منتديات قصايد ليل - عرض مشاركة واحدة

08-10-2011

.
.
.
شقه فهاد*صفا ..
كان ينزل الصور من جواله على لابه ..ويضحك وعيونه غرقت بالدمع وهو يشوف صور فارس وسهراتهم .. يافرق سهرته الليلة عن السهرات مع فارس وربعهم ..
لفرٍآقَكم ششكل ع‘ـَـَجيب
صصوٍُرٍَه مثل كل الصصوٍُرٍ
بسس السسهرغ‘ـَـَيرٍ السسهر
مآأقدرٍ أقوٍُوٍُوٍُل إني ح‘ـَـَزٍين
لكن بموٍُوٍُوٍُت من القهـَـَـَـَـَـَـَـَرٍ

ضاقت صفا من حاله ياكثر تعلقه بـ فارس وهي تتمتم ربي يسلي قلبه ويجبره عن فراق العضيد ..
.
.
.
النمسا ..
فينا ..
قامت مها من السرير وطلعت لمتعب .. شافته نايم على الصوفا ويده نازله من الصوفا : يافديتك ..
جلست ورفعت يده وخلتها بحضنها وبرقة: متعب..
متعب تحرك شوي حط يده على عيونه من النور : مها ..
مها : آييه .. ليه نايم هنا ..
متعب كان زعلان منها على كلامها عن نفسها ونظرتها انقلب على بطنه ولاكلمها..
مها ابتسمت: متعب ..
مارد عليها ..
مها أغراها شعر متعب لنص الرقبة المقصوص بشكل مرتب وانيق وساعدته طبيعه شعره الكثيف والاسود حطت كفها بشعره وهي تحركه بهدوء وتكلمه ..: ليه ماترد..
متعب: لاني زعلان ..
مها : طيب أنا مااحب ازعل أحد .. شلون ارضيك؟
متعب رجع على ظهرها : نظرتك البششعه لنفسك لاتنظرينها بينك وبين نفسك فما بالك بينك وبيني ..
مها تعشقه وكلمه عشق وحب قليله بحق بما تملكه بقلبها لـ هالانسان.. بس تقوله احبك اعشقك اغليك جعلني مابكيك بس حياها منعها اكتفت توصل اللي تبيه له بنظره عيونها ..
متعب : اتفقنا مها ..
مها مسكت كفه وباسته ودموعها على كفه وباحت باللي داخلها: جعلني مابكيك يامتعب ..
متعب تأثر .. بس بنفس الوقت حس بقيمته عندها .. حب نظره الحب اللي بعيونها له من أكثر من 3 شهور ومرور من صارت معه ماشاف هالنظرة بعيونها غير هالليلة .. : أحبببك ..
مها حمر وجهها من نبرته الغير ..
متعب بلمح بصر شالها وحطها بحضنه وهو على الصوفا ومرجع ظهره على الاخر : يا تل قلبي على وجههك اللي قلب لونه ..
ضحك وحط راسها تحت رقبته : فرغي كل الحيا هنا ياساتر ..
قالها وهو ميت ضحك وومستانس بحياها منه ..
.
.
.
بعد مرور اسبوع ..
ببيت أبو عبدالله ..
كانت شجن بالصالة مع العنود ..
العنود: خلاص راح تسافرين ..
شجن تودع العنود: خلاص طيارتنا بكرة .. انتبهي لنفسك وفكري بحياتك مع زياد وارجعي له ..
أم عبدالله: انصحيها ياشجن..
شجن ناظرت ام عبدالله : اقولها ياخالتي من قبل..
العنود لاجل ماتشتغل بال صديقتها : بأذن الله ..
ودعتها هي وولدها وطلعت..
بكت العنود وكثر ماتكره السفر كرهته زود ..
بعد وقت ..
العنود : يمه من غير هالغرفة واثثها ؟
فواز جالس وبحضنه بنت اخته : أبوي ..
العنود بحب: بعد عمري أبوي ..
فواز:عاد شرأيك ترى انا اخترت كل شي هلالي..
العنود : مرآ تجنن ..
امهم: فواز نزل بنت اختك ..
فواز: خليني اتسلى فيها ..عنود بنتك على الصامت ..
العنود مسنده راسها : آييه ماتبكي ..
امها: الله يبعدها عن شخصيتك أنتي وفواز ..
فواز: لتين اطلعي مثلنا ..
امهم طلعت : الله يخلف على لتين دامك امها وذا خالها ..
العنود ابتسمت : فواز متى مباراة الهلال ..
فواز ضحك بشكل هستري : لآآآ ..
العنود ضحكت: وجع لاتطيح البنت ..شفيك؟
فواز يضحك ويكلم بنت اخته : امتس الخبلة مالها اسبوع من جابتس وتعبانة وتسأل عن الهلال..
العنود حذفته بالمخده: ياسامج تخرب نظرتي بعين بنتي من اليوم ..
بكت بنتها لان المخده جات فيها ..
فواز : عنيد ياغبية رميتي بنتس والحين تبكي..
العنود جلست : الله يسستر تجي امي وتهزئنا..
دخلت امهم : شفيها لتين ..
فواز يشيل المخده ويبعده ..
امهم : حسبي الله على العدو ترمون بعض بالمخدات وتجي على بنتك..
امهم كانت تحط لتين بسريرها : فواز عنود دجتكم خلوها بعيده عن لتين..
فواز : طيب يمه ..
طلعت امهم ..
العنود لاول مره من ولدتها تتأمل كلمه بنتها: الله فواز استوعبت بنتي ..
قعدت تكررها : بنتي .. آحسس بشعور غريب ..
فواز تحمس : وشو خليني اجربه ..
ضحكت :هههههههههههههههههههه غبي غبي يافواز لما تتزوج ويجيك عيال راح تحس بشعور حلو..
فواز يضحك : لحظه شعور حلو قاعد احسه مع بنتس وأنا خالها ..
العنود تذكرت: متى مباراة الهلال؟
فواز : اوما ماتدرين الليلة ..العنود خايف من هالمباراة ..
العنود : حتى أنا .. مدري ليه حاسه راح نطلع من دوري ابطال اسيا..
فواز : الله يسستر ..
العنود : ماراح تروح للملعب طيب..
فواز : لا منيب رايح امي رافضة ..
العنود: احسسن حتى أنا خايفة عليك مع الزحمه ..
.
.
.
ببيت ماجد ..
مهنا له قلبه ووتين بالرياض وهو بالسويد .. كان جالس يلاعب بنته ونجد وعمتها سوالف ..
ماجد: نجد وين هدايا وتين ؟
نجد : لحظه بقوم اجيبها ..
قامت وقامت معها وتين وهي فرحانه ببراءتها على الهدايا ونست كل زعلها من ابوها ..
ماجد قام جلس جنب امه : بشريني عنك يالغالية ؟
امه ابتسمت له براحه: بخير دامني اشوفك مرتاح مع نجد ..
ماجد : الحمدلله يمه مرتاح بالحيل معها .. بس الاهم عندي من راحتي راحتك وراحه وتين ..
امه : الله يرضى عليك ياللي تدرون عن راحه امك وبنتك ..
باس كف امه وهو يسولف لها عن سفرته للسويد ..
غرفة نومهم ..
جلست نجد وتين على السرير وهي تفتح لها علب الهدايا..
وتين استانست حيل فيها ..
نجد تركب لها البطاريات وتتحرك الباربي : شوفي تتحرك..
وتين تصفق بيدينها وحيل مستانسه .. ضحكت نجد وهي تفك لعبه المكعبات لها وتركبها مع وتين بحماس ..
دخل ماجد بعد وقت وناظرهم وهو مبتسم : اشوف السرير حوسة..
نجد ناظرته وفضلت الانسحاب من الغرفة .. تغير وجهه ماجد لما تركت نجد الغرفة لهم وحس بأثر كلامه عليها لما كانوا بالسويد.. حب يجلس مع بنته ويلعب معها..
.
.
.
ببيت أبو عبدالله ..
العنود كانت تبكي وتناظر الهلال يطلع من كأس آسيا .. وفواز مدمعه عيونه: خلاص العنود اصلن مانقدر ننافس هالسنة ماعندنا مدرب صاحي..السنة الجاية كأس اسيا لنا ..
العنود تشهق: فواز اسيا .. حلمنا ..حلم عبدالرحمن بن مساعد .. آسيييا مهيب أي بطولة ..
فواز :آيييه ادري اسيا حلمنا بس ربي ماكتبها لنا هالسنه ياخوك..
دخل زياد الساعة 11 لغرفة العنودلانه مر وحب يتطمن على العنود وبنتهم من صدمته ببكى العنود وجهه فواز المتغير ركض لبتنه على باله صاير لها شي تطمن عليها وتناظرهم: وراكم ..
فواز يناظر التلفزيون : الهلال طلع من كأس اسيا ..
ضحك زياد بنذاله وشماته : تستاهلوووون رافعين خشومكم بالهلال .. مافيه غير الاتي تأهل وبنأخذ كاس اسيا ..
العنود : تحلم تأخذونه ماراح يأخذه غير الفرق الكورية مصدق أنت بس يعطونكم جوكم ..
زياد بطنازه: اجل نطلع على يد ام صلال ..!
العنود: طلعنا بركلات الترجيح ..
فواز : ركلات حظ .. ولو غيرنا تعرض للظروف ذي ماكان وصل لدور 16 الهلال ظروفه صعبه لامدرب ولاشي صاحي ..بس اسيا السنه الجاية لنا..
زياد ضحك بشماته فيهم ..
العنود بعصبيه : زياد اسكت ..
زياد شال بنته وجلس على طرف السرير :كملي جوك مع المباراة وخليني مع لتين ..
العنود تخزه: انتهت ..
زياد : فواز افا تبكي لاجل كورة عيب يارجال..
فواز رمى الريموت : مسوي بيفوز فيها الاتحاد تبطي ..
طلع من الغرفة وهو ضايق ومخنوق من هزيمة الهلال..
العنود :زياد نزل لتين واطلع منيب طايقتك ..
زياد نزل لتين وقام صك الباب وجلس: عمتي فتحت لي الباب وطلعت لغرفتها يعني الجو امان ..عنود لتس اسبوع مارضعتي لتين والحليب راح يتجمع بالصدر ومهوب زين ..
العنود تمسح دموعها من بعد خروج الهلال المر: زياد انصحك تطلع..
زياد عطف رجله تحته وبنتهم بحضنه : لامنيب طالع بجلس ..ولازم ترضعين لتين حليبك مفيد لها..
العنود :فحط منيب اعرف..
زياد: مايبي لها عنود وراح اساعدك..
العنود خزته بنظره: لا..
زياد : تكفين عنود صدقيني مافيه افيد لبنتنا من حليبك لاترضعينها دوم بس على الاقل بين وقت ووقت..
العنود : طيب الليلة مالي خلق..
زياد يبي يحنن قلبها: العنود مافيه اجمل من هالشعور صدقيني راح ينسيك هالخسارة والهلال..
العنود رفعت حاجب: لايكثر ..
ضحك وشال بنتهم وراح جلس جنبها على السرير وهو يحط بنتهم بحضنها ويساعدها ..
العنود حمر وجهها..
زياد ابتسم : عاادي عادي..
العنود ماتكلمت ..كملت ترضيع بنتها وتعبت معها وزياد يضحك على العنود ونرفزتها .. نزلت بنتهم وصرخت بـ زياد: مجنننون أنت..
زياد بهدوء: عنود لاتنسين العلاقة ببيننا رجاء مهوب عشاني تاركك تنسين انك زوجتي ..
العنود بعدتها عنها : زيااااد خلك بعيد تسلم ..!
زياد بتهديد:عنود ..
العنود بنفس تهديده: زياااد قلت لك خلك بعيد ..
زياد : ماطلبت المحال ..
العنود خزته : لا دامك جيت عندي فـ طلبت المحال.. منيب نورة اللي تطلبها واللي متلهفه واللي لاجل تجيبك سحرتك وأخذتك ..
زياد: قلتيها واخير تأكدتي مسحورآ يعني اجيها من غير علمي حتى زواجنا الله يسستر لايكون مهوب بـ سليم ..
العنود دمعت من القهر: زفت وحقير تنام مع نورة بالجناح..
زياد مسك كفها بيد وهو يساعدها ويعدل معها الروب من منطقه الصدر لما رضعت بنتها وبصدق: تخيلي بالله اروح بكامل قواي العقليه ادخل نورة للبيت مهوب للجناح بس .. العنود أنا ماكنت بمخي ولا ادري حتى لما صحيت الصبح بعد العلاج انصدمت وحتى على بالي كنتي نايمة معي ببيت طلال..
العنود تبعد خصلها عن وجهها: يكون بعلمك بفترة زواجك نسيتك مثل مانسيت ان لك زوجه اسمها العنود ..
زياد ابتسم وعرف انها تبي ترد حركة النسيان من قبله لان بفترة زواجه من نورة نسى وكل يوم ينسى أكثر الين لهى عن العالم ولهى بنورة..
العنود : مبتسم اكيد تذكرت ذيك الايام معها..
زياد : لا والله الا خاق مع اللي قدامي وصادتني عنها تقل مهيب حليلتي..!
العنود : خلك ..
ضحك : تدرين ان عنادك محببك لقلبي زود بس البلا انه محبب لقلبي ويروق لي..

ادري ان شجونك شجون وان عنادك عناد
والبلا ان عنادك عناد وشجونك شجون
ربك اللــــي سخرك لي تقود ومــا تقـــاد
والله الخالق ولــله فــي خلــقه شــؤون

العنود تتألم وزياد يتغزل ..
حس بنظرتها شوي وتنفجر فيه جا للمهم: طيب يالعنود امريني وشاللي تبينه وابشري به بس ارجعي لي ..
العنود تناظره :شف بالنسبه للبيت منيب راجعه له قبل ماتغير الاثاث كله ومن إيطاليا..
زياد من غير تفكير: وغيره ..
العنود : يتنفذ هالطلب اول ..
زياد : ابشري ماطلبتي شي..
العنود : نشوف يازياد ..
زياد : زياد بن محمد عند كلمته ..
عدل المخده لها لما شافها تبي ترتاح ..حطت بنتها على صدرها وهي حاطه يدها على شعرها ..
زياد كان على السرير جنبها وميت بحنانها على بنتهم : تحبينها؟
العنود تناظره وبهدوء وتغير جوها وبنتها بحضنها: احسدك على هالسؤال..
ضحك :بجد بالله ..
العنود : تخيل معي شي عاش وكبر بداخلك .. تدري زياد آحبببها أكثر من أي شي..
زياد يناظرها وعلى طريقة حبها لتين :وترى أبوها يحبك أكثثثر من أي شي..
العنود وخد بنتها على خدها وابتسمت: ملاحظ ان فيك كميات من الكلام الرومنسي..
زياد مبتسم وجايز له وضع العنود وبنتهم :بلاه من شوقي لك.. تدرين وش ودي فيه ؟
العنود تجاريه: وشو؟
زياد ابتسم : ودي اضمك ولا اتركك الين اتركك من حالي ..
العنود ضحكت: تدري متى راح تحقق هالرغبة؟
زياد بلهفه: متى؟
العنود : لما تنفذ كل طلباتي .. وكأنك نفذته فأبشر بالعنود ..
زياد : ابشري باللي تبينه لو يكلفني عمري.. أهم شي ترجعين لي بلاتس ماتدرين وشو حالي من دونك ..
العنود ضحكت: زياد روح لبيتكم ..
زياد: تكفين بنام عندتس..
العنود رفعت حاجب: ليه وشو قالولك نورة تبيتك ببيت أهلها وبغرفتها..
ضربته بقهر على وركه (فخذه) : اقسسسم يازياد لو دريت انك مسحور بوقتها كان ذبحتها بس أذا ماربيتها ..
زياد ميت ضحك ويفرك فخذه: تضربين من قلبتس.. بس عسل على قلبي يابعد قلب زياد ..
العنود :زياد شيل لتين وحطها بسريرها ..
شال بنتهم وهو يبوسها الين وصلها لسريرها وحطها ..
أخذ شماغه ودنق باس العنود وهو ماسك يدينها لاجل ماتمعنه : يلا بروح ..مدري وشاللي راح يضرتس لو تركتيني انوم معتس..
العنود تناظره بقهر على حركته: شف حركتك الحين ..
زياد بنظره :عاديه مهوب لاجلنا بعدنا عن بعض تنسين طباعي.. أنتي عارفة أنا شلون معك ..العنود تأكدي أني احبك ولو مااحبك ماصبرت عليك فأقل حق لي أنك تحترميني ..
العنود : لو سويت نفسك حركتك وتركتك بسبب السحر وخنتك مع رجل ثاني ماراح تتقبلها يازياد .. فلا تطلب مني فوق طاقتي.. كفاية بس دعوى الطلاق اللي سحبها بدر من المحكمة ..
زياد: لان بدر عارفن غلاتس عندي وحبي لتس..
العنود بزهق: زياد خلك من بعض الحركات ..
زياد بزهق أكثر: ياشين طبع الصد فيك .. لولا رجاي وخابرن أن الله بيردتس لي ردن جميلا ماكان خليتس فيذا ..
يا شيـن طبـعٍ فيـك .. يا زيــن الأطبـاع
لولا الرجــاء .. ما كان خلّيته .. يفـوت
سَـنَـع .. يشـوّه لا تـذكّـرتــه .. أسـنـاع
مثل الحصاة .. اللي وسط عقد ياقــوت

العنود : ماصديتك الا عقب اللي صار ..
زياد : بس بخلك في هالصدة ماله داعي وخاصة انك عارفة أن مالي بالدعوة شي وانظلمت مثلتس.. بجد ميت من اللهفه والشوق لتس ولكلامتس .. طلبتك يالعنود الا الوصل بيننا لاتفكرين تقطينعه ..
البخل .. في سِلْم المحبيـن .. ممـقـوت
الحكي .. قوت السمع / وأسامعي جياع
ومسامـعي ماتت من الجـوع .. للـقـوت
وحكي الغزل في صدرك أشكال وأنواع
لكن صمتك .. حوّل الصـدر .. تـابـوت
إلا طَلَبتـك وصـل .. صعّبـت الأوضـاع

العنود : زياد ..
زياد رفع حاجب : أنا مدري هالعناد مين وين ورثتيه ؟
العنود : شف اسمي وبس وكل ابن ادم له نصيب من اسمه..
زياد بغبنه: الدعوة مهيب اسمتس بس .. جعل اللي علمك وعودك على العناد يموت .. هوني من العناد والصد وخلينا بالمواصل قبل لاتلاقي أحدنا المنيه ..

(مدري ..من اللي درّسـك جعله يمــوت)
تصـد .. ما كـنّـك من الصـد .. مـرتـاع
وإن قلت : يا القاطـع .. تلفّـت مبـهـوت
أقطع بـ دَرْب مواصلك في الشهر.. باع
وإلاّ إنت تقطع للوصل فـ السنة .. فوت
طعني .. وطاوع واحدٍ فيك .. ما طـاع
ناسٍ صغار عقول / وأشوار / وبخوت
وإلطف بحال اللي نحـل حاله .. و راع ..
قلبٍ جروحه .. تنزف أفكار .. وبيوت
قلبـي .. إلا منّه شـرى قـلـب .. ما بـاع
وإنت هالله هالله فيه .. والعمـر موقوت

العنود غمضت عيونها وكانت تبي تتكلم معه بس الم: زياد الممم..
زياد دنق عندها بسرعة : وين الحبوب اللي عطيتك؟
العنود :بالدرج ذاك ,,
مشى وجابها وهو يسكب مويه عطاها الحبوب ..: ممكن تهدين اعصابتس والحركة الزايدة اتركيها لان تأثر عليك ..
العنود بدت تغمض عيونها من التعب والجهد اللي بذلتها وخاصة انها كانت متوترة بعد خسارة الهلال..
غطاها زين وغطى بنتهم على دخله عمته ابتسم لما شافها ..
عمته: ناموا..
زياد: العنود توها..
عمتها: بات فيذا..
زياد ابتسم وشماغه على كتفه:لا عمه .. الله يعطيك العافية.. تصبحين على خير..
.
.
.
اليوم الثاني..
ببيت عبدالله *شهد ..
عبدالله :بروح لعمتي حصة لاجل اتطمن عليها ..
شهد كانت ضايقة على عمتها:طيب ليه ماتسافر برآ؟
عبدالله بحضنه بنته وتضحك : يقول الدكتور نفس هنا وهناك..
شهد: الله يعين .. هاتيك سحر..
تخبت تحت حلق أبوها ..
شهد ابتسمت: سحر هاتيك بابا راح يطلع ..
عبدالله مبتسم: خليها ..
شهد خلتها .. لما حست بالامان رفعت راسها من تحت حلق أبوها وتوزع ابتسامات .. باسها أبوها وهو ماسك خدودها: يالببى قلببها هالبنت
شهد تضحك على عبدالله وبنتهم : راح تتدلع كذا ياعبدالله ..
عبدالله يرفعها وتضحك بصوت مسموع يشرح الصدر:شهد شوفي..
شهد تضحك : ياعيوني أنا ..
شالت فهد : ياعمري عليييه .. آحبببه هالولد..
عبدالله جلس بنتهم بحضنه ومسك يد شهد : وعبدالله يحبك.. شهد ترى مصر اتكلم معك ونجلس ونحكي بحكي كثير بس يجي وقته لا تعتذرين..حتى بعيونك نظره حزن مهيب مريحتني ..

من زعلك في عيونك السود نظره
لا شفتها حسيت بالحزن والياس

شهد عارفه انه يبي يوصل لكل شي صار لها بفترة غيابه: اهم شي انك معي الحين ..
عبدالله : ترى كلمة جدتي بمجلس طلال للان ترن بأذني عن معاناتك لما كنت مسافر..
شهد ابتسمت له وهي تحاول تشيل سحر اللي متمسكة بابوها .. وقفت شهد وحطت فهد مكانه: شوف بنتك الحين لما اقوم ..
ضحك عبدالله وهو يشوف بنته تتفلت تبي امها ..
شالتها شهد وهي تضحك: شفت بنتك الدبا..
ضحك وهو يمسك خدها: خيانه ياسحر..
أخذ شماغه والطاقية ولبسها من جنبه وتالي حط عقاله وعين شهد ترقبه..ابتسم لها ..:يلا ياحلوين اشوفكم بعد شوي .. شهدوه احتمال الوالد يمر معي لما نجي لبيتنا لاجل يسلم عليكم..
شهد: أوك حبيبي..
نزلت سحر ومشت معه الين الباب وهي تفتح له الباب : انتبه لنفسك لاتعطف وتتحرك على رجلك كثير..
عبدالله موقف قبالها ينتظر أبوه وبدر لما يمرونه : تدرين ليه انتبه واخاف علي نفسي ..
ركزت بالنظر فيه أكثر : آممم..
عبدالله بهدوء وخوف : لاني اخاف عليك من اللي مايخافون الله .. اخاف على عيالنا من الجور والظلم .. احبببكم كثييييير وكثر حبي لكم أخاف عليكم..
شهد دمعت: عبببدالله ..
ترك وحده من عكازته وضمها : يادموعك مايعذبني كثرها..
شهد تناظره وهي على صدره : لاتقول كلام فيه نبره فراق ..عبدالله ماتحمل حياتي من غييرك..
عبدالله يده على ظهرها : من عيوني الله يخليني لاجل ماتهل الدمع هالعيون الفاتنات..
.
.
.
ببيت ماجد ..
غرفتهم ..
نجد: بروح لاهلي الليلة..
ماجد كان منسدح على السرير : ان شاء الله .. تعالي نجد ..
نجد كملت ربط شعرها ومشت له ..جلس وهو يمسك كفها ويجلسها بحضنه.. حمر وجهها ولاتعودت منه لانها ماتسمح له ..:ماجد..
ماجد ابتسم: نجد تراني ماسك نفسي وصادها لاجلك ومقدر كل شي..رجاء نجد ..
نجد ضاع لون وجهها ورجعت لها ذكرى بندر بلحظه تكره ذيك اللحظة افتقدت بسببها كل ثقتها بنفسها..
ماجد :نجد حبيبتي ..
دمعت :طيب اتركني..
ماجد ناظرها : الى متى؟
نجد تمسح دموعها: خلني اجمع شتاتي..
ماجد بلكنه غريبة: مرت حول السنه ولاقدرتي تجمعين هالشتات..!
نجد بحده وتناظره بقوه من عقب تلميحه بأن باقي لبندر بقلبها شي: مهيب بنت محمد اللي ترضى هالشي على نفسها ..
ماجد عجبه ردها : اجل ليه مبعدتني عنك ..
نجد نست حياها منه دامه وصل كلامه ونظرته : ماطلبت ياماجد وصديتك .. ابتسم وهو يحط لسانه ويحركه على شفته العليا: اوك اجل ..
.
.
.
ببيت أبو عبدالله ..
كانت العنود تناظر زياد: وشو ذا؟
زياد: كتالوج لـ أحدى دور الاثاث في ايطاليا اختاري ..
العنود حطت الكتالوج جنبها: لما اخلص راح اقولك..
زياد : الليلة بجي بالليل واخذه وتكونين اخترتي..يلا سلام ..
طلع زياد وفواز يناظرها ..
فواز: اوما عنود مامر عليك سنه كامله وتغيرين الاثاث..
العنود ابتسمت: لاجل اللي وطت بيتي ..
فواز: والاثاث؟
العنود: مدري بس أكيد جمعيات خيريه..
فواز : لا خليني اتصرف فيه..
العنود استغربت: ليه؟
فواز :بس..
العنود تحمست : لاتكفى قول ..
فواز :بقولك بس لااحد يدري..
العنود تحمست أكثر: يلا قول..
فواز :مع ربعي وطلاب بالمدرسة مسوين قروب كامل لاجل نساعد الاسر المحتاجة بالرياض..
العنود اعجبتها الحركه كثير: ياجعلني فدوة مرآ حلوه الحركة..
فواز: حيل والشعور اللي جيينا هو احنا نساعدهم شعور راحه فضيع ..يااه ياعنود فيه بعض الاسر تخيلي بس وجبه باليوم وتدرين وشو خبز يغمسونه بـ ماي ويأكلونه..
العنود تضايقت : يالله ..
فواز: لاجل كذا نبي نبيع بعض الاثاث والباقي نأثث فيه بيوت بعضهم.. والفلوس الباقية من البيع راح نقسمها قسمين الاول نوزعه بالتساوي بينهم والثاني نخليه الين رمضان بأذن الله ..
العنود كبر حيل أخوها بعينها .. برغم صغر سنه والرفاهيه المتوفرة له وشخصيته المراهقه اللامباليه امام الكل :بجد مصدومة وليه ياسخيف ماكنت تقولي؟!
فواز: أفضل .. لآن وربعي نرجى الثواب من الله سحبانه وتعالى.. وتحسين لو دروا الناس ماراح يتركون القيل والقال والتمجيد الفاضي..

ما فعلت الخير أرجي من بشر فاني إثابهـ
عالمٍ ربّي بـ قصدي و ما سبَبْ أطيب فعـولي

دخلت امهم واشر فواز للعنود ماتكمل لاجل تضل السالفة بينهم ..
امهم راحت لبنت العنود وهي تتفدى فيها وتشليها..
العنود :يمه تحسين البت دي على الصامت..
فواز : لا خليها هزاز..
العنود :هههييي ماتضحك ..
فواز : هيهيهيهيهي لاتكفين اضحكي..
امهم ناظرته بنقد على عقولهم وطلعت ببنت العنود ..
العنود: فواز خل نطلع للصالة ..
فواز سندها وطلعوا..
العنود متكيه على أخوها: يازين الدجة .. آفف زهقت من الجلسة..
فواز: شوفي خل تتشافين بس وراح نطلع ..
العنود:فيه اماكن جديدة فتحت..
فواز : اييه التحلية فيها مطاعم جديدة ..
العنود : يالبيييه بسس ..
امهم شافتهم: عنود وش مقومك من السرير..
العنود: زهقت يمه..
جلست ..
أبوها ابتسم: تو مانورت الصالة بقدوم العنود وبنتها..
العنود: يابعد عيني يبه..
امها: العنود بكرة الحريم بيجون لاجل يتحمدون لتس بالسلامة ..
العنود: اوك يمه ..
.
.
.
ببيت أهل ريما ..
كانت متضايقة وتدق على عناد ومايرد ..
امها: طيب وينه الحين؟
ريما بـ هم : مدري يمه لانه من اسبوع مايرد علي..
امها: تستاهلين اللي طعتي اختس بـ عناد .. الحين وينها اختس هماها ببيت رجلها ومع عيالها ولا سألت عليتس..
ريما دمعت بقهر ودقت على شهد : سلام..
شهد: وعليكم السلام.. هلا ريوم..شخبارك؟
ريما تقوم لغرفتها :هلا شهدوه.. زفت احوالي ياشهد..
شهد استغربت: ليه شفيه؟
ريما تبكي: عناد مايرد علي من اسبوع..
شهد طاح قلبها : يممه فيه شي؟
ريما : مدري ياشهد بس مايرد علي تهاوشنا لاني قلت له راح انام عند اهلي وقال لا واصريت عاد زعل ..وش اسوي؟
شهد :ليه ياريما كم مره قلت لتس بطلي هالحركة الحين وشو نفعتك فيه اصايل..
ريما : قاهرتني الحين ماسألت فيني.. بس ماهمتني اهم شي عناد ..
شهد: بسكر الحين وبدق عليه
ريما: ردي فيني بسرعة..
شهد: اوك..
ضمت ريما نفسها: أنا غبييية غبيييه ..
.
.
.
ببيت شهد*عبدالله ..
شهد حاط ولدها بحضنه وتدق على عمها: هلا بالغالي..
عناد : هلا شهوده شخبارك؟
شهد: تمام .. أخبارك وينك ادق عليك من يومين وامس ماترد ..
عناد: اببد ساحب على الجوال..وأنا الحين بـ بحبيبه قلبي سويسرا معاي اجازه شهر أنا وخويي ثامر ..
شهد ابتسمت : وريما..
عناد عرف ان شهد ردت :خلي اهلها وأنا عمك ينفعونها ..
شهد: عمي ريما بالحيل ضايقه لانك ماترد عليها..
عناد : أنا حلفت مارد عليها الين تبطل حركة النومه عند اهلها كل نهاية اسبوع..
شهد : لا عمي .. أنا ادفع الكفارة بس كلم ريما ..
عناد : تعرفين غلاتس عندي ولو طلبتي عيوني نفذتها بس هالقرار أنا قررته وانتهيت منه..
شهد: طيب رد عليها بالمسجات..
عناد: لا شهد .. خلي ريما تتأدب..أنا تعبت لو تدرين وشو المشكلة تصوري جيت الصبح وأخذتها من عند اهلها عاد قالت العصر الجمعه عند اهلي عاد قلت يالله بروح وتالي اكيد بترجع معي لاكن قالت لا .. خليها تتحمل اللي يجيها ..
شهد احتارات: الله يهديكم..
عناد ابتسم: آمين .. الا خليك مني طميني عنك وعن عيالك وعبدالله..
شهد ابتسمت وتلاعب ولدها: كلنا تمام .. وحياتي الحمدلله حيل مستقرة ومرتاحه دام عبدالله بقربي..
عناد ارتاح: يابعد عمك ..عساه دوم .. وين عبدالله الحين ؟
شهد : طلع مع عمي لاجل يزور عمتي حصة..
عناد ضاق بسبب اخته: هي شخبارها ووراها رافضة تكلم احد..
شهد: مدري عمي رحت لها أنا وعبدالله قبل كم يوم وتخيل عصبت ..
عناد : اعوذ بالله من شرها حتى وهي مريضة .. لاتشرهين عليها وأنا عمك..
شهد: لا عمي الله يشفيها ويكشف ضرها..
عناد يضحك فجأه ويناقر خويه ثامر ..ضحكت شهد على ضحكه عمها ..
عناد : شهد ارسلي صور عيالك خل هالدلخ يشوفهم مدري شكله يقرب لهم شي متحمس مع خشته وأنا اسحب فيه من اربع شهور..
ضحكت شهد : من عيوني..
عناد: تسلم لي عيونك .. اسمعي الحين راح نطلع ندج .. تامريني بشي..
شهد: سلامتك .. وحاول تتراجع عن اللي براسك وتكلم ريوم..
عناد مبتسم وماسك خويه لاجل مايتحرك ويبقسه: يصير خير.. شهد بسكر لاجل الفيل ذا ..
شهد تضحك: بحفظ الله ..
عناد: ارسلي الصور..
شهد: اوك ..
سكرت من عمها ودقت على ريما ..
ريما بكت : لاآآآ ..
شهد: ريوم هونيها وذا درس لاجل ماتطيعين اصايل ..
ريما :احبببه ليه يسوي فيني كذا..
شهد: قلبي ريوم اصبري هالشهر وحاولي تشغلين نفسك بأي شي وراح يمر بسرعة..
ريما تمشي بغرفتها:ليه قسى علي كذا ..
شهد: ياعمري عمي يحبك بس هو بالحيل زعلان لك لانه مشتاق لتس ورفضتي تررجعين معه..
ريما: يالله طيب بس يرد علي ..
شهد: راح اكلمه من عيوني.. وسعي صدرتس ياقلبي..
ريما: وين اوسعه وعناد زعلان وامي زعلانه مني لان زعلت عناد والله يسستر لو درى ابوي عاد عناد قريب لقلبه ..
شهد: خليها على الله واهم شي اكثري من الاستغفار صدقيني ريوم ماريحيني لما كان عبدالله مسافر كثر الاستغفار والراحة اللي كنت الاقيها لما استغفر ..

حديث الزبير بن العوام أن رسول الله صلى الله عليه وسلم قال: "من أحب أن تسره صحيفته فليكثر فيها من الاستغفار" رواه الطبراني في الأوسط ورجاله ثقات

.
.
.
ببيت ماجد ..
بغرفه نومهم ..
نجد منصدمه من شخصيه ماجد المرحة والرومنسية .. دايم تشوفه الطيبه والتواضع بالمستشفى من خلال تعامله .. بس معاملته معها غير غير غير..
ابتسمت : ماجد تكفى خل نطلع للصالة ..
ضحك وهو منسدح على رجلها : لمين نطلع بالصالة..
نجد تذكرت ان عمتها ووتين راحوا لمعياد ..
ماجد يجلس وفيه الضحكه: كأن فيه فكره ببالك عن شخصيه الدكتور بالمستشفى واللي معك الحين..
ضحكت : يمه شلون عرفت؟
ضحك : افا ذي شغلتي ..ياحلو ضحكتك ..
انحرجت..
ماجد ناظرها لوقت وبديع صنع الخالق بجمالها وفتنته واخلاقها وطيبها وتواضعها ..
نجد كانت تلعب بأسفل شعرها الطويل وساكته..
ماجد : آحم ..
رفعت عيونها..
ماجد : يازين هالعيون وهالنظرة.. يعجبني فيك حيااائك مني.. اعششقها اتلذذ فيك وفي خجلك الفطري ..
.
.
.
الشركة ..
زياد : متى راح تدبره طيب..
طلال: الملبغ موجود ربي معطينا من فضله اللهم لك الحمد..
زياد ارتاح نسيبا: حلو .. طيب اجل اكتبه لي بشيك ..
طلال : طيب وش تبيه فيه ؟
زياد: لاجل أبي اعيد تأثيث البيت من ايطاليا..
طلال رفع حاجب ومستغرب : مالك سنه من سكنت بيتك ..!
زياد : العنود رافضة ترجع الين يتأثث البيت من جديد ..
طلال: ليه؟
زياد: لاجل البيت بيتها وسكتنه غيرها ..
طلال: وأنت تطيع الله يجزاك خير..
زياد: زوجتي وأبيها .. لو تطلب عيوني اعطيها..
طلال ابتسم: افا اركد يارجال..
زياد ابتسم: احبها أم لتين ولا ابي تطلع من االنفاس الا وهي معي ..
طلال رحم اخوه وحبه للعنود ..: الحين بكتب لك الشيك..
زياد: حطه من حصتنا بالشركة ..
طلال: بكتبه لك من حسابنا الخاص ..
كتبه ووقعه وعطاه..
زياد يناظر الشيك: ماخلا منك ياعضيدي..يلا عن اذنك ..
طلال: بحفظ الله ..تعال متى راح تسوي لبنتك تمايم؟
زياد: بسأل العنود ..
طلال ضحك: اسألها ..
وقف طلال : عندي اجتماع توكل ..
ضحك وطلع..
.
.
.
الليل ..
دخل زياد لـ غرفة العنود وكان فواز موجود وقالت له كل السالفة بخصوص الاثاث ..
زياد ابتسم باعجاب واضح بشخصيه فواز :مشالله عليك ..
فواز بهستره المعهودة: اقول لااحد يدري بس..
زياد ضحك: طيب أنا ماعندي مانع .. والاثاث تعال شيله من بكرة ولكم حرية التصرف فيه ..
فواز بوناسة : بعدي يالنسيب..
زياد: مشالله علييك بجد كبرت بعيني .. الله يوفقك ..
فواز يحط يده على شعره: طيب عن اذنكم ..
طلع ولاحب يجلس مايحب أحد يمدحه مهما يكن لان قالها مايرجي من احد مدح وشكر ..
زياد : ها اخترتي..
العنود: آييه ..
زياد يجلس جنبها على السرير: آشوف ..
العنود توريه الين خلصت: حلو ..
زياد: ياقلب زياد دامك اخترتي مافيها تسأليني أكيد أنها ذوق وحلوه..
.
.
.
سويسرآ..
زيورخ السويسرية
عناد :الشياب معصب..
ثامر: ثايرين علي.. لاكن ماهمني أحد ..
عناد : ياشيخ خلك من الكل .. ياملح جو هالمدينه..
ثامر: وانششهد ..
عناد :تعال نشوف هالمحل ..
ثامر يناظر اسمه : سبرونقلي
دخلوا وكان محل شوكولا ..
عناد: نأخذ الرو(شوكولا خام) ..
ثامر: آييه هي احلى ..
أخذو وطلعوا..
عناد يأكل :شف كيف آكل ..
يأكل ويقلد الاعلانات: شو بتجنن ..
ثامر:هههههههههههههههاي وينهم عنك ..
عناد :هههههههههههاي هم ترى دايم يطلبوني ويقولون ياعناد بس ارفض خبرك أنا خلقه خقه اصير ممثل ..
ثامر ياكل شوكولا ويضحك: ياملحك ياخويي العزيز ..
عناد:لاداعي للاحراج يالخوي..
ثامر: من واجبنا هق هق ..
كلموا وهم يمشون عناد: خل نروح للبحيرة ..
ثامر: قدااام ..
.
.
.
بعد عده اسابيع ..
.
.
.
بريطانيا..
كان فارس يكتب رسالته للماجستير ..
ساره: ها حبيبي ..
فارس يأخذ منها الكوب: يعطيك العافية حبيتي ..
ساره:الله يعافيك .. ها قربت تخلص..
فارس يأخذ نفس : قربت آخرها بكتب الحين كلمه الشكر ..
ساره تناظره وهو كاتبها على مسوده خاصه وباين عليه مهموم من المناقشة ..
ترك الجهاز وحط راسه على صدرها: متوتر..
احتوته :حبيبي أنت ..
حطت راسه على فخوذها وهي ماسكه يدينه اللي تعوره من الكتابة على الورد وتسوي ليدينه مساج لاجل ترتخي اعصاب يدينه .. غفى وكملت مساج لها وتدعي الله يوفقه ..
.
.
.
الرياض..
شقه فهاد ..
فهاد يفتح الباب ووقف من الصدمة ..وهو يناظر جد صفا وأبوها..
ابتسم جده: ماراح تقلطنا..
فهاد ابتسم بتوتر من شاف عمه: لا .. تفضلوا..
دخلهم للصالة بما انهم وحدهم .. ونادى صفا ..
من شافت أبوها رجعت بخوف بسرعة للغرفة..
قام فهاد :عن اذنكم ..
مشى فهاد للغرفة..
جد صفا: شوف بنتك من شافتك رجعت لداخل ماخفت الله واتقيته فيها ..
سكت أبو صفا وهو مهوب راضي لاجل يجي يراضي صفا بس جدها اجبره..
بغرفتهم ..
دخل وصك الباب وهو يقربها ويضمها وراسها تحت حلقه:لاتخافين ..
صفا محوطه يدينها بفهاد بقوة وترجف: لا أبوي اعرفه أكيد ناوي يأخذني..
فهاد يضمها أكثر وتالي رفع وجهها بيدينه:قلتها لتس من قبل مايفرقنا غير الموت .. ثقي بكلمه فهاد ..
وعدتـك مايفرقنا لا زمان ولا مكان ..
وعدتـك والعهد يبقـى بعنقـي ليـن تبكيني ..
مسك يدها وطلعوا للصالة سلمت على جدها وابوها بحذر وجلست جنب فهاد ..
جدهم: حنا جايين لاجل نصالح أبو صفا وصفا ..
فهاد ماسك يد صفا وينقل النظر بين جده وعمه ..
فهاد: جد مانرد لك طلب لاكن اشوف نظره بعيون عمي توحي بشي ثاني..
أبو صفا : لا أبغى اصالح بنتي .. منيب طالب منها زيارة لاكن أبغاها تسامحني..
فهاد ناظره : عمي تقل مغصوب على الجية؟
جدهم: فهاد كل شي يجي مع الوقت .. المبادرة جات من عمك وهو جا الليلة وقال تعال معي ياعم لاجل نروح لصفا ..
صفا ناظرت فهاد وتالي تكلمت: يبه أنا موب زعلانة منك بالعكس أنا خايفة أنت تكون زعلان مني.. يبه عمري ماهتنيت بنوم الليل من همومي من كرهك لي..
جدها: ماتخاف ربك اشغلت قلب بنتك ..
أبو صفا : عمي انتظرك بالسيارة ..
جد صفا ناظر زوج بنته وهو يطلع ووقف: أبوتس بيرجع لصوابه.. لاتضيقين صدرتس ..ودعتكم الله ..
طلع من الشقة وصك الباب فهاد ويناظر صفا ..
صفا تأخذ نفس وهي بس تنطق اسمه لانه يشعرها بالامان: فهاد ..

عندما يحبك شخص ما ..
فإنك تشعر بأنه ينطق اسمك بشكل مختلف عن ما ينطقه بقية الناس..
انك تشعر بأن اسمك بأمان في فمه..

فهاد مشى ووقفها وهو يحس بخوف من تصرف عمه المفأجئ ..:قلبه..
صفا: لاجل احس بالامان نطقته ونطقته وحسيت فيه ..
فهاد ابتسم وهو يحتويها: اشرأيك نطلع ..
صفا: احس كلي ارجف وين جوي واطلع..
فهاد يمشي معها لغرفتهم : لاخلي نطلع لاجل ننسى طيحه القلب ذي ولا نرجع الا اخر الليل ..
صفا تناظره:وين نروح؟
فهاد: أي مكان .. تدرين وين خلي نروح للملاهي ونلعب الين نمل..
نست سالفة أبوها وضحكت على خبال زوجها..
فهاد يضحك: آيييه أبي هالضحكه تسلم لي والله .. البسي واحلى دجه..
صفا ضحكت: آوك ..
.
.
.