بأعلن على كلمة طلال احتجاجي ..
..................... طلال يكفينا تجاريح ياخي..
ما انته بلاحئ لا منته بلاجئ..
..................... تكفى تراها كلمة تذبح الحي..
قل ضيف قل زاير لناس هجاجي..
..................... وبكره نرد وكن ماصار به شي..
خلك على ماقيل في برج عاجي..
..................... لو تحترق كل البشر داخلي في..
شفني وشف حالي وقل ابتهاجي..
..................... عقب انقلاب الحال وش صاير في..
من اول كيفي وحره ومزاااجي..
..................... واليوم ماعندي من اللي مضى شي..
مديت كفي للعطا وطاح تاجي..
..................... وبعض المبادي دستها تحت رجلي..
(( كيــــــــفي مزاجـــــــي ))
كيفي مزاجي كل شي بكيفي...
.................. حره وحره والف مليوووون حره..
باخذ ربيعك منك واعطيك صيفي..
.................. وباخذ حلا الايام واعطيك مررره..
ذوق العنا خله يزاورك طيفي..
.................. ذوقي اللي ذقناه ولو كان مره..
عقب الهجر يا تعتذر يا وليفي..
.................. بأرد لك نص العنا والمضره..
وهذه احدى القصائد الساخرهــ للشاعرهــ رحمها الله
.
.
.
لـي صاحب منه تبـي تطلع الروح
...................خبل ومن هي مولعه فيه خبــله
عاميــن المح له مع الجد ومزوح
...................وأقول ياعنتــر تنـاديك ... عبلة
طال المدى ثم قلت أنا أغليك يالوح
...................مجروحة جرح جرح مخاطره عجله
دنق وقال أنا من العام ... مجروح
...................وأشـر لجرح مبطــــي وسط رجله
لاخير بانسان رمى ثوب ماضيـه ..... وبالتالية يسعى لطمـس الهوية
للشمس نور يحسب إنّـه يغطيّـه..... ما يدري كفوفـه بنـوره خفّيّـه
وأنا فدا الماضي ليا حل طاريـه ..... أنسى الحيـاة المترفة والشقية
طبع البداوة عشقي وميتة فيـه ..... وكلّي فخر لاقالـوا إنّـي بدويّـه
إيه أبدويه آخذ الخيـر وأعطيـه ..... وأبادل المعطي جزيـل العطية
إيه أبدويه وأزرع الطيب وأجنيه ..... الطيب زرعي ما زرعت ألرديه
إيه أبدويه لـو تزيـد المشاريـه ..... ببقـى على عهـد البداوة وفيّّـه
ماألاحق الموضة بسوق المسافيه ..... اللي لهن كل يوم روحـه وجيّـه
الله سترني ، ثوبهـم ذاك ماابيـه ..... لاصار تطريزه بسلـك الخطية
ماني من اللي أثبت العكس وأنفيه ..... وبيني وبين العيب حوض المنيّـه
ومانيب دلّوعه ولا قلت : (أمبيه) ..... ولالي على كثر الدلـع مقدريّـه
رزينه وثقلي على الخـفّ ابديّـه ..... دام الثقـل زينـه لعقـــل البنيّـه
كرامتي نجم سطـع فـي لياليـه ..... ولاذلّني مخلوق ما دمـت حيّـه
لنفسي عليّه دين لاشـك أبوفيـه ..... ولا دفعت لمقتـل الخـوف ديّـه
وأقول للي جهل الأيـام معميـه ..... مولوده ، وعشت ، وبموت أبدويه
.·:*¨`*:·. كوشة فرحها.·:*`¨*:·.
وكليلها الابيض بقايا كفنها
.................... تبريكاتهم اصبح عزى يجرح الصوت
صرخه ويبابه تشابه لحنا
.................... غصب عليها تقبل الوضع بسكوت
مهرة وعادات البداوه رسنها
.................... اغضت وصدت وانطلق صوت مكبوت
لابو تقاليد الحياة وسننها
.................... وراحت معاه وبقلبها حرف منحوت
يبقى معاها لين يطوي بدنها
.................... وراحت وبركان القهر لاتها لوت
تبي تصيح وفيه خوف سكنها
.................... راحت وصدى كلماتها زلزل بيوت
" لابو تقاليد الحياة وسننها "
|