الجزء الواحد والثلاثون ..
ببيت جد صفا ..
أبوها يستعجلها بالاجابة : ها صفا ؟
مسكت اطراف يد فهاد وهي تنقل النظر بينه وبين أبوها ..حست كل شي حولها ضبابي ماصارت تشوف شي فكت أطراف اصابع فهاد وطاحت .. مسكها خالها بسرعه :صفاااا..
لف فهاد وشالها بسرعة من خالها ..
جدها : بسرعة جيبوا موية باردة ..
خالها ركض لغرفته وجاب عطر قوي ورشة على وجهها الين بدت تفوق شوي شوي ..
صفا كان راسها على رجل فهاد وجسمها الباقي على الكنب ..
جدها :بسم الله عليك ..
ناظرت شوي وكانت نظراتها تايهه .. مسكت كف فهاد ..شوي الين بدت تحس بنفسها واللي حولها .. جلسها فهاد ويده على خصرها : كيفك الحين ؟
صفا كانت دايخه: تمام ..
جدها جلس جنبها : خلوني أنا وفهاد وصفا ..
أبو صفا: بجلس معكم ..
جد صفا بحده: ابغى صفا وفهاد وحدهم ..
طلع الكل .. صفا انحرجت من جدها لان فهاد مافك خصرها وجنبه بجنبها مايفصل بينهم شي ..
جدهم : صعبوا عليك القرار ولاتحملتي ياحبيبة جدك ..
صفا دمعت عيونها ..
جدهم : تبغين أبوك وفهاد ؟
صفا هزت راسها بأييه وهي تمسح دموعها..
جدهم وقف ..
وفتح المجلس ونادى أبو صفا ..: تعال ..
مشى أبو صفا .. وجلس ..
جد صفا: اسمعني ولاتقاطعني .. تبغى مرتك وعيالك ..
أبوصفا: آييه ابغاهم ..
جد صفا: اجل خل صفا ورجلها بحالهم .. ولاتخرب بيت بنتك ..
أبو صفا : لا ..
جد صفا بكلمه صارمة: اجل مالك المرة عندنا ولاعيال ..
أبو صفا: افا ياعم ..
جد صفا: تبغى تفرق بين بنتك ورجلها وتبغاني أعطيك مرتك.. ياولدي مثل ماتبغى لنفسك وتتمنى ارضاه للناس.. وذي بنتك قطعه منك..
فهاد وصفا كانوا ساكتين ويناظرون بعض وتالي ناظروا جدهم ..
أبو صفا كان ساكت ماتكلم لوقت ..: على شرط ترجع معي مها (مرته)الحين ..
جد صفا: ترجع معك .. بس مالك بصفا ورجلها .. وتصفي قلبك ..
نادى بنته : مها .. مـــهــا ..
دخلت ..: سم يبه ..
أبوها: تعالي ترجعين مع رجلك .. عشان عيالك ..
مها : حاضر يبه ..
أبوها: الله يرضى عليك .. ويصلح لك عيالك ..
فهاد وقف: جدي راح نطلع ..
جده ابتسم : ماغير طيحنا قلوبكم .. الله يحفظكم ..
فهاد ابتسم من برى قلبه لان بجد ضايق ..لبست صفا وسلمت على جدها ونظره بعيون ابوها خوفتها ماقربت له ..
فهاد: عن اذنكم ..
مسك يد صفا وطلعوا ..
عند الباب ..
مرة أبوها: انتبه يافهاد لصفا ..
فهاد :من عيوني .. مع السلامة ..
صفا باست امها وطلعت ..
بسيارة فهاد كان يسوق ويده على الدركسون والثانية على القير وكلها ترجف .. كان ضايق ويتخيل لو اختارت صفا ابوها وتركته .. وشو حياته من دونها صحيح ماجلسوا ولا عاشو مع بعض حياة حلوه مثل باقي المتزوجين .. بس يحبها يعشق عنادها وثقتها بنفسها ودلعها وطوالة لسانها وشكلها وكلها .. يحب حكيها لما تحاكيه وتكون مروقةحتى لو هو كلام عادي .. يحب احترامه لنفسها وأخلاقها ..يحب كل كلها ..تنهد وضرب بقوة على الدركسون و ناظرها وباين انها تبكي .. ماتكلم يبي يوصلون شقتهم .. بس مسك كفها ..وتالي حط يده على القير وحرك لما فتحت الاشارة همس :يحلمون ويموتون ولا يقدرون يفرقونا ..
وقف قبال العمارة اللي فيها شقتهم ..طفى السيارة ونزل .. نزلت صفا مسك يدها وطلعوا لشقتهم ..دخلوها فكت غطاها ..لفها فهاد له وضمها: لاتبكين .. مستحيل يفرقونا ..
صفا: لو حطونا ببالهم راح يفرقونا ماتعرف أبوي ..
ضمها أكثر وبكى معها : لامت يفرقونا..
ماينسمع بصالة شقتهم سوى صوت شهقاتهم وبكاهم وخوفهم على حياتهم اللي مابعد يدت اصلن عشان ينهونها..!
.
.
.
ببيت أهل ام عبدالله ..
عبدالله كان جالس مع امه :طلبتك يالغالية ارجعي للبيت..يمه تفرطين ببيتك عشان وحده ماندري عن اصلها من فصلها..
امه: منيب راجعه ..
عبدالله: أفا ..طلبتك يمه..لاتخلين بيتك لها.. يمه تذكري كم تعبتي على هالبيت ولاجله.. والحين بكل بساطة تتركينه ..
امه : وكرامتي..
عبدالله: كرامتك محفوظة ولاعاش من يمسها.. بس ارجعي يمه.. واقولك الليلة تعالي معي للبيت أنا وشهد .. وبكرة أذ تبين اوديك للبيت أوديك من عيوني.. وأذ تبين تجلسين معنا ان ماشالك البيت تشيلك عيوني..
امه سكتت شوي ..
أبوها : صاز ولدتس .. خليتس في بيتس ..
عبدالله : ها يمه تكفين .. شوفي حتى جدي مأيدني .. قومي معي طلبتك ..
أمه : لاجل عيونك ياعبدالله .. والا أبوك مايستاهل..
عبدالله: ياجعلني فدوة عيونك يمه.. ذا بيتك ماتتركينه لكل من هب ودب..
قامت جابت عباتها وأخذت شنطه اليد ولبست ..
أخوها توه داخل : بتروحين ؟
أم عبدالله: بروح الليلة مع ولدي عبدالله وتالي اروح لبيتي ..
أخوها: الله يكملك بعقلك ياوخيتي .. كنت متأكدن ماراح تتركين بيتك وعيالك ..
عبدالله : عن اذنكم ..
سلم على يد جده .. وتالي طلع يشغل السيارة الين تجي امي ..
دق على شهد :هلا شهوده امي راح تجي معي.... تسلمين حبيتي .. آييه جاين بالطريق... اوك سلام ..
شاف امه طالعه من بيت جده فتح لها باب السيارة ركبت سكره وحرك..
.
.
.
ببيت ماجد ..
معياد : يمه باين انك متضايقة حيل ..
امها: مافيني يكود العافية.. ودي اروح معك الليلة ..
معياد ابتسمت: فديت تراب رجولك ان ماشالك البيت تشيلك عيوني.. تدرين ان ضاري دوم يقول جيبي خالتي عندنا .. بس انك ترفضين..وحتى الحين العيال لما تجين راح يفرحون ..
امها ابتسمت ..
دقت على ضاري يمرهم وقال لها يجهزون لانه قريب اصلن ..
قامت معياد لمت أغراض امها ولسبت امها العباية :ي الله يمه ..
امها: لميتي كل أغراضي..
معياد : أييه يمه هذي هي بالشنطه ..
عطت امها عكازها وشالت أغراض امها وطلعوا من الغرفة ..
وتين ركضت لجدتها : وووووين ترروحين ..؟
جدتها: بروح مع عمتك ..
طلعت وجدان من غرفتها وكانت توها صاحية من نامت الظهر .. سلمت على معياد : على وين؟
معياد : بأخذ امي تجلس معي مشتاقه له أنا والعيال وضاري ..
وجدان ابتسمت ..
أم ماجد: مع السلامة..
وجدان: بحفظ الله ..
طلعوا وانصك الباب ..
وجدان تربط شعرها: فكه روحه من غير رجعه .. الحين بأخذ راحتي ببيتي ..
.
.
.
ببيت طلال..
كانت وجن مع أخوها فواز بالصالة وولدها وصدرها ضايق على متعب اللي مايرد ..
فواز : متعب أكيد راح لربعه ..
وجن : بس يرد علينا..
فواز : ماراح يرد .. متعب يبيها من الله .. خليها يفلها مع ربعه..
وجن: طيب يفلها بس يطمنا عليه ..الله يهديه ..
فواز وقف: وجن وين السواق ؟
وجن : أكيد تلاقيه بالملحق ..ليه ؟
فواز: عادي بطلع بروح أنا وعزوز نروح نشتري اشرطة سوني
وتالي نمر البقالة ..
وجن: آييه حبيبي براحتك .. تبي فلوس..
حك راسه ..
وجن ابتسمت وفتحت البوك : بلاستشين 3 ..
فواز: آييه بس عندي ميتين ..
عطته 250 له و50 ريال لولدها ..
فواز: ليه 250 عندي 200 ؟
وجن ابتسمت: ماعليك ماراح تقصر عليك يمكن تحتاجها ..
عطاها 50 : خلاص خلي حقه عزوز وبجيب له ..
وجن: لا حبيبي خلها عندك ماتعرف عزوز لما يروح للبقالة بثر ..
ضحك فواز وشال ولد أخته ..
وجن: فواز نزله ثقيل عليك اسم الله عليه ..
فواز ضحك : كأنك تتطنزين علي ترى ..
ضحكت على اخوها ..وولدها اللي فرحان بالطلعه ..
طلعوا : حافظكم اللي عينه ماتنام ..
رجعت تدق على متعب مارد ..
طلعت لغرفتها ومعها الشنطه ونادت الشغالة ترتب ملابس فواز ومتعب وكتبهم بغرفتهم .. كانت تناظر بصورة طلال : ارجع الله يخليك وحششتني كثثييير ..
كَمْ لكْ [ مسآفر ] .. ارْجَع الله يخلّيكْ
ملّيت احاتي رجْعِتك .. والوِطَنْ مَل..!
إما تجِي ....\ والا أنَا بُكْره .. آجِيكْ
ياخي بَمُوت مْن الوَلَه : شُوف لِي حَل..!
.
.
.
ببيت أهل شهد ..
كانت شهد تسولف مع عمتها وريما وتالي قامت لما ناداها عبدالله ..
شهد: هلا ..
عبدالله : كيف امي الحين ..
شهد: تمام ..
حطت كفها على خده بصوتها الهادي الممتلئ كله حنان : لاتتضايق ..
عبدالله : خليها على الله .. بالليل راح اسولف لك عن اللي صار.. شي ياشهد غريب ..
شهد:اوك .. عمي عناد وينه ؟
عبدالله :بالمجلس..
شهد: تعال نروح له ..
مشوا له ..
وقف عناد : شهوده نادي ريما..
شهد: لاتفكر راح تجلس معنا وتتعشى..
عناد : وقت ثاني عندي رحله داخلية الساعة 12 ..وخبرك لازم اكون متواجد قبلها بوقت ..
شهد: أذ كذا مااقدر اقول شي بس راح توعدني تجي ..
عناد: من عيوني اجي لك ..
شهد: تسلم عيونك ..
مشت وقالت لريما .. وشوي راحوا ..
جلس عبدالله مع امه وشهد شوي وتالي اذن للعشا ..وقام يصلي..وشهد علمت عمتها على القبله عشان تصلي وفرشت لها السجادة ..
عمتها: ارتاحي يابنتي ..
شهد ابتسمت: لا عادي عمتي ..
بدت عمتها بالصلاة وتركتها شهد وراحت تصلي العشاء وتالي تسوي العشا ..
.
.
.
ببيت ماجد ..
ماجد بعصبيه : أمي ماطلعت من بيتي الا وسمعت الهواش اللي صار ببينا .. ماتدرين أنك لاحشمتي أمي واحترمتيها احترمك وأعزك زود.. بس تأكدي أن بتصرفاتك ذي ماعاد لك بالقلب قيمه وقدر..
وجدان خافت من عصبيه ماجد ..
دخلت بنتهم الغرفة وشافت وجدان قاعده على طرف السرير وماجد كان على الطرف الثاني وحاط يدينه على أطراف راسه .. لف راسه لما شاف بنته :تعالي بابا ..
مشت لابوها ..
جلسها بحضنه : شفيك الدمعه بعيونك ؟
وتين عمرها ثلاث سنوات بس تتكلم بطلاقة وتزنن : ليه تهاوش ماما؟
ماجد وهو يلمس شعر بنته بحنان: لا بابا ماتنهاوش .. صح وجدان ..
وجدان ماردت..
ماجد بطولة بال: وجدان ..
وجدان بقهر: آييه ..
ماجد نزل بنته : بروح بابا اصلي وتالي أجي اخذك ونمر بيت عمه معياد نشوف جده طيب..
وتين: تيبب..
باس بنته : خلي الشغالة تلبسك واجي الاقيك جاهزه ..
وجدان لفت بعصبيه : حلوه خلي الشغالة تلبسك .. وانا وين رحت ؟
ماجد :وتين روحي بابا جيبي لي كأس موية بسرعة ..
طلعت وتين تركض ..
ماجد مشى وقرب لـ وجدان: ماانصحك تعقدين الامور قدام وتين.. لاتخربين نظرتها لحياتنا ..
مشى ولبس شماغه ..دخلت وتين ومعاها كأس ماي :حبيبة بابا ربي يسقيك من نهر الكوثر من يد النبي صلى الله عليه وسلم ..
ناظرت ابوها وابتسمت ماعرفت وش تقول ..
ماجد ابتسم ودنق وهو يبوسها : قووووولي آمييين ..
وتين : آمييييييين ..
ماجد : بوسي بابا بقووووووة ..
مسكت أبوها من رقبته ودلت يدينها وباسته بقوة ..ضحك ماجد من قلبه على بوسة بنته .. ونزلها وطلع ..
وتين : ماما ابي اروح مع بابا لبسيني ..
وجدان: روحي عني خلي الشغالة تلبسك ..
نادت الشغالة وجات : لبسي وتين ..
أخذت الشغالة وتين وطلعت لغرفه وتين تلبسها ..
.
.
.
صلى عبدالله بالمسجد القريب من بيت اهله عشان يقابل أبوه .. خلصت الصلاة ومشى معه عبدالله للبيت ..
عبدالله: خل نروح للمجلس..
أبوه: ورى ؟
عبدالله : أبغى اتكلم معك براحتي ..
مشى وفتح المجلس وصكه وراه ..
عبدالله جلس مقابل لابوه : يبه .. امي الحين عندي بالبيت وولاهنت أبيك بكرة تجي وتراضيها ..
أبوه :لا .. أمك طلعت وحدها ترجع وحدها ..
عبدالله : يبه الله يهديك انت اللي غلطت وتزوجت عليها .. وهي زوجتك وام عيالك ولكم مع بعض فوق 30 سنة .. احترم هالعشره واللي بينكم طوال هالسنين واحترم امي ..
أبوه سكت ..
عبدالله : أول مره اطلبك يبه .. لبى هالطلب .. مهيب حلوه لا بحقك ولابحق امي يكون كلن منكم ببيت ..
أبوه : مفروض امك ماتطلع ..والشرع محلل لي اربع ..
عبدالله : محلل اربع ماقلنا شي .. لكن استأجر لزوجتك الجديدة بيت وحدها .. وبصراحه غلطه عمر تجيبها للبيت زين ماذبحتها العنود او فواز ومتعب ..
أبوه: بشوف ..
عبدالله مسك لحيه أبوه اللي ملاها الشيب ومغطيها بالحنا : طلبتك ..
ابوه : مالك الا طيبه الخاطر بكرة بجي لكن لاترفض امك ..
عبدالله ابتسم براحه ووقف: لاتوصي .. بس بمرك الصباح ..
ابوه: خلاص..
عبدالله سلم على راسه : تصبح على خير ..
أبوه: وأنت من اهله ..
طلع عبدالله من بيت اهله وهو مرتاح نسبينا لاجل انه ابوه وافق وامه بعد..
.
.
|