........( بــرد ليلــي ).........
قلت أجمع برد ليلي و همي و حطبي
قلتها و أقصى ضلوعي ذياب(ن) عاويه ..
الشتا يرثع ورا البال و الليل يحبي
و الطعون أقفت فرادا و جت متخاويه ..
صاحبي لا مرك الشوق مره ,, مر بي
لا تجيني مع هجوس(ن) تجيني ضاويه ..
آه يا صعب إغترابي بعدك و ما أصعبي
عقبك الدنيا بعيني غدت متساويه ..
آه يا قصر المسافه و يا طول تعبي
و الهبوب إن فرع الجرح جمره كاويه ..
آتطوى كني القاع لا هجهج ظبي
كل ما أصرد بعيني تضيق الزاويه ..
ليه يا درة شبابي و لولي و ذهبي
ليه خليت الحنايا عروش(ن) خاويه ..
يوم تضحك لي عيونك ,, عيونك وش تبي
كم لها تشرب نحولي و لا هي راويه ..
لا غلاك أكبر ذنوبي و لا قلبي نبي
الله أعلم و المقابيل وش هي ناويه ..
الجفا ما هو على البال و البعد يهبي
و الظنون اللي غشت جرتك للهاويه ..
صاحبي صاحت بي البيد (" تكفى يا صبي ")
ما تقطعك الفيافي عزوم(ن) ثاويه ..
كل حلم(ن) يا أهيف القد بالصدر مخبي
حروة يملا سماها وعود(ن) غاويه ..
ما ملت عين المشاريه هزة منكبي
لو يصير الحلم شعره و أصير معاويه ..
قلت أجمع برد ليلي و جوعي و حطبي
قلتها و أقصى ضلوعي ذياب(ن) عاويه ..
.........( وردتـين" حمـــر ).........
جت في يديها وردتين(ن) حمـر
قبل الشفق و الشمس محمـره ..
العنق نافر و السوالف خمـر
و الموت بين العنق و الغره ..
و الريح تآخذ من شعرها غمر
تلعب معاها شوي و تثره ..
ذاك الثليل اللي جمرني جمر
اللي بغيت أموت من حره ..
قلت أنورت كل الدروب السمر
و العيد جا يمشي على الجره ..
برق السنين و مجهمات و قمر
جيتي و خفاقي نفض شره ..
الليله ليله من ليالي العمر
و أحلى ليالي العمر بالمره ..
قالت غيابك و أنتظارك جمر
و أبطت تعاتبني و تتشره ..
قلت أبشري و الرمش يآمر أمر
يالول وجداني و يا دره ..
" و اللي جمعنا يا أنتظار العمر
ما أعود هالفرقا ولا مره .. "
........( عـذب السجـايــا ).........
عذب السجايا و عوده بأول الكنه
متى تزين السوالف و آخذ علومه ..
و أسامحه عن خطاة الجرح و الونه
و أعاتبه لو يصد شوي و ألومه ..
و أذكره بأول المسفار حتى إنه
إليا تذكر زمان أول نسى نومه ..
يوم إنه أقبل خدين الروح يوم أنه
و أقبلت أراعيه و القومه هي القومه ..
من يومها و الحشا ما عاد له خنه
إلا لصوته و ميعاده و ملزومه ..
عفري هنف للضلوع و جا لهن حنه
و أستانست له فياض القلب و رجومه ..
لنا جبينة ليا أرتج الغطا كنه
برق(ن) يصب الرفيف بكبد ديمومه ..
ما أقول شفته و شفت البيض يتلنه
أقول شفته و شفت الشمس منجومه ..
ما أقول كن الجديل الليل لكنه
ليل(ن) خرعه الظلام و ضيع نجومه ..
يا قبلة الله هاك العنقود لي منه
قام يتهجا شذى عطره و يشمومه ..
فيه إنتهى النور لا والله بدا منه
فجر نعس بالوريد و نام بهدومه ..
ورد(ن) تفرعن حماره قلت أبا أكنه
إليا متى و الحنايا منه مفطومه ..
فز و تطرق رطيبه قلت ما عنه
بلم شيحه و ريحانه و قيصومه ..
صد و تلعثم هديله في برد سنه
يا قوم ذا النور يوم إنكت يا قومه ..
الله عطانيه والله يعطي الجنه
و إليا إستجد الهوى كل(ن) و ملزومه ..
.........( نهـار البشـايــر ).........
يا نهار البشاير صب لي شمس ..
بتقهوى و أنا والله حياوي
يكفي إني فداوي عندك من أمس ..
و أنت تشره على ثقل الفداوي
أحسب إنك قبل لا تمد لي خمس ..
تحتضني و أنا أمد الرهاوي
لا تعجب تلمس خاطري لمس ..
لا تغرك من بعيد الكساوي
جايز أضحك لو إنه خاطري عمس ..
نوب ضحكي مثل طبعي نحاوي
يمكن إني قريب و مبعد الرمس ..
كل لون(ن) لبس جفني سماوي
جيت أقص الزمان و جرته طمس ..
قلت أبنشد قنب بالرجم عاوي
هات روحك بهار و زين الحمس ..
كم طعون(ن) مضاربها تداوي
ما حسبنا لها بالربع و الخمس ..
خيرة الله و لا بعض الرجاوي
كانها بس للحيال و النمس ..
ما عليها تحاسيف و جداوي
شمس غابت و حنا في رجا شمس ..
منهو اللي بقى منا فداوي
.........( ضحكـة ثغـــرك ).........
هذا أنت ولا حمرة الشمس و اليم ..
ريح المطر ولا نسايم حنينك
يومك ضحكت و بش بأوجانك الدم ..
قبل الغياب و كلهم حاسدينك
كن النهار اللي رسم للشفق فم ..
ضحكة ثغرك اللي سماها جبينك
هذا أنت ولا من يضم الحشا ضم ..
هذي يدين البرد ولا يدينك
(ثلجي نحرك) أدفى من غفاية الهم ..
عن خاطر(ن) صحوات همه تدينك
أبا أتشتت مع جديلك و أبا ألم ..
و أبقى معك سيد هواك و رهينك
.........( دخيــل المـا )..........
حزين من الشتا ولا حزين من الظمى يا طير ..
دخيل الريشتين اللي تضفك حل عن عيني
دخيل الما و ملح الما و حزن الما قبل ما تطير ..
تهيا للهبوب اللي تصافق في شراييني
دخيل الغصن و الظل الهزيل و هفهفات عصير ..
دخيلك لا تشح بنجمتي و الليل ممسيني
ترفرف يا فقير الريش ضيقه و النهار قصير ..
علامك كل ما ليل جناحك جيت ساريني
أنا ماني بخير و جيت يمي و أنت ما أنت بخير ..
و أنا يا طير في من الهجاد اللي مكفيني
ترى لو شفت لي ظل و مهابة في عيون الغير ..
ترى كل الزهاب اللي معي جرحي و سكيني
........( جـداد الفـرايــد ).........
أنا لي عن جداد الفرايد شهر و شوي ..
نشف دم قلبي و القلم ناشف(ن) ريقه
حضر كل هم بخاطري يوم غابت هي ..
لك الله قصيد(ن) يفرج الهم و الضيقه
و أنا من قصيدي لا حشا ما نفضت يدي ..
و لا مر يوم(ن) و إخذلتني طواريقه
أنا الشعر عندي مثل الإنسان كاين حي ..
رفيق(ن) و له حق الوفا في مواثيقه
رفيق(ن) ليا لدت عيون الشدايد لي ..
شلع كنه اللي نازع(ن) من شواهيقه
|