منتديات قصايد ليل - عرض مشاركة واحدة - خلاص ~أرجوك لوتسمح تراك بدنيتي منفي ... الكاتبه ::: العين غرآمي

10-17-2011

جامعة الامارات

اسوم : يالله وين ريموه تأخرت نبغي نخلص البروجكت ..
حور: والله ماعرف .. خل ندقلها ..
اسوم : اوك ويت ..

اسوم تدق حق الريم وكله يعطيها مغلق..

اسوم : شهالحاله لا يكون صارلها شي..
حور: لا ان شالله لا تفاولين عليها..ان شالله ماعليها شر..

شوي إلا ريموه يايه تربع : آسفه تأخرت عليكم ..
أسوم شوي بتصيح : ريموه انتي وينج ؟
حور:يلسنا نحاتيج ..
الريم يالله يالله تتنفس : آسفه .. آسفه والله بس منصور بنجرن عليه التواير. . وتأخرنا..

حور قلبها عورها ..

أسوم : آها.. سلامتكم عيل..
الريم تمت تصيح : الله يسلمكم ..
اسوم وحور تروعن : ريموه بلاج تصيحين ..؟
الريم : ماشي ماشي ..
اسوم : ريموه شو ماشي وانتي تصيحين ..
الريم تمسح دموعها : ماشي بس تروعت ع منصور ..وكنا بندعم .. وخليتكم تحاتون ..
حور تلوي ع الريم : خلاص ريماني حبيبتي ما صار شي..
اسوم : يلا فديتج سرنا..خل عنج ..الحمدلله ماستوى شي..
الريم : فديتكن..يلا سرينا...

البنات سارن يخلصن البروجكتات ماليلهن عسب يسلمونهن ..

الريم : اف اخيرا خلصنا ..
اسوم : هيه والله مابغينا..
حور كانت مضايجه وابتسمت ..

اسوم: غيث احين ياي بترابعنيه ؟
الريم : لا انا قايله حق اخويه اييني ..برايج ..
حور: والله انا من الصبح ادق محد يرد .. برايكن سيرن بدق بعدنيه ..
الريم : لا والله ما ادقين..ترى بيتكم حذال بيتنا تعالي ويايه ..
حور: ريموه .. !!
الريم: خل عنج ريموه .. بتسيرين .. جب ولا كلمه هههه ..
حور: ريموه استحي اركب ويا اخوج ..
الريم: جيه تستحين ترانيه وياكم ..
حور: ماعرف والله ..خلاص اللي تشوفينه..
اسوم:اوك عيل هذا غيث يدق شكله وصل .. تامرونيه ع شي..
الريم وحور : سلامتج ..
اسوم : فداعة الله ..
البنات: الرب حافظ ..

راحت اسوم .. والريم وحور يلسن فالريسيبشن يرقبن منصور اييهن ..
الريم : حواري تجهزتي حق الملجه ؟
حور: امممم يعني..
الريم : ههه شو يعني..باجر الملجه
حور: ماعرف والله ماعرف..
الريم :حواري فيج شي..من يومين وانا احسج موول هب ويانا ومضايجه ..
حور دمعت عينها: ماشي ريموه ..
الريم :حواري بلاج ؟
حور: ريموه انا مابغي هالريال لي خاطبنيه ؟
الريم : ماتبغينه ؟
حور: هيه مابغيه ..
الريم : عيل شعنه توافقين ..
حور: ريموه انا مول مارتحتله .. ولد عمي واعرفه.. عمري مارتحتله ..مغازلجي بالقو .. ويوم اني رفضت أبوويه حرج عليه .. وقالي انتي ما بتيلسين تتنقين فالرياييل ..
الريم : هيه بس انتي ماتبينه .. ليش جيه ..؟
حور تصيح : ماعرف ريموه ابويه امبونه شديد ..ولي حط شي فباله خلاص..
الريم : فديتج حواري لا تضيجين بعمرج ..ان شالله ما بيستوي إلا الخير..

شوي إلا منصور يدق..
الريم : هلا..
منصور:اهلين ..يلا ظهري انا برع ..
الريم .اوك يايين ..

الريم: يلا حواري ظهرنا..ولا تضيجين بعمرج غناتي..
حور مبتسمه : ان شالله ريماني..

الريم ظهرت ووياها حور..

حور ركبت وهي مووول مستحيه : السلام عليكم ..
منصور: وعليكم السلام ورحمة الله ..شحالج ؟
حور: الحمدلله ومن جداك ؟
منصور :الحمدلله بخير ونعمه ..

تمو عربانا طول الدرب ساكتين ومنصور كان يحاول يكابر ويبين انه خلاص نسى البنيه !!!.. عقب خطفوا حور بيتهم وروحوا ..

حور أول ما دخلت البيت لقت ابوها وامها واخوها هزاع ..

بوهزاع : مرحبا مرحبا ببنيتيه !!
حور توايه ابوها: وبك زود ..شحالك ابويه ؟
بوهزاع :بخير يعلج بخير..وشحال عروستنا ثرها باجر الملجه ..
حور ودموعها فعينها: أبويه !!
بوهزاع : آمري يا بنيتي؟
حور: ابويه انا مابغي الريال..
بو هزاع محرج: هب كيفج .. ولد عمج وأولابج من الغريب..
هزاع : يابوي دامها ماتبغيه خلاص.. ترى ها مستقبل هب لعبه ..
بوهزاع : انت اسكت ومالك خص..
هزاع :لا يا بوي..هاي اختيه وليه خص ..
بوهزاع وهو محررج : جب ولا كلمه .. اقطعها الرمسه اشوف..

هزاع ظهر محررج من البيت ..

بوهزاع : وانتي باجر ملجتج طيب غصب بتاخذينه بتاخذينه !!
حور تصيح : ابوييه مابغييه ماابغيييه !!

بو هزاع ينش وويطبع كفه ع خد حور لي كساه الدمع والقهر !!

سقى الله يوم انآ طفله !!
أنام ولاحدن قدي !!
ولا أحاكي هموم اليوم ولا انطر امل بكره !!
تداعب امي شعراتي وتمسح يدها خدي !!
ونومي هادي وساكن رعانا الرب في ستره !!
تداعب يدي الدميه وعندي هالزمن وردي
همومي لعبتي ضاعت وعندي همي شكبره
كبرت وزادت همومي واحس ان الزمن ضدي
كبرت ونظرت الطفله تعيش بداخلي فطره !!

البارت _21_

حور تصيح : ابوييه مابغييه ماابغيييه !!

بو هزاع ينش وويطبع كفه ع خد حور لي كساه الدمع والقهر !!

سقى الله يوم انآ طفله !!
أنام ولاحدن قدي !!
ولا أحاكي هموم اليوم ولا انطر امل بكره !!
تداعب امي شعراتي وتمسح يدها خدي !!
ونومي هادي وساكن رعانا الرب في ستره !!
تداعب يدي الدميه وعندي هالزمن وردي
همومي لعبتي ضاعت وعندي همي شكبره
كبرت وزادت همومي واحس ان الزمن ضدي
كبرت ونظرت الطفله تعيش بداخلي فطره !!

أم هزاع تنش صوب بو هزاع : لآ يا بو هزاع لا !!
حور منصدمه .. حاطه يدينها ع خدها وتطالع الأرض.. بوهزاع راص ع يدينه ويطالع حور !!
حور ما قدرت تتحمل الموقف ربعت حجرتها ويلست تصيح من الخاطر !!
آآخ يابوي ليش انت قاسي جيه ؟ ليش يابوي !! انا شسويت يا بوي .. شسويت !!

حور بحال لا يحسد عليه !! تحس عمرها مخنوقه .. وصورة أبوها فهاييج اللحظه لين احين تمر امبين عيونها !!
حور زخت دفتر مذكراتها ويلست تشخبط عليه بقهر .. ودموعها خرست الأوراق وتخالط الدمع ويا الحبر !!!

حور ع طول دقت حق الريم وهي تصيح ..

الريم : حواري بلاج .. ليش تصيحين ؟
حور : الريم ابوويه .. ابوويه بيذبحنيه .. مابغي اعرس مابغي..ماااااابغي يا ريم
الريم : فديتج حواري.. انا بسير اخبر اميه جان بتخليني أيي صوبكم أوك ؟
حور: ليت يالريم ليت .. آسفه ضيجتبج ..
الريم : أفا ياحور .. لا تقولين جيه نحن ربع ..
حور: فديتج ريمان..
الريم: خلاص حور انتي هدي وانا احين يايه ..فداعة الله..
حور: ان شالله.. الرب حافظ ..

الريم بندت عن حور .. وراحت صوب امها تخبرها..

الريم : إميه !
أم فلاح : ها يا إميه ؟
الريم : اممم اميه ابغي اسير صوب حور ..
ام فلاح : وشو عندج هناك ؟
الريم : ماشي اميه بس حليلها حور مضايجه قلت بسيرصوبها..
أم فلاح : واعليه عنها هالبنيه .. خبرتنيه امها عن السالفه .. سيري يا اميه زين تسوين ..
الريم : حد هني يوصلنيه ..

فلاح توه نازل : هيه انا هني وين إبها؟؟
الريم : صوب حواري بنت ييرانا..
فلاح : اوك عيل انا ظاهر بخطفج فدربي بس بسرعه انقفضي ..
الريم : علنيه فداك .. اوك دقايق..

فلاح يلس حذال امه يسولف وياها ..

أم فلاح : فلاح !!
فلاح : يالبيه!!
أم فلاح : لبيت في منى يا ولديه .. ترانيه رمست العرب..
فلاح مستانس : ها بشري..!
أم فلاح مبتسمه : امررره موافقين .. هالخميس ان شالله بتملج ..
فلاح مستانس يحب امه ع راسها : بشررج ربيه بالينه يا اميه ..
أم فلاح : علنيه فداك .. يلا عاد شد حيلك .. لازم تخلصون اموركم بسرعه ..متى فاضي نسير ناخذ الشبكه وهالسوالف !
فلاح : امررره اليوم ان شالله .. ع المغرب لان تدرين عنديه دوام ..
أم فلاح : هيه .. يلا عيل ان شالله المغرب نسير ..ونخلص امورنا..
فلاح : ان شالله يا اميه ..

الريم نازله : يلا فلاح انا خلصت ..
فلاح : يلا عيل اميه شي فخاطرج ؟
ام فلاح : هله هله بعماركم .
فلاح والريم : ان شالله .. مع السلامه ..
أم فلاح : ربي يحفظكم يا عياليه ..

لندن [ الجامعه ]

الشباب توهم مخلصين دوامهم وبيظهرون من الجامعه .. يالسين يتمشون وضحك وسوالف!!شوي إلا اتيي شوق!!

شوق: مرحبا شباب..
الشباب يصدون صوبها : مراحب ..
شوق وهي تطالع هادف : شحالكم ..؟
الشباب : الحمدلله بخير ونعمه ..
شوق: عسى دوم ..
هادف: شحالج شوق..؟
شوق مبتسمه : الحمدلله بخير.. شو ظاهرين ؟
حمدان : هيه والله .. تونا مخلصين ..
شوق وهي تطالع هادف جنه شي فخاطرها: حيكم .. انا احين عنديه كلاس.. عن اذنكم ..
هادف: شوق متى تخلصين ؟
شوق: امممم 12 ونص..
هادف: آها.. عيل أرقبج فالكوفي..
شوق طايره من الوناسه : امممم اوك خلاص..
هادف مبتسم ..
شوق: يلا عيل فداعة الله ..
الشباب : ربي يحفظج..

شوق روحت عن الشباب وهي مستانسه .. والشباب ظهروا يتمشون !

[شركة بو غيث الله يرحمه ]

فلاح قبل لا يروح دوامه قال بيخطف ع غيث يسلم ويشوف امور الشغل وياه ..

فلاح توه يدش المكتب : السلام عليكم ..
غيث رفع راسه .. اول ما شاف فلاح نش يوايهه : وعليكم السلام ورحمة الله .. مرحبا مرحبا..
فلاح : وبك زوود .. شحالك ربك إلا بخير ؟
غيث: الحمدلله بخير وسهاله .. انت شحالك ؟
فلاح : بخير و نعمه ربيه يعافيك..
غيث: عساه حالن مديم .. اقرب اقرب ..
فلاح : جريب طال عمرك ..ها شو الشغل وياك ؟
غيث: والله تمام .. الحمدلله الاوضاع وايد اوك احين..
فلاح : الحمدلله .. يلا ربيه يوفجك ان شالله ..
غيث: ان شالله .. اشتشرب؟.
فلاح : لالا طولي بعمرك انا رايح بس خطفت اسلم ..
غيث: لا مايصير يا ريال..
فلاح : حلفت عليك والله رايح انا مستعيل..وصح اخبرك ..الملجه هالخميس ان شالله ..
غيث: مبروووك مبروووك هههه اخيرا..
فلاح: الله يبارك فيك ههه ..
غيث: حيك والله ثرني بلحقك غرت ههه ..
فلاح : ههههه ارقبك عيل..زين عيل غيث.. تامرني ع شي؟..
غيث:سلامة راسك شيخي..
فلاح : الله يسلمك .. فداعة الله .
غيث: الرب حافظ..

[ بيت بو هزاع ]

الريم توها وصلت ظهرت لها البشكاره .. ودخلتها.. الريم لقت أم هزاع روحها فالصاله .. راحت صوبها تسلم ..

الريم : السلام عليكم ..
ام هزاع : وعليكم السلام .. مرحبا بالريم ..
الريم : شحالج خالوه ؟
أم هزاع : الحمدلله بخيروسهاله .. ومن جداج ؟
الريم : والله الحمدلله ما نشكي باس..
أم هزاع : عساه حالن مديم .. يايه صوب حور ..
الريم : ههه هيه والله خالوه .. وينها عيل راقده ؟
أم هزاع : والله مادريبها احيدها فحجرتها.. بسير ازقرلج اياها..
الريم : ماعليه خالوه لا اتعبين عمرج انا بسيرلها.
أم هزاع : برايج عيل يا بنيتي سيريلها ..
الريم مبتسمه : ان شالله ..

الريم سارت صوب حور فحجرتها .. دقت الباب ..

حور : تفضل..
الريم فجت الباب وابتسمت : زاد فضلج ..
حور نقزت تلوي ع الريم : رييماني فديتج .. شحالج ؟
الريم : ههه الحمدلله .. انتي شحالج ؟
حور مبتسمه : احمدالله ع كل حال..قربي ريموه..
الريم : جريب..
حور: والله استانست بييتج ..
الريم : فديتج والله ..خير حور شصاير خليتيني احاتيج .؟
حور : أبويه جبرنيه آخذ الريال .. وباجر الملجه يالريم باجر !!
الريم ماعرفت شتقول : واخوج وامج مارمسو؟
حور: إميه حليلها ما بيدها شي.. أبويه حالف عليها بالطلاق لو تدخلت .. وهزاع رمس وابويه حرج عليه وظهر من البيت .. آآآخ يالريم احس عمريه ضايعه ضايعه <<<وتصيح..
الريم : فديتج حواري خلاص لا تتضايجين ان شالله ما يتسوي إلأا الخير..
حور: خلاص يالريم انا باخذه مابغي اخسر هليه عشان ريال خلاص خلاص..

الريم تلوي ع حور وحور تصيح .. الريم يلست تهديها لين ما هدت حور ورقدت من زود التعب والصياح !!

وتحت فالصاله هزاع توه داخل .. سار صوب امه : مرحبا اميه ..
ام هزاع : هلا يا اميه .. وين سرت يلست احاتيك..؟
هزاع : هالبيت ضيج سرت افتر بالسياره ابرك ..

أم هزاع حز فخاطرها وسكتت ..
هزاع : شصاير يا اميه ؟
أم هزاع : والله ياولديه ابوك معند .. وامرره هب معطي البنيه فرصه .. حور اللي عمرها ما انضربت .. طبع كفه اليوم ع خدها واعليه عنها..
هزاع محرج : شووووووووووه !!
أم هزاع : خلاص ياوليدي هدي.. مهما كان ها ابوها..
هزاع : الابو عمره ما كان بالهقساوه .. انا ظاهر صوب حور..

أم هزاع تبغي توقفه ما قدرت .. يلست تصيح ع حالها وحال عيالها ..

هزاع سار صوب اخته وامره هب شايف شي.. هزاع الولد الوحيد ووايد يحب خواته حور وحصه .. أول ما وصل الحجره .. دخل ع طول بدون ما يدق الباب !!

هزاع انصدم .. ماتوقع ان حد عند حور.. مايحيد ان حد ايي عندها.. شاف الريم يالسه ع الشبريه وحور راقده ..الريم ع طول صدت صوب الباب ..

هزاع : آآ .. آآآسف سمحيليه ..
وظهر هزاع .. والريم منصدمه هب مستوعبه شي !!

هزاع ماعرف شيسوي ويهه قافط .. دخل حجرته وهو محرج وبند الباب !!

لندن [ الجامعه \ الكوفي ]

شوق من خلصت ع طول راحت الكوفي .. لقت هادف يرقبها .. ابتسمت وسارت صوبه !

شوق: تأخرت عليك؟
هادف مبتسم : لا عادي..

شوق يلست وتمت ساكته ..

هادف : ها شو سويتي اليوم ..؟؟
شوق: والله ماشي هالدكتور غلس هههه .. ماصدقت خلص..
هادف: ههههه .. حيج والله ..شوق!!
شوق: آمر؟
هادف: شستوى بالسالفه !!سويتي لي قتلج عليه ؟
شوق: هيه أمس عقب ما بندت عنك ع طول دقيت لأبوي وتفاهمت وياه ..
هادف مبتسم : ها بشري..!!
شوق: الحمدلله .. اقتنع .. والله يا هادف انا مادري شو كنت سويت بدونك..
هادف: أفا ها واجبنا ..كلنا عندنا مشاكل .. ونحتاج دوم لحد يوقف ويانا..
شوق: هادف .. متى بتخبرني انت شفيك؟
هادف: اممم ماعرف والله ..
شوق: دخيلك قولي احين .. والله من متى وانا احاتيك..
هادف: امممم بقول بس بشرط ؟
شوق: هههه بعد يتشرط ..
هادف: هيه شو تتحرين هههه ..
شوق: آمر انت..
هادف: امممم خبريني..من فتره كنتي تبين تقوليلي شي عقب قلتي عقب.. شو كان هالشي ؟
شوق ارتبكت ..يلست تطالع حولها ..

شوي إلا فون هادف يرن ..

هادف: سمحيلي شوي شوق..
شوق: بالحل شيخي.
هادف يبتسم لها ويرد ع الفون : مرحبا مشعل..
مشعل: هادف انت وينك .؟
هادف: هني فالكوفي ليش؟
مشعل: تعال ياخي حمدان طاح عليه حرارته وايد مرتفعه ونحن احين فالمستشفى..
هادف بخوف :خلاص انا ياي احين ..

ويبند عن مشعل : سمحيلي شوق انا بسير احين ..
شوق: خير هادف شصاير.؟
هادف: ماشي بس حمدان تعب مادل شفيه .. حراره ظنتيه ..
شوق: آها سلامته ان شالله ..
هادف: الله يسلمج .. أشوفج باجر اوك؟
شوق: اممم خلاص..
هادف: فداعة الله..
شوق : الرب حافظ ..

هادف ع طول دقها سلف ورايح صوب حمدان .. كانت حرارته وايد مرتفعه .. ركبوله مغذي كم ساعه عقب ردو الفندق.. وكانت صحته احسن عن قبل الحمدلله ..وطاحوبه الشباب طيحه الدلوع والدلوع هههه ..

[ يوم الخميس ]

اليوم الخميس .. بيت بوهزاع ربشه وبيت بو فلاح بعد !! اليوم ملجة حور ع ولد عمها محمد وملجة فلاح ع عليا .. المناسبه فرح !! والنفوس حيرانه !!

هل فلاح ماشالله عليهم الكل مستانس بملجة ولدهم !! وبيت بوهزاع مخيم عليه الحزن ..

أم فلاح وعياالها ناشين من الصبح .. يرتبون امورهم يالله يالله يلحقون ..
الريم من أذن الظهر قالت بتخطف تشوف حور هي واسما عقب بيسيرن الصالون ..

أسوم : حليلها حواري والله إنها غامضتنيه ..
الريم : هيه فديتها .. يلا ان شالله الريال يظهر اوك .. وترتاح فحياتها ..
أسوم : ان شالله يارب ..

الريم واسوم توهن واصلات بيت بوهزاع .. نزلن سلمن ع أم هزاع وسارن صوب حور ..
دشن عليها الحجره يونه يخوفنها : بووووووووووو
حور كانت منسدحه ع الشبريه وسرحانه : بسم الله الرحمن الرحيم ..

اسوم والريم نقزن صوبها ع الشبريه ويضحكن ع شكلها ..

الريم : جيه شايفه ينيات ههههه
اسوم: شكلها.. يلا روحنا.. هههه
حور: هههه فديتكن والله .. استانست وين تروحون ..بس روعتونيه ههههه ..
الريم : فديتج والله .. شحالها العروس..؟

حور واختفت ملامح الفرح فويهها وبابتسامه حزينه : الحمدلله ..
اسوم : حواري حبيبتي لا تتضايجين .. ان شالله ربي مكتب لج الخير فهالشي..
حور : ان شالله يارب..

الريم تغير الجو : ها متى بتخربطين ع و يهج .. ولا تبين نخربطلج .. ههههه
حور: هههههه اتخيل..
اسوم : افا عليج .. بنخليج احلى عروس هههه ..
حور: فديتكن والله .. بتيني حرمه تعدلنيه عقب شوي..
الريم : حيج والله .. انا كنت ابغي حرمه تيني بس هالعنز اسوم ماطاعت تبا تسير الصالون هههه ..
اسوم : منو العنز يالبقر هههههههه ..
حور: ههههه والله انكن .. مووول ماتعقلن ..
الريم : خووزو عنها العاقل تراج الا شراتنا ولا بتعرسين خلاص.. هههه
حور: ههههه يمكن ..

اسوم والريم يلسن ويا حور شوي .. سوالف وضحك .. حور حست شوي براحه .. واستانست .. عقب ترخصن عنها وراحن الصالون ..

[ ملجة فلاح ]

الريم كانت وآيد حلوه وكيوت .. كانت لابسه مخصر وردي هادي.. وفاله شعرها ومسويه بف خفيف من فوق .. ومكياجها وايد هادي بعد .. واسوم لابسه مخصر عنآبي وعليه كرستال صوب الخصر. ومسويه تسريحه ع فوق شوي.. ماشالله عليهن كانن وايد حلوات .. ومشتغلات رقص ماشي شغل هههه .. وحليلهن مستانسات ..

الريم : ههه بس اسوم تعبت ..
اسوم : ماشي يلا .. صبري بزقر رويض العبيطه هههه ..
الريم : هيه والله مشغلتنا من الصبح وهي متيلسه يونه هههه ...
اسوم تزقر رويض: رووووووويض تعالي..
روضه : هههه شو عندج؟
اسوم : يلا اشتغلي..
روضه : ههههه شوه ؟
اسوم :يلا رقصي واقفه جيه جنج لوح .. ههههه
روضه : هههه مابا استحي...
اسوم : والله ترقصين <<< وتسحبها ترقص غصب..

تمن البنات رقص وجيه مستانسات .. شوي إلا يدخلون العروس ..ماشالله عليها كانت وايد حلوه .. يلست شوي .. صوروها وجيه .. عقب قالو بيدخلون المعرس

أم فلاح : بنات المعرس بيدخل ..

البنات والحريم تسترن ودخل المعرس..

عليوه من النوع اللي وايد يستحي.. اول ما دخل المعرس..يدينها ترجف .. فلاح دخل حبها ع يبينها .. وقف حذالها .. لبسها الدبله .. ويلسو تصوير وما تصوير .. وفلاح كل شوي يصد يطالع عليوه .. وعليووه مووول مستحيه هب عارفه وين تودي عيونها ..

فلاح : أقوووول..
عليوه فخاطرها من اولها يتحراني واحد من الربع : لبيه ..
فلاح : آآآخ .. هههه طالعيني!

عليوه مستحيه وتطالع الارض...

فلاح : لالا انا بظهر ..
عليوه ع طول صدت صوبه ..وفجت عينها..

فلاح ناقع ضحك : ههههه اخيرا.. لو ادري من زمان قتلج بظهر هههه .. فديتج والله .
.
عليووه استحت ع طول صدت يونه تلعب بالدبله ..

[ملجة حور]

اللي تعدل حور متلعوزه .. كل ما تحطي الجحال حور تصيح وتخربه .. آخر شي حور استحت وزخت عمرها .. لين ماخلصتها الحرمه .. وأحين الوقت لي بينزلون حور فيه !!

الصاله ممزوره حريم .. حور متروعه .. أمها يايه عندها: يلا يا بنيتي يرقبونج ..
حور تطالع امها والدموع فعيونها : اميه مابغي مابغي..
ام هزاع : فديتج يا اميه لا تعذبيني زود ..
حور تحب امها ع راسها : يلا يا اميه .. .نزلنا..
أم هزاع : علنيه فداج يا بنتي.. ربيه يهنيج ..
حور مبتسمه : آمين ..

حور تنزل من ع الدري.. والحريم من اول ما نزلت وهن يذكرن ربهن ع جمال حور !! صدق ماشالله عليها اسم ع مسمى !! نزلت حور والحيا مغطيها .. يلست بهدوء.. شوي إلا المعرس داخل ..

حور حست بألم .. هب قادره تشوفه حتى .. وهو ولا ع البال !! دش سلم عليها ووقف .. عقب لبسها الدبله .. ويلسو يصورون .. محمد كان يحاول يرمسها بس هي ترد بكلمتين وتسكت .. هب قادره ترمس ولا تطالعه ..

خلصت الملجه ع خير!! الكل بارك لهله وعياله ... فلاح مستانس ولا حدن قده .. وعليوووه ميته من المستحى بسبته !! وحور حاسه انها بسجن مؤبد مستحيل تظهر منه .. أول ما خلصت الملجه .. سلمت ع خوها وابوها ولا قدرت تحط عينها بعينه وهو ولا ع البال !! راحت ع طول الحجره ويلست تصيح !!