(( الجزء التاسع والعشرين ))
في غرفتها ترتب دولابها البسيط ,,سمعت هيفاء نغمة الجوال ,,, جت يمه وشافت المسج ,, فتحته على طول ,, وشافت رقم فهد ورسالته اللي تدل انه سافر ,, حزنت شوي منه ,, ما ودها انه يروح عشان يتجاوز اللي بينهم ,, اكيد كله مني ,, بس هو بعد لازم يستحمل اللي يجيه ,,,
سكرت الجوال ودعت الله سبحانه وتعالى انه يوصل بالسلامة....,,,,
في الطائره فهد جالس في الوسط وكان بجنبه موظف اجنبي راج في اجازته ,,, ارتاح انه مو مثل لغته عشان ما يبتلش كل شوي سالفة ,,, لكن اللي ما توقعه فهد فعلا ,, ان هالراكب فعلا وده بالسوالف وقعد يجر فهد من سالفه الى سالفة باللغة الانجليزية لحد ما حطت الطايرة في مطار هيثرو ,,,,
كان زميل فهد ينتظره عند صالة القادمين ,, سلم عليه وقاموا بالاجراءت اللازمة وطلعوا على جو باااارد وممطر مررره ,,,
فهد : من زمان تمطر والا اليوم ,,
هيثم : هو لهم وقت معين ,,, سماهم هره تمطر ومره شمس ومره تغيم في ساعة واحده ,,,,
ضحك فهد على تعليق هيثم وتحركت السيارة اللي تقلهم لخارج مدينة لندن متجهين لمدينة اكسفورد ,,,
خيال هيفاء ما فارق فهد دقيقه ,, حب يرسل لها رسالة انه وصل ,,, بس تركها لحد ما يوصل االمدينة ويستقر فيها ,,,
خذوا مشوار تقريبا ساعتين مع الزحمة ,,, لكن انقضت كلها سوالف بينهم عن المدينة وش راح يحتاج فهد ,, من بنك وسوبر ماركت
,, الى مطاعم ,,,لكن هيثم وعد فهد انه راح يكون معه الايام الاولى ,, حتى يتعود على نظام المدينه,,
فهد : ماله داعي والله كفايه عليك رتبت حجوزاتي كلها ,, اذا احتجت شي بكلمك ,,,,
هيثم : خلاص متى ما احتجتني كلمني ,, انا راح انشغل الاسبوع الجاي مع الاختبارات لكن بعدها ,, فااضي تماما ,,,
صلوا لبيت فهد المحجوز له مسبقا ,, ونفس ما طلبه فهد بيت صغير تحيط به حديقه ممتدة من خلفة ,, وسيارة مرسيديس باب واحد ,,,
دخلوا البيت ,, وطلب لهم هيثم بيتزا ,, وتاسف انه ما رتب للأكل
فهد : لا تفكر في الاكل هذا اخر شي احاتيه اي شي وبس ,,,
دخل فهد غرفته يبي يبدل ,,وقعد على السرير حس بأكتئاب انه راح يبدأ حياة جديده بالحاله ,, كان وده ان هيفاء عنده الحين وتخيلها تمشي في الغرفة وترتب اغراضه ,, لكن الله يسامحك يا هيفاء راسك يابس ,,,
طلع جواله وفتح رسالة جديده ,,
((دخلت البيت من شوي باااارد وكئيب ,, وتخيلتك معي كيف راح يكون ,, هيفاء انا محتاج لك)) ,,,وارسل المسج
قامت هيفاء من الصباح وكلمت جارتهم ام عبدالله انها ترسل عيال جارتهم بعد صلاة العصر عشان تدرسهم ,,, رتبت سريرها وغيرت ملابسها ,, كانت تاركه الجوال في الدرج ,, وما فكرت انها تبي تشوفه ثاني ,,, جلست تفطر وجاها رنين على الجوال ,, خذته واول ما شافت رقم فهد خلته صامت ,, هو عارف اني ما راح اكلم يدق علي ليش ,,, بعد ما سكر فهد شافت رسالته ,, شافت انه يبيها تحن عليه ,,,
فهد بعد ما ارسل المسج ما جاه رد من هيفاء ,, توقع ترسل ولو حرف واحد ,, لو كلمه ,, الحمدلله على السلامة مثلا ,, لاتكونين قاسيه يا هيفاء كذا ,,,
بعد ساعه شافها ما ردت وطلع هيثم حب انه يدق عليها ,, هو عارف انها ما راح ترد بس حب انها تشوف اتصاله ,,,
حاولت هيفاء تتشجع اكثر ,,وتغير نمط حياتها ,, استعدت للعيال الصغار اللي بيجونها ,, ماتدري هي بتعرف تتعامل معهم وتوصل لهم المعلومة والا لا بس بتجرب على الاقل شي جديد ,,,,
بعد سفر فهد ,, دخلت ام طلال في عزلة جديده ,, ماصار لحياتها طعم ,, الا من زيارة صديقاتها ,, لا ونيس ولا جليس مثل فهد وهيفاء ,,,
وتمنت الايام تمر بسرعه ,, ودها بنفسها تروح لهيفاء ,, دقت على لطيفه تبي تنشد عنهم ,,
رفعت هيفاء سماعة التليفون ,,
هيفاء : الووو
ام طلال اول ما سمعت صوت هيفاء نزلت دمعتها واختنقت بعبرتها : هيفاء وشلونك يا قلبي ويالله الحروف تطلع
ما توقعت هيفاء انها جدتها بالمررره : هلا يمه وتأثرت من صوتها وقعدت تبكي ومدت السماعه لأمها ترد على جدتها ,,,
والله اللي تغيرت حياتك يا هيفاء ,, يا ليتك دريتي وش بيصير لك تتقبلينه على الاقل ,,,
لطيفه : هلا يام طلال وشلونك ياعمري
ام طلال : هلا لطيفه وشلونكم ,, اشتقت لصوتها خليها تكلمني ابي اسمعها ,,,
لطيفه : قامت عني والله بروحها ما قدرت تكلمك متأثره,,,
ام طلال : يا عمري ياهيفاء ,, قولي لها اني مريضه من فراقها وفراق فهد ,, ومالي عقب الله الا هم ,, تعالوا عندي يا لطيفه كلميها يا عمري ,,,
لطيفه : من عيوني لا تحاتين ,,, ابشري ان شالله بكلمها ,,,
قامت لطيفه لهيفاء وهي شايله في خاطرها عليها ,,,
لطيفه : ترى مو زين منك تعاملين جدتك كذا ,,,
هيفاء وهي حزينه من يوم سمعت صوت جدتها تبكي : ما قدرت اكلمها وفي نفس الوقت ما عندي شي اقوله ,,
لطيفه : هاذي جدتك ,, انتي لازم تحكمين عقلك حتى لو فهد غلط جدتك مالها دخل ,,,
هيفاء : انتي نسيتي انها قامت مع فهد ضدي ,,
لطيفه : هيفاء انتي عاقله ,, حتى لو قامت مع فهد مالك حق تقاطعينها كذا ,, انتي لازم تكلمينها كل يوم وتسألين عنها ,, ترى زعلك صار بايخ ,, اول اشوف معك حق ,, لكن الحين , لا ما قصر فهد والله ,, جاء يبي يرضيك ورفضتي ,, جاء ثاني ورفضتي ,, وش تبينه يسوي ,,
صحيح هيفاء فهميني انتي وش اللي بيرضيك على فهد
هيفاء وهي تصيح : مدري ,,, وغمضت عيونها ما تبي تكمل الحديث مع امها ,,,
اول مره تعنفها امها بذا الطريقة ,,, دايما تسكت منها تدور لخاطرها ,, لكن هالمره مو في صفها ابدا ,,,,
قامت بعد العصر وتوضت وصلت وجلست تنتظر الصغار اللي بيجونها ,,,
جتها حرمة متوسطه في العمر ,معها بنت في الصف الرابع وولد في الصف الثاني ,, خالد ,, ونجود ,,
عطت هيفاء تفاصيل بسيطه عنهم واتفقت معها انها تجيبهم ثلاث مرات في الاسبوع
ام خالد : لا تواخذيني انتي كم تاخذين على الحصه ..؟؟
هيفاء : انا بدرسهم عشان خاطر ام عبدالله ,, وودي اني اساعدك في تعليمهم في وقت فراغي ,, لكن انا ما ابي مقابل ابدا ...
قعدت الام فتره وهي تحن على هيفاء ,, لكن هيفاء ماعطتها فرصه مرره ,,,
تركتهم الام وابتدت معهم هيفاء اول حصه ,,
شافت انهم ما شالله فاهمين مره بس يمكن ما يتابعون حل الواجب عشان يرسخ في مخهم اكثر ,,,
راحت الحصة الاولى في التعريف عن نفسهم وش ياخذون من مواد وش يحبون ,, وش هوايتهم
نجود : ابله انا احب الرسم ,,
هيفاء ترسمين شجره والا بيت والا سياره ,,
نجود : احب ارسم سحاب وشمس وبحر ,,
هيفاء : الله حلووو وبعد ,,
نجود : ابي اعرف ارسم فراشه فيها الوان بس كل مره تخرب معي ,,
قامت هيفاء دقايق ورجعت لها
تتذكر مره انها كان عندها قماش ملون فيه فراشات ,, طلعته وجابته لنجود وقصت جزء من القماش يحتوي على فراشه وقالت لها تحتفظ فيه عشان تعرف طريقة الالوان ,, حست هيفاء بأنجاز ,, ما ابسط الاشياء اللي نسويها وهي ممكن ترسم الفرحة على وجوه الغير ,,
شافت هيفاء انها اهملت خالد
هيفاء : طيب خلود وش اصعب ماده عندك
خالد : رياضيات ,, ما احبها كلش
هيفاء : اتحداك واذا خليتك تحبها وش تعطيني ,,
خالد ,, بعطيك ورده وهو يضحك ,,
عزمت هيفاء انها تكمل معهم لحد ما يخلصون اختبارتهم على الاقل ,, وفرحت ان فيه شي ممكن تنتظره كل يوم ,,
بعد فترة كم شهر ,,, هيفاء وامها جالسين يتقهون ويسولفون عن زواج بنت جيرانهم ,, جاهم اتصال على تليفون البيت ,, رفعت السماعه لطيفه وتكلمت ,,
لطيفه : الوو
ام طلال : هلا ومرحبا ,, وشلونكم
لطيفه : مرحبا يأم طلال وهي ترفع صوتها شوي ,, وشلونك انتي ياعمري ,,,
ام طلال : بخير يا قلبي ,, شلون هيفاء
لطيفه : ابشرك يخير اللهم لك الحمد ,,,
ام طلال : عندكم احد ,, استغربت لطيفه من السؤال ,,
لطيفه : سلامتك ,,
سكرت لطيفه من ام طلال وهي تقول مدري ليه يا هيفاء حاسه ان جدتك فيها شي ,,,
هيفاء فزت من مكانها ,, وش فيها ,, لمياء كلمتني البارح ما قالت عنها شي ,, خذت جوالها تدق على لمياء ,,
رنت عليها ثلاث مرات وما حصلت اجابه وفي الأخير سكرت,,,
وهم على حالهم رن جرس البيت وطلعت الشغاله تفتح البوابه وسمعتها هيفاء وهي تصرخ فرحانه : لمياء جات ,,
طلعت هيفاء للحوش تبي تشوف لمياء صدق جت,, وشافتها وهي تسند لجدتها ام طلال بكبرها جايه ,,
خفق قلب هيفاء بشوووق لجدتها كانت كاتمته الشهور اللي راحت ,,
جرت هيفاء لجدتها وضمتها بقووووه وهم يبكون على بعض وعلى جروح فرقتهم وشدت يدها على شعرها وهي تقول
مالي خاطر عندك يا هيفاء ,,
هيفاء تمسك يد جدتها وتضمها لها : يمه والله اني اغليك ومن غلاتك ما بغيت اكلمك واقولك شي في نفسي وهو ممكن يزعلك على فهد
ادري انك تحبينه وولدك اللي ربيتيه ,, وش انتظر منك تسوين ,,
ام طلال : مو قته هالكلام دخلوني ابي ارتاح من الطريق ,,
لمياء : هيفاء ,, فيصل بيدخل ,,
هيفاء : اوكي ياعمري انا داخله ,,
دخل فيصل وسلم على خالته لطيفه ,, وقعد في المجلس يبي يتريح شوي من الطريق ,, فجأته جدته اللي طلعت من عدتها انها تبي العمرة ,, ثم غيرت رأيها وكلمته يوديها لهيفاء ,,,
ام طلال دخلت غرفة مقلط للحريم ما يستخدمونها عادة وحطت لها هيفاء فراش وثير ورتبت لها مكان ترتاح فيه شوي ,,
اول ما خلصت ترتيبها وام طلال تراقبها ,, قالت لها ام طلال : قواك قلبك يا هيفاء ما تسألين ,,
هيفاء ماعندها اي رد اكثر من اللي قالت ,,,
وهم في مكانهم رن جوال ام طلال ,,
ام طلال : ناوليني جوالي يا قلبي ,,
دخلت هيفاء يدها في الشنطه ,, اول ما شافت اسم فهد نور عيني ,, ارتبكت وعطت جدتها الجوال ,,
اسم فهد ما زال يخلي قلبها يرجف مثل اول ,, ولا حست انه مهما بعد انها نسته او فكرت انها تنساه ,, ما قدرت بس ما ودها تحكي ,,
ام طلال : هلا يا قلبي ونور عيني ,,
فهد : هلا بك يمه ,, وصلتي ,,
ام طلال : الحين تونا داخلين ,,
فهد : شفتي هيفاء :
ام طلال : هاذي هي عندي ,, ما شالله احلى من اول بعد ,,
هيفاء انحرجت من جدتها وطريقتها معا حسستها ان جدتها راح تسوي اللي تقدر عليه وانها ترجع لفهد,,,
ام طلال : لحظه ومدت الجوال لهيفاء ,, كلمي فهد يبيك ,, وعطتها الجوال ,,
هيفاء مثل ما يقولون اسقط في يديها ,,ما بغت ترد جدتها وفي نفس الوقت حست انها تسوي حركات بزران اذا ما كلمته وهو اللي يسئل عنها ,,,
خذت هيفاء الجوال ,,,
هيفاء|:الوو
فهد :عاش من سمع صوتك انا قلت اكيد نسيتينا
ما ردت هيفاء ظلت ساكته
فهد تقرين مسجاتي اللي ارسلها
هيفاء بدون تردد اي
انشرح صوت فهد وقال لهيفاء دامك تقرينها فودي والله ,,
قالها فهد انها تهتم في حالها ,, ولو ترد على المسجات ترى بتحسسه انها معاه على طول الوقت ,,
ام طلال : وش رايك تروحين معنا العمرة انتي وامك لطيفه ,,,
هيفاء تدفقت مشاعرها وهي تشوف جدتها تضمها وتدعي لها من قلبها ,,,, ام طلال وهي تضم هيفاء ,, وتقربها تبي تكلمها
ام طلال : هيفاء : متى بترضين على فهد ..,,,,
هيفاء ماعندها رد لجدتها وهي حستها فرحانه بس مو باللي يرضى عليها ,,,
هيفاء : الايام كفيله بكل شي يا يمه ,,,,
هيفاء ما توقعت ردة فعلها تكون كذا تجاه جدتها ,, وعرفت ان حب جدتها فطري ,, مو هي اللي تتحكم فيه ,,,, ما تدري الحين وشلون تعامل فهد ,,,
طلعت من جدتها وراحت تشوف لمياء مشتاقه لها حييييل ,, لقت لمياء قاعده عند امها وهي بطنها غريب شكله عليها ,, واخير بتصيرين يا لمياء ام ؟؟؟؟
هيفاء : ليه ما جت معكم ريما
لمياء : مسكينه والله ما قدرت تترك خالتي بالحالها ,,
هيفاء ,,فيها الخير والله ,,,,,,
ظلت ام طلال عند بيت لطيفه كم يوم ,,,وصارت حديث الديره ,, وام طلال برقيها المعتاد ,,استقبلت جيران لطيفه وسلمت عليهم ,,
وفي ليلة
وهما قاعدين يرتبون سمعوا صرخة ام طلال جايه من الغرفة وقامو ا كلهم في صوت واحد يمه,,
ما تدري وش كثر راح من الليل وهما قاعدين عند راس جدتها اللي جاها اغماء قوي,.
(( الجزء الثلاثين ))
طلع الدكتور الخاص وهو يطمنهم ان ام طلال تحتاج راحه بسيطه في الفراش وان شالله بتكون بخير ,,,
بعد ماطاحت عليهم جدتهم كلمت لمياء فيصل يرجع لهم ,, يمكن يحتاجون يرجعونها الرياض ,,,
ام طلال نايمه في فراشها وهيفاء عند راسها تقرأ عليها ,,, بالرغم ان ما فيها شي يقلق لكن هيفاء ما ارتاحت مره لوضعها ,,
جابت لمياء الغداء عشان جدتها تتغذى شوي ,, لكن ام طلال بدت دموعها تنزل وهي ساكته ,,
هيفاء : وشفيك يمه :: لا تخافين ما فيك الا العافية والدكتور طمنا ,,,
ام طلال : ابي اكلم فهد ,, يمكن اموت ما سمعت صوته ولا شفته ,,,
هيفاء ولمياء كلهم بصوت واحد , يمه اسم الله عليك وشفيك ,, لا تقولين كذا مو زين ,,
ام طلال : ابي اكلم فهد ودموعها تنزل ,,
دقت هيفاء على طول على فهد من جوالها ,, فهد وقف في كوفي يأخذ له كابتشينو ,, شاف اسم (( حبيبتي )) وعلى طول رفع الخط ,,
وقف وارخى سمعه كله ,,
هيفاء : الو
فهد : هلا
هيفاء : كيفك ان شالله بخير
فهد : ماشي الحال ,, هيفاء درت ان فهد شايل عليها بعد المده ذي ,, على كثر ما ارسل مسجات ودق اتصالات ولا ردت على شي منها ,, لحد ما طفش منها ,, بدى يباعد من مسجاته ,, لين وقفها بعد ما شاف مافيها نتيجه ,,,
هيفاء : جدتي معك ,, وناولت ام طلال الجوال
فهد عرف ان جدته راحت للديرة او حس كذا والا كيف تكون هي وهيفاء في مكان واحد ,,, اكيد كذا والا يمكن هيفاء رضت ورجعت لا لا ما اظن ,,,
ام طلال اول ما كلمت فهد قعدت تبكي ,, وهو على الجانب الثاني يهديها يبي يعرف وش السالفه ,, ما قدر يفهم
هيفاء خذت الجوال ,,
هيفاء : جدتي طيبه بس شكلها اشتاقت لك وتدلعت علينا ,, تبي تطمن فهد وفي نفس الوقت تبي تعطي جدتها ثقه شوي ,,,
فهد : هيفاء طمنيني جدتي صاير لها شي ,, مو عادتها تبكي وش صاير لا تخبين علي شي والا ارجع على اول طياره ,,
هيفاء : حلفت لك ما فيها شي ,, جتنا هنا ومبسوطه وكل شي بس يمكن ,, تأثرت بغيابك ,,
فهد : طيب هدت عطيني اكلمها,,
هيفاء : لا خله وقت ثاني برجع اكلمك ,,
فهد : انتظرك لا تتأخرين علي ,,,
هيفاء سكرت وعاتبت جدتها ,, يمه الحين من جدك ,, تصيحين بيقول فيك شي ,,
ام طلال : انا ما ارتحت من سافر,, وانتي زعلتي وجيتي هنا ,, انتوا ما تحسون في ولا لي خاطر عندكم ,, انتوا ما تحبون الا انفسكم ,, انا مالي الا انتوا بسلامة الباقيين ,,
هيفاء : يمه الله يسامحك مو لهالدرجه ,, احنا مو متعمدين نزعجك بس الظروف حكمتنا ,, انتي تعرفين غلاتك عندي
ام طلال : اعرفها يا هيفاء هذا وانتي ما كلفتي على نفسك ودقيتي على تشوفين اوضاعي وش صار معي ,,يا هيفاء لا ترخصين غلاك عندي بتصرفاتك ,, فهد اعتذر وجاء عندك كم مره وانتي رافضه ترجعين ,, وش تبين الواحد يسوي ابي افهم يذبح عمره عشان ترضين ,, ولفت نامت على جنبها ما تبي تكمل كلامها مع هيفاء ,,,
هيفاء تركت لمياء مع جدتها وطلعت لغرفتها ,, قعدت على مكتبها وفيها قهر على الوضع كله ,, جدتها زعلانه زعل كايد عليها ,, ومنقهرها على عمرها تشوف انها سوت الشي اللي يرضيها ,, لكن الظاهر انه موعاجب الجميع انها تختار الابتعاد عنهم ,,
ضاقت بقوووه وقعدت تفكر وش تسوي وكيف ترضي جدتها ,, الا يجيها اتصال من رقم فهد ,,
فهد : هيفاء ما دخلت المحاضرة للحين وش صار على جدتي ,, ما قدرت ادخل وانا بالي عندكم ,,
هيفاء : ما فيها شي قلت لك دلع بس وانا بوسع صدرها ,, ما حبت تعطيه اجابات واضحه عن الوضع
فهد : متى جاتكم جدتي ,, كان قصده بالسؤال ذا انه يعرف الوضع اللي صاير ,,
هيفاء : من كم يوم وما فيها شي والله ,, بس جاء في خاطرها تكلمك ,, هذا كل الموضوع
فهد : ممكن اطلب منك شي ,,
هيفاء وهي متردده ,, : تفضل ,,,
فهد :ممكن تراعين خاطر جدتي شوي وما تزعلينها بعنادك ,,
انصدمت هيفاء من كلمته,, الحين انا غلطانه ومعانده ,, ونسيت نفسك وش سويت ,,
هيفاء : فمان الله وسكرت الخط ما عطته فرصه يقول شي ,, وفهد عرف انها زعلت من طريقته معها ,, يووو يا هيفاء ترى بطفشيني عاد ,,,
عصبت هيفاء على فهد وش فاكر نفسه يعطي اوامر لا يقول عني عنيده ,, اكيد الفكره ذي في راسه عني ,, متى صرت عنيده ,, عشان ما ارضى بالغلط ,,والا لازم ارضى به واقول سامحوني ,, اي منطق ذا ,,,
قامت من غرفتها بتطلع جتها نغمة مسج ,,فتحتها شافت فهد مرسل لها (( اذا لي باقي قدر عندك ارجوك تهتمين بجدتي انا برتب اموري وبرجع اشوفها كم يوم ,,,ارتبكت هيفاء ومادرت شتسوي بعد رسالة فهد ,, شافت انها ملزمة وانها لازم تخفف عن جدتها وجدتها ما راح ترضى الا انها ترجع معها لفهد ,,,,,
احتارت وش تسوي فعلا هي ما تبي ترجع عشانهم ,, تبي هي مقتنعه فعلا بقرارها ,,
جت عند امها لطيفه ,, وقعدت جنبها وهي على سجادتها تصلي العصر ,,
لطيفه عارفه حيرة هيفاء ,, حطت هيفاء راسها في حضن امها وغمضت عيونها وقعدت تنزل دموعها ما بغت امها تشوفها وهي تصيح ,,
لطيفه مربيه هيفاء وعارفه كل مشاعرها واحساسيها ولو ما قالتها ,, مسحت دموع هيفاء بيدها وكلمتها وهي تمسح شعرها ,,
لطيفه : هيوفه ياعمري ,, انا عارفه وش تحسين به ,, انتي مو هاينه عليك جدتك بس ماودك يغصبونك على شي
هيفاء : يمه انا ما ارضى انها تتعب وتتضايق عشاني ,, بس هم جرحوني جرح ما يوديه شي ابي ارضى بس ما قدرت ,, يمه انتي تحسبين ما احبها ولا احب فهد ,, لكنهم صدقوا في اول شي سمعوه ,, هنت عليهم بسهوله وطلقني ,,, والحين يبون ارجع كذا بس ,,,
لطيفه : اذا انتي عاقله وتفكرين لبعدين ومستقبلك ,, ففهد مثل كل الرجاجيل اذا زعل ,, لا تاخذين على زعله ,,
والله مو عشانك ترجعين بس والله يا فهد ما ينتعوض ,, هيفاء عارفه ذا بس كله منك يا فهد انت اللي قسيتني ,,
لطيفه : هيفاء ارجعي مع جدتك والله بيساعدك وبيرضيك ,,,
هيفاء : انا مني براجعه الا وانتي معي ,, وانا برجع عشان جدتي ,, اما فهد فبدري الكلام عليه ,,, جاهم فيصل هذاك اليوم
واول ما دخل على جدته ما تطمن على حالها ابد ,, وعزم يرجعون للرياض يسون لها فحوصات ويتاكدون انها مافيها شي ,,
جاه اتصال من فهد يبي يتطمن على جدته ,,,كان فيصل قاعد مع لمياء في المجلس
فيصل : هلا بك يا فهد وش اخبارك ,,
فهد : الاخبار عندكم ,, وش فيها جدتي ,, هيفاء ما قالت عنها شي ,,
فيصل : وش اقولك يمكن تحتاج فحوصات جابوا لها دكتور هنا قال لازم ترتاح بس ,, لكن انا مو متطمن ,,
فهد : اوكي متى بترجع الرياض ,,
فيصل بكره ان اشالله ,,
هيفاء قعدت جنب جدتها ,,, خذت يديها وحبتها ومسكتها بقوووه في يدها ,,
هيفاء : يمه وش تحسين به الحين ,,
ام طلال : بخير ,, ودي ارجع للرياض وادخل المستشفى ,,
هيفاء : يمه انتي تحسين بشي ,,
ام طلال : تعبانه وفيني ضيقه ,,انا ما ابي اغصبك ترجعين معي ,, ودي تكونين مرتاحه في حياتك ,, لكن ما اقول الا الله يهديكم ,,
هيفاء : برجع معك يمه ,,,
ام طلال : صحيح ,, صحيح يا هيفاء ,,وخذتها لصدرها وضمتها وهي تحس براحه عجيبه من قرار هيفاء ,,,,
طلع فيصل ولمياء في السيارة معاهم ام طلال ولطيفه وهيفاء ,,
وتركوا شنطهم مع الشغالات في السياره الثانية ورجعوا للرياض في رحلة يملأها الأمل من كل الأطراف بمستقبل احسن للجميع ,,,
ريما قاعده تجهز كل شي عشان وصولهم من غرفة جدتها لغرفة هيفاء ,, للمجلس واستقبال الضيوف ,, الى كل شي يبي تجهيز ,, كانت تساعدها خديجه في تحضير الاساسيات وتشرف على كل صغيره وكبيره ممكن يحتاجونها
طلال وسلطانه مرت حياتهم بشكل روتيني ,, مكتفين ببرنامجهم وما حبوا يضيفون له اي تغيير ,, كلهم يحبون الهدوء والاستمتاع بوقتهم بعيد عن مسؤليات العمل والبيت ,,
فهد اتفق مع نواف على حجز بعد بكره انه يجي الرياض كم يوم ,, واستغل نواف هالفرصه اذا جاء فهد بيخطب ريما رسمي ويملك عليها ,, ويخليها تتجهز براحتها ,, رب ضاره نافعه ,, مرض جدته وتعبها بيترك له فرصه انه يكلم فهد اذا جاء ,,
وصل فيصل للقصر بعد مشوار كم ساعه ,, تعبت لمياء من الطريق عشان ظهرها فكان يسوق بشويش عشانها ,,, نزل وفتح الباب لجدته اللي كانت جالسه جنب هيفاء ومتسنده عليها ,, وخذ يدها ومشى معها للقصر ,, ومشوا البنات وراه ,,,
اول ما دخلوا ,, استراحت ام طلال على الكرسي ,, وحست بدوخه ,, فقالت يمكن انها من الطريق ,,,
ريما وهي واقفه وفاتحه يدينها بكبرها لهيفاء ,, كان عناقهم مؤثر لدرجه صيحت الباقين ,, من طلال وسلطانه ولمياء وحتى لطيفه ,,,
بكوا الثنتين بشكل يحزن وما عرفوا قيمة بعض وغلا بعض الا لما بعدوا عن بعض
ريما وهي تشد شعر هيفاء : يا ويلك اذا رحتي مره ثانيه ,, انا ارضى ان فهد يزعل بس انتي لا لا ,,,
هيفاء وهي تضمها مره ثانيه : الله لا يجيب الزعل يا عمري ,,,
دخلت ام طلال تستريح في غرفتها ,, واتفق معها فيصل بياخذها للمستشفى بكره بيسون لها فحوصات ,,
ريما خذت هيفاء بعد ما نامت جدتهم وطلعت معها لغرفتها ,,,
ريما : نورتي مكانك يا قلبي ,,, اشتقت لك والله
هيفاء : تدرين بغلاتك عندي يا ريما لكن اللي صار يخلي الواحد يفكر في نفسه ومكانته عند الاخريين
ريما : انتي ما تعرفين مكانتك عند فهد ,, انتي لو تشوفين بس كيف سوى تحريات ما قدر يصدق انك بتسوين هالشي صحيح الغضب اعماه في البدايه لكنه رفض يرضخ للموقف ووراهم لحد ما اكتشف كل شي ,,
هيفاء : قولي لي ,, ومسكتها ريما وقعدت تقص عليها كل السالفة ,,
ريما : ومن يومها مشاعل مادخلت بيتنا ونواف محرم عليها تطلع الا في اضيق الحدود ,, صارت تقول للعنود اول حد بيتقدم لي باخذه ان شالله وشو ولا هالعيشه ,, اما عبير ,, فدرت بمشاعل واللي صار لها ومن يومها حرمت بنفسها تجي خايفه حد يشرشحها ,, لان مشاعل قالت للعنود ان عبير متقفها معها ,, وعنود قالت لي ,,
راح نص الليل وهم يسولفون ,, وفي الاخير هيفاء قالت لريما انها بتروح تنام عند جدتها هاليومين لانها حاسه انها ممكن تبي شي في اي لحظه ,,,
في الصباح بدري ,, قامت ام طلال واستعدت تبي تروح للمستشفى فأصرت هيفاء انها تجي معهم هي وفيصل ,, ما تقدر تترك جدتها لحالها ,,
ام طلال : يمك انا بروح انا وفيصل بنكفي ,, واذا احتجتك بكلمك ,,
هيفاء : مستحيل يمه انا بروح معك ,,
طلعوا مع فيصل للمستشفى الخاص ,, واول ما وصلوه وقاموا بفحوص لأم طلال , اقترح عليهم الدكتور ان ام طلال تنام في المستشفى كم يوم ,, عشان يتمون كل الفحوصات على رواقه ,,
وافقت ام طلال ,, ورتب لها الدكتور اجراءت الدخول ,,, هيفاء على طول كلمت ريما تجهز لهم اغراض للمستشفى وتجيبها لهم ,, بعد فتره بسيطه طلعت ام طلال فوق لغرفتها في المستشفى ,,,,وهيفاء معاها في كل لحظه ما تغيب من عينها ,,,
تركهم فيصل في الغرفة عشان يرتاحون ,, وأكد لهم انه بيرجع لهم العصر بيشوف الطبيب وش اخر اخباره ,,,
قامت هيفاء كعادتها اذا جت المكان ورتبته اكثر مماهو مرتب ,, رتبت سرير جدتها وطلعتها عليه ,,, وكلمت لمياء وعطتها اخبارهم ووصتها على امهم تهتم فيها هاليومين اللي بيغيبون فيها ,,,
قبل الظهر جتهم ريما محملة بكل شي من مفرش لام طلال ,, الى غيار لهيفاء حق يومين ,, وشنطة ام طلال وملابسها ,,
وما نست انها تجيب لهم القهوة والشاي والمكسرات للمستشفى ,,,
ظلت هيفاء وريما يرتبون المكان ,, ووصت ريما السواق يجيب ورد عشان يضفي للغرفه شكل ,, اكيد صديقات ام طلال اول ما يعرفون انها في المستشفى بيزرونها ,,,
ام طلال حست بأسترخاء تام في المستشفى ,, وحست ان اعصابها مرتاحه من يوم رجعت معهم هيفاء ,, ما باقي الا فهد انه يلتم شمله معهم ,, تمنت ذيك اللحظه بفارغ الصبر ,,
بعد ما طلعوا منهم الزوار بعد المساء ,, خذت ام طلال هيفاء عنده ومسكت يدها ,, وقعدت توصيها في اغراضها ,, لان الدنيا ما تنضمن ,, ووممكن الانسان يفارقها في اي لحظه بدون مقدمات ,, حاولت هيفاء تخفف عن جدتها مشاعرها الطبيعية ,, اكيد ان جدتي خايفه لحد ما تطلع الفحوصات وتطمنها ,, بس ان شالله ما يكون فيها اي شي ,,,
ما سمعت من فهد اي شي وما رجع يكلمها وما ارسلت له شي بعد ,, فتوقعت ان فيصل يقول له عن كل شي ,, حاولت انها ترسم صورة عن لقاءها بفهد اذا فكر انه يجي فعلا ,, وش راح تقول له ,, كيف بتسلم عليه ,, فكرت مده طويله وفي الأخير توصلت الى حل ,,,
بعد ما نامت جدتها , بدلت ملابسها ولبست لها قميص قطن عادي ,, وحررت شعرها وقربت لها شرشف للصلاه صغير ,, في حال ان اي حد ممكن يدخل فجأه ,, وتعطرت بعطرها اللي تحبه حيييل ونامت على كرسي المرافق للمريض ,,
مع وصول الخطوط السعوديه فجر ذاك اليوم قادمه من لندن ,,, كانت مشاعرفهد مثل هدير محركات الطائره ,, تدور بسرعه ثم تقف عند نقطه معينه لتعيد الكره مره اخره ,,,
ما في باله الا شيئين صحة جدته اللي تطمن عليها قبل يركب الطايرة لما كلمه فيصل ,, وهيفاء هل رضت وبترجع حياتهم طبيعي والا لا ,,,
اول ما طلع من ارض المطار كان السواق في استقباله وطلع معاه على المستشفى على طول ,,,
وصل فهد لمركز الممرضات وسئل عن غرفة جدته ,, واكدت له الممرضه انها نايمه ,, وياليت يزورها بعدين ,, فهد ما التفت لها وكمل طريقه لغرفة جدته ,, دخلها وشاف جدته نايمه على السرير وهي شبه مغمضه ,, وفتحت عيونها اول ما شافته وحست به ,, وهيفاء اللي نايمه على الكرسي وما اشبهها بنفس ذاك اليوم واول مره يشوفها نايمه في سرير جدتها ,, قرب يم جدته ,, وباس راسها ,, والتفت لهيفاء اللي لحافها نزل منها ,, فخذه ولحفها ,,, ومسح على شعرها وما قدر يمسك نفسه وباس خدها وهي نايمه ,,
رجع لجدته يبي يسألها عن حالها ,, لكن هيفاء اللي فتحت عيونها بعد حركته ما شافت الا ظهره ,, حطت اللحاف على وجهها وسوت نفسها نايمه ,, وقلبها يدف بقوه ,, انحرجت منه يشوفها بذا الشكل وهي نايمه خصوصا انها من زماااان ما شافته ,,
قعد فهد يسولف مع جدته بهدوء عشان ما يصحون هيفاء اللي صاحيه وهما مو حاسين ,, ثم طلع منها وقال بيرجع على الظهر عشان يشوف فحوصاتها ,,,
اول ما طلع وسمعت هيفاء تسكيرة الباب ,, قامت مستعجله ودخلت الحمام تبي تغير ملابسها يمكن يجي في اي لحظه ,, لكنها سمعت ام طلال تناديها من ورى الباب ,, هيفاء تعالي كملي نوم ,, فهد مو جاي قبل الظهر ,,,,
هيفاء وهي تغسل وجهها : يا حبي لك يا جدتي ,, لا تحاتيني انا طالعه الحين ,,,
هيفاء تشوف ان اليوم غير طبيعي بحضور فهد ,,,
الله يعينها على الساعات القادمة وكيف بتحكي معه ,,,
جاهم الدكتور الصباح واخبرهم ان ام طلال مافيها اي شي الا ارهاق بسيط وقل غذاء ولازم تهتم في حالها ,, حتى لو يعطيها مقويات تحت اشرافه كطبيب ,,,
هيفاء متوترة من جية فهد ,, ما تبي تسوي نفسها عاادي ,, لازم يعرف انها راجعه عشان جدتها وبس ,, واذا هي تبي ترجع له بترجع باقتناع منها ,,,
غيرت لجدتها وعطتها بعض الفاكهة ,, وقعدت تسولف معها ,,
ام طلال تحب طريقة هيفاء معها ,, تشوفها غير متكرره مع اي احد قبل ,.. لها طريقه في مسك الاشياء وترتيبها ومشيتها ورزتها في قعدتها ,, لها دور كبييير ,,
وهم يسولفون وهيفاء تضحك جدتها تبيها تستانس ,, ما شافوا الا فهد يدخل عليهم ,,, وعينه على هيفاء ,,
فهد : مساء الخير ,,
هيفاء : مساء النور
فهد ما بغى يمد يديه لها بعد يمكن تفشله ,, فأكتفى بالسلام
ام طلال : وشلونك يمه ان شالله ارتحت ,, شكلك ما نمت ,,
فهد وهو ما رفع عينه من هيفاء ويحاول يتبعها بنظره ,, لانها حست به ان يركز عليها فحاولت تسوي بعض الترتيبات في الغرفة ,,
فهد : الا نمت يمه بما فيه الكفاية بس مشتاااق ...... هيفاء التفت عفوي له تبي تشوف تكملة كلمته ,,
بس مشتاااق اعرف الطبيب وش عنده
صدت منه هيفاء وهي تضحك ,, ما قدرت تمسك ضحكتها ,,علي هالحركات يا فهد
فهد شاف كتفها يهتز عرف انها ضحكت ,,
فهد :بعض الناس شكلهم فيه شي مونسهم يا ليت يشاركونا فيه ,,,,
هيفاء سفهته وكملت شغلها ورتبت الورد في الفازا
ام طلال :لا ابشرك الدكتور طمنا ,, الحمدلله ما فيني الا العافيه ,,
فهد : اي مريت عليه وقال لي علومه كلها ::: بس انا ما راح اعتمد على كلامه ,, عشان كذا بعد اسبوع بسافر انا وانتي وهيفاء لندن !!!
وعينه على هيفاء يبي يشوف ردة فعلها ,,
هيفاء : ما في داعي جدتي تسافر دامها طيبه بالعكس السفر راح يكون متعب عليها ,,,
فهد كان قاعد على الكرسي وقف وقرب لهيفاء وهي تتكلم : اذا طلبت رأيك يا قلبي علميني به ,, لكن هذا قراري ,, وما عليكم الا انكم تتجهزون ,,
وطلع من الغرفة وهو يضحك في قلبه على هيفاء ,,, ما صدقت يا هيفاء انك رجعتي في حماي تبين اخليك ,,,