الساعة الرابعه عصرا ..
ام بندر _ تصدقين أرجولي ذبحتني من كثر ماروح من محل لمحل ..
أم محمد _ ما تقصرين يام بندر بس ليش ماتخلين عبير تساعدج ؟
ام بندر _ عبير والله انها مسكينة و ما قصرت معاي و أحيانا والله تروح بروحها ..
ام محمد _ الله يوفقهااا ياريت سوير تاخذ من عقل عبيرشوي
ام بندر ضحكت مسكينة ام محمد شكلهاا ماتعرف عبير عدل _ ليتهن كلهن ياخذ العقل من جنان يام محمد ولا عبير حالها ما يختلف عن حال سارا ..
ضحكت ام محمد و تمواا يسولفون عن أمور كثيره .
جنان قعدت من النوم و نزلت تحت لابسه برمودا قطن وسيع أبيض و بدي تفاحي أخضر و شعرها رابطه من فوق و مسويته مثل ذيل الحصان . . و هي نازله بتروح للصالة و لا محمد داش البيت و شايل معاه ملفات . . أبتسم لهااا أما هي نغزهاا قلبها صح انها تبي تطلق من بندر عشان هو يرتاح ولا تبي تنفرض عليه لكنها تحبه .
و بنفس الوقت تبيه لأنها عايشه على أمل انه بيتحسن بس كل ما تتذكر حديثه عنهاا تصر على طلبها بالطلاق و هذا طبع بني آدم ما يحب يكون غثيث و مفروض على شخص ..قعدت تفكر ليش محمد ضحك أكيد وافق أبوي على طلبي بس انا أبيه وماراح أتزوج أبد لو شيصير . ؟! هذا بندر الغاالي الي انولد حبه مع عدد عمري كل ما أكبر يكبر حبي . و هذا حبي حب عذري حب البنت لولد عمها بدون خرابيط مكالمات ولا طلعات و أشياء تغضب الرب بعد .. و حبي كتمته بصدري لا قعدت أفضح عمري و أنزل راس أبوي و أخوي بالتراب .. دخلت جنان بدوامه المتناقضات و مر طيييف نوف بشكل عالسريع و كشر وجهها . و لا محمد بصوت بعال _ جناااااااان وين وصلتي ؟
جنان برجفه _ ها ..
محمد _ لا تقولين ها قولي نعم .
جنان بنعومه _ نعم أستاذ محمد .
محمد حب يحرجها _ شفيج سرحتي .. و قعد يغمزلهااا
جنان انحرجت و كبس وجها صار إشارة مرور _ اممم ما سرحت .
محمد _ اي أمبين .
وألتفت شاف امه ماسكه التلفون و تكلم ..
محمد _ الوالدة تكلم منو ؟
جنان بتستخف دمها _ ماعندنا بالبيت وحده والده ..
محمد _ خخخخخ لا تعيدينهاا سخيفه و قديمه بعد ..
جنان بتوتر _ مادري توني نازله . أقول محمد كلمت ابوي عن موضوع بندر ؟
محمد بجديه _ ايه كلمته ...
جنان بسرعه _ زين شنو قال ابوي ؟
محمد و يمسك يد جنان و قعدوا على الصوفااا ...
محمد _ جنان الوالد عصب وقال لو مو بندر جان أخذت رايهاا بس هذا بندر تربيتي .. و انتي يا جنان صلي الأستخارة .. الله سبحانه و تعالى ما نزل شي إلا و له حكم .. و صلاة الإستخارة تبعد عنج الشر و ترشد الخير لج .. و عيشي حياتج مع زوجج بما يرضي الله فالمرأة الصالحه لها دور كبير في حياة الرجل .. و تذكري ان في حديث ان المرأة إذا رضا عنها زوجهاا تدخل من أي باب من أبواب الجنة الي تبيه ..
جت جنان بتكلم . لكن محمد حط يده على فمها بمعنى اسكتي ..
فحاولي تكسبين زوجج و بندر أعرفه ماراح يقصر معاج رجال بمعنى هالكلمه ..
جنان حاولي تطيعينه بما يرضي الإله .. فالله يرضى عليج و هم زوجج بيرضى عليج ..
عندج كلام يا جنان .. ؟!
تقدمت جنان صوبه و حبت خشمه و ضحك محمد من تصرفهاا العفوي و قالت بصوت مهزوز_ جزاك الله خير يا خوي. نتوكل على الله العلي القدير .. وقعدت تبجي .. محمد و منحرج منهاا _ والله ياجنان كلمته بس مارضى و حتى طردني حاولت فيه بس سبحان الله الزواج قسمه و نصيب و هالبندرووه بالذات طلع من نصيبج ..
و حب يضحكهااا قال _ يختي مادري ابوي شنو شايف ببندر عشانه مصر عليه ؟
جنان ضحكت بضحكة ممزوجه ببكاء _ محمد بس ..
محمد رفع راسها _ أرفعي راسج و قال الله تعالى ( و عسى أن تكرهو ا شيئا و هو خيرا لكم و عسى أن تحبوا شيئا و هو شرا لكم )
جنان _ و نعم بالله ...
فجأة سمعوا ضحكة أم محمد بصوت عالي و تقول _ بس خلاص أرحميني يامره . أقول شكلج مطوله و عيالي صارلهم نص ساعه عندي وانا أكلمج يلى مع السلامة ..
سكرته من أم بندر و قالت _ هاذي ام بندر تسلم عليكم ..
الكل _ الله يسلمها ..
ام محمد شافت وجه جنان _ جنان شفيج يمه أحد مضايقج ؟ و قامت لها و لا جنان تضحك تحاول تغير السالفه.
محمد بيلهي أمه _ شخبارها ام بندر و شخبار عبير ؟!
ولا على نزلت بدور و تخز محمد _ قلنا ام بندر مرة عمك . بس عبير ليش تسأل عنهاا ؟
الكل مات ضحك عليهاا ..
بدور _ شفيكم تضحكون وانا صاجه شكو يسأل عن بنت عمه ؟!
محمد _ لااا تخافين عبور مثل جنان يعني مثل أختي .
بدور و رافعه حاجبها _ عبووور هااا ؟!
أم محمد و تبتسم _ تعالي يا بدور شنو بتظلين واقفه عالدرج جنج حارس عمارة ..
و تأشر لها بمكان جنبهااا جنان ماتت ضحك على بدور و هي تعطي محمد نظره شر ..
بدور انتبهت لضحكة جنان و قالت بدلع _ خااااااااااااااله ..
و مشت عالسريع لخالتهااا و قعدت عندهاا . محمد فاتح عيونه بوسعهاا مستغرب ( مسكين ما سوى شي ) _ ما سويت شي يمه ؟!
أم محمد تغمز له _ خلاص أقطعواا سيرة عبير عنااا ..
جنان خف ملامح البجي عنها و قالت بدلع _ يا عيني يا عيني على ألي يغارون .. و تلتفت لأخوهاا و قالت _ أفرح أفرح يااا عم شعليك عندك مره تحبك و تغار عليك ..
انحرجت بدور قدام خالتها ..
أما محمد شاق الحلج من الأذن للأذن .. وقال _ أحم أحم أصلا هذا وجه أحد ما يغار عليه ..
ياااااشين الواحد إذا فيه طفرة من الثقه ..
كلهم ألتفتوا لها و هي واقفه عالدرج .. ورابطه عنقوصين و امبين انها توها قاعده من النوم ..
محمد يقلدها _ ياااااشين الجهال لا تكلموا عند الكبار . و خاصه عند الرياجيل ( يقولها و هو صاك على اسنانه يعني حسي على دمج و أحترميني انا أخوج الكبير )
سارا طلعت لسانهاااا له و سوت حركات بحواجبها بتقهره ..
ام محمد ما حبت حركات بنتها _ عيب يا سارا هذا أخوج الكبير .
محمد و يحك ذقنه _ لا أبشري يمه ألسانها هذا بينقص في يوم من الأيام ..
جنان تهز راسه يعني تعالي له و حبي راس أخوج نزلت سارا ووصلت عند أخوها و مدت يدها له و قالت _ كااااااااااافك
مد لها محمد يده و حطت سارا يدها فوق يده و اسحبته لها عالخفيف و حبت خشمه و جبهته و قالت _ حمودي انا اسفه ..
محمد حس بحنان خواته و حبهن له .. فأبتسم لها و حظنها عالخفيف _ مقبوله بس ما تعودينهاااا مرة ثانية ..
بدور بغيرة _ بس خلاص سارا روحي شوفي عواشه من اليوم تقول ابي سارا ..
جنان منصدمة وقالت بصوت عالي _ ياويل حظك ياخوي تراها أخته ..
سارا راحت لبدور _ محتراااااااااا
طالع محمد بدور و ضحك شكلهاا شوي و بتنفجر .. و ماشي للدرج _ مع السلامة ..
ام محمد لسارا _ يمه روحي استعجلي الخدامه عالقهوة ...ما صارت ..
سارا و تأشر على عيونهااا _ من عيوني يام محمد ..
// بيت بو أحمد //
بو أحمد يرحب الضيوف بوخالد و ولده خالد ( رفيج بو أحمد ) بديوانيته و أحمد يصب القهوة للرياجيل ..
بو أحمد _ هلا و الله ببو خالد وينك يا رجال عنا ؟
أبتسم بوخالد _ والله الدنيا لهتنا عن أحبابناا و كاهي بنفسهاا جابتنهااا لهم ....
بو احمد _ الله يحيك يابوخالد و شوفتك والله تشرح الصدر ..
بو خالد _ ماعليك زود و بيض الله وجهك ..
و يلتفت لأبو أحمد _ هذا ولدي خالد دكتور طب ..
بو أحمد _ يا هلا بالدكتور شخبارك ؟
خالد _ هلا بك يا عم ..
والله تمام .. و انا بخير بشوفتك الميمونة ..
بوأحمد _ تسلم تسلم ياولدي . إلا أنت شنو تخصصك بالطب ؟
خالد _ جراحه يا عم ..
أحمد _ شهادتك من الخارج ولا من أهنيه ؟
خالد و يعدل قعدته _ لا من بريطانيا وانا خوك ..
أحمد و يصب القهوة لأبوه_ يلى بالتوفيق ..
بو خالد بصوت جهوري _ يا بو أحمد أحنا جينا نطلب القرب منك و نسبكم يشرف و النبي صلى الله عليه وسلم قال " تنكح المرأة لأربع لمالها و لنسبها و لجمالها و لدينها فاظفر بذات الدين تربت يداك " وانا أتقدم بخطبة ولدنا خالد على بنتك نوف و إن شاء الله يطرح البركه بيناا .
بو أحمد _ هاذي الساعة المباركه يابوخالد .. بس الشور شور البنت ..
بوخالد _أكيد يابوأحمد احنا ما نرضى نجبر البنات على زواج ما يبنه .. و هذا الي أمره دينااا ..
وأن شاء الله الرد يكون أمبجر عشان نعجل العرس ..
ابو أحمد _ ابشر ابشر يابوخالد .
و بعدها بخمس دقايق طلع بوخالد وولده من ديوانية بوأحمد ..
بندر في سيارته متجه لبيت عمه عشان ياخذ الملفات حقت الشركة و هو يكلم محمد ..
بندر _ الشرهة مو عليك الشرهة علي ألي طاق طريق عشان آخذ الأوراق ولا المفروض انت تجيبهاا لي ..!
محمد _ تصدق اني أكتشفت فيك صفه ؟
بندر _ و إلي أهي ؟
محمد _ صفه مذموومه ؟
بندر نفذ صبره _ زييييين قولهااا.
محمد _انك مناااان مع مرتبه الشرف ..
صك بندر التلفون بوجه محمد ( هذي طريقه بندر لا عصب يصك التلفون بوجه الي نرفزه عشان ما يتكلم بألفاظ جارحه )
بندر بقهر_أخخ صج ما يستحي ..
و شغل شريط للشيخ ماهر المعيقلي و هو يقرأ سورة الأحقاف ( انصحكم بسماعها )
حس بإرتياح و طمأنينة و سكينة ...
لي وصل قدام باب بيت عمه و نزل ..
محمد يصعد الدرج و يقول لسارا _ ليش ما تنامين ؟ مو ابركلج من هالصور المتحركة ؟
سارا _ ما جاني النوم ..
محمد _ خلاص قولي للخادمة تسوي قهوة بندر بالديوانية ..
سارا _ إن شاااااء الله ..
و قالت للخدامه ولا جنان طالعه من صالة الضيوف كانت تكلم بالتلفون الثابت..
جنان كانت لابسه بيجامه حمرا و عليهاا قلووب و فاكه شعرها على طوله ..
جنان و خلاص عيونها بتقفل وتقول لسارا _ الساعة ألحين 10 ومانمتي ؟
سارا _ أوكي بنام بس خل يخلص هالتوم و جيري ..
جاتها فكرة جهنمية و طقت جبهتهاا _ ايييه تذكرت محمد يبيج بالديوانية ضروري ..
جنان باستغراب _ شيبي مني ؟
سارا بسرعه _ مادري بسرعه روحي له شكله مستعجل ..
جنان راحت للديوانية .. شافت ليتها منور .. و ادخلت الديوانية ( نظامها ديوانيتين داخلات ببعضها الاولى ديوانية متوسطه ثم باب يدخل على ديوانيه كبيره) جنان بخطوات خفيفه شافته مو موجود بالديوانية الأولى قالت أكيد بالكبيرة و دخلت و صرخت _ سبراااااااااايز
و لا تشوف بندر الي وقف و هو مخترع و قعد يدور حول نفسه و شكله متوهق و معصب منها
بندر و صوته يالله يطلع و يأشر لها _ نحاااااشي لالالا تعااااااااااااالي لالالا..
الأخت تنحت و فمها مفتوح و بسرعه جا صوبها و مسك يدها بعصبية و قال لها _ شمدخلج هني ؟
جنان بخرعه و إنحراج _ م م م محممم د يبيني ..
بندر و ضاغط على اسنانه _ جذاااابه شلون محمد يسوي جذي !
جنان بعوار _ آآآي اترك يدي يا بندر ..
ولا تسمع صوت رجال جاي بيدخل الديوانية الي هم فيهااا وقال بصوت جهوري _ وراك وراك يا فهد الأهل هني بالغلط دخلوااا .. بعدها سمعوه يقول _ أوكي .. انا طالع ..
جنان بألم _ بندر شفيك اقولك أترك ايدي !! عورتني ..
بندر ترك يدها بسرعه و خزها من فوق لتحت _ محمد قالج تعالي هني ؟
جنان بتوتر _ لاا بس سارا قالت محمد يبيج بالديوانية ضروري ..بندر وفهم حركات هالسويروه .. وقال_ بسرعه اطلعي قبل لا يشوفج أخوج اهنيه و ابتلش انا .. !
طبعا هالكلمة بالنسبه لبندر عادية ولا لها أعتبار عنده .. لكنهاا تطعن قلب وليف صادق الحب لكنه مجرووح ..
جنان لفت عنه و مشت كأنهااا منومه مغناطيسية و عيونها مركزه على فراغ .. لي طلعت ..
بندر تنفس بقوة و قعد على الكرسي و فك أزارير دشداشته و حذف شماغه و عقاله ..
و تنهد . _ آه شسالفتج يا جنان .. ! وسارا دواها عندي .!
و دق على رفيجهم فهد ..
جنان أدخلت الصاله شافت سارا قاعده وشكلهاا تنطرهاا وقفت سارا و راحت لجنان و أضحكت و هي تقول _ عليييييج وااااااااااحد ..
جنان فرغت طاقتهاا المكبوته في صدرها و قهرها من كلمة بندر و طريقه تعامله معها بطراق محترم على خد أختهااااااا
سارا بصدمه حطت يدها على خدها الحار تحس يشتعل نار من كثر حرارته و نزلت دموعها _ ليييش يا جنان ؟
جنان بحقد على حركتها السخيفه طنشتهااا و صعدت فوق لغرفتهاااا ..
سارا من هول الصدمه قعدت تبجي بصوت مسموع و راحت ركض لغرفتهااا ...
نزل محمد و معاه الملفات .. و مالقى سارا و راح للمطبخ شاف القهوة مجهزه و الخدامه مو موجوده .. فأخذهاا للديوانية
بندر و فهد قاعدين و ماخذين راحتهم عالآخر ..و فاصخين الشمغ و القحفيات و متمددين على الغنفات ..
دخل عليهم ولا بندر يتطنز _ الله بالخيييير جان طولت بعد !
فهد _ اي والله ..
محمد و ينزل الصينية و يقعد يصب لهم _ أعذروني عالتأخير لأن الملفات الأهل نسواا وين حاطينهااا ..
بندر و تذكر موقفه مع جنان و قعد يحك شعره عالخفيف و هو سرحان ..
محمد انتبه له و قال لفهد _ يقهرني لا سرح .. ودي أعرف شنو يفكر فيه ..
فهد و بجرأة _ بعد عرسه بعد شهرين أكيد بيفكر و بيسرح على كيف كيفه ..
محمد و الدم يغلي و ماحب يجرح رفيجه _ أقول لو انك ساكت ابرك لك .. سكت دهرا و نطق كفرا ..
فهد حس بضيقه محمد من رده _ أسف يا بو عمر ماكنت أقصد بسوء و هي بس زله لسان ..
محمد _ مقبول يا فهد .. إلا أقول منت ناوي تزوج بعد . انا و تزوجت و بندر خلاص بينظم لي و انت متى بتودع هالعزووبه ..
ضحك فهد بصوت عالي انتبه له بندر و قال مستغرب _ شسالفة ؟
محمد لا إراديا حرك يده _ اسكت انت كمل سرحانك .
انحرج بندر الظاهر طول بالسرحان .. فحك خشمه من الفشيله و ابتسم _ ما سرحت ..
فهد _ امبين يا بوعذبي .. من اليوم واحنا من سالفة لسالفه و انت بس تحك شعرك و تطالع الثريا ...
بندر و يعدل قعدته _ خلاص توووبه يا عيااااال ..
فهد و محمد مع بعض _ عياااال بعييينك ..
و استمروا بالسوالف و الضحكات ..
+++ بيت بو أحمد +++
غرفه نوف ..
ام أحمد و تمسح شعر بنتهااا _ نوف خلاص كبرنا أحنا و كبرتي معانا يا بنيتي و البنت من تكبر تروح لبيتهاا بيت زوجهاا لأنها في بيت أهلهاا تعتبر ضيفه مؤقته .
نوف و تعدل بالجلسه _ يعني السالفة سالفة خطبه ..
ام أحمد _ اي يا أمي في دكتور متقدم لج ..
طيف بندر مر قدام عيون نوف و أبتسمت ..
امها أرتاحت شكلها موافقه ..
وقفت بتطلع و قالت _ يعني أقول لابوج انج موافقه على خالد !
نوف بثقه _ لا منو قال اني موافقه ..
ام أحمد بعصبية _ نوف شوفي عمرج بالأول .. لي متى بترفضين الرياجيل و كل واحد أحسن من الثاني ..
قاطعتها نوف _ ما راح أخذه قلتلج ما راح اخذه ..
صرخت امها عليها _ زين لي متى ؟!
نوف و ترتجف من الغضب _ ألي أبيه باخذه أرتحتي ألحين
.. و لفت وجهها عن أمهااا بكل تكبر و علوا ..
أمهاا بقهر و توطي صوتها _ نوف يا حبيبتي الدكتور ما يتعوض دين و أخلاق و شهاده و جاه ومال .. كل أم و ابو يتمنون لبنتهم رجال بهاذي المواصفات ..و كاهي النعمه جايتج لباب بيتج لا ترفسينهااا يا نوف ...
نوف _ قولي لأبوي مابيه ..
أم أحمد و تزم شفايفها _ هذا آخر جواب ..؟
نوف برجفه _ ايه
أمها _ زين قعدي فكري يوم يومين ..
نوف _ قولي لأبوي مابيه ..
طلعت امها و تقول بصوت مسموع الله يهدااااج يا نوف ..
أحمد بعصبية _ على أي أساس ترفضه .. تحمد ربهاا ان واحد مثل أخلاق و دين خالد جا يفكر فيهااا ..
بو أحمد _ لا روح طقهااا بعد .. شاطر والله . الراي بالأول و الأخير لها انا أنت أمها مالنا شغل فحياتهاا الخاصه .. و الرزق جاي إن شاء الله ..
أم أحمد _ انا بعرف ليش ما تبي تتزوج كل من جا يخطبها ترفضه ..
أحمد _ يبا انت مدلعهااا بزياده أجبرهااا .. لا تخليهاا تاخذ راحتها بهالزواج . ألحين ترفض و بترفض و بترفض بعدين بطق الثلاثينات عاد شبتستفيد من هالرفض و منو الرجال الي يبي زوجه ثلاثينيه .. ماااااكو يبا .. يبا و كلام الناس ما ترحم و أغلب رياجيل فريجنا تقدموا لها و أرفضتهم وألحين بيدرون و يالله منو بيفكنا من ألسنتهم ..
بو أحمد و قايم _ مناة عيني أشوف بنتي عروس و مستانسه بس انا أجبرها لا يعني لا .. و الله ان ارادها تتزوج بتزوج لو رجال ساكن بأمريكا محد عارف وين نصيبه ..
أحمد _ يعني خلاص بترفضه ؟
بو أحمد _ أكيد البنت رافضه . و الله يرزقنه ببنت الحلال الي تسعده .
سكتوا بعدها و طلع بوأحمد و طلع معاه أحمد ..
// الجزء الخامس //
@ بيـــــت بو بنـــــدر @
بندر و أم بندر و عبير قاعدين يتريقون ولا عبير تضغط على رجل بندر .. ألتفتلها و عطاها نظره مستغرب من حركتهاا أبتسمت عبير له أهني بندر حس فيهاا شي و قال بهمس _ شفيج بغيتي تقطعين اصابعي . ؟!
عبير تفشلت منه _ أممم لك ولا للذيب ؟!
بندر _ أول قولي شنو بعدين أفكر ..
عبير أنقهرت و بزله لسان _ صج ما عندك ذوق أيه والله معها حق جنان يوم تقول انك عديم الذووق ..
بندر و عيونه بتطلع و غص بلقمته _ كح كح ..
أم بندر _ أسم الله عليك .. هاك هاك قلاص الماي ...
عبير بخوف _ أييييه ماكنت أقصد بندر ..
ام بندر وتطالعها بشرر _ أنتي شقايله لأخووج ؟
عبير _ كنت أتغشمر معاه ..
بندر وعيونه حمر و تدمع _
خلاص قولي شبغيتي ..
أم بندر _ شعندكم ؟!
عبير _ يمه ابي بندر يوصلني للجامعه .
بندر _ لا والله و السايق شفايدته ؟!
ام بندر و تذكرت _ ايه نسيت لاقولك فاطمة أخذت السايق بتروح فيه للمستشفى ..
بندر معصب _ وليش ماراحت مع زوجهاا ؟!
أم بندر _ جاسم عنده دوام .
بندر_ وانا بطالي ماعندي دوام .
أم بندر _ بندر شفيك معصب . ؟
ود أختك وبعدين جامعتهااا مو بعيده عن الشركة .. ليش مسوي من الحبه قبه ...
عبير حست مكانها بينهم غلط . و انهاا السبب فهالشوشرة .. و قالت بخوف واضح _ انا اسفه .
بندر و يتمالك نفسه _ قومي جدامي ألحين ..
ام بندر انقهرت منه _ خل أختك تريق ..
عبير قامت بسرعه _ لا يمه انا خلصت .
بندر قام و قبل لا يطلع ماهانت عليه أمه يطلع وهي زعلانه عليه فحب راسها _ سامحيني يا الغالية تعرفين بنتج ترفع الضغط ..
أم بندر لانت ملامحها _ رح الله يحفظك و لا تعصب على أختك ..
بندر _ ان شاء الله ..
عبير ودها تنحاش قبل لا تقول ان جنان بتروح معاهم _ بندر.
بندر بصبر _ اللهم طولك ياروووح نعم ..
عبير _ نعم الله عليك .. جنان ..
بندر _ شفيهاااا جنان بعد؟
عبير _ بتروح معانااا ..
بندر و الشرر يتطاير من عيونه و قال بصوت عالي _ اسبقيني عالسيارة ..
ركضت عبير و طلعت تنطره برى البيت ..
أم بندر _ لاحول ولا قوة إلا بالله .. انت ليش معصب .. أخذ أختك و زوجتك وودهم للجامعه ليش حارق أعصابك .. ؟
بندر بقهر _ تبيني اطق مشوار بعد و أروح لبيت عمي .. و جنان وين سواقهم .. انا غبي معطي بنتج وجه .
و هو بيطلع و لا صوت أمه _ بندر ياوليدي لا تعصب عليهن . ماراح تعيش إذا انت جذي .. الصبر زين و هذيل حريم ضعيفات .. أصبر و تحملهن ..
بندر و بإبتسامه بالغصب _ابشري .
طلع بندر و هو يفكر بكلام امه ( أخذ أختك و زوجتك ) زوجتك زوجتك مالها معنى .. ..
شاف عبير قاعدة في السيارة و تكلم بالتلفون .. ركب وعرف منو قاعدة تتكلم معاه .. سمعهاا تقول
_ بسرعه كلهاا ربع ساعه وواصلين عند باب بيتكم .. أوكي يلى مع السلامه ..
و سكرت التلفون ..
بندر بهدوء _ الساعه جم تبلش محاضرتكم ؟!
عبير _ 8 و نص ..
بندر _ أنتي و جنان بنفس التخصص ؟!
عبير _ ايه ..
:: عــــــبــــــيــــــر ::
صراحه أخوي فيه شي .. قلب 180 درجه .. صج مزاجه متقلب .. والله ماراح يتبهدل معاه غير جنان .. صح انه هاوشني و عطاني خوش تهزيئه بس أمووت على أخوي أبيه يرتاح و يستانس بحياته مع جنان و فرحت انها بتجي معاي و ليت بندر يحس فيهااا بس لو شوي .. عالأقل يشبع أنوثتهاا المجروحه انا حاسه فيها لكنها تكابر و ماتبي تفضفضلي .. بعدين أول مرة أدري ان في عريس ما يعرف تخصص زوجته !!!!!
خل أحرجه ..
عبير مسويه نفسها بريئه _ أقول بندر ..
بندر و ألتفت لهااا _ قووولي ..
عبير _ في زوج ما يعرف تخصص زوجته ؟!!!!
بندر يهز كتفه _ أممم في أزواج مايعرفون قبل العرس بس بعدهااا أكيد بيعرف ..
وطالعهاا _ ليش تسألين ؟!
عبير _ لا عادي شفتك تسألني عن تخصص جنان فاستغربت ..
بندر و يحط شريط _ أهااا عشان جذي اوكي مصيري عارف شنو تخصصهاا صح عبوووره ؟!!
عبير و تبتسم له _ صح يا أخي العزيز ..
بعدها سكتوا ينصتون لصوت الحق سورة يوسف بصوت القارئ محمد البراك ..
: جـــــــنــــــــان :
قعدت الفجر و صليت فرضي و رحت لغرفة سارا اللي للحين ودي أذبحهاا على حركتهاا السخيفه .. و سحبت فراشها بخشونه أبيها تقعد مخترعه و صار الي كنت أبيه ..
سارا مخترعه _ بسم الله بسم الله ..
قلتلها بحقد _ قووومي صلي قبل لا يصلى عليييج ..
شفتهاا تمدد جعلهاا استغفر الله قلبي ولساني موراضين يدعون عليهاا ..
قامت بكسل و شوي ولا تصقع بالطوفه الي جنب الباب .. ما ستحملت شكلها يضحك ..
جنان تضحك بصوت عالي ..
كشتت فيها سارا كأنها مو موجوده بغرفتها ..
للحين زعلانه المفروض انا الي أزعل مو هي !!
فطلعت من غرفتهاا و شفت ليت غرفه امي وابوي مشغله دريت انهم صلوااا ..و رحت أكمل نومتي..
عالساعه ثمان قعدت و لبست محاضرتي تبلش ثمان و نص و أتصلت على عبير تمرني ..
نزلت تحت شفت الوالده بروحها قاعده فتريقت عالسريع الهانم عبير ماتحب انقعهاا برى .. طاااالعه على أخوهاااا ..
دق تلفوني ولا عبير تقولي يلى انا برى اطلعي بسرعه .. حبيت راس أمي و قلتلها _دعواتج يمه .
أم محمد _ موفقه يابنيتي ..
جنان و عند الباب _ آآميـــــن ..
طلعت برى بيتنا بس كأني أشوف شي غلط .. عبيروه قاعده قدام .. ألتفت لجهة السايق ولا الحبيب كاشخ و يطيح الطير من السما .
بسم الله هذا بندر . ألتفت لعبير ولا الأخت تبسم .. أما هو يطالعني عادي .. مشيت و رجولي ترتجف أحس كأني بطيح هاذي أول مره أروح معاه بدون ابوي أو عمي .. رجعت لأمي و انا خايفه .
لقيتها قاعده مثل ماتركتها ..
جنان _ يما
ام محمد _ هلا جنان شرادج ؟
جنان بحيا_ يما بندر بوصلني مع عبير ! أرووح
ام محمد _ روحي يما هذا زوجج ..
طلعت لهم و فتحت الباب الخلفي الي ورى بندر و قعدت بدون سلام ولا شي .. و ريحه عطره تفوووح .. مالت كاشخ حق بنات الجامعه من ألحين أشكره يغازل الحبيب <<< بدت الغيره .
بندر حرك لجامعتهن ..
عبير بدفاشه _ و عليكم السلام و رحمة الله و بركاته ..
جنان سكبتهااا .. و لا ردت عليها .
بندر _ السلام عليكم و رحمة الله و بركاته ..
جنان شوي و تبجي شفيهم عليهااا من صباح الله خير ..
عبير شافت جنان كاشته فيهم فردت علي أخوهاا. _ وعليك السلام و رحمة الله و بركاته ..
جنان ودهاا تخنق عبير .. و بتلقائيا رفعت نظرها لمرايا السيارة و لا عينها بعين بندر بالصدفه .. تذكرت دخولهاا عليه بالديوانيه .. أضغطت على أسنانها بقوة .. أما هو طالعهاا بنظرة خاليه من مشاعر .. كأنه جامد ..
عبير بتقتل هالصمت المزعج _ جنااااان ..
جنان بعد أنقهرت شفيهم ما يسولفون خوش روحه معاهم _ نعــــــم ..
عبير _ لا بس أجرب صوتي ..
جنان بسرعه نست وجود بندر _ خخخ ما تضحك ..
عبير _ تعالي إلا صج إلا سمعناه ؟!
جنان مو فاهمه _ شنو الي سمعتيه !!
عبير _ دكتوره سهام تبي برزنتيشن مو بحوث ..
جنان _ عادي شفيها سوي برزنشين ابركلج من مطالعه فلانه و علانه ..
عبير و تلتفت لها _ انا ألي أخزخز ببنات خلق الله .
جنان منصدمه _ يييمه منج تجذبين ايه ماتركتي بنت إلا بحلقتي عيونج فيها ؟!
عبير _ انا اجذب !
جنان خلاص ماقدرت عليهاا _ أقول عبير ..
عبير _ نـــــعم ..
جنان بصوت يرتجف _ كرمينا بسكوتج ..
بندر عيونه بتطلع من أسلوب جنان و زعلها السريع فطالع بأخته وقال بإستهزاء بصوت هامس
_ خخخ مصخررره ..
عبير بقهر و مكتفه يدينها على صدرها _ أقووول سوووق و انتبه ترى أختك تحب الحياه ..
جنان حست انها زودتها شوي واخذت راحتها عالأخر ..
فالتزمت الصمت .
بندر شاف أخته الدم فور عندها فطالع بالمرايااا و قال _ أقوول بنت عمي ..
جنان رفعت عيونها للمراياا و شافته يطالعها و هو مبتسم جاها مغص ردت عليه بكل براءة _ نعم .
بندر عيونه مركزه عليهاا _ و الله منتي بهينه !!!
جنان مافهمت عليه شيهبب هذا و شقاعد يقول ؟ شنو منتي بهينه و لا عاد نظراته مرة يبتسم و مره يخزني خز .
جنان أسكتت ماردت عليه ..
و الكل سكت و حس بتوتر الجو و كهربته .. و يوم بينزلن تكلم بندر بصوت عالي و كلهن جمدن بمكانهن و حب يقهرن _ هاذي أول و آخر مره تأخرني عن الدوام فاهمااااات ؟!
سكتن كل وحده تنطر الثانية ترد عليه بالنيابه عن الساكته .. جنان تقول هاذي أخته و عبير تقول جنان زوجته و بنت عمه يمكن يحس على دمه شوي و يسكت ..
بندر شافهن ساكتات فصرخ عليهن _ أنتن تفهمن الكلام و لا ما تفهمن ؟
جنان و عبير _ فاهمااااااات ..
بندر يمثل العصبية_ أنزلن لا بارك الله في العوووبااااااات . !
جنان من الخرعه بتنزل بسرعه ولا خصرها اليمين يعورهااا . و قعدت تتلوى على نفسها
جنان و يدهااا على خصرهااا _ آآآآآآآآيـــــــــي يعورني ..
جات عبير من صوبهااا _ جنان شفي خصرج
و مسكت يد جنان و جنان تعورت و قعدت تبجي _ يعورني يا عبيــــــــــر !!
بندر ما استحمل صياحهاااا مهما كانت هذه بنت عمه بالأول و الأخير و بتكون بعد شهر زوجته . فنزل من السيارة و راح للمقعد الثاني و فتح الباب قعد يطالع فعبير بتوتر _ عبير رووحي لمحاضرتج ..
عبير بخوف كبير _ لاااا أبعقد مع جنان ..
بندر بعصبية _ أطلعي برى بنت عمج ماني بماكلهااا .. أخلصي علي بسرعه ..
دموع جنان اطلقت لنفسها العنان و حست بدوخه و تتلوى على نفسها ..
بندر بحنيه _ جنان وين مكان العوار ؟
:: جنـــــــــــــــان ::
بعد ما عصب عليناا بندر . حسيت اني بموت على ايده لو قعدت ثانيه . فتحت الباب بسرعه و انا قاعده آخذ كتبي و لا خصري يعوري . مادري كان شنو شعوري في هاللحظه أصرخ علي بندر و لا أبجي من العوار . ما حسيت بشيئ بعدها لان الألم زاد علي و قعدت أبجي بقهررر ..
بعدين حسيت بنفسي و ألتفت لعبير بس ماكانت موجوده و شفت جسم قاعد جنبي في المقعد الخلفي .. قعدت اميزه عدل بسبه عيوني الي ماشوف فيهااا من كثر الدموووع .. لي استوعبت ان الجسم الي قاعد عندي هو ما في غيره .. بندر حلم المراهقه .. دنقت راسي و العوار رد لي لكن بندر طلب يشوف مكان الألم.
بندر بحنية _ جنان وين مكان العوار ؟
هزيت راسي بــ لاااااا ..
وقلت بصوت تعبان _ أبي عبير ...
بندر _ عبير راحت لمحاضرتهاا .. خليني أشوفج يمكن دوده زايده مدامه باليمين و عشان أوديج المستشفى
جنان من اسمعت المستشفى و بجت زياده _ بندر لااااا تكفى لااااا ..
بندر يحاول يصبر نفسه الظاهر أمي داعية علي اليوم.!
بندر _ شنو لا لا . ألحين خليني أشوف أول ..
سحب يدهاا عن مكان الألم و حط ايده ..
جنان بخوف و انحراج من قرب بندر لها و حست بألم _ آآآآي ..
بندر و يحاول عشان يتأكد ..
_ زين جذي بعد يعورج ؟!
جنان تحاول تمسك نفسهاا _ لا خلاص ألحين ما أحس بألم ..
بندر بشك _ أكيـــــــــــــــد ؟!
جنان بتردد _ أكيد ..
قعد يطالعهاا شوي لانها متألمه و أكيد فيها شيئ .. بس ما حب يثقل عليها بالحنه ..و يمكن مغص عادي .. عشان جذي سكت ..
طلع بسرعه بندر قبل جنان و ركب قدام ..أما جنان حاولت بجهد كبير انها تكون طبيعية .. ما تدري شلون تغير بندر بدقايق معدوده .. أول يصارخ علينا و ألحين الحنان كله بعينه و بصوته ...
شالت كتبهاا بايدها الثانيه و هي هامه بالنزول من سيارة بندر .. رد لها الألم فقعدت و ما تحركت من مكانها غير أنها سندت راسها على المرتبه و خرجت منهااا آهه .. و حطت يدها على خصرها ..
جنان ما استحملت _ أبي أمييييي
و زاد صياحها و بجاها ...
الألم زاد عليهااا و بندر عمره ما واجهه موقف مثل هالمواقف ..
جنان بصوت يقطع القلب _ بندر ألحق علي بموووت ..
أرتبك حيل من طريقه جنان و هي قاعده تلتوي على نفسهاا و تقول بموت .. حرك السيارة و قلبه يرقع من الخووف .. و يديه تنتفض .. ما توقع هالأحداث بتصير ..
جنان _ آآه
بندر بتوتر _ خلاص خلاص المستشفى قريب .. كلها دقايق و أوصل ..
سمعهااا تئن و تبجي . ألتفتلها شافها ممده عالمقعد و يديها عالخصر اليمين .. و لا جهاز جنان يدق ..
بندر من الخوف قعد يصرخ _ هذا وقته هذا وقته ..
اما جنان بعالم ثاني .. تحس روحها بتطلع و الدنيا تدور و ظهر بندر يروح بعيد و يقرب يروح بعيد و يقرب ...
دق الجهاز أربع مرات و بندر الخوف مسيطر عليه .. حاول يسرع قبل لا توصل الإشارة حمرا .. لكن الإشارة اسرع منه .
بندر بعصبية _ الله ياخذكم هذا وقته .. استغفر الله ..
بثواني و لا جهاز بندر يرن .. شاف عبير يتصل بك ..
رد عليها عشان ما تحاتي جنان .
بندر بتوتر _ نعم
عبير _ بندر جنان وينهاا ادق عليها و ما ترد .. ؟
بندر _ عبير اسمعيني جنان معاي بوديها المستشفى و لا
قاطعته عبير بصراخ _ ليييش شنووو فيهااا ؟
بندر بصراخ أعلى فقد السيطرة على نفسه _ جاااااااااااااااب ..
عبير قلبها طاح شفيها توأمي صديقتي الصدوقه ..
بندر _ اسمعيني و انتي ساكته جنان تعبانه و انا الحين بالمستشفى . و كوني انتي جاهزه عشان أخذج لهااا فاهمه .. سكر بندر الخط بعد ما خلص كلامه ..
ثواني و الإشاره خضرا . حرك السياره بإتجاه المستشفى ...
%%%%%%%%%%%%
|