منتديات قصايد ليل - عرض مشاركة واحدة - ديوان لا وقت للأشواق

08-09-2011

يا طير لا تبني على غصنهم عِـشّ
أتعبت عمرك وأنت تجمع لك أقشاش

باكر تبي تندم علـى جمعـة القـشّ
أنحش مدامك تقدر اليـوم تنحـاش

إبعد عن اللي ناهش ٍ عرضنا نهـشّ
إبعد عن اللي قربهم صايـر ٍ مـاش

أهل الحسد والحقد والكذب والغـشّ
لا عاش قرب ٍ يتعب النفس لا عاش

أطيبهم اللي لا تقفّيـت بـك حـشّ
غشاش في دنياه وإن مات غشـاش

في حضرتك من طيب الورد لك رشّ
في حضرتك ما حش لو كان حشّاش

والعود فيهم عظمـه البالـي الهـشّ
معدوده أيامه على وقـت الأقـراش

أكثر علومه صادرات ٍ مـن الـدشّ
إمتابع ٍ ل( الزير ) مع طاش ما طاش

مع أم كلثـوم ٍ ونجـوى والأطـرشّ
يهز راسه كن صايبه هـش هـاش

عقله عقل طفل ٍ مغربـل ومنطـشّ
اللي يحسّب جمرة السمر فش فـاش

يا طير روّح قِدم تصبح بـلا عـشّ
ولا ّ بعد بكـره نشيلـك بالأنعـاش

وأن كنت باقي جهّز اليوم لك نعـش
ما ظن تسلم دام جـاورت ألوحـاش
النرجسيه