............( صـوتـي المبحــوح )..........
على كثر الكلام وكثر ماقبل الكلام جـروح
سكت وما لقيت الكلمتين اللي على بالـي ..
أخاف إن قلتها وإن قلتها وإن قلتها بوضـوح
توسدني ملامات الرفيق وشرهة الغالـي ..
كذوبة يا الهجوس اللي على الخاطر تجي وتـروح
بغيت أزبن ذراها واستريح وما تهيا لـي ..
ورحت أتلي شتاتي وآترجا صوتي المبحـوح
تموج بي الدروب ومسند كفي على ظلالـي ..
عسى ما أنتي رجايا يابروق في سماي تلـوح
يشرهبني رعدها والظما بالصدر همالـي ..
نقلت جروح ما أعرفها بقلب مرهف مجـروح
تنطحت البياض و سود الله وجه عذالـي ..
ولو طالت بي الحروة وبانت للملام شبـوح
نهض شوفي جنحانه واستبان المرقب العالـي ..
ولو خان الشفق مرة ومرة طيره المذبـوح
بقا وكره على جباه النجوم المرقبة خالـي ..
يسامحني رفيق كل ما أخطى قلت له مسمـوح
على كبر الهقاوي من رفيقي مرخي حبالـي ..
ماهو بـ ذنب الكفوف اللي شذاها بالجميل يفـوح
إلى من صافحت بعض الردى في بعض الأحوالـي ..
ماهو بـ ذنب الوفا والنية البيضا وطيب الـروح
وأنا ثوب الجمالة ما لبسته جرد وسمالـي ..
على كثر الكلام وكثر غيظي مانويت أبـوح
عساها ماتعود الكلمتين اللي على بالـي ..
..........( الجبــل راســي )..........
ينجرح قلب لكن ترتفع هامة
والله إني لا أموت ولا أنحنى راسي ...
لو رماني زماني وسط دوامه
العواصف شديدة والجبل راسي ...
أنقل الحزن وأمشي منتصب قامه
قاسي الوقت لكني بعد قاسي ...
وأسمع الحلم يصرخ لحظة إعدامه
رابط الجاش ماهز الخبر باسي ...
عزتي غالية والناس سوامه
قلت ما أطيع حتى تقطع أنفاسي ...
زانت أيام عمري شانت أيامه
مارجيت العزا من رحمة الناسي ...
من عجز لايدوس الهم بأقدامه
لازم إنه مع الأيام ينداسي ...
يندمل جرح قلب ماتت أحلامه
بس ما أظن يبرا جرح الإحساسي ...
يوم صارت مابين القلب والهامة
ويش أبي بالحياة إليا إنحنى راسي ...
...........( لعبــة النــار )...........
ولع رماد الشوق يا معذبي نار
من كان يحلم بـ إشتعال الرمادي ..
ما كنت أحسب إنه يكون اللقا حار
لين إلتقينا و إشبكتنا الأيادي ..
و قامت لنا الذكرى تغني على الطار
تنساب بـ أسماعي نغم حب هادي ..
حسيت شي لفني مثل الإعصار
و أستيقظت نشوة غلاك بـ فؤادي ..
أخذت لي سجة وأنا شبه منهار
بين الخيال و بين علم وكادي ..
و فزيت يوم أني تنبهت وش صار
مثل الذي توه صحا من رقادي ..
تغير الموقف بلا سابق إنذار
و غير المشاعر جت مشاعر جدادي ..
رديت لك عقب التجافي و الإنكار
و طويت صفحات الزعل و العنادي ..
و تبددت ذيك المبادي و الأفكار
أية جنون أفكار و أية مبادي ..
تراي أنا مليتها لعبة النار
ما أحد لعبها قبلنا و إستفادي ..
من رد لـ الجنة عقب صالي النار
حتى السموم يصير عنده برادي ..
..........( الـدمعـــه )...........
يا أبن الحلال أنت وش تبغى بـ هالدمعة ..
بتموت ما شفت دمعة ذل من عيني
ماني حبيبك إذا ضحيت بـ السمعة ..
لا ذلني حب ويش اللي تبي فيني ..؟
لا تكسر الود يجرح راحتي جمعه ..
يكفيك جرح الحشا لا تجرح يديني
لا تزهم الليل كل اللي بقى شمعة ..
هي كل شي تبقى بينك و بيني
وهج المكابر تراه بـ يحرقك لمعه ..
باكر ترى أقول لك ما عاد يمديني
أبعدتني و القلوب القشر مجتمعه ..
دايم و أنا القاك ,, دايم و أنت مغديني
أدور أنا و أنت مثل السبت و الجمعة ..
يا قربنا و الصحيح إنا بعيديني
...........( مقـرد الخلـــق )..........
مراهيش نوك ماتبل الورق يا هـن
لها اليوم تاسع يوم تبرق ولا سالــت...
يقولون لاضاقت عليك الوسيعة غـن
وأنا أقول شفت مقرد الخلق وش قالـت ..
أنا البارحة من غابت إلين أذن
تحلوى عيوني للكرى مير ما أحتالـت ..
يثوع النعاس من أرمد الجفن يوم تعـن
سراميد غيظ بالحشا حبلها فالـت ..
ماغير أتدرق بأسمر الليل لا لجـن
هجوس تخطرت هيبة الجرح و أختالت ..
هجوس ليا قامت تكرب وقمت أون
تصرم معاليق الحنايا ليا أنهالـت ..
ذلول الهجاد اللي نبت في جماها سن
من العام تثعي في ضلوعي ولا زالـت ...
حلال الذهاب إلى استشاطت لبسها جـن
عساي أتجود في نحرها ليا مالـت ..
وأنا يوم أمس بطانها ماعليه مـن
يدين الهوان إن حطت اللوم وإن شالـت ...
ابا أزم نفسي عن طمان هواه مصـن
وأعدي لجفني وأرقب العين وش خالـت ...
عليها الملام ولا عليها السلام أبـدن
يدين تبي قصرة يديني ولا طالـت ...
بعد مانفضت غبار صدري ولد ياهـن
بعد ماروت روحي من الغيض وأكتالـت ...
يقولون لاضاقت عليك الوسيعة غـن
وأنا أقول شفت مقرد الخلق وش قالـت ...
..........( القصــايــد )..........
من هجوس تغني الذوق عن بعض الهجـوس
يعلم الله كنها اللول يوم نصبهـا
كنها سراية البرق لي قامت تهـوس
من يقول الله عليها نقول أبشر بهـا
القصايد ما نساوم عليها بالفلـوس
تفتخر فينا القصايد قبل نفخر بهـا
من خلقنا الله وحنا عزيزين النفـوس
ما نوطي شمخ الروس غير لربهـا
ماردينا والليالي لها وجه عبـوس
خل يوم إن الليالي سميح دربهـا
لي جهزنا بالمثايل ندوس الراي دوس
والدسايس بارد العين ما يجهر بهـا
ما نشدنا عن دنوع على الجره يحـوس
يحسب إنه صار حاجه وهو من جنبهـا
قدرنا عند النشامى مجرب ومحسـوس
الرجال اللي على الدين ما نبخل بهـا
التجارب علمتنا وصمينا الـدروس
نعرف النفس المريضة ونعرف طبهـا
ينطفي سم الحيايا وهو تحت الضـروس
يا الله إنك تختصرها على من شبهـا
" البنآدم لاتعافى على كفه يبـوس
وش يبي بأعراض الأجواد يوم يسبهـا "
لايحسب إن المراجل تجي درباي روس
ينتبه من جمرة النار لا يلعب بهـا
............( أوراق منسيــــه )............
كلك تعالي غلا ولا أرجعي كلـك
بعض الغلا منك مايستاهل الجيه ...
طالت وانا في رجا ليتك و ياعلك
أوراق بالذاكرة وأوراق منسيه ...
مابل ثوبك مطر شوقي ولا بلك
لو علتك من سحاب الروح وسميه ...
" ليه أمشي الدرب دامه ما يوصل لك
تخاف رمضا الضياع أقدام رجليه ..."
يابنت تو الهوى ماصرت أنا خلك
للحين مازالت الصورة رماديه ...
ومازال بعض الغموض الشره يحتلك
وشلون أنا أعشقك وأحبك على النيه ...
أشوفك هناك قدامي ولا أدلك
صعب الكتابة ليا صار الورق ميه ...
إن كان شمسك تساومني على ظلك
ماعاد أبي منك لا شمس ولا فيه ...
أما تعالي لقلب فز لك كلك
ولا أتركيني ما ابي لك بالهوى جيه ...
...........( خلـك بعيـــد )..........
لاعاد تنشد مابقى عندي علوم
كل العلوم المبطيات تخبرها ...
ماجيتك أشكي ميلة الوقت مزحوم
نفسي ليا ضاق المدى ما أخسرها ...
ياصاحبي كنت أمس كنت أمس محشوم
واليوم هج بجيتك وإختصرها ...
خلك بعيد أبعد من العام لليوم
وأدنى من أحلام النجوم وقمرها ...
بعض الكلام اللي تحليه مسموم
وما كل كف صافحتك تغدرها ...
" كم طيب ساقته الأقدار لرخوم
ويا كثر ناس تنخدع في صورها ... "
والحر مايشره على خنعة البوم
الله رفع شانه ووطا قدرها ...
لو جيتني كنك على الوجه ملطوم
بعض الخطايا عذرها ماغفرها ...
عندي تساوت هرجة العذر واللوم
هذيك ما أبغاها وذيك أحتقرها ...
زلة وعدت ماحدتني عن النوم
مرت سلام وبعد الله كدرها ...
أنا أعتبرها كبوة حصان ويقوم
وأنت إعتبرها زي ماتعتبرها ...
|