .. و إذا بجوا كان يقول لها بهدوء _ خلاص ..
الله أكـــبـــر .. الله أكـــبـــر ..
أشهد أن لا إله إلا الله
أشهد أن محمد رسول الله
حي على الصــــــلاة
حي على الفـــــــلاح
الله أكـــبـــر .. الله أكـــبـــر ..
لا إله إلا الله ..
بو بندر _ يلى الصلاة يا بنات ..
و طلع من البيت لمسجدهم ..
ما داوم اليوم في الشركه من فعلة ولده .. رفض انه يخبر و يعتذر لــــ أخوه عن طلاق ولده لبنته .. فــ حب يكون البلاغ من عند بندر ..
فاطمه ببملامح جامده تتقهوى مع خالتها و عبير ..
وكان الكل ماله خلق .. عبير شافت ان حاله امها ما ينصر عليها ..
عبير _ يمه
أم بندر بسرحان كبير .. ما حست ببنتها كلش .. أشرت عبير بيدها قدام وجهه أمها ..
أم بندر بضيقه _ شتبين يا عبير ؟
عبير _ يمه تبينا نتمشى عالبحر .
كانت فاطمه اتابع حوار لكن بقلب مجروح ..
أم بندر بهم _ بعد الصلاه نطلع أحس اني مخنوقه بس ابي اسمع صوته بس ..
فاطمه أبتسمت ابتسامه خفيفه
بحسره و مراره .
قالت عبير لفاطمه بحزن _ اليوم طلعت جنان ؟
فاطمه _ طلعت من العصر ..
نزلت راسها عبير شوي كأنها تفكر بشي ..
/////////////////////////
صعدت بدور لشقتها عشان تصلي صلاه المغرب .. بدون ما تحس بشي .. جيت عذاري مع خالها و زوجها ما حسستها بشي .. ربما كان لأبو طلال دور في لامبالاة بدور ..
بقى في الصاله الكل من الحريم ما عدا بدور ..
دش بو محمد و محمد _ السلام عليكم
الكل _ وعليكم السلام ..
قال بو محمد و هو واقف _ سويره أصعدي فوق ..
سارا بخوف _ والله والله يبا ما عودهااا ..
أبتسم لها وقال _ أدري انج ما بتعودينها بس ابيهم بموضوع خاص ..
سارا بغيره _ و جنان معاااااهم ؟
بو محمد _ و جنان معاهم ..
جنان بتقهرها _ ويت ويت ويت تبين كيس ؟
سارا _ سخييفه و بعدين شبي بكيس ..
جنان _ عشان تلقطين وجهج ..
كانت سارا بتكلم بس قاطعها بو محمد بعصبية _ بس عاد شهالألفاظ هاذي ؟ وانتي( يطالع بسارا) قلتلج اصعدي فوق تفهمين الكلام ؟
قامت سارا بخطوات سريعه .. لفوق ..
مشى بو محمد و قعد على غنفه .. ثم قال بخجل _ جنان تعالي يبه أهنيه ..
( يأشر على مساحه جنبه)
مشاعر و أحساسيس مختلطه غزت قلب جنان .. حست كأن وجهها يشحب .. بطنها يآلمها .. قامت و هي أطالع بأمها ثم بأخوها و آخرتها بعذاري .. .. كان فمها يبتسم بتوتر و خوف شديد .. مشت لي قعدت عند أبوها .. ونزلت راسها .. مسك ابوها يدها اليمنى و حضنها بحب و حنان بيديه الثنتين ..
أرفعت راسها جنان و عيونها بعيون أبوها .. تنطر يقولها بشكل صريح بعيد عن الإحتمالات .. بعيد عن التوقعات ..
أم محمد قلبها نغزها من شي شين بيصير .. قعدت على أعصابها .. ثم استغفرت ربها بقلبها و تعوذت من الشيطان الرجيم ..
عذاري دموعها أوشكت على السكب .. ملامح جنان ما هانت عليها .. أختها ما فرحت حتى بملجتها .. و يجي هو يطلقها يا الله صعبه صعبه عليج يا جنان ..
محمد من شاف جنان وتوترها و خوفها الواضح عليها نزل راسها .. من صغره و ما يحب يشوف خواته بهالضعف و الإنكسار .. ما يبي يشوف رده فعلها ما يبي يشوف دموعها ..
قال بو محمد بثقل و قلبه ينزف حرقه و ندم على مستقبل بنته .. _ جنان يا قلبي سامحيني و انا بوج .. ( سكت ثواني ) مالج نصيب مع بندر ..
جنان تهز راسها ببطء بإشاره لا.
قالت ام محمد بصدمه _ ششتقول يابو محمد ؟
بو محمد يحاول انه لا ينكسر قدام أهل بيته قال _ بندر طلق جنان ..
جنان بصراخ و يده حاطتهم على أذونها بتكتم صوت الحقيقه و بتكم صوتها وهي تقول هذا الي انتي تبينه ليش الحين تصرخين و تبجين .. توج تحسين بقيمته توج تندمين مافكرتي تغيرينه بعدين .. فرصه و رفستيها يا جنان ..
جنان بصراخ _ لاااااااا
ام محمد الصدمه شلتها عن الحركه و النطق .. كانت تشوف جنان و صراخها و رفضها سماع اي شي . ومكان العمليه يعورها بس تحملت بأقصى ماعندها ..
بو محمد مسك يديها و نزلها من على اذونها _ بس بس يا جنان . الزواج قسمه و نصيب .. و بندر خلاص ماضي و حاولي تنسيه .
جنان بعيون حمرا تهز راسها بلا .. قالت بتردد _ خلاص طلق ؟
أم محمد قامت من مكانها و راحت لغرفتها بهدوء ..
عذاري على طول ألحقت أمها .
جنان تلتفت لمحمد و تعيد سؤالها عليه _ محمد الله يخليك بندر طلقني .. ؟
محمد حس بحقد ناحية بندر _ أستغفرك يا رب ..
قام لي وصل عند جنان وقعد جنبها _ جنان أنتي مو كنتي ما تبينه خلاص كاهو سبحان الله الي تبينه صار ..
جنان بقلبها انتو مو فاهمين و لا راح تفهمون ابدا .. بس انتي طلبتي الطلاق منه .. فماله داعي هالندم ..!! لكن انا أبيه أبيه و بندر لي و انا له ..
قاطع أفكارها بو محمد _ كنت أتمنالج بندر لكن بندر مامنه حسوفه .. ( قالها بحسره )
قامت جنان من عندهم بتروح لغرفتها محتاجه جلسه هاديه صريحه مع مشاعرها المتلاطمه .. ابومحمد مغطي وجهه بيديه .. ما تصور ان بندر بهالشكل .. وهو الي يفتخر و يعتز إذا قالوا له هذا ولد اخوك و اشاروا به بالعنان .. طلعت آهه موجعه من بو محمد جعلت محمد يطالع ابوه بحزن ..
محمد بنفسه _ هذا ما جنته يداكم بس الله يهديكم .. أنتم تخططون و تنفذون و احنااا الي ناكلنا و فوق هذا نتحمل خطأكم .. الله يعينج يا جنان ..
جنان و هي على عتبات الدرج سمعت صرخه عذاري من غرفه والديها خلتها تنزل بسرعه و كان بومحمد و محمد يركضون ما يدرون شسالفه ..
جنان أفتحت غرفه أمها شافت الغاليه مغمي عليها على السرير
و عذاري تحاول تقعد و تصيح بخوف ..
حاولت تكلم بس ابوها و محمد امسكوها بصوب عشان يدخلون .. منظر امها كرها بنفسها أكثر و أكثر .. كل شي جميل بحياتها حست كأنه اندثر . شلون بتحس بالحياه و زينتها و امها مغمي عليها بسبة قرارها السريع ..
: : : اســــمـــعـــــوهــــــــــا : : :
لا يا يمه كل شي يصير و لا هالمنظر الي أشوفه ..
وعت على صراخ محمد يقول _ بسرعه انا بالسياره انطركم ..
شافت ابوها و عذاري يشيلونها بخفه ..
صرخت بأعلى ما عندها _ انا السبب انا السبب لو تروح امي انا القاتله .. كله مني كله مني ..
ابوها يطالعها بنظرات متسائله _ شتخربطين يا جنان مو وقته .. و امج ما فيها إلا كل بس ضغط و أرتفع ..
جنان تهز راسها بلا _ انا انا انا الي قلت لـــــ بندر يطلقني ..
بحركه مفاجئه من أبو محمد سحب شعرها بقهر .. قال بعيون مقهوره _ هذا حصاد ثمرتي يا جنان !!
ثم تركها ..
جنان بألم من شدة ابوها _ أي أي
( شفيــــــــــــــــــــكم )
طالعوا لأعلى الدرج شافوا سارا مخترعه و تنزل بسرعه .. بو محمد استعجل عذاري بلبس العباية لأمها و شالوها بسرعه و طلعوا ..
سارا شافت منظر امها قالت بتوتر _ امي شفيهااا تكلمي ؟ ليش شايلينها ؟ وين بتودونهاا ؟
سارا مسكت كتوف جنان _ جنان تكلمي ؟ امي شفيهاااا ؟
جنان تشيح وجهها عن سارا _ ودودها المستشفى ..
سارا تقاطعها _ ليــــــــــش ؟
جنان ما تحملت قالت بعصبيه _ أرتفع عليها الضغط خلاص أرتحتي ..
خلصت من كلمتها ثم اصعدت فوق لغرفتها ..
/////////////////////////
|