--------------------------------------------------



في بيت ابو خالد ..


على الاتفاق الساعه كانت 4:30 الكل موجود في البيت والرجال كانوا في المجلس وللحين يبحثون عن فهد الغائب والاتصالات مستمره والبنات مجتمعات في الغرفه الداخليه الصاله الصغيره والامهات في الصاله الخارجيه


سمر (تآكل قطعة حلى) : والله وافق وقال اهو راح يوصلنا
ليالي : بس انتي ما اعطيتينا خبر
سمر : شوفي انا مالي شغل بروح اللي تبي تروح تستعد بكره الفجر بعد الصلاه نمشي
فرح : صعب
مي : إلا صعب لي سطام ما راح يرضى اروح
عذاري : انتوا تراضيتوا
مي (تشرب قهوه) : لا طبعا بس امي كل مره تلمح لي ان رجوعي سواء رضيت لو غصب
سمر : وش تحس فيه عمتي
مي : امي همها ما اشيل اسم مطلقه عادي كل شيء
ليالي : معليه بس هالأسلوب ما ينفع ارجع لسكير
عذاري : ما قلتي لبندر عنه
مي (تآخذ قطعت حلى) : بصراحه بندر اللي فيه مكفيه زوجته وزعلها في بيت اهلها موتره مخليه عصبي حتى بنته ما يتحملها صاير نار
فرح : ما حاول يتفاهم معها
مي : راح ورفضت تقابله تقول تعبت من طريقته والادهى ان مفهمها ما يبي عيال منها وتحجج انهم باول حياتهم بس اكتشفت ان عذر لان يشك فيها ما يبي منها عيال
عذاري : لا حول ولا قوة إلا بالله يعني ممكن يوصل للطلاق
مي : مو عارفه بس الامور متأزمه عمتي خوله تقول انها مآخذه اجازه فتره لين تتعدل الامور
سمر :خلونا من هذي السالفه المهم بكره من تبي تروح ابوي قال شوفي البنات
عذاري : انا بروح وبقول لجدتي الليله ننام عندكم عشان ما احاتيها لوحدها في البيت عند خالتي احسن
فرح : بسأل امي وارسل لك مسج مقدر اروح وما اعتقد بتوافق لان عرسي بعد كم يوم وظروف اللي احنا فيها واختفاء فهد مأزمه الجو
ليالي (حطت رجل على رجل) : بكره جاسم عازمني على الغداء في بيتهم بس بسحب عليه وما افوت جمعتكم اصلا من زين الجلسه معه ومع امه ورع امه
البنات : ههههههههههههههههههههههههههههههه
سمر : مدري كيف متحملته
ليالي : وش اسوي نصيبي والطلاق آخر حل لاهلي قلت لهم ما ابيه قالوا وش بيقولون الناس عنك متطلقه بسرعه
عذاري : صح الطلاق مو حل بس البدايه خطأ بعد جاسم عقليه مدري كيف الحياء كله
ليالي : تعود على نمط في التربيه الدلال والدلع لدرجه ان تصرفاتها اقرب لبنت منها ولد اسكتن قبل امس اتصلت امه وقالت بتعزمني على عشاء في البيت رفضت ما ابي اشوفه اذبحه بس امي حلفت اروح جاء اخذني وليته ما جاء كل شوي يكلم امه يقول وينه ويرسم ابتسامه غصب انه معي وتشوفينه يرجف يا اخي حسيت اني رجال مع حرمه
البنات : هههههههههههههههههههههههههه
فرح : بتسكتين على الوضع
ليالي : لا طبعا بغيره هذا صار زوجي ما اقدر اتحمل طريقته بس بعمله اصول الحياه وبدل اكون انا اللي احميه وآخذ يده يآخذ اهو يدي ويحميني
مي : الظاهر طريقك طويل
ليالي (تتنهد) : حياتي بس يمكن ان جاسم رحمه عند سطام صح دلوع بس مو سكير
مي : مصيبه مو عارفه كيف احلها صعب اتطلق بسبب رفض امي ومجتمعنا ما يرحم اللي مثلنا وبيحطون اسباب علي ليه ما تحملت او حاولت اغير وبصراحه انا قررت ارجع لحياتي وبحاول اغيره اوجهه سطام طيب بس فيه بذره مو زينه صح بس اقدر اني اغيره بأذن الله
سمر : حاولي دام تمدحين فيه حاولي
مي (أبتسمت) : بنات بكره بروح معكم
عذاري : مو تقولين ما راح يوافق
مي : بساومه
البنات : كيف
مي : بروح اتصل عليه بقول برجع لك بس بشرط توافق اروح مع خالي ولما ارجع بالليل يجي ياخذني
فرح : تظنين بيوافق
مي (غمز لها وبخبث) : بقدر عليه اعرف له
البنات : هههههههههههههههههههههههههه
مي (توقف وتآخذ جوالها) : ادعوا لي
البنات : الله يوفقك
فرح : زين ان موافقة امي تكفي بس صعب لاني عروس
سمر : إذا ما تقدرين احنا نكفي
فرح : والله خاطري اروح نفسيتي زفت قرب عرسي وفهد ووضحه تعبني
ليالي : حاولي وكلمي ابوك اذا رفضت
فرح : بكلمهم
عذاري : انا عادي بروح ما يحتاج اقول لاحد
سمر : وسليمان
عذاري : وش دخله
سمر : تقولين له على الأقل
عذاري : ليه قلتي لعبدالرحمن
سمر(ابتسمت بحياء) : كان يتقهوى عندي قبل الصلاه وقلت له وقال لو تحبين انا اوصلك
ليالي (غمزت) : يبيها من الله بس حريمته
سمر : ههههههههههه ايه فهمت عليه
عذاري : احلفك بالله ما طلب شيء عشان يوافق
سمر : ههههههههههههههههه يماه منك كأنك جالسه معنا
البنات : سموووووووره
سمر (تأشر بيدها) : لا لا مو تفكيركم الخايس
فرح : ياعيني تفكيرنا الخايس تفكيرنا برئ
سمر : بسم الله تفكير سليم
ليالي : وش طلب
سمر : ولا شيء
ليالي : قولي
سمر : ههههههههههه بس احراج
فرح (تصفق) : احلى وتقول تفكيرنا خايس إلا افكار رجلك الخايسه
سمر (بحياء) : فديته وفديت قلبه حلاله
عذاري : بنت استحي
سمر : وش استحي حبيبي كيفي وكيفه
ليالي : سمر من صدق رجلك ماخذ راحته على الآخر يعني كل ما شافك سوى حركه كذا تعطينه وجه
سمر : بس انا مو غبيه اوافقه على كل شيء
فرح : يعني ما قدر عليك
سمر(غمزت لها) : افا عليك مو هبله اعرف حركات النص كم
ليالي : عاد استغربت ضنيت انك انهبلتي
سمر(مدت لسانها وبدلع قالت) : هبالي ساعات بس بكيفي وبدلعي وبطريقتي بس والله احببببببببببببببببببببه
عذاري : الله يديمها بينكم محبه
البنات : امين
عذاري (توقف) : اجل بروح اكلمه واعطيه خبر لا يزعل اني ما قلت له
مي (تدخل وهي تبتسم) : وافق
عذاري : والله
مي (تجلس وتحط جوالها) : أيه رفض اول بس شرطت ارجع له اذا وافق ولا بقول لبندر عاد اهو وافق وناااااااااسه برتاح يوم من الكليه وبروح اشوف القريه لاول مره
عذاري : حتى انا متحمسه بروح اكلم سلومي وارجع
سمر (تصب لها شاي) : بصراحه كل ما تكلمت ليالي وفرح ووضحه عن القريه تمنيت اروح لها
فرح : يعني باقي انا شكلي بروح اطلب امي قدام الحريم اخليهم يضغطون عليها عشان توافق
مي (غمزت لها ) : أستغلي الفرص
فرح : الله يستر بروح يالله سي يو
مي : ما تبين تقولين لجاسم
ليالي (شرقت بالشاي) : كح كح وش كح ك ك كح
سمر : بسم الله عليك وش فيك
ليالي (تشرب ماء) : من اقول كح كح له جاسم
مي : وش فيها
ليالي : هههههههههههههههههههههههههههههههههه
سمر : وش فيك
ليالي : اقول لجاسم اسكتي لا اموت من الضحك ههههههههههههههههههههههه
مي : صدق مو فاهمه شيء وش فيك
ليالي : يا عمي جاسم هذا ورع آخذ موافقة ورع
سمر : ليالي بس تقولين له ورع
ليالي : سمر الله يخليك لا تعكرين مزاجي ومي سكري أي موضوع يدخل اسمه فيه ترى صدق مالي خلق له وللكلام عنه (أخذت جوالها) برسل له بقول بكره ما راح اطلع معه تلاقينه بيذبح ذبايح والسبب انه ما راح اشوفه
مي وسمر : ههههههههههههههههههههههههههههههه


اما عند عذاري


عذاري (تتنهد) : وش فيك
سليمان : ولا شيء بس مشغول
عذاري (تجلس على الكرسي بالحديقه الخلفيه) : ما تلاحظ ان صار لك كم يوم ما تكلمني زعلتك في شيء
سليمان : لا
عذاري : شكلك مشغول
سليمان : ايه
عذاري : سليمان هالحاله ما تصير كلامك جاف مو مثل قبل كل ساعه متصل ولا مسج مرسل يا اخي 3 ايام ولا اتصلت
سليمان : قلت لك مشغول كيف يعني
عذاري : خلاص لا تعصب
سليمان : تبين شيء
عذاري : لا باي


سكرت الجوال منه ولا انتظرت رده هزت راسها وتحاول تمسك دمعتها من اسلوبه الجاف قررت تجلس شوي لين تهدأ وهي تفكر فيه وفي تغيره من الليله اللي كان عندها وجاه المسج تغير صار ما يفقدها صارت ترسل له ولا يرد عليها إلا بعد فتره طويله كثير ما حبت البنات ينتبهوا لها كفايه اللي هم فيه قررت ما تقول له انت بتروح للقريه يمكن يفقد وجودها هاليوم وقررت ما تتصل ولا ترسل له شيء بتشوف يبي يشتاق ولا لا



اما سليمان اللي من سكرت منه وقف مكانه يطالع جواله هز راسه وحس بألم في قلبه من طريقة معاملته لها بسبب مسج وكلام ما يعرف صدق ولا كذب وحقد تنهد وسند ظهره على الجدار يفكر


سليمان : ليه ما اواجها ليه ما اسألها يمكن يطلع كذب بس كيف بقول لها انت تحبين احد قبلي كان لك علاقات طيب ليه دام تحب رضت فيني اللي يرسل المسج قال ان عندها ذكرى منه ساعه بس كيف اتأكد اسالها يعني عندك ساعه هديه من شاب اكيد بتقول لا كيف بيكون موقفي لو طلع الكلام كذب اكيد بتزعل اخاف اظلمها واخاف اظلم نفسي مع وحده لها ماضي ما ابي اللي احبها يكون لها ماضي لا يمكن اتقبل هذا الشيء ياربي مدري اقدر اسامحها لو طلع صدق وتغاضى عن الماضي ولا الماضي بيكون نهايه لحياه ما ابتدأت


حس باحد وقف جنبه فتح عيونه


سليمان : فيصل
فيصل (يآخذ نفس) : هلا زين لقيتك
سليمان : طيب سلم اول
فيصل (يمد يده ويسلم ) : السموحه وربي مستعجل كيفك
سليمان : بخير وانت
فيصل : بخير بس ابي منك خدمه ومشاري ما لقيته
سليمان : تآمر
فيصل : في مريضه هنا مدخله من 3 ايام ابي اعرف ليه دخلت
سليمان : وش يهمك
فيصل : تكفه فهد له كم يوم مختفي احس هالبنت بتكون الحلقه اللي توصلنا له
سليمان (انصدم) : مختفي
فيصل : تعال بس شوف لي وش السبب
سليمان (يمشي معه) : تعال بطلب ملفها وبشوف السبب


اتجه معه وفيصل يدعي ربي ان يوصل لفهد طلب سليمان ملفها وشاف انها تعرضت لضرب وان في تحقيق وسأل الممرضات عرف ان زوجها السبب ابتسم فيصل وعرف مكان فهد شكر سليمان وطلع متجه للمركز واهو يكلم بالجوال


فيصل : ايه بالمركز ........ مدري والله يا عم اللي اعرفه ان ضرب زوجته دارين وتسبب يدخلها المستشفى .......... هي اشتكت عليه ايه صار له 3 ايام ......... رايح هنا تبي تلحقني ........ من جراح ......... ايه جيبه يمكن نحتاجه في المركز لانه محامي .. والله مدري بس الظاهر ان الشيء كبير والظاهر تنحول قضيه للمحكمه .... مع السلامه



دخل فيصل وسلم على الضابط عرفه في نفسه وطلب يشوف فهد الضابط وافق لان يعرف فهد ولما عرف ان فيصل ولد عمه شرح له ان كلم فهد بيبلغ اهله بس فهد عصب ورفض وقال لو قلت لاحد والله اقطع علاقتي فيك كصديق واهو احترم رغبة فهد الحارس وصل فهد لغرفة الضابط اللي انصدم من وجود فيصل قرب فيصل منه كله شوق وراحه لشوفته وضم فهد حب الضابط يتركهم لوحدهم واستأذن يطلع بس ما لحقوا يجلسون دخل ابوه ومعه جراح اللي سلم عليه وجلسوا



الاب : ليه يا فهد
فهد (منزل راسه) : سامحني
الاب : بالسجن 3 أيام واحنا كل فكر يودي ويجيب الكل يدور عليك
فهد : ما حبيت تشوفوني كذا
جراح (يقاطعهم) : خلونا من العتاب وقول لي وش صار عشان نطلعك من هنا
فهد : .................
جراح : فهد السكوت مو من صالحك قول لي وش اللي صار ووصل الامر تدخل زوجتك المستشفى
فهد : ..................
فيصل (تضايق من سكوته) : فهد تكلم
فهد : ماعندي كلام سوء تفاهم
الاب : سوء تفاهم يوصل الامر تدخلها للمستشفى
فهد : صعب اتكلم واقول
جراح (حس ان الامر كبير واحترم رغبة فهد ) : طيب نقدر نوصل لتنازل
فيصل : كيف
جراح : نكلم الزوجه والاهل ونقول ان الامر بس سوء تفاهم بين ازواج وتتنازل عن المحضر ويطلع من المركز وبعدها نحلها
فهد (أبتسم بأستهزاء) : ما راح يوافقون
الأب : ليه
فهد : ابوها كان عندي امس قال اتنازل بشرطين
جراح : وش
فهد (عض شفايفه) : اطلق بنته واتنازل عن البيت لها
الأب : البيت في اسم من
فهد : بأسمي انا اشتريته عشان تسكن فيه هي واهلها
الاب : فهد سو اللي يبون بس تطلع
فهد (يصر على ضروسه ) : تحلم هذا اللي كانت تبيه البيت بس بعدها
الاب : تكفه يا فهد والله اعطيك ثمن البيت بس تطلع اليوم
فهد : يبه انا ما همني الفلوس انت مو فاهم شيء
فيصل (بعصبيه) : انت اللي مو فاهم تنازل شوي عن غرورك امك طاحت في المستشفى 3 ايام والحين في البيت بس تبكي وتقول ولدي وين
فهد (نزل راسه) : ........................
الاب : فهد ابوس يدك عشان امك وحالتها اللي ما تسر تنازل شوي يا فهد كفايه اللي صار كفايه لا تزيد علينا بدخولك السجن بسبب حرمه انت اخترتها وانت تتحمل اللي صار
فهد : يبه
فيصل : بس يا فهد كفايه ينحرق البيت وينحرق اهي بس امك والله تعبانه
فهد (دمعت عينه) : امي
الأب (حط يده على كتف فهد) : امك والكل وفرح بس تقول اهو وعدني يكون موجود بعرسي
فهد (غمض عيونه) : الله لا يوفقك يا دارين يبه اتصل على ابوها وخله يجي ما ابي شيء بس ابي امي ورضاها


فعلا تم الاتفاق دارين من فهد واتفقوا البيت بكره يسجله بأسمها ويتم طلاقهم بعد وعد من ابوه ما يغير كلمته ورجع فهد البيت الكل بكى حرارة اللقاء بين امه وبينه بكى فهد ايه بكى لاول مره الكل مصدوم شوف دموع فهد المغرور باس يدها وراسها وباس رجولها يطلب غفرانها وتسامحه بس ترضى عنه قلبها حن لحاله وقالت قلب الام ما يغضب لو قالت الكلام هي راضيه عنه بس ما تبي شيء غير قربه منها


الكل كان فرحان في رجوع فهد للبيت والكل اتجه لبيته مرتاح تطمنوا عليه والبنات اتفقن مع العم فهد بكره الفجر يكونوا مستعدين للروحه للقريه ومقابله وضحه والاصرار ترد معهم لازم توافق







---------------------------------------------


انتهى البارت