منتديات قصايد ليل - عرض مشاركة واحدة - رواية يدري إن اسباب ضعفي نظرته يدري إني ما اقاوم ضحكته كامله

09-10-2011

الــــــــــــبــــــــــــــارت 42

------------------------------------------------------

من رجع وشاف امه ما قدر ينام كل تفكيره في الأيام اللي فاتت واللي صار من 3 ايام تذكر الوضحه تذكر وش سوى لها وكيف كانت تترجى وتبكي وتذكر ابوها واخوها و اهلها حط أيديه على أذونه واهو يغمض عيونه ويهز رأسه يبي يطرد شكلها وكيف كان تبكي وقف وابتعد عن سريره مو قادر يجلس في غرفته كل مكان يذكره فيها سريره وسادته كل شيء ريحتها موجوده يحس فيها بنسمات الهواء حوله

فهد : آآآآآآآآآآآه وش سويت فيك يالوضحه

سمع صوت الآذان هلل وذكر الله دخل يتوضأ ولبس ثوبه اخذ شماغه على كتفه وطلع من غرفته متجه للسلم انتبه لفرح معها عبايتها وشنطه صغيره هاند باغ

فرح (ابتسمت) : صباح الورد
فهد : صباح النور وين رايحه
فرح (ماسكه عبايتها ونقابها) : القريه عند خالي
فهد (وقف على السلم وبلع ريقه) : وضحه
فرح (وصلت آخر السلم وحطت الشنطه تعدل لفتها) : ايه
فهد (نزل وقف قدامها) : مع من
فرح : مع عمي فهد كل البنات انا وليالي سمر وعذاري ومي كلنا بنروح
فهد : ليه
فرح(ألتفت له وبنبرة حزن) : الصراحه من يوم اللي صار وحلفت ما تجلس هنا بس تبي أمها كانت منهاره متحطمه اخذها خليفه وجدي للقريه وبعدها ما عاد سمعنا شيء عنها حتى الجوال مسكرته ولا ما ترد بس زوجة اخوها ترد علينا وتطمنا
فهد : من
فرح(تكمل) : اليوم المشؤوم
فهد : وش صار
فرح : بصراحه انت اخذت المفتاح ورفضت تفتح حتى رفضت تعطينا المفتاح وطلعت من البيت والحمد لله في مفتاح ثاني للغرفه فتحنا الغرفه وما قدرت ادخل دخلت سلمى وامي لها انت ما رحمتها يمكن غرورك عصبيتك أعمتك إن اللي قدامك إنسانه يا فهد جسمها ما عاد فيه مكان ينشاف كله ضرب
فهد(غمض عيونه وتراءت قدامه الذكرى ) : ضربتها
فرح : أيه بس انت صح ما خالفة امر الله او تعديت المسموح صح محلل لك وضحه بس أنت كنت متوحش همجي باللي صار كنت تبي تثبت نفسك وتجبرها وتكسر رأسها بس الوضحه مهما كانت تتضاهر انها قويه بالنهايه امرأه
فهد : وش صار بعدها
فرح : كانت تصارخ وتهذي كانت ترفض أمي تقرب لها هي وسلمى تقول أكرهكم ليه ما حميتوني ليه خليتوني له لانه ولدكم يعني وكانت تضرب وجها وتقول وش اقول لأبوي كنت تصيح وتقول وش بيقول اخوي عني وش بقول لجدي الوضحه مو كذا فهد السبب ليه وكانت تصارخ طلعت امي وبقت عندها سلمى لين هدأت وصارت بس تبكي بصمت بدون كلام تبكي وهي جالسه في زاوية غرفتك سمعت صوت ابوي وقالت لسلمى ما اقدر اطلع اشوف عمي حست نفسها مخطيه رغم ان السبب أنت بس تحس انها مذنبه صار اللي صار وأمي طاحت علينا نقلناها للمستشفى بس أخذنا ساعتين وأيدنا على قلوبنا وحالة أمي ما تسر والدكتور يقول الضغط مرتفع تعرضت لصدمه أو موقف هزها
فهد (صد عنها) : ..................
فرح(تكمل رغم أنها تحس انه يتألم نادم) : رجعنا للبيت والوضحه كانت قافله على نفسها بغرفتها القديمه وتبكي وما تبي تفتح على الليل تفاجئنا في خليفه وجدي
فهد (ألتفت ) : وبعدين
فرح (تجلس على الكرسي) : دخل جدي وخليفه وكان ابوي وخالد موجودين طلب خليفه يشوف الوضحه بما انه رافضه تفتح حتى لما قلت لها ما صدقت خالد اخذ له طريق وصعد معه لغرفة الوضحه وجدي وأبوي جالسوا في الصاله التحتية تركهم خالد لما وصله للباب ونزل لتحت انا كنت واقفه عند باب غرفتي وشفت وسمعت كل اللي صار بينهم واهم ما انتبهوا لي او لوجودي

خليفه (يضرب الباب) : وضحه انا خليفه

وضحه ركضت للباب وفتحت له دمعة عيونها ونزلت على خدها وخليفه انصدم وجمد من شكل وجها وانتبه لرقبتها وايديها لان ثوبها نص كم زراق وحمار دمعة عيونه لشكل اخته فتح ايديه لها وهي ما صدقت رمت نفسها في حضنه ضمها لها بس سمعت انين منها

وضحه(بهمس وبشهاق) : توجعني ياخوي
خليفه (خف من ضمها وبهمس) : وش فيك
وضحه (حست نفسها بتطيح مسكت ثوبه) : تعبانه
خليفه (شال أخته ودخل وحطها على السرير) : بسم الله عليك
وضحه(مسكت ثوبه وبدموع وألم) : لا تبعد

خليفه جلس جنبها وأيده حول خصرها ورأسها على صدره يحس بدموعها تبلل ثوبه ويسمع شهقاتها ويحس باهتزازها بين أيديه مسك نفسه لا يبكي قدامها وانتبه لرقبتها أثار ضرب وجها أيديها غمض عيونه واهو يكتم عصبيته لا يفجر في البيت يبيها تبكي لين تهدأ ولا تكتم في قلبها حس أنها هدت عدلها وجلس قدامها ومسك يدها

خليفه : وضحه وش صار ليه كل هذا الزراق والكدمات في جسمك تكلمي من سوى فيك كذا
وضحه (تطالع له وهي تبكي) : فهد
خليفه : فهد ضربك
وضحه : ليه جاء على الضرب كان يهون
خليفه (عقد جواجبه) : وش صار
وضحه : اللي صار ما نقال يا خوي (بكت بحرقه) فهد كسرني حسسني إني قذره أخذ مني حقه بالقوه سمح لنفسه انه يعتبرني زوجه له حلاله
خليفه (بلع ريقه) : قصدك إن
وضحه(حط أيديها على أذونها وغمضت عيونها) : لا تقولها ما أبي أتذكر اللي صار ما أبي ما أبي

خليفه قرب وضمها وهي بكت على صدر أخوها أنين وألم وحرقه وقهر

خليفه (يمسح بشويش على ظهرها) : اهدي
وضحه : خذني بعيد ياخوي خذني عن هنا ما أبي فهد ما أبيه
خليفه (صر على ضروسه) : فهد بيندم على اللي صار والله وأنا اخو الوضحه ليندم وينسى ان الوضحه بيوم له زوجه
وضحه : تكفه يا خوي طلقني منه جرحني والله جرحني أهاني ياخوي وصغر قدري غصب والله اللي صار قاومت بس فهد ما رحمني ولا رحم رجائي
خليفه : افااا يا بنت محمد ما عاش من يصغر قدرك وألحين قولي لي وش اللي صار بالضبط تكلمي يالغاليه وانا موجود لا تهتمين في احد ولا تهتمين بأحد

ابعدها شوي عنه ومسح دموعها واهو يشوف كدمات على وجها
وضحه(نزلت رأسها):........................................... ........
خليفه : سمعي يالوضحه لا تستحقرين نفسك اللي صار لك مو برضاك غصب عنك والجروح والضرب اكبر دليل انك يا بنت محمد رفضتيه بس فهد عنيد وأناني ومغرور حب يحطمك ويوضح لك إن اهو الرجل وان اللي يبيه غصب عنك يصير (رسم ابتسامه يخفي الغضب اللي في قلبه) بس فهد نسى إن لو تجرأ يوم عليك بيكون خليفه طوفان قدامه يغرقه في شر أعماله صح سكت أول مجبور من أبوي يرفض أتدخل ويقول خل أختك تمشي حياتها وفهد لا يمكن يضرها هي بنت خاله بس ابوي تغافل على إن فهد إنسان ما يراعي صلة الرحم أو القرابه في أمور حياته يحب يفرض نفسه على الناس يحب يكسر ويحطم يحب يجبر الناس لو رافضين بس يكون اهو الآمر في الأمور الناهي عليها
وضحه (مسكت يده برجاء) : تكفه بموت لو أبوي جبرني أعيش معه لا لا فهد مستحيل أظل معاه
خليفه : بخليه يطلقك دامك رافضته
وضحه : رفض
خليفه : مو كيفه غصب عنه أبوي رفض أول نتدخل بس لما يعرف بزواجه لما يعرف بضربه لك وان تجرأ عليك وغصبك على شيء انتي رافضته بيوافق
وضحه : خليفه لا ما ابي يعرف
خليفه( عقد حواجبه) : عن شنو
وضحه(نزلت عيونها ) : أن
خليفه(ما حب يحرجها ) : فهمت طيب ليه
وضحه(طالعت له بعيون دامعه) : لو عرف ما راح يطلقني منه بيقول انتي خلاص صرتي زوجته واللي صار امر عادي اهو ما راح يحس باللي أنا حسيت فيه من أهانه
خليفه : وضحه بكون صريح على أيام جدي وجدتي وامي وابوي وحتى عماتي ما كان في عرس يعني ملكه وعشاء عادي يآخذ زوجته ويروح لبيته واللي صار مو شيء حرام من حقه
الوضحه(توقف وتبعد عن اخوها) : يا خليفه لو كان في ظروف أحسن ما اقول شيء ولكن فهد اللي سواه نابع عن غرور و كبريائه كان رد كرامته لأني رفضته وهددته في ابوي هددته لو ما طلقني بفضحه وبقول عن زواجه مو حب فيني كزوجه او خوف إني أروح منه او حتى اهتمام اني ما اكون له لا لا ياخوي لا تقول مو شيء حرام من حقه إلا حرام
خليفه (وقف خلفها وحط يده على كتفها) : خلينا نطلع ما عاد لك مكان هنا دام عفتي المكان لا يمكن تباتين فيه يوم خذي اغراضك وخلينا نطلع
الوضحه(دمعت عيونها) : ما عدت أبي شيء بآخذ عباتي ونطلع ما عاد يهمني شيء بس أبي أوصل لأمي برتمي في حضنها ارتاااااااح
خليفه (هز رأسه واهو يشوفها تلبس عبايتها مسك يدها) : الله
وضحه : يالله

فرح (وقفت) :وبعدها دخلت غرفتي ونزلوا أهم وبعدها طلعت ووقفت عند السلم وسمعت أصوات عاليه أبوي جدي خليفه وخالد وجدي حلف يمين على يمين إنك لتطلقها غصب بالطيب بتطلق وابوي حاول يبقون الليله ويمشون الصبح بس جدي قال إن البيت اللي تنهان فيه الغاليه ماله مجلاس فيه وعرفت بعدها إن خليفه استأجر في فندق ينامون راح لهم عمي ابو وليد بس جدي رفض يروح لهم وقال وين ما ترتاح الوضحه يكون اهو وبس طلع الصبح
فهد(غمض عيونه وتنهد) : بروح أصلي
فرح : روح صل ما تقدر ترجع الوقت
فهد : مع السلامه
فرح : الله يحفظك ياخوي

اتجهت للمطبخ تجهز شاي وقهوة هي قالت للبنات بتسوي لا احد يسوي .. بعد أقل من 10 دقائق رن جوالها شافت الرقم رقم عمها

فرح : هلا
أبو إبراهيم : أحنا برا اطلعي
فرح : حاضر

طلعت وكان جيب اللي جاء فيه عمها فهد سلمت عليه و صعدت في الكرسي الثاني

فرح : السلام عليكم
الكل : وعليكم السلام
أبو إبراهيم : كيفك يا عروسنا
فرح( بحياء) : بخير يا عمي ( ألتفت لمي) ليالي وين
مي (تأشر بالكرسي الثالث وهي نعسانه) : نايمه قالت الكرسي لي تمددت ونامت
فرح (تطالع عذاري المستندة برأسها على الكرسي) : وهذي نايمه بعد
مي : إيه
فرح (تطالع سمر) : سمسم
مي : لا بس تنعس تغفي وتقوم
فرح (طالعت للقهوة) : عمي
أبو إبراهيم : هلا
فرح : اصب لك قهوة
أبو إبراهيم : ما نرفض يا عروستنا
فرح : تبشر بس ترى مو فنجان أكواب
أبو إبراهيم : كل اللي يجي منك حلو
فرح : تسلم (صبت كوب ومدته لعمها ) مي تبين
مي : أيه ما ودي أنام
فرح : تبشرين

أبو إبراهيم يسوق واهو يشرب قهوة بهدوء ومشغل قرآن وبالطريق وبعد نص ساعه تقريبا وقف عند محطة يبي يملئ الخزان ليالي حست السيارة وقفت تعدلت واهي تتثاوب

ليالي : وصلنا
مي : ههههههههه لا خالي نزل يجيب لنا فطور
ليالي : من تجي مكاني بجلس قدام
فرح : عذاري نايمه وسمر بعد جلسي مكانك
ليالي : مابي
مي : محد راد عليك من الأول اخترتي هذا المكان اجلسي
ليالي : خاطري أسوق
سمر (تجلس وهي تعدل لفتها) : من يسوق
فرح : جدتي
سمر (ألتفتت) : هي معانا
البنات : ههههههههههههههههههههه
عذاري (تجلس) : ازعااااااااج انتم
ليالي (تضرب كتفها) : بسك نوم شوفي الشمس طلعت لا يفوتك
عذاري : مصدع راسي والله ما نمت عدل البارحه
فرح : شكلك سهرانه مع حبيب القلب
عذاري (تطالع المحطه وبهمس) : لا
سمر : لا يكون سويتي مثلي البارح قفلت جوالي ما كلمته أبي أنام عشان استعد لليوم
عذاري (بكذب ) : أيه
مي : معقوله ما زعل منك
سمر : تصدقين للحين مقفله جوالي خايفه يتصل ويذبحني
البنات : ههههههههههههههههههههههههههه
مي (ألتفتت لعذاري ) : وش فيك صاير شيء بينك وبين سليمان
عذاري : خلاف
فرح : لا يكون عشان روحتك لوضحه
عذاري : متغير فيه شيء متغير
سمر : يمكن مشغول بس
عذاري : لا إحساس بقلبي بس حبيت إني اسكت لين ارجع وأشوف وش يصير
ليالي : تعرفون ما قلت لصديقاتي إني اليوم بسحب على الكلية
سمر : لا أنا بلغت بدور هي تقول للبنات
فرح : طيب على المغرب نرجع للرياض بيحسبون عليكم اليوم
مي : صدق يوم مو مسوي شيء عادي
ليالي : إلا صدق هذي من سيارته
سمر : سالم
ليالي (عقدت حواجبها) : غير سيارته
سمر : لا بس هذي شراها قبل شهر ونص عشان البر وطلعات التخييم يقول سيارته ما تصلح للبر

ليالي طالعت حولها وانتبه لشماغ جنبها ما شافته بالأول لان كان ظلمه بس ألحين نور أخذته بأيديها وحطته في حضنها قربت رأسها بدون لا احد ينتبه للشماغ وشمته غمضت عيونها تداري دمعتها ابتسمت رفعت رأسها وشافت عمها يصعد

ليالي : عمي فهد
أبو إبراهيم (أبتسم) : هلا باللولو صح النوم زين صحيتي جبت لكم سندويش وعصير
ليالي (أبتسمت) : صح بدنك بطلبك شيء قول تم
أبو إبراهيم : تم (يعطي سمر الأكياس) وزعي على البنات
سمر(توزع على البنات سندويش وعصير طبيعي) : تسلم يالغالي
أبو إبراهيم : يسلمك (ألتفت للخلف) آمري ياللولو
ليالي : بسوق
مي (شهقت) : وش تسوقين
فرح : هههههههههه وش فيك ليالي تسوق دايم إذا رحنا لخالي ترى حتى أنا أسوق لما كنا نروح أبوي وعمي أبو وليد يخلونا نسوق والوضحه بعد تعرف خالي معلمها هي علمتنا
سمر : لا ما يصير بتعلم مثلهن
عذاري : وأنا بعد
أبو إبراهيم : بس أحنا ما عندنا وقت نتعلم عشان تقدر نرجع المغرب
مي : خاطري أتعلم بعد
أبو إبراهيم : خلوها لما نرجع نروح كم يوم المزرعه وأعلمكم
مي : بندر راح يرفض وما أظن سطام يوافق
أبو إبراهيم : وش دخلهم أنا بعلمكم ومحد بيعرف
عذاري : يعني يبه تعلمنا محد بيقول لا
أبو إبراهيم : دام الشيء وصل عندي محد له دخل وبعدين ما أرد على احد دام في نفسكم من عندي أغلى منكم
سمر : الله لا يحرمنا منك يارب
البنات : أمين
ليالي : أسوق عمي
ابو إبراهيم (طالع لسمر) : إذا سمر ترجع ورى عشان أنا اجلس مكانها
سمر (تكتف ايديها) : لا ما ارجع ورى وبعدين ما أضمن سواقتها
ليالي (تصر على ضروسها) : سموره شطوره يالله ورى وخليني قدام يا أختي اشتقت للسواقه
سمر : لا
ليالي ( أبعدت رأس عذاري وتقدمت وضربت سمر برأسها) : وتبن
سمر(تمسك رأسها) : آآح بابا شفها
أبو إبراهيم : ما اتدخل بينكم
سمر : وش ما تدخل بنتك تنضرب تقول ما أتدخل وبعدين وش تسوق يعني لو الشرطة شافونا وش بيقولون مخالفه وتحقيق حرمه تسوق
ليالي : ووول خلاص خلاص بحلها
سمر : كيف
ليالي (تلفتت حولها وترفع يدها) : هذا شماغ عادي ألبسه ويكفي ومحد بيدقق
سمر (لوت بوزها) : يهب يا وجهك
ليالي : سمر وراااااااااااا
سمر : اففف طيب بس بجلس بين البنات ما أبي اجلس بروحي ورى
مي : بتصير زحمه
سمر : والله المكان يكفي وأنا ضعيفه مالي شغل
ليالي (تنزل رأسها لتحت تنزل اللفه والنقاب وتعدل الشماغ) : خلصن صار لنا ساعه واقفين

تبدل الأماكن سمر والبنات خلف وليالي مكان السواق والعم مكان اللي جنب السايق

أبو إبراهيم : يالله
ليالي (طالعت له ومدت يدها لنظارته) : سوري لازم نظاره
أبو إبراهيم : ههههههههههههه فداك
مي : أحلى يا كشخه
ليالي (غمزت لها) : أعجبك
عذاري : خذي رقمها بعد طايحات مغازله
الكل : ههههههههههههههههه
أبو إبراهيم : نمشي
ليالي : بسم الله

عدلت الشماغ عليها ولبست النظاره تداري نظراته ودموعها النظاره كانت عذر بس مع كل نسمه تتخلل ريحته تحس فيه ودمعت عيونها على ذكريات تمر في مخيلتها عضت شفايفها تداري شهقاتها وهي تسوق زادت من صوت المسجل بس هالمره شغلت انشوده

اتركيني ياهمومي .. وارحمي قلبي الحزين
كفكفي دمعي رجِيتك .. وادفني نار الشجون

راحت أيام السعادة .. وانطوت عِشْرة سنين
وأغرقت ذكرى الليالي.. بين أمواج الحنين

وصارت آهاتي توالى... أطوي ليلي في أنين
كم تباطت بيّ ليالي... كم تساهت بي جفون

يازمن عيش السعادة... يازمن خضر الغصون
جتك أشعاري تنادي ... وين خل الروح وين

فرح (تهمس لسمر اللي جنبها) : منين جابت الشماغ
سمر(تأشر للخلف) : أكيد سالم تركه في سيـ.. (سكت لما انتبه وبهمس) سالم
فرح : شماغه
سمر (تطالع لليالي من منظرة السياره ) :انتبهي لكتوفها
فرح (بهمس) : تبكي تظن إن النظارة بتخبي ألمها
سمر : و الأنشودة دليل الحالة اللي تعيشها
فرح : ألم الماضي
سمر : وألم الحاضر
مي (تقرب لسمر وبهمس) : وش عندكم
سمر(تهمس) : ليالي متلثمه بشماغ سالم
مي (رفعت كتوفها) : وإذا
سمر(تضربها في كتفها) : هبله أنتي انتبهي لها
مي ( تطالع ليالي ) : وش فيها يا حلوها تسوق وطربانه

سكتت لما انتبه لدموعها على طرف عينها ما حد يلمح لمعة الدمعة إلا إذا كان خلفها

مي : تبكي
عذاري (ألتفت لها) : من
مي (تأشر وبهمس) : ليالي
عذاري (طالعت لها وعقدت حواجبها) : وش له
مي : شماغ الحبيب
عذاري : جاسم
مي (تضربها بكوعها على جنب) : من متى حبته اقصد شماغ سالم
عذاري : لا حول ولا قوة إلا بالله ليه توجع قلبها
مي : صدقيني اللي مسويته عمد
عذاري : ليه
مي : مدري بس حاسه أنها تتعمد
سمر (بهمس) : بس لا أبوي يحس وخلوها كذا تقدر أحسن لا تكتم

ليالي مدت يدها وشغلت أنشودة ثانيه تدري اللي تسويه يبي يعذبها بس تبي ترتاح وتريح الهموم شوي تبي تنزاح لو بدموع بس ترتاح

يا ناس محد داري بحالة الروح ..... محد درى وش خافي وسط روحي
أخفي جروحي وسط روحي ولا أبوح ..... لحد ولا أحد داري عن جروحي
جروح روحي علمت قلبي النوح ..... لكن يخفي نوحته ما يبوحِ
لانيب لا عاشق ولا حاذف اللوح ..... ولانيب من يبغى الطرب والمزوحِ
يا ناس محد داري بحالة الروح ..... محد درى وش خافي وسط روحي
أخفي جروحي وسط روحي ولا أبوح ..... لحد ولا أحد داري عن جروحي
لكن قلبي يمسي الليل مجروح ..... مجروح من دنيا عليها شفوحِ
دنيا تلاعبنا على غير مصلوح ..... نعيش فيها وقت ثمن نروح
يا ناس محد داري بحالة الروح ..... محد درى وش خافي وسط روحي
أخفي جروحي وسط روحي ولا أبوح ..... لحد ولا أحد داري عن جروحي
دنياك لو تجعل لك البال مشروح ..... بتشوف وجه الشر بعده يلوح
دنيا دنيه شرها دايم يلوح ..... ما دايم تأتيك بوجه صبوح
يا ناس محد داري بحالة الروح ..... محد درى وش خافي وسط روحي
أخفي جروحي وسط روحي ولا أبوح ..... لحد ولا أحد داري عن جروحي
يا للي تبي الدنيا شذاها لك يفوح ..... عليك بالتوبة وربك سموحِ
ياهيه يا طير على شجرة الدوح ..... يا للي بعالي الصوت دايم تنوح
يا ناس محد داري بحالة الروح ..... محد درى وش خافي وسط روحي
أخفي جروحي وسط روحي ولا أبوح ..... لحد ولا أحد داري عن جروحي
لا واهنيك سالي الهم وتروح ..... تفرح بدنيا تاليتها نزوحِ
ــــــــــــ

-----------------------------------------------------------------