منتديات قصايد ليل - عرض مشاركة واحدة - نفســي عزيزة يا بندر ... الكاتبه ::: قلم نابض بجويتي

10-24-2011

يوم جديد تتجدد فيه الطاعات و يزيد فيه الأعمار و تقترب من الممات ..
قال تعالى ' و لمن خاف مقام ربه جنتان '

بندر بصوت عالي يأذن لصلاة الفجر .
الله أكبر . الله أكبر . أشهد ان لا إله إلا الله .أشهد ان محمد رسول الله .
حي على الصلاة حي على الفلاح قد قامت الصلاة قد قامت الصلاة الله أكبر . الله أكبر لا إله الا الله .

قعدوا الرياجيل و بندر صار الإمام لهم . و قرأ سورتي السجدة و الإنسان كسنة للرسول صلى الله عليه و سلم في صلاة الفجر .و ماشاء الله صوته كان رجولي و يشبه صوت إمام الحرم المدني الشيخ :: عبد المحسن القاسم .::

قعدت بدور على صوت بندر و قعدت البنات و الحريم عشان يصلن و منهاا يقعدن يتريقن و يستقبلن أم أحمد و بنتهاا نوف

بدور تهز جنان _ جنان قومي
جنان تجر اللحاف _ ياااي خليني انام
بدور اسحبته بقوة_ أقول قومي صلي لا بالماي
قعدت جنان و تمغطت لا قالت بس جنان_ اصبحنا و أصبح الملك لله ولا إله إلا الله وحده لا شريك له له الملك وله الحمد و هو على كل شيئ قدير .
بعدها سحبت لحاف عبير ولحاف سارا _ قووومن صلن يا بناااات

عالساعة السابعة صباحا . . الجميع تريقن و تقهوى ..

قام بندر و محمد للصيد .. محمد _ بندر يومنك تحب الصيد ليش ما تروح للمغرب أسمح شباب يقولون الصيد هناك شي شي
بندر _ لا يبا شوراي اطق طريج عشان القنص ووين بعد للمغرب بعيده شوي ياخوك . وإذا فنفسي روحه عندنا جيرانا دول الخليج اقرب مسافه . و أفضل بعد هناك لنا معارف يدلولنا عالأماكن الزينة .
محمد _ كيفك والله انا سمعت يمدحونها قلت اقول لك .
أقول بندر تصدق انت قبل أربع سنين سمعتني ابيات كتبتهااا و للحين ما أضحك عليك أتذكر كذا بيت . سمعنيهااا ؟
بندر ما تذكر _ آي بيت ياكثر ما أبلشك بأشعاري يابو حور
محمد _لا شدعوه يا بو عذبي بس لحظه خل اتذكر البيت
ايه هذا

الوقت يمضي والليالي مشاويح*** والعين ماذاقت لذيذ المنامي .
اسامر النجمه و بث التصاريح *** أشكو لها هم به الصدر زامي .
أخايل القمرا وألف المسابيح *** واقدح من عيون المعاني مرامي .
الغيد ياما في هواهن مطاريح *** مابين مقتول و صويب العظامي ..
الحب نعمه مثل غيث المراويح *** لاصار بين اثنين و الوضع سامي .
واحيان نقمة مثل صفق الملاويح *** لاصار من واحد وزاد الهيامي ..

أما الباقي والله مو حافظهااا . بس سمعنيهااا ..
بندر تضايق _ لا السموحه يا بو حور . اسمحلي ما أقدر هالحين
محمد_ ليش ما تقدر تقولها ألحين ؟
بندر_ شنو تحقيق هوو ؟!
محمد _ شفيك بندر عصبت جذي ماله داعي هالتعصيبه !
بندر _ اسف يامحمد ماقصد جذي بس خلاص ابيات خاصه ماله داعي أقولهااا
محمد _ زين انتي سمعتنيها برضاك
بندر_ هذاك أول و ألحين غير و أقطع هالسيره
محمد مافهم بندر . شفيه عصب عشان شعر . لاحول و لا قوة إلا بالله .
أنتبه محمد للصيده _ بندر ألحق عليهاا لاطير منك
و صوب بندر رصاصته عليهااا و أصاب الهدف . ولا يشوفون جيب متجه لمخيمهم .
محمد _ هذا شكله بو احمد
بندر و ينزل البندقية _ ايه هووو

سيارة بو أحمد
بس ابو أحمد وام أحمد و نوف أما أحمد و زوجته ماقدروا يحضرون و نواف و زوجته مسافرين أمس برا الكويت يتعالجون
بو أحمد_ ما وصيج يام أحمد بيضي الوجه انتي و بنتج مابي مشاكل سامعين ؟!
أم أحمد_ هاذي بنتك موجوده كلمهااا انا والله تعبت معاهااا
نوف و لابسه عباية مخصره تحتاج تلبس فوقهاا عباية و حاطه مكياج صارخ _ أبشر يبا ..
بو أحمد _ ابعدي والله هاذي البنت الزينة .
ام أحمد _ هذاك بندر ؟!!
بو أحمد _ ايه ما شاء الله عليه رجال طلع من رجال ..
ام أحمد _ أنا أشهد يا جاسر ..

قربوا من مكان بندر و محمد . و نزل بو أحمد يسلم .. و نوف قاعده بالسيارة و عيونهاا تلاقط ..
بندر _ يا حي الله من جانا .
بوأحمد_ الله يحيك يا بو عذبي
بندر ويحب راس خاله .
بوأحمد_ شخباركم و شعلومكم و شلون الجووو وانابوك ؟
بندر_ الحمدلله الكل تمام وعافية و الجو يسأل عنكم ..
بو أحمد _و انت يامحمد شخبارك ؟
محمد _ الحمدلله نزقح ..
بو أحمد _ دووم يا بو حور
بو أحمد و يأشر على الخيمة السودا و ديزاينهااا سدووو ._ هذيك خيمه الرياجيل .؟
بندر _ ايه . حيااااك يا خال ..

حرك بو أحمد لخيمة الرياجيل .و نزلت ام احمد و نووف . لخيمه الحريم

: خيمه الحريم :

دشن الخيمه ام أحمد _ السلام عليكم و رحمة الله و بركاته .
الكل قام لهاا و رد السلام عليها يحبونها من طيبها و حسن خلقها أمرأة مثقفه وواعية .
لكنهاا فشلت في تربية بنتهااا . نسأل الله المستعان .
نوف إلي يشوفها يحسب انها غلطانه أو مضيعه . شكلها ما يناسب مكان البر . و ريحه العطر فايحه
سلمت على الكل و عند سلامها لجنان همست لها _ صج إلي سمعناه يا جنان ؟
جنان سوت نفسها مو فاهمة _ شنو سمعتي اسمحيلي ما فهمت عليج !
نوف و بحرقه _ ملجتج على بندر ولد عمتي .
جنان _ إيه صج إلي سمعتيه
وحاولت تبتعد عنهاا ما تبي تقعد معاها أكثر عشان لا تفقد أعصابهااا لأن نوف حريفه في أستفزاز الناس .
نوف و صاكه اسنانها _ ووين رايحه قعدي بسولف معاج ؟
جنان أرتبكت ماتوقعت انهاا تبيها حبا فيها لااا نوف في راسها شي و ياخوفي منها ..
جنان و تضحك ضحكه صفرا _ ماعليش يا عمري مشغووله . مع السلامه ..
نوف ورافعه حاجبها _ مع السلامه ياااا جنان ..
طلعت جنان من الخيمه بتروح للمطبخ تجهز القهوة و الجاي .
جات عبير لنوف و قعدت جنبها
عبير و تشرب عصير مانجا _ أقول نووف وين حريم اخوانج ما شوفهن ؟
نووف _ أمم مادري عنهم ..
جوا ما جوا مو هاميني ..
عبير بقلبها _ هذا أولهاااا ..
عبير بتقهرها _ حسافه والله لهم وحشه ما تتصورينها يا نوف
نوف بتعالي _ إلا تعالي انتي ليش ما قلتيلي عن ملجة أخووج ؟!
عبير و تحرك راسها يمين و يسار _ ليش شصاير عشان أعلم الي يسوى ولي ما يسوى ؟
نوف بعصبية _ شقصدج انا ما سوى ؟
عبير _ اوووف اللهم طولك ياروووح انا قلت انج ما تسوين شي ؟
نوف _ وكلامج شلون يتفسر!!
عبير _ تراج لوعتي جبدي خو تحقيق هوو رجال و ملج شفيها قالبينها ليش ماقلتوا وليش مادري شنو ؟
نوف القهر واضح بصوتها _ شمعنى جنان من زينهااا جيكرة ما تنبلع شزودها عني ها شزودها عني ؟!
عبير متفاجأة من تسلط بنت خالهااا و حقارتهاا و جرأتهاااا _ تبين الصراحه يا بنت الخال زودها عنج جمال و أخلاق و نفس و لسان .
سكتت نووف حست انها شوي و بتنفجر .. و راحت عبير لفاطمة و بدور و سارا .
ألتفتت نوف لأمهاا شافتها ماخذه راحتها مع عمتها ام بندر و ام محمد. قامت بتروح لجنان بالمطبخ للحين النار شابه بصدرها ما خمدت ..

: جنان :

اللهم أكفنيهم بما شئت قلته بعد ما شفت نظرة من نوف ما دري شنو أفسرها لكنها نظرة حسد و حقد . مسكينه يا نوف علبالها بندر هو الي فضلني من بين كل بنات الكويت .. بغيت أهز راسها و أقولهاا بندر رافضني ما يبيني زوجه له . أصحي عن هالحسد وألحقي على عمرج .. طلعت أحس اني مخنوقه لو قاعدة بالبيت ابرك لي من مقابله وجيهه حسوده
شفت قدامي أخوي محمد متجه لخيمتهم و يقول لي _ فديت الي بيسون قهوة لنا . قلت له و انا ابتسم له _ فديت روحك يالغالي ..
و راح هو وهو يطلع تلفونه من بنطلونه البيج ..و انا داخله المطبخ الكيربي و الإبتسامه شاقه الحلج أحب أخوي محمد و متعلقه فيه بدرجه ما تتصوروها . شفت بندر واقف قدامي و الجاي عالنار .
تيبست بمكاني و إبتسامتي أذبلت و هو ولا عليه يطالع فالنار و يرفع عينه صوبي .. صراحه شكله يجنن .. لابس جنز اسود و تي شيرت عنابي و مسوي الحمدانية ..
بندر _ وين عباتج و نقابج ؟ ما تدرين ان في رياجيل محرمه عليج !
قلبي بغى يطلع من مكانه . مارديت عليه بالأساس لساني انخرس فغضيت بصري و طلعت بسرعه و استوعبت شنو صار لي . والحبيب ولا عليه قعد يطالع و لا بعد يتحكم من ألحين . إن شاء الله محمد يتفاهم مع ابوي بموضوعي مع بندر ..اوف نقعني نص دقيقه برا و انا شكلي يضحك منخشه ورى سيارته الي حاطه عند المطبخ و الحمام " اكرمكم الله "
واخيرا طلع بس شكله يكسر الخاطر . شلون شايل الصينية .. و قعد يتلفت يمين يسار مادري شيبي يشوف بعد . مشيت بسرعه عشان ما يشوفني . دخلت المطبخ و قعدت اسوي القهوة ..
وقعدت أغني هالأبيات للشاعر محسن الهزاني شاعر الغزل الأول .

ألف وليف الروح قبل أمس زرناه .
غرو يسلي عن جميع المعاني ¤
البا بقلبي شيد القصر مبناه .
وأدعى مباني غيرهم مرمهاني ¤
التا تراني كل ما أوحيت طرياه .
أفز لو حلو الكرى قد غشاني ¤
و الجيم جيته ما تردى لمن جاه .
ريم الشمال في الرياض مرباه ¤

بندر بصوت هامس _ صح لسانج ..
جنان و عيونهاا بغت تطلع_ بسم الله ..
بندر _ عطيني قفشه نسيت لا أخذهااا
جنان عطته الغرض و قبل لا يطلع قال _ آخر مرة أشوفج مو لا بسه عبايتج و نقابج أوكي ؟
شافهاا ساكته قال بصوت أعلى _ سمعتيني ولا أعيد ؟!
جنان بصوت واطي _ سمعت .
طلع و جنان تلفتت حوليهااا تشوف في أحد موجود ..

: بندر :
قعدت انا و محمد بالمطبخ اسوي الجاي لنا . ضاق خلق محمد من القعدة بالمطبخ فطلع .. بدقيقه من الزمن ولا ملاك داخل علي . سبحان من صورهاا و خلقهااا لكن ما بقلبي شي تجاهها . لبسهاا كان ملفت أقهرتني لو جاسم كان بمكاني جان شافهااا . لابسه برمودا بيبي و بدي ماسك عليهاا لونه
فضي .. و شعرها الناعم طاير بالهوااا . و كانت تبتسم مادري ليش ؟ شكلها كان أحد معاها و ضحكهاا . تذكرت هالأبيات .

// برق (ن) تلالا بأمر عز الجلالا ** واثره جبين صويحبي و احسبه برق //

شفت وجهها أنصبغ أحمر و عيونهااا بغت تطلع .
نبهتهاا تلبس عبايه إذا اطلعت برى خيمة الحريم . و بعدها شردت بسرعه برى المطبخ . و نطرت لي خلص الجاي فحظرت البيالات و السكر . لكني أحس اني ناسي شغله بس مادري شني ياربي فطلعت بروح لخيمتنااا قعدت اتلفت يمكن أشوفها لا يكون الخبلة رايحه للخيمة تسويها مو رفيجة عبير خلاص كل شي جايز !
و عند وصولي للخيمة تذكرت القفشه ( الملعقه ) طقيت يدي على راسي _ آخ القفشه نسيتهاا
و رديت على دربي للمطبخ و لا جنان قاعدة تغني ماشاء الله صوتهاا حلوو وذوقها راقي . مره وحده محسن الهزاني خطيره الصراحه بنت عمي . قعدت اتسمع لها لي تخلص خلاص هي ألحين زوجتي بعد ماخلصت قلت خل أحرجهاا شويه _ صح لسانج و ذكرتها بالعباية . حسيت انها ودها تمسك رقبتي و تخنقني أعرف البنات ما يحبن الأوامر .. وخاصه باللبس بس شنسوي لاصار عقولهن صغيره ..
طلبت تعطيني القفشه و عطتنيها
و رحت للخيمة ..

خيمه الحريم
بدور _ سبحان الله مادشت قلبي أحس انهااا عقرب رمل
فاطمة_ الله يهديهاا يا بدور مانبي ناكل لحمهاا من كثر حسناتنا يوم نحش فيهااا .
بدور انحرجت _ استغفر الله مو قصدي جذي بس ورى هالبنت شي ؟! عندي أحساس .
فاطمة _ مالقت من يربيها عدل أمهاا إنسانة ناجحه في علاقاتها الإجتماعية و معلمة قديره و لها جهود جبارة بس فشلت في تربية نوف . سبحان الله يطلع من الورد شوك .. الله يهديهاا و يصلحهاااا
بدور _ اجمعيييين يا فاطمة والله انج تريحين الواحد . و صدرج وسيع . و القعده معاج ما تنمل .. مووو هاذي ( تأشر على عبير و هي جاية بتقعد معاهن )
عبير اطالع في نفسها_ شفيني ؟!
فاطمه تبتسم _ تمدحج
عبير و تعطي بدور نظرة _ طالعي في عيني
طالعت بدور فعين عبير و كاتمة الضحكة ..
عبير تعرف بدور إذا جذبت تكتم الضحكه . عبير _ أقووول يلى عااااد شكنتي تقولين ؟!
بدور _ أقول بتغيرين صبغتج بعرس أخوج ؟
عبير ومشت عليها الجذبه _ والله محتاره ودي بالصبغه الثلجية و ودي أخليه مثل ما هو بس بقصه قصه حليمه ..
فاطمة _ حلوو
بدور وتقوم _ أوكي انا بشووف عيالي وين راحوا

في المطبخ

نوف ادخلت على جنان و هي تحط الهيل و المسمار في المطارة ..
نوف بقرف _ أمبيييه شلون مستحمله القعده هنييييه
جنان بخرعه _ يمااااااااااه من وين طلعتي
نوف بحقد _ من الباب طبعا ..
جنان ماحددوا عرسج ؟!
جنان بقلبهااا _ أهوووو شكلنا ماراح نطلع من المطبخ إلا على المستشفى على طووول _ بعد شهرريين .
نووف _ شافج بالملجه ؟
جنان _ لا مو من سلمنا هالأمور هاذي ..
نوف _ ويييي معقدين ...!
جنان بتقهرها _ يا حلات التعقيد إذا كان جذيه .
جنان قعدت ترتب الصينيه و القهوة و بتطلع _ أقول نوووف وانتي للحين ماكو أحد تقدم لج ؟!
نوف _ أنا ماخذ إلا إلي في باااالي و قولي نوف بنت جاسر ما قالت ...
جنان انقبض قلبهااا _ تعالي تقهوي .

.

// الجزء الرابع //

مرت الثلاثه أيام .. على خير بالرغم من تصرفات نوف السيئة إلا ان الطلعة كانت في منتهى الروعه و الوناسه .. و كل واحد أخذ أهله و راح لبيته .

بيت بو محمد :

الساعة السادسه و النص صباحا
جنان _ السلام عليكم .
عبير _ وعليج السلام جنوو .
جنان _ عبور حبيبتي أخذيني معاج لا تنسين أوكي
عبير _ اوكي بس ليش ؟ لا يكون متهاوشه مع أم الخلاجين
جنان بقهر _ و في غيرهاا يبيله تأديب
عبير _ خلاص عشر دقايق ألقاج برى ناطرتني ولا بروح تعرفيني ما أحب اتنقع برى
جنان _ أقول مااالت بس .. طالعه على أخوهااا
عبير _ هييين أن ما خليته يطلع عيونج ماكون عبير
جنان _ أقول يلى يلى بسررعه
و سكرته من عبير . و انزلت تحت شافت ابوهاا و أمهاا و ساراا يتريقوون . حبت راس امها وابوها _ السلام على أحلى أب وأم بالدنيااا
بو محمد و يأشر على الكرسي الي جنبه _ وعليج السلام يا أحلى بنت في الدنياا تعالي حبيبتي
ساراا بغيره _ نحنووو هنااااا
جت جنان جنب أختهااا و همست بإذنهااا و تقلدها _ محترااااااااا
ضحكوا على شكل سارا و هي غيرانه من جنان و قعدوا يكملون ريوقهم .
ام محمد _ جنان عندج أختبارات هالأسبوع ؟!
جنان تتذكر _ لحظه يمه . وطلعت جهازها تشوف التقويم و قالت بنعومه _ لا يالغاليه ما عندي هالأسبوع .
بعدها سكتوا و قامت سارا بسرعه بتلحق عالمدرسه . و حبت راس امها و ابوها قالت _ مع السلامه .
الكل _ مع السلامة ..

ألتفت بو محمد لجنان _ جنان أستعديتي للعرس أقصد جهزتي يمه .
جنان بقلبها _ يعني محمد ما كلمه للحين ...
جنان _ لا يبا ما جهزت .
عصب بومحمد بس عطته زوجته نظرة يعني لا تعصب وأرحم بنتك ..
تماسك بو محمد _ ليش ياجنان ماكفتج الفلوس ؟ انا ماراح أقصر معاج يابنيتي
جنان و العبره خانقتهااا _ يبا أنت عارف رايي بهالزيجه فمالي خلق أروح أجهز !!
بو محمد _ يعني شنوو ؟! مافهمت فهميني يا جنان
جنان _ العذر و السموحه منك يبا . أبيك اطلقني من بندر ..
بو محمد مامسك أعصابه و صرخ صرخه هزت أركان البيت _ جنااااااااااااااااااان .
جنان من الخرعه القفشه طاحت على أرضية السيراميك وطلعت صوت مزعج و أرتجفت جنان من شكل أبوها المعصب ووجهها صفر من الخوف و حست بدموعها بتنزل و طالعت بأمهاا تستنجد بها لكن حكم القوي على الضعيف .. و نزلت أم محمد نظرهاا لتحت .. و قطع هالصمت جهاز جنان .. قامت بتوتر و طلعت لعبير .

أم محمد بحزن _ مو جذي نتفاهم يا بو محمد عالأقل حسس بنتك انها غالية و معززه مو تحسسها كأنها عاله و تبي الفكه منهااا .
بو محمد _ والله انها أغلى بناتي وزود بعد . وانا مطمن يومني مزوجها بندر . و بنتي مكرمه ومعززه في بيت ابوها و بيتهااا . و بتظل معززه يا ام محمد . بس هالي تسويه جنان دلع بنات و بتشوفينها بعد العرس .
ام محمد _ يا رييت يابو محمد . وأشوف السعادة بعيونها و تقر عيوني بشوفة عيالهاا
بو محمد و قايم _ آمين . و قولي لولدج إذا قعد يلحقني بسرعه بروح لبيت بوعوض نسيت لقوله أمس ..
ام محمد _ أبشر .

أركبت جنان سيارة أهل عبير و صوتهاا يهتز . و دموعها الوحده ورى الثانية تنزل .. سلمت و جلست بسكوت .. استغربت عبير هدوء جنان و أهتزاز صوتهاااا فألتزمت الصمت حست انها مو طبيعيه و أحد ضايقهاا مافي غيرها ساروه ماتجوز عن هالحركات السخيفه .. حرك السايق أتجاه الجامعه .. بعدها بخمس دقايق أنفجرت جنان بصوت عالي .. ماقدرت تكتمه ..
عبير أخترعت _ يماااه شفيج جنان تبجين .. ؟!
جنان ولا أكن أحد يكلمهاا . .
عبير و تهز كتف جنان _ تكلمي شفيج .. ماترديييين .؟!
جنان و تمسح كحلها مع دموعها_ مافيني شي ؟
عبير بعصبية _ لااا فيج شي كل هالدموع وماكو شي ؟ تضحكين على منوو ؟ أنا عبير مو سارا !!
جنان و توخر يد عبير عنهاا _ قلتلج مافيني شي .
عبير بشك و حاسه ان في شي بينهم _ بندر له شي بالموضوع ؟
تفاجأت جنان بعبير و طالعتها ثواني وكانت عيونها حمر ..
ماردت عليها جنان شتقول لأخته ..
عبير بثقه _ متى ما بغيتي تكلمين عن الي يدور في نفسج و كاتمته عني تلاقيني الصدر الرحب مهما يكون بندر مثل ما هو أخوي فأنتي بنت عمي بعد .
وأفتحت الباب بعد ما وقف السايق قدام الجامعه .. ونزلت و هي متضايقه ليش ما افتحت جنان قلبهاا لهاا ياما أسرار قلناها لبعض و حفظناها بس ليش هالشي بالذات جنان ماتبي تقوله ..
ألحقتهاا جنان و هي حاسه بصداع رهيب بعد البجي الي بجته ..

قعد محمد من النوم و هو ناوي يكلم أبوه بموضوع جنان .. و نزل مع زوجته بدور ..
شافوا أم محمد قاعدة بروحها تفرج على قناة المجد ..
محمد و بدور _ السلام عليكم .
و حبوا راسهاا .
أم محمد _ وعليكم السلام .
قامت بدور تكلم الخدامة تجيب لهم ريوق ..
محمد يتلفت _ وين أبوي ؟؟!
أم محمد _ أيه ذكرتي أبوك يقول ألحقه هو ببيت بو عوض عازمه عالقهوه . أخبر ياوليدي ان الصبح جاي الضحى للحريم ما دريت ان الرياجيل لهم قهوة الضحى ..
ضحك محمد بصوت عالي و سحب يد امه و حبهااا قعد جنبها _ فديت الي ينكتون .. بس يما عاد مانوصل مواصيلكم بهالحش و النميمه ..
عصبت امه _ وخر عني انا أحش وأنم يا قليل الحياا و قدامي تقولها ..
محمد حب راسها _ محشومه يالغالية و انا ما قلت انتي يمه انا أقصد الحريم ..
ام محمد و تحط يدها على راسها _ وانا شنوو مو حرمه .
محمد مات من الضحك و مسك بطنه الضحك آلمه _ أقصد بعض الحريم وانتي حرمه مافيها أختلاف هاذي ..

جت بدور و حطت الخدامه الريوق و قعدوا يتريقون وام محمد قعدت تشوف إعاده برنامج الجواب الكافي مع العلامة الشيخ صالح اللحيدان ..

:: بيت بو أحمد ::

نوف و هي بتطلع من البيت الساعه 10ولا قدامها أخوها الكبير أحمد ..
أحمد مستغرب _ شنو مو مداومه لدوامج ؟
نوف بإرتباك _ ايه تعبانه
احمد و يطالعها من فوق لتحت _ شهاللبس ماسترتي شي يا نوف . !! وين عالله طالعه وانتي تعبانه
نوف و عيونه متشتته مره على أخوها و مره عالباب . _ رر رايحه للطبيب .
أحمد بعصبية_ للطبيب و لبسج جذي . !
نوف حاسه الأرض تدور حولينها _ تت تبيني أأأروح أغير لبسي ..
أحمد بصراخ _ أذلفي عن وجهي يا .. أعوذ بالله و أخذي معاج الخدامه و قسمن بالله يا نوف أنشفتج معتبه درجه هالباب باللبس هذا لأحشي رجولج حش فاهمه ؟
نوف من الخرعه أركضت للدرج بتروح لغرفتها ..
و دقت على عهود _
عهووود انا هونت .
عهود متفاجأه _ لييش ؟
نوف وتلتفت لبابها_ أحمدوه الله ياخذه طاح علي و هاوشني على لبسي قلت بروح لطبيب و صرخ صرخه زين عقلي موجود للحين جان ما نجنيت حسبي الله عليهم من أخوان منكدين بعيشتي !!
عهود _ الحمدلله لاعندي أحد يتأمر علي لا اخو ولا أخت .
نوف _ بعد أمج وابوج مطلقين وكلهم ما يدرون عنج جت عالأخو ..أووووف ضايق خلفي ياعهود .
عهود بتقهرها _ حسافه طافج قاعدة أشوف بنات الكلية مهربين و جايين لهالمجمع ؟
نوف بحسرة _ مالت عليهم .
أوكي حبيبتي انا بنااااااام
عهود _ نوم العوافي .

في الشركة
كان بندر شايل الشغل على راسه لا أبوه ولا عمه و لا محمد مداومين فالحمل كله على ظهره و حيله منهد ..
طلب من السكرتير يجيب كل صفقات الشركه عنده بالمكتب . قعد على الكرسي و يدينه حاطهم تحت راسه يفكر فعرسه ما باقي له غير شهرين ألا و هو ولا كأنه معرس شعور عادي يحسه تجاه تاريخ ليله العمر ضحك بإستهزاء من كلمه ليله العمر . تمناها مع حبه الهنوف بنت جيرانه بس سبحان الله الرزق ما يندرابه لمين ولوين يرووح . قعد يلوم نفسه ليتني كلمت أبوي و أصريت عليه و سويت كل شي بس أخذ هالهنووف .. طق السكرتير باب مكتب بندر و أعتدل بندر بقعدته . و بصوت شوي عالي _ أدخـــــــــــــــــــــل ..
دخل السكرتير و حط هالصفقات على مكتب بندر ..
و قال _ تامر على شي ثاني .
بندر _ لا . و سكر الباب وراك وما أبي أشوف أحد فاهم .
السكرتير _ أبشر استاذ بندر .
و سكر الباب و غاص بندر بالصفقات . و قعد يشوفهااا ..

بو محمد و بو بندر يعتمدون حيل ببندر و محمد .لأن خبرتهم بالتجارة ممتازة و طبقوا المثل الي يقول " هذا الشبل من ذاك الأسد "

عالغــــــــــــــداء ...

سارا _ يبا تبي أحطلك مرق ..
بو محمد _ حطي ياأمي ..
و حطت لأمها و أخوها و بدور ..
محمد _ يما جنان كل محاضراتها ماتخلص إلا قبل العصر بربع ساعه ؟
ام محمد _ ايه يا محمد ماتطلع إلا قبل صلاة العصر بربع ساعة ..
بو محمد _ الله يوفقهااا .. و نزل القفشه وقام ..
وقال _ كثر الله خيركم ..
الكل _ عـــــــافيـــــــة ..
محمد و قام بعده على طول _ لحظه يبا أبيك بشغله ..
سارا واللقافه اشتغلت عندها_ شيبي من ابووووي !
ام محمد _ وانتي شكو اتركي عنج اللقافه .. والله بتعيشين براحه . أخذيها مني ..
بدور تشمت_ يادافع البلاااااااا
سارا _ أقول الخبر اليوم بفلوس باجر ببلاااااش ..

دخلوا غرفه المكتب و سكر محمد الباب عليهم ..والتوتر كاسيه من راسه لأخمص قدمه
بو محمد و يجلس على الصوفاا
_ شبغيت يا محمد . ؟
محمد ووجهه يعرق ._ يبا تعرف انا ما نرضى بدمعه تنزل على خد بنت من بناتك . و راسنا يشم الهوااا صح يبا ..
بو محمد بسرعه _ يخسى واحد ينزل دمعه من بناتي وهالكور يشم الهوا .
محمد سكت ثواني و نظره على رجله و رفعهاا بوجه أبوه ..
وتكلم بصوت رخيم _ طلــــق جنان من بنـــــــدر ..
بو محمد انصدم من طلب ولده .. وقال بصوت مرتفع _ محمد ..
محمد _ سم ..
بو محمد _ شفت شي مو طيب على بندر ؟!
محمد _ لا
بو محمد _ بندر مووو محافظ على صلاته ؟
محمد استغرب من هالأسئله _ لا ... بالله انه محافظ وكل صلواته بالمسجد ..
بو محمد _ أخلاقه فيها شك ؟
محمد _ لااا
بو محمد عصب _ أجل اطلع برى ياولد أمك .
محمد جا بيتكلم بس ابوه عصب و صرخ _ قلتلك أطلع بـــــــــــــــــــــرى ..
جا محمد لأبوه بسرعه و حب يده و راسه ..
محمد بإنكسار لأبوه _ انا آسف يبا و سامحني ما قصدت أفرض راي على رايك و لا بمشي كلمتني على كلمتك .. بس يبا جنان تغيرت مو مثل قبل ماتلاحظها يبا .. ؟ وين جنان ام المقالب ؟ وين ضحكاتها الي تملى البيت ؟ يبا احنا قاعدين نذبح روح جنان بهالزيجه .. مانبي نغصبها على شي بعدين إذا ماحصل توفيق بينهن .. تقولنا انتم السبب انتم رميتوني . حتى لو ماقالت بس بتقتلنا بنظراتهاا المكسوره ..
سكت محمد وحب راس ابوه .. بو محمد _ خلصت .
محمد _ ايه يبا
بو محمد _ لو ماهو بندر جان أخذت رايهاا . هذا بندر أعرفه مثل ما أعرفك .. رجال يعتمد عليه .. رجال قادر على تحمل المسؤولية .. رجال عنده سعه صدر وسييع .. رجال يكرم ضيفه .. رجال لا دش بالدواوين الكل يقوم له من سمعته الي مثل المسك .. رجال بأهل بيته كريم ..و أنا بعطيه أثمن ما عندي و جنان والله ثم والله وكاني أقوله لك يا محمد بعد أمك جنان أغلى بناتي و عشانها الأغلى حجزتها لبندر .. ولا سوالف البنت لولد عمها ماتمشي معي جان انا زوجتك عبير من زمان أو حجزتها لك بس لاني أعرف بندر بيحافظ على جوهرتي ..
عندك شي ألحين ؟
محمد _ سلامتك يبا ..

طلع محمد من المكتب بيروح يقيل شوي قبل صلاة العصر ..
شاف أمه و بدور و سارا يشربون جاي و يسولفون ومن سكر باب غرفة المكتب و الكل سكت بعد ما شافوا وجه محمد مصفووق . قامت أمه له وأبتسم لهااا محمد يعرف ان هالقلب الحنون مهما كبر ولدها في السن إلا أنه بنظرها صغير .. و قرب منها و حب راسهااا . قالت بهمس له _ شفيك يما وجهك ما يبشر بالخير .؟!
محمد ويطالع ببدور و سارا _ مو ألحين يما انا بقيل و بالعصاري أقولج شسالفة .. تامريني على شي يا الغالية ؟
أم محمد حبت جبهة ولدهاا _ سلامتك يما ..
حب يدها و راسها _ الله يسلمج . وصعد لجناحه ألحقته بدور و هي تقول بقلبهااا _ الله يستررر وجه يخرع لا يكوون بيتزووج علي .. يسويهاا محمد .

دخلت عليه بغرفة النوم بس كان موجود بحمامهم الخاص ' أكرمكم الله '
و قعدت على السرير تنطره يطلع و اطقطق أصابعهاااا . طلع محمد و يمسح وجهه بالمنشفه .. و ضحك بوجهه زوجته .. شافها معقده حواجبها و أطالعه . .
محمد يبتسم _ حبي ليش هالتعقيدات ؟
بدور بقهر _ قولي من آخرتهاااا
شسمهااا ؟ لا يكون نوف
محمد ما فهم _ هاااا
بدور و تهز أرجولها _ من قال ها سمع يا محمد ..
وراحت له ._ يا قسى قلبك يا محمد شلون تجيب لعمور و عثوم و عواشه مرة أبوو اتصبحهم بطراق و تمسيهم بطراق شلوون سمح لك قلبك ؟

أستوعب محمد و طلعت من عنده ابتسامه _ شكوو نوف بنت جاسر بالسالفه ؟
بدور عصبت _ زين ليش ضحكت ؟ هااا
بحركه طفوليه من محمد بسرعه حط يده على فمه _ خلاص ممم جذي تبين ما راح أضحك ..
بدور و ادور حولينه و بصوت هامس ( حرام جذبت الجذبه و صدقتها ) _ محمد انا قصرت فحقك .. قولي عالأقل أصلح أخطائي و أتفداها مو تحط علي نسرررة ..
مسك يدهااا و قال _ والله مافي مره توصلج بس انتي الله يهداج فكرج راح بعيد .. والسالفه تخص ناس .. والله يوفق هالناس لأنهم يستاهلون كل خير ..
بدور بشك _ والله
محمد يبتسم _ والله
طقت صدره بخفه _ أشوى على بالي ...
محمد حب يطينهاا _ وإذا إذا طقت في راسي بخليج أنتي تدورين لي .. الأقربون أولى بالمعروف ..
بدور بصرخه قهر _ محماااااااااااااااد
ركض محمد لفراشه بينام قبل لا تاكله .. و دخل الفراش و طلع راسه لهااا وقال _ أحبج لا عصبتي .. ويلى طفي النور و اطلعي برى ..
بدور _ عنااااد بقعد عندك و الليت ماراح يتطفى ..
محمد بتعب _ والله تعبان بدوره..
ارحمته و طفت الليت و طلعت ..و طيف ابتسامه بفمهااااا ..

@@@ الجامعه @@@

عبير و جنان في الكافتيريا يتغدون ..
عبير _ بتروحين معاي ولا بتروحين مع سواقكم ؟!
جنان _ شكلي ثقيلة و غثيثه اليوم معاج .. لا برووح مع دريولناااا .
عبير حبت تقهرها _ وفرتي علينا ..
جنان طقت راس عبير بجنطتهااا
_ صج ما تستحييين !! مالوومج أخت أخوج ماعندكم ذرة من الذووق ..
عبير معصبه _ أحنا ماعندنااا ذووق !
جنان طلعت لسانهاا لعبير _ مالت بس ..
عبير و بتحرج جنان دقت على بندر . سكتت جنان عبالهاا بدق على سواقهم .. بعد ثواني ولا عبير تكلم ..
عبير و وأطالع بجنان _ السلام عليك شلونك ؟
بندر شاف أخته تدق عليه و هو توه داش غرفته بيريح من الإرهاق والتعب الي أهلكه في الشركة ..
رد عليهاا _ وعليج السلام . انا أزقح ..
عبير _ دووم يا خوي . وينك ألحين . ؟
رفعت جنان حواجبهااا يعني الخبلة داقه على يا بندر يا جاسم .
بندر و متمدد على السرير و يحك ذقنه ماله خلق لسوالف أخته الي ما تخلص .
بندر _ والله انا ألحين متمدد عالسرير ابنااام تعبان حدي .
عبير و تمثل الصدمه _ بعيد الشر عنك . جعلهاا فعدوينك إن شاء الله ..
قهقه بندر من خبال أخته .. وقال _ يابنت مافيني إلا العافية بس ارهاق و تعب خفيف من الشغل .. انتي للحين بالجامعه؟
عبير _ ايه يابو عذبي كنت أبيك تاخذنا بس مدام انك تعبان خلاص أنروح مع السايق ..
جنان وجهها أحترق من الحرارة و دقات قلبها سريعه ..
و نزلت نظرهاا لأكلهااا . ماتبي بنت عمها تلاحظ ..

استغرب بندر من كلمة " تاخذنا " و قال _ ليش منو معاج ؟
عبير_ في غيرهااا لزقه عنزروت بنت عمك جنان .!
جنان بشهقة عالية و قالت _ أيا بنت الذيناااا
عبير و معاها بطل ماي _ قولي الذين آمنوااا قولي آمنوا لا أكت عليج الماي !
جنان أخترعت من عبير و استحت من ولد عمها أكيد سمعها .. قالت _ الذين آمنوا أرتحتي ألحين ..
عبير _ ايه جذي . ما تمشين إلا بالماي ..

سمع بندر شهقه جنان و هوشتهن مع بعض و قال لعبير _ أقول عبير انا مو ناقص عوار راس . و قولي لجنان لا تشاهق مو زين بالنسبه للصحه أوكي .. يلى مع السلااااااامه
عبير تفشلت من أخوها حتى ماقال سلميلي على جنان خلاص البنت زوجته بالثبوتات المفروض يسأل عنهاا_ إن شاء الله و الله يسلمك ..

جنان بقهر _انتي سخيييييفه و تاااافه يا عبير ..
عبير _ وويييي ليش شمسويه ؟
جنان _ داقه عليه عشان ياخذنا اصلا لو جا ماارضى أركب معاه . .
بعدها تذكرت و قالت بخوف _ زين هو شخباره شفيه تعبان شنو صاير له عسى ما شر ؟
عبير_ بل عليج شوي شوي لهالدرجه خايفه عليه ماعليج منه يزقح الحبيب .. مثل الحصان لا تخافين عليه ..
انحرجت جنان من تسرعهااا و قالت بهمس _ بعيد الشر عنه
حبت عبير تحرجها زيادة _ شقاعدة تقوولين .
وطقت جبهتهاااا _ يؤيؤيؤ نسيت .. حبيب الروح يسلم عليج ( تجذب عليها ) و يقول قولي لجنان لا تشاهق مو زين لهاا بعد من ألحين خايف عليج شعلييج يا معوووده
جنان واللون الأحمر صابغ وجهها _ الله يسلمه .
و ترفع يدها للسما _ و يرزقج يا عبير بالرجال إلي يحسن معاشرته لج و يكرمج و ترتاحين معاه ..
عبير بدفاشه _ بس هذا الي طلع منج !!
جنان بصدمه _ امبييييه زين شتبين عشان ادعيلج ..
عبير و اطالع فالسما _ ابي راكب حصان أبيض و شعره طويل شوي و اسمراني و طويل و مفتول العضلات و و و بعد شنوو شنوو ؟
جنان وصلت عندها وقامت بتطلع من الكافتيريا _ الحمدلله عالعقل ترى العقل نعمة ..أحمدي ربج عليهاا في ناس مجانين و محرومين من هالنعمة فأحمدي الخالق عليهاا و قومي يلى ريحه الكافتيريا خانقتي و جبدي لايعه ..
عبير و تشرب عصير المانجا _ لحظه بس شربه ..
جنان _ حسبي الله عليج جم عصير شاربه حشى ألي يشوفج يقول عندكم مجاعه في بيتكم .
شرقت عبير بالعصير _ كح كح كح كح كح .. قل أعوذ برب الفلق من شر ما خلق و من شر غاسق إذا وقب و من شر النفاثات في العقد و من شر حاسد إذا حسد ..
جنان ابتسم لبنت عمهااا و قالت _ أحبببببببببج
عبير _ وفري هالكم الهائل من الحب لزوجج . انا مو محتاجه له ..
جنان و تاخذ كتبها من عند الطاولة ماتبي تبين لهفتها لبندر_ اوف شهالبندر الي ذبحتيني فيه ..
عبير بتحرها _ بندر مافي أحد يوصل مثله . رجال شهم شاعر جميل ناجح في شغله حنون حبيب مرهف الأحساس وذو الأحساس بكبره ..
جنان تقاطعهاا _ بس بس وصلتيه للسما ...و آخرتها .. سكتت جنان
عبير _ شفيج سكتي ؟!
جنان تتهرب من نظرات عبير المتفحصه لملامحهاا _ مافي شي بس مو شكل السايق تأخر عليناااا ؟!
عبير تأكدت ان بجي جنان بندر له دخل فيه . بس طوفتهااا على جنان مردها بتعلمهاااا ..
عبير و تخصرت_ مو جنج بتروحين معاي !
جنان وتقلدها و تخصر _ ايه و غصب بعد عندج مانع ؟
عبير _ أكيد ماعندي مانع إذا الأرض ما شالتج عيووني أقصد عيون بندر تشيلج ..
جنان طقتها عالخفيف بكتفهااا عبير _ آي عورتيني وانا صاجه إلا عيوني أبيهم...
بعدها بثانيتين ولا السايق داق على عبير عشان تطلع .. و طلعوا بسلام من الجامعة ..