مـن إًجمــل وإًعــذب ماقـراءت فـي الشعــر ،،
أكـاد أجـزم أنـه لابـد مـن إحتـواء مكتبـة دواويـن المنتـدى لديـوان هـذا الشاعـر ،،
فهـو شاعـر متفـرد وذو حـس وذائقـه عاليــه ،،

إًتمنـى أن تستمتعــو بما أخـترت مـن قصائــد ،،


للشاعـــر ،،،،،،،،،

((مـسـاعد الـرشـيـدي))




............( آخـر عبــآراتـي )............


آخر عباراتي وداع ,, آخر مشاويري رحيل
جيتك و بي لفحة ظما و أقفيت كبدي ناشفه ..
أصعب كلام ,, أصعب خبر صرخه عقب صمت طويل
مثل الهدوء اللي سبق لحظة هبوب العاصفه ..

" و إنتي بـ متناول يدي تبدين مثل المستحيل
في عشرتك صوت العقل يقتل طموح العاطفه .. "

الحب ماهو كل شي إلى وقف حظ بخيل
قلوبنا أصفى من العسل بس الظروف مصالفه ..
لا لـ الندم ,, لا لـ العتب ,, أو شي من هذا القبيـل
و أنتي ما جا منك خطأ حتى تقولي آسفه ..
من غير ليه استسلمي و استلهمي صبر جميل
ولا تسأليني وش جرى ما لك بـ طول السالفه ..
قولي لهم يا عزوتي ما عابنا موت النخيل
اللي يوافيها الأجل و تموت لكن واقفه ..
آخر عباراتي وداع ,, آخر مشاويري رحيل
جيتك و كبدي ناشفه و أقفيت كبدي ناشفه ..




............( تشـآورنـــا )............


تشاورنا على الفي البعيد وقلت: ويش الراي ..؟
وتهادت من عيونك ضحكة ماني بـ ناسيها
أنا أشهد يا العيون المرجهنه غير أجيك أقصآي ..
نحيل طاولته جبال همه وأنتخى فيها
أنا أشهد لـ أقطفك ورد وقصايد وأنثرك بـ غنآي ..
على فال الهبوب وكل ذعذاع يغنيها
أنا أعرف كيف ينساق البحر كله لـ بحة نآي ..
وأنا أعرف من هي اللي تقتل أشعاري وتحييها
إذا ما أرضي غرورك لاكتبتك تنكسر يمنآي ..
وربك ما تخون القوس هقوة كف باريها
يا ليتك تشعلي صمت الدروب وتشعلين خطآي ..
وأضم الصدفة اللي جمعتنا حيل وأغليها
يا ليتك تسكبيني كل ما أظما في كفوفك مآي ..
وأصير الغيمة اللي كنت بكفوفك مخبيها
وأهلي بالنهار اللي لفا بك والنهار الجآي ..
وأجرب كيف أموت بضحكتك وأحيا بتاليها
يا ملحك في حشاي وبـ العيون وبـ أرتجاف شفآي ..
وأنا قلبي تخونه هيبة الجية وطاريها
أنا سيد هواك وقلت مرة للهدب مولآي ..
دريت إني رهينك يا عيون عز واليها
وطن عمري عيونك ,, ديرتي ,, ربعي ,, هلي ,, منفآي ..
حلال أن غربتني ضحكة ماني بـ ناسيها



...........( تشبهـين البحـــر )..........


تشبهين البحر ...!!
قالت: أشبه البحر و تخافه
قلت: يتشرد سنا نجمه ولا تظما مرايا ..
تقربين لـ ماه ...!!
قالت: بيننا فرق و مسافه
قلت: كم يبعد سواد الرمش عن سود المنايا ..
يا الحبيبه لا تلوميني على قل الكلافه
ما ذبحت إلا الطعون و ما عزمت إلا الحنايا ..
سامحيني لو هزعت الغصن و أحزني جفافه
الضلوع اللي على خبرك ,, على خبرك ظمايا ..
يومها ضاق الخيال بـ يمتي رفض و صلافه
باقي منك الكثير ولا بقى مني بقايا ..
أدرج مثل النهار اللي لمح ظله و شافه
أطرق مثل المشيب اللي غشا روس الخطايا ..
عاشق هزه هواك و شاعر ما أهتز قافه
قادها عيطا نشاش عضودها فج و ملايا ..
وين ما ريع عليه الليل و الرمضا خلافه

" لحف القمرا طرف بشته و نجماته عرايا ..
المهم إني عبرت لـ عمر و أدمنتي ضفافه "

آه يا قل الخطأ مني ويا كثر الزرايا ..
كل ما عرج على قلبي هاك الطاري و حافه

" ساقني لـ الموت طرف و ضحكة بين الثنايا ..
ما على حسنك كلام ولا على جرحي حسافه "

ما خلق ربي جمال إلا و لك منه حلايا ..
إيه يا ملح القصيد إنتي و يا عذر أرتجافه
لو عذاريبه تجيب بسيرتك صارت مزايا ..
من متى كان الخيار أنتي و كان الحلم تافه
يا بعد كل الغياب و يا بعد كل الهدايا ..

بس أنا عندي سؤال إن كان ما فيها كلافه
تذكرين البحر ..؟
قالت: و ألمسه بين الحنايآ ..


..........( شـاطـي النيــل )...........


ليلك نثر عطره على شاطي النيــل
وأنا ضواني ليل نجد و سريتـه ..
يا مطول الغيبات ياما أطول الليـل
توي دريت إنه سواد و جفيتـه..
أثر النجوم أكثر من الجدي و سهيــل
نجم كتب همي و نجم محيتـه ..
يا صاحبي عطشان عطشان لك حيــل
مظمي و همال السهر ما قويتـه ..
رد السلام لـ مترفات المناديــل
كحل العيون و دمعك اللي نسيتـه ..
الدرب ميت و الخطاوي مقاتيـل
وإن لاح طيفك مت فيه و حييتــه ..
الله على الضحكة نهار المواصيــل
هاك النهار اللي بـ عمري فديتـه ..
قبل أتقهوى من كسالا مظاليـل
قبل السلام و قبل جاني و جيتـه ..
ضم الحشا و أكسر جمود التفاصيـل
ما عندي أغلى من خفوق كويتــه ..
لـ مصافحك كف و قصيد و هلاهيـل
إما زبنك القلب والا خذيتــه ..
لو يغري القمرا ذبول القناديـل
بعت النهار لـ جيتك و إشتريتــه ..
يوم إنتثر عطرك على شاطي النيـل
أنا ضواني ليل نجد و سريتــه ..


..........( حلــم البنفســج )..........


حلم البنفسج رذاذ و هب له نوبه ..
ذعذاعة ما يبل الكبد ماطرها
رديت منها عطش و أحلام مجلوبه ..
كن الخطاوي تقودها جبايرها
الناس تنشد و كل يحسب ذنوبه ..
و أستعذب الصمت في زحمة مشاعرها
لمه و لجه و مجروح توصوا به ..
أشباح ضول يديها في خناجرها
هي توبة الذنب ولا ما بها توبه ..
أو زلة شجرت بـ كفوف غافرها
مره يلومون شاعر خانت دروبه ..
و مره تخون المدينة حلم شاعرها

" مره كتبت القصيد لـ عين رعبوبه ..
و مرة نهبت القصايد من محاجرها "

يا طفلة النور كن الشمس لعبوبه ..
بـ الغرة اللي تضاحك لي بشايرها
وليا لفيتي صباح العمر محبوبه ..
تنطحتك القوافي في مباخرها
تزينت لك تقل غيدا و مخطوبه ..
كل يداري نهار الحفل خاطرها

تبختري و الجروح أقدار مكتوبه ..
ما شاورتني و أنا ما جيت أشاورها

وردية الفال دوبه شاعرك دوبه ..
ينفض غبار الخناجر عن منابرها
حوريتي و الكلام أنفاس منهوبه ..
شحيت بـ العبرة اللي شاب صابرها
لي خافق لو يهب الريح من صوبه ..
يكره حديث الدرايش عن ستايرها
تجملي في نحيل ضاق به ثوبه ..
قبل الشوارع تذوب بـ ظل زايرها

صبح البنفسج غمام و هب هالنوبه ..
ديمومة سيلت بـ الكبد ماطرها



...........( ليــل الحريــر )...........


كيف أطفي الريح بـ ثيابك و كيف أشعلك
كيف أتنثر على جمرك و كيف أحتويك ..
نقضت ليل الحرير و جيت ما أنت لـ هلك
سميت بـ اللي فتني بك و قلت أبتديك ..
هذا أول الدرب أو هذا الطريق أولك
جيت أتوقا عذابات المدى و أهتديك ..
شوقي مسافه و همساتك مدار و فلك
إن ما ظميتك غلا يا علني ما أرتويك ..
إيه أعرفك و أعرف إني من غلاك أجهلك
مرات أضمك و أخاف إني مشبه عليك ..
مرات أشوفك بنفس الوقت و أتخيلك
و أنشد كفوفي عن آخر سالفة من يديك ..
أعن لك لو تصب الموت و أتهيا لك
و أجوع لك و أتمنى خنجرك و أشتهيك ..
ما قلت لك عمر سيف العشق ما يقتلك
ما تشوفني حي قدامك و أنا أموت فيك ..
إشتقت لك قبل أجيك و جيت وإشتقت لك
البارحة طول ليلي بين هذي و ذيك ..
مليت جمر إنتظارك و استحيت اسألك
و حسبتني ما بعد جيتك و فكرت أجيك ..
أثرك بقلبي من البارح و أنا أستعجلك
و أثري نسيتك من الفرحة و قمت أحتريك ..