`~*.*~`¤-_هو .و. هي _-¤`~*.*~` يوم اجتمعوا
بقلم : أحلى ظبيانيه


حشره صايره في بيتين...
نروح لأول بيت اللي هو بيت (بو سعيد)

علياء عمرها 23 تصرخ بأعلى ما عندها: مو على كيفكم والله هذي حياتي هو على كيفكم تقررون منو آخذ ومنو اتزوج
امها (ام سعيد) تحاول تهديها: يا بنت ارمسي عدل انتي تكلمين ابوج
سعيد اخوها اصغر عنها بسنه: اصلا انتوا وايد مسوين لها سالفه زوجها غصب وخلاص
راحت صوبه عشان تضربه بس امها مسكتها
ام سعيد: شو تبينه خليه
علياء: قولي يسكت عني بالأول
بو سعيد كان اهدى واحد رغم هو اللي مطلع قرار زواجها: يا بنتي هذا لمصلحتج

نروح لبيت ثاني القسم الثاني من القصه بيت (بو محمد)
عادل عمره 23 سنه وهو بعد مب عاجبنه القرار: انا بس ابى اعرف قلوا البنات ولا شو يعني
بو محمد يحاول يقنعه: يعني لو دورنا لك وحده غيرها بتوافق
عادل مصر: لا ما بوافق انا ما افكر بزواج ألحين
محمد اخوه متزوج : ليش إنزين ما تبى تتزوج
عادل: ما ابى يا اخي وبس هو غصب يعني

نرجع لصوب ثاني الصراخ فيه ازداد
لأنه علياء كانت تضرب سعيد وام سعيد تصرخ عليهم من صوب وبو سعيد ميود راسه لين ما صرخ عليهم

طالعوا ابوهم شوي ورجعوا يضاربون ولا كأنه توه ابوهم نازعهم ورجعت ام سعيد تحاول تفك من بينهم

بو سعيد ما اتحمل اكثر ... وبدأ يعصر على قلبه .. لين ما طاح على الارض وهالشيء خله ام سعيد تصرخ خوفا عليه وركضت صوبه وهو كان مغمى عليه
علياء تهز ابوها: يبه يبه .. صرخت على اخوها : شو تتطالع خلنا نودي المستشفى
سعيد مرتبك : هيه صح صح


نروح لصوب ثاني
بو محمد: تاخذها يعني تاخذها انت لازم تزوج ونفتك من مشاكلك
محمد: صدقه ابوي يمكن تصطلب بعد الزواج
خوله توها كانت نازله من فوق وشاله علي عمره 5 سنوات ..
خوله : شو صاير
خوله تصير اخت علياء وهي ماخذه محمد اخو عادل وعندهم ولد واحد وهو علي
بو محمد: العنيد مب راضي يسمع الكلام
عادل: خولوا شوفيهم يبوني غصب اتزوج
خوله ادافع عنه: حرام عليكم الزواج مب بالغصب ترى
محمد: خوله انتي اسكتي
خوله: ليش اسكت اصلا حتى اختي ما بتوافق انتوا تعرفون الاثنين ما يطيقون بعض فكيف تزوجونهم
عادل: صدقها خوله نحن ما نطيق بعض فكيف تزوجونا
بوم محمد: لا تصير ببغاء وتردد كلامها انا وبو سعيد اتفقنا وخلاص تزوجون يعني تزوجون

رن تلفون خوله فراحت عنهم بعيد لأنه كانوا شالين البيت فوق راسهم

بو سعيد: انتوا ايه احشمونا على الاقل معقوله ولا واحد فيكم عنده عقل هذي آخر تربيتنا


خوله : شو متى صار ؟ خلاص خلاص الحين ابلغهم
خوله شوي وكانت بتصيح راحت عند محمد: محمد ألحق ابوي طاح عليهم وألحين هو مرقد في المستشفى
محمد: شو ؟ متى
خوله نزلت الدمعه من عينها: توها علياء خبرتني
بو محمد: شو صار؟ ليش خوله تصيح
محمد: يبه عمي منوم في المستشفى
بو محمد ما انتظر شيء .. بعدما اخذ اسم المستشفى انطلق وما انتظرهم حتى .. لازم اللي طاح شخص عزيز على قلبه ربيعه من ايام الطفوله وشريكين في التجاره

محمد: خوله روحي ألبسي عباتج وانا بشل علي وبترياج في السياره
خوله: إن شاءالله
ربعت لغرفتها
عادل: وانا بسبقكم
محمد: اوكي نتلاقا هناك

في المستشفى
ام سعيد مغرقه المستشفى بدموعها
وعلياء : اهوو امايه ادعي يقوم بالسلامه بدال ما تصيحين وتغرقين اللي في مستشفى
ضربتها على كتفها: انطبي انتي السبب اذا صار شيء لأبوج ما بسامحج
خافت علياء: بسم الله على ابوي وعلي انا شو يخصني والله سعيد هو اللي بدا
سعيد يدافع عن نفسه: انا ولا انتي ... محد معور قلب ابوي غيرج انتي حشى تسوين مشاكل اكثر عني انا بعد
علياء: اسكت عن اعضك مثل آخر مره تذكر خليتك تصيح
سعيد: تراج تقربين .. وتم ينبح مثل الكلاب:هو هو هو
بغت تروح صوبه بس ام سعيد صرخت عليهم: بس بس الله يغربل إبليسكم خافوا ربكم حرام عليكم
وتمت تصيح وكل واحد فيهم تم واقف في صوب ...
لين ما وصل بو محمد: ها بشروا شو قالوا الدكاتره
ام سعيد تصيح وترمس فما قدر يفهم شيء
علياء: عمي انا اترجم لك الدكتور بعده ما قالنا شيء
طلع الدكتور بنفس الوقت فتجمعوا صوبه
بو محمد: ها دكتور شو فيه
الدكتور: اتقوا الله .. كان بكمل بس صياح ام سعيد وقفه
سعيد: يمه ليش تصيحين
ام سعيد:ما تسمعه شو يقول وتمت تصيح
الدكتور : لا يا الحاجه انتي ما فهمتي قصدي
بو محمد : كمل انزين
الدكتور: كنت بقول اتقوا الله ولا تسون حشره ترى المريض بخير صابه جلطه بسيطه في القلب بس ها لازم تهتمون فيه عشان ما يتكرر
علياء: الحمدلله امايه سمعي الكلام كامل قبل لا تسوين لنا انهار مالحه
مسحت دموعها: نقدر نشوفه
دكتور: خلوا يرتاح ألحين بس هو طلب خصيصا بو محمد
بو محمد: انا بو محمد
دكتور: تقدر تشوفه بس لا اطول معاه
سعيد: ونحن
دكتور: انتوا بعدين مروا عليه
علياء مستغربه : شو هذا بعد ليش ما نقدر نشوفه
دكتور: بتسون عليه زحمه
بومحمد: انتوا سيروا وانا دخل عليه وبشوفه شو يبا وإن شاءالله ما يصير إلا كل خير

علياء خذت اهلها رغم إنها مب مرتاحه من السالفه وهم رايحين تقابلوا مع عادل
عادل: ها سعيد شو اخبار عمي
سعيد: بخير بس الدكتور يقول إنه ممنوع الزياره ألحين اونه لازم يرتاح
عادل: ايوااااااا عيل ابوي وينه؟
سعيد: بس سمحوا لأبوك يدخل
ام سعيد: وش فيك ما تسلم
عادل: حقج علي عمو انشغلت في عمي
وراح يسلم عليها
طالعوا بعض بنظرات احتقار .. علياء تجدمت عنهم
ام سعيد: وين رايحه ترييني
لحقتها ام سعيد
سعيد: عيل اشوفك بعدين يا .. يضحك بسخريه: يا النسيب
عادل بعد رد عليه بسخريه: في الاحلام يا سعيدان
سعيد هو يتحرك: بنشوووف
تم واقف عادل في مكانه ...

نخليهم شوي ...
وخلونا نعرف سبب الزواج ... بالغصب
طبعا الاثنين ما يقدرون يزوحونهم بغصب .. من جذي سكتوا عنهم لفتره .. رغم إنهم مقررين من زمان إنه الاثنين لبعض .. يرحون عند ناس يعرفونهم احسن من ناس غرب .. هذا كان فلسفته هالعائله
والدليل زواج محمد ولد مرزوق من خوله بنت راشد
والحمدلله عايشين بهناء
وهالفلسلفه الكل حافظنه لكن الاثنين مب عاجبنهم اللي هم عادل و علياء... ما يطيقون بعض لأسباب مجهوله ..
صح إنه قليل ما كان يدور بينهم كلام لكن يوم يتكلمون لازم يضاربون لأنهم ابدا مب متفقين على شيء
وابو محمد وابو سعيد عادي كانوا بصبرون عليهم بس بعد الحادثه اللي صارت بينهم اتفقوا انه ماشيء مجال ينتظرون اكثر
عشان يعقلون لازم يتزوجون على قولة دعاية جبن كرفت عشان يكبروا لازم يعقلوا .. وين رحتي
احم احم نرجع لقصتنا
الحادثه الاولى
البنت مفصوله من الجامعه .. وبعدما ما فصلوها اشتاقت للجامعه وصارت تحضر بوقت وتحضر كل محاضرتها .. البعض يعرف إنها مفصوله وبعض ما يعرف والبعض يعرف إنها مفصوله بس ما يعرفون إنها اداوم وهم الإدراه
بس كيف بتحصلين شهاده دام الإداراه ما تعرف إنج ادوامين ..؟؟ البنت فضلت ما تعور راسها وتفكر بها الموضوع
المهم فيه واحد من الدكاتره اللي يدرسونها يعرف إنها مفصوله فسألها : انتي ردوج مره ثانيه
ابتسمت: هيه دكتور ليش مب مستانس
بدون نفس: وانا شو يخصني فيكي
بصوت واطي: يكون احسن .. وضحكت
دكتور: قلتي حاجه
ميوده ضحكتها: لا دكتور
رجع يشرح .. هي وربعها تمو يضحكون
نوف: هههه مب هينه انتي
علياء: اعرف
سهى: ضيعتي على عمرج ليش تشاغبين هالقد وبالنهايه شوفي شو صار فيج
علياء: وانا شو درابي سياره اللي صدمتها بتطلع مال الضيف اللي ياي عندنا
سهى: انتي السبب
نوف: وانا شو يخصني
علياء: صح إنتي السبب راهنتي معاي اونج علياء اذا انتي بنت امج وابوج وعندج كرامه وعلى قولتج تسوين كل شيء ادعمي هالسياره
سهى: والاخت ما صدقت وسوته
علياء: ما تسمعينها السالفه فيها امي وابوي وكرامتي كان لازم ادعمه بسيارتي
نوف: وبالنهايه طلع سيارة ضيف شرف مسوي زياره في الجامعه هههههههه والمشكله إنه شافج وانتي رايحه وراجعه تدعمين بالسياره
علياء:ههههه هيه والله ... ولا بعد عبالهم فيني حاله نفسيه
سهى: خخخخخ والله هالتصرفات وحده فيها حاله بعد شو
قرصتها بقو فصرخت من الالم والكل تم يطالعها
دكتور: سهى في حاجه
سهى خايفه: لا دكتور
نوف وعلياء يضحكون عليها وغاطين حلجهم بيدهم
دكتور: بلا قله ادب وألتزمي الصمت
اونها عصبت منهم .. وتمت ساكته ما تكلمهم

الدكتور بعدما خلص راح لغرفته وهناك سأل دكتوره عن علياء فخبرته إنها مفصوله ومستحيل يردونها
عاد دكتور لقاها فرصه وراح عند الإداره وبلغهم ... وعلياء كانت يالسه في الكافتيريا تاكل وتضحك وما عليها من احد
وسهى اللي كانت زعلانه لازم بترضى دام علياء معاها

نوف لمحت عصابه معصبه يايين صوبهم
نوف:اوييي علياء الادراه وجنودها يايين صوبج
علياء: وينهم
كانت بتشرد بس فات الاوان .. الإدراه سمعتها كلام جارح وجدام البنات بعد الكل تم يطالعها وهي ما تتطالع غير الدكتور اللي كان مستانس ...
علياء قاطعتهم: خلاص إنزين بلاكم معصبين ألحين بروح
تحركت وتحركوا معاها ربعها
نوف: هذا اكيد الدكتور مخبر
سهى: صج فتان
علياء:دواه عندي هالقرعه
نوف: شو بتسوين
دخلوا الكلاس وعلياء راحت صوب طاولتها تشل اغراضها
علياء: قولي شو ما بسوي
ضحكت بخبث والاثنين تموا واقفين حايرين وبنفس الوقت خايفين يعرفون علياء مب هينه
وعلياء بنت نادره الوجود او يمكن مب موجود يوم تسوي شيء اتسوي بأسلوب مختلف .. والبنت هالمره ناويه على شيء ... بعدما ودعتهم ... راحت صوب ساييرهم وتمت تشخبط فيه بالروج مع حبي همسة غلا بشتاق لكم .. وشو ي مشخبطه بدرهم على البونيد سياييرهم .. بذمتكم هالبنت مب طبيعيه صح؟
وقفت : اخيرا طلع الابداع
ركبت سيارتها وراحت عنهم ....

ردت البيت وسيدا على غرفتها ..

وما كمل إلا ساعه وامها داخله عليها تصرخ
ام سعيد: علايه علايه قومي
علياء ولا كأنها تسمع شيء
ام سعيد تهزها: قومي يا اللي مصدعه فيني قومي
علياء: امايه شربي لج شي بارد واستريحي
سحبتها وخلتها تقوم: اقولج قومي ابوج يترياج تحت ومفول على الآخر
علياء: والله
ام سعيد: هيه شو مسويه انتي في الجامعه؟
علياء: ولا شيء
ام سعيد: قومي عيل يالله تحت
صح إنها طلعت بس كانت منخشه ورا امهـــا ...
تكلم ابوها من وراه امها: عسى ما شر ابوي
بو سعيد مفول: انتي شو مسويه في الجامعه
علياء تظاهر بالبراءه: ولا شيء
كان بجدم عشان يضربها بس ام سعيد ما خلته
ام سعيد: شو فيك ليش تبا تضربها؟
بو سعيد: سأليها البنت هذي صج مطفره فينا يقولج مشخبط على سيايير وفوقه طلعت مفصوله
ضربت على قلبها: مفصوله ؟!
صدت وراها اطالع علياء : صح الكلام؟
علياء خلتها تصد جدام: امايه انتي احميني وبس
امها كل ما تبى تصد وراها .. ما تخليها تختف عن ابوها يضربها
بو سعيد: علياء خلاص انا وايد صبرت عليج و وصلت حدي
بس ألحين خلاص .. بدأ الضغط يرتفع عنده
ام سعيد: يا بو سعيد هدأ لا تشغل بالك عليها .. ولا تنسى الدكتور شو قال يوم كانت صغيره وايد نشيطه
علياء تقدمت: ابوي تقصد إني مفرطه النشاط انا شو اسوي احس في شيء داخلي ما يخليني اقعد مكان واحد
بو سعيد: حرام عليج يا علياء السالفه كانت بتوصل الشرطه
ام سعيد ادافع عنه بنتها: شو ؟! شرطه؟ ليش بنتي شو مسويه لا يكون ذابحه ولا سارقه والله بنتي مسكينه والله
حضنته وعلياء معاها على الخط اونها بريئه
بو سعيد: انا خلاص قررت انتي لازم تزوجين عشان تعقلين
راح عنهم بعدما عطاهم كلمته ... تمت تنقز بعدما سمعت كلام ابوها
علياء: يمه سعي ابوي شو قال
ام سعيد: اهووو ما عليج من ابوي بس انتي اصطلبي وفكينا من حشرتج ...


وبصوب الثاني
بو محمد في المخفر
ليش ؟؟
لأنه ولده عادل مضارب .. لأنه الاخ خسر في الريس فظلوا كم من شباب يعلقون عليه .. عصب الريال وراح هو وشلته يضاربونهم ..
وبعد اخذ تعهد بينهم .. رجعوا البيت وطبعا ما سلم من توبيخ ابوه واخوه
بو محمد: استح على ويهك في شهر 3 مرات ادخلنا المخفر استح على ويهك
محمد: ابوي لازم نزوجه عشان يصطلب
عادل: محمد يا اخي لا تقعد تفر راس ابوي
بو محمد: صدقه اخوك ما شيء الا هالحل انت من زمان مخير لعلياء وألحين خلاص انا بكلم ابوها
عادل: لا لا مب على كيفكم
ماشي فايده تركوا في صاله واقف لحاله وراحوا عنه


بعد يومين طلع بـو سعيـــد .. ورجعوا لموال الزواج
علياء كل ما كانت تبى تقوله شيء او تعترض على شيء تخاف على صحته لأنه كل مره كان يمسك بقلبه

فأول ما وافقت على الزواج ... الكل نقز من الفرحه بس ألحين عادل منو بخلي يوافق نروح لبيتهم ونشوف

عادل توه كان راجع من برع ومثل كل مره ابوه كان يترياه
عادل يوم شاف ابوه فهم السالفه من جذي سلم من بعيد
بس وين يا عدول ما بتقدر تشرد من ابوك
بو محمد: وقف
وقف عادل وقبل لا يتكلم بو محمد رد عليه عادل: دخيلك ابوي لا تعيد السالفه والله إني مليت طفرت من السالفه كل يوم ع هالحال فكوني عاد
بو محمد بضيق: انا اللي مليت والله حرام عليك انا اول مره اشوف ولد يذل ابوه جذي
عادل: حرام عليك ابوي ما عاش من يذلك
بو محمد:اذا هذا مب ذل عيل شو .. ذبحتني والله كثر ما اترجاك .. وبنبره تعور القلب حتى الحصى يمكن يحن عليه.. :- بس انتوا وين من تكبرون خلاص تنسون انه عندكم والدين ربوا وتعبوا عليكم
عادل كان يسمعه كلامه وبنفس الوقت حاس خلاص وصل حده وبكل بروده وبدون نفس: موافق
بس بو محمد ما انتبه عليه ويالس يكمل كلامه: من بعدما ماتت امكم من بقى غيركم
عادل بصوت عالي شوي: يبه قلت لك موافق
بو محمد: بس انت موافق لكن ..
انتبه عليه: شو قلت؟
تنهد عادل: انا موافق على هالـ .. سكت
بس بو محمد من الفرحه كمل: على هالزواج صح
عادل: هيه
من الفرحه حضن ولده:عفيا عليك يا ولدي
مسكه من كتوفه: ألحين اقدر اقول انك ولدي بروح اتصل في راشد وابشره
صح إنه كان يبتسم بس في قلبه شيء ثاني كان .. حاس بضيق
عادل: عشان تعرف إني احبك وما اقدر اذلك
بو محمد حضنه مره ثانيه وراح يتصل في راشد

راشد بعدما سمع الخبر ...نقز من الفرحه
فاستغربت علياء اللي كانت يايه من المطبخ وبيدها كوب عصير
حتى تمت واقفه الا تعرف شو السالفه ويوم صكر راشد
من عند بو محمد
سألته علياء: ها ابوي بشر اشوفك مستانس فرحنا معاك
راشد راح صوبها: شو بفرحني اكثر يوم اشوفج عروس
من قال عروس اختفت البسمه من ويها ....
راشد: يقولج عادل وافق على الزواج
بسخريه: ما ادري شو يحسب نفسه هذا اكيد كان بوافق دام السالفه فيها علياء الحلوه
مسح على شعرها: الله يهديكم بس .. اليوم بمرون علينا وبنتفق على كل شيء
علياء: يبه تذكر انا ما ابغي عرس ملجه وبس
راشد: انا اهم شيء عندي تزوجون


الاتفاق كان على هذا شكل
عادل وعلياء اتفقوا إنه ما يبون حشره ويوله
وعادل اصر إنه يعيشون في شقه ولا بهون عن الزواج
فشاور عليه بوم محمد دام عندهم بيت قديم فليش ما يعيشون هناك
منه ومناك وافقوا يسون حفله بسيطه في الملجه

علياء من وافقت على الزواج ... نشاطها خف ما تحب تكلم حد واحياننا ما يكون لها بارض تاكل .. فخافت عليها امها ..
ام سعيد تعدل الفراش وتكلم بو سعيد
ام سعيد: بصراحه يا بو سعيد انا خايفه من هالزواج
بو سعيد: لا تخافين كل شيء بكون بخير
ام سعيد: ما ادري والله من وافقت على الزواج البنت متغيره
بو سعيد: يمكن عقلت
ام سعيد: البنت لا تسولف مثل قبل ولا تاكل وما تضحك الا بقوه وتقول لي عقلت
بو سعيد وصل صوب باب الغرفه: اقولج اطمني ولا تشغلين بالج عليها
طلع بو سعيد .. يلست ام سعيد على السرير
ام سعيد: كيف ما اشغل بالي
قامت بسرعه وراحت صوب غرفة بنتها
علياء كانت منسدحه على ظهرها وريول فوق وريول ويدها تحت راسها وكانت تتطالع فوق .. طالعت امها شوي ورجعت تتطالع فوق

ام سعيد تبتسم لها: ها علاوي شو تسوين
علياء اطالعها: ولا شيء يالسه افكر
ام سعيد راحت صوبها ويلست: وشو تفكرين
علياء: يالسه افكر شو افكر
ام سعيد باستغراب: شو؟؟
عدلت نفسها ويلست صوب امها: افكر شو افكر ؟ من سالفة الزواج وانا عقلي مشوش مب عارفه حاسه نفسي ما اعرف

ام سعيد تبى تهديها: حبيبتي لا تحاتين ترى عادل خوش ولد
ضحكت علياء: خوش ولد يمه ما تركب يعني تشوفين من أي نواحي إنه عادل خوش ولد ما ادري هذا ريلج شو شايف فيه
وقفت ام سعيد: ارمسي عدل عن ابوج .. وبعدين ابوج لا يمكن يضرج
تلعب بأظفارها: مب مشكله إن ما طلعت عيونه هذا عادل ما اكون علياء
ام سعيد: شو تقولين
راحت صوبها ومسكت من يدها: يمه علياء هذا زواج مب لعبان حياتج بتتغير من بعده .. قاطعتها علياء: هههه امايه لا تخافين كنت اتمصخر
ام سعيد: خوفتني الله يهديج
علياء ضحكت بمكر: لا تخافين ... (الله يعينك عادل)

عادل كان طالع مع ولد خالته مروان اللي كان ميت من الضحك
عادل يضربه: وش فيك تضحك حياتي بتدمر وانت يالس تضحك لي
مروان يمسح دموعه: خخخخخ علياء ما غيرها كككككككككك
عادل: اضحك اضحك اشعليك انا اللي متوهق
مروان مسك نفسه: بصراحه لايقه عليك انت محتاج حرمه حاره عشان تأدبك كككككككك
عادل تم يضربه : صج امحق صديق
مروان: كككككك بس صج علياء مب هينه
عادل: اشوفك تعرف عنها وايد
مروان: الله يخلي منى من ترجع من الجامعه تقعد تحش عنها تعرف إنها مفصوله
عادل: لا ما اعرف بس ليش
خبره مروان باللي خبرتهم منى
عادل: هذي وحده مينونه ويبون يزوجوني
مروان: بالعكس انا اشوف شخصيتها وايد حلوه
عادل: تزوجها انت عيل؟
مروان:هههه ما اقدر .. رفع يده : هالخاتم ما بخليني
عادل: هيه من قدك مخطوب من وحده ما عليها كلام
مروان: ايه عاد لا تحسدنا خخخخخخخ

مروان تم يضحك يوم سكتوا .. ضحك لأنه تذكر شيء عن علياء .. متى اول مره شافها
كان توه مخطوب ومسوين عزيمه في بيتكم عادل .. طلع من الميلس عشان يدخن وفجأه سمع احد يكح
مشى خطوتين وشاف علياء كانت تكح واطالعه بنظرات احتقار عمره ما شاف هالنظرات
علياء: وياء ويهك ما لقيت الا هنا ادوخ
انتبه عليها: ها؟ اسمحي لي بس انتي شو تسوين هنا
علياء: كنت اغازل .. وبنبره توبيخ:أنتوا شكو فيني
تحركت عنه بس هو وقفه: انتي اكيد علياء
طالعته بنظرات ... وبس ما ردت عليه ... راحت عنه
اما هو فتم يضحك: هذي علياء ما غيرها على قولة اختي مولعه دوووم

تم الخطوبه بينهم والملجه بعد اسبوع ..
وعلياء كل ما يقولونها قومي اشتري ترد عليهم مب متفيجه
حتى اغلب الاغراض امها اشترت لها
سعيد دخل وشاف اخته يالسه في الصاله تتطالع التلفزيون
وبيده كوره .. فراح صوبها
سعيد: علاوي شو تسوين
ما ردت عليه
سعيد: اسألج انا وياء هالراس
ويوم شافها بعد ما ردت عليه فر عليها الكوره
عصبت علياء: سعيد والله اني مفوله على الاخر لا تخلني ارتكب فيك جريمه
وقوه ويه بعد يلس حذالها: ألحين انتي عروس لازم ما تفولين مضر لبشرتج على الفكره
مسكت الكوره وتمت تضربه لين ما شبعت

قامت من عنده واتصلت لربيعتها: نوف بليز ابى اطلع انتي متفيجه
نوف: اكيد عيووووني
علياء: خلاص تجهزي بمر عليج انا
نوف: صاروخ عيوني


في سيارة علياء
توه بس ركبت نوف .. علياء رمست: بموت بموت من القهر
نوف: بل خوفتيني تحركي بالاول وبعدين اشتكي

نوف: زين انتي اذا مب موافقه لا تسوين
علياء: ابوي والله بس عشان خاطر ابوي كسر خاطري
نوف: بس هذا زواج يا ماما لا انتي تبينه ولا هو يباج خوش زواج والله
علياء: الله كريم بس انزين وين تبين تروحين
نوف: انتي وين تبين ؟
علياء: ما ادري والله .. اختاري انتي
نوف : هيه عشان بعدين الزواج ماشي طلعات على كيف كيفج
علياء: تخسي حياتي بتظل مثل ماهي لا عادل ولا غيره بخرب علي حياتي تعرفين شو ؟ ما عندي سالفه متضايقه لأنه حتى بعد الزواج مب متغير شيء في حياتي
نوف: من صدقج
علياء تصرخ: اكييييد .. ووووووووووووووو ... تضغط على الريس

المجله كانت عاديه ... يعني عزيمه بن الاهل وبس
حتى يوم كانوا يودعهم في المطار ... الاهل كانوا يوصونهم وام سعيد كانت تصيح
بس الاثنين ولا كأنهم موجودين في السالفه .. مووووول باردين على الآخر
بو محمد: ما وصيك عليها
بو سعيد : علياء لا تصدعين بالريال
علياء تتطالعه وتضحك: ههههه
بو سعيد خاف من ضحكتها: ليش تضحكين
علياء انتبهت: ها ولا شيء لا تخاف ابوي
بو سعيد: هيه .. زين يالله روحي عند ريلج
علياء: ريلي؟!
بو سعيد: وش فيج علياء روحي عند عادل
علياء: اووووو هيه صح اسمح لي عاد مب مستوعبه انه عادل (ضغطت على الكلمه): ريلي

وقبل لا تتحرك سعيد ياء صوبها: اختاه ما وصيج اباج تشترين لي هدايا
علياء تطنز: من عيوني وانا كم سعيد عندي يا اخوي العزيز
وفجأه امها حضنتها وتمت تصيح وترمس: بنتهمتيفعمرج بس محد فهمها
خوله: ممم امايه شو تقولين
علياء حاضنه امها وتضحك: تقولي بنتي اهتمي في عمرج
خوله: والله محد يفهم لأمي غيرج
حضنتها خوله ..

علي: عمي وين بتروح
محمد: عمك ألحين خلاص ما بتفيج لنا
عادل: بالستر عاد

اعلنوا عن موعد السفر ...
ودعوهم ع سريع ...
صح إنهم كانوا يمشون مع بعض .. لكن نظرات كل واحد فيهم ع صوب .. حتى يوم صعدوا الطياره تموا ساكتين

عادل قعد قرب النافذه ..
علياء : حووو مستر عادل انا ابغي اقعد هنا
هذي اول مره تكلمه من اول ما خطبوا لين الحين
عادل: والله يا آنسه علياء انا يلست قبلج
علياء: اقول عاد خلك عاقل وتعال اقعد هنا
عادل: انا اعقل عنج وإذا مب عاجبنج روحي دوري لج على مكان ثاني
علياء كانت بترمس بس المضيفه طلبت منها تقعد لأنها صاكه على اللي وراها
قعدت بقهر ...
عادل: سمعي نحن جدامهم بس رايحين لشهر العسل
علياء: اكيد
عادل: زين يوم تعرفين كل منا في صوب ومحد يدخل في حياته الثاني
علياء: ريحتني وألحين انطب صوتك صار وايد مزعج
طالعها بنظرات وصد عنها
وفجأه نطقت علياء: إيه تعال لا يكون بنكون في غرفة وحده
عادل:بعدني ما تخبلت
علياء: ومنو قال .. ضحكت بسخريه
عادل: شو تقصدين ؟ إني مينون
علياء: هههه جاوبت بنفسك
عادل عصب: علياء
علياء بعد معصبه: عادل
شرارت طالعه من عيونهم ...
عادل: مالت .. صد عنها
علياء: مالت ... صدت عنه

• جنون قصايدليل في التصاميـم
• لآ تسألونيے مـכּ أڪَوכּ •● هُنآ أنفَآسْ وξـشقـہآ כـتى الجنوכּ •●