"مواثيق الغلا"
كتبتك داخل أوراقي .. حفظتك صفحة بكتاب
لقيتك هاجس افكاري .. مسافاتك عناويني
أبيك لرحلتي ميناء .. أبيك لدمعي الأهداب
أبيك اول مسافه للخيال وغربة سنيني
أبيك الحلم لايامي .. أبيك الشوق والإعجاب
أبيك النبض باعماقي .. أبيك الشوف في عيني
أبيك لفكرتي هاجس .. أبيك النافذه والباب
أبيك النور لحروفي .. أبيك أجمل مضاميني
أبيك السيف لانصافي .. أبيك الرمح والمحراب
أبيك اطهر شعور يحتوي طبعي وتكويني
أبيك الغيم والبارق .. أبيك الورد والأطياب
أبيك الريح لاهبت .. أبيك الديم يسقيني
أبيك لصبري الهقوه .. أبيك لعبرتي طلاب
أبيك لفرحتي بسمه .. أبي للضحك تغريني
أبيك برعشة أحساسي شعور الخافق المرتاب
مادام اصدق مواثيق الغلا مابينك وبيني
ألا يا اول مشاويري حضورك ماوراه غياب
غيابك لا تذكرته أحس الموت يدعيني
من اول يوم باقداري تمنيتك غلا وعتاب
ومات الحلم في قلبي ولابه من يعزيني
ترى لو صورتك غابت ملامح طيفها ماغاب
بقايا قصة الماضي على الفرقا تواسيني
دخيلك مابقى غير الوداع وشرهة الاحباب
دخيلك مابقى خطوه على دربك توديني
قبل مااقرا تفاصيل الغياب وخافي الأسباب
تأمل هالسطور اللي تجسد كل مافيني
|