ابوطلال في المستشفى معه ولده سعود والدكتور يأكد له ان وضع الوالد مستقر بس لازم يأخذ المغذي كم يوم ويتجاوز اللي هو
فيه
طلعوا البنات للسوق بعد ما دخلت عمتهم ترتاح ومروا على العنود وقالوا لها تجهز لحد ما يوصلون
كانت هيفاء متأثره من موقف جدتها اللي عطتها مبلغ لها هي ولمياء مع انهم اكدوا لها ان عندهم فلوس بس هي اصرت عليها ان
تشتري ملابس للعشاء تكون مناسبه تبي صديقاتها يتعرفون عليهم
وعلى ماقال ابيكم تشرفوني,,,
وصلوا البنات السوق وفروا المحلات يدورون قطع تناسب اذواقهم كل وحده في صوب
استغرق التسوق منهم 3 ساعات وجلسوا في كافي مخصص للنساء وكل وحده قالت وش عجبها ,,حست لمياء ان بالها مشغول
مو معاهم
العنود:لمووو اللي شاغل بالك يتهنا فيه
لموو :هااا لا ولا شي بس افكر كيف اسوي شعري في العشاء
ريما: شعرك ما يحتاج شي ناعم بس ارفعيه بكلبات وخلاص
هيفاء : ماهو الشعر هو اللي يأخذ الوقت في كل مناسبه وضحكوا على نكته قالتها عن اشكال الشعر وقاموا وهم مبسوطين
على طلعتهم
مرت الايام على نفس الوتيره لين كان يوم الخميس وعشاء ام طلال الخاص لبناتها
بعد الغداء وما دخلت جدتهم تنام جلست مريم والبنات في المجلس المطل على الحديقه
مريم : لازم تكشخون الليله صديقات امي سيدات مجتمع واكيد بيسولفون عنكم فلازم
تستعدون زين
ريما : اسم الله عليهم والله لو يلبسون خيش بيصير يجنن عليهم
هيفاء وهي تحب ريما في خدها :الله يسلم قلبك يا حبي عيونك الحلوه
مريم : اصلا اللي ما يشوفكم حلوين عنده قصر نظر انا اقصد بس تكشخون زين,,
طلعوا كلن الى غرفته يرتاح ويتجهز والبنات نفس الشي ,,
هيفاء وهي حاطه رولات لشعرها من تحت ورافعه غرتها بكليب جالسه عند المرايه
تسوي المكياج بترتيب دقيق ,,
تحب ترسم عينها بالكحل لحد ما تأخذ عينها شكل العين العربيه الأصيله مع حواجبها المقوسه
ولمياء دخلت تاخذ شاور وطولت وهي على ذا الحال صارت اذا انعزلت شوي بالحالها تشوفها تسرح
فيصل شاغل تفكيرها بقوه ,,, يا ترى هل انا شاغله تفكيره بعد
طلعت بروب الحمام وحطت لها مكان على الارض وجلست عليه ترتب شعرها وتجففه بالهوا الحار ثم خذ الشكل النهائي له في
لحظات من نعومته
طلعت فستانها الحرير لون اصفر هادي ماخذ القصه الفرنسيه على جسمها ومعي شكلها حلاوه اكثر وطلعت صندلها المرتفع ما
باقي الا اكسسوارتها تلبسها
اما هيفاء لبست فستان شيفون بني بتموجات جلد النمر مع حزام اسود عريض عطاه نوع من التأنق
لبست عليه صندل اسود بخيوط رفيعه اضفت على شكلها شياكه متميزه
كالعاده دخلوا على جدتهم وهي تسمي عليهم وتعوذهم من عيون الناس
الجميع اصبحوا في المجلس مستعدين لأستقبال الضيوف
توافدوا صديقات ام طلال وتوزعوا في انحاء المجلس والاحاديث الجانبيه مسيطره عليها
هيفاء تحس بنظرات الحريم من فوق لين تحت حتى حست انها في مجلس رجال مو حريم حشى عليهم
وهي جالسه تسمع بعضهم يقول ماشالله لا اله الا الله وين ما وريتونا هالبنات ياام طلال
وام طلال ترد بكلمات مقتضبه ما تبي تفسر لهم كل شي واكدت انهم عند جدتهم الثانيه
لمياء وهي تأشر على الشغاله توزع الحلويات على الحريم سمعت ثنتين يتكلمون
اكيد امهم حلووه اللي هذا جمالهم انبسطت في سرها وعرفت انهم نالوا اعجاب الجميع
مريم وهدى كانوا يشرفون على كل شي وحابين انهم ما يقصرون في حق ضيوفهم
وسلطانه اللي واقفه معهم بلغتهم بأعتذار اختها ام نايف بسبب ظروف عند زوجها
اما البنات فكانوا متأكدين انه عشا حريم رسمي وما راح يكون فيه الوناسه اللي
متوقعينها . قرر فهد ونواف انهم يرجعون بسبب كثرة الأتصالات من الشركه وشافوا ان
الأفضل رجعتهم قبل الجمعه علشان تستقر اوضاعهم شوي,
فهد وهو يدخل مع السواق اللي وصله للقصر يشوف زحمة السيارات اللي مو غريبه عليه ابد تجمعها
دايم جدته تحب تجمع صديقاتها ومؤكد هاذي عشية من العشيات
كمل طريقه لبيتهم وقرر انه يجيها في وقت ثاني
دخل واستقبلته الشغاله عند الباب وقالت له ان مدام سلطانه وريما عنده ام طلال
وطلع لغرفته في الطريق مر على فيصل يمكن يحصله بس حصل الغرفه فاضيه
فتح غرفته وحصلها مرتبه مثل ما وصى ريما عليها هو متعود ان محد يدخل غرفته
الأ بأذنه ,, ما يحب احد يدخل عالمه ودايما غرفته من المحرمات على الجميع الا بأذن
تعودوا اهله على طبعه وله هيبه تساعده في الشي هذا
طاح على سريره من التعب وارخى ظهره وفكره على بكره وشغله وجدته !!
بعد ما طلعوا الحريم كلهم وطلعت هدى وبناتها لبيتها طلعت مريم تشوف عيالها
وجلست ريما عندهم وخدتهم السوالف
لمياء : ريما وشرايك تنومين عندنا الليله
ريما : والله فكره ما طرى علي خلاص تم
هيفاء : يا سلام احس راح ننبسط بالهذره طول العشاء واحنا ساكتين
ام طلال تدخل : دام ريما تنام عندكم تعالي يا هيفاء سليني لين انام ,
هيفاء من عيوني يا يمه دقايق اغير ملابسي واجيك
طلعوا لغرفتهم دخلت وخذت شاور ولبست بيجامتها الحرير تبي تكشخ لريما
نظفت وجها من المكياج ولمت شعرها على فوق ولبست سليبر في رجلها وراحت وهي كلها نشاط لجدتها تحس تبي تسعدها ولو
بشي بسيط يفرح قلبها
لمياء وريما كملوا سهرتهم يسولفون شوي ويشاهدون التلفزيون يقطعون الوقت
هيفاء وهي ترتب سرير جدتهاو تعطره قالت لها جدتها تجي تنام تسولف عليها .
دخلت هيفاء مع جدتها وسولفوا ساعه اغلبها تكلم ام طلال عن عيالها وعن فيصل بالتحديد الموضوع اللي هيفاء كانت كلها اذان
صاغيه له وما حسوا بالوقت .
خذتهم السوالف لين ارتخت عيونها وما قدرت انها تروح وكملتها رقده بسرير جدتها
مسحت ام طلال على شعر هيفاء وهي تفكر في شي وتتمنى انه يتحقق
مع تباشير الصباح ويوم جديد محمل بالتفاؤل والخير
طلع فهد يسلم على جدته قبل يطلع للصلاه,, اتجه لجناحها وشاف خديجه تجهز الفطور
ما انتبهت له لأنها معطيته ظهرها وكمل طريقه لجدته بيفاجأها لأنه حس بشوق لها غير المره هاذي
دخل جناحها ما حصلها في مجلسها وتأكد انها للحين بغرفتها فتح الباب شوي وحصل الغرفه للحين فيها ظلام كنها ماقامت
وارتاع لأنه موطبع جدته تنام لوقت متأخر
شافها نايمه على السرير قرب وهو خايف ليكون صاير فيها شي
فتح نور الأباجوره والتفت عليها ورجع على ورى لما شاف النايمه عللى السرير
فتح فمه يبي يتكلم بس جمالها وهي مثل الملاك اخرسه
نايمه على المخده وشعرها الكثيف متبعثر على خدها ورافعه يدها على مخدتها ويحس باسترخائها و ما حست فيه ابد
سمع صوت المويه في الحمام وعرف ان جدته تتوضأ,,
طلع بسرعه قبل حد يحس فيه ورجع لخديجه يبي يستفسر منها
فهد : صباح الخير يا ام الخير
خديجه : صباح النور يا طويل العمر متى وصلت بالسلامه
فهد : بلا رسميات يا خديجه انا مثل ولدك من كبرت وانتي تعامليني رسمي
خديجه : يعلم الله انك مثل ولدي بس انت لك مكانه وقدرك كبير عندي
فهد : ما قصرتي ,, الا جدتي وينها
خديجه : صحيتها من شوي وما راح تطول تلاقيها جايه
فهد وهو متعمد : خلاص انا اروح اجيبها تفطر
خديجه وقفت بسرعه : لا الله يسلمك هيفاء بنت عمك فيصل نايمه عندها
توقف فهد في مكانه واللي يبي يعرفه وصل له , خلاص استعجليها شوي
جات ام طلال يمه وقام ورحب بها وحضنها وهي تدعي له من كل قلبها,,,
طلع فهد من جدته وهو منقبض شوي طول عمره ما تهزه بنت ولو اجمل البنات
لف الدنيا وشاف اشكال والوان وعرف بنات بس ولا فيه وحده ملت عينه
لكنه كل ما تذكر الموقف اللي صار حس بعدم ارتياح ,,
خديجه وهي تنادي على البنات يفطرون جاهم اتصال من ام وليد صديقة العايله
واثنت على ضيافتهم البارح وثم سألت عن ام طلال,
ام طلال : يالله حيها يأم وليد عسى انبسطتي البارح
ام وليد : اكيد انتي تسوين شي ما يجي حلوو ,, وسعنا صدرنا من جاك لازم يطلع مبسوط
ام طلال : عسى والله ...
ام وليد : الأ بسألك يام طلال : بنات ولدك مخطوبات ؟؟
ام طلال : الله يبارك فيهم .. ليه وش عندك
ام وليد : والله ما بغيت اكلمك في هالظروف بس قلت يمكن احد يكلمك قبلي
ودي اخطب لولدي وليد وحده منهم
ام طلال وهي تكلم بحذر بس حست الدم فار في راسها : الله يقسم لك الخير
بس بنات فيصل تكلموا عليهم عيال طلال ,,, وهي تبي تسكر عليها وعلى اي حد يفكر نفسهم
سكرت منها ورفعت السماعه على طلال تقولها يمرها بعد الصلاه
طلال : هلا والله بطويلة العمر وشلونك يالغاليه
ام طلال : شف يا طلال انا ما راح اصير بخير ولا اتطمن الا تزوج عيالك بنات فيصل
انا كفايه علي اللي احسه تجاهم اني اهملتهم طول هالسنين والحين انا بصلح غلطي
وعيالك ما راح يحصلون احسن منهم
طلال : ابشري يالغاليه لا تكدرين على نفسك انا بنفسي ودي انهم عندنا
لا تحاتين شي اللي تبينه يصير
في مكان ثاني من القصر,,
البنات في جناح عمتهم مريم يسولفون معاها ولمياء ترسم لبناتها الصغار ضي ورهف
حيوانات واشجار (ماهره في الرسم)
مريم : هيفاء وش تخصصك ؟؟
هيفاء : لغة انجليزيه ,,احب القصص المترجمه من كنت صغيره وحبيت اعرف عن الأدب هذا شوي ودخلته
مريم : كويس شي ممتع طيب ليه ما اشتغلتي بعد التخرج
هيفاء : اول حاجه امي مو راضيه انا نشتغل تعرفين النظام لازم يودونك خارج الديره
ويالله تخلصين المده وكانت الفكره مرفوضه عندها ,,
لسى ما كملت جاتهم خديجه وطلبتها لأم طلال
قامت مريم بسرعه حست ان خديجه وجها مو طبيعي
اتجهت بسرعه لجناح امها دخلت وهي تسمع امها تكلم في التليفون : اذا خلصت من ابوك مرني
مريم : عسى ما شر يمه ابوي فيه شي,, ومن اللي على التليفون
ام طلال : هذا فهد ,,, اسمعيني انا ابي فهد وفيصل ياخذون بنات عمهم ولا راح يحصلون احسن منهم مثل ما شفتي ,, تربيه وعلم واخلاق وفوق كل هذا ما ودك تشيلين عينك منهم
ابيك تكلمينهم ويعرفون ان هذا الشي هو في مصلحتهم واذا على امهم انا مستعده اكلمها تجي تسكن معنا ,,
مريم : طيب كلمتي فهد في الموضوع ,, انتي عارفه فكرته في الزواج
ام طلال : فكرة ضايعه انا صبرت عليه والله ما كتب شي الا يوم ارسل لنا بناتنا هم
راس المال ولا راح ارضى عليه ابدا اذا رفض,,
ابوطلال وام طلال وعيالهم
ابوطلال : فهد انا طول السنوات اللي مضت كنت مخليك على راحتك
وما ضغطت عليك تتزوج ولا اخوانك كذلك لكن انت الكبير ويهمني اني اخليك تأخذ وقتك
والحين انا اطلب منك تتزوج هيفاء بنت اخوي فيصل,,
فهد : يبه انا مالي اعتراض عليها بس انا فكرة الزواج ما ابيها وارجوك انك تتفهمني
ابو طلال : ترى انت مسختها برفضك للزواج منت صغير عشان ترفض,,
فهد : طال عمرك وسع صدرك انا ما قصدي بس
ابو طلال : لا تكمل لأني وعدت جدتك وانتهى الموضوع والكلام لك يا فيصل
ام طلال : ابو طلال شفيك معصب كل شي بالغصب الا الزواج ,,
فيصل : ابوي عنده حق هذولا بنات عمنا وحنا اولى بهم من الغريب ,,انا موافق يبه ,,
ابو طلال : بارك الله فيك يا ولدي وهو يطالع فهد اللي قام واستئذن منهم وطلع وركب سيارته وجلس يلف في حيهم ويرجع لباب القصر ثم يغير الأتجاه ويلف ثاني لين حس ان راسه بينفجر
هذه اخرتها يتحكمون فيه طول عمره يتحكم في الأشياء والصغير والكبير يسمعها شمعنى اهم قرار في حياته حس هالشي مضيق عليه الدنيا وتذكر شكلها يوم شافها
وحس انه كرها لأنها هي السبب انهم يتحكمون فيه ,,
ما سمع للجوال وهو يرن ورفع الخط
ام طلال : فهد وينك فيه
فهد وبرود : بغيتي شي يمه,,
ام طلال : انا قلت لك تمر علي ابيك الحين ,,, طمنها انه جاي في الطريق
مريم : هيفاء ابيك تروحين للمجلس بتحصلين فيه كتاب في المكتبه بيجوز لك مترجم
اسمه سيكرت ( كان هدفها انها تخلي هيفاء تنشغل في اي شي لحد ما يجي اخوها طلال هي كلمته يجي علشان يكلم البنات حست انها ما تقدر على مواجهتم
هيفاء وهي تفز بسرعه صحيح يا عمتي انا سمعت عنه الكتاب هذا توه نزل للأسواق
ومريم تأشر لها صحيح ,,,
تعودت اذا نزلت تحت تحط شرشفها بعنايه على شعرها ممكن اي احد يجي ,,
ضغطت زر المصعد تبي تنزل وانفتح الباب في وجهه ناظر بعيونه وكلها هم ما خفى عليها
فهد : السلام عليكم ,,
هيفاء وهي تنزل راسها ,, وعليكم السلام طلع من المصعد بسرعه عشان يسمح لها تدخل ولا اهتم لها اكثر من كذا
هيفاء وهي تدخل المصعد حست ريحة دهن العود منتشره في المصعد خذت نفس عميق بقوه تبي تشم الريحه حست انها ريحه ثمينه جدا ما قد شمت نفس العطر
( اكيد ما راح يشتري الا غالي فكرت في نفسها ))
بس ليه احس مهموم ( يمكن خسرفي مشروع لا سمح الله ,, وش خصي انا ,,
ام طلال : شف لا تجيب لي اعذار انا قلت كلمتي وما راح تكسرها لي
وابيك ترضيني ,,
فهد : ومالك الا الرضا ,, ( لازم ارضيها وفي نفس الوقت اكيد لازم ارضي نفسي بعد
بس كيف ,,كانت افكاره تدور في نفسه)
قام لها وحب راسها ومسكت يده : فهد ما راح تندم ابد اسمع كلامي
فهد وهو مو مزاج يسمح له انه يأخذ ويعطي معها : على خير يالغاليه
وطلع منها وهو ضايق حده بس الشكوى لله ,,,
(( الجزء السادس))
طلال وهو يتشاور مع مريم على جنب جتهم لمياء وهي تشيل صينية القهوه حطتها على الطاوله وحست ان فيه شي بس مو واضح ( لا يكون جدي فيه شي ,, بس مو باين انهم خايفين
طلال : لمياء وانا ابوك وين اختك ؟
لمياء : جايه الحين بالطريق ,, عمي جدي فيه شي ,, ؟؟
هيفاء وهي تدخل عليهم : السلام عليكم
الجميع وعليكم السلام
قعدت بجنب عمتها مريم وحست بخوف من يوم نادتها عمتها , لا يكون يبون يأخذونا من امنا ,, ما بقى الأ هذا
لا تضعفين قدامهم يا هيفاء انتي طول عمرك قويه ,, قعدت تكلم نفسها وهي ما انتبهت ان عمها يكلمها : هيفاء يا بنيتي انتي معانا
هيفاء : لبيه يبه ,, اي معاك الله يسلمك
طلال وبصوت خشن شوي ( طول عمره نظرته في الأمور جديه وحس انه لازم يكون جدي وما يلين كلامه حتى لو حس ان فيه قسوه عليهم هو ما راح يعطيهم اي خيار بيأمرهم وبس وفي الأخير هو لمصلحتهم
شوفوا يا بناتي ,انا من توفى ابوكم وانا احس بحسرة فقد الأخ اللي ماله ثمن وزاد حزني اكثر لما عرفت عنكم ولولا وضع الوالد انا كان لي تصرف ثاني ,,
وانا عندي موضوع ابي افاتحكم فيه انتوا بناتي ولا راح اختار لكم احسن من فهد وفيصل يكونون لكم ازواج ويسعدونكم ويعوضونكم عن فقد ابوكم
هيفاء وهي تفتح فمها تبي تتكلم
طلال : لا تقولين شي يا بنتي ما راح اقبل بأي عذر وانا ولي امركم ولو فيه احسن من عيالي ما قلت لا
لكن انا متأكد انهم بيسعدونك ,,, لمياء تأثرت من الموقف ونزلت دموعها بصمت حست نفسها ضعيفه
نزلت عيونها تلعب بأصابعها ما تبي حد يلاحظها
هيفاء : عمي المسأله مو سالفة الزواج المسألة في امي,,
طلال : امك على عيني وراسي وادين لها بذا الفضل وانا بكلمها وبعلمها لا تحاتين الموضوع الا اذا كان لكم اعتراض على عيالي ,,,
هيفاء انحرجت ما عرفت وش ترد هم مصيرهم يتزوجون وعند اهلهم بيكون الوضع مختلف
مريم وهي فرحانه : من زمان ما صارت عندنا مناسبة زواج وحضنت لمياء وهيفاء وتمنت لهم كل خير,,,
سلطانه وهي تكلم فهد اللي مو معاها ابد يحس بضيقه ما لها اخر (انا اللي اخطط واتصرف في كل شي
يجي ابوي يخطط لي ماعمري رفضت لك طلب ولاعصيتك يبا تجي الحين تجبرني
بس يسمع صوت ثاني في نفسه فهد انت ليش رافض زواجك الى متى تبي تصير عزابي مهو مصيرك بتتزوج
صح بس مو الحين ابد ولازم شريكة حياتي اختارها عن اقتناع مو يجبروني بها ,,
سلطانه : فهد انت معي ,,
فهد : نعم ,,وشو ,,اي اي معك يمه
سلطانه : اذا كان على ابوك انا بكلمه مره ثانيه مو مسئوليتنا انه يعطف على بنات اخوه يحطهم براسكم لازم يعرف هالشي
فهد : ما ينفع الكلام الحين يمه وعلى ما قال سبق السيف العذل,,انا ما اقدر ارفض له طلب ولو على قطع رقبتي
لكن انا راح اتصرف ,,,سلطانه وهي مليانه حزن على ولدها فهد خصوصا وهي عارفه وضعه ما قدرت تغير من رايه وتخليه يتمرد على ابوه لكن سواة الله احسن ,,,
فيصل عند ريما في غرفتها متمدد على الكنبه ويسمع السي دي الشغال بصوت منخفض
فيصل : ريما وش تعتقدين رأي لمياء بتوافق؟؟؟
ريما : يهمك تعرف هالشي انها توافق عليك شخصيا ولا توافق على فكرة الزواج نفسها ولا ايش بالضبط؟؟
فيصل : يا شين التفلسف سألتك سؤال وردي غطاه مو تتشعبين
ريما بضحك : اعصابك يا قلبي شفيك اسم الله عليك لاتكون مصخن وانا مدري
فيصل : اتركي عنك حركات الأستهبال هاذي انا اسئلك وش تظنين
ريما : مدري بس ما اظن ابوي يعطيهم فرصه بس الأهم يا فيصل انك ما تتزوجها وانت باقي حد في حياتك
فيصل وهو يتفاجأ من صراحتها
لمياء حساسه يا فيصل ولازم تداريها زين و,,, للحين بتكمل وقفها فيصل
فيصل : اعتقد انه مالها حق في حياتي اول وهذا شي خاص فيني واذا هي تبي اكون لها بس لازم تكسبني ,,طلع فيصل وهو معصب على ريما حيل اللي استغربت منه ومن نرفزته ( اكيد فيه احد في حياته ولا ليش يعصب ) بس هو يقدر يرفض اذا هو ناوي يأخذ اللي يحبها
سعود وهو جالس مع ابوه في المجلس مر عليهم فيصل طاير يبي يطلع لربعه
استوقفه ابوه : فيصل على وين
فيصل : للربع يبه تامر شي
طلال : سلامتك بس بغيت اعلمك اني كلمت البنات وموافقين على الموضوع واذا الله راد بأسرع وقت
فيصل اللي ريما ضيقت عليه بأسئلتها وتحليلاتها : على خير يبه وكمل طريقه برى .
طلال وهو يدعي ربه انه اتخذ القرار السليم للجميع
جلست ام طلال وبناتها في مجلسها الخاص يتابعون برنامج على التلفزيون دقت عليهم هدى :
ام طلال : هلا يمه وشلونك
هدى : تمام يالغاليه قالت لي مشاعل انك كلمتي تسألين عني ,,
ام طلال .: مابه الا الخير ابي ابشرك ان فهد وفيصل بياخذون بنات فيصل
هدى على الجهة الثانيه تشهق من صدمتها
هدى وش هالكلام يمه بالسرعه ذي ما امدانا نعرفهم ونعرف اخلاقهم...
ام طلال ( وما تبي البنات يسمعونها شتقول )
الله يوفقهم ويسعدهم ما تشوفين شر فمان الله ,, وسكرت السماعه تبي تقطع عليها تكثر في الكلام
هيفاء استئذنت انها تعبانه تبي تريح شوي بس هي اساسا تبي تهرب من الجو هذا
لمياء ومريم الي كانوا منشغلين على ضي ورهف والعاب الكومبيوتر اللي معهم ما لاحظوا خروجها من المكان
فكملت طريقها لغرفتها وهي تحس حمل ثقيل على صدرها ,, مو مرتاحه من خطبة عمها لهم وحست بالتزام عيال عمها
ما تبي عطف ولا شفقه من احد طول عمرهم لوحدهم وقادرين على مصاعب الدنيا
حست السعاده اللي كانوا فيها قبل يجون بيت عمهم لها طعم والحين ابتدت حياه من نوع ثاني يا ترى كيف بيكون شكلها
حست بحنين لأمها ورفعت الجوال تكلمها
هيفاء : هلا يمه وشلونك مشتاقه لك حيل
لطيفه : وانا مشتاقه لكم يا بعد عمري ,, كلمني عمك اليوم
هيفاء بحزن ما درت وش تقول : يمه ,,,
لطيفه : يا بعد عمري انتي تذكرين وش كنت اقولك :: الله يسعدكم ويرزقكم اللي يعرف قدركم واظن ان الله استجاب دعائي
هيفاء : يمه الله يخليك تجين انا احس اني عاجزه عن التفكير واحس عمي ما وده يتركنا بعد هالعمر واللي يسلمك يمه
لطيفه : يمه يا هيفاء بجي بس مو الحين مهما كان انتم عند اهلكم وحتى لو كنتي عندي وتزوجتي ما راح
اروح معك بيت زوجك اذكري الله وما راح يصير الا الزين
سكرت منها وهي تمسح دموعها اللي ما تنزل الا عشانها وما حست بعمتها مريم وهي تدخل ,,
خذت مريم منديل ومسحت دموع هيفاء ولمتها بقووه :: يالله وش كثر حنونه يا عمتي يا بخت عيالك ,,,
مريم : انتي ما تبين فهد ::؟؟
هيفاء: مو مسأله يا عمتي ,, انا حسيت المسأله ان عمي يأنبه ضميره ويبي يريحه , بس يمكن عياله ما ودهم
مريم : لو ما ودهم ما وافقوا يا قلبي كل شي غصب الا العرس تأكدي انهم يبون ومقتنعين بعد بس انتي ريحي بالك
دخلت لمياء هي والعيال وانقطع حديثهم لشي ثاني ......
في فيلا واحد من الشباب يتجمعون فيها
كان فيصل يلعب ورق مع ربعه وبعضهم يشوف التلفزيون جاه اتصال من nnn
فيصل : هلا يا قلبي ,, ام ,, ادق لك بعدين ,,
نوار على الخط : حبيبي انتظرك لا تتأخر علي,,
سكر فيصل وكمل لعب مع الشباب وهو عارف نوار وش تبي
نواف وفهد قاعدين في حديقة القصر وفارشين سجاد يستمتعون بالليل والجو الوقت خيالي وما راح يتكرر على طول
سولفوا عن موضوع الزواج وعلم نواف بكل شي
نواف : فهد انت عارف انك اتخذت القرار الصحيح ,,
فهد : اي قرار اللي اتخذته قصدك اللي اتخذوه , انا مالي الا الطاعه
لكن انا بوريك ان ما طينت عيشتها ما اكون فهد ,,
نواف : لا لا مو هذا فهد اللي يتكلم ,, احسك واحد ثاني فيه نزعة انتقام ,, فهد اعقل وانا اخوك ترى هي مالها ذنب نفسك بعد مجبوره فكر في هالشي والا ما فكرت الا في عمرك
فهد : مجبوره ,, ضحكتني وهي تحصل واحد نفسي ترى لولا ان جدي علم عن حقيقتهم كان ما يتحلمون انهم يعيشون هنا
نواف : الله يهديك يا فهد انت مستكثر عليهم الخير اللي هم فيه ترى هم شركاء لكم ولا نسيت
رمى فهد كاسة الشاي اللي في يده على العشب الاخضر وزفر زفره حاره حسست نواف ان فهد يعاني بقوه من القرارالصعب اللي انحط فيه,,,
لمياء وهي منسدحه على رجل هيفاء وتسولف عليها ,,
لمياء : تهقين ان عمي قالهم عن الموضوع مثل ما قال لنا والا هم عرضوا عليه
هيفاء : مدري راسي بينفجر من التفكير ذا ,, بعدين وش تفرق ,, احنا انحطينا فيه كلنا ولازم نستحمل الله يستر يا لمياء قلبي مو مرتاح ,,,