منتديات قصايد ليل - عرض مشاركة واحدة - خلاص ~أرجوك لوتسمح تراك بدنيتي منفي ... الكاتبه ::: العين غرآمي

10-17-2011

أم فلاح وام غيث وام هزاع يدخلن وهن يزغرطن : كلووووووولووووووش ...

الريم تفاجءت تمت تطالعهم وفاجت عيونها هب مستوعيه شي.. اليوم الريم محد يرمسها موول !!

اسوم يت وتلوي ع الريم وصاحت .. لان اسوم الوحيده لي كانت تعيش ويا الريم فرحها وحزنها !!

هادف كان وايد مستانس والشباب كلهم بعد !! ولو ان الملجه غريبه !! هههه بس المهم ان الكل مستانس !!

عربانا ملجوو وخلصوو !!

الشباب يسلموون ع هادف ويباركوله ...

هزاع : مبروووك يا هادف..
هادف: الله يبارك فحياتك ياخوي.. عمريه مابنسالك هالموقف..
هزاع مبتسم : افا عليك بس نحن خواان .. لا تخليني اسدحك احين واخيس كندورتك صح يالمعرس ههههههه
هادف توه انتبه يطالع كندورته وشكله : ههههههههههههههههههه أحلى معرس وربي..

فلاح : هههههههه أقول يالمعرس يلا إدخل سلم ع الحرمه .. ولبسها الدبله ..
حمدان : هههههههههه وين جيه ؟؟

هادف: أغبر أقشر وين ادش ههههه لالا مابدش..

غيث: ههههههه عيل هاي سواه تسويها .. والله بتدش جذا..

الشباب ناقعيين ضحك ههههههههههههههههههههههه

الريم نزلت وكانت وايد حلوه .. قالولها ان هادف بيدخل ..

وقبل لايدخل اسوم راحت يوونه بتباركله .. أول ما شافته : ووووووووووووووووووووككك

هادف : ههههههههه لا تضحكين ..كله من اخوج حلف عليه ما أبدل ههه ..
اسوم : دخيلك هادف بييب الكيمره ..وبخبر الريم عسب ما تنصدم ..هههه..
هادف: ههههههه غربلاتج ..اوك..

اسوم راحت وخبرت الريم .. والريم نقعت ضحك .. شوي إلا المعرس داخل ..
الحريم تمن يطالعنه ومستغربات .. طبعن بس حريم العايله ام غيث وام عليا وام هزاع والبنات .. هههه وهن عارفات السالفه ..

الريم أول ما طالعت هادف وهو داش يتها ضحكه وما قدرت تخشها جان تحط يدينها ع ثمها .. هادف يقترب !! أول ما اقترب هادف !! الريم حست بخوف !! يلستت تتذكر كل المواقف اللي صارت امبينهم !! الريم كانت مستانسه انه استوت حرمة الريال لي حبته !! ولكن فداخلها حاسه بألم كبير !! وجرح غاير ما تعرف وين بيوصلها !! الريم ماتعرف هي كيف وافقت ع هادف !! اول ما اقترب منها حست بألم .. ماتبا تطالع عيونه .. ما تباه يقترب منها !!

وهادف نفس الشي!! يقترب وكل ما يقترب يتذكر كلمات الريم !! كلماتها اللي لي احين تتردد فخاطره !! أحبه أحبه !! صوتها وهي تصيح !! هادف انت تشك فيني ؟ الكف لي انطبع ع خده !! يتذكر كل شي وهو ساير صوبها !! حاس بألم أكبر !! يمشي وبعيونه نظرة حب !! تتخللها جراح وآلام سنين !!

هادف سلم ع الريم من بعيد !! ماقدر يبوسها ع راسها .. ولا حتى يمد يدينه ويسلم !! والريم نفس الشي هب قادره !!

الكل مستانس !! ولحدن داري بعذاب هالقلبين وبنفس الوقت فرحتهم اللي ما بين المد والجزر !!

هادف لبس الريم الدبله وهي بعد لبسته !! وكانت يدينها وايد ترجف والكل لاحظ .. واسوم النذله تصور يدين الريم وهي ترجف بالفيديو .. وتصوور كندوورة هادف من فوق لتحت !! هههه .. وهادف يهددبابيده .. ماعليه ماعليه ههه ...

الملجه انتهت ع خير !! كانت أغرب ملجه تصير فالعايله !! عقب ظهروا المعاريس في الميلس رواحهم ..!

هادف كان يرقب الريم روحه فالميلس.. دخل حمدان ووياه الريم ..

حمدان : ها المعرس شو الهبه ؟ هههه
هادف: ههه عال العال ..
حمدان : انزين هاك حرمتك .. 5 دقايق بالضبط فاهم ..
هادف: ههههه وايد تصدق..
حمدان : اتحرى بعد ههههههههه ..يلا عن اذنكم ..
هادف : اذنك معاك ..

حمدان ظهر .. والريم تمت واقفه مكانها وهادف يالس فمكانه ما تحرك!!
تمو جيه ساكتين ولا واحد فيهم رمس!!

هادف يبغي يرمسها يبغي يشوفها هب قادر .. فجأه رفع عينه .. وشافها منزله راسها تحت بس كانت وايد حلووه.. هادف اول مره يدقق فملامحها جيه .. ابتسم هادف ويلس يطالعها وهي هب حاسه !!

هادف: اممم بتمين واقفه ؟
الريم تمت ساكته ..ماتعرف شتقول!!
هادف: مبرووك يالريم ..
الريم بالزور ترمس: الله يبارك فحياتك..

هادف استانس وايد سمع صوتها آآخ ..

هادف: اممم يلسي هب حلوه وقفتج جيه ..
الريم : آسفه ..

يلست بس بعيد شوي عنه ..

هادف: اممم خايفه مني شوه ؟

الريم فقط ويهها وتمت ساكته ..الريم ايدها كانت وايد ترجف وهادف لاحظ هالشي !!
وبدون ما يحس حط يدينه ع يدين الريم !! الريم استغربت ع طول صدت صوبه !! ويت عينها بعينه !! استحت ع طول نزلت راسها ! تحاول تسحب يدينها بس هو ميودنها حيل !!

هادف: ليش ترجفين؟

الريم تهز راسها بمعنى ماشي..

هادف تم ساكت وهو حاط يدينه ع يدينها . . والريم بعد ..

الريم : هادف!!
هادف:لبيــــــه !!
الريم : انت لي سويت جيه ؟
هادف : شو سويت ؟
الريم: انت .. انت قلتلي انك تكرهني واليوم !!
هادف فهم : تبيني اخليلج كل شي بارد مبرد ..
الريم :شوقصدك؟
هادف يطالعها بنظرة تحدي: انتي فاهمه شقصد زين ..

الريم سحبت يدينها عن ايد هادف ونشت تبغي تظهر !! ليش جيه يرمسنيه ليش؟؟ آآخ

هادف نش ويود يدينها بقو ولفها صوبه ..
الريم ودمعها فعينها: آآي عورتني .. هدني..

هادف يطالع الريم بعين وهي تبادله النظره نفسها !! نظرة تحدي وكبرياء !! تحاول تخفي فيها دموعها !!

هادف: ابغيج تفهمين شي واحد .. بتندمين !!
الريم : اندم ع شو .. انا شسويت لك شسويت شسويييت قول؟

هادف رص ع يدينها و نزلها بقو ..الريم حست بألم فيدينها.. ماقدرت تتحمل هالالم ..خلاص دمعتها بتنزل يدينها وايد تعورها !!

هادف حس إن رقع يدينها بقوو .. وشاف ملامح الريم انها تألمت !! تلوم ماعرف شيسوي..

الريم ع طول شلت عمرها وظهرت تربع بدون محد يشوفها.. دخلت حجرتها وتمت تصيح من الخاطر !! وايدينها كانت وايد تعورها .. تحس هب قادره تحركها !!

الريم راحت بدلت وهي منقهره وحاسه بألم .. راحت تبغي ترقد بس ما قدرت .. غير حزنها ع تصرف هادف وياها .. يدينها وايد كانت تعورها..

هادف ترخص من فلاح انه يرمس الريم بالتلفون !! هب لانه عيب يرمسها ولكن احتراما لهلها!!

عقبها ظهر عنهم وراح البيت !! آآخ يالريم أخيرا صرتي لي !! لي أنا وبس !! بس ..بس ليش انا هب قادر اواجهها ليش؟؟ آآآخ ..آسف يالريم ع معاملتيه وياج لكن غصبن عني غصبن عني يالريم !!

هادف دخل حجرته .. عقب ما اتسبح وخلص..ظهر حط راسه بيرقد .. ماقدر!!يبغي يعتذر من الريم .. يرمسها..يرضي خاطرها بس كبرياءه منعه عن هالشي.. عق تلفونه ع ينب ورقد!! وهب داري بالريم اللي مارقدت من ألمها !!

بيت بو فلاح

الساعه 10 الكل كان تحت في الصاله .. فلاح وحرمته وحمدان ومنصور وأمهم !! إلا الريم ما نزلت لي أحين !

أم فلاح : وينها الريم لي احين راقده ؟
حمدان : هيه يا اميه شكلها راقده ..
أم فلاح :واعليه عنها شكلها تعبت البارحه .,
فلاح : هيه والله .. عاد يسد اللي صار..الصراحه شي غريب صدق !!
حمدان : هيه والله ..أصلن انا امبوني كنت حاس انه هادف يبغي الريم..
منصور : يالدعله وشعنه مارمست هههه ..
حمدان : لاني ماكنت متأكد ..ويوم ان فلاح سئلهم إذا مرخصينها كلهم رخصوها .. حتى هادف..فما توقعت انه يباها بس ساكت..
فلاح : يلا ..المهم ان شالله ربي يوفجهم..
ام فلاح : آمين يآرب..ربيه يسعدهم ان شالله..

يلسو الاهل سوالف وضحك والريم لي احين ما نزلت ..

أم فلاح : يا عياليه واحد فيكم يسير يشوف الريم لا يكون تعبانه ولا شي...قلبيه يعورنيه ..
عليا: انا بسير عموه ..
ام فلاح :سيري بارك الله فيج ..

عليا راحت وتمت تدق الباب والريم ماتفج .. عليا :الريم ..الريم راقده؟
الريم فجأه رمست: لا عليوه دشي..

عليوه دشت وشافت الريم يالسه ع الشبريه ولاويه ع يدينها..
والسواد حول عيونها من التعب ..

عليوه :بسم الله عليج ريموه شفيج؟
الريم مبتسمه :لا مافيني شي.. بس أرق ماقدرت ارقد ...
عليوه : فديتج .. انزين جان نزلتي تتريقين ..
الريم:لآلا مالي خاطر ..

عليا نشت اونها بتقوم الريم ويودتها من ذراعها : يلا نشي نشي خل عنج الدلع..
الريم تألمت : آآآآآي..

عليا فجت يدين الريم بسرعه تروعت : بلاج ريموه..عورتج؟
الريم : لالا بس يدينيه تعورنيه شوي..
عليا: من شوو ؟
الريم : ماشي جيه بس..!!
عليا: انزين اقول حق فلاح يوديج المستشفى..؟؟
الريم:لالا ما يسوى..شوي وبتخف..
عليا : لالا ماشي ..
الريم : والله ما تقوليله برايها..
عليا: اف منج عنيده .. انزين يلا نزلي تريقي..
الريم: والله مالي خاطر..
عليا : هب كيفج انا سايره اييبلج الريوق..
الريم : لالالالا خلاص انا بنزل..عقب اميه بتحاتي..
عليا: ما تيين الا بالعين الحمره ..يلا جدامي..
الريم: ههههه وياويهج ..
عليا: هههههه تتمنينه ..

الريم وعليا نزلن تحت وكانن يسولفن ويضحكن ..

الريم : صبحكم الله بالخير..
الكل:صبحج الله بالنور والسرور...

الريم سلمت ع امها وخوانها ويلست ..عقب عليوووه طفرتها وراحت تتريق وردت يلست وياهم ..

فجأه الريم يودت يدينها وغمضت عيونها ,, تحس الالم زاد .. !!

عليووه : ريموه زاد عليج؟
الريم : لالا عادي عادي .. آآآآآآآي..

فلاح :الريم شفيج ؟

الريم صاحت ماقدرت تتحمل الالم ..

أم فلاح : واعليه عنج يا بنيتي شو بلاج ؟
عليا: عموه يدينها من الصبح تقول تعورها والله يهديها حلفت عليه ماقولكم يونه بتخف..
فلاح : عليا سيري ييبي سويجي بسرعه..

حمدان : انا سيارتيه مشغله خلاص بوديها..يالله الريم..

عليوه راحت تييب عباة الريم .. وحمدان شلها وراحو المستشفى..

عند هـــــــادف ..

هادف كان توه طالع فوق رايح حجرته .. كان قلبه يعوره ما يعرف ليش.. قال بدق حق الريم .. لالا ما بدقلها خلها جيه .. انا براويج يالريم ..!!

هادف يلس ع اللآب وعقب ماقدر يتحمل... اووف بطرشلها مسج..

طرشلها :

[ مرحبا شحالج الشيخه ؟ ]

هادف تريا شوي وماردت .. قال بيتريا بعد .. تم يتريا ربع ساعه وماردت ,, هادف خلاص ماقدر يتحمل تم يحاتي الريم .. راح ودق ع طول ..هادف يدق ويدق والريم ماترد ..هني ماعرف شيسوي.. حرررج خلآص..

راح صوب اسوم يبغيها تدق لقاها راقده ..وعاها وماطاعت تنش.. ظهر وهو محرررج ..

فج اللآب ويلس عليه يضيع وقت .. وكل شوي يطالع الفون !!

عند الريـــم

الدكتور يفحص الريم ..

الدكتور: يا ريم انتي وقعتي ع ايديكي ولا ضربتيها ع حاجه بقوه ؟
الريم ارتبكت : ها؟؟ لالا ماشي منه ..
الدكتور: متــأكده ؟
الريم : هيه صح وانا طالعه الدري تخرطفت وطحت ع يديني .. بس الضربه هب قويه ..
الدكتور : أيووا .. طيب أنا دي الوقت هلفها ليكي .. لأنوو عندك فدع فمفاصل رسغ ايديكي..
حمدان :آها..الحمدلله يعني هب كسر..
الدكتور : أيوا مش كسر الحمدلله ..

الدكتور لف إيد الريم ووصفلهم الدوا..خذوه وراحو البيت ..

بيت بو فلاح

الريم وفلاح توهم واصلين .. أم فلاح يايه صوبهم ..

ام فلاح : وااعليه عنج يا بنيتي ..شقالولج.؟؟
الريم مبتسمه : فديتج لا تخافين ..قالوا عنديه فدع فيدينيه..
ام فلاح : علنيه فداج ..انتبهي ع عمرج يابنيتي ..
الريم :إن شاء الله إميه ..يلا انا بسير حجرتيه ..
ام فلاح: سيري يا إميه ارتاحي..
فلاح : وانا بعد ساير فوق تامريني ع شي يا اميه ؟
ام فلاح : مايامر عليك عدو ولا ظالم سير ياوليدي..

الريم وفلاح راحوا فوق..الريم أول ما دشت حجرتها عقت عباتها وانسدحت فوق الشبريه .. عقب شافت الفون حذالها ..

اووه انا ماشليته والله ولا يا ع باليه .. الريم شلت الفون وهي طبعا هب متوقعه من هادف انه يطرش ولا يدق..أول ماخذت الفون فجت عيونها منصدمه .. لقت 12 مس كول من هادف .. ومسجات .. تروعت ع طول دقت له تحرت فيه شي..

هادف أول ما شاف الرقم ع طول رد : مرحبا..
الريم : مراحب ..
هادف: انتي وينج .. كم مره دقيت لج .؟؟ مووول ما تحاتين ريل ما تحاتين شي.. بس هامنج الرغيد والسوالف..
الريم تبغي ترمس : هادف أنا !
هادف محرج : انتي شوه .. احين انا من متى ادق .. يعني بتفهميني موول ماسمعتي التلفون يرن ولا شي.. ولا انتي بس جيه ع عنادج بعدج .. فهميني..
الريم : هادف انا كنت فالمستشفى!
هادف منصدم : هآآ ؟
الريم شوي وبتصيح : هادف والله آسفه .. بس يدينيه من امس تعورنيه .. ومارمت ارقد لين ساعتك .. ويوم اني نزلت فجأه تمت تعورنيه وايد ماقدرت اتحمل..ع طول يابولي عباتيه وسرت..والله ما كنت قادره ..آسفه هادف..

هادف ما عرف شيقول .. فديتج يالريم ظلمتج !! هزبتج وماخليت كلمه ماقلتها .. اففف ليش انا جيه .. والله من حبي لج يالريم ما عرفت شو استوالي. ماعرفت !!
آآآخ كله مني .. أنا السبب لويت يدينها البارحه ..وكنت حاس بألمها بس ما اهتميت آآخ

الريم تمت ساكته ترقب هادف يرمس..وهادف ساكت !! يفكر بحاله وحال الريم !!

هادف: سمحيلي الريم ..
الريم خلاص بتصيح بس متعوده ع هادف: لا عادي.

.
هادف حس إنه وايد زودها بس مايقدر مايقدر كل مايذكر انها تحب غيره يزيد قساوه !!

هادف: انزين برايج ببند ..
الريم بحزن : اوك خلاص برايك ..
هادف: فداعة الله..
الريم : الرب حافظ ..

هادف بند عن الريم وهو وايد متلوم .. هب عارف شيسوي ! شوي إلا وحمدان داق له ..

حمدان : مرحبا الساع .
هادف:وبك زووود شحالك؟
حمدان : الحمدلله بخير ونعمه ومن جداك.؟
هادف : والله الحمدلله ما نشكي باس..
حمدان : هادف ترى بنأجل السفر اسبوع !
هادف : ليـش؟
حمدان : فلاح اليوم مرمسني قال أجلو لان فيه اجتماع عشان يرتبون امور الشغل فالشركه ..
هادف: اها.. هيه صح يبالنا.. عشان ما تتلخبط الامور هني وهناك ..
حمدان :هيه .. والجامعه بعدها شهر .. ان شالله بنتم هالاسبوع والاسبوع الياي امرره رايحين ..
هادف: خلاص عيل خير ان شالله ..
حمدان : ان شالله ..يلا هادف ربيه يحفظك ..
هادف: الرب حافظ ..

حمدان بند عن هادف وراح صوب أمه يسولفون ..وخبرها انهم بيأجلون السفر اسبوع ووايد استانست وحليلها .. ماتبغي عيالها يبتعدون عنها..

أم فلاح : يا وليدي.. حلمتك معرس هه ..
حمدان : آآخ لا اتيني ع العوق هههه ..
ام فلاح : واعليه أي عوق؟
حمدان :يعني غيث وفلاح عرسو وهدووف بعد وانا محد صد صوبيه ..
أم فلاح :هههه واعليه عنك .. انت أشر بس وعليه اليوم اخطبلك ..!!
حمدان :هآآ؟؟ صدق امييه؟؟
أم فلاح : هيه نعم .. مووول ما امزح ..امبوونيه ابغيك تعرس ..
حمدان : تعيش امييييه هههه ..
ام فلاح : هههه خلاص عيل هونت ..امبوني بخطبلك ..
حمدان :هههه لالا خلاص..منو بتخطبيلي؟؟

إلا وفلاح نازل : اوووه اوووه غرت من هادف هههه ..
حمدان:ههه جب انت ..
فلاح : والله اميه لو تخطبيله احسن عن الرغيد هناك فلندن ههه ..
ام فلاح : وي دي .. وابويه عليك ثرها هاي سوالفك ..هاا
حمدان : هههه والله يخرط عليج ..
فلاح : وووووويوو هههه ..

ام فلاح : حمدان يا وليدي انا من خاطريه ابغي اخطبلك ..
حمدان مبتسم : علنيه فداج يا اميه ..
ام فلاح : والله هالبنيه فخاطريه .. وامررره لو وافقت عليها اليوم بخطبها لك .
فلاح: ههههههه لالا الوالده حفزانه ..
ام فلاح : هيه نعم ههه ..
حمدان :ومنو فخاطرج يا إميه ..
ام فلاح : أسما بنت سلطان ..بنت عمتك ..
حمدان استانس :والله يا إميه البنيه والنعم فيها مول ماتنعاب..
أم فلاح : يعني شرايك ؟
حمدان : من عقب شورج ماليه شور ..
أم فلاح : واعليه عنك يا وليدي .. في ذمتيه يا أخطبها اليوم ..

حمدان وفلاح فاجين عيونهم : هآآ؟؟
أم فلاح : لا ها ولا شياته .. اليوم بخطبها لك ان شالله ..
حمدان طاير من الوناسه : أميه اميه الملجه ورى باجر انزين ؟
فلاح : حووووه انت بلاك حفزان هههه ..
ام فلاح : ههه ياولديه بعدنا بنرقبهم لي يردون علينا .. وخير الملجه لين اسبوع ..
حمدان : لاآآآآ ..عقب بنسافر.. أشهد اني بستخف ههه ..
ام فلاح :واعليه عنك يالبديوي .. امرره فالك طيب بقولهم ..

حمدان وايد مستانس.. ما توقع كل شي يصير جيه بسرعه ..

أم فلاح دقت حق أم غيث..

أم فلاح : مرحبا الساع ..
أم غيث : يا مرحبا يا مرحبا شحالج يا ام فلاح؟
أم فلاح : بخير ونعمه ربي يعافيج ..ومن صوبج ؟
أم غيث: بخير دامكم بخير ..
ام فلاح : دوم ياربي..يا أم غيث انا داقتلج لحايه ؟
أم غيث: خير يا ام غيث.. عسى ماشر؟؟
ام فلاح : ماشر ان شالله .. بس والله حمدان ولديه يبغي نسبكم طالب ايد بنتج اسما..
أم غيث: والنعم فيه .. وهاي الساعه المباركه ..
أم فلاح : نحن يا ام غيث ان شالله بني نخطب رسمي .. ياغير نرقب رايكم قبل..
أم غيث: والله من صوبيه ترى امرره ماعيبه الريال.. وان شالله بخبر اسما وخوانها وبنرد عليكم ..ونحن اهل يا ام فلاح ..
ام فلاح : ان شالله يا ام غيث..وتراه الولد حفزان .. يبغي يملج قبل السفر ههه وحاشرنيه الملجه عقب يومين من ردكم ..
ام غيث: ههه وحليلك يا حمدان ..
ام فلاح : يلا عيل يا ام غيث.. ونرقبكم نحن ..
ام غيث: ان شالله ..فداعة الله ..
ام فلاح : الرب حافظ ..

أم غيث بندت عن ام فلاح وكانت وايد مستانسه .. الحمدلله الاخبار الحلوه بدت تهل عليهم من عقب اللي كان يصير فالعايله .. صدق ما بعد الحزن إلا الفرج !!

شوي إلأا غيث نازل .. سلم ع امه ويلسو يسولفون ..

أم غيث: غيث يا ولديه ..
غيث: لبيــه ؟
أم غيث: لبيت حاي .. يا ولديه ام فلاح توها مبنده عنيه .. وطالبه القرب منا ..!!
غيث : هآآ؟
أم غيث: هيه نعم ..طالبه ايد ختك اسما لولدها حمدان .. انا روحي استغربت بس هم مستعيلين .. حمدان يبغي يملج قبل السفر!!
غيث مستانس : والله يا اميه حمدان موول ما ينعاب.. وانتي اليوم يلسي ويا اسما وخبريها .. وربيه يكتب لي فيه الخير..

غيث خبر اخووه هادف ووايد استانس.. ع طول دق حق حمدان ..

حمدان : مرحباا ..
هااادف :مرااااحب يالغيوووور ههههه
حمدان : هههههه جب جب..
هادف : تخطب من وراايه هااا ؟
حمدان : هههه اسمحلي نسيت ايي صوبك اقولك تراني بخطب اختك..
هادف: ههههه ويا ويهك ..
حمدان : تعرف شو افكر ؟
هادف بعبط : شو تفكر ؟
حمدان :والله افكر ان لو ختك وافقت بملج هالاسبوع وبنشلهم ويانا لندن ..بيكملون دراسه هناك !
هادف جنه عيبته الفكره : تصدق فكره !! بس والعرس؟؟
حمدان : لحوووووول هههه عاد هاي سالفه ..

هادف: لحظه لحظه .. عادي بنعرس عقب شهر !!
حمدان فاج عيونه : حوووه انت تخبلت ؟
هادف :لا ما تخبلت صدق .. شهر يمديهم يخلصون ..

حمدان : هههههه ثرك ما عرفتهم احين .. يبالهم شهوور ولا سنه عسب يرتبون امور العرس..
هادف: خل عنهن هاللعب .. قبل اليوم خاطبنها باجر زافنها..مانبغيه هالمنكر اونه سنه وشهور ..
حمدان : هههههه أشهد انك فنتك .. لحظه لحظه ..جنا وايد مصدقين عمارنا ..بعدنا بنشاورهم .. واهلك لي احين ماردوا علينا ههه..
هادف: هههههه خلنا ياخي نسابق الزمن .. إن لم تكن ذئبا أكلتك الذئاب هههه .. وان شالله اسما بتوافق..
حمدان : هههههههه اسميك ..يلا انزين لا تخبلني انا ببند احين ..
هادف: اوك يلا سير كمل احلامك وانا بكمل احلاميه ههه ..
حمدان : ههه اوك..
هادف : اونه اوك ..يالدعله انا ارمسك صدق والله . . وبتشوف..
حمدان مبتسم : ان شالله يارب يصير لي فبالنا ..
هادف : آآخ ان شالله .. هههه يلا عيل فداعة الله .
حمدان : فداعة الرب ..