........( فـ البـــال ).........
فـ البال أغاني و خلان و مواعيد ..
قل لليالي تسولف لي وعدها
فـ البال لهفة قصيد و شوق لبعيد ..
تو المشاعر على زمة نهدها
لبست ظماها الدروب و حمحمت بيد ..
و أكهف سماها و حجانه عقدها
كيف أختصرها و هي زفره و تنهيد ..
إليا إستضاقت و غابت عن رشدها
من شفت في خدة الحروة تجاعيد ..
رديت أكسر و أجمع في عددها
ماغير أنقص جفا اللحظات و أزيد ..
يفتر جهدها و أعديها جهدها
أمد كف الرجا و تصافح القيد ..
و أكفها و الهجوس تمد يدها
لو هدلت بالرخا حلو العناقيد ..
صلف الهبايب إلى ذعذع حسدها
مرات تقفي و أقول فراقها عيد ..
و مرات تقبل نكد و أعشق نكدها
ما كل الأيام خلاني و أجاويد ..
ياما ليالي عزيزة مفتقدها
ما فاد بالوقت شرهات و مناقيد ..
يوم أمدح سنين و سنين أنتقدها
و الخطوة اللي مشت بي عكس ما أريد ..
يا مرها و الدروب آمر و أدهى
خلاص منها مصادير و مواريد ..
و ليت يا سبتها البارد و أحدها
فـ البال أغاني و خلان و مواعيد ..
و الضيقة اللي على زمة نهدها
........( ضحكتـك طفلـــه ).........
هات من جمرها و شوي من كاسها ..
ضحكتك طفلة(ن) مرفوظ عنها العتب
طفلة(ن) تسهر الغيمة بكراسها ..
ترسم النجمة اللي غافية بالهدب
خلها تقلب أيامي على راسها ..
ليتها ما تمل و لا يجيها التعب
خلها بالضلوع تشب مرواسها ..
القصايد تبي دافع قوي و سبب
كل ما جا يزخ العطر نسناسها ..
ثوبها من رذاذ و شالها من قصب
خبني بين حد الصحو و نعاسها ..
لحظة(ن) فارهة لين أتساقط رطب
لحظة(ن) باذخة تذبحك بإحساسها ..
كنها تبعدك عني و هي تقترب
هاتها يا بعد عمري بعد ناسها ..
ضحكة(ن) ما ربت بشفاك ما تنحسب
عاد لا ريع النعناع بأنفاسها ..
لعنبو شعر(ن) ذاك الوقت ما ينكتب
........( مهــرتــي )..........
مهرتي مجنونة الريح بعروقي تذوب ..
و إن عطت فج الفيافي وسيع(ن) بالها
مهرتي حره و أصيلة محياها طروب ..
فلوة(ن) يملى نحرها بشاير فالها
مهرتي شقرا نحيلة مثل بنت(ن) لعوب ..
لا جلدها مسرف الشوق زاد هبالها
سابقي يوم الليالي لها وجه كذوب ..
روحت بنت الهبايب تخب لحالها
سقتها من فرعة الشمس و شفاه الهبوب ..
ليه ما يلفح رسنها و أنا خيالها
يعلم الله لا عطية و لا حق مغصوب ..
عمها جمر المسافة و همي خالها
إن روت بيض النوايا مهي صلفة هيوب ..
صدرت ينضح نباها قراح زلالها
و إن رعت عشب الخطاوي على ريف القلوب ..
كم هنوف(ن) للمفالي تسوق ظلالها
كم دوت رهف الضماير لأجل عين محبوب ..
لين يرجف بالحنايا صدى موالها
و أن تعدن سبق الخيل ماني بمغلوب ..
كل حزة بالليالي لها رجالها
مهرتي شيخة زماني لها قدر محسوب ..
ما حداني عن غلاها بعيد خيالها
مرحبا بأول قدرها عساها ما تتوب ..
ما يحت غصون روحي يا كود جفالها
ضمها عطر الشمالي على صدر الجنوب ..
و أنثنى وردي شفقها و هل هلالها
........( ذعـذعـت نجــد ).........
المداهيل شوق و زعفران ..
و المدى هيل برد و هيجنه
ذعذعت نجد, نجد أم الزمان ..
و أقبلت بين طيب و غيدنه
صبحتني صباح القحويان ..
طفلة الثلج ورد و شيطنه
يا عذولي ياعلك للهوان ..
ما تشوف الطعون مهجنه
أنت ما شفت رقص الخيزران ..
و أنت ما شفت ضحك السوسنه
يوم غابت تذير و أستدان ..
أبيض القلب حزنه و أدمنه
نوب قلبي يشيل الحزن دان ..
نوب سامر و نوب الميجنه
ليلة الدمع مال السنديان ..
و أنحنى له حطيب و دندنه
كل شي تسمر بالمكان ..
كل لحظة تعدي عن سنه
ميت الشمع مل الشمعدان ..
معطف الفرو مل الوجهنه
نشدت نجد عن صافي ثمان ..
و المرايا تنشدني عنه
قلت ما أدري و هب الزعفران ..
المداهيل برد و هيجنه
........( مـزنـة" عفــرا ).........
بين نار الضخا و القل و الحاجه ..
و المشاريه و الخلان و الطيبه
شفت لي مزنة(ن) عفرا و لعاجه ..
قلت للقلب يدوي من مراقيبه
الليالي تبي صملات و مواجه ..
يا ولد لا تضريها على الهيبه
كل حر(ن) يمينه تطلق حجاجه ..
ما يدلي مع التالي مجاذيبه
.........( شعــــري )...........
ضاق الغمام و فح صدر المزاريب ..
يا الله بجاهك يا عليم الغيوبي
يا منجي(ن) يوسف من الجب و الذيب ..
بحماك يا ساتر خفايا عيوبي
صاحوا تناخوا دوروا بي عذاريب ..
تجمعوا ليلة وزا سولفوا بي
أثري مسوي بالقلوب الأعاجيب ..
و أنا مثل وجه السما نقش ثوبي
أنا وسيع بطان راهي مطاليب ..
ما أضيق لو شانت نوايا دروبي
آرد و أصدر و آخذ العلم و أجيب ..
ماني على طرش الرعاع محسوبي
بردت كبدي من قراح المشاريب ..
دوبي رويت من الشهاليل دوبي
خليت للحاقد طشاش و حثاريب ..
يتوب ولا قلعته لا يتوبي
شعري زها بجباه بيض المكاتيب ..
شعري على طرياه هبت هبوبي
شعري رسايل عيد طيب(ن) على طيب ..
عطر الشمال و هفهفات الجنوبي
شعري وسايد مترفات(ن) رعابيب ..
شعري لوى تلعات الأرقاب صوبي
شعري شهد له طيبين المجاذيب ..
وش عاد لو سود النوايا حكوا بي
لو كان مالي غيرها من مكاسيب ..
ما أبغى شهادة ميتين القلوبي
.........( لاطـريـق ولاخــوي )..........
ويش أسوي لا طريق و لا خوي ..
لا قرار و لا خيار و لا مصير
الليالي تلوي ذراعي لوي ..
و الرفيق السيف يغريه الجفير
و الضياع بسكتي يدوي دوي ..
أتصفق لا سراب و لا غدير
أطوي الظلما و عيت تنطوي ..
و إشتهيت الشوف بعيون الضرير
مثل طير(ن) طاح بيدين بدوي ..
يلعن الطيحة و لا يقوى المطير
كل يوم أقول باكر تستوي ..
و خاب ظني بالزمان و بالنصير
كنت أنا الصدر الحنون المحتوي ..
و كنت أنا لإحساسهم سلك الحرير
و صرت أنا هاك النحيل المنطوي ..
تلهث أنفاسي ورا حلم(ن) كبير
ضاعت الحيلات حيل الله قوي ..
لاني الأول و لا أظن الأخير
قلت بأصرخ و آخر علاجي كوي ..
وصلت الحلقوم و الخاطر كسير
من شرب من كف غيره ما روي ..
لعنبو كف(ن) على المده قصير
لا تعاتب ويش أسوي يا خوي ..
لا قرار و لا خيار و لا مصير
|